Kom-bɩɩse, yãmb bɩta tẽebã wɛɛngẽ bɩ?

A HIDEO yeela woto a tagsgã la a manesmã sẽn da yaa to-to a sẽn da wa n be kolɛɛsã wakate: “Mam da rabda kiris-neb tigissã, la mam da ka tʋll sõma-sõma n balem a Zeova ye. Mam da mi n geta m mengã wa ned m karen-bi-taasã sẽn nonge, hali n da be sorã zug n tabgd ne m pʋgsada. Mam da ka tar bõn-datɩ takɩ ye. M da leb n ka rat n bɩ tẽebã wɛɛngẽ me ye.” Kom-bɩɩs wʋsg yaa wala a Hideo, n yaa wa b ka tar bõn-datɩ sẽn tar yõod b sẽn dat n pidsi, b pa rat n bɩ tẽebã wɛɛngẽ me ye.

Yãmb sã n yaa bi-bɩɩga, yaa vẽeneg tɩ yãmb sã n deemd reem ning y sẽn nong n yɩɩdã y sũur yaa noogo. La tõeeme tɩ sã n wa lebg tẽebã yɛl bɩ y ka tar sũ-no-kãng ye. Rẽ yĩnga, tẽeb bõn-datɩ tallg tõe n kõo ned sũ-noog bɩ? Ges-y yɩɩl-gʋlsdã sẽn yeel bũmb ninga: “Zusoaba kaset yaa sɩda n ka viigdẽ ye. A kõta zɩɩlem soab yam. . . . Zusoaba tõog bʋʋd yaa sõama zãnga, a yaa wa vẽenem nin yĩnga.” (Yɩɩl Sõamyã 19:8, 9) Wẽnnaam Gomdã tõe n sõnga “zɩɩlem soab” t’a tall yam a tʋʋmẽ, n yɩ ‘vẽenem a nin yĩnga.’ N-ye tẽebã yɛl tõe n kɩtame tɩ y tall sũ-noogo. La bõe la y segd n maan n tõog n paam sũ-no-kãnga? Zĩ-bʋg la y segd n sɩnge?

Tʋlg-y n maan Wẽnnaam tʋʋma

Nananda, y segd n tʋlgame n maan Wẽnnaam tʋʋma. Ges-y Zida Rĩm a Zozias sẽn da yaa bi-bɩɩgã sẽn maanã. B yãa a Zeova Tõogã sebr wẽn-doogẽ wã. A Zozias sẽn kɩt tɩ b karem sebrã t’a kelge, a goamã kẽe a sũurã. Rẽ kɩtame t’a ‘yiis Israɛll neba bõn-yood nins b sẽn tar n waoogdẽ n beegd Wẽnnaama b tẽnga pʋgẽ.’ (2 Kɩbaya 34:14-21, 33) A Zozɩas sẽn wʋm Wẽnnaam Gomdã karengã, kɩtame t’a sõng tɩ baleng yɩlemdã kẽng taoor n paase.

Y na n tõogame n tʋlg n maan a Zeova tʋʋmdã, y sã n karemd Biiblã wakat fãa la y bʋgsd y sẽn karemd bũmb ningã zugu. Yaa rẽ n kɩt t’a Hideo tʋlg n maan a Zeova tʋʋmdã. A sɩngame n maand tũud-n-taar ne kãsem sẽn yaa so-pakda, sẽn ya a Zeova Kaset soab sẽn moond wakat fãa wã. So-pakdã ra yaa ned sẽn zãmsd Biiblã sõma la a modgd n tũud a zãmsgã a vɩɩmã pʋgẽ. So-pakda mak-sõng kenga a Hideo pɛlg tɩ yẽ me sɩng n maand woto, la a wa tʋll sõma-sõma n maan Wẽnnaam tʋʋmdã la a sõng neb a taaba. A sẽn bɩ tẽebã wɛɛngẽ wã kɩtame t’a vɩɩmã wa tall võore.

 Biiblã kareng daar fãa tõe n kɩtame tɩ kom-bɩɩsã tʋlg n maan Wẽnnaam tʋʋma. A Takahiro wilga woto: “Mam sã n kẽ gãag n mik tɩ m yĩmame n pa maan m daarã Biibl kareng la m sẽn yikd n karm-a. Rẽ kɩtame tɩ mam yã t’a Zeova sõngd-m lame. Biiblã kareng daar fãa wã sõnga maam wʋsg tɩ m bɩ tẽebã wɛɛngẽ. Mam yãka yam tɩ m na n kẽesa m meng a Zeova tʋʋmdã pʋgẽ n paase, dẽ mam sẽn sa kolɛɛsa poor bilf bal la m sẽn sɩng sõngr so-pakrã tʋʋmde. So-pakrã tʋʋmd sɩd kõta maam sũ-noog wʋsgo.”

