Soaalã zaabr dɩɩb võor ne yãmb yaa bõe?
Soaalã zaabr dɩɩb võor ne yãmb yaa bõe?
“Ned sã n dɩ bur-kãng la a yũ [Soaala] bõn-yũudla t’a ka zemse, a beegda [Soaala] yĩnga ne b zɩɩma.”—1 KORẼNT DÃMBA 11:27.
1. Bũmb ning d sẽn geend maaneg t’a yõod yɩɩd bũmb a taabã fãa yʋʋmd 2003 wã yaa bõe, la a sɩnga wãn to?
BŨMB ning d sẽn geend maaneg t’a yõod yɩɩd bũmb a taabã fãa yʋʋmd 2003 wã, yaa sẽn na n zĩnd-a tʋʋl-nif kiuug rasem 16 daar wĩndgã lʋɩɩs poorã. A Zeova Kaset rãmbã na n tigma taab n maan a Zezi Kirist kũumã Tẽegre. Wala d sẽn wilg sõsg ning sẽn loogã pʋgẽ wã, a Zezi lugla tẽegr kãngã, b sẽn boond me tɩ Soaalã zaabr dɩɩbã, yẽ ne a tʋm-tʋmdbã sẽn maan Pakã poore, Nizã rasem 14, yʋʋmd 33. Tẽegrã bur la a divẽ wã makda Kirist yĩngã sẽn pa tar yel-wẽndã, la a zɩɩmã sẽn daagã. Yaa maoong kãng bal n tõe n fãag ãdem-biisã ne yel-wẽnã la ne kũumã b sẽn dog ne wã.—Rom dãmba 5:12; 6:23.
2. Keoog-bʋg n be 1 Korẽnt dãmba 11:27 pʋgẽ?
2 Neb nins sẽn dɩt a Zezi kũumã Tẽegr dɩɩbã segd n maan-a lame tɩ zemse. Tʋm-tʋmd a Poll wilga rẽ vẽeneg a sẽn wa n gʋls kiris-nebã sẽn da be pĩnd Korẽntã, zĩig ning b sẽn da maan Soaalã zaabr dɩɩb tɩ pa zemsã. (1 Korẽnt dãmba 11:20-22) A Poll gʋlsame: “Ned sã n dɩ bur-kãng la a yũ Zusoaba bõn-yũudla t’a ka zemse, a beegda Zusoaba yĩnga ne b zɩɩma.” (1 Korẽnt dãmba 11:27) Gom-kãensã võor yaa bõe?
Kẽer maana Tẽegrã tɩ pa zems ye
3. Manesem bʋg la Korẽnt kiris-neb wʋsg ra tar Soaalã zaabr dɩɩbẽ?
3 Korẽnt kiris-neb wʋsg rɩɩ Tẽegrã rɩɩb tɩ pa zems ye. Welsg n da be b sʋkã. Wakat n zĩndi, tɩ kẽer zɩt rɩɩb n wat n dɩt sẽn deng tigisgã bɩ a wakate, n da nong n dɩtẽ la b yũud rãam tɩ loog noore. B ra pa gũus ne b tagsgã la ne b tẽebã ye. Rẽ kɩtame tɩ b ‘beeg Soaala yĩng ne a zɩɩm.’ Kom n da tar sẽn da pa zɩ-b rɩɩb n wa wã tɩ b yamã ra pa tik zĩ-yend ye. N-ye, wʋsg rɩɩ tẽegrã rɩɩb n pa tall waoogre, la b ra pa ne a yõodã sẽn ta zĩig ninga ye. Ad sɩd pa lingr la b sẽn ning bʋʋd b mens zutã ye!—1 Korẽnt dãmba 11:27-34.
4, 5. Bõe yĩng tɩ neb nins sẽn minim n dɩt a Zezi kũumã Tẽegr dɩɩbã segd tɩlae n sok b mens n gese b sã n zemsa ne rẽ maanego?
4 Yʋʋmd fãa, a Zezi kũumã Tẽegr sã n kolgdẽ, neb nins sẽn minim n dɩt Tẽegrã rɩɩbã segda tɩlae n sok b mens n ges b sã n zemsa ne rẽ maanego. Sẽn na yɩl n dɩ lagem-n-taar dɩɩb kãngã wa sẽn zemse, b segd n tara laafɩ tẽebã wɛɛngẽ. Ned ning sẽn na n tall paoogr bɩ pa-nandem meng ne a Zezi maoongã, yaa yelle, bala b tõe n ‘yiisa a soab Wẽnnaam nin-buiidã sʋka,’ wala sẽn da yaa to-to ne Israɛll ned sẽn dɩ lagem-n-taar dɩɩbã n yaool n pa yɩlemdã.—Maankʋʋre 7:20; Hebre dãmba 10:28-31.
