Bõe yĩng tɩ d na n tẽeg Soaalã zaabr dɩɩbo?
Bõe yĩng tɩ d na n tẽeg Soaalã zaabr dɩɩbo?
“Ad m sẽn paam Soaala nengẽ . . . yaa rẽ la m wilgd-y.”—1 KORẼNT DÃMBA 11:23, Sebr Sõngo.
1, 2. Bõe la a Zezi maan yʋʋmd 33 Pakã yʋngo?
A ZEOVA Biribl yendã ra bee be ne a karen-biis 11 wã sẽn ‘pa ne yẽ a makra pʋgẽ n ka basã.’ (Luk 22:28) Ra yaa yʋʋmd 33, tʋʋlg kiuug rasem 31, lamus zaabre, tɩ ra tog n yaa ki-pɛɛlg wakat Zerizalɛm. Ya a Zezi Kirist sẽn nan dɩ Pakã ne a tʋm-tʋmdbã n sa. A yiisa zãmb soab a Zida yɩnga, tɩ kell tʋm-tʋmdb a taabã. Bõe yĩnga? Bala a Zezi ra segendame n na n maan bõn-kãsengã. Ra yaa bõe?
2 Sẽn mik tɩ Evãnzill gʋlsd a Matɩe ra bee be wã yĩnga, bɩ d bas t’a togs-do. A gʋlsame: “A Zezi rɩka buri n ning barka n kao n kõ b karen-biisã n yeele: ‘Bɩ y reeg n dɩ, yõ wã yaa mam yĩnga.’ Bãmb yaool n dɩka bõn-yũudla, la bãmb sẽn ning barka, bãmb kõo bãmba n yeele: ‘Bɩ yãmb fãa yũ. Tɩ bõe, yõ wã yaa mam zɩɩm sẽn yaa kãab paalg zɩɩm sẽn daag neb wʋsg yel-wẽna sugr yĩnga.’ ” (Matɩe 26:26-28) Ra yaa bũmb sẽn maan vugr bal n ye pa na n yɩlem bɩ? A võor da yaa bõe? A tara võor ne tõnd rũndã-rũndã bɩ?
‘Bɩ y ket n maand bõn-kãngã’
3. Bõe yĩng t’a Zezi sẽn maan bũmb ning yʋʋmd 33, Nizã rasem 14 võor yaa kãsenga?
3 Yɛl nins a Zezi Kirist sẽn maan yʋʋmd 33, Nizã rasem 14 pa bũmb a sẽn wa n tiig n maan woto bal a vɩɩmã pʋgẽ ye. Yaa bũmb sẽn da segd n zĩnd tɩlae. Tʋm-tʋmd a Poll goma yel-kãng yelle, a sẽn da wa n gʋlsd kiris-neb sẽn zae ne vʋʋsem sõngã sẽn da be Korẽntã, zĩig ning b sẽn da ket n maand tẽegrã a Zezi sẽn sɩng sẽn yɩɩd yʋʋm 20 sẽn da loogã. Sẽn mik t’a Poll da pa zĩnd ne a Zezi la a tʋm-tʋmdb 11 wã yʋʋmd 33 wã, yaa vẽeneg tɩ yaa tʋm-tʋmdb kẽer n wilg-a bũmb ning sẽn maan sasa kãngã wã. Sẽn paase, ne vʋʋsem sõngã vẽnegre, a Poll bãnga a Zezi Kũumã tẽegr nens toɛy-toɛya sẽn sɩd segd n yɩ to-to. A Poll yeelame: “Tɩ bõe, mam deega bũmb ninga mam sẽn zãms yãmba Zusoaba nengẽ. A yaa tɩ yʋng ninga b sẽn zãmb Zusoab a Zezi wã, bãmb dɩka buri; la b sẽn ning-a barka, b kaoome n yeele: ‘Bɩ y reeg n dɩ. Yõ wã yaa mam yĩnga sẽn sãam yãmb yĩnga. Bɩ y maan bõn-kãnga n tẽegd mam yelle.’ La b sẽn dɩ n sɛ, b rɩka bõn-yũudl me n yeele: Bõn-yũudl kãngã yaa kãab paalga sẽn yaa mam zɩɩm. Bɩ y maan bõn-kãng n tẽegd mam yell wakat fãa yãmb sẽn yũuda.”—1 Korẽnt dãmba 11:23-25.
