Pipi kiris-nebã, la a Moiiz Tõogã
Pipi kiris-nebã, la a Moiiz Tõogã
“Tõog yɩɩ tõnd gũuda n na n tɛ tõnd n taas Krist nengẽ.”—GALAT DÃMBA 3:24, Kãab-paalgã Koe-noogo.
1, 2. Israɛll neb nins sẽn sak a Moiiz Tõogã neerã paama nafa bʋse?
YƲƲMD 1513 sẽn deng Kirist zãmaana, a Zeova kõo Israɛll nebã noyã. A yeela nin-buiidã tɩ b sã n da sak a noorã, a ra na n ning-b-la bark tɩ b paam sũ-noog b vɩɩmã pʋgẽ.—Yikri 19:5, 6.
2 No-kãens b sẽn boond t’a Moiiz Tõogã, bɩ koɛɛg-koɛɛg bal tɩ “Tõogã,” ra yaa “sõngo la tɩrga la neere.” (Rom dãmba 7:12) No-kãens kɩtdame tɩ ned tall zʋg-sõma wala sõmblem, pʋ-peelem, la a zãag ne yoob la a tall nonglem ne a yagse. (Yikri 23:4, 5; Maankʋʋre 19:14; Tõodo 15:13-15; 22:10, 22) Tõogã kɩtame tɩ Zʋɩf rãmbã nong taaba. (Maankʋʋre 19:18) Sẽn paase, b ra pa segd n tall lagem-n-taar ne bu-zẽmsã sẽn pa sakd Tõogã, bɩ n kẽ kãadem ne b kom-pugli ye. (Tõodo 7:3, 4) Tõogã ra yaa wala ‘lalg’ sẽn welg Zʋɩf rãmbã ne Bu-zẽmsã, n gũ Wẽnnaam nin-buiidã tɩ buud a taabã tagsg la b minund ra bẽeg-b ye.—Efɛɛz rãmba 2:14, 15, Kãab-paalgã Koe-noogo; Zã 18:28.
3. Sẽn mik tɩ ned ba a yembr da pa tõe n tũ Tõogã tɩ zems zãngã yĩnga, bõe la Zʋɩf rãmbã wa n bãnge?
3 La baa Zʋɩf rãmb nins sẽn da modg wʋsg n yɩɩg b taabã ra pa tõe n tũ Wẽnnaam Tõogã tɩ zems zãng ye. A Zeova sẽn da kot tɩ b maana yɩɩda bãmb pãng bɩ? Ayo. Bũmb a ye sẽn kɩt tɩ Wẽnnaam kõ Tõogã Israɛllã ra yaa sẽn na yɩl n “puk nebã beegre.” (Galat dãmba 3:19, Kãab-paalgã Koe-noogo) Tõogã kɩtame tɩ Zʋɩf rãmb nins sẽn da yaa pʋ-peelem dãmbã bãng tɩ b sɩd rata Fãagda. Nin-kãng soabã sẽn wa wã, Zʋɩf rãmb nins sẽn yaa sɩd dãmbã sũy yɩɩ noogo. Ra pa na n kaoos la b fãag-b n yiis yel-wẽnã la kũumã sẽn yaa kãab beedã pʋgẽ ye.—Zã 1:29.
