Yɛ la d tõe n paam belsg hakɩkã?
Yɛ la d tõe n paam belsg hakɩkã?
“Wẽnnaam tõnd Zusoab a Zezi Kirist Ba . . . n belsd tõnd d toog fãa pʋgẽ.”—2 KORẼNT DÃMBA 1:3, 4.
1. Yel-bʋs n tõe n kɩt tɩ nebã wa rat belsg wʋsgo?
BÃAG sẽn komsd ned tõe n kɩtame tɩ ned tags t’a vɩɩmã wãame. Tẽn-digimdgu, seb-bɛd ne koma wat n kɩtame tɩ nebã paoong fãa sãam tɩ b zĩ zaalem. Zabr sã n be tẽngã pʋgẽ, rẽ tõe n yãgsa yõe zak pʋgẽ, a tõe n sãama roto, wall yɩ tɩlae tɩ zakã neb zoe n bas b tarem. Yel-kɛgã tõe n kɩtame tɩ neba tags tɩ b pa tõe n paam yolsg zĩig ba a yembr ye. Neb nins yel-be-kãens sẽn paama rata belsg ne b sũyã fãa. Yɛ la b tõe n paam bels-kãnga?
2. Bõe yĩng tɩ belsg ning a Zeova sẽn kõtã ka to?
2 Neb la sigls kẽer maoodame n na n wa ne yolsgo. Neba ratame n wʋm gom-noodo. B sã n sõng-b ne rɩɩbo, gãag zĩig la futu, woto pidsda b ratem wakat bilf yĩnga. La yaa sɩd Wẽnnaam a Zeova bal n tõe n yiis wẽng ning fãa yel-be-kãens sẽn wa ne wã, la a kõ sõngr buud ning sẽn yaa yɛlã tɩɩm mengã, hal n kɩt tɩ yel-beed a woto ra le wa lae-lae ye. Biiblã yeta woto a wɛɛngẽ: “Pẽgre Wẽnnaam tõnd Zusoab a Zezi Kirist Ba sẽn yaa nimbãan-zoeer Ba la belsg fãa Wẽnnaam. Yaa bãmb n belsd tõnd d toog fãa pʋgẽ, tɩ tõnd tõe n bels toog sẽn tar-b rãmba ne belsg ninga Wẽnnaam sẽn da bels tõndã.” (2 Korẽnt dãmba 1:3, 4) Wãn to la a Zeova belsd tõndo?
Zu-loeesã tɩɩm meng-menga
3. Wãn to la Wẽnnaam sẽn kõt belsg ningã yaa ãdem-biisã zu-loees tɩɩm meng-menga?
3 A Ãdem yel-wẽndã yĩnga, ãdem-biisã fãa roga ne pa-zems-zãnga, tɩ rẽ wat ne zu-loees ka tɛk sẽn baasd ne kũum. (Rom dãmba 5:12) A Sʋɩtãan sẽn yaa ‘dũniyã naaba’ yĩnga, yellã kengame n paase. (Zã 12:31; 1 Zã 5:19) A Zeova pa wilg bal tɩ ãdem-biisã sẽn be nimbãaneg ning pʋgẽ wã pa noom a sũur ye. A tʋma a Biribl yendã a sẽn naana t’a yɩ rond sẽn na yɩl n kõ fãagre, la a leb n yeel tõnd tɩ d tõe n paama d mens ne a Ãdem yel-wẽndã biisi, d sã n wilg tɩ d tẽeda a Biriblã. (Zã 3:16; 1 Zã 4:10) Wẽnnaam reng n togsame me t’a Zezi Kirist b sẽn kõ tõog fãa saasẽ la tẽng zugã na n sãama a Sʋɩtãan ne a zãmaan-wẽngã gilli.—Matɩe 28:18; 1 Zã 3:8; Wilgri 6:2; 20:10.
