D rɩk d Wẽnnaam a Zeova togs-n-taare, n da tũus neb ye

“Wẽnnaam ka tũusd neb ye.”—ROM DÃMBA 2:11.

1, 2. a) A Zeova raab ne Kanaã buudã ra yaa bõe? b) Bõe la a Zeova maan-yã, la sogs-bʋs la rẽ wat ne?

ISRAƐLL nebã sẽn da wa n be Moaab weoogẽ wã yʋʋmd 1473 sẽn deng Kirist zãmaana, b kelga a Moiiz neere. Yel-pakr n da gũud-b Zʋrdẽ kʋɩlgã rʋʋnde. A Moiiz togsame t’a Zeova ratame tɩ Israɛll zab n tõog Kanaã tẽns a yopoe sẽn tar pãng n be Kãabg Tẽngẽ wã. Ad a Moiiz gom-kãensã sɩd ra kengda pɛlga: “[A Zeova yãmb] Wẽnnaam na n kɩtame tɩ y tõog bãmb n sãam-ba.” Israɛll da pa segd n maan kaool ne-b ye, la b ra pa segd n zoe b nimbãaneg n pa kʋ-b ye.—Tõodo 1:1; 7:1, 2.

² La zak a yembr neb la a Zeova bas n pa kʋ pipi galʋ-tẽng ning Israɛll sẽn zab ne wã pʋgẽ. Galʋ-tẽns a naas neb me n paam Wẽnnaam koglgo. Bõe yĩnga? Bõe la yel-kãsems nins sẽn tɩ loe ne Kanaã nin-kãensã põsbã zãmsd tõnd a Zeova wɛɛngẽ? Wãn to la d tõe n dɩk a togs-n-taare?

Nebã manesem, b sẽn wʋm a Zeova sẽn maanã

3, 4. Kanaã neb kẽer sẽn wʋm tɩ Israɛll nebã tõoga tẽns wʋsgã, b talla manesem bʋgo?

³ Israɛll sẽn yeeb rasempʋɩɩgẽ wã sẽn na maan yʋʋm 40 n yaool n kẽ Kãabg Tẽngẽ wã sasa, a Zeova kogla a nin-buiidã la a zab n sõng-ba. Kãabg Tẽngã goabg babgo, Israɛll zaba ne Kanaã rĩm a Araad. Ne a Zeova sõngre, Israɛll nebã tõoga rĩm-kãng ne a nin-buiidã Horma. (Sõdbo 21:1-3) Kaoosg poore, Israɛll kẽname n gilg Edom tẽngã, la b yi rɩtg babgã sẽnes n dig Mog-kɩɩngã yaanga. Beenẽ sẽn da yɩ Moaab nebã soolmã, lebga Amoor nebã n da be be masã. Amoor dĩm a Sihõ zãgsame t’a kõn bas tɩ Israɛll pɩʋʋg a soolmã ye. Rĩm a Sihõ kẽnga Zahaaz sẽn tog n da yaa Arno bãoogã rɩtg sẽnes n tɩ zab ne Israɛlle. Be la kʋ a Sihõ. (Sõdbo 21:23, 24; Tõodo 2:30-33) Hal rɩtg babgẽ wã, ya a Oog n da rɩt naam Amoor nebã sẽn be Basã wã zutu. Baa ne a Oog sẽn da yaa nin-wobgã, a ra pa tõe n maan baa fʋɩ a Zeova taoor ye. Yaa Edreyi la b kʋ a Oog. (Sõdbo 21:33-35; Tõodo 3:1-3, 11) Tõog-kãensã kɩbayã, n paas kɩbay nins sẽn tɩ loe ne Israɛll sẽn yi Ezipt to-to wã talla pãn-tusd-kãseng Kanaã neb zutu. *

