Kom-bɩɩse, a Zeova pa na n yĩm y tʋʋmdã ye!

“Wẽnnaam yaa tɩrga, la bãmb kõn yĩm yãmb tʋʋmda ne y nonglma yãmb sẽn wilg bãmb yʋʋra yĩnga, yãmb sẽn sõng bãmb neba n ket n sõngdẽ wã ye.”—HEBRE DÃMBA 6:10.

1. Wãn to la Hebre la Malaki sɛbã wilgd t’a Zeova nanda tʋʋmd ning y sẽn maand a yĩngã?

YÃMB zoe n maana bũmb n kõ y zoa t’a pa pʋʋs-y bark bɩ? Tõe n sãama y sũur wʋsgo, a sã n ges y sẽn maana wa bõn-zaalga, sẽn yɩɩd fãa, a sã n pʋd n yĩm y yel-sõmdã menga. La ad sɩd yaa toor wʋsg ne d sẽn na n tʋm ne d sũur fãa n kõ a Zeova! Biiblã yetame: “Wẽnnaam yaa tɩrga, la bãmb kõn yĩm yãmb tʋʋmda ne y nonglma yãmb sẽn wilg bãmb yʋʋra yĩnga, yãmb sẽn sõng bãmb neba n ket n sõngdẽ wã ye.” (Hebre dãmba 6:10) Tags-y gom-kãensã võor zugu. A Zeova sã n da yĩmẽ bũmb nins yãmb sẽn maan la y ket n maand a tʋʋmdã pʋgẽ wã, a sɩd ra na n gesa rẽ wa bũmb sẽn pa tɩrga, wa yel-wẽnde. Ad sɩd yaa Wẽnnaam sẽn sɩd nand tõnd tʋʋmdã!—Malaki 3:10.

2. Bõe yĩng t’a Zeova baleng sɩd yaa zu-no-kãsenga?

² Y sẽn balemd Wẽnnaam kãngã sẽn nand y tʋʋmdã la y maand a raabã yaa zu-no-kãsenga. Sẽn mik tɩ yaa neb milyaar a yoob n be dũniyã gill zug t’a Zeova Kaset rãmbã yaa bãmb milyõ a yoob bal tɩ yãmb paam n be-b sʋkã, ad sɩd yaa zu-no-kãseng n kõ-yã. Sẽn paase, y sẽn kelgd la y sakd koe-noogã wilgdame t’a Zeova geta yãmb mengã yelle. Sẽn yɩɩd fãa, a Zezi yeelame: “Ned ka tõe n wa mam nengẽ tɩ ka m Ba sẽn tʋm-a maama n bool-a ye.” (Zã 6:44) N-ye, a Zeova sõngda ned kam fãa t’a rɩ Kirist maoongã nafa.

Tall-y mi-beoog ne y zu-no-kãsengã

3. Wãn to la a Koore komdibli wã wilg b mi-beoogo, b sẽn tar zu-noog n balemd a Zeova wã yĩnga?

³ Wa d sẽn yã sõsg ning sẽn loogã pʋgẽ wã, yãmb tara zu-noog neb a taabã sẽn pa tar n na n noog a Zeova sũuri. (Yelbũna 27:11) Y pa segd n ges rẽ wa bõn-zaalg ye. Yɩɩl nins vʋʋsem sõng sẽn vẽneg tɩ b gʋlsã a yembr pʋgẽ, a Koore komdibli wã wilga b mi-beoogo, b sẽn tar zu-noog n balemd a Zeova wã yĩnga. D karemdame: “Daar a ye yãmb samand pʋgẽ n são rasem tusr zĩig a to. Mam nong n yalsa mam Wẽnnaam digno-koakẽ wã n yɩɩd tɩ zĩnd nin-wẽns yiya.”—Yɩɩl Sõamyã 84:11.

4. a) Bõe n tõe n kɩt tɩ kẽer get a Zeova balengã wa bũmb sẽn gɩdgd-b tɩ b pa tõe n maan b sẽn date? b) Wãn to la a Zeova mengã wilgd t’a neeme la a na n dola a sõgen dãmbã?

