A Zeova raarã sẽn kolgdã, wãn-wãn la d segd n ges nebã?

“[A Zeova] ka kaoosda tɩ pids bãmb kãabg . . . ye. La bãmb sẽn ka rat tɩ ned ba a ye sãama yĩnga, bãmb maanda sũ-mar ne yãmba n dat tɩ yãmb fãa yam tek tɩ y kos sugri.”—2 PƖƐƐR 3:9.

1, 2. a) Yaa wãn-wãn la a Zeova get nebã rũndã-rũndã? b) Sok-bʋg la d segd n sok d mense?

A ZEOVA tʋma a sõgen dãmbã tɩ b kẽng n tɩ “maan nebã buud fãa tɩ b yɩ . . . karen-biisi.” (Matɩe 28:19) D sẽn pidsd tʋʋm kãngã la d gũud a Zeova “ra-kãsengã” sẽn watã, d tog n gesa nebã wa a Zeova meng sẽn get-b to-to wã. (Sofoni 1:14) La yaa wãn-wãn la a Zeova meng get nebã? Tʋm-tʋmd a Pɩɛɛr yeela woto: “Zusoaba ka kaoosda tɩ pids bãmb kãabg wa neb kẽer sẽn tagsda ye. La bãmb sẽn ka rat tɩ ned ba a ye sãama yĩnga, bãmb maanda sũ-mar ne yãmba n dat tɩ yãmb fãa yam tek tɩ y kos sugri.” (2 Pɩɛɛr 3:9) Wẽnnaam geta ãdem-biisã wa neb sẽn tõe n tek yam n kos sugri. A raabã yaa tɩ “neba fãa paam fãagre, la b bãng sẽn yaa sɩda.” (1 Tɩmote 2:4) ‘Nin-wẽng sã n tek yam n bas a manesem wẽngã n vɩɩmde,’ ad woto sɩd nooma a Zeova sũur hal wʋsgo!—Ezekɩɛll 33:11.

² La rẽ yĩnga, tõnd sɩd geta nebã wala a Zeova sẽn get-b to-to wã bɩ? Wala yẽ, tõnd me geta buudã fãa neb wala neb sẽn tõe n yɩ a yãgrã “piis” bɩ? (Yɩɩl Sõamyã 100:3; Tʋʋma 10:34, 35) D ges makr a yiib sẽn wilgd bũmb ning sẽn kɩt tɩ tar yõod tɩ d ges nebã wala Wẽnnaam sẽn get-b to-to wã. Makr a yiibã fãa pʋsẽ, sãoong n da pẽneg wʋsgo, la a Zeova sõgen dãmbã ra reng n bãnga rẽ tiiri. D sẽn nan gũud a Zeova ra-kãsengã yĩnga, mak-kãensã sɩd tara yõod wʋsg ne-do.

A Abrahaam ra geta yɛlã wa a Zeova

3. A Zeova tagsg yɩɩ wãn-wãn ne Sodom la Gomoor nebã?

³ Pipi makrã tɩ loee ne bu-yaleng ba a Abrahaam sẽn yɩ wẽn-sakdã, la Sodom ne  Gomoor sẽn da pid ne wẽng wʋsgã. A Zeova sẽn da wa n wʋm ‘neb wʋsg sẽn yãbd Sodom ne Gomoor tʋʋm beedã yĩngã,’ a pa yɩ tao-tao n sãam galʋ-tẽn-kãensã ne b nin-buiidã fãa ye. A reng n kɩtame tɩ b tɩ ges yɛlã sẽn sɩd ra yaa to-to. (Sɩngre 18:20, 21) A Zeova tʋma malɛgs a yiib Sodom, tɩ b tɩ sig nin-tɩrg a Lot zakẽ wã. La yʋng ning malɛgsã sẽn ta wã, ‘tẽnga neb wa n gũbga roog ning bãmb sẽn be wã. . . . Yaa kom-bɩɩse hal n tɩ ta nin-kẽemba, neba fãa gill’ waame n dat n gãand malɛgsã. Vẽenega, tẽngã neb vɩɩm manesem sẽn yaa wẽng wʋsg woto wã sɩd ra wilgdame tɩ b zemsa ne sãoongo. Baasg zãnga, malɛgsã soka a Lote: “Fo tara neb a taab ka bɩ? Peeg f reem dãmba ne f komdibli wã la f kompugli wã la f wʋk fo sẽn so bũmb ninsa fãa n yiis zĩ-kãngã.” A Zeova ra paka sor tɩ tẽn-kãngã neb kẽer da tõe n paam n põse, la ya a Lot ne a kom-pugli a yiibã bal n wa n baas n põs sãoongã.—Sɩngre 19:4, 5, 12, 16, 23-26.