4. a) Bõe la a Zeova kõ sẽn na yɩl n paas tõnd bas-yardã ne yolsgã a sẽn kãabã? b) Wãn to la a Zeova sõngd tõnd tɩ d bãng yolsgã sẽn na n wa wakat ninga?
4 Sẽn na yɩl n paas tõnd bas-yardã ne a kãabsã, Wẽnnaam kɩtame tɩ b gʋls yɛl wʋsg sẽn kõt kaset tɩ bũmb nins fãa a sẽn deng n togsã pidsdame. (Zozue 23:14) Biiblã pʋgẽ, a kɩtame tɩ b gʋls bũmb ning a sẽn maan n fãag a sõgen dãmbã, yɛl nins ninsaalbã sẽn tagsd tɩ ye ka tɩɩmã taoore. (Yikri 14:4-31; 2 Rĩm dãmba 18:13–19:37) La ne a Zezi Kirist maasem, a Zeova wilgame t’a raabã me ya a maag “bãase la yĩns tood buud fãa,” la a vʋʋg kũ-rãmbã menga. (Matɩe 9:35; 11:3-6) Wakat bʋg la rẽ fãa na n zĩndi? Biiblã leokda sok-kãngã, bala a bilgda zãmaan-kʋd-kãngã yaoolem dayã sẽn na n yɩ to-to, sẽn deng Wẽnnaam sa-paalsã la tẽn-paalgã waoongo. A Zezi bilgrã zemsa ne wakat nins tõnd sẽn vɩyã.—Matɩe 24:3-14; 2 Tɩmote 3:1-5.
Nin-buiid sẽn da be toog pʋgẽ n paam belsgo
5. A Zeova sẽn da wa n kõt pĩnd wẽndẽ Israɛllã belsgã, a ra takda b yamã n sik bõe zugu?
5 D sã n ges a Zeova sẽn tall manesem ning ne pĩnd Israɛllã, d bãngda a sẽn wa ne belsg to-to n kõ-b toog wakate. A tẽeg-b-la a sẽn yaa Wẽnnaam ninga. Rẽ kɩtame tɩ b tall bas-yard ne a kãabsã n paase. A Zeova kɩtame t’a no-rɛɛsdbã rɩk makr sẽn tar pãng n wilg tɩ yẽ sẽn yaa sɩd Wẽnnaam sẽn vɩ wã yaa lebend fasɩ ne wẽn-naandsã, sẽn pa tõe n sõng b mensã la b balemdbã. (Ezai 41:10; 46:1; Zeremi 10:2-15) A Zeova sẽn yeel a Ezai tɩ: ‘Bels mam nebã. Bels mam nebã,’ a ra kɩtame t’a no-rɛɛsã tũnug ne makr la bilsg sẽn tik a sẽn naan bũmb ninsã zugu, sẽn na yɩl n wilg yẽ a Zeova sẽn yaa sɩd Wẽnnaam yɛngã sẽn yaa kãseng to-to wã.—Ezai 40:1-31.
6. Wakat ninga wãn to la a Zeova wilg b sẽn da segd n gũ fãagrã sasa ningã?
6 Wakat kẽere, a Zeova belsa a nin-buiidã n wilg-b wakat takɩ sẽn pẽ bɩ sẽn zãr ning a sẽn na n wa fãag-bã. B fãagrã Ezipt nugẽ sẽn da wa n kolgdẽ wã, a yeela Israɛll nebã b sẽn da namsdã woto: “Mam na n waa ne toog a ye n paas Faraõ zugu la Ezipt soolma zugu. Dẽ poore, yẽ na n basa yãmb tɩ y looge.” (Yikri 11:1) Tẽns a tãab sẽn wa n naag taab n na n tɩ zab ne Zida rĩm a Zozafatã wakate, a Zeova ra yeela a nin-buiidã t’a na n kẽesa a toog n sõng-b “beoogo.” (2 Kɩbaya 20:1-4, 14-17) La a Ezai ra zoe n gʋlsame tɩ b na n fãag-b-la Babilon nugẽ, tɩ ket sẽn kolg yʋʋm 200, la Wẽnnaam kɩtame t’a Zeremi togs yɛl a taab n fasem, tɩ fãagrã ket sẽn kolg yʋʋm koabga. Ad bãngr-gom-kãensã sɩd ra kenga Wẽnnaam sõgen dãmbã raoodo, fãagrã wakat sẽn da wa n kolgã!—Ezai 44:26–45:3; Zeremi 25:11-14.