4. Wãn to la Tõogã yɩ ‘gũud n tɛ Zʋɩf rãmbã n taas Krist nengẽ’?
4 A Moiiz Tõogã ra segd n zĩnda wakat bilf yĩnga. Tʋm-tʋmd a Poll gʋlsa a kiris-nin-taasã n yeel tɩ Tõogã yaa ‘gũud sẽn na n tɛ bãmb n taas Krist nengẽ.’ (Galat dãmba 3:24, Kãab-paalgã Koe-noogo) Pĩnd wẽndẽ wã kamb gũud yãagda kamba n kẽngd kareng la a yãagd-b n wat yiri. Naoor wʋsgo pa yẽ la karen-saambã ye, a ra yãagda kambã karen-saambã nẽngẽ bala. Woto me, a Moiiz Tõogã ra yaa sẽn na yɩl n tall Zʋɩf rãmb nins sẽn yaa wẽn-zoɛtbã n kẽng Kirist nengẽ. A Zezi kãabame t’a na n zĩnda ne a karen-biisã “wakat fãa hal tɩ ta [zãmaanã] sɛɛbo.” (Matɩe 28:20) Dẽnd kiris-neb tigingã sẽn lugla tɛka, “gũuda” sẽn yaa Tõogã ra pa leb n tar yõod ye. (Rom dãmba 10:4; Galat dãmba 3:25) La Zʋɩf rãmb sẽn lebg kiris-nebã sʋka kẽer da pa wʋm sɩd kãngã sẽn tar yõod wʋsgã võor tao-tao ye. Rẽ kɩtame tɩ b ra ket n tũud a Moiiz Tõogã noy kẽer a Zezi vʋʋgrã poor menga. Neb a taab yẽ remsa b tagsgã. B sẽn maan woto wã, b kõo tõnd mak-sõng rũndã-rũndã. Bɩ d ges rẽ sẽn yɩ to-to.
Kiris-neb zãmsgã võor sẽn yaa paalga
5. Yãab pʋgẽ bõe la b yeel a Pɩɛɛr t’a maane, la bõe yĩng tɩ rẽ sãam a sũuri?
5 Yʋʋmd 36, tʋm-tʋmd a Pɩɛɛr paama Wẽnnaam vẽnegr sẽn yaa kãsenga. Rẽ sasa, a wʋma koɛɛg sẽn yit saasẽ sẽn kõ-a noor t’a kood liuuli la rũms n dɩ, t’a Moiiz Tõogã yaool n da yet tɩ b yaa rẽgdo. Rẽ sãama a Pɩɛɛr sũuri, bala a ra zɩ n ‘dɩ bũmb sẽn yaa rẽgd t’a sɩɩsg meng kis ye.’ La koɛɛgã yeel-a lame: “Wẽnd sẽn yɩlg bũmb ningã bɩ f ra saag n bool tɩ rẽgd ye.” (Tʋʋma 10:9-15, Sebr Sõngo) A Pɩɛɛr pa gãd Tõogã sẽn yeelã dem-dem ye, a remsa a tagsgã. Rẽ kɩtame t’a wa paam yam vẽnegr Wẽnnaam daabã wɛɛngẽ.
6, 7. Bõe n sõng a Pɩɛɛr t’a bãng t’a ra tõeeme masã n moon bu-zẽmsã neba, la bõe me la a bãng n paase?
6 Sɩd yɩɩ woto ne-a. Rap a tãab n kẽng roog ning a Pɩɛɛr sẽn da be wã, n kos-a t’a wa tũ-b n kẽng wẽn-zoɛt sẽn yaa Bu-zẽng ned sẽn pa kẽ bãong yʋʋr sẽn boond t’a Korney yiri. A Pɩɛɛr sika nin-kãensã zakẽ wã. A Pɩɛɛr sẽn wʋm yãabã võorã, vẽk-n-beoogo, a tũ-b lame n kẽng a Korney yirã. Beenẽ, a Pɩɛɛr kõo kaset sõma a Zezi Kirist wɛɛngẽ. Sasa kãnga a Pɩɛɛr yeelame: “Mam bãnga masã tɩ Wẽnnaam ka tũusd neb ye. La buud fãa sʋka, ned ninga sẽn zoet bãmba la sẽn maand tɩrga, yẽ soab tata bãmb yam.” Pa a Korney bal n tẽ a Zezi ye, la a roagdbã la a zo-rãmbã me tẽ-a lame, la vʋʋsem sõng “siga neb nins fãa sẽn kelgd Wẽnnaam koɛɛga zutu.” A sẽn sak n deeg tɩ ya a Zeova nug n be yellã pʋgẽ wã, a Pɩɛɛr “yeela bãmb tɩ b sak lisg ne Zusoaba yʋʋre.”—Tʋʋma 10:17-48.
