Soaalã yaoolem zaabr dɩɩbã yaa bõe?

YÃMB sã n wʋm tɩ b yet tɩ “Soaalã yaoolem zaabr dɩɩbo,” bõe n wat y yamẽ? Neb wʋsg yẽ na n tagsa a Leonard de Vinci (sẽn vɩɩmd yʋʋmd 1452-1519) sẽn gʋl bũmb ning peend zug Milã Itali soolmẽ wã, t’a yʋʋr yi wã yelle. Sẽn be yaa tɩ yʋʋm kobsã sẽn tong taabã pʋgẽ, gʋn-gʋndba, yɩɩn-yɩɩndb la sɛb gʋlsdb goma Yaoolem zaabr dɩɩbã yell wʋsgo.

La Yaoolem zaabr dɩɩbã pʋd n yaa bõe, la a võor yaa bõe ne ãdem-biisã rũndã-rũndã? Bãngr sɛbã la gom-biis võor sɛbã na n yeel-y lame tɩ Yaoolem zaabr dɩɩbã b sẽn boond me tɩ Soaalã zaabr dɩɩbã yaa rɩɩb ning a Zezi Kirist sẽn dɩ ne a tʋm-tʋmbã zaabr ning sẽn deng a kũumã sẽn yɩ maoongã. Zaab-kãng rɩɩbã yɩɩ a Zezi ne a karen-biis nins sẽn tall kɩs-sɩd ne-a wã sẽn lagem taab n dɩ tɛkem-tɛkem. Yaa rẽ n kɩt tɩ neb kẽer nong n boond-a tɩ Yaoolem zaabr dɩɩbã. La sẽn mik tɩ yaa Soaal a Zezi Kirist meng a toor n sigl rɩ-kãngã wã, b sẽn bool-a tɩ Soaalã zaabr dɩɩbã, sɩd zemsa kɛpɩ.

Zãmaan woo zãmaane, neb kʋʋng n sak n ki yɛl poorẽ, b sẽn da ges tɩ yel-kãens zemsa pẽgrã yĩnga. Bãmb sẽn ki woto wã nafa neb sãnda wakat bilf pʋgẽ bala. Baasg zãnga, baa kũ-kãensã sẽn tõe n wõnd b sɩd ra zemsame wã, d sã n mak-b ne a Zezi Kirist kũumã, d mikdame tɩ b yõodã pa kolg-a baa bilf meng ye. Sẽn tɩ yɩɩd fãa, ned a to pa zĩnd ãdem-biisã dũni sẽn gudgã pʋgẽ n ki, t’a kũumã pak dũniyã fãa gill neb woto ye. Bõe yĩnga?

Sẽn na yɩl n leok sok-kãngã la d sõng-y tɩ y bãng Soaalã zaabr dɩɩbã sẽn tar võor ning ne-yã, d kotame tɩ y karem sõsg ning sẽn pʋgdã.