Bels-y neb nins sẽn be sũ-sãang pʋgẽ wã
Bels-y neb nins sẽn be sũ-sãang pʋgẽ wã
‘A Zeova yãka maam tɩ m bels sũ-sãoong rãmba fãa.’—EZAI 61:1, 2.
1, 2. Ãnd dãmb la d segd n belse, la bõe yĩnga?
A ZEOVA sẽn yaa belsg hakɩk Wẽnnaamã zãmsda tõnd tɩ d sõng neb nins sẽn be toog pʋgẽ wã. A zãmsda tõnd tɩ d “paas neb nins raood sẽn boogã raoodo,” la d bels neb nins fãa sẽn be sũ-sãang pʋgẽ wã. (1 Tesalonik rãmba 5:14, Kãab-paalgã Koe-noogo) Sõngr woto raab sã n wa yaa tɩlae, d sõngda d tẽed-n-taasã. D leb n wilgda d nonglem ne neb nins sẽn pa be tigingã pʋgẽ wã, baa ne neb nins sẽn pa tall nonglem ne tõnd pĩndã.—Matɩe 5:43-48; Galat dãmba 6:10.
2 A Zezi Kirist karma bãngr-gomdã sẽn tɩ loe ne tʋʋm-kãnga wã n wilg t’a pidsa yẽ zugu, n yeele: “Zusoab a Wẽnnaam [vʋʋsmã] bee ne maam. Tɩ bõe, bãmb yãka maam n tʋm maam tɩ [m tɩ] togs naong rãmba koe-noogo, . . . la m bels sũ-sãoong rãmba fãa.” (Ezai 61:1, 2; Luk 4:16-19) Kiris-neb nins sẽn zae ne vʋʋsem sõng tõnd wakatã bãnga hal sẽn kaoos tɩ tʋʋm-kãngã paka bãmb me, tɩ ‘piis a taabã’ naagd bãmb ne sũ-noog a pʋgẽ.—Zã 10:16.
3. Nebã sã n wa sok tɩ: “Bõe yĩng tɩ Wẽnnaam basdẽ tɩ sabaab rãmbã watẽ?” wãn to la d tõe n sõng-ba?
3 Sabaab sã n wa tɩ nebã sũy sãam wʋsgo, b nong n sokdame tɩ: ‘Bõe yĩng tɩ Wẽnnaam basdẽ tɩ sabaab rãmbã watẽ?’ Biiblã leokda sok-kãngã vẽenega. La tõe n kaoosame tɩ ned sẽn pa zãms Biiblã wa tõog n wʋm leok-kãngã võor sõma. A Zeova Kaset rãmbã sɛb kõta sõngr yel-kãngã wɛɛngẽ. * La pipi, neb kẽer sẽn yã verse Biiblã pʋgẽ, wala Ezai 61:1, 2 wã yɩɩ belsg n kõ-ba, bala verse kãens wilgdame tɩ Wẽnnaam tʋllame tɩ ãdem-biisã paam belsgo.
4. Poloyn, wãn to la a Zeova Kaset soab a ye tõog n sõng bipugl sẽn be sũ-sãang pʋgẽ, la wãn to la kɩba-kãngã tõe n sõng yãmb tɩ y sõng neb a taaba?
