Yãmb sɩd tẽeda koe-noogã bɩ?
Yãmb sɩd tẽeda koe-noogã bɩ?
“Wẽnnaam soolem kolgame. Bɩ y tek yam n bas y yel-wẽna n tẽ koe-noogo.”—MARK 1:15.
1, 2. Wãn to la y na n bilgẽ Mark 1:14, 15 võore?
RA YAA yʋʋmd 30 wã sasa. A Zezi Kirist ra sɩnga a koe-mooneg kãsengã Galile soolmẽ wã. A ra moonda “Wẽnnaam koe-noogo,” t’a goama sɩd tall pãng sõma ne Galile neb wʋsgo. A yeelame tɩ: “Wakat taame, la Wẽnnaam soolem kolgame. Bɩ y tek yam n bas y yel-wẽna n tẽ koe-noogo.”—Mark 1:14, 15.
2 ‘Wakat ra taame’ t’a Zezi na n sɩng a koe-moonegã, la ne nebã wakat taame tɩ b segd n dɩk sard sẽn na n kɩt tɩ b ta Wẽnnaam yam. (Luk 12:54-56) ‘Wẽnnaam soolem da kolgame,’ bala a Zezi sẽn yaa Rĩm ning b sẽn yãkã ra bee ne-ba. A koe-moonegã kɩtame tɩ sũ-tɩrs rãmbã tek yam n kos sugri. La wãn to la bãmb ne tõnd me wilg tɩ d ‘tẽeda koe-noogã’?
3. Nebã maana bõe n wilg tɩ b tẽeda koe-noogã?
3 Wa a Zezi, tʋm-tʋmd a Pɩɛɛr me sagla nebã tɩ b tek yam n kos sugri. A Pɩɛɛr goma ne Zʋɩf rãmb nins sẽn da be Zerizalɛm yʋʋmd 33 Pãntekotã raarã n yeele: “Bɩ y tek yam n kos sugri tɩ y ned kam fãa sak koom lisgu ne a Zezi Kirist yʋʋre y yel-wẽna sugr yĩnga; la y reeg Wẽnnaam kũuna sẽn yaa Sɩɩg Sõngã.” Neb tusa n tek yam n kos sugr n deeg lisgu, n lebg a Zezi karen-biisi. (Tʋʋma 2:38, 41; 4:4) Yʋʋmd 36, Buzẽms neb nins sẽn tek yam n kos sugrã maana woto. (Tʋʋma 10:1-48) Tõnd wakatã, neb tusa sẽn tẽed koe-noogã tekda yam n kot sugr b yel-wẽna yĩnga, n dɩkd b mens n kõt Wẽnnaam n deegd lisgu. B saka fãagrã koe-noog n wilgdẽ tɩ b tẽeda a Zezi maoongã sẽn yaa rondã. Sẽn paase, b tũuda tɩrlem n yãk yam n zĩnd Wẽnnaam soolmã poorẽ wã yĩnga.
4. Tẽeb yaa bõe?
4 La tẽeb yaa bõe? Tʋm-tʋmd a Poll gʋlsame: “Tẽeb n kɩtd tɩ d saagd bõn-sõma paoongo la a kõt kaset tɩ bũmb n be n zʋʋg nif sẽn ne bala.” (Hebre dãmba 11:1, Sebr Sõngo) Tõnd tẽebã kɩtdame tɩ d kɩs sɩd tɩ bũmb nins fãa Wẽnnaam sẽn kãab a Gomdã pʋgẽ wã yaa wa sẽn zoe n pids bala. Yaa wa d sẽn na n tar sebr sẽn wilgd tɩ d soo bũmbu. Tẽeb leb n yaa “kaset” bɩ yel-vẽenes d sẽn tar n na n tẽ yɛl d sẽn pa ne. Tõnd yam vẽenemã la d sũurã sẽn pid ne mi-beoogã kõt-d-la bas-m-yam tɩ bõn-kãens yaa yel-sɩda, baa ne d sẽn pa ne-bã.—2 Korẽnt dãmba 5:7; Efɛɛz rãmba 1:18.
