Kirist gomda ne tigimsã
Kirist gomda ne tigimsã
‘Sẽn zãad-a ãds a yopoe ne a rɩtgã yetame.’—WILGRI 2:1.
1, 2. Bõe yĩng tɩ d segd n dat n bãng bũmb nins Kirist sẽn yeel Azimineer tigims a yopoe wã?
YA A ZEOVA Biribl yend a sẽn naanã, a Zezi Kirist n yaa kiris-neb tigingã Zusoaba. Sẽn na yɩl n tall a karen-biis nins sẽn paam vʋʋsem sõng zaeebã tiging t’a pa rẽgme, Kirist sẽn yaa b Zusoabã, a kõt-b-la noy la a remsd-ba. (Efɛɛz rãmba 5:21-27) D tara makr ne rẽ Wilgr sak a 2 la a 3 pʋgẽ. Be d yãta koees sẽn tar pãng a Zezi sẽn taas Azimineer tigims a yopoe ne nonglmã.
2 Nand tɩ tʋm-tʋmd a Zã wʋm a Zezi goam nins a sẽn taas tigims a yopoe wã, Wẽnnaam kõ-a-la vẽnegr sẽn tɩ loe ne “Zusoaba raare.” (Wilgri 1:10) ‘Daar’ kãng sɩnga Mesi Rĩungã luglgẽ yʋʋmd 1914. Rẽnd Kirist sẽn togs tigimsã bũmb ninsã tara yõod wʋsg yaoolem day kãensã pʋsẽ. A sẽn kõ raood kengr la sagls ninsã sõngda tõnd tɩ d mao ne wakat kãensã sẽn yaa tood wakatã.—2 Tɩmote 3:1-5.
3. Tẽebã wɛɛngẽ, ‘ãdsã,’ ‘malɛgsã’ la ‘sãnem fɩtl dãmbã’ tʋm-tʋmd a Zã sẽn yã wã võor yaa bõe?
3 A Zã yãa a Zezi Kirist sẽn paam ziirã, sẽn ‘zãad ãds a yopoe ne a rɩtgo,’ n ‘kẽnd sãnem fɩtl dogens a yopoe’ bɩ tigimsã sʋka. ‘Ãdsã’ yaa ‘tigims sẽn sãeeg tẽns a yopoe pʋgẽ wã malɛgse.’ (Wilgri 1:20, Sebr Sõngo; 2:1) Wakat ninga, ãds makda malɛgse, la Kirist ra pa na n kɩt tɩ ninsaal gʋls koees n taas malɛgs ye. Woto yĩnga, ‘malɛgsã’ segd n yaa yel-gɛtbã bɩ kãsem dãmb sẽn paam vʋʋsem sõng zaeebã sula. Gom-biig ning sẽn yaa ‘malɛgsã’ tɩ loee ne b koe-taasgã tʋʋmdã. Wẽnnaam siglgã sẽn fɩɩgã yĩnga, ‘tʋm-tʋmd sẽn tũud sɩda’ leb n yãka rap sẽn tar zʋg sõma nins sẽn segdã ‘piis a taaba’ sʋk tɩ b yɩ yel-gɛtba.—Luk 12:42-44; Zã 10:16.
4. Wãn to la Kirist sẽn togsd tigimsã bũmb ninsã tõe n naf kãsem dãmbã sẽn kelgdã?
4 ‘Ãdsã’ bee a Zezi nug-rɩtgẽ, sẽn dat n yeel t’a tara tõog b zutu, n wilgd-b sore, n nong-b la a kogend-ba. Woto kɩtame tɩ b tar kolg-n-togs yẽ taoore. Rũndã-rũndã kãsem dãmbã sẽn tũud a goam nins a sẽn taas tigims a yopoe wã yĩnga, b nee b sẽn tõe n welg zu-loees sẽn wõnd woto to-to. Yaa sɩd tɩ kiris-nebã fãa segd n kelga Wẽnnaam Biriblã. (Mark 9:7) Rẽnd bõe la d tõe n zãmse, d sã n kelgd Kirist sẽn gomd ne tigimsã?
