Yaas-y kɛpɩ n ges a Zeova fãagrã!
Yaas-y kɛpɩ n ges a Zeova fãagrã!
“Bɩ y sũ tãp n yaas n ges [a Zeova] sẽn na n tõog n kõ yãmba.”—2 KƖBAYA 20:17.
1, 2. Bõe yĩng tɩ “Magoog Goog” zabrã sẽn kolg wʋsgã wẽnem na n yɩɩg bi-beer sẽn kẽesd rabeemã sẽn yaa yell ne tẽnsã?
B BILGA bi-beer sẽn kẽesd rabeemã sẽn ya a soaba, n wilg tɩ yaa zabr b sẽn zabd ne dũniyã neb fãa la ãdem-biisã vɩɩm manesem menga. Rẽnd d nee bũmb ning sẽn kɩt tɩ d pa segd n deem ne yel-kãngã wã. La zabr wẽnem sẽn yɩɩd woto n wate, tɩ nebã pa tagsd a yell wʋsg bɩ b toog pʋd n kae ne-a meng ye. Yaa zab-bʋgo?
2 Yaa ‘a Goog sẽn yit Magoogã’ zabrã, tɩ Biiblã gomd a yell Ezekɩɛll sak 38 pʋgẽ wã. D sã n yeel tɩ zab-kãng wẽnem na n yɩɩga bi-beer sẽn kẽesd rabeemã sẽn dat n sãam tẽnsã, yaa bilgr sẽn loog noor bɩ? Ayo, bala a Goog zabrã pa ne ãdem-biisã goosneema rãmb bal ye. Yaa ne Wẽnnaam saasẽ goosneema wã la a na n zab ne. La sẽn yaa lebend ne ninsaalb sẽn pa tõe n gɩdg zabr fãa sẽn wat b zutã, Naandã na n tõoga a Goog sẽn na n wa yik a zab-toaagã.
B na n yika zabr ne Wẽnnaam goosneemã
3. Bõe la b yeel dũniyã nanambs tɩ b maan yʋʋmd 1914 tɛka, la b manesem yɩɩ wãn to?
3 Wẽnnaam Rĩungã luglg saasẽ yʋʋmd 1914 tɛka, zabr n be Rĩm ning Wẽnnaam sẽn zĩnig naam geerẽ masã wã ne a Sʋɩtãan dũni wẽngã sʋka, n ket n kẽngd taoor hal ne masã. Wakat kãnga, b yeela tẽng zug nanambsã tɩ b sak Naab ning Wẽnnaam sẽn yãkã. La b zãgsa rẽ maaneg wa b sẽn da reng n togs woto wã: “Dũniyã rĩm dãmba zẽkda b mense la nanambs yẽsda ne taaba n kɩɩsd [a Zeova] la bãmb nin-tũusdgã n yetẽ: ‘Bɩ d kao bãmb balgrã n fãag d mens ne bãmb bãensã.’ ” (Yɩɩl Sõamyã 2:1-3) Rĩungã kɩɩsg na n taa a zug tẽn-sʋk Magoog Googã zabr wakate.
4, 5. Wãn to la ninsaalb tõe n zab ne Wẽnnaam saasẽ goosneema wã ninsaal nif sẽn pa ne wã?
4 Tõe tɩ y sokda y mens tɩ wãn to la ninsaalb tõe n zab ne saasẽ goosneema b sẽn pa ne. Biiblã wilgdame tɩ goosneema kãngã tara ‘neb tus koabg la tus pis-naas la a naas b sẽn da dũniyã zugu,’ n paas “Pebil” a Zezi Kirist. (Wilgri 14:1, 3; Zã 1:29) A sẽn be saasẽ wã yĩnga, b boonda goosneema paalgã tɩ “yĩngr paalga,” la b boond a tẽng zug nin-buiidã wala sẽn zems tɩ “dũni paalga.” (Ezai 65:17; 2 Pɩɛɛr 3:13) Neb 144 000 sẽn yaa Kirist na-rɩt-n-taasã sʋka, wʋsg zoe n baasa b tẽng zug vɩɩmã kɩs-sɩd pʋgẽ. Rẽ, b wilgame tɩ b zemsa ne tɩ sɩng tʋʋm-paalg ning sẽn gũud-b saasẽ wã.
