Kelg-y bũmb nins vʋʋsem sõngã sẽn yetã!
Kelg-y bũmb nins vʋʋsem sõngã sẽn yetã!
“Sẽn tara tʋba, bɩ a kelg bũmb nins [vʋʋsem sõngã] sẽn togsd mam tẽedbã.”—WILGRI 3:22.
1, 2. Sagl-bʋg la b togs n yɩlem a Zezi koees nins a sẽn taas tigims a yopoe wã Wilgr sebrẽ wã?
A ZEOVA sõgen dãmbã segd n kelga goam nins vʋʋsem sõngã sẽn vẽneg a Zezi Kirist t’a togs tigims a yopoe nins yell b sẽn gom Wilgr sebrã pʋgẽ wã. Sɩda, koɛɛg fãa tara sagl-kãngã: “Ned ninga sẽn tar tʋb bɩ a kelg bũmb nins [vʋʋsem sõngã] sẽn togsd tẽedbã.”—Wilgri 2:7, 11, 17, 29; 3:6, 13, 22.
2 Tõnd zoe n vaeesa koees nins a Zezi sẽn taas malɛgsã, bɩ yel-gɛtbã sẽn be Efɛɛze, Smirn la Pɛrgammã. Wãn to la d tõe n dɩ bũmb ning a sẽn togs tigims a naasã sẽn ketã ne vʋʋsem sõng maasma nafa?
Tiyatiir tigingã malɛka
3. Tiyatiir da bee yɛ, la b ra mi-a-la sõma koosem bʋg yĩnga?
3 “Wẽnnaam Biiga” pẽga Tiyatiir tigingã la a keoog-a me. (Karm-y Wilgri 2:18-29.) B mee Tiyatiir (sẽn lebg Akisaar masã wã) Zediz (pĩnd Hɛrmo) kʋɩlgã sẽn be Azimineer nen-taoorã wogelle. B ra mii galʋ-tẽngã sõma, a tʋʋm-mitbã te-neeb yĩnga. Tẽn-kãng gar-loasdbã ra tũnugda ne tɩɩg buud yẽg n maand gar buud sẽn yaa moomd-moomd yʋʋr sẽn da yi wʋsgo. A Poll sẽn wa n kaag Filip tẽnga sẽn be Gɛrɛs soolmẽ wã wakate, a Lidi sẽn ‘da koosd gar’ Tiyatiirã lebga kiris-neda.—Tʋʋma 16:12-15.
4. Bõe yĩng la b pẽg Tiyatiir tigingã?
4 A Zezi pẽga Tiyatiir tigingã a tʋʋm sõma wã, a nonglmã, a tẽebã, a sũ-marã la a tʋʋmdã koe-moonegã pʋgẽ wã yĩnga. Sɩda, ‘bãmb yaoolem tʋʋma yaa wʋsg n yɩɩd pipi tʋʋma.’ La baa tõnd sã n da zoe n tʋma wʋsg pĩndã, d pa segd masã n maan yaal-yaal ne d vɩɩm manesmã ye.
5-7. a) “Pag a Zezabɛll” da yaa ãnda, la bõe la b ra segd n maan n gɩdg a pãn-tusdgã? b) Kirist koɛɛg ning a sẽn taas Tiyatiir tigingã sõngda pagb nins sẽn yaa wẽn-zoɛtbã tɩ b maan bõe?
5 Tiyatiir tigingã ra basame tɩ wẽn-naands pʋʋsgo, ziri zãmsg la yoob ra be a pʋgẽ. “Pag a Zezabɛll” da bee be. Tõe tɩ yaa pagb sull sẽn da tar manesem sẽn wõnd zʋg wẽns nins Israɛll buud piigã soolem rĩm poak a Zezabɛll sẽn da tarã. Mitb kẽer tagsdame tɩ Tiyatiir ‘no-rɛɛs-pogsã’ makame n na n belg kiris-nebã tɩ b balem leebg wẽnnaam dãmb la a wẽn-pogse, la b lagem n dɩ wẽn-naands maand rɩɩb b kibs rãmb sasa. Bɩ pag ba a ye sẽn maan a meng wa no-rɛɛs ra wa saag n bao n na n soog neb a taabã rũndã-rũndã kiris-neb tigingã pʋgẽ ye!