4. Bõe yĩng tɩ kiris-nebã segd n tẽeg Soaalã zaabr dɩɩbo?
4 Evãnzill gʋlsd a Luk sɩd wilgame t’a Zezi kõo noor n yeele: “Bɩ y maan bõn-kãnga n tẽegd mam yelle.” (Luk 22:19) B leb n lebga gom-kãngã woto: “Bɩ y maan woto tɩ yɩ mam yell tẽegre.” (Bible de Jérusalem) Sɩda, b nong n gomda tẽegr kãng yell n yetẽ tɩ yaa Kirist kũumã Tẽegre. A Poll me bool-a lame tɩ Soaalã zaabr dɩɩbo. (1 Korẽnt dãmba 11:20, Sebr Sõngo) B kõo kiris-nebã noor tɩ b tẽegd Soaalã zaabr dɩɩbo. La bõe yĩng tɩ b lugl tẽegr kãngã?
Bũmb ning sẽn kɩt tɩ b lugl-a wã
5, 6. a) Bõe me n kɩt t’a Zezi lugl a kũumã Tẽegre? b) Wilg-y bũmb a to sẽn kɩt tɩ b lugl Soaalã zaabr dɩɩbã?
5 Bũmb a ye sẽn kɩt tɩ b lugl tẽegrã ra tɩ loee ne raab a yembr a Zezi kũumã sẽn pidsi. A Zezi kiime n na n teel a saasẽ Ba wã naam sẽn ka to. Woto, Kirist wilgame t’a Sʋɩtãan munaafɩɩk yaa pʋɩyagda, a sẽn yet tɩ ninsaalbã maanda Wẽnnaam daabã rat-m-yembr yĩngã. (Zoob 2:1-5) A Zezi sẽn ki kɩs-sɩd pʋgẽ wã wilgame t’a Sʋɩtãan togs-kãng yaa ziri, la woto nooga a Zeova sũuri.—Yelbũna 27:11.
6 Bũmb a to sẽn kɩt tɩ b lugl Soaalã zaabr dɩɩbã yaa sẽn na yɩl n tẽeg tõnd t’a Zezi sẽn yɩ ninsaal sẽn zems zãng n pa tall yel-wẽnã, a kiime n ‘kõ a vɩɩm tɩ yao neb wʋsg yĩnga.’ (Matɩe 20:28) Pipi ninsaalã sẽn maan yel-wẽnd n beeg Wẽnnaamã, a konga a vɩɩm sẽn zems zãngã ne saagr nins sẽn tɩ loe ne rẽ wã. Baasg zãnga a Zezi yeelame: “Wẽnnaam nonga dũniyã hal tɩ b kõ b Biiga sẽn-ka-to, tɩ ned ninga fãa sẽn tẽed bãmb kõn sãam ye, la a na paam vɩɩm sẽn-ka-sɛta.” (Zã 3:16) Sɩda, “yel-wẽna yaood yaa kũum, la Wẽnnaam kũuna yaa vɩɩm sẽn ka sɛta tõnd Zusoaba Kirist Zezi maasem yĩnga.” (Rom dãmba 6:23) Soaalã zaabr dɩɩbẽ kẽngr tẽegda tõnd nonglem kãseng ning a Zeova ne a Biriblã sẽn tall ne tõndo, a Zezi kũumã sẽn yɩ maoongã wɛɛngẽ wã. Ad tõnd sɩd segd n talla naneb wʋsg ne nonglem kãnga!
Wakat bʋg la Tẽegrã segd n maane?
