Belsg neb nins sẽn baood sõngrã yĩnga

BIIBLÃ pa zu-lɛbg tɩpg sebr ye. La a kõta tõnd belsgo, n sõngd tõnd tɩ d maand sũ-noog ne vɩɩmã, baa ne zu-loees nins d sẽn paamdã. Sɩd-sɩda, Gʋlsg Sõamyã yetame: “Ninsaal pag sẽn doga vɩɩm yaa koɛɛga la toogo.” (Zoob 14:1) Yaa d sẽn pa zems zãngã yĩng n wat ne tõnd zu-loeesã kẽere. La ãnda n tar taal pipi ne ninsaalbã namsgo?

Biiblã wilgame tɩ yaa malɛg-wẽng b sẽn boond t’a Sʋɩtãan munaafɩɩka. Yaa yẽ n “belgd dũniyã fãa” la a wat ne zu-loeesã wʋsg sẽn namsd ãdem-biisã. La Biiblã wilgda tõnd t’a wakatã saab kolgame. (Wilgri 12:9, 12) Ka la bilfu, Wẽnnaam na n kẽesa a toog n kɩt tɩ toog ning fãa a Sʋɩtãan sẽn wa ne tẽngã neb zutã sa. Biiblã wilgame tɩ tɩrlem dũni paalgã Wẽnnaam sẽn kãabã na n yiisa ninsaalbã sũ-sãams fãa.—2 Pɩɛɛr 3:13.

Ad yaa bũmb sẽn kõt bas-m-yam, d sẽn bãng tɩ ninsaalbã namsg ka na n kaoosã! Wẽnnaam saasẽ Rĩungã sẽn be a Zezi Kirist nugẽ wã naam wakate, yel-kɛgã la namsgã na n saame. Gʋlsg Sõamyã yeta woto Rĩm ning Wẽnnaam sẽn yãkã wɛɛngẽ: “Yẽ na n fãaga nimbãan-ned sẽn kelemda la naong soab sẽn ka tar sõangda. Far soaba ne nimbãan-ned nimbãaneg tara yẽnda, la yẽ na n fãaga nimbãan dãmba vɩɩm. Yẽ na n fãaga bãmb ne toolem la pãnga, la bãmb zɩɩm daagr na n yɩɩ bõn-kãseng yẽ nifẽ.”—Yɩɩl Sõamyã 72:12-14.

Bãngr-gom-kãensã pidsg wakat ta n saame. D na n paama vɩɩm sẽn ka sɛt arzãn pʋgẽ tẽng zugu, yɛl sẽn be yamleoog pʋgẽ. (Luk 23:43, NW; Zã 17:3) Neb nins sẽn baood sõngrã sã n bãng Gʋlsg Sõamyã kãab-kãensã, b paamda saagr la belsgo.

[Seb-neng 32 fotã soaabdã]

Bipugl yam sẽn ka a mengã: Photo ILO/J. Maillard