Biiblã kareng sẽn yãk a toogo, bõe yɛs n leb n tõe n sõng-y tɩ y tʋlg n pẽg a Zeova n paase? A Tomohiro ma wã ra zãms-a-la Biiblã sɩda. A yeelame: “Yaa mam sẽn wa n zãms La vie a bien un but sebrã m sẽn da wa n tar yʋʋm 19 wakatã bal la a Zeova nonglmã la Zezi maoongã sẽn yɩ rondã kẽ mam sũurã sõma. Mi-beoogã m sẽn tar Wẽnnaam nonglmã yĩngã kɩtame tɩ mam tʋll n maan a Zeova tʋʋmdã n paase.” (2 Korẽnt dãmba 5:14, 15) Wala a Tomohiro, kom-bɩɩs wʋsg sẽn modg n zãms Biiblã sõma b toorã, kɩtame tɩ b rat n bɩ tẽebã wɛɛngẽ.

Sã n mik tɩ ne rẽ fãa, yãmb ket n ka tʋll n maan a Zeova tʋʋmã ne y sũur fãa, y maanda a wãna? Ned n be tɩ y tõe n kos-a sõngr bɩ? Tʋm-tʋmd a Poll gʋlsa woto: “Tɩ bõe, yaa Wẽnnaam n maand b tʋʋmd yãmb pʋsẽ, la b kõt yãmb ratmã, la pãng tɩ maan[e].” (Filip rãmba 2:13, Kãab-paalgã Koe-noogo) Yãmb sã n pʋʋs a Zeova n kos a sõngre, a na n kõ-y-la a vʋʋsem sõngã, tɩ kõ-y pãng tɩ y “maan” la y tall ‘ratem.’ Woto rat n yeelame tɩ Wẽnnaam vʋʋsem sõngã na n kɩtame tɩ y tʋlg n maan wa y sẽn tõe tɛk a Zeova tʋʋmdã pʋgẽ n paase, la a sõng-y tɩ y bɩ tẽebã pʋgẽ. Sẽn ya a soab fãa, y wee n teeg a Zeova pãngã la y keng y sũyã!

Yãk-y y meng bõn-datɩ

Yãmb sã n yãk yam tɩ y na n maana a Zeova tʋʋmdã sõma n paase, y segd n yãka bõn-datɩ y meng yĩnga, sẽn na yɩl n tõog n bɩ tẽebã pʋgẽ. Bipugl sẽn yaa kiris-ned tɩ b boond-a t’a Mana yeelame: “M sẽn yãk bõn-datɩ wã, sɩd sõnga maam wʋsgo. Mam ka tar n leb poorẽ ye, mam kẽnga taoor ne raoodo. M pʋʋsa a Zeova sõma t’a sõng-m tɩ m pids m bõn-datɩ wã, la m tõogame n kẽng taoor tɩ bũmb ka tiis-m ye.”

Y segd n yãka bõn-datɩ sẽn zemse, y sẽn tõe n pidsi. Bõn-datl a yembr sẽn zems yaa Biiblã sak a yembr kareng daar fãa. Y leb n tõe n maana vaeesg yell ning zugu. D rɩk makr ne bũmb sẽn be ne farend tɩ y tõe n gese. Y sã n dat n zãms n bãng a Zeova zʋg-sõma wã, y tõe n gesa Publications de la Société Watch Tower — Index sebrã, zĩig ning b sẽn ning tɩ “Jéhovah” wã, n ges gom-zu-bil ning sẽn yet tɩ “ Qualités ” wã tẽngre. A Zeova zʋg-sõma toɛy-toɛy sẽn zems 40 la b sõdg be. Y sã n maan vaeesg b zutu, sãmbg sẽn kae, rẽ na n kɩtame tɩ y pẽneg a Zeova n paase, la kɩt tɩ y tʋlg n maan a raabã n paase. Bõn-datɩ a taab y sẽn tõe n pids yaa modg n kõ leoor baa yaa vugr tigisg fãa sẽn tar sõss sẽn baood tɩ neb kõ leoor wakate, bao n bãng baa yaa tigisgã ned a yembr sõma n paas tigisg fãa sasa, la ra maan raar tõr n ka pʋʋs a Zeova bɩ n gom a yell ne neb a taab ye.

Y sã n nan pa gʋls y yʋʋrã Wẽnnaam tʋʋmdã lekoll pʋgẽ, rẽ me leb n yaa bõn-datl sẽn yaa sõma n kõ-yã. Yãmb zoe n moonda koe-noogã bɩ? Y sã n nan pa moondẽ, bɩ y bãng tɩ y segd n modgame n wa lebg koe-moond sẽn ka reeg lisgu. Wa sẽn zemse, sẽn pʋgd rẽ masã yɩta bao n yɩ a Zeova zoa sõma n paase, la y rɩk y meng n kõ-a. Kom-bɩɩs wʋsg me leb n vɩɩme tɩ  zemsd ne b sẽn dɩk b mens n kõ wã, n modgd n kẽed wakat fãa Wẽnnaam tʋʋmdã pʋgẽ.

Yaa sɩd tɩ y segd n talla bõn-datɩ y vɩɩmã pʋgẽ, la gũus-y n da tall wags-n-taar yam ye. Y na n paama sũ-noog n yɩɩd y sẽn maandã pʋgẽ, y sã n ka makd y mengã ne neb a taaba.—Galat dãmba 5:26; 6:4.