7. Bõe yĩng tɩ kiris-neb nins sẽn zaeyã wãbd Tẽegrã bur la b yũud divẽ wã “wakat fãa”?
7 A Poll yeela woto Soaalã zaabr dɩɩb wɛɛngẽ: “Wakat fãa yãmb sẽn dɩt bur kãngã la yãmb sẽn yũud bõn-yũudl kãngã, yãmb wilgda Zusoaba kũum hal tɩ bãmb leb n wa.” (1 Korẽnt dãmba 11:26) Kiris-neb nins sẽn paam vʋʋsem sõng zaeebã ned kam fãa wãbda Tẽegrã bur la a yũud a divẽ wã hal tɩ ta b kũum. Woto, b wilgda Wẽnnaam a Zeova la dũniyã taoor n yɩlemdẽ tɩ b tara tẽeb ne Wẽnnaam sẽn kõ a Zezi t’a yɩ maoong sẽn yaa rondã.
8. Sẽn zae-bã sull segd n ket n tẽegda Soaalã zaabr dɩɩb hal tɩ ta wakat bʋgo?
8 Kiris-neb nins sẽn zaeyã sull segd n maana Kirist kũumã Tẽegr tɩ ta wakat bʋgo? ‘Hal t’a leb n wa.’ Woto la a Poll yeel-yã. Woto rat n yeela vẽeneg tɩ b ra na n tẽegda rẽ hal t’a Zezi wa vʋʋg a karen-biisã sẽn zae ne vʋʋsem sõngã n deeg-b saasẽ a sã n wa be Rĩungã pʋgẽ. (1 Tesalonik rãmba 4:14-17) Woto zemsa ne a Zezi goam nins a sẽn taas tʋm-tʋmdb 11 wã sẽn tall b kɩs-sɩdã: “Mam sã n kẽng n maneg zĩigã n sɛ, m na n lebg n wa peega yãmba, tɩ mam sẽn be zĩig ninga, bɩ yãmb me zĩnd be.”—Zã 14:3.
9. A Zezi goam nins sẽn be Mark 14:25 pʋgẽ wã võor yaa bõe?
9 A Zezi sẽn wa n lugl a kũumã Tẽegrã, a goma divẽ wã wɛɛngẽ n yeel a tʋm-tʋmdb nins sẽn tall kɩs-sɩdã tɩ: “Mam kõn leb n yũ viyn biis koom hal tɩ ta daar ninga mam sẽn na n yũ ne yãmb Wẽnnaam [rĩungã] pʋgẽ wã.” (Mark 14:25) Sẽn mik t’a Zezi ra pa na n yũ divẽ sɩd-sɩd saasẽ wã, yaa vẽeneg tɩ sẽn da be a yamẽ wã yaa sũ-noogã, b sẽn mi n makd ne divẽ wã. (Yɩɩl Sõamyã 104:15; Koɛɛg Soaba 10:19) Zĩnd ne taab Rĩungã pʋgẽ da yaa sũ-noog yẽ ne a karen-biisã sẽn da gũud ne b sũy fãa.—Rom dãmba 8:23; 2 Korẽnt dãmba 5:2.
10. B segd n maana a Zezi kũumã Tẽegr naoor a wãn yʋʋmd pʋgẽ?
10 B segd n tẽega a Zezi kũumã kiuug fãa, semen fãa bɩ daar fãa meng bɩ? Ayo. A Zezi lugla Soaalã zaabr dɩɩb Pakã daare, la b kʋ-a-la raar-n-kãngã. B ra maanda Pakã n ‘tẽegd’ b sẽn fãag Israɛll nebã n yiis-b Ezipt yembdẽ wã yʋʋmd 1513 sẽn deng Kirist zãmaanã. (Yikri 12:14) B ra maanda Pakã vugr yʋʋmd pʋgẽ, Zʋɩf rãmbã kiuug ning b sẽn boond tɩ Nizã wã rasem 14 soaba. (Yikri 12:1-6; Maankʋʋre 23:5) Rẽ wilgdame tɩ b segd n tẽega a Zezi kũumã yʋʋmd fãa wa Pakã, la pa kiuug fãa, pa semen fãa bɩ daar fãa me ye.