4, 5. Bõe yĩng t’a Abrahaam bõos Wẽnnaam Sodom nebã yĩnga, la rẽ yĩnga, a sẽn da tagsd to-to nebã zutã sɩd ra zemsa ne Wẽnnaam tagsgã bɩ?

⁴ Bɩ d lebg n tẽeg wakat ning a Zeova sẽn da wa n wilg t’a na n sig n gesa Sodom ne Gomoor galʋ-tẽnsã sẽn da yaa to-to wã. Wakat kãnga, a Abrahaam kolg n bõosa Wẽnnaam woto: “Daar ninga, nin-tɩrs pis-nu bee tẽnga pʋgẽ. Yãmb na n sɩd sãam-a lame n ka bas zĩig nin-tɩrs pis-nu wã sẽn be be wã yĩng bɩ? Tɩ lagem nin-tɩrs ne nin-wẽns n kʋ, yell a woto maaneg zãra ne yãmba. La tɩ nin-tɩrs na yɩ wa nin-wẽnse, yãoã zãra ne yãmba. Dũniyã fãa bʋ-kaooda ka na n maan tɩrg sɩda?” A Abrahaam tũnuga ne gom-biig ning sẽn yaa “zãra ne yãmba” naoor a yiibu. A sẽn da mi a Zeova sõma wã yĩnga, a ra miime t’a pa na n naag nin-tɩrsã ne nin-wẽnsã n sãam ye. A Zeova sẽn yeel t’a sã n yã “nin-tɩrs pis-nu sẽn be be” a pa na n sãam Sodommã, a Abrahaam talla sõorã boogr bilf-bilf hal tɩ wa kell piig bala.—Sɩngre 18:22-33.

⁵ Rẽ yĩnga, a Zeova ra na n kelga a Abrahaam kosgã, sã n da mik tɩ woto ra pa zems ne yẽ mengã tagsg sɩda? Yaa vẽeneg t’a ra pa na n kelg-a ye. A Abrahaam sẽn yaa “Wẽnnaam zoa” wã yĩng kɩtame t’a ra mi a Zeova tagsgã la a ra sak-a. (Zak 2:23) A Zeova sẽn wa n dat n sãam Sodom la Gomoorã, a sak n deega a Abrahaam kosgã. Bõe yĩnga? Bala, tõnd saasẽ Ba wã ‘pa rat tɩ ned ba a ye  sãam ye, la a ratame tɩ bãmb fãa yam tek tɩ b kos sugri.’

A Zonas tagsg nebã zug yɩɩ lebend fasɩ ne a Zeova rẽndã

6. A Zonas sẽn tɩ moon Niniivã, tẽngã neb manesem yɩɩ wãn to?

⁶ Bɩ d ges makr a yiib-n-soabã sẽn gomd a Zonas yellã. Mak-kãngã pʋgẽ, yaa Niniiv tẽngã la Wẽnnaam da yãk n na n sãame. B ra yeela no-rɛɛs a Zonas t’a tɩ moon Niniiv n wilg tɩ ‘Wẽnnaam yãa a nebã wẽnem.’ (Zonas 1:2) Niniiv ne a tẽn-kɩremsã sẽn naag taab ra yaa galʋ-tẽng-kẽeng t’a yalmã “ta rasem a tãab kẽnde.” A Zonas sẽn wa n baas n sak n kẽng Niniivã, a ra moond n yetame tɩ “keta rasem pis-naas tɩ Niniiv sãam.” La Niniiv nebã sẽn wʋma, b “tẽe Wẽnnaam koɛɛgã n maan no-loeere. La sẽn sɩng ne nin-kãsems n tɩ ta nin-bõonega fãa sẽgna boto.” Baa Niniiv rĩmã meng sak n teka yam n kos sugri.—Zonas 3:1-6.