⁴ Israɛll sẽn wa n pasg Zʋrdẽ kʋɩlgã n kẽ Kanaã tẽngã a pipi wã, b tɩ zĩnda Gilgall. (Zozue 4:9-19) Zeriko sẽn yaa galʋ-tẽng sẽn gũbg ne lal-tagdã ra pa zãr ne be ye. Kanaã pag a Rahaab sẽn wʋm bũmb ning a Zeova tʋʋmã wɛɛngẽ wã kɩtame t’a tʋm ne tẽebo. Rẽ kɩtame tɩ yẽ ne a zakã rãmb põse, a Zeova sẽn da wa n na n sãam Zeriko wã.—Zozue 2:1-13; 6:17, 18; Zak 2:25.

5. Bõe n kɩt tɩ Gabaõ nebã maan sɩlem?

⁵ Rẽ poore, Israɛll nebã yii Zʋrdẽ kʋɩlgã noorã n dʋ tãens nins sẽn be babgẽ be sʋkã zutu. A Zozue saka a Zeova sor-wilgr n solg n ling Ai galʋ-tẽngã n zab ne-a. (Zozue sak a 8) Kanaã rĩm dãmb wʋsg sẽn wʋm tɩ rĩm dãmb a taab la Israɛll zab ne n tõoge, b sũu tãpo. (Zozue 9:1, 2) Hivit rãmbã galʋ-tẽng b sẽn boond tɩ Gabaõ wã neb manesem yɩɩ toore. Zozue 9:4 yetame: “Bãmb maana sɩlem.” Wala a Rahaabe, b wʋma a Zeova sẽn fãag a nin-buiidã n yiis-b Eziptã, la a sẽn tõog  a Sihõ la a Oogã. (Zozue 9:6-10) Gabaõ nebã bãngame tɩ zabr pa na n yãk neng ye. Woto, b tʋma neb a Zozue nengẽ Gilgalle, tɩ b tɩ yõk sɛɛg Gabaõ nebã la galʋ-tẽns a tãab nins sẽn pẽ bãmba wã yĩnga, sẽn yaa Kefira, Beerot, la Kɩrɩyat-Zearim. B sẽn tʋm b rãmbã maana wa b yita tẽn-zãrgẽ. B sɩlmã tõogame. A Zozue maana kaool ne-ba, n yeel t’a pa na n kʋ-b ye. Rasem a tãab poore, a Zozue ne Israɛll nebã bãngame tɩ b ra belg-b lame. Baasg zãnga, b sẽn da wẽen ne a Zeova yʋʋr n maan kaoolã yĩnga, b sɩd pa zab ne-b ye. (Zozue 9:16-19) A Zeova sakame bɩ?

6. A Zeova manesem yɩɩ wãn to ne kaool ning a Zozue sẽn maan ne Gabaõ nebã?

⁶ B kõo Gabaõ nebã sor tɩ b yɩ ra-kɛɛdb la ko-wuiidb n kõ Israɛll nebã la a ‘Zeova tẽn-kugrã’ wẽn-doogã pʋgẽ. (Zozue 9:21-27) Rẽ toor sẽn ka be, Amoor rĩm dãmb a nu la b tãb-biis sẽn da wa n dat n zab ne Gabaõ nebã sasa, a Zeova kẽesa a toogo, n maan yel-soalmã. Sapɩl-bɛdã kʋʋ bɛɛbã n yɩɩd a Zozue sodaasã sẽn kʋ wã. A Zeova reega a Zozue kosgã mengã, a sẽn da kos tɩ wĩndgã la kiuugã yals t’a tõog bɛɛbã n baasã. A Zozue gʋlsa woto: “Daar sẽn wẽnd woto nan ka zĩnd ye. A ka zĩnd sẽn deng woto, la a ka zĩnd wakat kãng zugẽ tɩ Zusoaba sak ninsaal koɛɛg woto ye. Tɩ bõe, Zusoaba zaba Israɛll neba yĩnga.”—Zozue 10:1-14.