11, 12. Bõe la pĩnd yɛlã wilgd a Zezi kũumã Tẽegr sɩngrẽ wã wɛɛngẽ?
11 Rẽnd zemsame tɩ d maan a Zezi kũumã Tẽegr yʋʋmd fãa, Nizã rasem 14. Sebr a yembr yetame: “B ra boonda Azimineer kiris-nebã tɩ Piig la a naas rãmbã, b sẽn da minim n tẽegd Soaalã zaabr dɩɩbã Nizã rasem 14 n pa viigdẽ wã yĩnga . . . Daarã tõe n tɩ zemsa ne arzũm bɩ semena daar a to.” The New Schaff-Herzog Encyclopedia of Religious Knowledge, volum a 4, seb-neng 44.
12 Pĩnd yɛl mit a John von Mosheim goma yʋʋm kob-gĩnd a yiib-n-soabã minung yell n wilg tɩ piig la a naas rãmbã ra maanda a Zezi kũumã Tẽegr Nizã rasem 14, bala “b ra geta Kirist sẽn kõ makr ningã wa tõog b sẽn segd n tũ.” Pĩnd yɛl mit a to yetame: “Azi Piig la a naas rãmbã egiliiz rãmb ra maanda wa Zerizalɛm egiliizã. Yʋʋm kob-gĩnd a yiib-n-soabã, Soaalã zaabr dɩɩb sasa Nizã rasem 14, egiliiz kãens ra tẽegda fãagr ning Kirist kũumã sẽn wa ne wã.”—Studia Patristica, volum a 5, yʋʋmd 1962, seb-neng a 8.
Burã võore
13. Yaa bur bʋg buud la a Zezi tũnug ne, a sẽn da wa n lugend Soaalã zaabr dɩɩbã?
13 A Zezi sẽn da wa n lugend tẽegrã, a “rɩka bur n ning barka n kao n kõ [tʋm-tʋmdbã].” (Mark 14:22) Bur ning sẽn da be sasa kãngã wã ra yaa Pakã burã. (Yikri 13:6-10) B sẽn pa wẽ bur kãng ne rabɩllã yĩnga, a ra yaa paklg n zemse, t’a kaoob ra yaa nana. A Zezi sẽn fɩɩg bur ne yel-solemd n kõ neb tusa wã, a kaoobã ra yaa nana, bala a kao-a lame sẽn na yɩl n tõog n pʋɩ. (Matɩe 14:19; 15:36) Rẽ, a Zezi kũumã Tẽegrẽ burã kaoob ra pa tũudum yel-maandɩ ye.
14. a) Bõe yĩng tɩ zems tɩ Tẽegrã bur da tall rabɩlle? b) Bur bʋg buud la b tõe n tũnug ne?
14 A Zezi sẽn da wa n lugend Tẽegrã, a yeela woto bur ning a sẽn tũnug ne wã wɛɛngẽ: “Yõ wã yaa mam yĩnga sẽn sãam yãmb yĩnga.” (1 Korẽnt dãmba 11:24; Mark 14:22) Burã sẽn da ka rabɩllã zemsame. Bõe yĩnga? Yaa rabɩll sẽn tõe n makd wẽngã, wẽnem bɩ yel-wẽndã yĩnga. ( Korẽnt dãmba 5:6-8) Burã ra makda a Zezi yĩngã sẽn da zems zãng n pa tar yel-wẽna, tɩ b rɩk-a n kõ wa sẽn zems tɩ yɩ maoong sẽn yaa rondã. (Hebre dãmba 7:26; 10:5-10) A Zeova Kaset rãmbã ningda rẽ b yamẽ n tũud makr ning a Zezi sẽn bas n tũnug ne bur sẽn ka rabɩll a kũumã Tẽegrẽ wã. Wakat kẽere, b tũnugda ne Zʋɩf rãmbã bur sẽn pa lagem ne zẽ-biis wala gɛba bɩ gɛla. Sã n pa rẽ, b tõe n maana bur sẽn ka rabɩll ne zom bilfu (zĩig ning b sẽn tõeyã, yaa ne alkamd zom) sẽn naag ne koom bilfu. B segd n naga zoma t’a yɩ bãaneg tɩ b tõe n dɩk-a n wẽ bur ne kaam bilf bur-laagã pʋgẽ hal tɩ burã kʋɩ n sakd kaoobo.