7 Bõe n sõng a Pɩɛɛr t’a bãng tɩ Bu-zẽms nebã sẽn da pa tũud a Moiiz Tõogã ra tõeeme masã n lebg a Zezi Kirist karen-biisi? Yaa tẽeb yam-vẽenem. Wẽnnaam sẽn wilg t’a saka Bu-zẽms neb nins sẽn pa kẽ bãong n pʋdg a vʋʋsem sõngã b zutã yĩnga, a Pɩɛɛr bãngame tɩ b ra tõe n deega lisgu. A Pɩɛɛr bãngame me tɩ Wẽnnaam da pa baood tɩ Bu-zẽms kiris-nebã tũ a Moiiz Tõogã n yaool n deeg lisg ye. Y sã n da be wakat kãngã, rẽ yĩnga y ra na n saka wa a Pɩɛɛr n dems y tagsgã bɩ?
Kẽer da ket n tũuda “gũudã”
8. Bãongã wɛɛngẽ, kiris-neb kẽer sẽn da be Zerizalɛm da tara tags-bʋg sẽn yaa toor ne a Pɩɛɛre, la bõe yĩnga?
8 A Pɩɛɛr sẽn yi a Korney yirã poore, a kẽnga Zerizalɛm. Tiging ning sẽn be be wã wʋmame tɩ Bu-zẽms neb sẽn pa kẽ bãongã “reega Wẽnnaam goama,” la yel-kãng pa yɩ Zʋɩf buudã kiris-neb kẽer noog ye. (Tʋʋma 11:1-3) Baa ne b sẽn sak tɩ Bu-zẽms nebã ra tõe n lebga a Zezi karen-biisã, sẽn gãd-b bãongã dem-demã pẽdgame tɩ rɩlla Bu-zẽmsã neb tũ a Moiiz Tõogã n yaool n paam fãagre. La Bu-zẽmsã sẽn da yaẽ wʋsg tɩ Zʋɩf buudã kiris-neb sõor da paoodẽ wã, bãongã kõom da pa wat ne no-koeemd ye. Sul a yiibã kɩɩsa taab yel-kãngã zug n kaoos yʋʋm 13. (1 Korẽnt dãmba 1:10) Ad woto sɩd ra tog n yɩɩ makr meng n kõ pipi kiris-nin-kãensã, sẽn yɩɩd fãa Bu-zẽms kiris-neb nins sẽn da be Zʋɩf rãmbã tẽnsẽ wã!
9. Bõe yĩng tɩ ra tar yõod wʋsg tɩ b welg bãongã kõom yelle?
9 Yellã baas n taa a zug tẽn-sʋk yʋʋmd 49, kiris-neb sẽn yi Zerizalɛm n wa Ãntios sẽn be Siiri soolem a Poll sẽn da moondẽ wã. B sɩngame n moond n yetẽ tɩ rɩlla Bu-zẽmsã sẽn lebg kiris-nebã kẽ bãong wa sẽn zems ne a Moiiz Tõogã. La mo-yõsr kãseng ne no-koeemd n zĩnd bãmb ne a Poll la a Barnabas sʋka. B sã n da pa welg yel-kãngã, kiris-neb kẽere, b yaa Zʋɩf rãmb tɩ b yaa Bu-zẽms neb me, b ra na n lak n lʋɩɩ tẽebã wɛɛngẽ. Woto b seglame t’a Poll ne neb kẽer kẽng Zerizalɛm n tɩ sok kiris-neb siglgã taoor lʋɩtb sull n bãng yellã vɩʋʋgo, sẽn na yɩl n welg zu-loɛɛgã vugr wakat fãa yĩnga.—Tʋʋma 15:1, 2, 24.
Mo-yõsrã poore, b zemsa taaba
10. Yɛl kẽer bʋs la siglgã taoor lʋɩtb sull ges n yaool n dɩk sard sẽn tɩ loe ne Bu-zẽmsã sakre?
10 Tigisg b sẽn da maand sasa, yaa wa kẽer wẽe no-koeemd n dat tɩ nebã ket n kẽed bãongo, tɩ neb a taab yeel tɩ rẽ ye pa tɩlae ye. La pa nebã tagsg n lʋɩ taoor ye. B sẽn wẽ no-koeemd wʋsg poore, tʋm-tʋmdb a Pɩɛɛr ne a Poll togsa bãn a Zeova sẽn da maan kiris-neb nins sẽn pa kẽ bãongã yĩnga. B wilgame tɩ Wẽnnaam pʋdga a vʋʋsem sõngã Bu-zẽms neb sẽn pa kẽ bãong zutu. B sokame: ‘Zemsame tɩ kiris-neb tigingã zãgs neb nins Wẽnnaam sẽn sakã bɩ?’ Rẽ, karen-biig a Zak karma verse sẽn sõng neb nins fãa sẽn da be be wã tɩ b bãng a Zeova raab yɛllã wɛɛngẽ.—Tʋʋma 15:4-17.
