Kom-bɩɩs sẽn noogd a Zeova sũuri
Kom-bɩɩs sẽn noogd a Zeova sũuri
B segla sõs-kãensã kom-bɩɩs nins sẽn be a Zeova Kaset rãmbã sʋkã yĩnga. Woto yĩnga, d sagenda kom-bɩɩsã tɩ b zãms sõs-kãngã sõma la b kõ leoor wʋsgo, b sã n wa na n zãms-a tigingã Gũusg Gasg zãmsgẽ.
“M biiga, maan yam n kõ maam sũ-noogo tɩ m paam n leok sẽn paoogd-a maama.”—YELBŨNA 27:11.
1, 2. a) Wilg-y bũmb ning sẽn wilgd tɩ dũniyã yɛl sẽn be yamleoog ne-yã bal pa rat n yeel tɩ y pa zems ne yɩ kiris-ned ye. (Rom dãmba 7:21) b) Bõe la a Azaf makrã zãmsd yãmba? (Ges-y zĩ-gũbrã seb-neng a 7 wã.)
MAMS-Y n ges yãmb sẽn na n daad futu. Y sẽn wa n getẽ wã, zĩig pʋgẽ, y yãa fuug sẽn ta y yam. A kõbgã la a modɛllã me taa yãmb yam, t’a yaa no-noogo. La rẽ poore, y ges-a-la sõma n paase. Linga yãmb y sẽn yã tɩ fuugã noor yidgame la tɩ sẽebã pa yɩ sõma wã. Baa fuugã be rasãnd me, a sẽebã pa sõma ye. Yãmb na n yiisa y ligd n da fu-yook woto bɩ?
2 Mak-y rẽ ne yãkr yãmb sẽn yaa kiris-ned sẽn yaa bi-bɩɩgã sẽn segd n maane. Pipi wã, tõe n wõnda dũni kãngã yɛlã bee yamleoog wʋsgo. Wala makre, tõe tɩ yãmb karen-bi-taasã sɛgda taab n deemdẽ tɩ be yamleoogo, n dɩkd dorge, n yũud rãam la b mi n tar rolsem manesem, bɩ b maand pag ne rao lageng tɩ b nan pa kẽ kãadem ye. Yãmb mi n data vɩ-kãngã buud bɩ? Yãmb datame n yɩ soog-m-mens rãmb wa bãmb baa yaa bilf bɩ? Sã n yaa woto bɩ y ra yãg n tags tɩ y yaa wẽnga, la tɩ y pa zems ne y yɩ kiris-ned ye. Biiblã meng sak n deegame tɩ dũniyã yamleoog tõe n neka ratem wʋsgo, baa ne neb sẽn dat n ta Wẽnnaam yamã.—2 Tɩmote 4:10.
3. a) Bõe yĩng tɩ dũniyã yɛl baoob pa tar yõodo? b) Wãn to la kiris-ned a yembr bilg dũniyã sũ-noog baoob faoolem?
3 Masã, wa y sẽn na n maan ne fuug y sẽn dat n da wã, d bõos tɩ y maag y yĩng n ges bũmb nins dũni kãngã sẽn tarã. Sok-y y meng woto: ‘Zãmaan kãngã yɛlã sõmblem taa zĩ-bʋgo?’ Biiblã yetame tɩ ‘dũniyã loogdame.’ (1 Zã 2:17) Dũniyã sũ-noog pa kaoosd ye. Sẽn paase, wẽn-kɩɩsg manesem wata ne baas-beed wʋsgo. Rẽ sɩd pa be nafr ye. Kiris-ned a yembr sẽn da segd n mao ne a sẽn bool tɩ “tood nins a sẽn paam a sẽn sãam a bi-bɩɩlmã yĩngã” yetame: “Dũniyã tõeeme n wõnd a bee yamleoog wʋsgo. La a ratame tɩ d tẽ tɩ d tõeeme n kẽes d meng a reemã pʋgẽ tɩ pa wa ne yell ye. La vẽenega pa sɩd ye. Dũniyã na n dɩka yãmb n tʋme, la y sã n wa ye pa tar yõod ne-a la a sẽn basd-y tɩ y lʋɩ.” * Bõe yĩng tɩ y na n vɩɩmd woto n sãam y bi-bɩɩlmã?