⁴ Yaa woto la yãmb tagsd ne zu-noog ning y sẽn tar n balemd y saasẽ Ba wã bɩ? Yaa sɩd tɩ wakat ninga, yaa wa a Zeova balengã gɩdgda yãmb tɩ y pa tõe n maan y sẽn datã ye. Yaa sɩd tɩ d sã n dat n tũ Biiblã noy d vɩɩmã pʋgẽ, rɩlla d mong d meng bũmbu. La bũmb ning fãa a Zeova sẽn baood tɩ yãmb maana wat n baas n yɩɩ yãmb nafr yĩnga. (Yɩɩl Sõamyã 1:1-3) Sẽn paase, a Zeova nee modgr nins y sẽn maandã la a wilgd vẽeneg t’a nanda y kɩs-sɩdã. Sɩda, a Poll gʋlsame n wilg t’a Zeova “yaa neb nins sẽn baood bãmba roanda.” (Hebre dãmba 11:6) A Zeova baooda soay n na n maan woto. Israɛll pĩnd wẽndẽ no-rɛɛs-tɩrg yeelame: “[A Zeova] nif geta dũniyã zĩiga fãa n dat n sõng neb nins sẽn dat Wẽnnaam ne b sũyã fãa wã.”—2 Kɩbaya 16:9.

5. a) Bõe la y tõe n maan me n sɩd wilg tɩ y nonga a Zeova ne y sũur fãa? b) Bõe yĩng tɩ tõe n wõnd yaa toog tɩ y gom ne neb a taabã y tẽebã yelle?

⁵ Y tõe n wilga sõma-sõma me tɩ y nonga a Zeova ne y sũurã fãa, y sã n gom a yell neb a taabã taoore. Yãmb zoe n paama sor n na n gom y tẽebã yell ne y karen-bi-taas kẽer bɩ? Sɩngrẽ wã, tõe n wõnda y pa tar daood n na n maan woto ye, la rẽ tõe n kẽes-y-la rabeem bilf menga. Y tõe n soka woto: ‘M na n maana wãna, b sã n laad mam?’ bɩ ‘b sã n tags tɩ mam tũudmã yaa tũudum sẽn pa wõnd a taaba, m maanda wãna?’ A Zezi  wilgame tɩ pa neba fãa n na n kelg Rĩungã koɛɛg ye. (Zã 15:20) La rẽ pa rat n yeel tɩ y vɩɩmã fãa tõre, b na n yaal-y lame la b zãgs-y ye. Sẽn yaa lebend ne woto, kom-bɩɩs wʋsg sẽn ya a Zeova Kaset rãmb yãa neb sẽn dat n kelge, la b taabã meng talla waoogr ne-b n paase, b sẽn gãd b tẽebã kãn-kãeyã yĩnga.

‘A Zeova na n sõng-y lame’

6, 7. a) Wãn to la yʋʋm 17 bipugl tõog n kõ a karen-bi-taas kasetã? b) Bõe la a Jennifer sẽn maan bũmb ningã zãmsd yãmba?

⁶ La wãn to la y tõe n paam daood n gom y tẽebã yell vẽenega? Bõe yĩng tɩ y pa na n yãk yam ne y sũur fãa n togs nebã sɩd vẽenega, b sã n sok yãmb bũmb y tũudmã wɛɛngẽ? Ges-y a Jennifer sẽn da tar yʋʋm 17 wã kɩbare. A yeelame: “M da rɩta midi lekollẽ wã. Kompugli nins sẽn da rɩt taabl yɛng ne maama wa n sõsda tũudma zugu, tɩ bipugl a yembr sok maam mam tũudum sẽn ya a soaba.” A Jennifer da yɛɛsdame n pa rat n leok bɩ? A sak n deegame n yeel tɩ: “N-ye, bala m da pa mi b sẽn da na n tall manesem ning ye.” Rẽnd a Jennifer maana bõe? Ad a sẽn yeele: “M yeela kompugli wã tɩ m ya a Zeova Kaset soaba.” La a paase: “Pipi wã, yɩɩ wa ling-b lame. Yaa wa b ra tagsdame t’a Zeova Kaset rãmbã ra yaa neb sẽn pa wõnd b taabã. Rẽ kɩtame tɩ b sogs maam yɛl toor-toore, tɩ m tõog n wilg-b tɩ b sẽn tagsd to-to tõnd wɛɛngẽ wã yaa ziri. Baa daar n kãng poore, kompugli wã kẽer da wat n maand-m-la sokr wakat-wakate.”