7. A Zeova talla manesem bʋg ne Niniiv nebã sẽn tek yam n kos sugrã?

⁷ Ad manesem kãngã sɩd yɩɩ lebend wʋsg ne Sodom nebã manesem sẽn yɩ to-to wã! A Zeova tagsg yɩɩ wãn ne Niniiv nebã sẽn tek yam n kos sugrã? Zonas 3:10 yeta woto: “Wẽnnaam me teka yam n ka sɩbg bãmb wa b sẽn da yeela ye.” A Zeova “teka yam” n pa sɩbg Niniiv nebã, b sẽn toeem manesmã yĩnga. Wẽnnaam noyã pa toeem ye, la baasg zãnga, a Zeova sẽn yã Niniiv nebã sẽn tek yam n kos sugrã, a toeema a sẽn da sar n na n maan-b bũmb ningã.—Malaki 3:6.

8. Bõe yĩng t’a Zonas sũur sãame?

⁸ A Zonas sẽn wa n bãng tɩ Niniiv nebã pa na n paam sãoongã, rẽ yĩnga a tagsa wa a Zeova yellã zug bɩ? Ayo, bala d karemda woto: “Yãoã ka yɩ a Zonas sũur noog baa bilf ye, a sũura yikame.” Sẽn paase, bõe la a Zonas maan-yã? Kɩbarã yetame: “A pʋʋsa [a Zeova] n yeele: ‘Y sugri, Zusoaba, m ka reng n yeel woto tɩ m ket n be yir sɩda? Yaa woto n da kɩt tɩ mam zoe n dat n kẽng Tarsissã; bala, mam miimi tɩ y yaa Wẽnnaam sẽn tar sũ-bʋgsem la y zoeta neb nimbãanega. Yãmb sũur ka yikd tao-tao ye. Yãmb tara nonglem wʋsgo, la y tekda y yam n ka sɩbgd neb ye.’ ” (Zonas 4:1, 2) A Zonas ra mii a Zeova sõma. La wakat kãngã, Niniiv nebã sẽn tek yam n kos sugrã, no-rɛɛsã sũur sãamame t’a pa ges-b wa Wẽnnaam sẽn ges-b to-to wã ye.

9, 10. a) Zãms-bʋg la a Zeova kõo a Zonase? b) Bõe yĩng tɩ d tõe n yeel t’a Zonas wa n baas n demsa a tagsgã tɩ zems ne a Zeova sẽn da get Niniiv nebã to-to wã?

⁹ A Zonas yii Niniiv n tɩ ti zãnd tẽnga kɩreng n zĩnd a tẽngrã n dat n “ges Niniiv sẽn na n yɩ to-to.” A Zeova kɩtame tɩ kũsg yi n bɩ, sẽn na yɩl t’a Zonas paam maasem. La vẽk-n-beoogã kũsgã kiime. La a Zonas sũur sẽn yik ne yellã, a Zeova yeel-a lame: “Kũsgã . . . sẽn ki yʋng a ye pʋgẽ wã, fo sũur sãamame. La sẽn yɩɩda, mam tog n zoee Niniiv sẽn yaa tẽn-kãseng n tar neb tus koabg la pisi sẽn  ka mi b nense, ne b rũmsã sẽn yaa wʋsgã nimbãanega.” (Zonas 4:5-11) Ad woto sɩd kɩtame t’a Zonas bãng a Zeova sẽn tagsd nebã zug to-to wã neere!