4 Kom-bɩɩs ne kãsemb fãa rata belsgo. Poloyn bi-bɩɩg a ye yam-ka-m-meng sẽn da tar kosa ned a sẽn mi saglse. Ne sõmblem, a zoa sẽn ya a Zeova Kaset soab sõsa ne yam n wa bãng tɩ sogsg la sãmbs n da namsd bipuglã. “Bõe yĩng tɩ wẽngã be wʋsg woto? Bõe yĩng tɩ nebã namsdẽ? Bõe yĩng tɩ mam yao bipuglã sẽn yaa koamsã namsdẽ? Bõe yĩng tɩ mam sũurã ka laafɩ? Tõnd wẽn-doogẽ wã, b yetame tɩ yaa Wẽnnaam n dat woto. La sã n yaa woto, rẽnd m pa na n ye tẽ Wẽnnaam ye!” Kaset soabã pʋʋsa a Zeova a sũurẽ n yaool n yeele: “M sũur yaa noog f sẽn sok maam rẽ zugã. M na maan m sẽn tõe n sõng-fo.” Kaset soabã yeelame tɩ yẽ me sẽn da wa n yaa biiga, a ra tara sãmbse, t’a Zeova Kaset rãmbã sõng-a. Ad a sẽn yeele: “M bãngame tɩ Wẽnnaam pa namsd neb ye. A nonga nebã, n dat bũmb ning sẽn na n naf-b n yɩɩge, la ka la bilfu, a na n waa ne toeeng kãseng tẽngã gill zugu. Bãasã, zu-loees nins kʋʋlma sẽn wat ne wã, la kũumã na n saame, tɩ nin-sakdbã na n paam vɩɩm sẽn pa sat tẽng zug ka.” A wilga bipuglã Wilgri 21:3, 4; Zoob 33:25; Ezai 35:5-7 la 65:21-25. B sẽn sõs n kaoos poore, bipuglã yeela woto tɩ wilgdẽ t’a paama yolsgo: “Masã m miime tɩ m vɩɩmã tara võore. M tõe n lebg n wa ges-f lame bɩ?” B sɩnga Biibl zãmsg ne-a, n maand naoor a yiib semen fãa.
Ne belsg ning Wẽnnaam sẽn kõtã
5. D sã n tar nimbãan-zoeere, bõe la d na n maan n kõ belsg sɩd-sɩda?
5 D sã n wa rat n bels neb a taabã, sɩd zemsame tɩ d tall nimbãan-zoeere. D na n modgame n tall goam la koe-zom sẽn wilgd tɩ d sɩd rata ned ning sẽn be sũ-sãoong pʋgẽ wã neere. Pa d sẽn na n tũ goam b sẽn togs yĩngr-yĩngr bal la d tõe n maan woto ye. Biiblã yeta tõnd tɩ d ‘tõe n gũu tõnd tẽeb pidsg ne sũ-mar la ne Gʋlsg Sõamyã belsgo.’ (Rom dãmba 15:4) D sẽn tar dẽ d yamẽ, d tõe n wilga Wẽnnaam Rĩungã sẽn ya a soab wakat sẽn zems sasa, la d tik Biiblã zug n wilg a sẽn na n welg masã zu-loeesã to-to. Rẽ poore d tõe n wilga bũmb ning sẽn kɩt t’a yaa saagr hakɩkã. Yaa woto la d na n kõ belsgo.
6. Bõe la d segd n sõng nebã tɩ b bãnge, tɩ kɩt tɩ b tõog n dɩ belsg ning Gʋlsg Sõamyã sẽn kõtã nafa wʋsgo?
6 Sẽn na yɩl n tɩ ned tõog n dɩ belsg ning b sẽn kõtã nafa wʋsgo, a segd n bãnga sɩd Wẽnnaamã, a sẽn sɩd ya a soaba, la a bãng t’a kãabsã zemsa ne bas-yardo. Tõnd sã n baood n na n sõng ned sẽn nan pa a Zeova balemda, yaa sõma tɩ d wilg bũmb nins sẽn pʋgdã võore. 1) Belsgã sẽn be Biiblã pʋgẽ wã yita sɩd Wẽnnaam a Zeova nengẽ. 2) A Zeova ya a Soab ning sẽn tõeyã fãa sẽn yaa saasã la tẽngã Naanda. A yaa nonglem Wẽnnaam, a tara sõmblem wʋsgo, la a yaa sɩd soaba. 3) D sã n paam Wẽnnaam Gomdã bãngr sẽn zems kɛpɩ tɩ rẽ kɩt tɩ d pẽneg-a, d tõe n paama pãng n mao ne yɛlã. 4) Biiblã tara verse rãmb sẽn gomd zu-loees takɩ neb toɛy-toɛy sẽn mao ne yelle.