Efɛɛz tigingã malɛka
5. Efɛɛz ra yaa galʋ-tẽn-bʋg buudu?
5 A Zezi pẽga Efɛɛz tigingã la a keoog-a. (Karm-y Wilgri 2:1-7.) Wẽn-poak a Artemis pʋʋsg ro-kãsengã sẽn da beẽ wã yaa leebg la tũudum nif zĩig Azimineer mogrã noor nen-taoor babgo. Baa ne Efɛɛz sẽn da pid ne yoobo, ziri tũudum la tɩɩm dãmbã, Wẽnnaam ninga tʋm-tʋmd a Poll la neb a taab koe-mooneg bark galʋ-tẽn-kãngã pʋgẽ.—Tʋʋma, sak 19.
6. Wãn to la kiris-neb nins sẽn yaa kɩs sɩd dãmb rũndã wã yaa wa pĩnd Efɛɛz kiris-nebã?
6 Kirist pẽga Efɛɛz tigingã n yeele: “Mam bãnga yãmb tʋʋma ne y namsga la y sũ-marã; la yãmb ka sakd neb nins sẽn yaa wẽnga ye; yãmb maka neb nins sẽn yet tɩ bãmb yaa tʋm-tʋmdba, la b yaool n ka tʋm-tʋmdb ye; la yãmb mikame tɩ bãmb yaa ziri-yagdba.” Rũndã-rũndã, a Zezi karen-biis hakɩkã tigims me maanda tʋʋm-sõma, n tʋmd wʋsg la b tar sũ-mar toog pʋgẽ. B pa sak ziri saam-biis nins sẽn da rat tɩ b ges-b wa tʋm-tʋmdbã ye. (2 Korẽnt dãmba 11:13, 26) Wa Efɛɛz rãmbã, kiris-neb nins sẽn tar kɩs-sɩd rũndã-rũndã wã “pa tõe n sak neb nins sẽn yaa wẽngã” ye. La sẽn na yɩl n kell n tall a Zeova balengã t’a yɩ yɩlemd la a kogl tigingã, b pa maand lagem-n-taar ne sɩdã kɩɩsdb nins sẽn pa tekd yam n kos sugrã ye.—Galat dãmba 2:4, 5; 2 Zã 8-11.
7, 8. Yel-manesem bʋg sẽn da yaa yell wʋsg la Efɛɛz tigingã ra tara, la wãn to la d tõe n mao ne yell a woto?
7 Ne rẽ fãa, kiris-nebã sẽn da be Efɛɛzã ra tara zu-loe-kãsenga. A Zezi yeelame: “Yell ninga mam sẽn tar ne yãmba, yaa tɩ yãmb basa yãmb pipi nonglem.” Tigingã neb ra segd n vʋʋga nonglem ning b sẽn da tar pipi ne a Zeova wã. (Mark 12:28-30; Efɛɛz rãmba 2:4; 5:1, 2) Tõnd fãa segd n gũusame n da wa bas nonglem ning d sẽn tall ne Wẽnnaam pipi wã ye. (3 Zã 3) Yaa wãn to masã, yɛl wala arzɛk tʋlsem la yõ-noogrã pʋgb sã n wa sɩngdẽ n dat n tall pãng wʋsg tõnd vɩɩmã pʋgẽ? (1 Tɩmote 4:8; 6:9, 10) Sã n wa yaa woto, d segdame n pʋʋs sõma-sõma n kos Wẽnnaam sõngre, sẽn na yɩl n ledg tʋlsem kãng ne nonglem sẽn tar pãng ne a Zeova, la ne mi-beoogo, bũmb nins fãa yẽ ne a Biriblã sẽn maan n kõ tõndã yĩnga.—1 Zã 4:10, 16.
8 Kirist sagla Efɛɛz rãmbã woto: “Bɩ y tẽeg yãmb sẽn kong ne bũmb ninga la y tek yam n kos sugri n leb n maan yãmb pipi tʋʋma.” B sã n da pa maan woto yaa bõe n da na n paam-ba? A Zezi yeelame: “A sã n ka woto, mam na n waa yãmb nengẽ, la mam na n yiisa yãmb fɩtl doagendga t’a ra le zĩnd a zĩigẽ . . . ye.” Piisã fãa sã n da bas tɩ b pipi nonglmã maage, “fɩtl doagendga” bɩ tigingã ra pa na n leb n zĩnd ye. D sẽn yaa kiris-neb sẽn tar yẽesmã, bɩ d tʋm wʋsg tɩ tigingã tẽebã vẽenem ket n yãgda.—Matɩe 5:14-16.