Divẽ wã võore
15. Bõn-yũudl ning Kirist sẽn tũnug ne wã ra yaa bõe, a sẽn da wa n lugl a kũumã Tẽegrã?
15 A Zezi sẽn kɩt tɩ bur sẽn ka rabɩllã pɩʋʋgã poore, a rɩka bõn-yũudla, “n ning barka n kõ a [tʋm-tʋmdbã], la bãmb fãa yũumi.” A Zezi wilga woto: “Yõ wã yaa mam zɩɩm sẽn yaa kãab paalg zɩɩm sẽn daag neb wʋsg yĩnga.” (Mark 14:23, 24) Bõn-yũudl kãng ra yaa bõe? Yaa divẽ sẽn kʋme, la pa nasaar sib koom sẽn pa kʋm ye. Gʋlsg Sõamyã sã n gomd divẽ yelle, a pa rat n yeel tɩ yaa nasaar sib koom sẽn pa kʋm ye. Wala makre, wa a Zezi sẽn yeelã, yaa divẽ sẽn kʋme n da tõe n kẽes “ko-waoosa,” la pa nasaar sib koom bal ye. Sẽn paase, Kirist bɛɛbã ning-a-la taal n yeel t’a ra yaa “rã-yũuda.” Taal-ningr kãngã pa na n tallẽ võore, divẽ wã sã n da yaa nasaar sib koom bal ye. (Matɩe 9:17; 11:19) Pakã maaneg wakate, b ra yũuda divẽ, tɩ Kirist tũnug ne rẽ a sẽn wa n lugend a kũumã Tẽegrã.
16, 17. Divẽ bʋg buud n zems ne a Zezi kũumã Tẽegr maanego, la bõe yĩnga?
16 Yaa divẽ miuug sẽn pa kalem ne bũmb bal n yaa makr sẽn zems ne a Zezi zɩɩmã sẽn daagã. Yẽ mengã yeelame: “Yõ wã yaa mam zɩɩm sẽn yaa kãab paalg zɩɩm sẽn daag neb wʋsg yĩnga.” Tɩ tʋm-tʋmd a Pɩɛɛr gʋlse: “Yãmb [kiris-neb nins sẽn zae ne vʋʋsem sõngã] bãngame tɩ ka ne bõn-sãamdse sẽn wẽnd wanzuri walla sãnem la yãmb paam fãagre n bas yãmb minung sẽn yaa zaalem yãmb sẽn da reeg y ba rãmba nengẽ wã ye. La yaa ne Kirist zɩɩm sẽn yaa sõama, bãmb yɩɩ wa pe-bi-sõngo sẽn ka tar yell ye.”—1 Pɩɛɛr 1:18, 19.
17 Sãmbg sẽn ka be, ra yaa divẽ miuugã la a Zezi sẽn tũnug ne, a sẽn da wa n lugend a kũumã Tẽegrã. La rũndã-rũndã pa divẽ miida fãa n zems ne rẽ ye, bala b paasa kẽer rã-toos bɩ noosdo. A Zezi zɩɩmã ra zemsame, n pa baood tɩ bũmb paas-a ye. Rẽnd divẽ b sẽn pul dã-toos bɩ bũmb a to pa zems ye. B pa segd n tũnug ne divẽ sẽn ning sɩkr bɩ sẽn pul ne rã-toos n maan a Zezi kũumã Tẽegr ye. A tõe yɩɩ divẽ miuug b sẽn maan yir n pa ning sɩkr ye. B tõeeme me n tũnug ne divẽ miuug ning b sẽn maan Fãrens b sẽn boond tɩ bourgogne la bordeaux wã.