⁷ A Jennifer maana a bãngẽ, a sẽn tũnug ne sor ning a sẽn paamã n moon a tẽebã bɩ? Ayo! Ad a sẽn yeele: “Midi wã rɩɩb poore m sũur yaa noog wʋsgo. Masã, kompugli kãensã mii a Zeova Kaset rãmbã sẽn sɩd yaa b rãmba.” Masã a Jennifer sẽn kõt saglg ningã tũub pa toog ye. A yeelame: “Y sã n wa neẽ tɩ yaa toog ne-y tɩ y kõ y karen-bi-taasã bɩ y karen-saam dãmbã kasetã, bɩ y pʋʋs y sũurẽ koɛɛg-koɛɛga. A Zeova na n sõng-y lame. Y sũur na n yɩɩ noogo, y sẽn tũnug sõma ne sorã sẽn pak y yĩng tɩ y tõe n kõ kasetã.”—1 Pɩɛɛr 3:15.

8. a) Wãn to la pʋʋsg sõng a Nehemi, a sẽn wa n be yel-lingdmã taoore? b) Lekollẽ wã, yel-bʋs pʋsẽ la tõe n yaa tɩlae tɩ y pʋʋs a Zeova koɛɛg-koɛɛg y sũur pʋgẽ?

⁸ D neeme t’a Jennifer sagendame tɩ b pʋʋs a Zeova koɛɛg-koɛɛga, sor sã n wa pak tɩ y tõe n kõ kaset y tẽebã zugu. Yaa woto kɛpɩ la a Nehemi sẽn da yaa Pɛrs rĩm a Artazɛgzɛs divẽ kõtã maan-yã, a sẽn da wa n be yel-lingdem taoorã. A Nehemi ra maanda yɩɩre, a sẽn wʋm tɩ Zʋɩf rãmbã ra bee nimbãaneg pʋgẽ wã, la a bãng tɩ Zerizalɛm lebga raboogã. Rĩmã yãame tɩ yaa wa yɩɩr n da tar a Nehemi, t’a sok a Nehemi n na n bãng sẽn yaa bũmb ninga. A Nehemi pʋʋs n kosa sõngr la a yaool n leoke. Rẽ poore, ne raoodo a kosa sor n na n leb Zerizalɛm n tɩ sõng n me galʋ-tẽngã sẽn lʋɩyã. A Artazɛgzɛs saka a Nehemi kosgã. (Nehemi 2:1-8) Woto zãmsda yãmb bõe? Y sã n yɛɛsdẽ, sor sã n pak yãmb taoor tɩ y tõe n kõ kasetã y tẽebã zugu, bɩ y ra maan yood-yood n pa pʋʋs y sũur pʋgẽ ye. A Pɩɛɛr gʋlsame: “Bɩ y bas yãmb yɩɩra fãa ne [a Zeova]; tɩ bõe, bãmb menga geta yãmb yelle.”—1 Pɩɛɛr 5:7; Yɩɩl Sõamyã 55:23.

‘Segl-y y meng n bãng leokre’

9. Wãn to la yʋʋm 13 bipugl a Leah tõog n bas Les jeunes s’interrogent sɛb 23 ne a taaba?

⁹ Ges-y ned a to vɩɩm kɩbare. A Leah sẽn tar yʋʋm 13 ra karemda Les jeunes s’interrogent — Réponses pratiques * midi rɩɩbã wakat lekollẽ wã. Ad a sẽn yeele: “M taabã ra geta maam, la pa kaoos la neb wʋsg wa lɩkd n get sebrã, n sɩng n sokd n dat n bãng sẽn yaa sebr ningã.” Zaabr ne a wa ta, tɩ kompugli a naas n da kos a Leah Les jeunes s’interrogent sebrã. Tao-tao bala, kompugli kãens ra wilgda b taab sebrã, tɩ bãmb me rat  n paam sebrã. Semen a wãn sẽn pʋglã, a Leah basa Les jeunes s’interrogent sɛbã 23 ne a karen-bi-taas la b zo-rãmba. Ra yaa nana ne a Leah t’a gom ne neb a taab sẽn da wa n sok-a pipi n na n bãng sebr ning a sẽn da karemdã bɩ? Ayo. “Pipi wã, m da yɛɛsdame.” Woto la a sak n deege, la a paase: “La m pʋʋsame, n da miẽ t’a Zeova ra bee ne-ma.”

10, 11. Wãn to la Israɛll bipugl tõog n sõng Siiri tãb-biis naab t’a bãng a Zeova, la toeeng bʋs la ra-kãng maan dẽ poore?

