Naongã: Zĩig ning d sẽn tõe n yã a tɩɩmã wakat fãa yĩngã

BAA ne kɩbaya d sẽn wʋmd dũniyã gill zug naongã wɛɛngẽ wã sẽn ka noomã, neb me n be n tar bas-m-yam tɩ b tõe n maana yɛl vẽeneg n yiis naongã. Wala makre, zʋrnall a ye (Manila Bulletin) n yeel tɩ Azi bãnk ning sẽn be tẽnsã yidgr yĩngã wilgame tɩ “Azi tõe n yiisa naongã ka ne yʋʋm 25 sẽn wate.” Bãnkã saglame tɩ tẽnsã mao tɩ b laogã paase, tɩ rẽ la b na n yiis naong rãmbã talemd sẽn loog noorã pʋgẽ.

Sigls a taab la goosneema rãmb yiisa sagls wʋsg la b maan gɛɛla sẽn na yɩl n welg yellã. Bãmb kẽer la woto: Ligd bĩngr sẽn na yɩl n wa kogl nebã ne vɩɩmã zu-loeese, kɩt tɩ nebã paam kareng sõma n paasã, tẽns nins sẽn tar ligdã bas tẽns nins sẽn nan yidgdã samã taale, bas tɩ tẽng fãa tõog n koos a sẽn dat tẽng a to pʋgẽ, sẽn na yɩl tɩ tẽns nins sẽn tar naong rãmb wʋsgã tõog n koos b teedã nana-nana n yɩɩda, la tɩ goosneem rãmbã me rot ligd sẽn ka toog naong rãmbã yĩngã.

Nasiõzĩni Asãmble zenerallã yãka bõn-datɩ tɩ b segd n pids yʋʋmd 2000 wã ne yʋʋmd 2015 wã sʋka. Bõn-datɩ kãens kẽer yaa talemd sẽn loog nugã ne komã la neb paoong sẽn yɩɩd taab wʋsg tẽn-yɛng pʋgẽ wã yiisgu. Yaa sɩd tɩ bõn-datɩ kãensã yaa sõma wʋsgo, la neb wʋsg yam yooda b na tõog n pids-b dũni kãngã sẽn welgã pʋgẽ.

Bũmb nins d sẽn na n maan n zab ne naongã

Sẽn mik tɩ dũniyã gill zugu, na n yɩɩ toog tɩ d yã yellã tɩɩmã, zĩ-bʋg la d tõe n paam sõngre? Wa b sẽn wilg poorẽ wã, zĩig bee d sẽn tõe n paam sagls sẽn yaa sõma tɩ tõe n sõng nebã masã menga. Zĩ-kãng la bʋgo? Yaa Wẽnnaam Gomda sẽn yaa Biiblã pʋgẽ.

Bõe n kɩt tɩ Biiblã yaa toor ne sɛb a taabã fãa? Ya a sẽn yit Naandã sẽn yaa tõog sẽn yɩɩd fãa soabã nengẽ wã. Biiblã kõta yam sẽn be yõod wʋsgo, la sagl-sõma neb buud fãa sẽn tõe n tũ zĩig fãa la wakat fãa. Naong soab sã n tũ no-kãens fãa, a vɩɩmã tõe n zĩnda yamleoog n yɩɩd baa masã menga. D rɩk makr a wãna.

Tall-y tagsg sẽn zems ligdã wɛɛngẽ. Biiblã yeelame: “Yam bee koglg yĩng wa ligd sẽn be koglg yĩngã; la bãngr sẽn be nafr n yɩɩdã yaa tɩ yam kogenda neb nins sẽn tar-a wã vɩɩm.” (Koɛɛg Soaba 7:12, NW ) Woto rat n yeelame tɩ bõe? Ka ned sẽn na n tar ligd la a tar bũmb fãa ye. Yaa sɩd tɩ ligd tõe n waa ne koglg bilfu. D sã n tar ligdi, d tõe n daa bõn-yood kẽer d sẽn datã, la pa zãng-zãng ye. Bũmb a taab n be tɩ b yõod yaa kãseng n yɩɩd tɩ ligd ka tõe n da ye. D sã n sak rẽ, d na n talla tagsg sẽn kɩls tɩ zems laogã wɛɛngẽ, tɩ ne woto bɩ d ra paam sũ-sãams nins neb nins sẽn tik b vɩɩmã arzɛgsã baoob zugã sẽn paamdã ye. Ligd ka tõe n da vɩɩm ye, la d sã n tʋmd ne yam, tõe n kogla tõnd vɩɩmã masã la tõe n pak sor n kõ-d tɩ d wa tõog n paam vɩɩm sẽn ka sɛt menga.