7. Bõe la b nong n naagd fãagrã kãabs pʋgẽ, la wãn to la rẽ tall pãn-tusdg kɩs-sɩd dãmbã zut Israɛlle?
7 D bãng tɩ naoor wʋsgo, kãabs nins sẽn kõt Wẽnnaam nin-buiidã belsgã wilga yɛl sẽn tɩ loe ne Mesi wã. (Ezai 53:1-12) Zãmaan ne a to, kãab-kãensã kõo kɩs-sɩd dãmbã saagr b sẽn da wa n sɛg makr wʋsgã wakate. Luk 2:25 pʋgẽ, d karemdame: “Gese, dao a yembre n be Zerizalɛm t’a yʋʋr boondẽ t’a Simeõ, dao kãng yaa nin-sõngo la a ra sakda Wẽnnaam sõama la a gũud Israɛll belsgo, [Mesi wã waoongo] la Sɩɩg Sõng bee ne yẽnda.” A Simeõ ra mii saagr ning sẽn tɩ loe ne Mesi wã sẽn be Gʋlsg Sõamyã pʋgẽ wã, la rẽ pidsgã gẽegr talla pãn-tusdg a vɩɩmã zugu. A ra pa mi saag-kãng sẽn da na n pids zãng to-to ye, sẽn paase, yẽ mengã pa yã fãagrã b sẽn da reng n togsã pidsg ye, la a maana sũ-noogo, a sẽn yã Ned ning sẽn da na n wa yɩ ‘fãagrã’ Wẽnnaam sẽn kõ wã.—Luk 2:30.
Belsgo, Kirist maasem yĩnga
8. Sõngr ning a Zezi sẽn kõ wã yaa wãn to, b sã n mak-a ne sõngr ning neb wʋsg sẽn da tagsd tɩ ra yaa tɩlae ne-bã?
8 A Zezi Kirist sẽn da wa n moond koe-noogã tẽng zugã, pa wakat fãa la a sõng nebã wa bãmb sẽn da tagsd tɩ ra yaa tɩlae ne-bã ye. Kẽer tʋlga Mesi sẽn da na n wa fãag-b ne Rom yembdã b sẽn kisã ne b sũy fãa. La a Zezi pa moon tedgr zĩ-kãng wɛɛngẽ ye, a yeel-b lame tɩ b “kõ Sezaar bũmb ninga sẽn yaa Sezaar dẽnda.” (Matɩe 22:21) Wẽnnaam daabã ra yɩɩda fãag neb nanambs nugẽ zĩig sẽn zãre. Nebã ra ratame t’a Zezi lebg b rĩma, la a yeel-b lame t’a segd n ‘kõo a vɩɩm tɩ yao neb wʋsg yĩnga.’ (Matɩe 20:28; Zã 6:15) Ra pa wakat kãng la a ra segd n yɩ rĩm ye, la zu-sobend ning a sẽn na n paam n dɩ naamã na n yii a Zeova nengẽ, la pa kʋʋng sũy sẽn pa noom nengẽ ye.
9. a) Yaa belsg koe-bʋg la a Zezi moon-yã? b) Wãn to la a Zezi wilgẽ t’a koɛɛgã tara yõod yɛl nins pʋsẽ nebã sẽn da be wã? d) A Zezi koe-noogã mooneg yɩɩ yẽbgr ne bõe?
