‘Da zoe-y rabeem ye, ra yɛɛs-y ye’
‘Da zoe-y rabeem ye, ra yɛɛs-y ye’
“Da zoe-y rabeem ye. Da yɛɛs-y ye, . . . tɩ Soaala-Wẽnd na zĩnd ne-yã.”—2 KƖBAYA 20:17, Sebr Songo.
1. Bi-beer sẽn kẽesd rabeemã tara pãn-tusdg bʋg nebã zutu, la bõe yĩng tɩ neba be bʋʋm b sẽn zoet rabeemã?
BI-BEER sẽn kẽesd rabeemã! Gom-kãngã meng yɩkda pɛlga, n tẽegd bãanã sẽn kae tɩ nebã pa tar a tɩɩmã. A wata ne rabeem, sũ-sãoong la sũ-yikri. La a leb n yaa gomd sẽn bilgd bũmb ning neb wʋsg sẽn yɛɛsd tɩ na n namsa ãdem-biisã yʋʋm nins sẽn watã. Tẽns kẽer sẽn zabd ne bi-beer sẽn kẽesd rabeemã nens toɛy-toɛyã hal yʋʋm wʋsg n ket n nan pa tõog-a wã paasda rabeem kãng pãnga.
2. Wãn to la a Zeova Kaset rãmbã maand bi-beer sẽn kẽesd rabeemã taoore, la rẽ wata ne sogs-bʋse?
2 Baasg zãnga, d sɩd tõe n talla saagre. A Zeova Kaset rãmbã sẽn moond dũniyã gill zug tẽns 234 pʋsẽ wã tara saagr hal wʋsgo. B pa yɛɛsd tɩ b na n maka bi-beer sẽn kẽesd rabeemã yiisg n kong ye, la b kɩsa sɩd tɩ b na n tõog-a-la ka la bilfu. Zemsame tɩ d tall b saagrã buud bɩ? Dũni kãngã pʋgẽ, ãnd n tõe n yiis to-kãngã sẽn namsd nebã, la wãn to la rẽ tõe n yɩ? Sẽn mik tɩ nen-kɛglmã mata tõnd fãa wã, yɩta sõma tɩ d vaees n bãng saag-kãngã sẽn yẽbg bũmb ning zugã.
3. Bõe n wat ne rabeema, la bõe la b reng n togs tõnd wakatã yĩnga?
3 Rũndã-rũndã, nebã zoeta rabeem la b yɛɛsd yɛl toor-toor yĩnga. Tags-y n ges neb wʋsg sẽn ye pa tõe n ges b mens yell b sẽn kʋʋlã yĩnga, la neb nins pãng sẽn boog wʋsgo, b sẽn namsd ne bãas sẽn ka tɩɩmã yĩnga, la zags neb sẽn maood n na n paam b noor dɩɩbã yelle. Sɩda, ning-y y yamẽ tɩ yõor yaa sãana. Kũ-lingdem tõe n waame, sãmpogr bɩ sabaab yĩnga, n kɩt tɩ tõnd sẽn get tɩ bũmb ning tara yõodã kell n sa. Rabeemã la yɩɩrã, n paas mo-yõsã la sũ-sãamsã kɩtame tɩ tõnd wakatã yaa wa tʋm-tʋmd a Poll sẽn bilg bũmb ningã: “Bɩ f bãng tɩ yaoolem wakate tood na n zĩndame. Tɩ bõe, neba na n yɩɩ beed dãmba, . . . neb sẽn ka tar ninbãan-zoeere la sũ-to-neba, tẽnkãn-neba, neb sẽn ka tar yõk-m-menga, pʋto rãmba, nin-sõamyã kisgdba.”—2 Tɩmote 3:1-3.
4. Yel-tood nins b sẽn bilg 2 Tɩmote 3:1-3 pʋgẽ wã kõta saag-bʋgo?
4 Baa ne verse kãngã sẽn bilgd yel-toodã, a kõta saagr me, bala a wilgdame tɩ wakat tood kãensã segd n zĩnda a Sʋɩtãan dũni-wẽngã “yaoolem wakate.” Rẽ wilgdame tɩ yolsg n kolge, la tɩ ka la bilfu, Wẽnnaam Rĩungã sẽn yaa naam sẽn zems zãng a Zezi sẽn zãms a karen-biisã tɩ b pʋʋs a yĩngã na n ledga dũni wẽngã. (Matɩe 6:9, 10) Rĩung kãng yaa Wẽnnaam saasẽ goosneema wã. A Daniɛll bãngr-gomdã wilgame tɩ yaa Rĩung b sẽn “ka tõe n sãam,” la a paas t’a “na n wãa [ninsaalbã] soolem kãens fãa tɩ b menem n bas-a t’a yaas wakat fãa.”—Daniɛll 2:44.