Koglg ne “wẽng soaba”
4, 5. a) Bilf sẽn deng a kũumã, bõe la a Zezi pʋʋs n kos a Zeova? b) Bõe yĩng tɩ woto ra yaa kosg sẽn zemse?
4 Kom-bɩɩs nins sẽn be a Zeova Kaset rãmbã sʋkã sẽn mi tɩ zãmaan kãngã pa tar bõn-sõng n na n kõ-bã maoodame n da tall zood ne dũni kãngã ye. (Zak 4:4) Yãmb bee kom-bɩ-kãens sẽn yaa kɩs-sɩd dãmbã sʋk bɩ? Sã n yaa woto, y zemsa pẽgre. Yaa sɩd tɩ pa nana tɩ y kɩɩs y taabã pãn-tusdg la y yɩ toor ye, la ned n be n tõe n sõng-y tɩ y maan woto.
5 Bilf sẽn deng a kũumã, a Zezi pʋʋsa a Zeova n kos-a t’a “gũ” a karen-biisã “tɩ wẽng soaba ra tõog-b ye.” (Zã 17:15) A Zezi ra bee bʋʋm a sẽn pʋʋs n kos woto wã. A bãngame tɩ ra pa na n yɩ nana ne a karen-biisã tɩ b yɩ burkĩmb ye, baa b yʋʋmã sẽn da yaa to-to fãa. Bõe yĩnga? Bũmb a yembr sẽn be, wa a Zezi sẽn sak n deegã, a karen-biisã ra na n maoa ne bɛ sẽn tar pãng tɩ ninsaal nif pa ne-a, sẽn yaa ‘wẽng soab’ a Sʋɩtãan munaafɩɩka. Biiblã yetame tɩ malɛg-wẽng kãngã “gõoda wa gɩgemd sẽn kelemda n baood a sẽn tõe n paam a soaba n sãam.”—1 Pɩɛɛr 5:8.
6. Wãn to la d mi t’a Sʋɩtãan pa zoet kom-bɩɩsã nimbãanega?
6 Ãdem-biisã sẽn be tẽng zug tɛka, a Sʋɩtãan namsd-b-la ne toom sẽn loog noore, tɩ woto kõt-a sũ-noogo. Mams-y n ges yel-beed sẽn loog nug ning a Sʋɩtãan sẽn wa ne a Zoob la a zakã neb zutã. (Zoob 1:13-19; 2:7) Tõe tɩ y tẽra kɩbay y sẽn wʋm sẽn wilgd tɩ tũu ne a Sʋɩtãan sẽn nong nen-kɛglmã sababo. A Sʋɩtãan gõodame n na n sãam neda, la a sẽn baood n na n yõk nedã, a pa zoet kom-bɩɩsã nimbãaneg ye. Wala makre, pipi yʋʋm kob-gĩndã sɩngrẽ, a Herood yiisa no-wẽng n kɩt tɩ b kʋ komdibli nins fãa sẽn da be Bɛtlehɛm n da zems yʋʋm a yiib bɩ n pa ta woto wã. (Matɩe 2:16) Ya a Sʋɩtãan n ning tʋlsem kãngã a Herood sũurẽ wã. Rẽ fãa yaa sẽn na yɩl n kʋ biig ning sẽn da na n wa lebg Mesi ning Wẽnnaam sẽn kãabã, sẽn na n wa sãam a Sʋɩtãan wa Wẽnnaam bʋ-kaoorã sẽn da wilgã! (Sɩngre 3:15) Vẽenega, a Sʋɩtãan pa zoet kom-bɩɩsã nimbãaneg ye. A sẽn dat bal ya a sãam ninsaalb wʋsg wa a sẽn tõe tɛka. Rẽ yaa vẽeneg n yɩɩd rũndã-rũndã, bala b riga a Sʋɩtãan t’a yi saasẽ n sig tẽng zugu, “la a sũ-puugra yaa kãsenga a sẽn bãng t’a wakat yaa bilfa yĩnga.”—Wilgri 12:9, 12.
