Yɛ la y tõe n yã tẽeb noy hakɩka?

“YÃMB sã n na n yãka tũudum tɩ bala y zaka neb n be tũudum kãng pʋgẽ, bõe yĩng tɩ y pa na n yãk Sɛlt rãmbã tũudum tõnd yaab rãmbã sẽn tũ sẽn yɩɩd yʋʋm 2000 sẽn loogã?” Woto la a Rodolphe sok ne laado, tɩ bi-bɩɩg ning sẽn da kelgd-a wã la.

A Rodolphe yeelame: “Mam zems-n-taarã ne Wẽnnaamã tara yõod wʋsgo. Mam pa rat lɛ-lɛ tɩ b modg-m tɩ m tũ rog-m-mikã tũudum, tɩ mam zakã neb sẽn vɩɩmd yʋʋm pi-gĩn bɩ yʋʋm kobs sẽn loogã tũ-a lame yĩng ye.” A Rodolphe tagsa neer yɛlã zutu. A pa ges yel kãng sẽn yaa kãsengã faag-faag n yeel bal t’a rog n mika a roagdbã ne yẽ tũudmã ye.

Baa ne b sẽn ye pa wɛ n taasd tũudmã zãmaan ne a to rũndã-rũndã wã, neb wʋsg ket n gãda b zakã neb tũudum. La rẽ yĩnga, yaa sõma wakat fãa tɩ d gãd d roagdbã tũudum bɩ? Bõe la Biiblã yet rẽ wɛɛngẽ?

A sẽn maan yʋʋm 40 rasempʋɩɩgẽ wã poore, a Zozue sẽn yɩ a Moiiz lɛdgdã yeela Israɛll nebã tɩ b yãke: “Yãmb sã n ka rat n tũ Zusoabã, bɩ y bao y sẽn na n tũ a soab rũnda. Y sã n dat n tũ wẽnnaam dãmb nins y yaab rãmba sẽn da tũud Efrat kʋɩlga rʋʋndã, bɩ y tũ. Walla y sã n dat n tũ Amoor dãmba wẽnnaam dãmba sẽn be tẽng ninga yãmb sẽn be wã, bɩ y tũ, tɩ maam ne m yir dãmba yẽ, tõnd na n tũu [a Zeova].”—Zozue 24:15.

Yaab rãmb nins yell a Zozue sẽn goma sʋka, a ye n da ya a Abrahaam ba a Teera, sẽn vɩɩmd Uur sẽn yaa galʋ-tẽngã sẽn da be Efrat kʋɩlgã yaangã. Biiblã pa wilg yɛl wʋsg a Teerã wɛɛngẽ ye, sã n pa a sẽn yet bal t’a ra balemda wẽnnaam dãmb a taabã. (Zozue 24:2) Baa ne a biribl a Abrahaam sẽn da pa mi Wẽnnaam daabã zãngã, a ra sakame n na n yi a ba-yirẽ galʋ-tẽngã, a Zeova sẽn da wa n yeel-a t’a yi wã. N-ye, a Abrahaam yãka tũudum sẽn yaa toor ne a ba wã rẽnda. A Abrahaam sẽn maan woto wã, a paama bark nins Wẽnnaam sẽn da kãab-a wã, la a lebga ned tũudum wʋsg neb sẽn sak n deeg t’a yaa ‘neb nins fãa sẽn tẽeda ba.’—Rom dãmba 4:11.

Biiblã gomda a Rut sẽn ya a Zezi Kirist yaab-poakã yell neer me. A Rut ra yaa Moaab poak sẽn kẽ kãadem ne Israɛll daoa. A sẽn wa lebg pʋg-kõorã, a ra segd n yãka a sã n na n paa a ba-yirã, bɩ a sã n na n tũu a sɩdã ma n kẽng Israɛlle. A Rut yãame t’a Zeova balengã n tar yõod n yɩɩd bõn-naandsã baleng yẽ roagdbã sẽn da maandã, t’a togs a sɩda ma woto: “Fo neba na n yɩɩ mam neba, la fo Wẽnnaamã me na n yɩɩ mam Wẽnnaam.”—Rut 1:16, 17.