5 La neb 144 000 sʋka, sẽn ket-b tẽngã zug sõor yaa bilfu. Neb sẽn yɩɩd 15 000 000 sẽn wa Soaalã Zaabr Dɩɩbẽ yʋʋmd 2002 wã sʋka, ra yaa neb 8 760 bal n wilg tɩ b tara saasẽ vɩɩm saagre. Ned ning fãa sẽn na n yɩ yaalg n zab ne kellã neb sẽn na n zĩnd Rĩungã pʋgẽ wã, sɩd-sɩda, a soab zabda ne Wẽnnaam Rĩungã.—Wilgri 12:17.
Rĩmã tõoga a zabrã n baase
6. Wãn to la a Zeova ne Kirist get nebã sẽn kɩɩsd Wẽnnaam nin-buiidã?
6 B ra pĩnd n togsa manesem ning a Zeova sẽn na n talle, b sã n wa kɩɩs Rĩung ning a sẽn luglã: “Sẽn zĩ-a saasẽ wã laadame, Zusoaba laada bãmba. La b na n goma ne bãmb ne sũ-puugri. B sũ-yikra na n kẽesa bãmb dabeem, Zusoaba yeelame: ‘Yaa maam n zĩndg m dĩma m Siõ tãn-sõng zugu.’ ” (Yɩɩl Sõamyã 2:4-6) Masã, wakat taame t’a Zeova na n kɩt tɩ Kirist tɩ ‘baas a tõogrã.’ (Wilgri 6:2, NW ) Wãn to la a Zeova get b sẽn kɩɩsd a nin-buiidã yaoolem tõogrã sasa? A getame tɩ yaa yẽ ne Rĩm ning yẽ sẽn kɩt tɩ rɩt naama la b kɩɩsda. A Zeova yeelame tɩ ‘ned sã n sɩɩs bãmb neda, yaa wa a sẽn tuk a nifu.’ (Zakari 2:12) La a Zezi togsa vẽeneg t’a geta nebã sẽn maan bɩ b sẽn pa maan a ba-biisã sẽn zae ne vʋʋsem sõngã wala yaa yẽ la b maan bɩ b pa maane.—Matɩe 25:40, 45.
7. Bõe yĩng t’a Goog na n sik a sũ-yikrã ‘kʋʋng kãsengã’ neb b sẽn bilg Wilgri 7:9 pʋgẽ wã zutu?
7 Yaa vẽeneg t’a Goog na n sika a sũ-yikrã neb nins sẽn sõngd kellã sẽn zae ne vʋʋsem sõngã me zutu. Nin-kãensã sẽn na n zĩnd Wẽnnaam ‘dũni paalgã’ pʋgẽ wã yaa ‘kʋʋng kãseng’ sẽn yit ‘soolem fãa, la buud fãa la neb sẽn gomd goam toɛy-toɛy’ sʋka. (Wilgri 7:9) B yeelame tɩ bãmb ‘yalsa geera ne Pebila taoore, la bãmb yera fu-peelse.’ Woto, b tara lohorem Wẽnnaam ne Kirist Zezi taoore. B tara “koms vãad b nusẽ,” n kilsd a Zeova n yetẽ tɩ yẽ n zems ne yɩ ãndũniyã Naab sẽn ka to, sẽn zĩnig Rĩm a Zezi Kirist sẽn yaa “Wẽnnaam Pebilã” t’a rɩt naamã a yʋʋr yĩngã.—Zã 1:29, 36.
8. A Goog sẽn na n yik zabrã na n kɩtame tɩ Kirist maan bõe, la rẽ na n waa ne bõe?
8 A Goog zabrã na n kɩtame tɩ Rĩm ning Wẽnnaam sẽn zĩndg geer zugã tik n yik n zab Armagedõ zabrã. (Wilgri 16:14, 16) Neb nins sẽn zãgs a Zeova naam sẽn ka to wã na n paama sãoongo. La sã n yaa ne neb nins sẽn deeg toog b sẽn tall kɩs-sɩd ne Wẽnnaam Rĩungã yĩngã, b na n paama yolsg wakat fãa yĩnga. Rẽ wɛɛngẽ tʋm-tʋmd a Poll gʋlsame: “Yõ wã yaa bãnd sẽn wilgd tɩ Wẽnnaam bʋʋd yaa tɩrga, la b na n geelgame tɩ yãmb zemsame tɩ paam Wẽnnaam soolem yãmb sẽn namsd a yĩngã. Tɩ bõe, Wẽnnaam na n maana tɩrga n tɩ lebs neb nins sẽn namsd yãmba toogo. La yãmb sẽn namsdã, b na n kõo yãmb vʋʋsg ne tõndo wakat ninga Zusoab a Zezi sẽn na n yi [saasẽ] ne bãmb malɛk kãsemsã n wa wã. Bãmb na n puka bug-witem pʋgẽ. Bãmb na n sɩbga neb nins sẽn ka mi Wẽnnaam la sẽn ka sakd tõnd Zusoab a Zezi Koe-noogã.”—2 Tesalonik rãmba 1:5-8.