7. a) D sã n gomd n tadgd belsg ning Wẽnnaam sẽn kõt ‘wʋsg Kirist maasem yĩnga’ zugu, bi-bʋs la rẽ tõe n wome? b) Wãn to la y tõe n bels ned sẽn yã t’a talla manesem wẽngã?
7 Neb kẽer kõo sũ-sãang rãmb sẽn zoe n mi Biiblã belsg tẽebã wɛɛngẽ, n karem 2 Korẽnt dãmba 1:3-7. B sẽn da wa n maand rẽ, b gom n tadga b sẽn yeel tɩ: ‘Tõnd paamda belsg wʋsg Kirist maasem yĩnga’ zugu. Verse kãngã tõe n sõnga ned t’a bãng tɩ Biiblã yaa belsg yẽgr a sẽn segd n tags a zug n yɩɩd pĩndã. Rẽ leb n tõe n yɩɩ yẽbgr tɩ d tõe n sõs ne-a n paas sasa a taaba. Ned sã n tagsdẽ t’a zu-loeesã yaa bõn-wẽns a sẽn maan yĩnga, d pa na n kao a bʋʋd ye, la d tõe n yeel-a lame tɩ 1 Zã 2:1, 2 ne Yɩɩl Sõamyã 103:11-14 goama kõta belsgo. Yaa woto la d sɩd belsd neb a taabã ne belsg ning Wẽnnaam sẽn kõtã.
Nen-kɛglmã bɩ farã sã n wa keng vɩɩmã wʋsgo
8, 9. Wa sẽn zemse, wãn to la d tõe n kõ neb nins sẽn nams nen-kɛglmã yĩngã belsgo?
8 Nen-kɛglmã bɩ zabã kenga neb milyõ rãmb ka tɛk vɩɩm. Wãn to la d tõe n bels-ba?
9 Kiris-neb hakɩkã gũusdame n da wa wilg ne b goam bɩ b manesem tɩ b teenda sull bɩ a to dũni kãngã zabã pʋsẽ ye. (Zã 17:16) La wa sẽn zemse, b tũnugda ne Biiblã n wilg tɩ masã yel-toodã pa na n kell n be wakat fãa ye. B tõe n karma Yɩɩl Sõamyã 11:5 n wilg a Zeova sẽn tagsd to-to ne neb nins sẽn nong nen-kɛglmã wall b karem Yɩɩl Sõamyã 37:1-4 n wilg Wẽnnaam sẽn sagl tɩ tõnd mens ra rok d sũuri, la tɩ d teeg Wẽnnaamã. Goam nins sẽn be Yɩɩl Sõamyã 72:12-14 pʋgẽ wã wilgda Salomo Kãseng a Zezi Kirist sẽn yaa Rĩm n dɩt naam masã saasẽ wã sẽn tagsd to-to ne ka taal dãmbã sẽn namsd nen-kɛglmã yĩngã.
10. Yãmb sã n vɩɩmda zabr sʋk tɩ kaoos yʋʋma, wãn to la verse nins b sẽn wilgã tõe n bels-yã?
10 Neb kẽer zĩnda tẽngẽ sul toor-toor sẽn zab taab naamã poorẽ. Bãmb getame tɩ zabrã ne a sẽn wat ne yɛl ninsã naaga vɩɩmã zu-loees pʋsẽ. B gesame tɩ b sẽn tõe n maan bũmb ning tɩ sãoog n yɩɩda, yaa b sẽn na n zoe n kẽng tẽng a to. La bãmb wʋsg pa tõogd n maan woto ye. Kẽer sẽn mak rẽ maaneg yõy yãgsame. Neb nins sẽn tõog n kẽng tẽn-zẽngã mikame tɩ b põsa zu-loees n tɩ paam zu-loees a taab bala. D tõe n dɩka Yɩɩl Sõamyã 146:3-6 n sõng nin-kãens tɩ b tall saagr ne bũmb sẽn são tẽn-zẽngẽ zoe n kẽnge. Bãngr-gomd ning sẽn be Matɩe 24:3, 7, 14 bɩ 2 Tɩmote 3:1-5 pʋgẽ wã tõe n sõng-b lame tɩ b bãng yellã võor zãnga, la yɛl nins sẽn namsd-bã võore, sẽn dat n yeel tɩ d vɩɩ dũni kʋdrã saab wakate. Verse rãmb wala Yɩɩl Sõamyã 46:2-4, 9, 10 la Ezai 2:2-4 tõe n sõng-b lame tɩ b bãng tɩ saagr sɩd beeme tɩ beoog-daar na n talla laafɩ.