Biiblã gom-biis võor sebr a yembr (Dictionnaire de la Bible) sẽn wilgd kɩba-kãngã yõod Biiblã pʋgẽ togsame tɩ kɩbarã wilgda “pʋg-sãang sẽn dog wẽn-zɩtb sẽn kis Israɛll nengẽ, tɩ Israɛll me ra kis-bã . . . sẽn tũ ne Wẽnnaam sor-wilgr t’a wa lebg rĩm a Davɩɩd sõng yaab poaka, a nonglmã ne a Zeova buudã la a balengã yĩnga.” A Rut pa maan sãmb-sãmb la a yãk tũudum sẽn da yaa toor ne a roagdbã rẽnd ye. La a sẽn yãk yam n maan woto wã kɩtame t’a paam Wẽnnaam barka.

Kɩbar ning sẽn wilgd kiris-nedemdã sɩngrã wilgda bũmb ning sẽn kɩt t’a Zezi karen-biisã bas b yaab rãmbã tũudmã võor vẽeneg n yɩɩda. Ne goam b sẽn sɩd pa tõe n kɩɩse, tʋm-tʋmd a Pɩɛɛr yeela a kɛlgdbã tɩ b ‘fãag b mens zãmaan kãngã nin-wẽnsa sʋka,’ n tek yam n kos b yel-wẽna sugr la b reeg lisg ne a Zezi Kirist yʋʋre. (Tʋʋma 2:37-41) Makr nins sẽn yaa kãsems n yɩɩdã a yembr ya a Soll sẽn da yaa Zʋɩf sẽn nams kiris-nebã. A sẽn da wa n digd Damaase, Wẽnnaam vẽneg-a lame t’a yã Kiristã. Rẽ poore, a Soll lebga kiris-ned tɩ b boond-a rẽ tɛk tɩ tʋm-tʋmd a Polle.—Tʋʋma 9:1-9.

Pipi kiris-nebã wʋsg pa vɩɩmd yel-soalem woto ye. La b fãa ra segd n basa Zidaisma la Wẽn-zɩtbã wẽnnaam dãmbã balengo. Neb nins sẽn sak kiris-nedemdã ra reng n paama bãngr sõma la b yaool n kẽ a pʋgẽ, la naoor wʋsgo, yaa b sẽn da kelg tɩ sek a Zezi mesiimdã wɛɛngẽ wã poore. (Tʋʋma 8:26-40; 13:16-43; 17:22-34) Pipi kiris-nin-kãensã ra bãnga vẽeneg tɩ b segd n maana toeeng b vɩɩmã pʋgẽ. Ra yaa nebã fãa la b bool-yã, Zʋɩf rãmb la sẽn pa-b Zʋɩf rãmba, la b fãa ra wʋmda koe-yɛngã. Sẽn na yɩl n ta Wẽnnaam yam, ra yaa tɩlae tɩ nebã tũ tũudum buud a to masã, sẽn yaa Kirist tũudma.

Yãkr sẽn tar yõod wʋsgo

Sẽn yɩɩd fãa, raood ra yaa tɩlae pipi yʋʋm kob-gĩndẽ wã sẽn na yɩl n bas f zak neb tũudum wala zidaisma, ãmperɛɛrã balengo, bõn-naandsã balengo, la f tɩ yãk tũudum Zʋɩf rãmbã la Rom dãmbã sẽn da yaande. Pa kaoos la yãk-kãng wa ne namsg b zut ye. Rũndã-rũndã, rẽnda f tall raood woto me n tõog n zãgs “tɩ b ra tus-f tɩ f sak n maan wa neb a taabã ye.” Woto la a Hippolyte Simon, sẽn yaa Clermont-ferrand katolik tũudum taoor soabã togs a sebrã (Vers une France païenne ?) pʋgẽ. Rẽnda f tall raood n tɩ naag tũudum neb sõor sẽn paood b sẽn paoogd wakat kẽere, sẽn dat n yeel t’a Zeova Kaset rãmbã.