¹⁰ B pa wilg a Zonas sẽn tall manesem ninga, Wẽnnaam sẽn zoe Niniiv nebã nimbãanegã yĩng ye. La yaa vẽeneg tɩ no-rɛɛsã remsa a tagsgã sẽn da yaa to-to ne Niniiv nebã sẽn tek yam n kos sugrã. Ya a Zeova sẽn kɩt t’a gʋls kɩba-kãngã wã yĩng n kɩt tɩ d yet woto.

Yãmb yẽ geta nebã wãn-wãna?

11. A Abrahaam tagsg ra na n yɩɩ wãn ne neb nins sẽn vɩ rũndã-rũndã wã?

¹¹ Rũndã-rũndã, sãoong a to la tõnd me gũuda. Yaa dũni-wẽn-kãngã a Zeova sẽn na n sãam a ra-kãsengã sasa wã. (Luk 17:26-30; Galat dãmba 1:4; 2 Pɩɛɛr 3:10) A Abrahaam sã n da ket n vɩ, wãn-wãn la a ra na n ges neb nins sẽn vɩ dũni-kãngã sẽn na n sãam ka la bilf pʋgẽ wã? Neb nins sẽn nan pa wʋm Rĩungã “koe-noogã” yell ra na n sɩd pak-a-la hal wʋsgo. (Matɩe 24:14) A Abrahaam da kosa Wẽnnaam n yɩlem nin-tɩrs nins sẽn da tõe n ket Sodommã wɛɛngẽ. Rẽ yĩnga, neb nins sẽn tõe n wa bas dũni kãngã a Sʋɩtãan sẽn so wã manesem n tek yam n kos sugr la b balem Wẽnnaamã yell paka tõnd me bɩ?—1 Zã 5:19; Wilgri 18:2-4.

12. Bõe n tõe n kɩt tɩ d wa tall a Zonas tagsgã buud nana-nana d moonegã zĩigẽ, la bõe la d tõe n maan rẽ wɛɛngẽ?

¹² Sɩd zemsame tɩ d tʋll tɩ wẽngã sa tao-tao. (Habakuk 1:2, 3) La d yaool n tõe n wa talla a Zonas tagsgã buud nana-nana, n pa tagsd neb nins sẽn tõe n wa tek yam n kos sugrã yell ye. Sɩd tõe n wa yɩɩ woto, sẽn yɩɩd fãa, neb nins tõnd sẽn moond Rĩungã koɛɛgã sã n maanda b toor kae, bɩ b sã n yaa kɩɩsdb wall zab-zabdba. D tõeeme n wa le pa tagsd neb nins a Zeova sẽn ket n tõe n tak n yiis dũni-wẽn-kãngã pʋgẽ wã yell ye. (Rom dãmba 2:4) D sã n vaees d meng neer n mik tɩ d tara tagsg sẽn wõnd a Zonas sẽn da tall tagsg ning ne Niniiv nebã buud baa yaa bilfu, d tõe n pʋʋsame n kos a Zeova t’a sõng-d tɩ d rems d tagsgã tɩ zems ne yẽ rẽndã.

13. Bõe yĩng tɩ d tõe n yeel tɩ neba yell paka a Zeova rũndã-rũndã?

¹³ Neb nins sẽn nan pa maand a Zeova raabã yell pak-a lame, la a kelgda a sõgen dãmb nins sẽn dɩk b mens n kõ-a wã kosgo. (Matɩe 10:11) Wala makre, a na n deega b pʋʋsgã n ‘sõng bãmb tao-tao.’ (Luk 18:7, 8) Sẽn paase, a Zeova na n pidsa a kãabsã la  a raabã fãa wakat ning a sẽn yãkã pʋgẽ. (Habakuk 2:3) Wẽngã fãa sẽn be tẽngã zugã yiisg bee rẽ sʋka, wala a sẽn da sãam Niniiv nebã b sẽn wa n lebg n kẽ wẽngã pʋgẽ wã.—Nahũm 3:5-7.