6 Kirist ‘ra na n kɩtame tɩ pag a Zezabɛll lʋɩ bãaga, la neb nins sẽn maan yoob ne yẽ wã sã n ka kos sugri, a na n kẽesa bãmb to-kãseng pʋgẽ.’ Yel-gɛtbã pa segd abada n bas zãmsg la pãn-tusd-wẽng woto buud tɩ zĩnd ye. La pa tɩlae ne kiris-ned t’a yo walla a pʋʋs wẽn-naands n yaool n bãng ‘t’a Sʋɩtãan yel-zulumsã’ (NW ) yaa wẽns zãng ye. Tõnd sã n kelg a Zezi keoogrã, ‘d na n talla d sẽn tarã kãn-kãe,’ la woto, yel-wẽnã kõn soog-d ye. Sẽn zae-bã sẽn vʋʋgã sẽn zãgs tʋʋm-wẽnse, tʋls-wẽns la bõn-datɩ wẽnsã yĩngã, b paama ‘noor soolem toɛy-toɛya’ zutu, n na n lagem ne Kirist n wã soolem kãense. Masã tigingã tara makr wɛɛngẽ ãdse, la sẽn paam-b vʋʋsem sõng zaeebã sã n wa vʋʋg saasẽ, b na n paama “yibeoog ãdg sẽn yãgda,” sẽn yaa pʋg-paal sɩd a Zezi Kirist.—Wilgri 22:16.
7 B ra keooga Tiyatiir tigingã t’a ra bas pãn-tusd-wẽng ning pagb nins sẽn kɩɩsd sɩdã sẽn wat ne wã ye. Koɛɛg ning vʋʋsem sõng sẽn kɩt tɩ Kirist togs tigingã sõngda pagb nins sẽn yaa wẽn-zoɛtbã tɩ b pa zĩig ning Wẽnnaam sẽn kõ-b rũndã-rũndã wã pʋgẽ. B pa makd n na n soog rapa, la b pa baood n na n belg saam-biisã tɩ b kẽesd b mens ziri tũudmã yɛlẽ walla b yo ye. (1 Tɩmote 2:12) Sẽn yaa lebend ne rẽ, pagb nins sẽn zoet Wẽnnaamã kõta mak-sõng n maand yel-somd la tʋʋm-sõma tɩ kõt Wẽnnaam pẽgre. (Yɩɩl Sõamyã 68:11, NW; 1 Pɩɛɛr 3:1-6) Tigingã sã n gãd bũmb nins a sẽn tarã, sẽn yaa tẽebã zãmsg la manesem yɩlemdã, la a ges Rĩungã tʋʋmd wa bũmb sẽn be yõod wʋsgo, Kirist na n waa ne bark kãseng a yĩnga, la pa sãoong ye.
Sard tigingã malɛka
8. a) Sard da bee zĩ-bʋgo, la yel-bʋs la d mi a zugu? b) Bõe yĩng tɩ Sard tigingã ra rat sõngre?
8 Sard tigingã ra rata sõngre, a sẽn da ki tẽebã wɛɛngẽ wã yĩnga. (Karm-y Wilgri 3:1-6.) Sard sẽn da be Tiyatiir goabg babgã n da zãr ne kɩlometr 50 wã ra yaa tẽng sẽn tar arzɛka. Leebgã, zĩigã sẽn sakd koodã, pe-kõbdã fut ne a tapi rãmbã b sẽn da maand be wã yĩng kɩtame t’a ra yaa galʋ-tẽng sẽn tar arzɛka, la a ra talla nin-buiid sõor sẽn ta 50 000. Sã n yaa ne pĩnd yel-mit a Zozɛfo, Zʋɩf rãmb wʋsg n da be Sard pipi yʋʋm kob-gĩnd sẽn deng Kirist zãmaanã. Galʋ-tẽngã rabood pʋgẽ, b yãame tɩ Zʋɩf rãmbã karen-doog la Efɛɛz wẽn-poak a Artemis pʋʋsg roog me n da be be.