A Poll sẽn yaa bi-bɩɩg n yit Bastia sẽn be Kors soolmẽ wã, b sẽn wub katolik tũudmã pʋgẽ wã, mi n naaga Egiliizã tʋʋmdẽ, wala gato rãmb koosg sẽn na yɩl n paam ligd katolik sõngr siglg yĩnga. A sẽn dat n bãng Biiblã n paasã yĩnga, a sakame n sõsd wakat fãa ne a Zeova Kaset rãmbã. A wa n bãngame t’a sẽn da zãmsd bũmb ningã ra na n kõ-a-la nafa sẽn kaoosde. Wa sẽn zems ne rẽ, a Poll saka Biiblã noy fãa n lebg a Zeova Kaset soaba. A roagdbã pa kɩɩs a yãkrã sẽn pa gɩdg-a t’a ket n nong a zakã neb wa pĩndã ye.

A Amélie bee Fãrens goabg babgã. Yaa sẽn na maan zãmaan a naas masã la a zakã neb ya a Zeova Kaset rãmba. Bõe yĩng t’a yãk n na n sak a roagdbã tũudum? “F pa lebgd a Zeova Kaset soab tɩ f roagdb bɩ f yaab rãmb n ya a Zeova Kaset rãmba, bɩ tɩ b yɩɩ a Zeova kaset rãmb ye.” Woto la a togs-yã, la a paase: “La daar n wat tɩ f na n yeel f menga: ‘Yaa m tũudum la woto, bala yaa woto la m sɩd tẽeda.’ ”  Wala a Zeova Kaset rãmb a taab wʋsg sẽn yaa kom-bɩɩse, a Amélie miime t’a sẽn tẽed bũmb nins tɩ tar pãngã kɩtdame t’a vɩɩmã tar bõn-datla, la kõt-a sũ-noog wʋsgo.

Bũmb ning sẽn kɩt tɩ d sakd Wẽnnaam noyã

Yelbũna sebrã pʋgẽ, a sak a 6, verse 20, b sagenda neb nins sẽn dat n ta Wẽnnaam yama woto: “M biiga, sak f ba tõodo la ra bas f ma zãmsga ye.” Ka wã b pa rat n yeel tɩ d sak zond-yaar ye, b sagenda kom-bɩɩsã tɩ b sak Wẽnnaam noyã, b sẽn na n paas b tẽebã, la b yãk b toorẽ yam n sak Wẽnnaam. Tʋm-tʋmd a Poll sagla a tũud-n-taasã tɩ b “mak bũmb fãa,” la tɩ b sɩd bao n bãnge, b sẽn zãms-b bũmb ninsã sã n sɩd da zemsa ne Wẽnnaam Gomdã la ne a raabã, la b vɩɩmd tɩ zems ne rẽ.—1 Tesalonik rãmba 5:21.

B wub-b-la kiris-neb zakẽ tɩ pa woto me, a Zeova Kaset rãmbã sẽn yɩɩd milyõ a yoobã, b kom-bɩɩs la b nin-kẽemb fãa yãka yam woto. Ne Biiblã zãmsg neer maasem, b paama b sogsg nins sẽn tɩ loe ne vɩɩmã bõn-datlã leoor sẽn yaa vẽenega, la b wʋma Wẽnnaam daabã ãdem-biisã wɛɛngẽ wã võor tɩ yaa vẽenega. B sẽn paam bãngr woto wã, b saka Wẽnnaam noyã la b maand b sẽn tõe tɛk n maand Wẽnnaam daabã.

Yãmb minim n karemda zʋrnall kãngã tɩ pa woto me, bõe yĩng tɩ y pa na n sak sõngr ning a Zeova Kaset rãmbã sẽn kãabd-y sẽn na yɩl tɩ y zãms Biiblã n vaees tẽebã noy sẽn be a pʋgẽ wã? Woto, y na n tõogame n “lemb n ges [n bãng t’a Zeova] yaa sõama,” la y na n paama bãngre, tɩ y sã n tũ-a, bɩ a tall-y n kẽng vɩɩm sẽn pa satẽ wã.—Yɩɩl Sõamyã 34:9; Zã 17:3.

[Foto, seb-neng a 3]

Zak neb sẽn ya a Zeova Kaset rãmb hal sẽn na maan zãmaan a naase

[Foto, seb-neng a 5]

A Rut basa a yaab rãmbã wẽnnaam dãmba, n yãk n na n tũ a Zeova