9. Wãn to la d segd n ges tũudum wila?
9 Efɛɛz kiris-nebã zemsa pẽgre, b sẽn da kis “Nikolayɩt dãmba tʋʋma.” B sẽn togs bũmb ning Wilgr sebrã pʋgẽ wã toor sẽn ka be, d pa mi bũmb vẽeneg sẽn tɩ loe ne Nikolayɩt dãmbã sɩngre, b zãmsgo, la tũudum wil-kãngã minungã wɛɛngẽ ye. La a Zezi sẽn gɩdgd ninsaalb pʋgbã yĩnga, d segd n kisa tũudum wilã wakat fãa wa Efɛɛz kiris-nebã sẽn da kis-b to-to wã.—Matɩe 23:10.
10. Neb nins sẽn kelgd bũmb nins vʋʋsmã sẽn yetã na n paama bõe?
10 “Ned ninga sẽn tar tʋb bɩ a kelg bũmb nins [vʋʋsem sõngã] sẽn togsd tẽedbã.” Woto la Kirist yeel-yã. A Zezi sẽn da wa n be tẽng zugã, ra yaa ne Wẽnnaam vʋʋsem sõngã pãng la a ra gomda. (Ezai 61:1; Luk 4:16-21) Woto yĩnga, d segdame n kelg bũmb nins Wẽnnaam sẽn tũnugd ne a Zezi n gomd ne vʋʋsem sõngã maasmã. A Zezi kãaba woto vʋʋsem sõngã sor-wilgr pʋgẽ: “Ned ninga sẽn na n tõoge, mam na kõ yẽ vɩɩm tɩɩga sẽn be Wẽnnaam [arzãnã] tẽn-sʋka biis t’a rɩ.” Sẽn zae-bã sẽn tũud bũmb nins vʋʋsmã sẽn yetã na n vɩɩmda saasẽ n pa tol n bãng kũum “Wẽnnaam [arzãnã] pʋgẽ” sẽn ya a Zeova meng nengẽ wã. ‘Kʋʋn-kãsengã’ neb me sẽn kelgd bũmb nins vʋʋsmã sẽn yetã, na n paama tẽng zug arzãnã, n yũ “vɩɩm koom kʋɩlga” koom la b leb n paam maagre, tɩɩs nins sẽn be kʋɩlgã wogellã “vãad” maasem yĩnga.—Wilgri 7:9; 22:1, 2; Luk 23:43.
11. Wãn to la d tõe n kɩt tɩ tigingã tall nonglem ne a Zeova n paase?
11 Efɛɛz rãmbã basa b pipi nonglmã tɩ maage, la yaa wãn to, bũmb sẽn wõnd woto sã n wa maand tiging pʋgẽ rũndã-rũndã? Bɩ tõnd ned kam fãa sõng n kɩt tɩ tigingã nebã tall nonglem ne a Zeova n gom a nonglem tʋʋmã yelle. D tõe n wilga d mi-beoog ne Wẽnnaam sẽn tall nonglem ninga, n dɩk a Biribl nongrã n kõ tɩ yɩ rondã. (Zã 3:16; Rom dãmba 5:8) Sã n zemsame, d tõe n goma Wẽnnaam nonglmã yell d leoorã la d sõssã d sẽn kõtã pʋsẽ tigissẽ wã. Tõnd tõe n wilga d mengã nonglem ne a Zeova n pẽg a yʋʋrã koe-moonegã pʋgẽ. (Yɩɩl Sõamyã 145:10-13) N-ye, tõnd goamã la d tʋʋma tõe n maana yɛl wʋsg n vʋʋg bɩ n paas tigingã pipi nonglem.