9, 10. a) Wãn to la a Zeova kɩt tɩ Zida tõog bɛ sẽn tar pãng wʋsgo? b) Bõe la kiris-nebã segd n ket n maand rũndã-rũndã?
9 To-kãsengã sẽn wat n na n ta a baasg zĩigẽ Armagedõ sasa wã, Kirist na n zaba ne wẽng buuda fãa. La pa na n yɩ tɩlae ne a karen-biisã tɩ b zabe, wala sẽn da pa yɩ tɩlae ne Zida rĩungã sẽn tar buud a yiibã neb tɩ b zabe, zabr a ye sẽn wa n yik sẽn yɩɩd yʋʋm 2 900 sẽn loogã sasa wã. Zabrã ya a Zeova zabre, t’a kɩt tɩ b tõoge. Biiblã yetame: “Zusoaba belga a Amo ne Moaab neba la Seiir tãensa neba sẽn kẽng n na n tɩ zab ne Zida nebã. La Zusoaba tõoga bãmba. Tɩ bõe, Amo ne Moaab neba zaba ne Seiir tãnga nebã n sãam b zãnga. La bãmb sẽn sãam Seiir nebã n sɛ, bãmb wẽnemdame n kʋ taaba. La Zida neba sẽn ta weooga gãs-bedra zĩigẽ, bãmb gesa kʋʋng kãsenga sẽnẽ n yã tɩ b gãe tẽnga, b ned ba a ye ka põs ye.”—2 Kɩbaya 20:22-24.
10 Yɩɩ wala a Zeova sẽn da reng n togsã bal kɛpɩ: “Ka yãmb n na n zab zab-kãng ye.” (2 Kɩbaya 20:17) Kiris-nebã me na n maana woto, a Zezi Kirist sã n wa na n kẽng n ‘tɩ baas a tõogrã.’ La nananda, b ket n zabda ne wẽngã, pa ne zab-teed meng-meng ye, la yaa ne tẽebã zab-teedo. Woto yĩnga, b ‘ket n maanda sõama n tõogd wẽnga.’—Rom dãmba 6:13; 12:17-21; 13:12; 2 Korẽnt dãmba 10:3-5.
Ãnda n na n lʋɩ taoor tɩ b zab ne a Googe?
11. a) Sigl-bʋs la a Goog na n tũnug ne n zab a zabrã? b) Tẽebã wɛɛngẽ gũusgã baooda bõe maanego?
11 A Goog sẽn yit Magoogã ya a Sʋɩtãan b sẽn sik tẽng zug yʋʋmd 1914 tɛkã. A sẽn yaa malɛk tɩ nebã pa ne-a wã yĩnga, a pa tõe n zab a toor ye, la a na n tũnuga ne ninsaalbã sigls n zabe. Ninsaalb sigls kãens na n yɩɩ bʋse? Biiblã pa togsd rẽ fãa ye, la a wilgda tõnd yɛl sẽn tõe n sõng tõnd tɩ d bãng sẽn tõe n yɩ sigls ninsã. Dũniyã yɛl sẽn pidsd Biiblã bãngr-goamã sasa, bilf-bilfu d na n bãnga rẽ võor n paase. A Zeova nin-buiidã lakda b mens ne no-koeem vɩɩdo, la b ket n gũusda tẽebã wɛɛngẽ, n get politikã la tũudmã yɛl nins sẽn wilgd Biiblã bãngr-goam pidsgã neere.
12, 13. Wãn to la no-rɛɛs a Daniɛll reng n togs yaoolem zabrã b sẽn na n zab ne Wẽnnaam nin-buiidã?
12 No-rɛɛs a Daniɛll kõo vẽnegr sẽn tɩ loe ne yaoolem zabr ning b sẽn na n maan ne Wẽnnaam nin-buiidã, n gʋls woto: “Yẽ [rɩtg rĩmã] na n yii ne sũ-yikr wʋsgo [n dat] n sãam neb wʋsg la a menes-ba. La yẽ na n tilga a naam fu-rot ko-kãsenga ne tãn-sõnga sẽn tar ziira sʋka.”—Daniɛll 11:44, 45.