D vɩɩmd tɩ zems ne d sẽn tarã. Pa wakat fãa la tõnd sẽn tʋll bũmb ningã yaa tɩlae ne-d ye. Sẽn segd n pak-d n yɩɩdã yaa bũmb nins sẽn yaa tɩlae ne-dã. Tõnd tõee nana-nana n gãd d sũurẽ wã tɩ bũmb yaa tɩlae ne-do, tɩ sɩd-sɩdã yaa bũmb d sẽn tʋll woto bal tɩ yaool n ka tɩlae ye. Yam soab na n deng n dɩka ligd ning a sẽn paamdã n pids a raab nins sẽn yaa kãsemsã, wala rɩɩbã, futã, zĩ-gãadgã la bõn-yood a taab sẽn yaa tɩlae. Rẽ poor masã la a na n ges ligd ning sẽn ketã sã n seka teed a taab raabo, n yaool n dɩ-a. A Zezi sagla a kɩbar a yembr pʋgẽ tɩ ned segd n ‘deng n zĩnd n tagsa a ligd yell n bãng a sã n tara sẽn seke.’—Luk 14:28.

Filipinni, a Eufrosina sɩdã bas-a-la sẽn na maan yʋʋm a wãn la woto, t’a wubd a kamb a tãabã a yembre. A sɩdã sẽn bas-a wã tɛka, a maoodame n paamd zakã neb noor dɩɩbo, la a kẽgsd ligdã a sẽn paamdã. Wakat kãng pʋgẽ, a zãmsa kambã tɩ b bãng b sẽn segd n tʋm ne ligdã b sẽn paamdã to-to. Wala makre, kambã sã n yã bũmb n data, a ka yet-b bal t’a ka tõe n da ye, a kɩtdame tɩ b tagse, n gom ne-b woto: “Koɛɛg kae ye, y tõe n paama y sẽn datã, la rɩlla y yãke. Tõnd ligdã seka bũmb a ye raab bala. D tõe n daa bũmb ning yãmb sẽn datã, walla d ra nemd ne zẽ-vãad n dɩ ne mui wã semen kãngã. Masã, bʋg la y rata? Yaa y yãke.” Naoor wʋsgo, tao-tao bala kambã wʋmda goamã võore, n sak tɩ b rata rɩɩbã, n bas bũmb a to wã.

Kɩt-y tɩ y sẽn tarã sek-yã. Biiblã leb n yeela woto: “Tõnd sã n tar dɩɩb ne futu, yõ wã sekda tõndo.” (1 Tɩmote 6:8) Ligd yen-yen bal pa kõt ned sũ-noog ye. Arzɛgs rãmb wʋsg n be n pa tar sũ-noogo, tɩ naong rãmb wʋsg me be n tar sũ-noog wʋsgo. Naong rãmb kãens modgdame tɩ b sẽn tarã sekd-ba. A Zezi wilgame tɩ d tall ‘nif sẽn yaa sõamã,’ sẽn get  bũmb nins sẽn tar yõod n yɩɩdã bala. (Matɩe 6:22) Rẽ sõngda nedã t’a tall sũ-noogo. Naong rãmb wʋsg tara sũ-noogo, bala b baoome n paam zems-n-taar ne Wẽnnaam la zak pʋgẽ vɩɩm sũ-noogo, sẽn yaa bũmb ned sẽn ka tõe n da ne ligd ye.