Kiris-ned pa-kẽesd-m-toogã yaa lebend ne bi-beer sẽn kẽesd rabeemã
5. Sẽn pa kaoos pʋgẽ, tẽnsã manesem yɩɩ wãn to bi-beer sẽn kẽesd rabeemã wɛɛngẽ?
5 Sẽn na maan yʋʋm pi-gĩna, bi-beer sẽn kẽesd rabeemã yãgsa neb tusa yõyã. B sẽn wẽ Niuyork la Wasĩnton yʋʋmd 2001, bõn-bɩʋʋng kiuug rasem 11 wã tɛka, dũniyã gill fãa bãngame tɩ bi-beer woto buudã yaa yell sẽn tar yãngr n paasdẽ. A sẽn piuug wʋsg dũniyã gill zugã yĩnga, tẽnsã fãa sũu taab n na n zab ne-a. Wala makre, yʋʋmd 2001, yʋʋm-sar kiuug rasem a 4, sã n yaa ne kɩba-kɩtb sẽn wilgi, “tẽns 55 sẽn yaa Erope, Amerikdinoor la Azi tẽn-sʋk tẽnsã ministr dãmb sẽn get tẽn-zẽms yɛlã yell naaga taab n yãk yam” sẽn na yɩl n lagem taab n mao. Etazĩni nin-kãseng a yembr n pẽg tʋʋm-kãng n yeel t’a kɩtdame tɩ modgr ning b sẽn maand n zabd ne bi-beerã “paam pãng n paase.” Zĩig pʋgẽ, neb milyõ kobs n fõr n kẽ bũmb ning zʋrnall a yembr (The New York Times Magazine) sẽn bool tɩ “zabr sẽn pa wõnd a taab sɩngrã” pʋgẽ. La bɩ d gũ n ges modg-kãens sã n na n yãka nenga. B sẽn zabd ne rabeemã sẽn wa ne biis ninsã yɛɛsa neb wʋsg n kõ-b yɩɩre, la pa woto ne neb nins sẽn teeg a Zeova wã ye.
6. a) Bõe yĩng tɩ wakat kẽere, yaa toog ne nebã tɩ b sak a Zeova Kaset rãmbã sẽn pa kẽesd b toogã? b) Mak-sõng bʋg sẽn tɩ loe ne politikã yɛl la a Zezi kõ a karen-biisã?
6 B mii a Zeova Kaset rãmbã wa neb sẽn pa kẽesd b toog politikã pʋgẽ. Baa neb wʋsg sã n sakd a Zeova Kaset rãmbã tagsg yel-kãngã zug laafɩ wakate, sã n wa gudg wʋsgo, b ye pa sakd woto ye. Naoor wʋsgo, rabeema la yɩɩrã zabrã sẽn wat ne wã kɩtdame tɩ nebã nonglem ne b tẽnsã yik n yãnge. Rẽ tõe n kɩtame tɩ yaa toog ne neb kẽer tɩ b bãng bũmb ning sẽn kɩt tɩ neb sãnda pa rat n teel neb sul sẽn lʋɩɩsd tẽng-n-biilmã taoorã. La kiris-neb hakɩkã yẽ miime tɩ b segd n saka a Zezi sẽn kõ noor ning sẽn yet tɩ d ‘ra yɩ dũniyã rẽndã.’ (Zã 15:19; 17:14-16; 18:36; Zak 4:4) Rẽ baoodame tɩ b kell n da kẽes b toog politikã la zãma wã yɛlẽ ye. A Zezi mengã kõo mak-sõng rẽ wɛɛngẽ. D sã n ges a yamã sẽn zems zãngã la a tõogã sẽn yaa kãseng to-to wã, d mikdame t’a ra tõe n sõnga wʋsg n welg yẽ zãmaana neb zu-loeese. A yaool n pa bao n kẽes a toog politikã pʋgẽ ye. A koe-moonegã sɩngrẽ, a zãgsa a Sʋɩtãan sẽn kãab-a naam dũniyã soolem fãa zutã. Rẽ poore, neba me sẽn wa n dat n yãk-a t’a yɩ b naabã a zãgsa fasɩ.—Matɩe 4:8-10; Zã 6:14, 15.