¹⁰ A Leah sẽn maan bũmb ningã tõe n tẽeg-y-la bũmb sẽn wõnd woto Israɛll bipugl b sẽn dɩk n kẽng yembd Siiri sẽn sege. Siiri tãb-biis naab a Naama da yaa wãoore. Tõe t’a pagã sɩnga sõsg sẽn kɩt tɩ bipugl kɩdg kãngã gom a tẽebã yell vẽenega. Ad bipuglã sẽn yeele: “Zaka soab sã n da kẽngẽ Wẽnnaam no-rɛɛs ninga sẽn be Samari wã nengẽ, a na n maaga a wãoodã.”—2 Rĩm dãmba 5:1-3.

¹¹ Bipugl kãngã raoodã yĩnga, a Naama wa n bãngame tɩ ‘Wẽnnaam ka le be zĩig a to ye, yaa Israɛll bal la a be.’ A pʋd n yeela ne a sũur fãa t’a “ka na n le maan maoong wẽnnaam a to yĩng ye, yaa Zusoaba yĩng bal la m na n maane.” (2 Rĩm dãmba 5:15, 17)  A Zeova sɩd ninga bipugl kɩdg kãngã raood barka. A tõeeme la a na n maana woto n kõ kom-bɩɩsã rũndã-rũndã. A Leah mikame tɩ yaa woto. Sẽn wa n beẽ-beẽ, a karen-bi-taasã yeel-a lame tɩ Les jeunes s’interrogent sebrã ra sõngda bãmb b manesmã pʋgẽ. Ad a Leah sẽn yeele: “M sũur da yaa noogo, bala m da miime tɩ m da sõngda neb a taabã tɩ b zãmsd a Zeova wɛɛngẽ n paasdẽ, la m da sõngd-b tɩ b toeem b vɩɩmã.”

12. Wãn to la y tõe n paam raood n gom y tẽebã yelle?

¹² Y tõe n maana wa a Jennifer la a Leah. Tũ-y a Pɩɛɛr saglgã. A gʋlsame n wilg tɩ y sẽn yaa kiris-nedã y segdame n ‘[segl y meng] n bãng daar fãa n leok ne sũ-maasem la sik-m-menga ned ninga fãa sẽn sokd yãmb tẽeb yelle.’ (1 Pɩɛɛr 3:15) Wãn to la y tõe n maan woto? Rɩk-y togs-n-taar ne pipi yʋʋm kob-gĩndẽ kiris-nebã sẽn pʋʋs a Zeova t’a sõng-b tɩ b moon ne “raood kãsenga.” (Tʋʋma 4:29) Rẽ poor bɩ y tall raood n gom ne neb a taabã y tẽebã yelle. Biis nins rẽ sẽn na n woma na n ling-y lame. Sẽn paase, y na n nooga a Zeova sũuri.

Video wã, la lekollã devoaar dãmb a taabã

13. Kom-bɩɩs kẽer tũnuga ne so-bʋs sẽn pak b taoor n kõ kasetã? (Ges-y zĩ-gũbsã seb-neng 14 la 15.)

¹³ Kom-bɩɩs wʋsg wilga video kasɛt rãmbã n kõ kaset b tẽebã zugu. Wakat kẽere, a taab tũnuga ne lekollã devoaar dãmb n pẽg a Zeova. D ges komdibli a yiib sẽn ya a Zeova Kaset rãmb makre. B ned kam fãa tara yʋʋm 15. B karen-doogẽ wã, b zãmsda dũniyã pĩnd yɛla, tɩ b kõ-b devoaare, tɩ b ra segd n gʋls kɩbar dũniyã tũudum a yembr zugu. Bãmba b yiibã lagma taab n gʋls kɩbar a Zeova Kaset rãmbã zutu, n tik sebr ning sẽn yaa: Les Témoins de Jéhovah : Prédicateurs du Royaume de Dieu * wã zugu. B ra segdame me n sõs rẽ zug minit a nu pʋgẽ. Rẽ poore,  karen-saambã ne karen-biisã talla sogsg wʋsg hal tɩ komdibli wã kell n sõs ne-b minit 20 n paase. B karen-bi-taasã kell n maana sogsg a Zeova Kaset rãmbã zutu, tɩ maan semen dãmba!

14, 15. a) Bõe yĩng tɩ ninsaal zoees wat ne yelle? b) Bõe yĩng tɩ y segd n tall bas-m-yam, sã n yaa ne togs neb a taaba y tẽebã ?