5 A Poll rɩka a Zezi kũumã Tẽegr n mak ne lagem-n-taar dɩɩbã sẽn da maand pĩnd Israɛllã. A goma Tẽegrã rɩtb sẽn yaa pʋɩt-n-taas ne Kiristã yelle, la a paase: “Yãmb ka tõe n yũ Zusoaba bõn-yũudla la zĩn dãmba bõn-yũudl ye; la yãmb ka tõe n dɩ Zusoaba rẽnda la zĩn dãmba rẽnd ye.” (1 Korẽnt dãmba 10:16-21) Ned sẽn minim n dɩt a Zezi kũumã Tẽegr dɩɩb sã n maan yel-wẽn-kãsenga, a segd n togsa a Zeova a yel-wẽndã, la a bao tigingã kãsem dãmbã sõngr tẽebã wɛɛngẽ. (Yelbũna 28:13; Zak 5:13-16) A sã n sɩd tek yam n kos sugr la a tall manesem sẽn zems ne sugr kosgo, a pa na n dɩ tẽegrã rɩɩb tɩ pa zems ye.—Luk 3:8.
D wa Tẽegrẽ wã la d tall waoogr ne-a
6. Ãnd dãmb la Wẽnnaam kõt zu-noog tɩ b rɩ Soaalã zaabr dɩɩbo?
6 Neb nins sẽn maand Kirist ba-biis 144 000 kellã neb neer masã wã segd n dɩɩ Soaalã zaabr dɩɩb bɩ? (Matɩe 25:31-40; Wilgri 14:1) Ayo. Wẽnnaam kõta zu-no-kãngã neb nins sẽn zae ne vʋʋsem sõngã n na n yɩ ‘pʋɩt-n-taas ne Kiristã’ balã. (Rom dãmba 8:14-18; 1 Zã 2:20) Yaa wãn to masã ne neb nins sẽn saagd n na n vɩɩmd wakat sẽn kõn sa tẽng zugu, tẽngã gill sẽn na n wa lebg arzãn Rĩungã naam dɩɩb wakatã? (Luk 23:43; Wilgri 21:3, 4) B sẽn pa pʋɩt-n-taas ne a Zezi n pa tar saagr n na n vɩɩmd saasẽ wã yĩnga, b wata a Zezi kũumã Tẽegrẽ n get yɛlã ne waoogr bala.—Rom dãmba 6:3-5.
7. Bõe yĩng tɩ pipi yʋʋm kob-gĩndẽ kiris-nebã ra mi tɩ b ra segd n dɩɩ a Zezi kũumã Tẽegr dɩɩbo?
7 Pipi yʋʋm kob-gĩndẽ kiris-neb hakɩkã ra paama vʋʋsem sõngã zaeebo. Bãmb wʋsg ra tõeeme n tʋm ne yel-soalem kũunã vʋʋsem sõngã sẽn kõ wã a yembr bɩ sẽn yɩɩd woto, wala makre gom-zẽnã. Woto yĩnga, ra pa toog ne nin-kãensã tɩ b bãng tɩ b ra paama vʋʋsem sõng zaeebo, la tɩ b ra segd n dɩɩ Tẽegrã rɩɩb ye. La rũndã-rũndã, ned tõe n bãnga a sã n paama vʋʋsem sõng zaeeb ne gom-kãensã buud Wẽnnaam sẽn vẽneg tɩ b gʋlsã: “Neb nins Wẽnnaam [vʋʋsmã] sẽn tɛta yaa Wẽnnaam kamba. La yãmb ka reeg yembd [vʋʋsem] tɩ kẽes yãmb dabeem yɛs ye. La yãmb deega [vʋʋsem] sõngo sẽn kɩt tɩ tõnd yɩ Wẽnnaam kamba tɩ tõnd kelemdẽ n yetẽ: ‘Abba, Ba!’ ”—Rom dãmba 8:14, 15.
8. Ãnd dãmb la “ki” wã la ‘nadensã’ yell b sẽn gom Matɩe sak 13 makda?