11. Yel-bʋg la b ra pa segd n ges n dɩk sardã sẽn tɩ loe ne bãongã kõomã, la bõe n wilgd t’a Zeova bark ra bee sard kãng zugu?
11 Nebã fãa ra gũuda siglgã taoor lʋɩtb sull sẽn na n yɛɛlga. B sẽn yaa Zʋɩf rãmbã yĩng ra na n kɩtame tɩ b rɩk sard n yeel tɩ bãongã kõom yaa tɩlae bɩ? Ayo. Nin-kãensã sẽn tar kɩs-sɩdã ra rat n tũu Gʋlsg Sõamyã la Wẽnnaam vʋʋsem sõngã sor-wilgr ne b sũy fãa. B sẽn kelg kasetã fãa sẽn tɩ loe ne yellã poore, siglgã taoor lʋɩtb sull neb fãa sakame tɩ pa tɩlae ne Bu-zẽms kiris-nebã tɩ b kẽ bãong n tũ a Moiiz Tõogã ye. Saam-biisã sẽn wʋm sard kãngã b sẽn dɩkã, b sũy yɩɩ noogo, la tigimsã neb sõor sɩngame n ‘paasd daar fãa.’ Kiris-nin-kãensã sẽn sak Wẽnnaam sor-wilgr sẽn yaa vẽenegã paama leokr sẽn tik Gʋlsg Sõamyã zug sõma. (Tʋʋma 15:19-23, 28, 29; 16:1-5) La sok-kãseng n da ket n baood leokre.
Yaa wãn to yẽ ne kiris-neb sẽn yaa Zʋɩf rãmbã?
12. Sok-bʋg la b ra ket n pa leoke?
12 Siglgã taoor lʋɩtb sull wilga vẽeneg tɩ ra pa tɩlae ne Bu-zẽmsã neb sẽn lebg kiris-nebã tɩ b kẽ bãong ye. La yaa wãn to yẽ ne Zʋɩf rãmb nins sẽn yaa kiris-nebã? Siglgã taoor lʋɩtb sull sẽn dɩk sard ningã ra pa fasem yellã nen-kãngã ye.
13. Bõe yĩng tɩ ra pa zems tɩ b yeel t’a Moiiz Tõogã tũub ra yaa tɩlae ne fãagre?
13 Zʋɩf buudã kiris-neb kẽer sẽn da ‘wɩngd ne tõogã yɛlã’ ra ket n kẽesda b kamb bãong la b tũud a Moiiz Tõogã noy kẽere. (Tʋʋma 21:20) Kẽer zãaga zĩig n yetẽ meng tɩ ra yaa tɩlae ne kiris-neb nins sẽn da yaa Zʋɩf rãmbã tɩ b tũ a Moiiz Tõogã sẽn na yɩl n paam fãagre. Rẽ wɛɛngẽ wã b ra tudga wʋsgo. Wala makre, bõe yĩng tɩ kiris-ned ra na n kʋ rũng maoong n kos a yel-wẽnã sugri? Kirist maoongã kɩtame tɩ maoong-kãens ra pa leb n tar yõod ye. Yaa wãn to yẽ ne a Moiiz Tõogã sẽn da yeel tɩ Zʋɩf rãmbã ra segd n gũusame n da tall zood ne Bu-zẽms nebã? Ra na n yɩɩ toog wʋsg ne kiris-nebã sẽn yaa koe-moondb sẽn tar yẽesmã tɩ b sak gɩdg-kãensã, la b ket n tʋmd tʋʋmd ning b sẽn bobl-b sẽn yaa moon Bu-zẽmsã neb bũmb nins fãa a Zezi sẽn da zãms-bã. (Matɩe 28:19, 20; Tʋʋma 1:8; 10:28) * Bũmb pa wilgd tɩ b fasma yel-kãensã siglgã taoor lʋɩtb sull sẽn da wa n tigim taabã sasa ye. Ne rẽ fãa, tigingã pa kong sõngr ye.