11. Verse bʋs n bels pag Afirik nen-taoor babgã, la bõe yĩnga?
11 Zabr sẽn da wa n yik Afirik nen-taoor babgẽ wã, pag a yembr n zoe n bas a yir wakat ning vẽenã sẽn da ket n niid wa saagã. Rẽ kɩtame tɩ rabeem la sũ-sãams wʋsg wa tar-a. Rẽ poore, yẽ ne a zakã neb sẽn da wa n be tẽn-zẽnga, a sẽn wa n tar pʋg sasa, a sɩdã yikame n dɩk b kãadmã sebr n yõoge, la a rig-a ne a pʋgã ne b biriblã sẽn da tar yʋʋm piigã, la a lebg labe. B sẽn wa n karem Filip rãmba 4:6, 7 la Yɩɩl Sõamyã 55:23 t’a kelgã, n paas Gũusg Gasgã la Réveillez-vous ! wã sõss sẽn wilgd Biiblã verse rãmb võore, a baas n paama belsg t’a vɩɩmã tall võor ne-a.
12. a) Yols-bʋg la Gʋlsg Sõamyã kõt neb nins sẽn namsd wʋsg naongã yĩngã? b) Wãn to la a Zeova Kaset soab sẽn be Azi tõog n sõng a raadenga?
12 Laogã kaalem kenga neb milyõ rãmb wʋsg vɩɩm. Wakat ninga rẽ me yaa zabrã ne a sẽn wat ne yɛl ninsã yĩnga. Wakat kẽere, goosneema taoor dãmb sẽn pa tall yam la b yaa rat-tɩ-loog la pʋ-lik rãmbã sãama tẽngã ligdi, la b modg nin-buiidã n deeg b paoongã. La neb n be n zɩ n paam dũni kãngã laogã wʋsg ye. Bãmbã fãa tõe n paama belsg n bãng tɩ Wẽnnaam wilgame t’a na n sɩd yolsa neb nins sẽn teeg-a wã, la t’a na n sɩd waa ne dũni paalg sẽn na n tall tɩrlem t’a nebã na n dɩ b nus tʋʋma nafa. (Yɩɩl Sõamyã 146:6, 7; Ezai 65:17, 21-23; 2 Pɩɛɛr 3:13) A Zeova Kaset soab a yembr sẽn be Azi tẽngẽ sẽn wʋm a raadeng sẽn maand yɩɩr naongã yĩngã, a wilgame tɩ bũmb ning sẽn be be wã bee dũniyã gill zugu. B sẽn sõs Matɩe 24:3-14 la Yɩɩl Sõamyã 37:9-11 zugã, wa n baasa ne Biibl zãmsg sẽn maand wakat fãa.
13. a) Pʋlem-faad sã n belga neb wʋsg tɩ b sũy sãame, wãn to la d tõe n tũnug ne Biiblã n sõng-ba? b) Neb wʋsg sã n tagsdẽ tɩ vɩɩmã yel-tood wilgdame tɩ Wẽnnaam kae, wãn to la y tõe n modg n kɩt tɩ b tags tɩrga?