8 Yʋʋm kobsã pʋsẽ, neb nins sẽn sɩd paam vʋʋsem sõng zaeebã bɩɩ wa “ki” sẽn be “nadens” sẽn makd ziri kiris-nebã sʋka. (Matɩe 13:24-30, 36-43) Yʋʋmd 1870 tɛkã, “ki” wã lebga vẽeneg n paase, la yʋʋm a wãn poore, b togsa yel-gɛtb nins sẽn yaa kiris-neb sẽn zaeyã woto: “Kãsem dãmbã . . . segd n wilga neb nins sẽn tigimd taab [a Zezi kũumã Tẽegr yĩngã] bõn-kãensã b sẽn baood tɩ b maana: 1) tẽeb tallg ne [Kirist] zɩɩma, la 2) rɩk f meng n kõ Soaalã la a tʋʋmdã, hal n sak kũum dẽ yĩng menga. Rẽ, b segd n boola neb nins fãa sẽn tar yam-kãng buudã, la sẽn dɩk b mens n kõ woto wã tɩ b lagem n tẽeg Soaalã kũum.”—Études des Écritures, tome VI, La Nouvelle Création, seb-neng 128. *
‘Piis a taabã’ baoobo
9. Wãn to la b wilg ‘kʋʋn-kãsengã’ sẽn ya a soabã vẽeneg yʋʋmd 1935, la wãn to la rẽ toeem neb kẽer sẽn da rɩt a Zezi kũumã Tẽegrã dɩɩbã manesem?
9 Sẽn wa n beẽ-beẽ, a Zeova siglgã sɩngame n tigimd neb a taaba, Kirist ba-biis nins sẽn zae ne vʋʋsem sõngã toor sẽn ka be. Rẽ n so tɩ toeeng kãseng zĩnd yʋʋmd 1935 wã sẽnese. Sẽn deng rẽ, Wẽnnaam nin-buiidã ra geta ‘kʋʋn-kãseng’ ning yell b sẽn gom Wilgr 7:9 pʋgẽ wã wala tẽedb sull a to sẽn yaa pʋgdga, sẽn da na n lagem ne neb 144 000 b sẽn vʋʋg saasẽ wã, tɩ b yaa wala Kirist pʋg-paalã pʋgds bɩ a tũud-n-taasã. (Yɩɩl Sõamyã 45:15, 16; Wilgri 7:4; 21:2, 9) La yʋʋmd 1935, sig-noy kiuug rasem 31, b kõo sõsg a Zeova Kaset rãmbã tigis-kãsengẽ Wasĩnton sẽn be Etazĩni wã, n tik Biiblã zug n wilg tɩ ‘kʋʋn-kãsengã,’ yaa ‘piis a taabã’ sẽn vɩ saabã wakatã. (Zã 10:16) Tigis-kãseng kãng poore, kẽer sẽn da rɩt a Zezi kũumã Tẽegr dɩɩbã basa a rɩɩbo, bala b mikame tɩ b saagrã ra yaa tẽng zug vɩɩmdgo, la pa saasẽ ye.
10. Wãn to la y na n bilg ‘piis a taaba’ sẽn be rũndã-rũndã wã saagr la b zɩɩbo?
10 Sẽn tɩ yɩɩd fãa, yʋʋmd 1935 wã tɛka, b baoa neb nins sẽn wa n yɩ ‘piis a taabã,’ sẽn tar tẽeb ne rondã la sẽn dɩk b mens n kõ Wẽnnaama, la sẽn sõngd ‘bãg-bilã’ sẽn paam vʋʋsem sõng zaeebã, n moond Rĩungã. (Luk 12:32) Piis a taab kãens saagdame n na n vɩɩmd wakat sẽn pa sat tẽng zugu, la yɛl a taabã fãa pʋgẽ, b wõnda sẽn na n dɩ-b naam Rĩungã pʋgẽ wã kell sẽn be rũndã-rũndã wã. Wa sãamb nins sẽn da vɩ pĩnd Israɛll nebã sʋk n balem a Zeova la b sak n tũ Tõogã, rũndã-rũndã piis a taabã me sakda zɩɩb nins kiris-ned sẽn segd n tʋkã, wala koe-noogã mooneg ne tẽeb Israɛllã nebã. (Galat dãmba 6:16) Wala sãan ba a yembr sẽn da vɩ Israɛll nebã sʋkã sẽn da pa tõe n yɩ rĩm bɩ maan-kʋʋdã, piis a taabã ned ba a yembr pa tõe n zĩnd na-rɩtbã sullẽ saasẽ Rĩungã pʋgẽ, bɩ b yɩ maan-kʋʋdb ye.—Tõodo 17:15.