Tẽeb yaa tɩlae ne-do!
5. Bõe yĩng tɩ tẽeb tar yõod wʋsg woto?
5 Tõnd rogda ne tẽeb tʋlsem la d pa rogd ne tẽeb ye. Sɩda, pa neba “fãa n tar tẽeb ye.” (2 Tesalonik rãmba 3:2) La kiris-nebã segd n talla tẽeb n tõog n paam pʋɩɩr ne Wẽnnaam kãabsã. (Hebre dãmba 6:12) A Poll goma tẽeb mak-sõma yell n yaool n gʋls tɩ: “Woto yĩnga, tõnd me sẽn tar kaset dãmb wʋsg sẽn gũbg tõndã, bɩ tõnd bas zɩɩb fãa la yel-wẽna sẽn gɩdgd tõnd naana wã, la d zoe zoees ninga sẽn be tõnd taoorã n da yɛ ye. Bɩ tõnd ges a Zezi sẽn yaa tõnd tẽeb sɩngda la a taasda.” (Hebre dãmba 12:1, 2) “Yel-wẽna sẽn gɩdgd tõnd naana wã” yaa bõe? Yaa tẽeb kaalem, bɩ tẽeb basg mengã. D sã n dat n ket n tar tẽeb sẽn tar pãnga, d segd n ‘gesa a Zezi neer’ la d rɩk a togs-n-taare. D leb n segd n zãgsa raglem tʋʋma, n zab ne yĩngã ratem tʋʋma, la d zãag d mens ne laog nonglem, dũniyã filozofi rãmba, la rog-n-migs sẽn kɩɩsd Gʋlsg Sõamyã. (Galat dãmba 5:19-21; Kolos rãmba 2:8; 1 Tɩmote 6:9, 10; Ziid 3, 4) Sẽn paase, d segd n tẽeme tɩ Wẽnnaam bee ne-do la t’a Gomdã sagls tũub sɩd nafdame.
6, 7. Bõe yĩng tɩ zems tɩ d pʋʋs n kos tẽebo?
6 D pa tõe n paam tẽeb ne d meng raab bal ye. Tẽebã yaa Wẽnnaam vʋʋsem sõngã bɩ a pãn-tʋmdgã bil a ye. (Galat dãmba 5:22, 23) La d na n maana wãna, tõnd tẽebã sã n wa rat paasgo? A Zezi yeelame: “A sã n yaa woto tɩ yãmb . . . bãng tɩ kõ yãmb kamba kũun sẽn yaa sõama; dẽ, sẽn yɩɩda yãmb arzãn Ba kõn kõ neb nins sẽn kot bãmba Sɩɩg Sõng bɩ?” (Luk 11:13) N-ye, bɩ d pʋʋs n kos vʋʋsem sõngã, bala a tõe n kɩtame tɩ d tall tẽeb ning sẽn yaa tɩlae ne-dã n tõog n maan Wẽnnaam daabã, baa yel-tood pʋsẽ.—Efɛɛz rãmba 3:20.
7 Zemsame tɩ d pʋʋs n kos tẽeb n paase. A Zezi sẽn da rat n dig zĩn t’a yi n bas biribla, biriblã ba bõosame: “Mam tẽedame, bɩ y paas mam tẽeba t’a paoodame.” (Mark 9:24) “Bɩ y paas tõnd tẽebo.” Woto la a Zezi karen-biisã yeel-yã. (Luk 17:5) Woto, bɩ d pʋʋs n kos tẽeb n paase, n mi vẽeneg tɩ Wẽnnaam reegda pʋʋs-kãensã buudu.—1 Zã 5:14.
Wẽnnaam Gomdã tẽeb yaa tɩlae
8. Wãn to la tẽeb ne Wẽnnaam Gomdã tõe n sõng tõndo?
8 A Zezi sẽn na n ki tɩ yɩ maoongã ket bilfu, a yeela a karen-biisã woto: “Da sak-y tɩ yãmb sũyã sãam ye. Bɩ y tẽ Wẽnnaam, la bɩ y tẽ maam me.” (Zã 14:1) D sẽn yaa kiris-nebã, d tẽeda Wẽnnaam la a Biriblã. La sã n yaa ne Wẽnnaam Gomdã yẽ? A tõe n kõ-d-la pãng wʋsg tɩ d maan sẽn yaa neer d vɩɩmã pʋgẽ, la yaa d sẽn na n zãms-a la d tũ sagls la sor-wilgr sẽn yaa sõma a sẽn kõt-dã ne kɩs-sɩda.—Hebre dãmba 4:12.