¹⁴ Wala makr nins yell tõnd sẽn goma sẽn wilgdã, bark kãsems la y tõe n paame, y sã n togs neb a taabã y tẽebã n wilg tɩ y ya a Zeova Kaset soaba. Ra bas-y tɩ ninsaal zoees kɩt tɩ y kong zu-noog la sũ-noog ning sẽn yaa sõng neb a taabã tɩ b bãng a Zeova wã ye. Biiblã yetame: “Ninsaal zoees wata ne yelle. La sẽn teegd-a [a Zeova] tara laafɩ.”—Yelbũna 29:25.

¹⁵ Tẽeg-y tɩ y sẽn yaa bi-bɩɩg n yaa kiris-nedã, y tara bũmb sẽn sɩd tar yõod ne y kom-bɩ-taasã: yaa vɩɩm manesem ning sẽn yaa sõma n yɩɩd masã, la vɩɩm sẽn pa satã kãabg beoog-daar yĩnga. (1 Tɩmote 4:8) Bãng-y tɩ Etazĩni, y sẽn tẽedẽ tɩ nebã toog nong n kae ne tẽebã yɛl la tɩ b nonga dũniyã yɛlã, vaees-n-gɛsg a yembr n wilg tɩ sẽn na ta kom-bɩɩsã pʋɩ-sʋk pa reemd ne tũudmã ye, la a yembr tãab zug yetame tɩ b vɩɩmã pʋgẽ, tũudmã “tara pãn-tusdg bãmb zut n yɩɩd sẽn keta fãa.” Yaa woto me dũniyã babs wʋsg pʋsẽ. Lekollẽ wã, yãmb karen-bi-taasã sũy na n yɩɩ noog tɩ b kelg yãmb sẽn tar koɛɛg ning n na n togs Biiblã zugã.

Kom-bɩɩsã, pẽneg-y a Zeova

16. Ta a Zeova yam baooda bõe maanego, gom a yell ne neb a taabã toor sẽn ka be?

¹⁶ Yaa sɩd tɩ noog a Zeova sũur baoodame tɩ y maan sẽn yɩɩd gom a yell bala. Y leb n segd n tũu a noyã y yel-manesmã pʋgẽ. Tʋm-tʋmd a Zã gʋlsame: “Wẽnnaam nonglem yaa tɩ tõnd sak bãmb tõogo. La bãmb tõog ka toog ye.” (1 Zã 5:3) Y na n mikame tɩ sɩd yaa woto, y sã n pẽneg a Zeova. Wãn to la y tõe n maan woto?

17. Wãn to la y tõe n pẽneg a Zeova?

¹⁷ Rɩk-y sẽk n karem Biiblã la sɛb nins b sẽn tik Biiblã zug n maana. Y sã n zãmsd n bãngd a Zeova n paasdẽ, na n yɩɩ nana n yɩɩd ne-y n paas tɩ y sak-a la y gom a yell ne neb a taaba. A Zezi yeelame: “Nin-sõng sũur sẽn pid ne sõmblmã, a yiisda bõn-sõama. . . . Tɩ bõe, sũur sẽn pid ne bũmb ninga, noor gomda bõn-kãense.” (Luk 6:45) Rẽ wã yĩng bɩ y pids y sũurã ne bõn-sõma. Bõe yĩng tɩ y pa na n yãk bõn-datɩ rẽ wɛɛngẽ? Y tõe n segla tigingã tigiss sõma n paas semen ning sẽn wata wã. Y bõn-datl sẽn pʋgd tõe n yaa y sẽn na n kõ leokr sẽn yaa koɛɛg la sẽn yit y sũurẽ. Yaa sɩd tɩ tara yõod wʋsg me tɩ y tũ bũmb nins y sẽn zãmsdã.—Filip rãmba 4:9.

18. Baa neba sã n namsd-y y tẽebã yĩnga, ne bõe la y tõe n kɩs sɩda?

¹⁸ A Zeova balengã sẽn wat ne bark ninsã kaoosda wʋsgo, b kaoosda wakat sẽn kõn sa. Yaa sɩd tɩ y sẽn ya a Zeova Kaset soabã, wakat-wakate neba kɩɩsd-y lame bɩ b yaand-y-yã. La tags-y a Moiiz yelle. Biiblã yetame t’a ra “geta keoor sẽn be taoore.” (Hebre dãmba 11:24-26) Yãmb me tõe n kɩsa sɩd t’a Zeova na n dola yãmba, modgr nins y sẽn maand n zãmsd n bãngd-a la y gomd a yellã yĩnga. Sɩda, a pa na n tol n ‘yĩm yãmb tʋʋmda ne y nonglma yãmb sẽn wilg bãmb yʋʋra yĩnga ye.’—Hebre dãmba 6:10.