11. Bõe yĩng tɩ ned lisgã wakat tõe n tar loees ne a sã n bee kellã neb sẽn zaeyã sʋk bɩ a pa be-b sʋka?
11 Rẽ, yʋʋmd 1930 poorã, ra lebga vẽeneg tɩ b zoe n yãka sẽn na n vɩɩmd-b saasẽ wã neb sulli. Sẽn kolg yʋʋm pis-yopoe masã, yaa piis a taabã sẽn saagd n na n vɩɩmd tẽng zugã la b baooda. Ned sẽn zae ne vʋʋsem sõng sã n wa ye pa kɩs-sɩd soaba, sẽn tɩ yɩɩd fãa yaa piis a taabã ned sẽn tũ Wẽnnaam ne kɩs-sɩd n kaoos la a Zeova na n bool tɩ reeg nin-kãng zĩig n lok 144 000.
Kẽer sẽn tudg n yet tɩ b paama zaeebã võore
12. Ãnd dãmb n segd n bas n ye ra rɩ a Zezi kũumã Tẽegr dɩɩbo, la bõe yĩnga?
12 Kiris-neb nins sẽn zae ne vʋʋsem sõngã kɩsa sɩd tɩ sik ka be tɩ b paama saasẽ vɩɩmã boolle. La yaa wãn to, kẽer sẽn pa paam booll kãng sã n minim n dɩt a Zezi kũumã Tẽegr dɩɩbo? B sẽn bãng masã tɩ b zɩ n paam saasẽ vɩɩmã saagrã, sãmbg sẽn kae b sũur kasetã na n kɩtame tɩ b bas Tẽegrã rɩɩb rɩɩbo. Ned sã n yetẽ t’a paama booll n na n yɩ rĩm la maan-kʋʋd saasẽ, n yaool n miẽ tɩ b sɩd pa bool-a, Wẽnnaam pa na n ges nin-kãng wa ned sẽn ta a yam ye. (Rom dãmba 9:16; Wilgri 20:6) A Zeova kʋʋ a Koore sẽn yaa Levi buudã nedã, a sẽn bao a Aarõ maan-kʋʋrã ne tɩtaamã yĩnga. (Yikri 28:1; Sõdbo 16:4-11, 31-35) Kiris-ned sã n wa mik t’a ra rɩta a Zezi kũumã Tẽegr dɩɩb tɩ pa zemse, a segd n basame n ye ra rɩ-a, la a pʋʋs a Zeova ne sik-m-menga n kos sugri.—Yɩɩl Sõamyã 19:14.
13, 14. Bõe yĩng tɩ kẽer tõe n tudg n tags tɩ b paama saasẽ boollã?
13 Yaa bõe n tõe n kɩt tɩ kẽer tudg n tags tɩ b paama saasẽ boollã? Kẽed-n-taag kũum bɩ yel-beed a to tõe n kɩtame tɩ ned yam ye pa be ne tẽng zug vɩɩmã ye. B tõeeme me n tʋlg saasẽ vɩɩmã saagr wa b zo-nongr sẽn yet t’a yaa kiris-ned sẽn zae. Yaa sɩda, Wẽnnaam pa yãk neb tɩ b sagl neb a taab tɩ b bao zu-no-kãngã ye. La a sã n zae sẽn na n dɩ-b naam Rĩungã pʋgẽ wã ne vʋʋsem sõngã, a pa kɩtd tɩ b wʋm koees tɩ kõ kaset ne rẽ ye.
14 Tũudmã ziri tagsg ning sẽn yet tɩ nin-sõamyã wã fãa rebda saasẽ wã tõe n kɩtame tɩ neb kẽer tags tɩ b paama saasẽ boollã. Woto yĩnga, d segd n maana gũusg tɩ tags-goalem nins d sẽn da tar pĩndã bɩ yɛl a taab ra kɩt tɩ d paam tagsg sẽn pa zems ye. Wala makre, kẽer tõe n soka b mens tɩ: ‘Mam dɩkda tɩt sẽn toeemd mam sũurã tʋlsem bɩ? M nong n tara tʋlsem sẽn tar pãng sẽn tõe n kɩtd tɩ m tagsdẽ tɩ m paama vʋʋsem sõng zaeeb tɩ yaool n sɩd pa woto bɩ?’