14. Bõe la d segd n maand n gũud a Zeova ra-kãsengã?

¹⁴ Nand tɩ dũni-wẽn-kãngã paam sãoong a Zeova ra-kãsengã sasa, d na n ket n gũuda ne sũ-mar n tʋmd wʋsg a raabã maaneg pʋgẽ. D pa mi yɛl kẽer sẽn tɩ loe ne moonegã tʋʋmd sẽn segd n maan n ta zĩig ning t’a Zeova raarã yaool n wa ye, la d miime tɩ d tog n moona Rĩungã koe-noog dũniyã gill fãa tɩ zems ne Wẽnnaam sẽn dat to-to wã tɩ saabã yaool n wa. Vẽenega, “bõn-neebã” sẽn ket tɩ d segd n tall n wa t’a Zeova pids a roogã ne zĩirã yell segd n pak-d lame.—Azze 2:7.

Ne d tʋʋmã la d wilgd d sẽn get nebã to-to wã

15. Bõe n tõe n kɩt tɩ d bãng tɩ d segd n mooname n paase?

¹⁵ Tõe tɩ d vɩɩ zĩigẽ nebã sẽn pa reegd koe-noogã sõma, tɩ d yɛlã me yaool n pa kõt-d sor tɩ d yik n kẽng zĩig koe-moondb raab sẽn beẽ n yɩɩd ye. D mak n ges wala d sẽn na n ket n tõe n yã neb piig tõnd moonegã zĩigẽ tɩ saabã yaool n ta. Rẽ yĩnga, d tagsdame tɩ tara yõod tɩ d ket n baood neb piigã sẽn ketã bɩ? Kʋʋngã “nimbãaneg yõka” a Zezi, “tɩ bõe, bãmb sũyã sãama wʋsgo la bãmb pãnga fãa sɛɛme. Bãmb yaa wa piis sẽn ka tar kɩɩm ye.” (Matɩe 9:36) D sã n zãmsd Biiblã la d karemd Gũusg Gasgã la Réveillez-vous ! wã neere, d na n wʋma dũni-kãngã zu-loeesã võor sõma n paase. Woto me na n kɩtame tɩ d bãng n paas tɩ d segd n moona koe-noogã. Sẽn paase, d sã n tar naneb wʋsg ne ‘tʋm-tʋmd sẽn tũud sɩd la sẽn tar yamã’ sẽn yiisd sɛb sẽn tik Biiblã zugã, n tʋm ne-b sõma, tõe n sõng-d lame tɩ mooneg zĩis nins d sẽn minim n moond naoor wʋsgã neb sɩd sak koɛɛgã n yɩɩda.—Matɩe 24:45-47; 2 Tɩmote 3:14-17.

16. Wãn to la d tõe n kɩt tɩ d moonegã wom biis n paase?

¹⁶ Neb nins sẽn ket n tõe n sak Biiblã vɩɩm koɛɛgã yell sẽn pak-dã yĩngã, kɩtame tɩ d baood weer la soay buud toɛy-toɛy n na n moon nebã. Rẽ yĩnga, d mikame tɩ d ye pa segd neb wʋsg yir bɩ? Sã n yaa woto, d tõe n kɩtame tɩ d koe-moonegã wom biis n paase, d sẽn na n toeemd zĩis la wakat n moondẽ. Zĩm-yẽedbã kẽngda zĩm yẽeb wakat ning b sẽn tõe n paam zĩmã. Rẽ yĩnga, tõnd me tõe n maana wa woto, d koe-moonegã tʋʋmd b sẽn mak ne zĩm yẽebã pʋgẽ bɩ? (Mark 1:16-18) Bõe yĩng tɩ d pa na n mak kasetã kũun zaabr la ne telefõnnã zĩis nins laloa wã sẽn pa gɩdg woto maanegã? Neb kẽer yãame tɩ parkĩng rãmbẽ, kamiyõ rãmb yalsg zĩisẽ, essãens koosg zĩisẽ la magazẽ rãmbẽ wã yaa zĩis sẽn womd biis wʋsgo. D leb n wilgda vẽeneg me tɩ d tara a Abrahaam tagsgã buud nebã zugu, d sã n baood weer n moond d sẽn paam wakat ning fãa.