7, 8. a) Bõe la a Zeova Kaset rãmbã sẽn pa kẽesd b toog politikã yɛlẽ wã pa rat n yeele, la bõe yĩnga? b) Wãn to la Rom dãmba 13:1, 2 wilgd tɩ d pa segd n kẽes d toog nen-kɛglem tʋʋm pʋsẽ n zab ne goosneema rãmba?
7 B pa segd n tags t’a Zeova Kaset rãmbã sẽn yaa pa-kẽesd-m-toog rãmbã, b teendame bɩ b sakda nen-kɛglem tʋʋm ye. Kaset rãmbã sã n maan woto, na n kɩɩsa b sẽn yet tɩ b yaa “Wẽnnaam sẽn yaa nonglem la laafɩ soaba” sõgen dãmbã. (2 Korẽnt dãmba 13:11) B bãnga a Zeova tagsg sẽn ya a soab nen-kɛglmã zugu. Yɩɩl gʋlsdã gʋlsame: “Zusoaba feesda nin-tɩrg ne nin-wẽng fãa. Bãmb kisa ned sẽn nong n maan a taab pãnga.” (Yɩɩl Sõamyã 11:5) B leb n mii a Zezi sẽn yeel tʋm-tʋmd a Pɩɛɛr bũmb ningã: “Sui f sʋʋga a wʋʋgẽ, tɩ bõe, neb nins fãa sẽn zãad sʋʋsã, yaa sʋʋg n na n kʋ-ba.”—Matɩe 26:52.
8 Baa ne yɛl sẽn zĩnd pĩndã sẽn wilgd vẽeneg tɩ ziri kiris-nebã tũnuga ne “sʋʋg” naoor wʋsgã, pa woto ne a Zeova Kaset rãmbã ye. B lakda b mens ne rẽ. A Zeova Kaset rãmbã sakda noor ning sẽn be Rom dãmba 13:1, 2 pʋgẽ wã wakat fãa: “Bɩ ned kam fãa sak nanambsa noyã, tɩ bõe, noor ka be, a sã n ka Wẽnnaam n kɩt t’a zĩnd ye. Noy nins sẽn be wã yaa Wẽnnaam n kɩt tɩ b beẽ. Woto yĩnga, ned ninga sẽn zãgsd naab noore, a kɩɩsda Wẽnnaam tõogo. La neb nins sẽn zãgsda ningda bʋʋd b mens zutu.”
9. Ne manesem a yiib bʋs la a Zeova Kaset rãmbã zabd ne bi-beer sẽn kẽesd rabeemã?
9 La sẽn mik tɩ bi-beer sẽn kẽesd rabeemã yaa wẽngã, rẽ yĩnga, a Zeova Kaset rãmbã pa segd n maan bũmb n sõng n zab ne-a sɩda? N-ye, b segd n sõngame, la b sɩd sõngdame. Pipi, b pa tʋmd bi-be-tʋʋm ye. Yiibu, b zãmsda nebã tɩ b bãng noy nins kiris-ned sẽn segd n tũ, tɩ b sã n sak n tũ rẽ bɩ nin-kãens basd nen-kɛglem buud fãa. * Rɩẽ, a Zeova Kaset rãmbã rɩka lɛɛr 1 202 381 302 n sõng nebã tɩ bãng kiris-ned sẽn segd n vɩɩmd to-to. B sẽn maan woto wã pa yɩ sẽk sãoong ye, bala tʋʋm-kãng yĩnga, neb 265 469 n deeg lisg n lebg a Zeova Kaset rãmba, tɩ rẽ wilgd zãma wã taoor tɩ b basa nen-kɛglem.