7. Sɩd bʋg a Pɩɛɛr sẽn togs n paam pidsg Kanaã neb kẽer vɩɩm pʋgẽ?

⁷ Kanaã pag a Rahaab ne a zakã neba, n paas Gabaõ nebã zoee a Zeova n tall manesem sẽn zems ne rẽ. Fãagr ning b sẽn paamã wilgda sɩd sẽn yaa vẽenega, tɩ tʋm-tʋmd a Pɩɛɛr togs rẽ woto kaoosg poore: “Wẽnnaam ka tũusd neb ye. La buud fãa sʋka, ned ninga sẽn zoet bãmba la sẽn maand tɩrga, yẽ soab tata bãmb yam.”—Tʋʋma 10:34, 35.

A Zeova sẽn tall manesem ning ne a Abrahaam la Israɛlle

8, 9. Wãn to la yɩ vẽeneg t’a Zeova pa tũusd neba, manesem ning a sẽn tall ne a Abrahaam la ne Israɛll buudã pʋgẽ?

⁸ Karen-biig a Zak goma sõmblem kãseng ning Wẽnnaam sẽn tall ne a Abrahaam la a yagensã yelle. Ra ya a Abrahaam tẽebã n kɩt t’a yɩ “Wẽnnaam zoa,” la pa a sẽn da yit buud ning pʋgẽ wã ye. (Zak 2:23) A Abrahaam tẽebã la a nonglmã ne a Zeova wã kɩtame t’a yagensã paam barka. (2 Kɩbaya 20:7) A Zeova kãaba a Abrahaam: “Mam na n paasa f yagensã tɩ b yɩ wʋsg wa ãds sẽn be saasẽ la wa bĩisr sẽn be ko-kãsenga noore.” La ges-y kãabg ning sẽn be verse ning sẽn pʋgdã pʋgẽ wã: “Yaa fo yagensa yĩng la dũniyã buud fãa na n paam barka.”—Sɩngre 22:17, 18; Rom dãmba 4:1-8.

⁹ A Zeova pa maan tũusg ye, la a sẽn tall manesem ning ne Israɛllã wilga a sẽn tõe n maan bũmb ning neb nins sẽn sakd-a wã yĩnga. Manesem kãng wilgda a Zeova sẽn tall nonglem sẽn pa vaand to-to ne a sõgen dãmb nins sẽn yaa kɩs-sɩd dãmbã. Baa ne Israɛll sẽn da yaa nin-buiid a Zeova sẽn yãk ‘buuda fãa sʋkã,’ pa rat n yeel tɩ Wẽnnaam nonglmã pa na n naf buud a taab neb ye. (Yikri 19:5; Tõodo 7:6-8) Yaa sɩda, a Zeova sẽn fãag Israɛll Ezipt yembdẽ wã poore, a  togsame: “Yaa yãmb bal la m yãk dũniyã buuda fãa sʋka.” La ne no-rɛɛs a Amos la neb a taab maasem, a Zeova kãaba ‘buudã fãa’ neb me bõn-kãsemse.—Amos 3:2; 9:11, 12; Ezai 2:2-4.