13 Nebã sã n nams yʋʋm wʋsg bɩ b sã n pʋlem-b pʋlem-faad tɩ rẽ wa sãam b sũyã, b tõe n yɩɩ wa Israɛll nebã sẽn da wa n be Ezipt n da pa kelge, ‘b sũ-sãoongã’ yĩngã. (Yikri 6:9) Sã n wa yaa woto, d sã n wilg Biiblã sẽn tõe n sõng-b tɩ b tõog n mao ne masã zu-loeesã to-to la b gil bẽds sẽn sãamd neb wʋsg vɩɩm zaalmã, tõe n naf-b lame. (1 Tɩmote 4:8b) Neb kẽer geta vɩɩmã yel-tood sẽn namsd-bã wa kaset sẽn wilgd tɩ Wẽnnaam kae, bɩ t’a toog kae ne-b ye. Y tõe n tika verse rãmb sẽn zems zug n kɩt tɩ b tags tɩrga, tɩ sõng-b tɩ b bãng tɩ Wẽnnaam kõo sõngre, la neb wʋsg pa sak sõngrã ye.—Ezai 48:17, 18.
D bels nebã, seb-bɛd bɩ tẽn-digimd poore
14, 15. Sabaab sẽn da wa n kẽes neb wʋsg sũ-sãang kãseng pʋgẽ, wãn to la a Zeova Kaset rãmbã ges b yelle?
14 Seb-kẽenga, tẽn-digimdgu, bugum bɩ bũmb pusgr tõe n waa ne sabaabo. Sũ-sãamsã tõe n tuka neb ka tɛka. Bõe la d tõe n maan n bels sẽn põs-bã?
15 Nebã ratame n bãng tɩ ned n be n dat b neere. Bi-bees sẽn kẽesd rabeem sẽn da wa n wẽ tẽng a yembre, kẽesa neb wʋsg sũ-sãang kãseng pʋgẽ. Bãmb wʋsg yãa bõne. B zak neba, b zak soben dãmba, ne b zo-rãmb n ki, tɩ b tʋʋm sãam, tɩ bãan ning b sẽn da tara menem. A Zeova Kaset rãmbã sõnga b yagsã, n wilg b nimbãan-zoeere ne b toogã sẽn yaa kãsengã, la b taas-b belsg goam sẽn yit Biiblã pʋgẽ. Neb wʋsg talla mi-beoog wʋsg ne b sẽn ges b yell woto wã.
16. Sabaab sẽn zĩnd Salvadoor babg a yembrẽ, bõe yĩng t’a Zeova Kaset rãmbã sẽn be be wã koe-mooneg wom biis wʋsgo?
16 Yʋʋmd 2001 wã pʋgẽ, Salvadoore, tẽn-digimdg sẽn tall pãng n zĩndi, tɩ bɛgd zoe yeddd n kʋ neb wʋsgo. A Zeova Kaset soab a yembr sẽn da tar yʋʋm 25, la bipugl ning a sẽn da segl n na n kẽ kãadem ne wã yap a yiib sẽn yaa kompugli n pa sabaabã pʋgẽ. Biriblã ma ne bipugl ning sẽn da na n yɩ a pagã yɩɩ tao-tao n tʋm wʋsg koe-moonegã pʋgẽ. Neb wʋsg yeel-b lame tɩ yaa Wẽnnaam n dɩk neb nins sẽn ki wã bɩ tɩ ra yaa Wẽnnaam daabo. A Zeova Kaset kãens tika Yelbũna 10:22 n wilg tɩ Wẽnnaam pa tʋll tɩ tõnd nams ye. B karma Rom dãmba 5:12 n wilg tɩ yaa rao a yembr yel-wẽnd n wa ne kũumã, lakae pa Wẽnnaam daab ye. B leb n taasa belsg koɛɛg ning sẽn be Yɩɩl Sõamyã 34:19, Yɩɩl Sõamyã 37:29, Ezai 25:8, la Wilgri 21:3, 4 pʋgẽ wã. Sẽn mik tɩ pagb a yiibã meng zak neb n maan kaalem sabaabã pʋgẽ wã yĩng kɩtame tɩ neb wʋsg kelg sõma n yɩɩda. La b sɩnga Biiblã zãmsg ne neb wʋsgo.