9 Belsg ning a Zezi sẽn kõ wã ra bee ‘Wẽnnaam soolem koe-noogã’ pʋgẽ. Yaa koe-kãng la a Zezi moon a sẽn da kẽngẽ fãa. (Luk 4:43) A wilga vẽeneg tɩ koe-kãng zemsa ne nebã daar fãa zu-loeese, n wilg bũmb ning yẽ sẽn yaa Naab la Mesi wã sẽn na n maan n kõ ãdem-biisã. A kɩtame tɩ neb nins sẽn da namsdã yam ye kẽ vɩɩmã, a sẽn kɩt tɩ zoens yã la a kɩt tɩ mugs gomã (Matɩe 12:22; Mark 10:51, 52), a sẽn sãoog koms rãmba (Mark 2:3-12), a sẽn sãoog Israɛll nebã ne bã-wẽnsã (Luk 5:12, 13), la a sẽn yols-b ne bã-toos a taabã yĩnga. (Mark 5:25-29) A waa ne yols-kãseng n kõ zak neb sẽn da yãbd b kamb kũum, n vʋʋg kambã. (Luk 7:11-15; 8:49-56) A wilgame t’a tõeeme n yals seb-bɛd sẽn yaa yelle, la a rɩlg neb kʋʋng wʋsg sẽn da rat rɩɩbo. (Mark 4:37-41; 8:2-9) Sẽn paase, a Zezi zãms-b-la vɩɩmã noy sẽn da tõe n sõng-b tɩ b mao n tõog zu-loeesã, la sẽn da na n pids b sũyã ne saagr sẽn yaa vɩɩmd Mesi wã naam sẽn yaa tɩrgã wakate. A Zezi sẽn moon koe-noogã, belsa neb nins sẽn kelg ne tẽebã, la a lebg n maana yẽbgr sẽn na yɩl n keng nebã raood yʋʋm tusa sẽn da na n pʋgl sasa.
10. A Zezi maoongã kɩtame tɩ bõe tõe n yɩ?
10 Sẽn yɩɩd yʋʋm 60 a Zezi sẽn kõ a vɩɩmã tɩ yɩ maoong la a vʋʋg n kẽng saasẽ wã poore, tʋm-tʋmd a Zã ra paama vʋʋsem sõng vẽnegr n gʋls woto: “Mam kom-bõonego, mam gʋlsda yãmb bõn-kãense tɩ yãmb da maan yel-wẽna ye. La ned sã n maan yel-wẽna, tõnd tara sɛ-yõakda sẽn be tõnd Ba taoore, bãmb yaa a Zezi Kirist sẽn yaa tɩrlem soabã. Bãmb menga yɩɩ maoong tõnd yel-wẽna yĩnga, ka tõnd yel-wẽna yĩng bal ye, la dũniyã neba fãa yel-wẽna yĩng me.” (1 Zã 2:1, 2) A Zezi vɩɩmã sẽn zems zãngã maoong nafa kɩtame tɩ d paam belsg sẽn yaa kãsenga. D miime tɩ d tõe n paama d yel-wẽnã sugri, sũur kaset sẽn yaa yɩlemde, zems-n-taar ne Wẽnnaam la vɩɩm sẽn pa satã saagre.—Zã 14:6; Rom dãmba 6:23; Hebre dãmba 9:24-28; 1 Pɩɛɛr 3:21.
Vʋʋsem sõngã kõta belsgo
11. Sẽn deng a kũumã, bõe sẽn kõt belsg la a Zezi kãab-yã?
11 A Zezi sẽn da wa n be ne a tʋm-tʋmdbã yaoolem yʋng ning sẽn deng a kũumã sẽn yɩ maoongã, a goma bũmb a to yell a saasẽ Ba wã sẽn kõ sẽn na yɩl n bels-ba. A Zezi yeelame: “La mam na kos m Ba, la bãmb na kõ yãmb Sõangd a to, [bɛlsda; ne Gɛrk goama yaa parakletos] tɩ bãmb pa ne yãmb wakat sẽn ka sɛta. Bãmb yaa sɩd [vʋʋsem].” A Zezi kõ-b-la bas-m-yam woto: “La Sõangda sẽn yaa [vʋʋsem sõngã] . . . na n zãmsa yãmb bũmb fãa; la b na n tẽega yãmb bũmb nins fãa mam sẽn da togs yãmbã.” (Zã 14:16, 17, 26) Wãn to la vʋʋsem sõngã sɩd kõt-b belsgo?