A Zezi yaa karen-saamb sẽn pa tũusd neba

10. Wãn to la a Zezi rɩk a Ba wã togs-n-taar n pa tũus neba?

¹⁰ A tẽng zug koe-moonegã sasa, a Zezi sẽn da wõnd a Ba wã kɛpɩ wã, a maana wa a Zeova n pa tũus neb ye. (Hebre dãmba 1:3) Pipi bũmb ning sẽn da pak-a wakat kãng ra ya a bao “Israɛll buuda [neb] sẽn wẽnd piis sẽn menema.” Ne rẽ fãa a pa bas n pa moon Samari poakã koe-noogã bulg noor ye. (Matɩe 15:24; Zã 4:7-30) A leb n maana yel-solemde, sodaas naab sẽn wõnd a ra pa Zʋɩf sẽn kos-a yĩnga. (Luk 7:1-10) Tʋʋm-kãens paasa tʋʋm nins a sẽn maan n wilg a nonglem ne Wẽnnaam nin-buiidã. A Zezi karen-biisã me moona zĩig fãa. Lebga vẽeneg tɩ sẽn na yɩl n paam a Zeova barkã, pa be ne f sẽn yit buud ning ye, bee ne f tagsgã sẽn ya a soaba. Sik-m-mens rãmbã la pʋ-peelem dãmbã sɩdã kom sẽn da tarã saka Rĩungã koe-noogo. La wuk-m-mens rãmbã ne tɩtaam dãmbã yẽ paooga a Zezi ne a koɛɛgã. A Zezi togsa woto: “M Ba sẽn yaa [saasã] la dũniyã Zusoaba, mam pẽgda yãmba yãmb sẽn solg bõn-kãens ne yam dãmba la yẽesem dãmba n yaool n vẽneg bõn-kãens ne kom-bõonega yĩnga. N-ye, m Ba, mam pẽgda yãmba yãmb sẽn dat t’a yɩ woto wã yĩnga.” (Luk 10:21) Tõnd manesmã ne neb a taabã sã n tik nonglem la tẽeb zugu, d pa na n tũus neb ye, bala d miime t’a Zeova nonga woto.

11. Wãn to la b wilg kiris-neb tigingã pʋgẽ tɩ b pa tũusd neba?

¹¹ Pipi kiris-neb tigingã pʋgẽ, Zʋɩf rãmbã la sẽn pa-b Zʋɩf rãmbã ra zema taaba. A Poll wilga woto: “Ziir la waoogr la laafɩ bĩnga neb nins sẽn maand neera yĩnga, pipi rãmba yaa Zʋɩf la yaoolem yaa Gɛrk. Tɩ bõe, Wẽnnaam ka tũusd neb ye.” * (Rom dãmba 2:10, 11) Bũmb ning sẽn kɩt tɩ b paam t’a Zeova tall sõmblem kãseng ne-bã ra pa b sẽn yit buud ningã ye, la ra yaa b manesem ne bũmb ning b sẽn zãmsd a Zeova wɛɛngẽ wã, la saagr ning a Biribl a Zezi rondã sẽn kõtã. (Zã 3:16, 36) A Poll gʋlsame: “Zʋɩf ka Zʋɩf a yĩnga yell yĩng ye. La bãong me, a ka yĩnga sẽn yãta yell ye. La Zʋɩf yaa Zʋɩf a sũur yell yĩnga. La bãong yaa sũur yelle Sɩɩg Sõng sẽn maanda, la ka tõog yĩng ye.” Rẽ, a Poll sẽn tũnug ne gom-biig ning sẽn yaa Zʋɩfã (sẽn dat n yeel tɩ “sẽn yit Zida wã,” bɩ b sẽn pẽgã), a paasame: “Zʋɩf kãng pẽgr ka yit neba nengẽ ye, a yita Wẽnnaam nengẽ.” (Rom dãmba 2:28, 29) A Zeova kɩtdame tɩ neba fãa paam pẽgr n pa tũusdẽ ye. Tõnd me maanda woto bɩ?