Smirn tigingã malɛka
12. Bõe la pĩnd wẽndẽ yɛlã wilgd Smirn la tũudũm yɛl b sẽn da maand be wã wɛɛngẽ?
12 Kirist “sẽn yaa sɩngre la sɛɛbo, sẽn dag n yɩ-a kũum n lebg n vʋʋga” pẽga Smirn tigingã. (Karm-y Wilgri 2:8-11.) Smirn (sẽn yaa Izmiir sẽn be Turki masã wã) ra yaa Azimineer nen-taoor mogrã noor tẽnga. Yaa Gɛrk rãmbã n me galʋ-tẽn-kãngã, la yaa Lidi nebã n sãam-a sẽn zems yʋʋmd 580 sẽn deng Kirist zãmaana. A Alɛgsãndr le Gãrã lɛdgdbã n lebg n me Smirn zĩ-zẽnga. A lebga Rom sẽn da soog Azi wã babgo, n lebg leebg sẽn tar pãng zĩig sẽn da tar ro-bɛd sẽn yaa neeba. B ra mee wẽn-doog a Tibɛɛr Sezaar yʋʋr yĩngã, tɩ kɩt tɩ galʋ-tẽn-kãng lebg Rom na-kãsengã baleng zĩiga. Neb nins sẽn wat n balemd be wã ra segd n yãka wisd zɛrɩ n yõog n yeel tɩ: “A Sezaar yaa Soaala.” Kiris-nebã ra pa tõe n maan dẽ ye, bala sã n yaa ne bãmba, “ya a Zezi la Soaala.” Rẽ kɩtame tɩ b paam namsg wʋsgo.—Rom dãmba 10:9.
13. Baa ne b sẽn da be naong pʋgẽ wã, arzɛg-bʋs buud la Smirn kiris-nebã ra tara?
13 Namsgã b sẽn paamdã toog sẽn ka be, kiris-neb nins sẽn da be Smirnã ra namsda laogã kaalem yĩnga, tõe tɩ rẽ ra yaa sɩbgre, b sẽn da pa rat n balem Rom na-kãsengã yĩnga. Rũndã-rũndã, a Zeova sõgen dãmbã pa põsd zu-loe-kãensã buud ye. (Wilgri 13:16, 17) Baa ne b sẽn da be naong pʋgẽ wã, sẽn wõnd-b kiris-neb nins sẽn da be Smirnã tara arzɛk tẽebã wɛɛngẽ, la yaa rẽ n sɩd tar yõod n yɩɩda.—Yelbũna 10:22; 3 Zã 2.
14, 15. Wilgri 2:10 goamã tõe n kõo sẽn zae-bã bels-bʋgo?
14 Zʋɩf rãmb wʋsg sẽn da be Smirn da yaa “Sʋɩtãana rẽnda,” bala b ra tara rog-n-mik sẽn kɩɩsd Gʋlsg Sõamyã, b zãgsa Wẽnnaam Biriblã la b tʋʋs a karen-biisã sẽn paam dogem vʋʋsem sõng pʋgẽ wã. (Rom dãmba 2:28, 29) La kiris-neb nins sẽn paam vʋʋsem sõng zaeebã sɩd paama belsg ne Kirist goam nins sẽn pʋgdã! A yeelame: “Bɩ y ra zoe rabeem ne bũmb nins sẽn na n nams yãmba ye. Gese, Sʋɩtãana na n kẽesa yãmb kẽer bi-bees roogẽ tɩ yãmb paam makre, la yãmb na n paama namsg rasem piiga. Bɩ y maan neer hal tɩ ta kũum, la mam na kõ yãmb vɩɩm maanfo.”—Wilgri 2:10.
15 A Zeova naam sẽn ka to wã teelg pʋgẽ, a Zezi ra pa zoet kũum ye. (Filip rãmba 2:5-8) Baa ne a Sʋɩtãan sẽn zabd ne kellã sẽn paam vʋʋsem sõng zaeebã, yɛl nins sẽn na n nams-b wala toogo, bãens roogẽ kõom wall kũ-toaag rabeem pa tar-b ye. (Wilgri 12:17) B na n tõoga dũniyã. Wall tɩ b fõgen maanf b sẽn maan ne vãad la tɩ-puud sẽn sãamd wa b sẽn da maand n kõt wẽn-zɩtbã reemẽ gãndaadã, Kirist kãabda sẽn zae-bã sẽn na n vʋʋgã “vɩɩm maanfo,” tɩ b na n yɩ saasẽ bõn-naands sẽn pa kiidi. Ad sɩd yaa kũun sẽn ka mak-n-taaga!