12. Wãn to la vʋʋsem sõngã sẽn sõng a Zezi karen-biisã tɩ b tẽeg bũmb nins fãa a sẽn zãms-bã yɩ belsg n kõ neb wʋsgo?
12 Tʋm-tʋmdbã ra paama zãmsg wʋsg a Zezi nengẽ. Sɩd-sɩda b ra pa na n tol n yĩm bũmb nins b sẽn yã wã ye. La rẽ yĩnga b ra na n ket n tẽra a sẽn sɩd yeel bũmb ningã bɩ? Zãmsg wʋsg sẽn tar yõod la b ra na n yĩmi, b pʋ-tẽerã sẽn pa zems zãngã yĩng bɩ? A Zezi kõ-b-la bas-m-yam tɩ vʋʋsem sõngã ‘na n tẽega bãmb bũmb nins fãa a sẽn da zãms bãmbã.’ Woto, yʋʋm a nii a Zezi kũumã poore, a Matɩe tõog n gʋlsa pipi Evãnzillã. Evãnzill kãng tara a Zezi Tãng zug Zãmsgã sẽn kẽed sũur sõma wã, makr wʋsg nins a sẽn dɩk sẽn tɩ loe ne Rĩungã, n paas a sẽn gom a belmã bãnd yell n fasma. Sẽn yɩɩd yʋʋm 50 poore, tʋm-tʋmd a Zã ra tõogame n gʋls kɩbar sẽn be bas-m-yam sẽn togs yɛl wʋsg sẽn tɩ loe ne a Zezi tẽng zug vɩɩmã yaoolem daya. Gom-kãensã vʋʋsem sõng sẽn vẽneg tɩ b gʋlsã sɩd kenga nebã raood hal tɩ ta tõnd wakatã.
13. Wãn to la vʋʋsem sõngã yɩ wa pipi kiris-nebã karen-saamba?
13 Vʋʋsem sõngã pa tẽeg-b goam bal ye. A zãmsa karen-biisã la a sõng-b tɩ b wʋm Wẽnnaam daabã võor n paase. A Zezi sẽn da ket n be tẽng zug ne a karen-biisã, a togs-b-la yɛl b sẽn da pa wʋmd a võor vẽeneg ye. La kaoosg poore, vʋʋsem sõngã sõnga a Zã, a Pɩɛɛre, a Zak, a Ziid ne a Poll tɩ b gʋls n wilg Wẽnnaam daabã nens a taab pidsgu. Rẽnd vʋʋsem sõngã yɩɩ wa karen-saamba, n kõ karen-biisã bas-m-yam tɩ yaa Wẽnnaam n wilgd-b sore.
14. Wãn to la vʋʋsem sõngã sõng a Zeova sõgen dãmbã?
14 Vʋʋsem sõngã kũun sẽn yaa yel-solemdã sõngame tɩ b bãng vẽeneg me tɩ Wẽnnaam basa tẽng zug Israɛllã la a be ne kiris-neb tigingã masã. (Hebre dãmba 2:4) Vʋʋsem sõngã sẽn womd biis nins nebã vɩɩmã pʋgẽ wã me yaa bũmb sẽn tar yõod sẽn kɩtd tɩ b bãng neb nins sẽn sɩd ya a Zezi karen-biisã. (Zã 13:35; Galat dãmba 5:22-24) Sẽn paase, vʋʋsem sõngã kõo tiging kãng neba pãng tɩ b yɩ kaset rãmb sẽn tar daood n pa zoet rabeem ye.—Tʋʋma 4:31.