9, 10. Bũmb ning b sẽn togs Zak 1:5-8 pʋgẽ tẽeba wɛɛngẽ wã võor yaa bõe?
9 Tõnd sẽn yaa neb sẽn pa zems zãngã, d vɩɩmã pida ne zu-loeese. La d sã n tẽed Wẽnnaam Gomdã sɩd tõe n sõng-d lame. (Zoob 14:1) D rɩk makr ne tõnd sẽn na n pa mi d sẽn na n mao to-to ne zu-loɛɛg ye. Wẽnnaam Gomdã kõta tõnd sagl-kãngã: “Ned sã n be yãmb sʋk t’a yam paoodẽ, bɩ a kos Wẽnnaam sẽn kõt neba fãa ne yamleoog n ka lengdẽ wã, la a na paam. La bɩ a kos ne tẽebo la a ra sãmb ye, tɩ bõe, ned ninga sẽn sãmbda, a wẽnda ko-pɛma sobg sẽn pengda t’a lengdẽ. Bɩ ada soaba ra tags t’a na n deega bũmb Zusoaba nengẽ ye. Yẽ yaa yam a yiib soaba sẽn yuusd ne a yɛla fãa.”—Zak 1:5-8.
10 Tõnd sã n pʋʋsd Wẽnnaam a Zeova n kot yam, a pa na n zab-d rẽ yĩng ye. A pʋs n na n sõng-d lame tɩ d tall tagsg sẽn zems ne makrã. D tẽed-n-taasa bɩ d meng Biibl zãmsgã tõe n tẽega tõnd verse rãmb sẽn tõe n sõng-do. A Zeova vʋʋsem sõngã leb n tõe n wilga tõnd sor ne manesem zẽnga. Tõnd saasẽ Ba wã na n kõo tõnd yam tɩ d mao ne makrã, d sã n ket n ‘kot-a ne tẽeb n ka sãmbdẽ ye.’ La tõnd sã n yaa wa mogr ko-pɛm sebg sẽn lengde, bɩ d ra tẽ tɩ d na n paama bũmb Wẽnnaam nengẽ ye. Bõe yĩnga? Bala rẽ wilgdame tɩ d yama yuusdame la d pa tar kɩs-sɩd ne d pʋʋsgã bɩ yɛl a taab pʋgẽ ye. La tõe tɩ yaa woto meng ne d tẽebã. Woto kɩtame tɩ d segd n tall tẽeb sẽn yaa kãn-kãe ne Wẽnnaam Gomdã la ne sor-wilgr ning a sẽn kõtã. Bɩ d ges makr a wãn ne a sẽn sõngd tõnd la a wilgd-d sor to-to.
Tẽebã, la noorã rɩɩbo
11. Tẽeb ne Wẽnnaam Gomdã kõta tõnd bas-m-yam bʋg d daar fãa bõn-datmã wɛɛngẽ?
11 La yaa wãn to masã, tõnd sã n namsd rɩɩb kaalem bɩ naong yĩnga? Wẽnnaam Gomdã tẽeb kõta tõnd bas-m-yam t’a Zeova na n gesa d daar fãa bõn-datmã yelle, la tɩ dũni paalgã pʋgẽ a na n kõo neb nins fãa sẽn nong-a wã rɩɩb tɩ gale. (Yɩɩl Sõamyã 72:16; Luk 11:2, 3) D sã n tags a Zeova sẽn dɩlg a no-rɛɛs a Eli to-to kom wakatã, tõe n kenga d pɛlga. Rẽ poore, Wẽnnaam maana yel-solemd n kõ zom ne kaam tɩ pag ne a biribla, ne a Eli rɩ n pa ki kom ye. (1 Rĩm dãmba 17:2-16) A Zeova rɩlga no-rɛɛs a Zeremi me, Babilon sẽn da wa n gũbg Zerizalɛm n na n zab ne-a wã. (Zeremi 37:21) Baa ne a Zeremi la a Elize sẽn da pa tar dɩɩb wʋsg n na n dɩ wã, a Zeova gesa b yelle. Rũndã-rũndã, a geta neb nins sẽn wilgd tɩ b tẽed-a lame wã yell woto.—Matɩe 6:11, 25-34.