9. Bõe la d segd n maane, tõnd sã n tʋmd Wẽnnaam tʋʋmdã ne rok-m-zugẽ?
9 Kirist yeela Sard tigingã malɛk tɩ: “Mam bãnga yãmb tʋʋma, la yãmb tara yʋʋr tɩ yãmb vɩɩme, la yãmb yaool n yaa kũum.” D tagsg na n yɩɩ wãn to, d yʋʋr sã n yi tɩ d yaa tẽeb neda, tɩ d toog yaool n kae ne kiris-neb zu-nood tʋʋmã, n tʋmd d moonegã tʋʋm ne rok-m-zugẽ, tɩ d tẽebã ‘rat n ki n baase’? Sã n yaa woto, d segd n ket n ‘tẽegda bũmb nins tõnd sẽn da reeg la d wʋm’ Rĩungã wɛɛngẽ wã, la d segdame n leb n nang pãng Wẽnnaam tʋʋmdã pʋgẽ. Sɩd-sɩda, d segd n leb n kẽesa d mens kiris-neb tigissẽ wã ne d sũur fãa. (Hebre dãmba 10:24, 25) Kirist keooga Sard tigingã tɩ: “Yãmb sã n ka gũusi, mam na n waa yãmb nengẽ wa wagdre; la yãmb kõn bãng wakat ninga mam sẽn na n wa wã ye.” Yaa wãn to yẽ tõnd wakatã? Ka la bilfu, d segd n kolg n togsame.
10. Baa ne yell wala a soab ning sẽn zĩnd Sard tigingẽ wã pʋgẽ, bõe la kiris-neb kẽer maanda?
10 Baa ne yell wala a soab ning sẽn da be Sard tigingẽ wã pʋgẽ, neb n tõe n be be n ‘ka rẽgem b futu, n tõe n kẽn ne Kirist ne fu-peelse, bãmb sẽn zemsa yĩnga.’ B kell n yɩɩ kiris-neb hakɩka, n pa rẽgem, n pa tall dẽgd sẽn yit dũniyã neb vɩɩm manesem bɩ a tũudum pʋgẽ ye. (Zak 1:27) Woto yĩnga, a Zezi ‘kõn yẽes bãmb yʋʋr vɩɩm sebra pʋgẽ ye, a na n pʋda b yʋʋr a Ba ne a malɛk rãmba taoore.’ B togsame tɩ b zemsa ne kẽn ne Kiristã. Woto yĩnga, nin-kãensã sẽn zae ne vʋʋsem sõngã sull n yaa yẽ pʋg-paalã, na n yeelga fu-pɛɛlg sẽn pɩnde, n yaa yɩlemd la neere. Fu-kãensã makda Wẽnnaam nin-sõmsã tɩrlem tʋʋma. (Wilgri 19:8) Tʋʋmd zu-no-kãsems nins sẽn gũud-b saasẽ wã kɩtdame tɩ b maood n yɩt neb sẽn tõogd dũni kãngã. Bark me n gũud neb nins sẽn na n paam vɩɩm sẽn kõn sa tẽng zugã. Bãmb me yʋy gʋlsa vɩɩm sebrã pʋgẽ.
11. Bõe la d segd n maane, d sã n wa sɩngd suusg tẽebã wɛɛngẽ?
11 Tõnd ned ba a yembr pa rat t’a tẽebã maag wa Sard tigingã tẽeb sẽn da maag to-to wã ye. La yaa wan to, d sã n wa yã tɩ d sɩngda suusg tẽebã wɛɛngẽ? D segd n yɩɩ tao-tao n maan bũmb d meng neer yĩnga. D sã n neẽ tɩ wẽn-kɩɩsg tʋʋm bee yamleoog ne tõndo, wall d tigissã kẽngr bɩ koe-moonegã yaa laas-laase, bɩ d pʋʋs a Zeova ne d sũur fãa n kos a sõngre. (Filip rãmba 4:6, 7, 13) Gʋlsg Sõamyã ne sɛb nins ‘tʋm-tʋmd sẽn tũud sɩd la sẽn tar yama’ sẽn yiisã kareng la b zãmsg na n sõnga tõnd tɩ d ra gũs tẽebã wɛɛngẽ ye. (Luk 12:42-44) Rẽ, d na n yɩɩ wa Sard neb nins sẽn da tat Kirist yamã, la d na n yɩɩ bark n kõ d tẽed-n-taasã.