D paamda sõngre, d sã n wa be yɩɩr kãseng pʋgẽ
15. a) Yɩɩr bʋs la kiris-neb mao ne pĩnd la masã? b) Bõe yĩng tɩ neb nins sẽn kengd b taab raoodã me tõe n dat tɩ b keng b raood wakat ningã?
15 Neb nins fãa sẽn nong a Zeova wʋsg n tar kɩs-sɩd ne-a wã paamda namsg b tẽebã yĩnga. (2 Tɩmote 3:12) La kiris-neb wʋsg wa n zĩnda yɩɩr kãseng pʋgẽ. Tõnd wakatã, kẽer la neb kʋʋng pig-yã, sẽn paase b kẽes-b-la nams-bɛɛg zagsẽ, bãens rotẽ, la yembd tʋʋm pʋgẽ n ning-b zĩis b sẽn pa segd n ningẽ ninsaal abada. Goosneema rãmb kẽer namsa tõnd d tẽebã yĩnga, bɩ b basame tɩ bi-bees nams tõnd tɩ b pa sɩbg-b ye. Sẽn paase, kiris-neb n mao ne bã-toos bɩ zak pʋgẽ zu-loe-kãsemse. Kiris-ned sẽn bɩ sẽn sõngd a tẽed-n-taas wʋsg tɩ b mao ne zu-loees me tõe n wa bee yɩɩr pʋgẽ. Sã n wa yaa woto, ned ning sẽn kengd a to wã raoodã tõe n datame tɩ b keng yẽ me raoodo.
16. A Davɩɩd sẽn da wa n be yɩɩr kãseng pʋgẽ wã, wãn to la a paam sõngre?
16 Rĩm a Sayull sẽn da wa n digd a Davɩɩd n dat n kʋ wã, a Davɩɩd baoa Wẽnnaam sõngr n bõos-a woto: “Mam Wẽnnaam bɩ y wʋm mam pʋʋsgo,” la a paase: “Mam baooda zĩig yãmb pɩgsa maasmẽ.” (Yɩɩl Sõamyã 54:4, 6; 57:2) A Davɩɩd paama sõngr bɩ? N-ye, a paamame. Sasa kãng pʋgẽ, a Zeova tʋma no-rɛɛs a Gaad la maan-kʋʋd a Abiataar tɩ b tɩ kõ a Davɩɩd sor-wilgri. A leb n tũnuga ne a Sayull biribl a Zonatã n keng a Davɩɩd raoodo. (1 Sãmwɛll 22:1, 5; 23:9-13, 16-18) A Zeova leb n basame tɩ Filisti nebã wa zab ne tẽngã, tɩ rẽ kɩt t’a Sayull bas a Davɩɩd rigbu.—1 Sãmwɛll 23:27, 28.
17. A Zezi sẽn da wa n be yɩɩr kãseng pʋgẽ, yɛ la a bao sõngre?
17 A Zezi Kirist mengã ra paama yɩɩr kãseng a tẽng zug vɩɩmã sẽn wa n kolg saabã sasa. A ra mii sõma t’a manesmã ra tõe n waooga a saasẽ Ba wã bɩ sãam a yʋʋre, la a ra miẽ tɩ manesem ning a sẽn na n tallã tɩ loee ne ãdem-biisã beoog-daare. A pʋʋsa ne a sũur fãa, ne ‘sũ-sãoong hal wʋsgo.’ Wẽnnaam kɩtame t’a Zezi paam sõngr ning a sẽn da rat toog kãng sasa wã.—Luk 22:41-44.