7. a) Wãn to la a Zeova yaa lebend fasɩ ne a Sʋɩtãana? b) A Zeova tagsg yaa bõe ne vɩɩma su-noog paoongo?
7 Sẽn yaa lebend fasɩ ne a Sʋɩtãan sẽn tar ‘sũ-puugr kãsengã,’ a Zeova “nimbãan-zoeera” yaa wʋsgo. (Luk 1:78) A yaa nonglmã mak-sõng sẽn tɩ yɩɩd fãa. Sɩda, tõnd Naandã pukda zʋg-kãseng kãngã wʋsg hal tɩ Biiblã yetẽ: “Wẽnnaam yaa nonglem.” (1 Zã 4:8) Ad sɩd yaa welgr meng n be zãmaan kãngã wẽnnaam la Wẽnnaam ning tõnd sẽn tar zu-noog n na n balmã sʋka! A Sʋɩtãan baood n na n sãama neba, la a Zeova ‘ka rat tɩ ned ba a ye sãam’ ye. (2 Pɩɛɛr 3:9) A Zeova geta ãdem-biig fãa vɩɩm, la yãmb me vɩɩmã wa bũmb sẽn tar yõod wʋsgo. A Gomdã pʋgẽ, a sã n sagend-y tɩ y ra yɩ dũniyã rẽnda, a pa baood n na n gɩdg-y tɩ y ra paam vɩɩmã sũ-noogo, bɩ n gɩdg-y tɩ y ra maan y sẽn dat ye. (Zã 15:19) Sẽn yaa lebende, a rat n kogla yãmb ne wẽng soabã. Y saasẽ Ba wã ratame tɩ y paam bũmb sẽn yaa sõma wʋsg n yɩɩd dũni kãngã yõ-noogr sẽn pa kaoosdã. A ratame tɩ yãmb paam “vɩɩm hakɩkã,” vɩɩm sẽn kõn sa tẽng zug arzãnẽ. (1 Tɩmote 6:17-19, Kãab-paalgã Koe-noogo) A Zeova ratame tɩ y tõoge, la a sagenda yãmb tɩ y bao n ta bõn-datl kãngã. (1 Tɩmote 2:4) Sẽn paase, a Zeova maanda yãmb booll sẽn yaa kãsenga. Yaa bool-bʋgo?
‘Kõ-y maam sũ-noogo’
8, 9. a) Kũun bʋg la y tõe n kõ a Zeova? b) Wãn to la a Sʋɩtãan paoogd a Zeova, wa a Zoob makrã sẽn wilgã?
8 Yãmb zoe n maana y zo-nongr kũun t’a sũurã yɩ noog la a wilg a mi-beoog ne kũunã bɩ? Tõe tɩ y tagsa neer n yaool n na n bãng kũun buud ning sẽn zems ne nin-kãng soabã. Masã tags-y sok-kãngã zugu: Kũun bʋg buud la y tõe n kõ y Wẽnnaam la y Naand a Zeova? Pipi wã, tags-kãngã tõe n wõnda a ka võor ye. Bõe la sẽn tõeyã fãa soabã rat ninsaal nengẽ? Bõe la yãmb tõe n kõ-a t’a pa zoe n tarẽ? Biiblã leokda Yelbũna 27:11 pʋgẽ woto: “M biiga, maan yam n kõ maam sũ-noogo tɩ m paam n leok sẽn paoogd-a maama.”