Filadɛlfi tigingã malɛka
12. Tũudmã yɛl da yaa wãn to pĩnd Filadɛlfi wã pʋgẽ?
12 A Zezi pẽga Filadɛlfi tigingã. (Karm-y Wilgri 3:7-13.) Filadɛlfi (sẽn lebg Alasehiir masã wã) ra yaa zĩ-kãseng b sẽn maand divẽ Azimineer nen-taoor babgẽ wã. Sɩda, a wẽn-kãsenga ra ya a Dionysus sẽn yaa divẽ wẽndã. Vẽenega, Zʋɩf rãmb nins sẽn da be Filadɛlfi wã baoome n na n kɩt tɩ kiris-neb nins sẽn yaa Zʋɩf rãmb be wã kell n tall bɩ b leb n tũ a Moiiz Tõogã yɛl kẽere, n mak n konge.
13. Wãn to la Kirist tũnug ne a “Davɩɩd kʋɩlen-biiga”?
13 Kirist “tara a Davɩɩd kʋɩlen-biiga,” la woto, a paamame tɩ b bobl-a Rĩungã yɛl fãa la tẽebã zak neb yell gesgo. (Ezai 22:22; Luk 1:32) A Zezi tũnuga ne kʋɩlen-bi-kãng n pak sor tɩ kiris-neb nins sẽn da be Filadɛlfi la zĩis a taabã tõe n paam Rĩungã zu-nood tʋʋma. Yʋʋmd 1919 tɛka, a paka “kʋɩleng kãseng” ‘tʋm-tʋmd sẽn tũud sɩdã’ taoore, tɩ kɩt tɩ b moon Rĩungã tɩ bɛ ba a yembr pa tõog n pag kʋɩleng kãng ye. (1 Korẽnt dãmba 16:9; Kolos rãmba 4:2-4) La yaa vẽeneg tɩ b paga Rĩungã zu-nood kʋɩleng neb nins sẽn yaa “Sʋɩtãan rẽnda” taoore, bala b pa tẽeb Israɛllã neb ye.
14. a) Boe la a Zezi kãab Filadɛlfi tigingã? b) Bõe la d tõe n maan n da lʋɩ ‘makrã wakate’?
14 A Zezi kãaba Filadɛlfi kiris-nebã woto: “Yãmb sẽn talld mam koɛɛga namsg pʋgẽ wã yĩnga, mam me na n fãaga yãmb makr wakate sẽn na n wa dũniyã tɛk fãa n mak dũniyã rãmbã.” Sũ-mar ning a Zezi sẽn tallã buud yaa tɩlae sẽn na yɩl n moon koe-noogã. A zɩ n sak bɛ wã ye, a kell n maana a Ba wã raabo. Woto yĩnga, Kirist paama vʋʋgr saasẽ n ye pa tõe n ki ye. Tõnd sã n gãd d yam-yãkrã sẽn yaa kell n balem a Zeova la d teel Rĩungã n moon koe-noogã, d pa na n wa lʋɩ wakat kãngã ‘sẽn yaa makr wakatã’ ye. D na n kell n “talla bũmb nins” Kirist sẽn kõ-dã, d sẽn na n mao n tʋm Rĩungã tʋʋm n paasã. Rẽ maaneg na n kõo sẽn zae-bã saasẽ maanf sẽn pa tar mak-n-taaga, la kõ b tũud-n-taasã sẽn tar kɩs-sɩdã vɩɩm sẽn kõn sa.