17. Manesem bʋs la d tõe n tũnug ne n keng misioneer dãmbã la neb a taabã sẽn be tẽn-zẽms n moondẽ wã raoodo?

¹⁷ Neb wʋsg n ket n nan pa wʋm Rĩungã koɛɛg ye. Moonegã sẽn yãk a toogo, d sã n be yiri d ket n tõe n wilgame tɩ nin-kãensã yell sɩd pak-d lame bɩ? D sã n mi misioneer dãmb bɩ so-pakdb sẽn be tẽn-zẽms n moondẽ, d tõe n gʋls-b-la lɛta n wilg-b tɩ d nanda modgr ning b sẽn maand b tʋʋmdã pʋgẽ wã. Wãn to la woto wilgd tɩ nebã fãa yell sɩd pak-d lame? D sẽn gʋlsd lɛta n taasd misioneer dãmbã sẽn na yɩl n keng b raood la d pẽg-bã na n kɩtame tɩ b tʋlg n kell n pa b tʋʋmdẽ wã, tɩ woto bɩ b sõng neb wʋsg n paas tɩ b wa paam n bãng sɩdã. (Bʋkaoodba 11:40) D leb n tõe n pʋʋsa misioneer dãmbã la neb nins sɩdã kom sẽn tar tẽns a taab pʋsẽ wã yĩnga. (Efɛɛz rãmba 6:18-20) Manesem a to me d sẽn tõe n tũnug ne n wilg tɩ nebã yell sɩd pak-d lame yaa d sẽn na n kõ ligd n teel a Zeova Kaset  rãmbã tʋʋmd sẽn maand dũniyã gill zugã.—2 Korẽnt dãmba 8:13, 14; 9:6, 7.

Y tõe n kẽnga zĩig a to bɩ?

18. Bõe la kiris-neb kẽer maan sẽn na yɩl n teel Rĩungã tʋʋmd b sẽn vɩ tẽns nins pʋsẽ wã?

¹⁸ Neb nins sẽn yi b tẽnsẽ n kẽng zĩis Rĩungã koe-moondb raab sẽn beẽ wʋsgã paama bark wʋsg b sẽn tall mong-m-meng yamã yĩnga. A Zeova Kaset rãmb kẽer sẽn kell n pa b tẽnsẽ me zãmsa buud gom-zẽng sẽn na n yɩl n tõog n sõng sãambã tẽebã wɛɛngẽ. Yaa vẽeneg tɩ b modgrã sɩd talla barka. Wala makre, Kaset rãmb a yopoe sẽn sõngd Sɩn nebã sẽn vɩ Etazĩni Tegzas soolmẽ wã paamame tɩ neb 114 wa Soaalã zaabr dɩɩb tẽegrẽ yʋʋmd 2001 wã. Neb nins sẽn sõngd sul-kãensã tẽebã wɛɛngẽ wã sɩd yãame tɩ b pʋtã bɩɩme n ta tigisgu.—Matɩe 9:37, 38.