9 Wa y sẽn bãng y Biiblã zãmsg pʋgẽ wã, ya a Sʋɩtãan n paoogd a Zeova. A yetame tɩ ned balemda Wẽnnaam a meng nafr yĩng bala, la pa a nong-a lame ye. A Sʋɩtãan yetame tɩ b sã n bas nebã tɩ b nams fãa, pa na n yã n kaoos la b bas sɩd balengã ye. Wala makre, ges-y a Sʋɩtãan sẽn yeel a Zeova bũmb ning nin-tɩrg a Zoob wɛɛngẽ: “Yãmb wẽe yãgr n gũbg yẽ ne a zaka la a sẽn so wã fãa. Yãmb ninga a tʋʋma fãa barka. A piisa pida tẽngã. La masã, bɩ y tẽeg y nug n sɩɩs bũmb nins a sẽn tarã, y na mik t’a tʋʋs yãmba.”—Zoob 1:10, 11.
10. a) Wãn to la d mi t’a Sʋɩtãan pa yeel tɩ ya a Zoob bal n pa tar burkĩnd Wẽnnaam taoore? b) Wãn to la naam sẽn-ka-to wã yell pak yãmba?
10 Wa b sẽn wilg Biiblã pʋgẽ wã, a Sʋɩtãan pa yeel tɩ ya a Zoob bal n pa tar kɩs-sɩd ye, la yaa neb nins fãa sẽn maand Wẽnnaam daabã. Yãmb me naaga be. Sɩda, a Sʋɩtãan goma ãdem-biisã fãa yell a sẽn yeel a Zeova tɩ: “Ned [pa a Zoob bal ye, la yaa ned fãa] na n dɩka a sẽn tar fãa n kõ a vɩɩm yĩnga.” (Zoob 2:4) Yãmb nee tʋʋmd ning y sẽn tar gom-kãseng kãngã pʋgẽ wã bɩ? Wala b sẽn wilg Yelbũna 27:11 pʋgẽ wã, a Zeova yetame tɩ bũmb n be y sẽn tõe n kõ-a, tɩ rẽ kɩt t’a tõog n leok a Sʋɩtãan sẽn baood a noorã. Mams-y n gese. Ãndũniyã fãa Naab sẽn ka to wã boonda yãmb me tɩ y wa kõ y leokr gom-kãseng ning b sẽn wa ne tɩ pak zãmaan fãa nebã. Ad sɩd yaa zɩɩb la zu-noog sẽn yaa kãsems tɛkẽ la y tara! Y tõe n maana a Zeova sẽn kot yãmb bũmb ningã bɩ? A Zoob maana woto. (Zoob 2:9, 10) Yaa woto la a Zezi n paas neb ka tɛk a taab maan pĩnd wẽndẽ n tõk masã, tɩ kom-bɩɩs wʋsg naag b sʋkã. (Filip rãmba 2:8; Wilgri 6:9) Yãmb me tõe n maana woto. La yaa y bãng vẽeneg tɩ ned kam fãa segd n yãka a sẽn be a soab poorẽ, gom-kãseng kãnga pʋgẽ. Ne yãmb manesmã y na n wilga y sã n bee a Sʋɩtãan poorẽ bɩ y sã n bee a Zeova poorẽ, t’a tõog n leok bɛ wã sẽn baood a noorã. Y na n yãk n zĩnda ãnd poorẽ?
A Zeova rata yãmb neere
11, 12. Yãmb sã n yãk n na n balem a Zeova bɩ n pa balm-a, pak-a-la wʋsg bɩ? Wilg-y leokrã võore.