12. Wilgri 7:9 taasda saag-bʋgo, la yaa ãnd dãmb la b taasd-a?

¹² Kaoosg poore, Wẽnd vẽnegr pʋgẽ, tʋm-tʋmd a Zã yãa kiris-neb nins sẽn zae ne vʋʋsem sõngã sẽn yaa kɩs-sɩd dãmbã b sẽn bilg wala buud tẽebã wɛɛngẽ, sẽn yaa neb 144 000, “b sẽn ning bãnde, . . . Israɛll dãmba fãa sʋka.” Rẽ poore, a Zã yãa ‘kʋʋng kãsengã . . . sẽn yi soolem fãa, la buud fãa, la neb sẽn gomd goam toɛ-toɛya fãa. Bãmb yalsa geera ne Pebila taoore, la bãmb yera fu-peelse n tar koms vãad b nusẽ.’ (Wilgri 7:4, 9) Woto, kiris-neb tigingã sẽn be rũndã-rũndã wã pa bak buud ba a yembr n bas ye. Neb sẽn yit zĩis toɛy-toɛy saagdame n na n põs “to-kãsenga” sẽn watã, la b yũ “vɩɩm ko-bunds zĩisẽ” dũni paalgã pʋgẽ.—Wilgri 7:14-17.

Ra maan tũusgã nafa

13-15. a) Wãn to la d tõe n maan tɩ buudã la minungã sẽn yaa toor-toorã ra gɩdg-do? b) Togs-y kɩbay sẽn wilgd zood manesem tallg sẽn tõe n wa ne nafa ninsi.

¹³ A Zeova mii tõnd sõma wa ba sẽn tar nonglem sẽn mi a kamb sõma wã. Woto me, tõnd sã n wʋm neb a taabã võor n wilg tɩ d rat n bãnga b minungã la b sẽn wub-b to-to wã, d mikdame tɩ b sẽn yaa toor-toorã pa leb n yaa yell ye. Buudã sẽn yaa toor-toor sẽn da tõe n wa ne welgrã wat n basa weer tɩ zood la nonglem paam pãnga. Zems-n-taarã paasdame. (1 Korẽnt dãmba 9:19-23) Misioneer dãmb nins sẽn moond koe-noogã tẽn-zẽmsã tʋʋmd n wilgd rẽ sõma. B wilgame tɩ b nonga neb nins sẽn vɩ be wã, la rẽ kɩtame tɩ misioneer dambã pa kaoos la b paam zood sẽn tar pãng ne b zĩ-paalsẽ wã tigims neb ye.—Filip rãmba 2:4.

¹⁴ D sẽn pa tũusd nebã sẽn wat ne nafa ninsã yaa vẽeneg tẽns wʋsg pʋsẽ. A Aklilu sẽn yit Etiopi wã ra sidgdame, a sẽn get t’a vɩɩ a yembr Lõndr sen yaa Gãrãndbertayn na-tẽngã pʋgẽ wã yĩnga. Sidg-kãng paasame, bala wõnda nebã pa nong n tar zood manesem ne tẽns a taabã neb ye. Yaa woto la b yã Erop galʋ-tẽn-bɛd wʋsg pʋse. Ad a Aklilu sẽn yã bũmb ningã sɩd yɩɩ toor wʋsgo, a sẽn kẽng a Zeova Kaset rãmbã tigisgẽ b Rĩung Roogẽ wã! Neb nins sẽn da be be wã pʋʋs-a-la ne a waoongo,  la tao-tao bal t’a minima nebã. A bɩɩ tao-tao tẽebã wɛɛngẽ t’a mi-beoogã ne Naandã paase. Pa kaoos la a bao soay n moon Rĩungã koe-noog ne neb a taab bab-kãng pʋgẽ ye. Sɩd me, daar a yembre, koe-moond ning sẽn da moond ne a Aklilu wã sẽn sok-a a sẽn da magd n na n maan bũmb ning a vɩɩmã pʋgẽ, a Aklilu yɩɩ tao-tao n yeel t’a saagdame tɩ daar ninga, a na zĩnd tiging pʋgẽ sẽn gomd yẽ buud-gomdã, sẽn dat n yeel tɩ amharik. Ãngilindã tiging kãsem dãmbã sẽn bãng rẽ, b sũy yɩɩ noog tɩ b sigl zãma sõsg sẽn tik Biiblã zug a Aklilu buud-gomdã pʋgẽ. B sẽn bool nebã tɩ b wa kelgã, sãamb la sakã neb wʋsg n wa n kelg pipi zãma sõsgã ne amharikã. Rũndã-rũndã, Etiopi neb la neb a taab sẽn be bab-kãng pʋgẽ lagma taab tiging sẽn fɩɩgd pʋgẽ. Neb wʋsg yãame tɩ baa fʋɩ pa tõe n gɩdg-b tɩ b pa yãk yam n na n zĩnd a Zeova poorẽ, n wilg rẽ ne kiris-neb lisgã reegr ye.—Tʋʋma 8:26-36.