19. Bõe la d segd n deng n maane, d sã n wa magd n na n tɩ zĩnd tẽn-zẽng n teel Rĩungã koe-mooneg tʋʋmd beenẽ?

¹⁹ Tõe tɩ y tagsdame tɩ yãmb ne y zakã rãmb tõe n yik n kẽnga zĩigẽ b sẽn dat Rĩungã koe-moondb n paase. Yaa sɩd tɩ pipi, yaa yam bũmb tɩ d “reng n zĩnd n tags a ligd yelle.” (Luk 14:28) D segd n sɩd maana woto, sẽn yɩɩd fãa, ned sã n dat n tɩ zĩnd tẽn-zẽnga. Ned sã n tʋll n maan dẽ, a segd n deng n soka a meng woto: ‘Rẽ yĩnga, m na n tõog n paama ligd tɩ sek tɩ m ges m zaka rãmb yell bɩ? M na n tõog n paama sɛb sẽn kõt-m sor tɩ m kẽng tẽn-kãng bɩ? Rẽ yĩnga, m zoe n gomda tẽngã buud-gomd bɩ m sakame n na n zãms-a? M zoe n mii beenẽ sã n yaa tʋʋlg bɩ waoodo, la tẽngã rog-n-migs bɩ? Rẽ yĩnga, m na n tɩ tõog n sɩd yɩɩ “belsg” m tẽed-n-taasã sẽn be be wã yĩng n pa yɩ zɩɩb n kõ-b bɩ?’ (Kolos rãmba 4:10, 11) Sẽn na yɩl n bãng koe-moondb raab sẽn zem to-to tẽng ning d sẽn dat n kẽngã, wakat fãa, yaa sõma tɩ d reng n gʋls a Zeova Kaset rãmbã tʋʋmd will ning sẽn get-a moonegã tʋʋmd yell bab-kãng pʋgẽ wã tɩ b wilgd yɛlã sẽn yaa to-to. *

20. Wãn-wãn la kiris-ned a ye sẽn yaa bi-bɩɩg maan modgr n sõng a tẽed-n-taasã la neb a taab tẽn-zẽnga?

²⁰ Kiris-ned a ye sẽn da naag Rĩung roog meebẽ Zapõ soolmẽ wã yãame tɩ b ra rata tʋm-tʋmdb sẽn tar minim sẽn na n me baleng zĩig Paragoe. A sẽn yaa ra-kõor n leb n yaa bi-bɩɩg sẽn tar keelmã yĩnga, a yik n kẽnga tẽng-kãng n tɩ tʋm kiuug a nii tʋʋmdã pʋgẽ, tɩ yaa yẽ a ye bal n da yaa wakat fãa tʋm-tʋmd rota meeb wɛɛngẽ be. Wakat ning a sẽn zĩnd be wã, a zãmsa ɛspayõll la a maan Biibl zãmsg ne neb b yiya. A mikame tɩ b ra rata koe-moondb n paas tẽngẽ wã. La a sẽn leb Zapõ wã, pa kaoos la a lebg n kẽng Paragoe n na n tɩ sõng n tigim neb Rĩung ro-kãng pʋgẽ ye.

21. Tõnd sẽn gũud a Zeova ra-kãsengã, bõe n segd n pak d n yɩɩda, la tags-bʋg la d segd n talle?

²¹ Wẽnnaam na n sõngame tɩ b moon koɛɛgã sõma tɩ zems ne a raabã. Rũndã-rũndã, a kɩtame tɩ tẽebã wɛɛngẽ tigisgã baasg b sẽn maandã kẽngd taoor tao-tao. (Ezai 60:22) D sẽn gũud a Zeova raarã, bɩ d kell n tall yẽesem tigsigã tʋʋmd pʋgẽ la d get nebã wala d nonglem Wẽnnaamã sẽn get-b to-to wã.

[Tẽngr note]

Y tẽrame bɩ?

• D sẽn gũud a Zeova raarã, wãn to la d segd n ges nebã?

• A Abrahaam tagsg ra yaa wãn-wãn nin-tɩrs nins sẽn da tõe n be Sodommã wɛɛngẽ?

• Wãn-wãn la a Zonas ra ges Niniiv nebã sẽn tek yam n kos sugrã?

• Wãn-wãn la d tõe n wilg tɩ d geta neb nins sẽn nan pa wʋm koe-noogã wa a Zeova sẽn get-b to-to wã?

[Zãmsgã sogsgã]

[Foto, seb-neng 16]

A Abrahaam ra geta nebã wala a Zeova sẽn get-b to-to wã

[Foto, seb-neng 17]

A Zonas wa n baas n gesa Niniiv nebã sẽn tek yam n kos sugrã wala a Zeova sẽn da get-b to-to wã

[Foto rãmba, seb-neng 18]

Nebã yell sẽn pak tõndã yĩng kɩtame tɩ d baood weer la soay n na n moon koe-noogã.