15, 16. Bõe yĩng tɩ neb kẽer tõe n wa tudg n tags tɩ b paama vʋʋsem sõng zaeebo?
15 Kẽer segd n soka b mens tɩ: ‘M dat n yɩɩ nin-kãseng bɩ? M yaa ned sẽn dat n paam naam masã bɩ ned sẽn dat n yɩ pʋɩt-n-taag ne Kirist beoog-daar bɩ?’ B sẽn da bool neb nins sẽn na n dɩ naam Rĩungã pʋgẽ pipi yʋʋm kob-gĩndẽ wã, pa b fãa n da yaa taoor lʋɩtb tigingã pʋgẽ ye. La neb nins sẽn paam booll n na n vɩɩmd saasẽ wã pa baood n na n yɩ nin-kãsems bɩ n wukd b mens ne b sẽn paam vʋʋsem sõng zaeebã ye. B tara sik-m-meng ning b sẽn gũud tɩ neb nins sẽn tar ‘Kirist tagsgã’ tallã.—1 Korẽnt dãmba 2:16.
16 Tõe tɩ kẽer wa tags tɩ b paama booll n na n vɩɩmd saasẽ wã, b sẽn paam Biiblã bãngr wʋsgã yĩnga. La zaeeb ne vʋʋsem sõng pa kõt ned bãngr sẽn yaa kãseng n yɩɩd a taab ye, bala a Poll ra segd n zãmsa neb kẽer sẽn paam vʋʋsem sõng zaeebo, la a sagl-ba. (1 Korẽnt dãmba 3:1-3; Hebre dãmba 5:11-14) Wẽnnaam seglame n kõt a nin-buiidã fãa tẽebã rɩɩbo. (Matɩe 24:45-47) Rẽnd ned ba a yembr pa segd n tags t’a sã n yaa kiris-ned sẽn paam vʋʋsem sõng zaeebo, a paamda yam sẽn yɩɩd neb nins sẽn saagd n na n vɩɩmd tẽng zug arzãnẽ wã ye. Pa ned sẽn tar tõog n na n leok sogsg sẽn tɩ loe ne Gʋlsg Sõamyã, n tõe n kõ kaseto, bɩ n kõ Biibl sõssã yĩng n wilgd t’a paama vʋʋsem sõng zaeeb ye. Kiris-neb nins sẽn tar tẽng zug vɩɩmã saagrã me maanda bõn-kãensã sõma.
17. Paam vʋʋsem sõngã zaeeb bee ne bõe la ne ãnda?
17 Tẽed-n-taag sã n maan sokr saasẽ vɩɩmã booll wɛɛngẽ, kãsem soab bɩ kiris-ned a to sẽn bɩ tõe n sõssa ne-a yel-kãng zugu. Baasg zãnga, ned ba a yembr pa tõe n dɩk sard kãngã ned a to zĩigẽ ye. Ned sẽn sɩd tar bool-kãngã pa na n bao n sok neb a taabã n gese b sã n sɩd tara bool-kãng ye. Sẽn zae-bã ‘paama dogem paalga, ka ne bõn-buud sẽn sãamd ye, la a yaa ne bõn-buud sẽn ka sãamda sẽn yaa Wẽnnaam goama sẽn vɩ la sẽn paad wakat sẽn-ka-sɛta.’ (1 Pɩɛɛr 1:23) Ne a vʋʋsem sõngã la ne a Gomdã maasem, Wẽnnaam bʋta ‘bõn-buudã’ sẽn kɩtd tɩ ned paam ‘dogem paalga,’ ne saasẽ vɩɩmã saagre. (2 Korẽnt dãmba 5:17) La ya a Zeova n yãkde. Zaeebã “ka ned daabo walla tʋʋmd yĩng ye, la a bee ne Wẽnnaam.” (Rom dãmba 9:16) Woto, wãn to la ned tõe n kɩs sɩd t’a paama saasẽ boollã?