16. Tõnd sã n be tiging sẽn yaa wala pĩnd Smirn tigingã pʋgẽ, gom-bʋg yell la d segd n tagse?
16 Tõnd saagdame n na n vɩɩmd saasẽ tɩ yaa tẽng zug me, yaa wãn to masã, d sã n lagem ne tiging sẽn yaa wala pĩnd Smirn tigingã? Sã n yaa woto, bɩ d sõng d tẽed-n-taasã tɩ b tags bõn-kãseng ning sẽn kɩt tɩ Wẽnnaam basd namsgã tɩ wat tõnd zut d tẽebã yĩngã yelle. Bõn-kãng yaa gomd ning sẽn tɩ loe ne ãndũni naam sẽn ka to wã. A Zeova Kaset soab fãa sẽn tar burkĩnd kõta kaset t’a Sʋɩtãan yaa ziri yagda, la a wilgdẽ tɩ baa b sã n namsd ninsaala, a tõe n sɩd kell n wilgame tɩ Wẽnnaam bal n segd ne yɩ ãndũniyã Naab sẽn ka to. (Yelbũna 27:11) Bɩ d sõng kiris-neb a taabã tɩ b tall sũ-mar namsg ning b sẽn paamd b tẽebã yĩngã pʋgẽ, la bɩ rẽ kɩt tɩ d ket n tar zu-noog n ‘sakd [a Zeova] tɩ rabeem kaẽ, la d kẽn yẽ taoor daar fãa ne sõmblem la tɩrlem d yõor tɛka,’ n-ye, wakat sẽn kõn sa.—Luk 1:68, 69, 74, 75.
Pɛrgam tigingã malɛka
17, 18. Pɛrgam da yaa baleng bʋg buud zĩiga, la f sã n da zãgs bõn-naands pʋʋsgã bõe n da tõe n paam-fo?
17 Pɛrgam tigingã paama pẽgr la remsgo. (Karm-y Wilgri 2:12-17.) Pɛrgam da yaa wẽn-zɩtb tũudum zĩiga, n da be sẽn zems kɩlomotr 80 ne Smirn rɩtg babgã. Yaa wa Kalde ãds-bagbã yii Babilon n zoe n kẽng be. Bãad dãmb wʋsg kẽnga tɩpgã ziri wẽnd a Askelepios pʋʋsg roogã yʋʋr sẽn yi wã sẽn da be Pɛrgammã pʋgẽ. B boola Pɛrgam sẽn da tar wẽn-dot b sẽn da balemdẽ a Sezaar Ogustã tɩ “Rom na-kãsengã baleng zĩ-kãsenga, soolmã sɩngr sasa.”—Encyclopædia Britannica, 1959, volim 17, seb-neng 507.
18 Pɛrgam, tẽn-kugr la b ra me a Zeus balengã yĩnga. Galʋ-tẽngã ra leb n yaa zĩig ning a Sʋɩtãan sẽn tusẽ nebã tɩ b balemd ninsaalba. Rẽnd pa lingri, b sẽn yeel tɩ tigingã sẽn da be zĩig ningã ra yaa ‘Sʋɩtãan geerã’ ye. Ned sẽn teend a Zeova naam sẽn ka to wã sã n da tõdg t’a kõn balem Rom na-kãsengã, ra tõe n tũu ne a soabã yõore. Dũniyã ket n bee a Sʋɩtãan nugẽ, la tẽnsã tãb-kao la b balemd masã. (1 Zã 5:19) Sẽn sɩng ne pipi yʋʋm kob-gĩndã n tõk rũndã, kiris-neb wʋsg sẽn yaa kɩs-sɩd dãmb la b kʋ b tẽebã yĩnga, wala a soab ning yell Kirist sẽn gom n yeel t’a ‘Ãntipas sẽn yaa mam kɩs-sɩd kaset soab b sẽn kʋ yãmb sʋkã.’ Wẽnnaam a Zeova la a Zezi Kirist sɩd tẽra sõgen kãens sẽn yɩ kɩs-sɩd dãmbã yelle.—1 Zã 5:21.