Woto yaa Biiblã sagl-sõma a wãn bal sẽn tõe n sõng naong rãmbã tɩ b mao ne b zu-loeesã. Sagls wʋsg a taab n be. Wala makre, bas-y minim wẽns wala sɩgaar yũub la reem-n-bao-ligdã sẽn sãamd ligdã. Bãng-y bũmb nins sẽn tar yõod n yɩɩd vɩɩmã pʋgẽ, sẽn yɩɩd fãa tẽebã bõn-datɩ. Zĩig ning tʋʋm sẽn kae wã, mak-y n maan tʋʋmd bɩ y koos bũmbu, nebã sẽn data. (Yelbũna 22:29; 23:21; Filip rãmba 1:9-11) Biiblã sagenda tõnd tɩ d “tall yam ne yẽesem,” tɩ bala “bãmb na n yɩɩ vɩɩm d yĩnga.”—Yelbũna 3:21, 22.

Baa ne Biiblã sagls sẽn tõe n sõng n kõ neb nins sẽn maood ne talemdã yolsgã, sogsg la neb ket n sokd b mens beoog-daarã wɛɛngẽ. Rẽ yĩngã talemdã na n ket n namsda nebã wakat sẽn-kõn-sa yĩng bɩ? Welgr ning sẽn be sẽn tar-b arzɛgsã ne sẽn be-b naong wʋsg pʋgẽ wã na n wa saame bɩ? Bɩ d ges yellã tɩɩm neb wʋsg sẽn ka mi wã sẽn ya a soaba.

Biiblã kõta tõnd saagre

Neb wʋsg sakame tɩ Biiblã yaa seb-sõngo. La naoor wʋsgo b ka mi t’a tara kɩbay takɩ sẽn wilgd tɩ toeen-kãsems n na n wa ka la bilf ye.

Wẽnnaam datame n maan bũmb n welg ãdem-biisã zu-loeese, wala naongã. Sẽn mik tɩ ninsaalbã goosneem dãmb ka tõe walla b ka rat n maan dẽ wã, Wẽnnaam na n ledg-b lame. Wãn-wãn to? Biiblã wilgda woto Daniɛll 2:44 pʋgẽ vẽenega: “Wẽnnaam sẽn be yĩngra na n kɩtame tɩ soolem sẽn ka tõe n sãam la buud a taab sẽn ka tõe n deeg zindi. A na n wãa soolem kãens fãa tɩ b menem n bas-a t’a yaas wakat fãa.”

Wẽnnaam sã n wa yiis “soolem” bɩ goosneem dãmb kãens poor la Rĩm ning yẽ mengã sẽn yãkã na n sɩng tʋʋmde. Rĩm kãng ka ninsaal ye, a yaa malɛk sẽn vɩ saasẽ n wẽnd Wẽnnaam menga, n tar tõog n na n wa ne toeen-kãsems nins sẽn yaa tɩlae wã sẽn na yɩl tɩ welgr ning sẽn be arzɛgs rãmbã ne naong rãmbã sʋkã sa. Wẽnnaam yãka a mengã Biriblã t’a maan dẽ. (Tʋʋma 17:31) Yɩɩl Sõamyã 72:12-14 bilga Rĩm kãng sẽn na n maanã woto: “Yẽ na n fãaga nimbãan-ned sẽn kelemda la naong soab sẽn ka tar sõangda. Far soaba ne nimbãan-ned nimbãaneg tara yẽnda, la yẽ na n fãaga nimbãan dãmba vɩɩm. Yẽ na n fãaga bãmb ne toolem la pãnga, la bãmb zɩɩm daagr na n yɩɩ bõn-kãseng yẽ nifẽ.” Ad wã yaa saagr sẽn yaa kãsenga! Yolsg yaa n wa! Rĩm ning Wẽnnaam sẽn yãkã na n sõnga naong rãmbã la nimbãan dãmbã.

Woto, zu-loees nins sẽn tɩ loe ne naongã na n paama welgr wakat kãnga. Yɩɩl Sõamyã  72 wã verse 16 yetame: “Ki wʋsg na n zĩnda soolem pʋgẽ. A na n miima tãens zutu.” Rɩɩb ka na n le paoog ned ba a yembre, kom, ligd kaalem, bɩ laog zãab sẽn ka zems yĩng ye.