Sẽn zae-bã sẽn kɩs sɩd tɩ b paama saasẽ boollã võore
18. Wãn to la Wẽnnaam vʋʋsem sõngã kõt sẽn paam-b vʋʋsem sõng zaeebã kaseto?
18 Wẽnnaam vʋʋsem sõngã kaset kɩtdame tɩ kiris-neb nins sẽn zaeyã sɩd bãng tɩ b tara saagr n na n tɩ vɩɩmd saasẽ. A Poll gʋlsame: “Yãmb deega [vʋʋsem sõngo,] sẽn kɩt tɩ tõnd yɩ Wẽnnaam kamba tɩ tõnd kelemdẽ n yetẽ: ‘Abba, Ba!’ La [vʋʋsem sõng] menga kɩta kaset ne tõnd sɩɩse tɩ tõnd yaa Wẽnnaam kamba. La tõnd sẽn yaa Wẽnnaam kamba, tõnd yaa neb nins Wẽnnaam sẽn bĩng b paoong b yĩnga, la tõnd yaa pʋɩt-n-taas ne Kirist, tõnd sã n paam pʋɩɩr ne bãmb namsgã, tõnd na n paama pʋɩɩr ne bãmb waoogra me.” (Rom dãmba 8:15-17) Vʋʋsem sõngã pãng maasem yĩnga, sẽn zae-bã yam bɩ b tagsgã kɩtdame tɩ b getẽ tɩ Gʋlsg Sõamyã sẽn yet bũmb ning a Zeova tẽeb kambã wɛɛngẽ wã paka bãmba. (1 Zã 3:2) Wẽnnaam vʋʋsem sõngã kɩtdame tɩ b get b mens wa Wẽnnaam komdibli, la a kɩtdẽ tɩ b tar saagr sẽn pa wõnd a taaba. (Galat dãmba 4:6, 7) N-ye, vɩɩm sẽn pa sat tẽng zug wa ninsaalb sẽn zems zãng ne b zak neb la b zo-rãmb yɩtẽ-la bũmb sẽn be yamleoogo, la saagr ning Wẽnnaam sẽn kõ bãmba wã pa woto ye. Ne a vʋʋsem sõngã maasem, a kɩtdame tɩ b tar saagr sẽn tar pãng wʋsg n na n vɩɩmd saasẽ hal tɩ kɩt tɩ b sak n bas b tẽng zug vɩɩma ne bũmb nins fãa sẽn tɩ loe ne rẽ.—2 Korẽnt dãmba 5:1-5, 8; 2 Pɩɛɛr 1:13, 14.
19. Tʋʋm-bʋg la kaool paalgã tar kiris-ned sẽn zae vɩɩm pʋgẽ?
19 Kiris-neb nins sẽn paam vʋʋsem sõng zaeebã kɩsa sɩd tɩ b tara saasẽ vɩɩmã saagre, la b kɩs sɩd me tɩ b maana kaool paalg ne-ba. A Zezi goma rẽ yell a sẽn wa n lugl a kũumã Tẽegr n yeel woto wã: “Bon-yũudl kãngã yaa mam zɩɩm sẽn yaa kãab paalg zɩɩm sẽn daag yãmb yĩnga.” (Luk 22:20) Sẽn be-b kaool paalgã pʋgẽ wã yaa Wẽnnaam la sẽn zae-b ne vʋʋsem sõngã. (Zeremi 31:31-34; Hebre dãmba 12:22-24) Ya a Zezi Kirist la sɛ-yõkdã, t’a zɩɩmã sẽn daaga lugl kaool paalgã. La sẽn be-b kaool paalg kãng pʋgẽ wã pa Zʋɩf rãmb bal ye, bu-zẽmsã neb me n naage. Nin-kãens fãa yaa nin-buiid a Zeova yʋʋrã yĩnga, tɩ rẽ kɩt me tɩ b ya a Abrahaam “yagense.” (Galat dãmba 3:26-29; Tʋʋma 15:14) Kaool ‘sẽn ka sɛt’ kãngã kɩtdame tɩ tẽeb Israɛll nebã fãa tõe n paam vʋʋgr saasẽ n ye pa na n tol n ki ye.—Hebre dãmba 13:20.
20. Kaool bʋg la Kirist maan ne sẽn paam-b vʋʋsem sõng zaeebã?
20 Sẽn zae-bã kɩsa sɩd ne b saagrã. Kaool a to la b maan ne-ba. Yaa Rĩungã kaoole. A Zezi Kirist yeela sẽn ya-b pʋɩt-n-taas ne yẽ wã wɛɛngẽ: “Yãmb yaa neb sẽn pa ne maam m makra pʋgẽ n ka bas ye. Yaa woto yĩng la mam [maand kaool ne yãmb n] kõt yãmb soolem wa m Ba sẽn [maan kaool ne maam n] kõ maam soolmã.” (Luk 22:28-30) Kaool kãngã sẽn be Kirist ne a na-rɩt-n-taasã sʋkã na n paa wakat sẽn ka sɛta.—Wilgri 22:5.