12. Wãn to la tẽeb sõngd tɩ ned paam a noor dɩɩbo?
12 Tẽeb sẽn naag ne Biiblã noy tũubã pa na n kɩt tɩ d yɩ arzɛgs rãmb ye, la rẽ na n sõng-d lame tɩ d paam d noor dɩɩbo. D rɩk makre: Biiblã sagenda tõnd tɩ d yɩ pʋ-peelem dãmba, neb sẽn mi b tʋʋm sõma, la d ra yɩ kʋɩɩmb ye. (Yelbũna 22:29; Koɛɛg Soaba 5:18, 19; 2 Korẽnt dãmba 8:21) D segd n gesame tɩ tara yõod wʋsg tɩ d yɩ tʋm-tʋmd sẽn tar yʋ-noogo. Baa zĩis nins tʋʋm sẽn yaood sõma yãab sẽn yaa toogã, pʋ-peelem dãmb nins sẽn tʋmd neer la wʋsgã n ket n paamd yaood n são b taabã. Baa ne tʋm-tʋmd-kãens buudã nus sẽn pa zãad wʋsgã, b nong n paamda sẽn yaa tɩlae ne b vɩɩmã, n paamd b noor dɩɩb b toore.—2 Tesalonik rãmba 3:11, 12.
Tẽeb sõng-d lame tɩ d mao ne d ned kaalem sẽn wat ne sũ-sãang ningã
13, 14. Wãn to la tẽebã sõngd tõnd tɩ d mao ne d nin-nongr kaalem sẽn wat ne sũ-sãang ningã?
13 Wẽnnaam Gomdã wilgdame tɩ d nin-nongr sã n ki, d sũura sã n sãam yaa bũmb sẽn zemse. Zak soab sẽn tar kɩs-sɩd a Abraham yãba a pʋg-nongr a Saarã kũumẽ wã. (Sɩngre 23:2) A Davɩɩd sũura sãama wʋsgo, a sẽn wʋm t’a biribl a Absalom kiime wã. (2 Sãmwɛll 18:33) Baa a Zezi meng sẽn da yaa rao sẽn zems zãngã, a zoa a Lazaar sẽn wa n ki wã a yãbame. (Zã 11:35, 36) Tõnd nin-nongr sã n ki, tõe n kõ-d-la sũ-sãang kãsenga, la d sã n tar tẽeb ne Wẽnnaam kãabsã, tõe n sõng-d lame tɩ d mao ne sũ-sãangã.
14 A Poll yeelame: ‘Mam tara saagr ne Wẽnnaam, tɩ nin-tɩrsã la sẽn pa-b nin-tɩrsã vʋʋgr na n zĩndame.’ (Tʋʋma 24:15, NW ) D segd n talla tẽeb tɩ Wẽnnaam na n vʋʋga neb wʋsgo. (Zã 5:28, 29) A Abraham ne a Saara, a Izaak ne a Rebeka, a Zakoob ne a Lea bee nin-kãens fãa sʋka. Bãmba fãa sẽn gãe tẽngã gũuda b vʋʋgr Wẽnnaam dũni paalgã pʋgẽ. (Sɩngre 49:29-32) Ad sɩd na n yɩɩ sũ-noog menga, d sẽn nong-b rãmbã sã n wa vʋʋg n na n vɩɩmd tẽng zug ka! (Wilgri 20:11-15) Nananda, tẽebã pa na n kɩt tɩ d sũ-sãangã sa fasɩ ye, la a na n kell n pẽnega tõnd ne Wẽnnaam sẽn sõngd tõnd tɩ d mao ne d sũ-sãoongã.—Yɩɩl Sõamyã 121:1-3; 2 Korẽnt dãmba 1:3.