14. Sor-wilgr bʋg Tõogã wɛɛngẽ la a Poll sɛb nins vʋʋsem sõng sẽn vẽneg-a t’a gʋlsã kõ-yã?
14 B kõo sor-wilgr yellã wɛɛngẽ, la ra pa sebr sẽn yit siglgã taoor lʋɩtb sullẽ ye, la yaa sɛb a taab vʋʋsem sõng sẽn vẽneg tʋm-tʋmdbã tɩ b gʋlse. Wala makre tʋm-tʋmd a Poll taasa Zʋɩf rãmbã la Bu-zẽmsã sẽn da be Roma koɛɛg sẽn tar pãnga. Lɛt-kãng pʋgẽ, a wilgame tɩ Zʋɩf hakɩk “yaa Zʋɩf a sũurẽ la sẽn kẽed-a bãong hakɩk yaa sẽn kẽed-a a sũurẽ.” (Rom dãmba 2:28, 29, Sebr Sõngo) Lɛt-kãng pʋgẽ yɛsa, a Poll rɩka makr n wilg tɩ pa tɩlae ne kiris-nebã tɩ b tũ a Moiiz Tõogã ye. A wilgame tɩ pag pa tõe n kẽ kãadem ne rap a yiib wakat yɛng ye. La a sɩdã sã n ki a ra tara sor n na n lebs n kẽ kãadem. Rẽ a Poll rɩka mak-kãng n wilg tɩ kiris-neb nins sẽn zae ne vʋʋsem sõngã ra pa tõe n sak a Moiiz Tõogã la b ye yɩ Kirist rẽnd ye. B ra segd n lebga “kũum, sã n yaa ne tõogã yelle,” sẽn na yɩl n tõog n paam lagem-n-taar ne Kirist.—Rom dãmba 7:1-5, Kãab-paalgã Koe-noogo.
B pa wʋm yellã võor nana-nana ye
15, 16. Bõe yĩng tɩ Zʋɩf buudã kiris-neb kẽer pa bãng t’a Moiiz Tõogã tũub ye pa tɩlae, la wãn to la rẽ wilgd tɩ d segd n ket n gũusda tẽebã wɛɛngẽ?
15 A Poll sẽn wilg tagsg ning Tõogã wɛɛngẽ wã ra pa be kɩɩsg ye. Rẽ, bõe yĩng masã tɩ Zʋɩf buudã kiris-neb ra pa bãng t’a Moiiz Tõogã tũub ye pa tɩlae? Bũmb nins sẽn kɩt tɩ yaa woto wã sʋka, a ye yaa b sẽn da pa tar yam-vẽenem tẽebã wɛɛngẽ wã yĩnga. Wala makre, b maana yam-kaalg n pa rɩ tẽeb rɩɩb sẽn yaa taok ye. (Hebre dãmba 5:11-14) B ra leb n pa wat kiris-neb tigissã wakat fãa ye. (Hebre dãmba 10:23-25) Tõe tɩ bũmb a to sẽn kɩt tɩ kẽer pa wʋm yellã võorã ra ya a Moiiz Tõogã halhaal mengã. Tõog-kãng ra tika yɛl nif sẽn ne zugu, yɛl b sẽn tõe n sɩɩse, wala wẽn-doogã la maan-kʋʋdbã. Ra yaa nana ne ned tẽeb sẽn paood t’a sak Tõogã n bas kiris-nebã noy sẽn tar pãng n yɩɩd sẽn tik yɛl ninsaal sẽn pa ne zutã.—2 Korẽnt dãmba 4:18.
16 A Poll gʋlsa Galat kiris-nebã n wilg bũmb a to sẽn kɩt tɩ neb kẽer sẽn yet tɩ b yaa kiris-nebã ra rat n tũ a Moiiz Tõogã ne b sũyã fãa. A wilgame tɩ nin-kãensã ra ratame tɩ b waoog-ba, n ges-b wa tũudum kãseng neba. B sẽn da pa rat tɩ b ges-b wa kiris-neb hakɩkã yĩnga, b ra sakame n na n kɩɩs noy kẽer n yɩ wa b zãmaana neba. Sẽn da pak-b n yɩɩd yaa b ta nebã yam, lakae b ra pa baood n na n ta Wẽnnaam yam ye.—Galat dãmba 6:12.