15. Bõe la b baood tɩ neb nins sẽn na n yɩ ‘Wẽnnaam doogã ra-lugdsã’ maane?
15 Kirist paasame: “Ned ninga sẽn na n tõoge, mam na kɩt tɩ yẽ lebg ra-luk mam Wẽnnaam dooga pʋgẽ . . . La mam na n gʋlsa m Wẽnnaam la m Wẽnnaam tẽnga yʋʋre sẽn yaa Zerizalɛm paalga sẽn yit mam Wẽnnaam nengẽ [saasẽ] n sigda yẽ zugu. La mam na n gʋlsa m yʋ-paalga yẽ zugu.” Yel-gɛtb nins sẽn paam vʋʋsem sõng zaeebã segd n teela baleng hakɩkã. B segd n ket n tara zʋg-sõma nins sẽn segdã, sẽn na yɩl n zĩnd “Zerizalɛm paalgã” pʋgẽ, b sẽn na n moond Wẽnnaam Rĩungã la b kell n yɩ yɩlem tẽebã wɛɛngẽ wã. Woto yaa tɩlae, b sã n dat n yɩ ra-lugds saasẽ wẽn-doogã sẽn tar ziirã pʋgẽ, la b sã n dat n zã Wẽnnaam galʋ-tẽngã yʋʋre, n yɩ a saasẽ tẽng-n-biisi, la b zã Kirist yʋʋrã n yɩ a pʋg-paala. La vẽenega, b segd n talla tʋb n ‘kelg bũmb nins [vʋʋsem sõngã] sẽn togsd tẽedbã.’
Laodise tigingã malɛka
16. Yɛl kẽer bʋs la d mi Laodise wɛɛngẽ?
16 Kirist keooga Laodise tigingã sẽn tar sek-m-mengã. (Karm-y Wilgri 3:14-22.) Laodise bee Efɛɛz yaanga, n zãr ne kɩlometr 150, n be leebg so-tiis kãsengẽ Likus kʋɩlgã noor bãoog sẽn sakd kood sõma wã pʋgẽ. Rẽ kɩtame tɩ Laodise ra yaa tẽng sẽn maand teed wʋsgo, la a ra yaa ligd bĩngr wʋsg zĩiga. Bab-kãng futã sẽn maan ne pe-sabl kõbdã ra yaa bũmb b sẽn da mi sõma. A sẽn da yaa tẽng sẽn tar logtoeemd lekoll yʋʋr sẽn yi wã, wõnda ra yaa Laodise la b ra maand nin tɩɩm b sẽn da boond tɩ Firzi tɩ-zomã. A Askelepios sẽn yaa logtoeemdã wẽndã ra yaa galʋ-tẽngã wẽn-kãseng a yembre. Zʋɩf rãmb wʋsg n da be Laodise, tɩ bãmb kẽer da tar arzɛka.
17. Bõe yĩng tɩ b keoog Laodise kiris-nebã?
17 A sẽn wa n tũnug ne ‘a malɛkã’ n gomd ne Laodise tigingã, a Zezi goma ne zu-sobend n yeel t’a yaa “Kaset sɩda la Wẽnd bõn-naandsa fãa Kãsma.” (Sebr Sõngo) (Kolos rãmba 1:13-16) B keooga Laodise kiris-nebã, b sẽn da ‘ka maasga, la b ka tʋʋlg’ tẽebã wɛɛngẽ wã yĩnga. B sẽn da yaa zal-zalã yĩnga, Kirist ra na n wʋk-b lame. Ra pa segd n yɩẽ toog ne-b tɩ b wʋm mak-kãngã võor ye. Yambẽ n be, Hierapolis ra tara ko-bundum tʋʋls zĩisi, tɩ Kolos ra tar ko-maasga. La b sẽn da segd n fõog koomã zĩ-zãrgẽ n kẽng Laodise wã yĩnga, koomã ne a wa ta tẽngã pʋgẽ t’a lebga zal-zale. Koomã zoeta ko-sor b sẽn tu me pʋgẽ. Sã n wa pẽneg Laodise, koomã zoetame n tũud ko-sor sẽn yaa kug b sẽn po võyã, n dɩk-b n tom taab n me ne sima.
18, 19. Wãn to la b tõe n sõng rũndã-rũndã kiris-neb nins sẽn yaa wa Laodise rãmbã?