10. Saagr beeme tɩ b na n zaba ne nen-kɛglmã n tõog dũni kãngã pʋgẽ bɩ?
10 Sẽn paase, a Zeova Kaset rãmbã sak n deegame tɩ bãmb mensã pa tõe n yiis wẽng ning sẽn be dũniyã zugã ye. Yaa rẽ n so tɩ b teeg Wẽnnaam a Zeova sẽn ya a soab ning sẽn tõe rẽ wã zãng-zãnga. (Yɩɩl Sõamyã 83:19) Baa ne ninsaalbã sẽn modg ne b sũy fãa wã, b pa tõe n kɩt tɩ nen-kɛglmã sa ye. Biiblã gʋlsd vʋʋsem sõng sẽn vẽnegã reng n togsa woto tõnd wakatã sẽn yaa ‘yaoolem wakatã’ wɛɛngẽ n yetẽ tɩ: “Nin-wẽnsa ne zãmb dãmb na n maana wẽng n paase, b na n belga neb a taaba la bãmb mens na n paama belgre.” (2 Tɩmote 3:1, 13) Sẽn yaa woto wã yĩnga, ninsaalbã pa segd n tẽ tɩ b tõe n zaba ne wẽngã n tõog ye. La d sẽn tõe n teeg a soab ya a Zeova, t’a wa yiis nen-kɛglmã zãng wakat fãa yĩnga.—Yɩɩl Sõamyã 37:1, 2, 9-11; Yelbũna 24:19, 20; Ezai 60:18.
Baa ne b sẽn na n zab ne-b ka la bilfã, b pa zoet rabeem ye
11. Bõe la a Zeova zoe n maan sẽn na yɩl n yiis nen-kɛglmã?
11 Laafɩ Wẽnnaamã sẽn kis nen-kɛglmã yĩnga, d tõe n bãnga bũmb ning sẽn kɩt t’a segl n na n sãam ned ning sẽn yaa sabab t’a beẽ wã, sẽn dat n yeel t’a Sʋɩtãana. Sɩda, a zoe n ninga a Sʋɩtãan yãnd a sẽn kɩt t’a kong zabrã, malɛgs naab a Misɛll sẽn yaa Rĩm a Zezi Kirist Wẽnnaam sẽn zĩnig naam geer zug paalma taoorã. Biiblã bilga zab-kãng woto: “La zabr zĩnda [saasẽ]. A Misɛll ne bãmb malɛk rãmba zaba ne dragõ wã la dragõ wã ne yẽ malɛk rãmba me zaba ne bãmba. La dragõ wã ne a poorẽ dãmba ka tõog ye, la b ka le yã bãmb zĩig [saasẽ] ye. La b riga dragõ kãsenga sẽn yaa wag-kʋdre sẽn boond tɩ diable la Sʋɩtãana sẽn belgd dũniyã fãa wã. B riga yẽnda t’a kẽng dũniyã zugu, la b riga yẽ malɛk rãmba me tɩ b tũ yẽnda.”—Wilgri 12:7-9.
12, 13. a) Yel-bʋg sẽn yaa kãseng n zĩnd yʋʋmd 1914? b) Bõe la a Ezekɩɛll bãngr-gomdã reng n togs neb nins sẽn sakd Wẽnnaam Rĩungã wɛɛngẽ?
12 Biiblã sẽn geend wakatã to-to wã la dũniyã yɛl fãa lagem n wilgdame tɩ yʋʋmd 1914 yɩɩ wakat ning zabrã sẽn zĩnd saasẽ wã. Rẽ tɛka, dũniyã yɛl zẽna wʋsgo. Wilgri 12:12 wilgda a võorã n yetẽ: “Yaa woto yĩnga [saasẽ dãmba,] la yãmb dãmb sẽn be be, bɩ y maan sũ-noogo. Toog bee ne neb nins sẽn be dũniyã zugu la ko-kãsenga pʋgẽ wã. Tɩ bõe, Sʋɩtãana sigame n wa yãmb nengẽ, la a sũ-puugra yaa kãsenga a sẽn bãng t’a wakat yaa bilfa yĩnga.”
13 Rẽnd d wʋmda bũmb ning sẽn kɩt t’a Sʋɩtãan yikd a sũurã ne Wẽnnaam balemdb nins sẽn paam vʋʋsem sõng zaeebã la b tũud-n-taasã sẽn yaa ‘piis a taabã’ n yɩɩdã. (Zã 10:16; Wilgri 12:17) Ka la bilfu, kɩɩs-kãng na n taa a zug tẽn-sʋka, a Sʋɩtãan sã n wa na n zab a zab-toaagã ne neb nins sẽn sakd Rĩung ning Wẽnnaam sẽn luglã la b teegd-a wã sasa. B goma zab-kãng sẽn na n yɩ toaagã yell Ezekɩɛll sak 38 pʋgẽ, n yeel tɩ ya a ‘Goog sẽn yit Magoogã’ n na n yik-a.