¹⁵ Nebã yalẽ la b wubr pa taab ye. Rẽ pa tikr sẽn wilgd tɩ ned yɩɩda a to bɩ a pa ta a to ye. Yaa neb sẽn yaa toɛy-toɛy bala. B sẽn da wa n get a Zeova sõgen dãmb paals sẽn deegd lisg Malt sẽn yaa ko-sʋk tẽngã pʋgẽ wã, a Zeova Kaset rãmbã sẽn be be wã ra kaasda ne sũ-noog wʋsgo, tɩ sãamb nins sẽn yi Gãrãndbertayn n wa naag-bã raagd sũ-noog nintãm. Malt la Gãrãndbertayn saam-biisã wilga b sũ-noogã ne manesem toɛy-toɛya, la nonglem kãseng ning b sẽn tar ne a Zeova wã kɩtame tɩ b tũud-n-taarã tall yamleoog n paase.—Yɩɩl Sõamyã 133:1; Kolos rãmba 3:14.

D bas bu-zẽms kisgri

16-18. Togs-y kɩbar sẽn wilgd tɩ d tõe n basa bu-zẽms kisgr kiris-neb tigingã pʋgẽ.

¹⁶ Tõnd nonglmã ne a Zeova la ne d saam-biisã sẽn yaa kiris-nebã sã n paasdẽ, d tõe n dɩka a Zeova togs-n-taar sõma, d sẽn tagsd to-to neb a taabã zutã wɛɛngẽ. D tõe n basa bu-zẽms kisgr buud fãa tõnd sẽn da tar ne tẽns a taab bɩ buud a taab neba. Ges-y a Albert makrã. A ra yaa Gãrãndbertayn sodaag Dũni gill Zabr a yiib-n-soabã sasa, tɩ Zapõ rãmbã yõk-a yʋʋmd 1942 wã, Sĩngapuur lʋɩɩsã sasa. Rẽ poore, a rɩka sẽn zems yʋʋm a tãab n tʋm “kũum tẽr-bãnga” zĩigẽ, sẽn pẽ zĩig b sẽn wa n boondẽ tɩ Kwai kʋɩlgã põ wã. B sẽn wa n bas-a zabrã saabẽ t’a zɩslem da pa yɩɩd kilo 32 ye. Sẽn paase, a yeerã ne a yõorã ra kaoome, tɩ sãb-noaadga, zageng la weoog ra tar-a. Neb nins sẽn naag ne-a bãensã roogẽ wã tusa ra bee nimbãaneg wẽnem sẽn yɩɩd pʋgẽ, tɩ bãmb sʋkã neb wʋsg ki. Nams-bɛɛg ning a Albert sẽn yã wã kɩtame t’a lebg n kul yʋʋmd 1945 ne sũ-toogo, n da pa rat n wʋm Wẽnnaam bɩ wẽn-tũudum kɩbar ye.

¹⁷ A Albert pag a Irene lebga a Zeova Kaset soaba. Sẽn na yɩl n noog a pagã sũur bala, a Albert kẽnga a Zeova Kaset rãmbã tigiss a wãna. Kiris-ned sẽn yaa bi-bɩɩg n be Wẽnnaam tʋʋmdã pʋgẽ wakat fãa yʋʋr sẽn boond t’a Poll tɩ gesa a Albert sẽn na yɩl n zãms Biiblã ne-a. Pa kaoos la a Albert wa bãng tɩ yaa neba sũy la a Zeova gɛt ye. A rɩka a vɩɩmã n kõ a Zeova n deeg lisgu.