Tẽeb kõta yam-ka-m-meng rãmba pãnga
15, 16. a) Bõe yĩng tɩ d tõe n yeel tɩ yam-ka-m-mengã sã n paam sẽn tar-b tẽebã menga, pa lingri? b) Bõe la d tõe n maan n mao ne yam-ka-m-menga?
15 Wẽnnaam Gomdã wilgdame tɩ yam-ka-m-meng tõe n paama baa neb nins sẽn tar tẽebã. A Zoob mak-toaagã sasa, a tagsame tɩ Wẽnnaam da bas-a lame. (Zoob 29:2-5) Zerizalɛm ne a lalsã sẽn da lebg raboogã kɩtame t’a Nehemi sũur sãame. (Nehemi 2:1-3) A Pɩɛɛr da komsa raood wʋsg a sẽn wa n kɩɩs t’a pa mi a Zezi wã hal t’a “yãb ne sũ-sãoong wʋsgo.” (Luk 22:62) A Poll me sagla a tẽed-n-taasã sẽn be Tesalonik tigingẽ wã tɩ b “bels sũ-sãoong rãmbã.” (1 Tesalonik rãmba 5:14) Woto yĩnga, pa lingr tɩ yam-ka-m-meng paam neb nins sẽn sɩd yaa tẽedb rũndã-rũndã wã me ye. La bõe la d tõe n maan n mao ne yam-ka-m-mengã?
16 Yam-ka-m-meng tõe n paama tõndo, d sã n wa maood ne zu-loe-kãsemse. D pa segd n fãoog zu-loeesã fãa n ges-b wa zu-loe-yɛng sẽn yɩɩd d pãng ye. Tõeeme tɩ d sã n tũ Biiblã noyã, bɩ d tõog n welg-b yembr-yembre. Rẽ tõe n sõngame tɩ d yam-ka-m-mengã booge. D sã n tʋmdẽ la d vʋʋsd wa sẽn segde, rẽ me tõe n kõo yolsgo. Bũmb sẽn be bala, tẽeb tallg ne Wẽnnaam la ne a Gomdã na n sõnga tõnd tɩ d tẽebã tall pãngã, bala a kɩtdame tɩ d kɩs sɩd tɩ Wẽnnaam sɩd geta d yelle.
17. Wãn to la d mi t’a Zeova geta d yelle?
17 A Pɩɛɛr yeela woto tɩ kõt tõnd belsg la bas-m-yam: “Bɩ y sik yãmb mens Wẽnnaam sẽn yaa pãng soaba taoore, tɩ wakat sã n ta bãmb na zẽk yãmba. Bɩ y bas yãmb yɩɩra fãa ne bãmba; tɩ bõe, bãmb menga geta yãmb yelle.” (1 Pɩɛɛr 5:6, 7) Yɩɩl gʋlsdã yɩɩlame: “Zusoaba kokda neb nins fãa sẽn dat n lʋɩ wã, la bãmb doosda neb nins fãa sẽn kɩllã.” (Yɩɩl Sõamyã 145:14) D segdame n tẽ gom-kãensã sẽn kõt bas-m-yamã, bala b yita Wẽnnaam Gomdẽ wã. Yam-ka-m-mengã tõe n ket n beeme, la baasgo, ad sɩd kengda tẽebo, d sẽn mi tɩ d tõe n dɩka d yɩɩrã fãa n bas ne d saasẽ Ba wã sẽn tar nonglmã!
Tẽebã, la makr a taaba
18, 19. Wãn to la tẽebã sõngd tõnd tɩ d mao ne bãas la d kõ d tẽed-n-taas nins sẽn bẽedã belsgo?