18 Rũndã-rũndã neb nins sẽn wõnd Laodise rãmbã pa tar tʋʋlem sẽn wɩngd neda, bɩ maasem sẽn maagd ned ye. B sẽn yaa wa koom sẽn yaa zal-zalã yĩnga, a Zezi na n wʋk-b lame. A Zezi pa rat tɩ bãmb yɩ a koe-taasdba, n yɩ neb sẽn zae sẽn yaa “Kirist tʋm-tʋmdb” ye. (2 Korẽnt dãmba 5:20) Sã n pa b teka yam n kos sugri, b na n konga zu-noog ning b sẽn tar n yaa Rĩungã koe-moondbã. Laodise rãmbã baoo tẽng zug arzɛgse, n da ‘ka mi tɩ bãmb yaa nimbãan dãmba, la naong rãmba, la zoens la bɛɛl ye.’ Sẽn na yɩl tɩ b ra leb n yɩ naong rãmb la zoens la bɛɛl tẽebã wɛɛngẽ, ned ning fãa sẽn yaa wa bãmb rũndã-rũndã segd n daa tẽeb ‘sãnem sẽn zug ne bugum,’ tɩrlem ‘fu-peels’ la ‘nin kaam’ sẽn paasd tẽeb nenemã Kirist nengẽ. Kiris-neb yel-gɛtbã sõngda nin-kãens ne sũ-noog tɩ b bãng b tẽebã ratem yõodo, sẽn na yɩl n paam “tẽeb arzɛgse.” (Zak 2:5; Matɩe 5:3, NW ) Sẽn paase, yel-gɛtbã segd n sõng-b lame tɩ b sõog tẽebã “nin kaam,” tɩ b sak n tũ a Zezi zãmsgã, a mak-sõngã la a tall a tagsgã buudu. Woto la “yĩng ratem wẽnga la nin datem wẽnga ne tɩtaama” tɩɩm.—1 Zã 2:15-17.
19 A Zezi lengdame la a kibind b rãmb nins fãa a sẽn nongã. Yel-gɛtbã sẽn sakd yẽ wã segd n maanda woto me ne sũ-bʋgsem. (Tʋʋma 20:28, 29) Laodise nebã ra segd n ‘nanga pãnga la b tek yam n kos sugri,’ n toeem b sẽn tagsd to-to wã la b vɩɩmã manesem. La tõnd minim n tara vɩɩm manesem sẽn lebsd Wẽnnaam tʋʋmdã poorẽ d vɩɩmã pʋgẽ bɩ? Sã n yaa woto bɩ d ‘ra nin kaam a Zezi nengẽ,’ tɩ kɩt tɩ d tõog n yã tɩ tara yõod tɩ d bao Rĩungã pipi ne yẽesem.—Matɩe 6:33.
20, 21. Rũndã-rũndã, ãnd dãmb n deegd a Zezi, a sã n wa wẽ sallem b ‘rig noorẽ,’ la b saagr yaa bõe?
20 Kirist yeelame: “Gese, mam yasa rignoorẽ n kabsdẽ. Ned sã n wʋm mam koɛɛga n pak a kʋɩlenga, mam na n kẽe yẽ roogẽ n dɩ ne yẽnda, tɩ yẽ me rɩ ne maam.” A Zezi sã n da rɩt ne neba, a ra nong n zãmsda nebã tẽebã yɛla. (Luk 5:29-39; 7:36-50; 14:1-24) Masã, a wẽeda sallem tiging sẽn wõnd Laodise rẽndã rignoorẽ. A nebã na n deeg-a lame, n leb n tall nonglem ne-a, n deeg-a b sʋka, n sak t’a zãms-b bɩ? B sã n maan woto, Kirist na n dɩɩ ne-b tɩ naf-b wʋsg tẽebã wɛɛngẽ.