17. Sabaab wakate, sõng-bʋg buud la d tõe n kõ?
17 Sabaab wakate, y tõe n sega ned sẽn dat sõngr tao-tao. Rẽ tõe n baoodame tɩ y bool logtore. Tõe tɩ d segdame n dɩk ned n kẽng logtor yiri, bɩ n maan d sẽn tõe fãa n kõ rɩɩb la gãag zĩiga. Yʋʋmd 1998, sabaab woto sẽn zĩnd Itali, kɩba-kɩt a yembr yeelame t’a Zeova Kaset rãmbã “kõta sõngr sẽn sɩd nafde, n sõngd sẽn namsd-bã fãa, n pa sokd b sẽn yaa tũudum ning neb ye.” Zĩis kẽere, yɛl nins b sẽn deng n togs tɩ na n waa yaoolem dayã wata ne namsg wʋsgo. Zĩ-kãensã, a Zeova Kaset rãmbã tẽegda Biiblã bãngr-goam la b belsd nebã ne bas-yard ning Biiblã sẽn kõt n wilgdẽ tɩ Wẽnnaam Rĩungã na n waa ne bãan hakɩk n kõ ãdem-biisã.—Yelbũna 1:33; Miise 4:4.
Ned sã n maan yõore, bɩ d kõ a zaka rãmb belsgo
18-20. Ned sã n maan kaalem zak pʋgẽ, bõe la y toe n yeel bɩ n maan n kõ belsgo?
18 Daar fãa, neb milyõ rãmb n be sũ-sãoong pʋgẽ neb b sẽn nong kaalem yĩnga. Y tõe n sega neb nins sẽn be sũ-sãoong woto pʋgẽ wã, y sã n wa moond koe-noogã bɩ y sã n wa be y daar fãa tʋʋma zugu. Bõe la y tõe n yeel bɩ y maan n kõ belsgo?
19 Nedã sũur sãamame tɩ loog nug bɩ? Zakã pida ne kiidã neb bɩ? Y tõe n dat n goma wʋsgo, la tara yõod tɩ y maan gũusgu. (Koɛɛg Soaba 3:1, 7) Tõe tɩ sẽn zems yaa y sẽn na n pʋʋs-a ne a zaamẽ toogo, n bas sebr sẽn zems sẽn tik Biiblã zugu (seb-bila, zʋrnall bɩ seb-vãoogo), la y lebg n kẽng rasem a wãn poor n tɩ ges y sã n tõe n kõo sõngr n paase. Wakat sẽn zems sasa, bɩ y wilg Biiblã goam sẽn kengd raoodo. Rẽ tõe n kõo yolsgo. (Yelbũna 16:24; 25:11) Y pa tõe n vʋʋg kũum wa a Zezi sẽn maana ye. La y tõe n wilga Biiblã sẽn yet bũmb ning sẽn ki-bã wɛɛngẽ, la pa sasa y sẽn na n mak n kɩɩs ziri tagsa ye. (Yɩɩl Sõamyã 146:4; Koɛɛg Soaba 9:5, 10; Ezekɩɛll 18:4, NW ) Y tõe n lagma taab n karem Biiblã kãabs sẽn tɩ loe ne vʋʋgrã. (Zã 5:28, 29; Tʋʋma 24:15, NW ) Y tõe n sõsa kãab-kãens võor zugu, n wilg Biiblã kɩbay sẽn tɩ loe ne vʋʋgrã. (Luk 8:49-56; Zã 11:39-44) Wilg-y-b zʋg-sõma nins me nonglem Wẽnnaamã sẽn kõt tõnd saag-kãnga wã sẽn tarã. (Zoob 14:14, 15; Zã 3:16) Wilg-y woto fãa sẽn naf yãmb mengã to-to, la bũmb ning sẽn kɩt tɩ y tar bas-yard ne-bã.