17. Wakat bʋg la tagsg ning sẽn zems a Moiiz Tõogã wɛɛngẽ wã lebg vẽeneg tɩ kɩɩsg kaẽ?
17 Kiris-neb nins sẽn tar yam-vẽenemã sẽn maag b yĩns n zãms sɛb nins vʋʋsem sõng sẽn vẽneg a Poll la neb a taab tɩ b gʋlsã, b wa n paama tagsg sẽn zems kɛpɩ Tõogã zugu. La yaa yʋʋmd 70 wã bal la tagsg ning sẽn zems a Moiiz Tõogã wɛɛngẽ wã lebg vẽeneg ne Zʋɩf buudã kiris-neb fãa tɩ kɩɩsg kaẽ ye. Wẽnnaam sẽn bas tɩ b sãam Zerizalɛm ne a wẽn-doogã la sɛb nins fãa sẽn tɩ loe ne maan-kʋʋrã yɛlã, kɩtame tɩ ned ba a yembr pa leb n tõe n tũ Tõogã nens fãa ye.
D sẽn tõe n tũ zãms-kãng to-to rũndã-rũndã
18, 19. a) Manesem bʋg la d segd n talle, la manesem bʋs la d segd n lak d mens ne sẽn na yɩl n ket n tar tẽeb sẽn tar pãnga? b) Bõe la a Poll makrã zãmsd tõnd sã n yaa ne sak noy nins saam-biis nins sẽn lʋɩt taoorã sẽn kõtã? (Ges-y zĩ-gũbrã, seb-neng 16)
18 Tõe tɩ y sã n ges yel-kãensã sẽn loog hal sẽn kaoosã bɩ y sokd y menga: ‘M sã n da vɩɩmdẽ rẽ sasa, m manesem da na n yɩɩ wãn to ne Wẽnnaam sẽn da pukd a raabã bilf-bilfã? M da na n gãda a Moiiz Tõogã dem-dem bɩ? Bɩ m da na n maaga m meng hal tɩ b wa wilg yɛlã võor vẽenega? La b sã n da wilg yɛlã vẽenega, m da na n saka rẽ ne m sũur fãa bɩ?’
19 Yaa sɩd tɩ d pa tõe n bãng tõnd sẽn da na n tall manesem ninga, d sã n da vɩɩmdẽ rẽ wẽnd ye. La d tõe n soka d mense: ‘Mam manesem yaa wãn to ne vẽnegr nins b sẽn kõt Biiblã võor-wʋmb wɛɛngẽ rũndã-rũndã wã? (Matɩe 24:45) B sã n kõ noy sẽn tik Gʋlsg Sõamyã zugu, m modgdame n na n tũ b võorã meng-menga, la pa b sẽn yeelã bal n pa tagse? (1 Korẽnt dãmba 14:20) M gũuda ne sũ-mar t’a Zeova wa leoke, m sã n tar sogsg tɩ wõnd b leoorã pa wat tao-tao bɩ?’ Tara yõod wʋsg tɩ d rɩ tẽebã rɩɩb b sẽn kõt rũndã-rũndã wã sõma, sẽn na yɩl n “da wa bʋdg ye.” (Hebre dãmba 2:1, Kãab-paalgã Koe-noogo) A Zeova sã n tũnugd ne a Gomdã, a vʋʋsem sõngã la a tẽng zug siglgã n kõt noyã, bɩ d kelg neere. D sã n maan woto, a Zeova na n ninga tõnd bark n kõ-d vɩɩm sẽn ka sɛt sũ-noog pʋgẽ.
[Tẽngr note]
^ sull 13 A Pɩɛɛr sẽn da wa n kẽng Ãntios sẽn be Siiri soolmẽ wã, a talla lagem-n-taar wʋsg ne Bu-zẽms tẽedbã. La Zʋɩf buudã kiris-neb sẽn wa n yi Zerizalɛm n wa wã, a Pɩɛɛr “targame n leb poorẽ n ka le lagemd ne bãmb ye, yẽ sẽn zoet zʋmb rãmba yĩnga.” Mams-y n ges Bu-zẽms kiris-nebã sũy sẽn da segd n sãam to-to, tʋm-tʋmdã b sẽn waoogdã sẽn zãgs t’a kõn dɩ ne-bã yĩnga.—Galat dãmba 2:11-13.