14. Kogl-bʋg la a Zeova Kaset rãmbã ra paamda, la na n yɩɩ woto wakat fãa bɩ?
14 B sẽn dig a Sʋɩtãan n yiis saasẽ wã tɛka, sasa kẽere, politikã sigls kẽer b sẽn bilg ne makr goam Wilgr 12:15, 16 pʋgẽ wã modgame n kogl Wẽnnaam nin-buiidã ne a Sʋɩtãan sẽn zabd ne-bã. La Biiblã wilgdame t’a Sʋɩtãan yaoolem zabrã pʋgẽ, pa na n yɩ woto ye. Ninsaalbã siglg ba a yembr pa na n wa sõng neb nins sẽn teeg a Zeova wã ye. Rẽ segd n kɩtame tɩ kiris-nebã yɛɛs bɩ n zoe rabeem bɩ? Ayo.
15, 16. a) A Zeova goama sẽn kɩt t’a nin-buiidã tall bas-yam a Zozafat wakatã kɩtdame tɩ rũndã-rũndã kiris-nebã tõe n paam saag-bʋgo? b) Mak-sõng bʋg la a Zozafat ne a nin-buiidã bas ne Wẽnnaam sõgen dãmbã rũndã-rũndã?
15 Wẽnnaam na n ye sõnga a nin-buiidã wa a sẽn sõng a nin-buiidã tẽn-kʋdemd wẽndẽ rĩm a Zozafat wakatã. D karemdame: “Zida ne Zerizalɛm neba fãa la naab a Zozafat, kelg-y-yã. Zusoaba yeelame tɩ y ra yɛɛs n zoe zãma kãseng kãngã ye. Tɩ zab-kãng taa Wẽnnaam n yɩɩd yãmba. . . . Ka yãmb n na n zab zab-kãng ye. Bɩ y sũ tãp n yaas n ges Zusoabã sẽn na n tõog n kõ yãmba. Zida ne Zerizalɛm neba, ra yɛɛs-y ye. Beoogo, bɩ y yi n tɩ seg-ba, tɩ Zusoaba bee ne yãmba.”—2 Kɩbaya 20:15-17.
16 B kõo Zida nebã bas-m-yam tɩ pa tɩlae ne-b tɩ b zab ye. Woto me, Goog sẽn yit Magoogã sã n wa na n zab ne Wẽnnaam nin-buiidã, b pa na n dɩk zab-teed n zab ne-a ye. La b na n ‘yaas n ges a Zeova sẽn na n tõog n kõ’ bãmbã. Yaa sɩda, yaas n gesã pa rat n yeel tɩ d pa maand baa fʋɩ ye. D na n maana wala Wẽnnaam nin-buiidã sẽn maan a Zozafat wakatã. D karemdame: “A Zozafat fõgna a neng tẽnga, la Zida ne Zerizalɛm neba fãa wõgemda Zusoaba taoore. . . . La [a Zozafat] sẽn yẽs ne neba n sɛ, yẽ yãka yɩɩn-yɩɩndb tɩ b yeelg b fu-sõama n lʋɩ tãb-biisa taoore n yɩɩl n pẽg Zusoabã n yeele: ‘Pẽg-y [a Zeova] tɩ bãmb nonglem paada wakat fãa.’ ” (2 Kɩbaya 20:18-21) N-ye, baa bɛ wã zabr taoore, nin-buiidã kell n pẽga a Zeova. Woto yaa makr b sẽn bas ne a Zeova Kaset rãmbã tɩ b na n tũ, a Goog sã n wa yik a zabrã ne-ba.
17, 18. a) Manesem sõng bʋg la a Zeova Kaset rãmbã tar rũndã-rũndã a Goog zabrã wɛɛngẽ? b) Bõe la b tẽeg kom-bɩɩs nins sẽn yaa kiris-nebã sẽn pa kaoose?
17 Hal tɩ wakat kãng ta, la a Goog sã n wa sɩng zabrã poor menga, a Zeova Kaset rãmbã na n ket n teenda Wẽnnaam Rĩungã. B na n ket n paamda pãng la koglg n lagemd ne sẽn yɩɩd tigims 94 600 sẽn be dũniyã gill zugã. (Ezai 26:20) Ad woto na n sɩd kõ-d-la sor tɩ d pẽg a Zeova ne raoodo! Sɩd-sɩda, b sẽn gũud a Goog zabrã sẽn kolg wʋsgã pa kɩtd tɩ b zoe rabeem n tar n leb poorẽ ye. Wall tɩ b maan woto, kɩtdame tɩ b rat n pẽg Wẽnnaam sõma-sõma n paas wa b sẽn tõe tɛka.—Yɩɩl Sõamyã 146:2.