18. Bõe yĩng t’a Zezi pa maan yel-solemd sẽn tɩ loe ne a kũumã Tẽegr bur la a divẽ?
18 A Zezi sẽn da wa n lugend a kũumã tẽegrã, a pa maan yel-solemd n toeem burã ne divẽ wã tɩ sɩd lebg a yĩngã nemd la a zɩɩmã ye. Sã n yɩẽ-la woto ra na n yɩɩ ninsaal nemd wãbr la a zɩɩm yũubu, la woto yaa Wẽnnaam tõogã kɩɩsgo. (Sɩngre 9:3, 4; Maankʋʋre 17:10) A Zezi ra ket n tara a yĩn-nemsã zãng la a zɩɩmã fãa. Yɩɩ vẽk-n-beoog wĩnd-kaoore, sẽn yɩ Zʋɩf rãmbã kiuug b sẽn boond tɩ Nizã wã rasem 14 daarã, la a rɩk a yĩngã n kõ tɩ yɩ maoong sẽn zems zãnga, t’a zɩɩmã raage. Woto yĩnga, Tẽegrã bur la a divẽ yaa makr bala. B makda Kirist yĩn-nemsã la a zɩɩmã. *
Tẽegrã yaa lagem-n-taar dɩɩbo
19. Bõe yĩng tɩ b tõe n tũnug ne sẽn yɩɩd laag a yembr la vɛɛr a yembr Tẽegrẽ wã?
19 A Zezi sẽn wa n lugl a kũumã Tẽegrã, a yeela a tʋm-tʋmdbã sẽn tall kɩs-sɩdã tɩ b yũ divẽ wã vɛɛr a yembr pʋgẽ. A Matɩe Evãnzillã yetame: “[A Zezi] dɩka bõn-yũudla, la bãmb sẽn ning barka, bãmb kõo bãmba n yeele: ‘Bɩ yãmb fãa yũ.’ ” (Matɩe 26:27) A sẽn tũnug ne vɛɛr a ye n taas bõn-yũudlã n pa tũnug ne sẽn yɩɩd woto wã pa yell ye, bala sasa kãngã, ra yaa neb 11 bal n da yũ, rẽ me b ra tog n bee taabl a yembrẽ, n da tõe nana-nana n kɩt tɩ bõn-yũudlã pɩʋʋg b fãa nusẽ ne vɛɛr a yembre. Rõandã, neb milyõ rãmb n na n tigim a Zeova Kaset rãmbã tigims sõor sẽn yɩɩd 94 000 pʋsẽ Soaalã zaabr dɩɩb yĩnga. Nebã sẽn na n yɩ wʋsg woto n tigim n maan tẽegrã yʋʋn-yɛngã yĩnga, b pa tõe n tũnug ne vɛɛr a yembr bãmb fãa yĩng ye. La baa tigims kãens pʋsẽ b sẽn tũnugd ne vɛɛr dãmb wʋsg sẽn na yɩl n kɩt tɩ bõn-yũudlã pɩʋʋg kɛlgdbã nusẽ tɩ ra kaoos wʋsgã, vɛɛr kãens divẽ wã ket n makda a Zezi zɩɩm a sẽn daag tɩ yɩ maoongã. Woto me, b na n tũnuga ne sẽn yɩɩd la-yɛng burã yĩnga. Bũmb pa wilgd Gʋlsg Sõamyã pʋgẽ tɩ vɛɛrã segd n yɩɩ modɛll sẽn yãk takɩ ye. Baasg zãnga, vɛɛrã ne burã laag fãa segd n talla burkĩndi, sẽn zems ne tẽegrã. Yaa sõma tɩ b ra pids vɛɛrã, tɩ divẽ wã ra wa raag nebã nusẽ ye.
20, 21. Bõe yĩng tɩ d tõe n yeel tɩ Tẽegrã yaa lagem-n-taar dɩɩbo?