19. Bõe la a Balaam maan-yã, la kiris-nebã fãa segd n gũusa ne bõe?
19 Kirist goma ‘a Balaam zãmsga’ yell me. Ziri no-rɛɛs a Balaam sẽn da nong laog tɩ loogã yĩnga, a makame n na n kãab Israɛll wẽnga. Wẽnnaam sẽn wa n kɩt t’a Balaam kãab-wẽngã lebg barkã, a yẽsa ne Moaab rĩm a Balak n belg Israɛll neb wʋsg tɩ b balem wẽn-naands la b yo. Kiris-neb kãsem dãmbã segd n yɩɩ kãn-kãe tɩrlmã tũub wɛɛngẽ wala a Fineyas sẽn da yik n zab ne a Balaam mag-wẽnsã. (Sõdbo 22:1–25:15; 2 Pɩɛɛr 2:15, 16; Ziid 11) Sɩda, kiris-nebã fãa segd n gũusame tɩ wẽn-naandsã pʋʋsg la yoobã ra wa kẽ tigingã pʋgẽ ye.—Ziid 3, 4.
20. Sɩdã kɩɩsg tagsa sã n wa sɩng n kẽed kiris-ned yamẽ, bõe la a segd n maane?
20 Yel-kãseng n da yɛgd Pɛrgam tigingã, bala a basame tɩ ‘neb kẽer sẽn da be bãmb sʋkã sak Nikolayɩt rãmba zãmsgo.’ Kirist yeela tigingã tɩ: “Bɩ y tek yam n kos sugri. A sã n ka woto, mam na n waa yãmb nengẽ tao-tao n wa zab ne bãmb ne m noor sʋʋga.” Neb nins sẽn wat ne welsg tũudmã pʋgẽ wã rat n sãama kiris-nebã tẽebo, la nin-kãens buudã sẽn nong welsg la tũudum wil maanegã pa na n paam Wẽnnaam Rĩungã ye. (Rom dãmba 16:17, 18; 1 Korẽnt dãmba 1:10; Galat dãmba 5:19-21) Sɩdã kɩɩsg tagsa sã n wa sɩng n kẽed kiris-ned yamẽ t’a rat n yelg-ba, a segdame n kelg Kirist keoogrã! Sẽn na yɩl n põs sãoongo, a segd n teka yam n kos sugr la a bao sõngr tigingã kãsem dãmb nengẽ. (Zak 5:13-18) Ya a rems tʋʋll-tʋʋlle, bala a Zezi wata tao-tao n na n kao bʋʋdo.
21, 22. Ãnd n dɩt ‘mann sẽn solgã,’ la bõe la a makda?
21 Kiris-neb nins sẽn paam vʋʋsem sõng zaeeb n tar kɩs-sɩdã ne b tũud-n-taasã me sẽn yaa kɩs-sɩd dãmbã pa segd n zoe bʋ-kaoor ning sẽn watã ye. Neb nins fãa sẽn tũud sagls nins a Zezi sẽn kõ ne Wẽnnaam vʋʋsem sõngã sor-wilgr maasma na n paama barka. Wala makre, sẽn zae-bã sẽn tõog dũniyã, b na n kõ-b-la ‘mann sẽn solgã’ tɩ b rɩ, la b na n kõ-b-la ‘kug-pɛɛlg’ sẽn tar ‘yʋ-paalga.’
22 Wẽnnaam rɩlga Israɛll nebã ne mannã b yʋʋm 40 yeebgã rasempʋɩɩgẽ wã sasa. B yãka ‘bur’ kãng n bĩng sãnem dʋkẽ kaoolã koglgẽ, n solg-a sɛk roogẽ wã zĩ-sõng sẽn yɩɩdẽ wã, tɩ zĩ-kãng tar vẽenem sẽn yaa yel-solemd sẽn makd a Zeova belmã. (Yikri 16:14, 15, 23, 26, 33; 26:34; Hebre dãmba 9:3, 4) B ra pa kõ ned ba a ye sor t’a rɩ mann kãnga sẽn solgã ye. La a Zezi karen-biis nins sẽn zae ne vʋʋsem sõngã vʋʋgr poore, b na n vɩɩmda saasẽ n pa tol n ki ye, tɩ b mak rẽ ne b sẽn dɩt ‘mann sẽn solgã.’—1 Korẽnt dãmba 15:53-57.