13 Biiblã gʋlsg wakate, “ko-kãsenga” ra yaa Mog-kãsengã, bɩ Mediterane, la “tãn-sõnga” ra yaa Siõ, t’a Zeova yeel a wɛɛngẽ tɩ: “Yaa maam n zĩndg m dĩma m Siõ tãn-sõng zugu.” (Yɩɩl Sõamyã 2:6; Zozue 1:4) Woto, tẽebã wɛɛngẽ, tẽng ninga sẽn be ‘ko-kãsenga ne tãn-sõnga sʋka’ makda kiris-neb nins sẽn zaeyã tẽeb tʋʋm sẽn tar Wẽnnaam barkã. B pa leb n be mogrã sẽn makd ãdem-biis nins sẽn zãr ne Wẽnnaamã pʋgẽ ye. Masã b gũudame n na n dɩ naam ne Kirist Zezi saasẽ Rĩungã pʋgẽ. Vẽenega, rɩtg rĩma na n wa yika zab-toaag ne Wẽnnaam sõgen dãmb sẽn paam vʋʋsem sõng zaeebã ne b tũud-n-taasã sẽn yaa burkĩmb kʋʋn-kãsengã, tɩ rẽ pids a Daniɛll bãngr-gomdã.—Ezai 57:20; Hebre dãmba 12:22; Wilgri 14:1.
Wẽnnaam sõgen dãmbã manesem na n yɩɩ wãn to?
14. Yɛl a tãab bʋs la Wẽnnaam nin-buiidã na n maane, b sã n wa na n zab ne-ba?
14 Wẽnnaam sõgen dãmbã segd n maana bõe, b sã n wa na n zab ne-ba? Wẽnnaam nin-buiidã sẽn tall manesem ning a Zozafat wakatẽ wã me ye yaa mak-sõng n kõ-ba. Bãng-y tɩ b kõo a nebã noor tɩ b maan yɛl a tãabo: 1) tɩ b sũ tãpo, 2) tɩ b yaas kɛpɩ, 3) la tɩ b ges a Zeova sẽn na n tõog n kõ bãmbã. Rũndã-rũndã wan to la Wẽnnaam nin-buiidã na n tall manesem sẽn zems ne gom-kãensã?—2 Kɩbaya 20:17.
15. Ne a Zeova nin-buiidã, sũ tãpã võor yaa bõe?
15 B sũuda tãpo: Ne manesem sẽn pa vigsdi, Wẽnnaam nin-buiidã na n kell n sũu tãp n teel Wẽnnaam Rĩungã. B na n kell n yɩɩ kiris-neb sẽn pa kẽesd b toogo. B na n ‘talla tẽeb kãn-kãe n da vigsi,’ n tʋm a Zeova tʋʋmdã ne kɩs-sɩda, la b na n kell n pẽga a Zeova zãma sʋka, a sõmblem kãsengã yĩnga. (1 Korẽnt dãmba 15:58; Yɩɩl Sõamyã 118:28, 29) Weoogr sẽn be rũndã-rũndã bɩ sẽn nan wat beoog pa na n tõog n kɩt tɩ b bas Wẽnnaam sũur noogr ye.
16. Wãn to la a Zeova sõgen dãmbã na n yals kɛpɩ?
16 Yaas-y kɛpɩ: a Zeova sõgen dãmbã pa na n bao n zab n fãag b mens ye, la b na n talla bas-yard zãng-zãng ne a Zeova. Yaa yẽ bal n tõe n fãag a sõgen dãmbã dũniyã zũnd-zãnd pʋgẽ, la a kãabame t’a na n maana woto. (Ezai 43:10, 11; 54:15; Wiisgu 3:26) Tall bas-yard ne a Zeova rat n yeelame me tɩ d tall bas-yard ne tẽng zug siglg ning a sẽn tũnugd ne rũndã-rũndã sẽn na maan sẽn yɩɩd yʋʋm koabg n pidsd a raabã. Na n wa yɩɩ tɩlae ne kiris-neb hakɩkã tɩ b tall bas-yard ne b tẽed-n-taas nins a Zeova ne a Rĩm sẽn dɩt naamã sẽn yãk n lʋɩɩs taoorã, n yɩɩd pĩndã. Ra-kãensã sẽn yaa kɩs-sɩd dãmbã na n wilga Wẽnnaam nin-buiidã sore. D sã n pa sak b sor-wilgrã tõe n wa baasa ne yel-beedo.—Matɩe 24:45-47; Hebre dãmba 13:7, 17.