18. Bels-bʋg la Wẽnnaam kõ pipi kiris-nebã b sẽn da namsd wʋsg b tẽebã yĩngã?
18 Namsg ning sẽn wa kiris-nebã zut b tẽebã yĩng pipi yʋʋm kob-gĩndẽ tigingã yẽbgr poorã yɩɩ toaag hal n kɩt tɩ b fãa sãeeg n yi Zerizalɛm, sã n dok tʋm-tʋmdbã. B yõga rap ne pagb b yiya, n vɛo-b n yiis yɩnga. Bels-bʋg la Wẽnnaam kõ-ba? A Gomdã pʋgẽ a kõ-b-la bas-m-yam tɩ b “tara paoong sẽn yaa neer n yɩɩda sẽn ka sãamd ye.” B na n zĩnda saasẽ ne Kirist tɩ sik kaẽ ye. (Hebre dãmba 10:34; Efɛɛz rãmba 1:18-20) B sẽn ket n moondẽ wã, b paama kaset vẽeneg tɩ Wẽnnaam vʋʋsem sõngã ra bee ne-ba, la yɛl nins b sẽn vɩɩmdã kõ-b-la bʋʋm n paas tɩ b kɩdem.—Matɩe 5:11, 12; Tʋʋma 8:1-40.
19. Baa ne a Poll sẽn paam nams-toaag a tẽebã yĩngã, a tagsg yɩɩ wãn to ne belsg ning Wẽnnaam sẽn kõtã?
19 A Soll (Poll) menga sẽn da nams neb wʋsg b tẽebã yĩngã me wa n paama namsgo, a sẽn lebg kiris-nedã yĩnga. Sipr sẽn yaa ko-sʋk tẽngã pʋgẽ, bag n da mak n na n sãam a Poll koe-moonegã n tũnug ne zãmb la kɩbay golengo. Galasi, b loba a Poll kug hal n wa tẽed t’a kiime tɩ b yaool n bas-a. (Tʋʋma 13:8-10; 14:19) Masedoanne, b pãb-a-la ne kalwaase. (Tʋʋma 16:22, 23) Kʋʋngã sẽn nams-a Efɛɛzã poore, a gʋlsame: ‘Tõnd da namsa hal sẽn dat n yɩɩg tõnd pãnga, la tõnd da tẽedame tɩ d na n kiimi. Tõnd da tagsame tɩ tõnd na n kiimi.’ (2 Korẽnt dãmba 1:8, 9) La lɛt kãng pʋgẽ, a Poll gʋlsa goam nins sẽn kõt belsgã sẽn be sõs-kãngã sull a 2 pʋgẽ wã.—2 Korẽnt dãmba 1:3, 4.
20. Bõe la d na n yã sõsg ning sẽn pʋgdã pʋgẽ?
20 Wãn to la y tõe n kõ neb a taabã belsg woto buudu? Rũndã-rũndã neb wʋsg n dat belsgo, b sẽn be sũ-sãang pʋgẽ yel-beed sẽn paam neb tusa yĩnga, wall toog sẽn paamd bãmb balã yĩnga. Sõsg ning sẽn pʋgdã pʋgẽ, d na n yãa d sẽn tõe n kõ belsg to-to yel-kãensã buud fãa pʋsẽ.
Y tẽrame bɩ?
• Bõe yĩng tɩ belsg ning sẽn yit Wẽnnaam nengẽ wã tar yõod sẽn ka mak-n-taaga?
• Belsg bʋg la d paamd Kirist maasem yĩnga?
• Wãn to la vʋʋsem sõngã yɩ bɛlsda?
• Rɩk-y makr n wilg belsg Wẽnnaam sẽn kõ, a sõgen dãmbã sẽn da be yɩɩr kãseng pʋgẽ.
[Zãmsgã sogsgã]
[Foto rãmba, seb-neng 23]
Biiblã wilgda tõnd t’a Zeova kõo belsgo, a sẽn fãag a nin-buiidã
[Foto rãmba, seb-neng 24]
A Zezi kõo belsg a sẽn zãms nebã, n maag bãas la a vʋʋg kũ-rãmbã
[Foto, seb-neng 26]
A Zezi paama sõngr sẽn yit saasẽ