18 Tõnd nin-nongr sã n wa namsd ne bã-kɛgenga, tõe n yɩɩ mak-kãseng n kõ tõnd tẽebã. Baa ne Biiblã sẽn pa wilg tɩ b maana yel-solemd n sãoog kiris-neb wala a Epafordit, a Tɩmote la a Torfima, sãmbg kae t’a Zeova sõng-b lame tɩ b mao ne b toogã ye. (Filip rãmba 2:25-30; 1 Tɩmote 5:23; 2 Tɩmote 4:20) Sẽn paase, sẽn tɩ loe ne ‘ned ninga sẽn tagsd pãn-komsem dãmba yelle,’ yɩɩl gʋlsdã yɩɩlame: “Zusoaba kogenda yẽnda a sẽn ka laafɩ wakate, la yẽ paamda yãmb belsg wakat fãa yẽ sẽn gãe a gãagẽ a toog pʋgẽ wã.” (Yɩɩl Sõamyã 41:2-4) Wãn to la yɩɩl gʋlsdã goam sõngd tõnd tɩ d bels tẽedb nins sẽn bẽedã?
19 Manesem a ye d sẽn tõe n tũnug ne n kõ sõngr tẽebã wɛɛngẽ yaa d sẽn na n pʋʋs ne bãad dãmbã, la d pʋʋs b yĩnga. Rũndã-rũndã d pa kot Wẽnnaam t’a maag bãasã ne yel-solemd ye. La d tõe n kos-a lame t’a keng bãad dãmbã pels tɩ b mao ne b bãasã, la t’a paas b pãngã tẽebã wɛɛngẽ tɩ b tõog n mao ne wakat tood kãensã. A Zeova na n sõng-b lame, la b tẽebã na n paasame, b sã n ges beoog-daar ning sẽn wat tɩ ‘tẽngã ned ba a ye ka na n le yeel t’a ka laafɩ wã.’ (Ezai 33:24) Ad sɩd kõta belsg tɩ d bãng tɩ ne a Zezi Kirist sẽn vʋʋgã maasem, la ne Wẽnnaam Rĩungã maasem yĩnga, ãdem-biis nins sẽn yaa sakdbã na n paama yolsg wakat fãa yĩng ne yel-wẽnã, bãasã la kũumã! Bõn-kãsems kãensã d sẽn gẽegda yĩnga, d pʋʋsda a Zeova bark a ‘sẽn na n maag tõnd bãasã fãa wã.’—Yɩɩl Sõamyã 103:1-3; Wilgri 21:1-5.
20. Bõe yĩng tɩ d tõe n yeel tɩ tẽebã tõe n sõng-d lame tɩ d mao ne kʋʋlmã ‘wakat toodã’?
20 Tẽebã tõe n sõnga tõnd me tɩ d mao ne kʋʋlmã ‘toog wakat’ d laafɩ wã ne d pãngã sẽn wat n boogdẽ wã. (Koɛɛg Soaba 12:1-7) Woto yĩnga, tõnd sʋkã neb nins sẽn kʋʋlã tõe n pʋʋsa wa yɩɩl gʋlsdã sẽn yɩɩl woto a kʋʋlem wakatã: “Zusoaba sẽn yaa mam soaala . . . Da bas-y maam m kʋʋlem wakat ye. Mam pãng sã n sɛ, bɩ y ra bas maam ye.” (Yɩɩl Sõamyã 71:5, 9) Yɩɩl gʋlsdã yãame t’a rata a Zeova sõngre. Yaa woto me ne tõnd kiris-nin-taas wʋsg sẽn kʋʋl Wẽnnaam tʋʋmdã pʋgẽ wã. B sẽn tar tẽebã yĩnga, b tõe n kɩsa sɩd t’a Zeova sõngrã sẽn be wakat sẽn kõn sa yĩngã na n teel-b lame tɩ sik ka be ye.—Tõodo 33:27.
Kell-y n tall tẽeb ne Wẽnnaam Gomdã
21, 22. Tõnd sã n tar tẽebo, kɩtdame tɩ tõnd zems-n-taar ne Wẽnnaam lebg wãn to?