11 Yãmb sẽn yãkd n na n maan bũmb ningã sɩd paka a Zeova bɩ? Neb sõor sẽn sek pa zoe n tall b kɩs-sɩd t’a tõe n leok a Sʋɩtãan wa sẽn segd sɩda? Yaa sɩda, b manesmã zoe n wilgame t’a Sʋɩtãan sẽn yet tɩ ned ba a yembr pa maand a Zeova raabã nonglem yĩngã yaa rõdg bala. La a Zeova ratame tɩ y zĩnd a poorẽ naam sẽn-ka-to wã wɛɛngẽ, bala a rata yãmb mengã neere. A Zezi yeelame: “Yãmb Ba sẽn be [saasẽ] ka rat tɩ kom-bõoneg kãens ned a yembr sãam ye.”—Matɩe 18:14.
12 Vẽenega, yel-manesem ning yãmb sẽn na n tall yel-kãngã pʋgẽ wã paka a Zeova. Sẽn yɩɩd woto menga, y sẽn na n tall manesem ningã mat-a lame. Biiblã wilgda vẽeneg tɩ ninsaalbã tʋʋm tõe n noogame bɩ sãam a Zeova sũuri. Wala makre, Israɛll nebã sẽn da wa n tõdg a Zeova noor ka tɛkã, ‘a sũur sãamame.’ (Yɩɩl Sõamyã 78:40, 41) Sẽn deng a Nowe wakatẽ sa-kãsengã sasa, “ninsaalba wẽng [ra] yaa wʋsg dũniyã zugu,” la a Zeova “sũur sãamame.” (Sɩngre 6:5, 6) Tags-y n ges rẽ sẽn dat n yɛɛlga. Yãmb sã n tall manesem sẽn pa zemse, y tõe n sãama yãmb Naandã sũuri. Rẽ pa rat n yeel tɩ Wẽnnaam ka pãng bɩ tɩ ya a sũurã bal la a kelgd ye. A nong-y lame la a rat y neere. La yãmb sã n maan sẽn yaa tɩrga, a Zeova sũur noomame. A sũurã noomame, pa a sẽn na n ye paam n leok a Sʋɩtãanã bal ye, leb n ya a sẽn tõe masã n keo yãmbã yĩnga. La a sɩd rat n maana rẽ. (Hebre dãmba 11:6) Ad Wẽnnaam a Zeova sɩd yaa nonglem Ba tɛkẽ!
Bark wʋsg masã tɛka
13. Wãn to la a Zeova baleng wat ne bark masã menga?
13 A Zeova raabã maaneg sẽn kõt bark ninsã pa sẽn wat beoog-daarã bal ye. Kom-bɩɩs wʋsg sẽn be a Zeova Kaset rãmbã sʋk paamda sũ-noog masã menga, la b bee bʋʋm. “[A Zeova] noor yaa tɩrga, a kõta sũ-noogo,” woto la yɩɩl gʋlsdã gʋls-yã. (Yɩɩl Sõamyã 19:9) A Zeova mii sẽn são ne tõnd n yɩɩd ninsaal buud fãa. A Zeova tũnuga ne no-rɛɛs a Ezai n yeel woto: “Mam yaa [a Zeova], yãmb Wẽnnaam. Mam zãmsda yãmb y meng sõngr yĩnga. Mam yãagda yãmb sor ninga yãmb sẽn tog n tũ wã zugu. Yãmb sã n da sak mam tõodã, yãmb laafɩ wã ra na n yɩɩ wa kʋɩls koom la yãmb tɩrlma ra na n yɩɩ wa ko-kãsenga ko-wiisi.”—Ezai 48:17, 18.
14. Wãn to la Biiblã noy tõe n sõng yãmb tɩ y ra kẽ sam tɩ wa wʋm-yã?
14 Biiblã noy sakr na n sõnga yãmb tɩ y põs toog la yɩɩre. Wala makre, Biiblã yetame tɩ neb nins sẽn nong ligdã ‘kẽesa b mens to-kãseng pʋgẽ.’ (1 Tɩmote 6:9, 10) Yãmb neeme tɩ verse kãensã goam sẽn bilgd toog ningã paamda pidsg y kom-bɩ-taas kẽer zut bɩ? Komdibli la kompugli kẽer rɩgsda sam wʋsgo, b sẽn dat fut ligd sẽn yaa toog la teed sẽn yi paalma yĩng bala. F sã n zɩlg f meng ne sam sẽn na yɩl n da teed f sẽn sɩd pa tõe n paame, n segd n yao sama la yõod roaglgã n kaoos tɩ yaool n sa, woto yaa yembd buudu.—Yelbũna 22:7.