Y na n leokame tɩ bõe?
• Wãn to la a Moiiz Tõogã ra yaa ‘wa gũud n na n tɛ Zʋɩf rãmbã n taas Krist nengẽ’?
• Wãn to la y na n wilg bũmb ning sẽn kɩt t’a Pɩɛɛr manesmã sɩdã võor-wʋmb taoorã yɩ toor ne neb nins sẽn ‘da yet-b tɩ b kẽ bãongã’?
• Bõe la y zãms-yã, a Zeova sẽn pukd sɩdã rũndã-rũndã to-to wã wɛɛngẽ?
[Zãmsgã sogsgã]
[Zĩ-gũbri/Foto, seb-neng 16]
Ne sik-m-menga, a Poll sega makre
A Poll sẽn moon koe-noogã wʋsg tẽn-zẽms poore, a taa Zerizalɛm yʋʋmd 56. Beenẽ makr n da gũud-a. Tigingã paama kɩbar t’a zãmsda nebã n yetẽ t’a Moiiz Tõogã ye pa tar yõod ye. Kãsem dãmbã ra zoetame tɩ Zʋɩf buudã kiris-nin-paalsã na n wa lak n bas sɩdã, a Poll sẽn wilg vẽeneg t’a Moiiz Tõogã tũub ye pa tɩlae wã yĩnga, tɩ kɩt tɩ kiris-nin-kãens wa pa tall naneb ne a Zeova seglsã ye. Tigingã pʋgẽ, Zʋɩf buudã kiris-neb a naas n da maan pʋlengo, tõe tɩ b pʋlmame n na n yɩ Naziriẽ rãmba. Rẽ kɩtame tɩ b ra segd n kẽng wẽn-doogẽ wã n tɩ pids pʋlengã yel-maandɩ n baase.
Kãsem dãmbã kosa a Poll t’a yãag neb a naasã n kẽng wẽn-doogẽ wã la a yao b pʋlengã ligdi. A Poll da gʋlsa sẽn na ta sɛb a yiib vʋʋsem sõng sẽn vẽneg-a t’a gʋlse, tɩ seb-kãens ra wilgdẽ t’a Moiiz Tõogã tũub ra pa leb n yaa tɩlae sẽn na yɩl n paam fãagr ye. Ne rẽ fãa, a ra tara waoogr ne neb a taabã sũur-kaseto. A ra reng n gʋlsame: “Ne neb nins sẽn be tõog pʋgẽ wã, mam lebga wa ned sẽn be tõog pʋgẽ . . . tɩ mam tõe n paam neb nins sẽn be tõog pʋgẽ wã.” (1 Korẽnt dãmba 9:20-23) Baa ne a Poll sẽn da zɩ n kɩɩs Gʋlsg Sõamyã noy sẽn yaa kãsems yel-kãngã pʋgẽ wã, a tagsame t’a tõe n saka kãsem dãmbã sẽn yeelã. (Tʋʋma 21:15-26) A sẽn maan woto wã ra pa wẽng ye. Sã n yaa ne Gʋlsg Sõamyã, pʋleng ra pa wẽng ye, sẽn paase wẽn-doogã ra bee baleng yɩlemdã yĩnga, la pa bõn-naands pʋʋsg yĩng ye. Rẽnd sẽn na yɩl n da yɩ sabab tɩ nin-kãens lak n lʋɩ tẽebã wɛɛngẽ, a Poll maana wa b sẽn kos-a wã. (1 Korẽnt dãmba 8:13) Yaa vẽeneg t’a Poll ra segd n talla sik-m-meng wʋsg sẽn na yɩl n maan woto, la rẽ kɩtame tɩ tõnd nand-a n yɩɩda.
[Foto, seb-neng 14, 15]
Sẽn na maan yʋʋma, kiris-nebã tagsg ra yaa toor-toor a Moiiz Tõogã zugu