20 Baa ne b sẽn tõe n tũnug ne sẽn yɩɩd bur laag a ye bɩ divẽ vɛɛr a ye wã, Tẽegrã yaa lagem-n-taar dɩɩbo. Pĩnd Israɛllẽ wã, rao ra tõe n waa ne rũng Wẽnnaam zĩ-sõngẽ wã, tɩ b kodg rũngã be tɩ yɩ lagem-n-taar dɩɩbo. B rɩkda rũngã babg a yembr n yõog tẽn-kugrã zugu, tɩ babg a to kẽng maan-kʋʋd ning sẽn tʋmdã nengẽ, t’a ye kẽng a Aarõ komdibli wã nengẽ, tɩ sẽn kõ-a maoongã ne a zakã rãmb naag taab n dɩ sẽn ketã. (Maankʋʋre 3:1-16; 7:28-36) Tẽegrã me yaa lagem-n-taar dɩɩbo, bala nebã naagd n kẽesa b toogo.
21 A Zeova me sẽn yaa segl-kãngã Soabã naagda lagem-n-taarã rɩɩbẽ. Ya a Zezi la maoongã, tɩ kiris-neb nins sẽn zae ne vʋʋsem sõngã naagd n wãbd burã la b yũud divẽ wã. A Zeova taablẽ wã rɩɩb rat n yeelame tɩ rɩtbã tara zems-n-taar ne yẽ. Yaa rẽ n so t’a Poll gʋls woto: “Bark bõn-yũudla tõnd sẽn ningd barkã, tõnd ka lagemd n deegd Kirist zɩɩm sɩda? La bura tõnd sẽn kaoodã, tõnd ka lagemd n deegd Kirist yĩnga sɩda? A sẽn yaa bur a yembra yĩnga; tõnd sẽn yaa wʋsgã, tõnd lebga yĩng a yembre; tɩ bõe, tõnd fãa rɩta bur a yembre.”—1 Korẽnt dãmba 10:16, 17.
22. Sogs-bʋs a Zezi kũumã Tẽegr wɛɛngẽ n ket tɩ d na n bao n leok-ba?
22 Yaa Soaalã zaabr dɩɩb bal la a Zeova Kaset rãmbã tẽegd yʋʋmd-yʋʋmd tũudmã wɛɛngẽ. Rẽ zemsame, bala a Zezi kõo a karen-biisã noor woto: “Bɩ y maan bõn-kãnga n tẽegd mam yelle.” Tẽegrẽ wã, d tẽegda a Zezi kũumã, sẽn yaa kũum sẽn teend a Zeova naam sẽn ka to wã. Wa d sẽn wilgã, lagem-n-taar dɩɩb kãngã pʋgẽ wã, burã makda Kirist sẽn dɩk a ninsaal yĩngã n maan maoongã tɩ divẽ wã makd a zɩɩmã sẽn daagã. La yaa neb sõor bilf bal n wãbd burã la b yũud divẽ wã sẽn yaa makrã. Bõe yĩnga? A Zezi kũumã Tẽegr tara võor meng-meng ne neb milyõ rãmbã sẽn pa wãbd burã la b pa yũud divẽ wã bɩ? Soaalã zaabr dɩɩb võor segd n yɩɩ bõe ne yãmba?
[Tẽngr note]
^ sull 18 Ges-y Étude perspicace des Écritures, volum a 2, seb-neng 764. Seb-kãng ya a Zeova Kaset rãmbã n yiisi.
Bõe la y na n leoke?
• Bõe yĩng t’a Zezi lugl Soaalã zaabr dɩɩbo?
• Yʋʋmd pʋgẽ, naoor a wãn la b segd n maan a Zezi kũumã Tẽegre?
• A Zezi kũumã Tẽegr bur sẽn ka rabɩllã võor yaa bõe?
• A Zezi kũumã Tẽegr divẽ makda bõe?
[Zãmsgã sogsgã]
[Foto, seb-neng 11]
A Zezi lugla Soaalã zaabr dɩɩbo