A Zezi kũumã Tẽegr sasa yaa bark wakate
21. Wãn to la d tõe n dɩ Tẽegrã wakat nafa?
21 Tẽegrã sasa tara nafa wʋsgo. D tõe n dɩɩ Biiblã kareng b sẽn yãk sasa kãng yĩngã nafa. Leb n yaa wakat sẽn zems sõma ne pʋʋsgo, la bʋgsg a Zezi tẽng zug vɩɩmã la a kũumã zugu, la sẽn na yɩl n kẽes d toog n moon Rĩungã. (Yɩɩl Sõamyã 77:12; Filip rãmba 4:6, 7) Tẽegrã meng tẽegda tõnd nonglem ning Wẽnnaam ne Kirist sẽn tall ne tõndo, n kõ a Zezi t’a yɩ maoong sẽn yaa rondã. (Matɩe 20:28; Zã 3:16) Segl-kãng kõta tõnd saagr la belsgo, la a segd n kɩtame tɩ d modg n tũ Kirist makrã ne d sũyã fãa n paase. (Yikri 34:6; Hebre dãmba 12:3) Sẽn paase, a Zezi kũumã Tẽegr segd n kɩtame tɩ d vɩɩmd tɩ zems ne d sẽn dɩk d meng n kõ Wẽnnaamã n paase, la d tũ a Biribl nongrã ne kɩs-sɩda.
22. Wẽnnaam sẽn kõ ãdem-biisã bũmb ninsã sʋka, bʋg n yaa kãseng n yɩɩda, la ne manesem bʋg la d tõe n wilg d mi-beoog ne rẽ?
22 Ad a Zeova sɩd kõ tõnd kũun sẽn yaa sõma! (Zak 1:17) D tara a Gomdã sor-wilgri, a vʋʋsem sõngã sõngre, la vɩɩm sẽn pa satã saagre. Wẽnnaam kũun ning sẽn yaa kãseng n tɩ yɩɩd fãa wã yaa a sẽn kõ a Zezi t’a yɩ maoongã, sẽn zae-bã la neb nins fãa sẽn wilgd tɩ b tẽed-a lame wã yel-wẽn yĩnga. (1 Zã 2:1, 2) Woto wã, a Zezi kũumã yõod ne yãmb taa zĩ-bʋgo? Yãmb na n zĩnda ne neb nins sẽn na n wilg tɩ b tara mi-beoog ne rẽ wã, n wa tigim ne-b yʋʋmd 2003, tʋʋl-nif kiuug rasem 16, wĩndgã lʋɩɩs poore, n maan a Zezi kũumã Tẽegr bɩ?
[Tẽngr note]
^ sull 8 A Zeova Kaset rãmbã n yiis seb-kãngã, la masã a ye pa yit ye.
Y na n leokame tɩ bõe?
• Ãnd n segd n dɩ Tẽegrã rɩɩbo?
• Bõe yĩng tɩ ‘piis a taabã’ sẽn wat Soaalã zaabr dɩɩbẽ wã yaa gɛtb bal sẽn tar waoogr ne-a?
• Wãn to la kiris-neb nins sẽn paam vʋʋsem sõng zaeebã mi tɩ b segd n wãba burã la b yũ divẽ wã Kirist kũumã Tẽegrẽ?
• A Zezi kũumã Tẽegr sasa zemsa ne bõe maanego?
[Zãmsgã sogsgã]
[Taablo/Foto rãmba, seb-neng 14]
(Sebrã meng pʋgẽ la y tõe n yã fãa)
Tẽegrã watb sõore
MILYÕ RÃMBA
15 597 746
15
14
13 147 201
13
12
11
10
9
8
7
6
5
4 925 643
4
3
2
1
878 303
63 146
1935 1955 1975 1995 2002
[Picture on page 14]
Yãmb na n zĩnda a Zezi kũumã Tẽegrẽ rõandã bɩ?
[Picture on page 17]
Tẽegrã sasa yaa wakat sẽn zems neer sẽn na yɩl n paas y Biiblã kareng la y kẽes y toog Rĩungã mooneg pʋgẽ n paase