Zu-loees a taab me na n paama welgre. Wala makre, rũndã-rũndã, tẽngã neb wʋsg sẽn yɩɩd ka tar b mens zags ye. La Wẽnnaam kãaba woto: “B na n mee zags n zĩnd b pʋsẽ. Bãmb na n sela tɩɩse n dɩ b biisã. Bãmb ka na n me yir tɩ ned a to reeg n kẽ ye. Bãmb ka na n sel tɩɩs tɩ ned a to reeg n wob ye. Tɩ bõe, mam neba na n kaoosa wa tɩɩse. La neb nins mam sẽn yãka na n paama b tʋʋma nafre.” (Ezai 65:21, 22) Ned fãa na n paama a meng zaka, la a paam tʋʋmde. Yaa naongã tɩɩm wakat fãa yĩng la Wẽnnaam sẽn kãabd woto wã. Welg kãseng ning sẽn be ra-kãagbã ne naong rãmbã sʋk rũndã-rũndã wã ka na n zĩnd sasa kãng ye, neb ka na n leb n tʋmd wa b na n kiime n baood b noor dɩɩb ye.

Tõe tɩ nina sã n wʋm Biiblã sẽn kãab woto wã pipi, a tõe n tagsdame tɩ ka sɩd ye. La d sã n maag d yĩng n vaees Biiblã, d yãtame tɩ Wẽnnaam sẽn kãab bũmb nins fãa pĩndã paama pidsgu. (Ezai 55:11) Rẽ, ka wala bõn-kãens sã n na n paama pidsgã la sardã ye. Sẽn yaa lebend ne rẽ, sokrã la woto: Bõe la yãmb tog n maan tɩ rẽ sã n wa paam pidsg bɩ y rɩ a nafa?

Y na n zĩnda be bɩ?

Sẽn mik tɩ yaa Wẽnnaam goosneemã, tõnd tog n yɩɩ neb nins buud Wẽnnaam sẽn na n sak wala a soolem nebã. A pa bas tõnd n ka wilg-d bũmb ning d sẽn tog n maan n wa yɩ gooseneem kãng soolem neb ye. Noy nins d sẽn segd n tũ wã bee Biiblã pʋgẽ.

Wẽnnaam Biriblã, sẽn yaa Rĩm ning a sẽn yãkã yaa tɩrga. (Ezai 11:3-5) Dẽ, neb nins a sẽn sak tɩ b vɩɩmd a goosneemã naam wakatã me sedg n yɩɩ tɩrse. Yelbũna 2:21, 22 yetame: “Nin-tɩrs na n zĩnda tẽnga pʋgẽ, pʋ-peelem dãmb na n zĩnda a pʋgẽ. La b na n yiisa nin-wẽns tẽnga pʋgẽ. B na n yiisa neb nins sẽn ka baood sɩdã.”

Rẽ yĩnga y tõe n bãnga y sẽn tõe n tũ no-kãens to-to bɩ? N-ye, tõeeme. Y sã n zãms Biiblã la y tũ a noyã, y tõe n wa paama beoog-daar sẽn be yamleoog woto. (Zã 17:3) Yaa ne sũ-noog la a Zeova Kaset rãmbã na n sõng-y tɩ y zãms Biiblã. D sagend-y lame tɩ y sak zãmsg a woto n wa tõog n vɩɩmd dũni naong la yel-kɛg sẽn ka na n leb n zĩndẽ abada wã pʋgẽ.

 [Foto, seb-neng a 5]

A Eufrosina: “M zakã neb sẽn pa sãamd ligdã, kɩtdame tɩ d pa kongd sẽn yaa tɩlae ne-dã ye.”

[Foto rãmba, seb-neng a 6]

Zems-n-taar ne Wẽnnaam ne zak pʋgẽ vɩɩm sũ-noog ka bũmb sẽn daad ne ligd ye