18 Kom-bɩɩs tusa sẽn be dũniyã gill zug sẽn lebg wakat fãa tʋm-tʋmdb Wẽnnaam tʋʋmdã pʋgẽ wã tara manesem sõng kãngã. Sẽn na yɩl n wilg tɩ manesem kãng la sõma n yɩɩda, seb-vãoog ning sẽn yaa Jeunes gens — qu’allez-vous faire de votre vie ? wã la b yiis yʋʋmd 2002 tigims gĩn sull tigis-kãsemsẽ wã. Kiris-nebã, kom-bɩɩs la kãsemb talla mi-beoog ne tẽegr kãng sẽn zems a wakatã.—Yɩɩl Sõamyã 119:14, 24, 99, 119, 129, 146.
19, 20. a) Bõe yĩng tɩ kiris-nebã pa segd n yɛɛs bɩ n zoe rabeem? b) Bõe la sõsg ning sẽn pʋgdã na n maane?
19 Baa ne dũniyã yɛl sẽn yaa to-to wã, kiris-nebã pa segd n zoe rabeem bɩ n yɛɛs ye. B miime tɩ ka la bilfu, a Zeova Rĩungã na n yẽesa nen-kɛglmã buud fãa wakat fãa yĩnga. B leb n paamda belsgo, b sẽn mi tɩ vʋʋgrã na n kɩtame tɩ neb wʋsg nen-kɛglmã sẽn kʋ na n lebs n paam vɩɩmã. Rẽ na n sõnga neb kẽer sẽn da pa bãng a Zeova pĩnd tɩ b bãng-a masã, la na n sõnga neb a taabã sẽn dɩk b mens n kõ-a wã tɩ b ket n maand a raabã.—Tʋʋma 24:15.
20 D sẽn yaa kiris-neb hakɩkã, yaa d bãng tɩ d segd n kell n yɩɩ pa-kẽesd-m-toog rãmba, la d modg ne d sũy fãa n maan woto. D ratame n gãd saag-kãseng ning d sẽn tar n tõe ‘n yaas n ges a Zeova sẽn na n tõog n kõ tõndã.’ Sõsg ning sẽn pʋgdã na n paasa tõnd tẽebã, a sẽn na n kɩt tɩ d bãng rũndã-rũndã yɛlã sẽn sõngd tõnd tɩ d wʋmd Biiblã bãngr-goam pidsg võor n paasdẽ wã yĩnga.
[Tẽngr note]
^ sull 9 Sẽn na yɩl n yã makr ne neb sẽn bas nen-kɛglem b vɩɩmã pʋgẽ sẽn na yɩl n lebg a Zeova Kaset rãmba, bɩ y ges yʋʋmd 1990, tʋʋlg kiuug rasem 22 Réveillez-vous ! wã, seb-neng 21, la yʋʋmd 1991, sa-sik kiuug rasem a 8 soabã, seb-neng 18, la yʋʋmd 1996, yʋʋm-vẽkr pipi daar Gũusg Gasgã (ne farende), seb-neng a 5, la yʋʋmd 1998, sa-sik pipi daar Gũusg Gasgã, seb-neng a 5 pʋgẽ.
Y tõe n wilga a võor bɩ?
• Rũndã-rũndã, bõe yĩng tɩ neb wʋsg pa tar saagre?
• Bõe yĩng t’a Zeova Kaset rãmbã tar saagr beoog-daarã wɛɛngẽ?
• Bõe la a Zeova zoe n maan a soab ning sẽn wa ne nen-kɛglmã fãa wã?
• Bõe yĩng tɩ d pa segd n zoe a Goog zabrã?
[Zãmsgã sogsgã]
[Foto, seb-neng 23]
A Zezi kõo kiris-nebã mak-sõng ra kẽes m toogã wɛɛngẽ
[Foto rãmba, seb-neng 26]
Kaset rãmb tusa sẽn yaa kom-bɩɩs n yɩ wakat fãa tʋm-tʋmdb Wẽnnaam tʋʋmdã pʋgẽ
[Seb-neng 22 fotã soaadbã]
UN PHOTO 186226/M. Grafman