23. “Kug-pɛɛlga” la “yʋ-paalga” võor yaa bõe?
23 Kug-sablg paoong Rom dãmbã bʋ-kaoodb taoor ra wilgdame tɩ f tara taale, tɩ kug-pɛɛlg ra wilgdẽ tɩ f paama bʋʋm. A Zezi sẽn kõ kiris-neb nins sẽn zae ne vʋʋsem sõngã sẽn yaa tõogdb “kug pɛɛlga” wilgdame t’a gesame tɩ b ka yelle, la tɩ b yaa yɩlma. Sẽn mik tɩ Rom dãmbã ra wilgda kug-pɛɛl me n yaool paam sor n kẽ reem zĩ-kãsemsẽ wã yĩnga, “kug-pɛɛlga” tõe n wilgdame tɩ b sak n kõo sẽn zae-bã zĩig saasẽ Pebilã kãadem kibsẽ. (Wilgri 19:7-9) Vẽenega, “yʋ-paalga” makda zu-noog ning b sẽn na n paam n lagem ne Kirist n yɩ a na-rɩt-n-taas saasẽ Rĩungã pʋgẽ wã. Ad woto fãa kengda sẽn zae-bã la b tũud-n-taasã sẽn tʋmd a Zeova tʋʋmdã n saagd n na n vɩɩmd tẽng zug arzãnẽ wã raood wʋsgo!
24. D manesem segd n yɩɩ bõe sɩdã kɩɩsg taoore?
24 Yaa yam tʋʋmd tɩ d tẽeg tɩ sɩdã kɩɩsdb kɩtame tɩ yell ra yɛgd Pɛrgam tigingã. Yell sẽn wõnd woto sã n yɛgd tõnd sẽn be tiging ning pʋgẽ wã tẽebo, bɩ d zãgs sɩdã kɩɩsg fasɩ la d ket n kẽnd sɩdã pʋgẽ. (Zã 8:32, 44; 3 Zã 4) Sẽn mik tɩ ziri karen-saam dãmbã bɩ neb goam sẽn wilgd tɩ b tõe n wa yɩɩ sɩdã kɩɩsdbã tõe n sãama tiging tõrã yĩnga, d segd n yalsa kãn-kãe n da tol n bas tɩ zãmsg sẽn yaa wẽns wa gɩdg-d tɩ d pa tũ sɩdã ye.—Galat dãmba 5:7-12; 2 Zã 8-11.
25. Kirist koees a sẽn taas tigims bʋs la d na n vaees sõsg ning sẽn pʋgdã pʋgẽ?
25 Ad pẽgr goam la sagls nins a Zezi Kirist sẽn paam ziirã sẽn taas tigims a tãab Azimineer tigims a yopoe wã sʋkã tõnd sẽn vaeesã sɩd kɩtdame tɩ d tags neere! La vʋʋsem sõngã sẽn wilgd-a sorã, a tara bũmb wʋsg n na n togs tigims a naasã sẽn ketã. D na n vaeesa koe-kãens a Zezi sẽn taas Tiyatiiri, Sarde, Filadɛlfi la Laodise tigimsã sõsg ning sẽn pʋgdã pʋgẽ.
Y na n leokame tɩ bõe?
• Bõe yĩng tɩ d segd n kelg koees nins Kirist sẽn taas tigimsã?
• Wãn to la d tõe n sõng n vʋʋg tiging pipi nonglem?
• Bõe yĩng tɩ d tõe n yeel tɩ kiris-neb nins sẽn da yaa naong rãmb Smirnã ra tara arzɛgse?
• D sã n tags Pɛrgam tigingã yelle, wãn to la d segd n ges sɩdã kɩɩsg tagsa?
[Zãmsgã sogsgã]
[Kart, seb-neng a 8]
(Sebrã meng pʋgẽ la y tõe n yã fãa)
GƐRƐS
AZIMINEER
Efɛɛz
Smirn
Pɛrgam
Tiyatiir
Sard
Filadɛlfi
Laodise
[Foto, seb-neng 10]
‘Kʋʋn-kãsengã’ na n paama tẽng zug arzãna
[Foto rãmba, seb-neng 11]
Kiris-nebã b sẽn nams b tẽebã yĩngã tõoga dũniyã