¹⁸ Rẽ poore, a Poll kẽnga Lõndre, n zãms Zapõ neba buud-gomdã, n tɩ lagem tiging sẽn gomd buud-gom-kãngã. A sẽn yeel t’a na n tɩ peega a Zeova Kaset rãmb sẽn yi Zapõ tẽngã tɩ b tɩ kaag yẽ pĩnd tigingã, saam-biisã sẽn be be wã tẽega a Albert sẽn da kis Zapõ nebã hal tɩ pa nana wã yelle. A Albert sẽn lebg n wa Gãrãndbertayn tɛka, a ra pa rat n seg ned ba a yembr sẽn yit Zapõ ye, tɩ woto kɩt tɩ saam-biisã ra pa mi a sẽn na n maan to-to yellã taoor ye. B ra pa segd n maan yɩɩr ye. A Albert deega sãamba ne saam-biir nonglem wʋsgo.—1 Pɩɛɛr 3:8, 9.

‘Bɩ y pak y sũura yalengo’

19. Sagl-bʋg la tʋm-tʋmd a Poll kõ tɩ tõe n sõng tõndo, d sã n tar manesem sẽn wilgd tɩ d tũusda neba?

¹⁹ Rĩm a Salomo sẽn yɩ yam soaba gʋlsa woto: “Fo sã n tũus neba, ka sõama ye.”  (Yelbũna 28:21) Yaa nana tɩ d nong neb nins d sẽn mi sõma wã. La wakat ninga d pa baood n pẽneg neb nins d sẽn pa mi sõma wã ye. Tũus-kãngã buud pa zems ne a Zeova sõgen ye. Sɩd-sɩda, d fãa segdame n tũ a Poll saglgã sẽn yaa vẽenegã, a sẽn yeel tɩ d ‘pak d sũurã yalengã.’ N-ye, d yalg d nonglmã t’a ta zĩis toɛy-toɛy kiris-neba.—2 Korẽnt dãmba 6:13, Sebr Sõngo.

20. Vɩɩmã nen-bʋs pʋsẽ la d segd n dɩk a Zeova sẽn yaa tõnd Wẽnnaam sẽn pa tũusd nebã togs-n-taare?

²⁰ Tõnd saagdame n na n vɩɩmd saasẽ tɩ yaa tẽng zug me, d sã n pa tũusd neba, na n sõng-d lame tɩ d paam zems-n-taar bãg-yɛng sẽn tar Pekɩɩm yɛngã pʋgẽ. (Efɛɛz rãmba 4:4, 5, 16) D sẽn maood n na n dɩk tõnd Wẽnnaam a Zeova sẽn pa tũusd nebã togs-n-taarã, tõe n sõng-d-la d koe-moonegã pʋgẽ, d zagsã pʋsẽ la d tigimsã pʋsẽ, n-ye, d vɩɩmã nens fãa pʋsẽ. Wãn to? Sõsg ning sẽn pʋgdã na n goma rẽ yelle.

[Tẽngr not rãmbã]

Wãn to la y na n leoke?

• Wãn to la a Zeova wilg a Rahaab la Gabaõ nebã t’a pa tũusd neba?

• Wãn to la a Zezi wilg t’a pa tũusd neb a zãmsgã pʋgẽ?

• Bõe n tõe n sõng tõnd tɩ d bas minung bɩ bu-zẽms kisgri?

[Zãmsgã sogsgã]

[Foto, seb-neng a 8]

Israɛll sẽn na n deeg Kanaã wã sɩngre

[Foto, seb-neng a 9]

A Zezi moona Samari paga

 [Foto, seb-neng 10]

Zãma sõsg ne amharik Gãrãndbertayn

[Foto, seb-neng 10]

A Albert nonglmã ne a Zeova wã sõng-a lame t’a bas bu-zẽng kisgri