21 Tẽeb tallg ne koe-noogã la ne Wẽnnaam Gomdã gill sõngda tõnd tɩ d pẽneg a Zeova n paas wakat fãa. (Zak 4:8) Sɩda, a yaa tõnd Soaal la d Naab sẽn-ka-to, la a leb n yaa tõnd Naand la d Ba me. (Ezai 64:7; Matɩe 6:9; Tʋʋma 4:24) Yɩɩll gʋlsda yɩɩlla woto: “Yãmb yaa mam ba la mam Wẽnnaam la mam fãagr pĩig kugri.” (Yɩɩl Sõamyã 89:27) Tõnd sã n wilgdẽ tɩ d tara tẽeb ne a Zeova la ne a Gomdã a sẽn kõ wã, tõnd me tõe n ges-a-la wa d “fãagr pĩig kugri.” Ad woto sɩd yaa waoogr wʋsg n kõ-do!
22 A Zeova yaa kiris-neb nins sẽn paam vʋʋsem sõng pʋgẽ dogmã la b tʋmd-n-taasã sẽn tar tẽng zug vɩɩm saagrã Ba. (Rom dãmba 8:15) La tẽeb tallg ne tõnd saasẽ Ba wã zɩ n wa ne sũ-sãoong ye. A Davɩɩd ra yeela woto: “Mam ba ne m ma sã n bas maam, Zusoaba na n reega maam.” (Yɩɩl Sõamyã 27:10) Sẽn paase, b pʋs n kõ-d-la bas-m-yam woto: “Yaa bãmb yʋ-kãsenga yĩng la Zusoaba ka na n bas bãmb neba ye.”—1 Sãmwɛll 12:22.
23. Bõe la d segd n maan n paam zems-n-taar sẽn kaoosd ne a Zeova?
23 Sẽn na n yɩl n tall zems-n-taar sẽn kaoosd ne a Zeova, yaa vẽeneg tɩ d segd n tẽe koe-noogã la d sak tɩ Gʋlsg Sõamyã sɩd yaa Wẽnnaam Gomde. (1 Tesalonik rãmba 2:13) Tõnd segd n talla tẽeb zãng-zãng ne a Zeova la d bas t’a Gomdã yɩ tõnd sor vẽenem. (Yɩɩl Sõamyã 119:105; Yelbũna 3:5, 6) Tõnd sã n pʋʋsd-a n kɩs sɩd t’a yaa nimbãan-zoeta, fãagd la pɛlg kɛngda, tõnd tẽebã na n paasame.
24. Tags-bʋg sẽn kõt belsg n be Rom dãmba 14:8 pʋgẽ?
24 Tẽebã kɩtame tɩ d rɩk d meng n kõ Wẽnnaam wakat sẽn-kõn-sa yĩnga. D tẽebã sã n tar pãnga, baa d sã n segd n kiime, d ket n ya a sõgen dãmb sẽn dɩk d mens n kõ-a, n saagd n na n vʋʋge. N-ye, “tõnd sã n vɩ walla tõnd sã n ki, tõnd yaa [a Zeova] rẽnda.” (Rom dãmba 14:8) Bɩ d kell n gãd tags-kãngã sẽn kõt belsgã d sũurẽ, la d kell n tall bas-yard ne Wẽnnaam Gomdã, la d ket n tẽed koe-noogã.
Wãn to la y na n leoke?
• Tẽeb yaa bõe, la bõe yĩng t’a yaa tɩlae ne-do?
• Bõe yĩng tɩ yaa tɩlae tɩ d tall tẽeb ne koe-noogã la ne Wẽnnaam Gomdã gilli?
• Wãn to la tẽeb sõngd tõnd tɩ d mao ne makr toɛy-toɛya?
• Bõe n na n sõng tõnd tɩ d kell n tall tẽebo?
[Zãmsgã sogsgã]
[Foto rãmba, seb-neng a 8]
A Zeova sõnga a Zeremi ne a Eli b sẽn da tar tẽebã yĩnga
[Foto rãmba, seb-neng a 9]
A Zoob, a Pɩɛɛr ne a Nehemi talla tẽeb sẽn tar pãngã
[Foto rãmba, seb-neng 11]
Sẽn na yɩl n kell n tall zems-n-taar ne a Zeova, d tog n tẽe koe-noogã