17. Bõe yĩng t’a Zeova sõgen dãmb nins sẽn tar kɩs-sɩdã na n yã a Zeova fãagrã?
17 Ges-y a Zeova sẽn na n tõog n kõ yãmba: Sẽn na n paam-b fãagrã yaa kiris-neb nins fãa sẽn na n kell n tall burkĩndã, la sẽn teeg a Zeova t’a fãag-bã. B na n moona a Zeova bʋ-kaoorã raar waoong wa b sẽn tõe tɛk hal t’a wa ta. Bõn-naandsa fãa segd n bãngame tɩ ya a Zeova la sɩd Wẽnnaamã, la t’a tara sõgen dãmb sẽn tar kɩs-sɩd tẽng zugu. B pa na n ye kɩɩs a Zeova naam sẽn ka to wã n zãag zĩig abada.—Ezekɩɛll 33:33; 36:23.
18, 19. a) Wãn to la tõogrã yɩɩll sẽn be Yikr sak 15 pʋgẽ wã pukd bũmb ning sẽn be neb nins sẽn na n põs a Goog zabrã sũyẽ? b) Wẽnnaam nin-buiidã segd n maana bõe masã?
18 Wẽnnaam nin-buiidã na n kẽe dũni paalgã pʋgẽ ne pãn-paalga. B na n data ne b sũy fãa n yɩɩl tõogr yɩɩlle, wa Israɛll nebã sẽn maan to-to pĩnd wẽndẽ wã, b sẽn wa n fãag-b tɩ b pasg Mog-miuugã poorã. B fãa na n talla mi-beoog wakat fãa yĩng ne a Zeova, a koglgã yĩnga. B na n togsa gom-kãensã b sẽn da togs hal tẽn-kʋdem wẽndẽ wã: “Mam na n yɩɩlame n waoog [a Zeova]: Tɩ bõe, bãmb tara naam kãsenga. . . . Zusoaba yaa gãndaoog zabr pʋgẽ. Bãmb yʋʋr yaa [a Zeova]. . . . Zusoaba, yãmb nug-rɩtg wãada bɛɛba. Yãmb lubda y bɛɛba ne y naam kãsengã. Yãmb tʋmda y sũ-kãbre, la a rɩta bãmb wa moodo. . . . Neb nins yãmb sẽn fãagã, yãmb yãagda bãmb ne nonglem. Yãmb pãnga tara bãmb n dabd yãmb yi-sõngẽ wã. . . . Yãmb na n waa ne bãmba n wa sel yãmb tãnga zugu. Zusoaba, yaa zĩig ninga yãmb sẽn maan y yirã. Zusoaba, yaa sɛk-zĩiga yãmb nus sẽn yẽbgã. Zusoaba na n dɩɩ naam wakat sẽn ka sɛta.”—Yikri 15:1-19.
19 Vɩɩm sẽn pa satã saagr sẽn lebg vẽeneg n paas masã wã, ad sɩd yaa wakat sẽn zems n kõ Wẽnnaam sõgen dãmbã tɩ b wilg b sakr ne a Zeova la b leb n modg ne b sũy fãa n maan b Rĩmã sẽn be wakat sẽn pa sat yĩngã raabo!—1 Kɩbaya 29:11-13.
Y tõe n wilga a võor bɩ?
• Bõe yĩng t’a Goog na n zab ne sẽn zae-bã la ne piis a taabã?
• Wãn to la Wẽnnaam nin-buiidã na n sũ tãpo?
• Yaas kɛpɩ wã võor yaa bõe?
• Wãn to la Wẽnnaam a Zeova nin-buiidã na n yaas n ges a fãagrã?
[Zãmsgã sogsgã]
[Foto, seb-neng 28]
A Zeova kɩtame t’a Zozafat ne a nin-buiidã tõoge, tɩ pa yɩ tɩlae ne-b tɩ b zab ye
[Foto, seb-neng 30]
Sẽn zae-bã la piis a taaba lagem n teenda a Zeova naam sẽn ka to wã
[Foto, seb-neng 31]
Wala Israɛll nebã sẽn maan pĩnd wẽndẽ wã, Wẽnnaam nin-buiidã na n yɩɩla tõogr yɩɩll ka la bilfu