Tõeeme tɩ y tagsdẽ tɩ y ka tar minim tɩ seke, n neẽ tɩ yaa toog ne-y tɩ y yãk bõn-datɩ sẽn zemse. Sã n yaa woto bɩ y tũ Biiblã sagl-kãngã: “Kɩll f tʋbr n kelg yam goam.” (Yelbũna 22:17) Bao-y sõngr y roagdbã la kiris-neb sẽn bɩ tẽebã pʋgẽ nengẽ. Yaa vẽeneg tɩ roagdbã la neb a taabã segd n yɩɩ maan-tɩ-zems rãmb la neb sẽn kengd raood zĩ-kãngã wɛɛngẽ. Kom-bɩɩsã sã n neẽ tɩ b modgd-b lame tɩ b tũ bõn-datɩ neb a taab sẽn yãk n kõ-ba, rẽ tõe n kɩtame tɩ b ka le tar sũ-noogo, n kɩt meng tɩ bõn-datɩ wã yãkr ka leb n tall võor ye. Yaa rẽ buud n paam bipugl a yembre. A yeelame: “Mam roagdbã ra yãkda bõn-datl woo bõn-datl n kõt maam, wala m yʋʋrã gʋlsg Wẽnnaam tʋʋmdã lekollẽ, koe-noogã moonego, lisg reegre, la so-pakd yɩɩbo. Mam modga wʋsg n pids-b fãa. Mam sã n dag n tõog n pids bõn-datl a yembr fãa, mam roagdbã ka pẽgd maam ye, b yãkda bõn-datl a to n yet tɩ m modg n pidsi. Rẽ kɩtame tɩ mam da getẽ tɩ yaa wa b ra modgda maam tɩ m pids bõn-datɩ. Yaams wa n kẽe maam tɩ m da ka leb n getẽ tɩ m maanda bũmb sẽn be bark ye.” Bõe n da ka lebd be? Bõn-datɩ wã fãa ra yaa sõma, la ra ka bi-puglã meng bõn-datɩ ye. Sẽn na yɩl n tõog n pids bũmb sẽn tar yõodo, yãmb mengã tog n tʋlgame n yãk y meng bõn-datɩ!

Tags-y a Zezi Kirist yelle. A Zezi sẽn da wa tẽng zugã, a ra mii a Ba wã sẽn da baood t’a maan bũmb ninga. A Zeova raabã maaneg ra ka bõn-datl b sẽn yãk n kõ a Zezi bal ye, la ra yaa tʋʋmd a Zeova sẽn bobl-a t’a maane. A Zezi tagsg ra yaa bõe tʋʋm kãngã zugu? A yeelame: ‘Mam dɩɩb yaa n maan sẽn tʋm-a maama ratem, la tɩ m maan bãmb tʋʋma n sɛ.’ (Zã 4:34) A Zezi sũur da nooma ne a Zeova raabã maanego, la a maana a Ba wã sẽn da baood t’a maanã. A Zezi gesa rẽ wala rɩɩbo, la a sã n da baas tʋʋmd ning a Ba wã sẽn da baood t’a maanã kõt-a-la sũ-noogo. (Hebre rãmbã 10:5-10) Yãmb me sã n tʋll n maan y roagdbã sẽn sagend-y tɩ y maanã, y tõe n paama sũ-noogo.

Ra yɛ-y ne tʋʋm sõma maaneg ye

Yãmb sã n dag n tõog n tar bõn-datl y yamẽ fãa, bɩ y modg sõma n pids-a. Galat dãmba 6:9 yetame: “Bɩ tõnd da yɛ ne tʋʋm sõama maaneg ye, tɩ bõe, wakat sã n ta tõnd na wʋk yaoodo tõnd sã n ka yɛ ye.” Da teeg-y y meng pãng bɩ y meng tõog bal ye. Yaa vẽeneg tɩ y na n sega zu-loeese, sẽn paase wakat ning menga, y na n wa yãame tɩ y modgrã ka wom biis ye. La Biiblã kõta tõnd bas-m-yam woto: “Fo sẽn maand bũmb ninga fãa, bɩ f tẽeg [Wẽnnaam] yelle, la b na n demsa fo sorã.” (Yelbũna 3:6) Yãmb sã n modgd n na n pids y tẽeb bõn-datɩ wã, a Zeova na n sõng-y lame.

N-ye, yãmb sã n tʋll n maan a Zeova raabã la y sã n modgd sẽn na yɩl n pids tẽeb bõn-datɩ wã, y na n tõogame n maan tɩ ‘neba fãa yã tɩ y bɩtame.’ (1 Tɩmote 4:15) Dẽ, y na n tõog n talla vɩɩm sẽn tar võor Wẽnnaam balengã pʋgẽ.

[Foto, seb-neng 31]

Y sã n karemd Biiblã la y bʋgsd y sẽn karmã zugu, y na n tʋlgame n balem a Zeova

[Foto, seb-neng 32]

A Zezi maana a Ba wã sẽn da baood t’a maanã