15. Wãn to la Biiblã noy kogend yãmb ne toog ning yoob sẽn wat ne wã?
15 Bãng-y tɩ yoobã me yaa yelle. Dũniyã gill zugu, yʋʋmd fãa, kompugli sõor ka tɛk sẽn pa kẽ kãadem n dɩgsd pʋse. Kẽer dogame n pa rat n ges b kambã yell la b pa tar tõog n na n wub-b me ye. Kẽer yiisda pʋgã tɩ b sũur kasetã namsd-ba. Rap la pagb a taab me sẽn yaa kom-bɩɩs yaa yoob bãas wala SƖDA wã n longd-ba. La ne ned sẽn mi a Zeova, bũmb ning sẽn yaa wẽng n tɩ yɩɩd fãa ya a sẽn sãamd a zoodã ne a Zeova wã. * (Galat dãmba 5:19-21) Biiblã bee bʋʋm la a sẽn yet woto wã: “Bɩ y zoe yoobo.”—1 Korẽnt dãmba 6:18.
D maan “Wẽnnaam sẽn tar sũ-noogã” raabo
16. a) Wãn to la d mi t’a Zeova ratame tɩ y paam sũ-noog y bi-bɩɩlmã wakate? b) Bõe yĩng t’a Zeova yãk noy n dat tɩ yãmb tũ?
16 Biiblã wilgame t’a Zeova yaa ‘Wẽnnaam sẽn tar sũ-noogo.’ (1 Tɩmote 1:11, NW ) Wẽnnaam datame tɩ yãmb me paam sũ-noogo. Sɩda, yẽ mengã Gomd yetame: “Maan sũ-noog f bi-bɩɩlma wakate.” (Koɛɛg Soaba 11:9) La a Zeova getame tɩ zʋʋg masã vɩɩmã. A tõe n deng n yãa manesem sõma la manesem wẽng sẽn tõe n wa wa ne biis ninsã kaoosg zugẽ. Yaa rẽ yĩng la a sẽn sagend-y woto wã: “Tẽeg f naanda yell f bi-bɩɩlem wakate tɩ f tooga wakat nan ka ta ye, la tɩ yʋʋm nins fo sẽn na n yeel tɩ f ka tar sũ-nooga wakat nan ka kolg ye.”—Koɛɛg Soaba 12:1.
17, 18. Wãn to la pʋgsad a yembr sẽn yaa kiris-ned wilg a sũ-noog a Zeova balengã pʋgẽ, la wãn to la y tõe n paam sũ-no-kãng buudu?
17 Rũndã-rũndã, kom-bɩɩs wʋsg paama sũ-noogo, b sẽn balemd a Zeova wã yĩnga. Wala makre, a Lina sẽn tar yʋʋm 15 wã yeelame: “M tõe n zẽka m zugu. M yĩnsã tara laafɩ, m sẽn pa yũud sɩgaar la dorgã yĩnga. M paamda sagls sẽn yaa sõma wʋsg tigingã pʋgẽ, tɩ sõngd maam tɩ m zabd ne a Sʋɩtãan makrã sẽn yaa kɛgeng wʋsgã. M tara sũ-noogo, bala m tara tũud-n-ta-sõma Rĩungã Roogẽ. Sẽn tɩ yɩɩd fãa, m tara saagr sẽn ka mak-n-taag sẽn yaa vɩɩm sẽn-kõn-sa tẽng zugu.”