21 Rũndã-rũndã, makr wɛɛngẽ, ‘piis a taabã’ reega a Zezi b nengẽ, la woto tara bãmb n debd vɩɩm sẽn pa sat zĩigẽ. (Zã 10:16; Matɩe 25:34-40, 46) Kirist na n kõo sẽn zae-bã ned kam fãa sẽn tõogã zu-no-kãseng sẽn yaa ‘zĩnd ne yẽ a geera zug wa yẽ me sẽn tõoge la a zao ne a Ba wã a geera zugã.’ N-ye, a Zezi kãabame t’a na n kõo sẽn zae-bã sẽn tõogã keoor sẽn yaa kãsenga, sẽn yaa zomb naam geer zug ne yẽ, a Ba wã nug-rɩtg saasẽ. La piis a taabã sẽn yaa tõogdbã gẽegda zĩ-kãseng tẽng zugu, Rĩungã naam dɩɩb sasa.
Rẽ sẽn zãmsd tõnd fãa bũmb ningã
22, 23. a) Wãn to la kiris-nebã fãa tõe n dɩ goam nins a Zezi sẽn taas tigims a yopoe wã nafa? b) Tõnd segd n yãka yam ne d sũy fãa n maan bõe?
22 Sãmbg sẽn ka be, kiris-nebã fãa tõe n dɩɩ goam nins a Zezi sẽn taas Azimineer tigims a yopoe wã nafa. Kiris-neb kãsem dãmbã sẽn tar nonglmã sẽn yã tɩ Kirist pẽga tigimsã wa sẽn zemsã, b na n pẽga neb la tigims nins sẽn maand neer tẽebã wɛɛngẽ wã. Zĩig ning pãn-komslem sẽn be wã, kãsem dãmbã sõngda b tẽed-n-taasã tɩ b sak yellã tɩɩm, sẽn yit Gʋlsg Sõamyã pʋgẽ wã. Tõnd fãa tõe n ket n dɩta sagls nins fãa Kirist sẽn taas tigims a yopoe wã nafa, d sã n sakd-b tao-tao, la d pʋʋsd ne d sũy fãa me. *
23 Yaoolem day kãensã pa wakat d sẽn na n bao n yɩ sek-m-mens rãmba, bɩ n bao laog bɩ bũmb a to sẽn na n kɩt tɩ d tʋm Wẽnnaam tʋʋmdã ne rok-m-zugẽ ye. Woto yĩnga, bɩ tigimsã fãa ket n yãgd wʋsg wa fɩtl-dogends a Zezi sẽn ning b zĩigẽ. D sẽn yaa kiris-neb sẽn yaa kɩs-sɩd dãmbã, Kirist sã n gomd bɩ d kelg wakat fãa, la d kelg bũmb ning vʋʋsem sõngã sẽn yetã. Woto d na n paama sũ-noog sẽn kaoosde, n yaa vẽenem zãadb a Zeova ziir yĩnga.
[Tẽngr note]
^ sull 22 B wɛgsa Wilgri 2:1–3:22 La Révélation : le grand dénouement est proche ! sebrã pʋgẽ, a sak a 7 n tɩ ta 13. Seb-kãng ya a Zeova Kaset rãmbã n yiisi.
Wãn to la y na n leoke?
• “Pag a Zezabɛll” da yaa ãnda, la bõe yĩng tɩ pagb nins sẽn yaa wẽn-zoɛtbã pa rɩkd a togs-n-taare?
• Yel-bʋg n da be Sard tigingã pʋgẽ, la bõe la d tõe n maan n da wa lebg wa kiris-neb wʋsg sẽn da be be wã?
• Bõe la a Zezi kãab Filadɛlfi tigingã, la wãn to la rẽ pidsd rũndã-rũndã?
• Bõe yĩng tɩ b keoog Laodise tigingã, la saag-bʋg n be kiris-neb nins sẽn tar yẽesmã taoore?
[Zãmsgã sogsgã]
[Foto, seb-neng 14]
D segd n laka d mens ne “pag a Zezabɛll” manesem wẽnsã
[Foto rãmba, seb-neng 16]
A Zezi paka ‘kʋɩlen-kãseng’ t’a karen-biisã tõe n paam Rĩungã zu-noodo
[Foto, seb-neng 18]
Yãmb deegda a Zezi la y kelgd-a bɩ?