20 Ned sã n be sũ-sãang pʋgẽ a ned kaalem yĩnga, y sã n bool-a t’a wa Rĩungã Roogẽ, t’a wa yã neb sẽn sɩd nong taaba, la sẽn mi taab raood kengre, tõe n sõng-a lame. Suyɛɛde, pag a yembr yãame tɩ yẽ sẽn da baood bũmb ning fãa a vɩɩmã pʋgẽ yaa woto bal kɛpɩ.—Zã 13:35; 1 Tesalonik rãmba 5:11.
21, 22. a) D sã n dat n bels neda, bõe la d tog n maane? b) Wãn to la y tõe n bels ned sẽn zoe n mi Gʋlsg Sõamyã neere?
21 Yãmb sã n miẽ tɩ ned n be sũ-sãang pʋgẽ a ned kaalem yĩnga, yaa kiris-neb tigingã pʋgẽ tɩ pa a pʋgẽ me, wakat ninga y yam yuusdame tɩ y pa mi y sẽn na n yeel bɩ n maan bũmb ning bɩ? Gɛrk gom-biig ning b sẽn nong n lebgd Biiblã pʋgẽ tɩ “belsã” rat n yeela sɩd-sɩd tɩ “bool ned t’a wa yɛgl-f n zĩndi.” Yɩ bɛlsd hakɩk rat n yeelame tɩ f kõ f meng n sõng sẽn be-b sũ-sãang pʋgẽ b ned kaalem yĩngã.—Yelbũna 17:17.
22 La yaa wãn to masã, ned ning yãmb sẽn dat n belsã sã n zoe n mi Biiblã sẽn yet bũmb ning kũumã, rondã la vʋʋgrã wɛɛngẽ? Zoa tẽeb sẽn yaa yembr ne-f sã n wa be ne-fo, woto yen-yen wã tõe n kõo belsgo. Sũ-sãangã soab sã n dat n gom bɩ y kelg neere. Ra tags-y tɩ yaa tɩlae tɩ y gom wʋsg ye. Y sã n karem verse rãmba, ges-y-b wa Wẽnnaam goam sẽn belsd yãmb y yiibã. Wilg-y tɩ yãmb y yiibã sɩd tẽeda kãab-kãensã. Y sã n tall Wẽnnaam nimbãan-zoeerã buud la y taas sɩd nins sẽn be a Gomdã pʋgẽ sẽn tar yõodã, y tõe n sõnga neb nins sũy sẽn sãam b ned kũum yĩngã, tɩ b paam belsg la pãng sẽn yit “belsg fãa Wẽnnaam” a Zeova nengẽ.—2 Korẽnt dãmba 1:3.
[Tẽngr note]
^ sull 3 Bãngr Sẽn Tar n Debd Vɩɩm Sẽn-Kõn-Saẽ Wã, sak a 8; Comment raisonner à partir des Écritures, seb-neng 374-381, 237-241; Y a-t-il un Créateur qui se soucie de vous ? sak 10, la seb-bil ning sẽn yaa, Wẽnnaam Sɩd Maanda Yɩɩr Tõnd Yĩng bɩ? wã.
Y na n leokame tɩ bõe?
• Sabaab sã n wa, ãnd la neb wʋsg ningd taale, la wãn to la d tõe n sõng-ba?
• Bõe la d tõe n maan n sõng neb a taabã tɩ b rɩ belsg ning Biiblã sẽn kõtã nafa wʋsgo?
• Yel-bʋs n kõt neb wʋsg sũ-sãams yãmb babgẽ wã, la wãn to la y tõe n bels-ba?
[Zãmsgã sogsgã]
[Foto rãmba, seb-neng 31]
D moon koɛɛg sẽn kõt belsg hakɩk toog wakate
[Fotã soaadbã]
Refugee camp: UN PHOTO 186811/J. Isaac
[Foto, seb-neng 32]
Zoa sã n be ne-fo, rẽ meng tõe n kõo belsgo