18 Wala a Lina, kiris-neb wʋsg sẽn yaa kom-bɩɩs maooda wʋsg tẽebã yĩnga, tɩ kõt-b sũ-noogo. B mikdame tɩ b vɩɩmã, baa ne a sẽn yaa toog wakat ningã, a sɩd tara bõn-datl la saagr hakɩk beoog-daar yĩnga. Bɩ y ket n balemd Wẽnnaam sẽn sɩd dat yãmb neerã. Noog-y a sũurã, t’a na n kõ-y-la sũ-noog masã la wakat sẽn-kõn-sa!—Yɩɩl Sõamyã 5:12.
[Tẽngr note rãmbã]
^ sull 3 Ges-y sõsg ning sẽn yaa: “Sɩdã lebs n kõo maam m vɩɩmã” sẽn be yʋʋmd 1996, zĩ-likr kiuug rasem 22 Réveillez-vous ! wã pʋgẽ.
^ sull 15 Yaa bũmb sẽn kõt belsg tɩ d bãng tɩ ned sã n tek yam n kos sugri, n bas wẽngã maaneg la a vẽneg a yel-wẽnã n togse, a Zeova ‘kõta sugr wʋsgo.’—Ezai 55:7.
Y tẽrame bɩ?
• Yel-bʋg sẽn yit ‘wẽng soab’ a Sʋɩtãan nengẽ la y segd n mao ne?
• Wãn to la y tõe n noog a Zeova sũuri?
• Wãn to la Biiblã wilgd t’a Zeova rata yãmb neere?
• Bark kẽer bʋs la y paamda, y sã n balemd a Zeova?
[Zãmsgã sogsgã]
[Zĩ-gũbri/Foto, seb-neng a 7]
A yɩɩ nin-tɩrga, la kellẽ-la bilf t’a lak n lʋɩ
A Azaf ra ya a Zeova roogẽ wã yɩɩn-yɩɩnd yʋʋr sẽn yi tẽn-kʋdem wẽndẽ Israɛllẽ wã. A pʋd n maana yɩɩl b sẽn yɩɩl zãma sʋk balengã pʋgẽ. La baa ne a Azaf sẽn da tar zu-no-kãsems a Zeova balengã pʋgẽ wã, wakat n zĩnd tɩ neb a taabã wẽn-kɩɩsg manesem yamleoog ra tar-a, t’a ra getẽ tɩ yaa wa b ra kɩɩsda Wẽnnaam noyã tɩ bũmb pa maand-b ye. A Azaf sak n deega woto: “Kella bilf bala tɩ mam nao wã yõsge; mam nao wã da rat n salgame. Tɩ bõe, mam da maanda sũ-kiir ne wuk-m-mens rãmba mam sẽn yã nin-wẽns [laafɩ wã] yĩnga.”—Yɩɩl Sõamyã 73:2, 3.
Kaoosg poore, a Azaf kẽngã Wẽnnaam doogẽ wã n tɩ pʋʋs yellã zugu. A ye lebs n gesa yɛlã ne tẽeb nini, n bãng t’a Zeova kisa wẽngã, la tɩ wakat n wat tɩ nin-wẽnsã ne nin-tɩrsã na n kẽeb b sẽn bʋde. (Yɩɩl Sõamyã 73:17-20; Galat dãmba 6:7, 8) Hakɩka, nin-wẽnsã bee salg zugu. B na n wa baas n paama sãoongo, a Zeova sã n wa na n sãam zãmaan kãngã sẽn yaa wẽn-kɩɩsdb zãmaanã.—Wilgri 21:8.
[Foto rãmba, seb-neng a 9]
A Zeova sɩd rata yãmb neere, la a Sʋɩtãan rat n sãam-y lame
[Foto, seb-neng 10]
Kom-bɩɩs wʋsg paamda sũ-no-kãseng b sẽn balemd a Zeova ne b kiris-nin-taasã