[Tẽngr not rãmbã]

Y tẽrame bɩ?

• Bõe yĩng tɩ y tõe n kɩs sɩd t’a Zeova nanda y tʋʋmdã?

• Kasetã kũun manesem bʋs la kẽer yã tɩ yaa sõma lekollẽ wã?

• Wãn to la y tõe n paam daood n kõ y karen-bi-taasã kasetã?

• Wãn to la y tõe n pẽneg a Zeova?

[Zãmsgã sogsgã]

[Zĩ-gũbri/Foto rãmba, seb-​neng 14]

Kamb meng pẽgda a Zeova!

Baa kom-bɩɩs sẽn pa ta yʋʋm 13 tõog n kõo kaset lekollẽ wã. Ges-y kɩba-kãensã.

A Amber sẽn tar yʋʋm piig n be karen-dot a nu pʋgẽ wã, b ra karemda sebr sẽn gomd Nazi rãmbã sẽn da zabd ne Zʋɩf rãmbã dũni gill zabr a yiib-n-soabã sasa wã yelle. A Amber talla kasɛt video ning sẽn yaa Les triangles violets wã n tɩ kõ a karen-saambã. Linga karen-saambã, a sẽn bãng t’a Zeova Kaset rãmbã me ra paama namsg b tẽebã yĩng Nazi rãmbã naam wakatã. Karen-saambã kɩtame tɩ karen-doogã zãng ges video kãngã.

A Alexa sẽn da wa n tar yʋʋm a nii, a gʋlsa a karen-doogã neb lɛtr n wilg bũmb ning sẽn kɩt t’a ra pa tõe n maan Nowɛllã kibsã. Rẽ yɩɩ a karen-saambã noog wʋsg hal t’a kɩt t’a Alexa karem lɛtrã a karen-doogẽ wã, la karen-dot a yiib a taabẽ me. Baasgẽ wã a togsame: “B zãmsa maam tɩ m tall waoogr ne neb a taabã tẽeb sẽn yaa toor ne mam dẽndã, la m pʋʋsd-y-la barka, yãmb me sẽn tar waoogr ne mam yam-yãkrã sẽn kɩt tɩ m pa na n maan Nowɛllã.”

A Eric sẽn sɩng karengã poor bilfu, a talla Mam Biibl kɩbay sebrã n kẽng lekollẽ wã, n kos a karen-saambã sor n na n wilg sebrã a karen-bi-taasã, t’a karen-saambã yeel-a: “Bõe yĩng tɩ f pa na n pʋd n karem kɩbar tɩ karen-doogã fãa kelge?” T’a Eric sake. Rẽ poore, a yeela neb nins fãa sen da rat sebrã tɩ b zẽk b nusi. Karen-saambã n paas karen-biis 17 n zẽk b nusi. Masã, a Eric tagsdame t’a tara mooneg zĩig sẽn pa wõnd a taaba.

A Whitney sẽn tar yʋʋm a wɛ wã tara mi-beoog b sẽn yiis seb-bil ning sẽn yaa: Les Témoins de Jéhovah et l’instruction * wã yĩnga. Ad a sẽn yete: “M ma nong n kõta m karen-saam dãmbã seb-bi-kãngã yʋʋmd fãa, la rõandã, yaa mam meng n tɩ kõ-ba. Seb-bi-kãngã maasem yĩnga, mam karen-saambã yãka maam n yeel tɩ m yaa ‘semenã karen-bi-sõngo.’ ”

[Footnote]

[Zĩ-gũbri/Foto rãmba, seb-​neng 15]

Soay neb kẽer sẽn tũnug ne n gom b tẽebã yelle

B sã n yeel-b tɩ b gʋls kɩbar bɩ b maan devoaar b lekollẽ wã, kẽer yãka gom-zug sẽn sõng-b tɩ b kõ kaseto.

Kom-bɩɩs kẽer wilga b karen-saambã video bɩ sebr sẽn tɩ loe ne gom-zug ning b sẽn zãmsd karen-doogẽ wã.

Yaa kom-bɩɩs kẽer sẽn da karemd Biiblã bɩ sebr sẽn tik Biiblã zug sasa la kom-bɩɩs a taab pẽneg-b n na n sok sogsgo.

 [Foto, seb-​neng 12]

Sẽn tar-b minimã tõe n sõng n zãmsa kom-bɩɩsã tɩ b balem a Zeova