Rɩk-y Wẽnnaam sẽn yaa sɩd soabã togs-n-taare
Rɩk-y Wẽnnaam sẽn yaa sɩd soabã togs-n-taare
“Bɩ yãmb yɩ Wẽnnaam togs-n-taas wa kom-nongdse.”—EFƐƐZ RÃMBA 5:1.
1. Wãn to la neb kẽer tagsd sɩdã wɛɛngẽ, la bõe yĩng tɩ tags-kãens pa zemse?
“SƖD yaa bõe?” (Zã 18:38) A Põns Pɩlat sẽn sok sok-kãngã ne paoogr sẽn na maan yʋʋm 2 000 masã wã, a ra rat n yeelame tɩ sɩdã yaa bũmb võor wʋmb sẽn yaa toog wʋsg tɩ b pa segd n bao n bãng-a ye. Rũndã-rũndã me, neb wʋsg na n sak n deegame tɩ yaa woto. B wẽeda no-koɛɛm wʋsg sẽn na yɩl n bãng sɩdã sẽn sɩd yaa bũmb ning takɩ wã. Tõe tɩ y zoe n wʋmame tɩ b yetẽ tɩ ned fãa tara a sɩda, tɩ sɩd sẽn yaa takɩ ka be, bɩ tɩ sɩd yaa bũmb sẽn toeemd wakat fãa. Tags-kãensã fãa yaool n pa zems ye. B sẽn maand vaeesg yɛl kẽer zutã la karengã, yaa sẽn na yɩl n bãng yɛl takɩ sẽn maane, sẽn dat n yeel tɩ sɩdã tõnd sẽn vɩ dũni ning pʋgẽ wã wɛɛngẽ. Sɩdã pa bũmb sẽn be ne ned kam fãa tagsg ye. Wala makre, yɛl nins sẽn pʋgdã pa tõe n naag taab n yɩ sɩd ye: Ninsaal tara sɩɩg sẽn pa kiid la a pa tare, a Sʋɩtãan beeme la a kae, vɩɩmã tara bõn-datl la a pa tare. Yel-kãensã pʋgẽ, a yiibã sã n kɩɩsd taaba, ya a yen tãa bal n yaa sɩda. A yembr bal n segd n yaa sɩda, t’a to wã yaa ziri. B yiibã fãa pa tõe n lagem n yɩ sɩd ye.
2. Zĩ-bʋs wɛɛngẽ la a Zeova yaa Wẽnnaam sẽn yaa sɩd soaba, la sogs-bʋs la d na n leoke?
2 Sõsg ning sẽn loogã pʋgẽ, d yãame t’a Zeova yaa Wẽnnaam sẽn yaa sɩd soaba. A mii sɩdã bũmb fãa wɛɛngẽ. Sẽn yaa lebend zãng fasɩ ne a bɛ a Sʋɩtãan sẽn yaa bɛlgdã, wakat fãa a Zeova yaa sɩd soaba. Sẽn paase, a vẽnegda neb a taabã sɩdã sõma. Tʋm-tʋmd a Poll ra sagla a tẽed-n-taasã woto: “Woto yĩnga, bɩ yãmb yɩ Wẽnnaam togs-n-taas wa kom-nongdse.” (Efɛɛz rãmba 5:1) D sẽn ya a Zeova Kaset rãmbã yĩnga, wãn-wãn la d tõe n dɩk a togs-n-taar n kɩt tɩ d goamã la d vɩɩmã zems ne sɩdã? Bõe yĩng tɩ tar yõod tɩ d sɩd maan woto? La bõe n kõt-d bas-m-yam tɩ neb nins sẽn yaa sɩd rãmb b vɩɩmã pʋgẽ wã tata a Zeova yam? Bɩ d gese.
3, 4. Bõe la tʋm-tʋmd a Poll la a Pɩɛɛr deng n togs yɛl nins sẽn na n zĩnd “yaoolem dayã” sasa wɛɛngẽ?
3 Tõnd vɩɩ zãmaan sẽn piuug ne zɩlem-beed wʋsg tũudmã wɛɛngẽ. Wa Wẽnnaam sẽn vẽneg tʋm-tʋmd a Poll t’a ra reng n togsã, “yaoolem wakat” kãensã pʋsẽ, neb wʋsg maanda wa b sakda Wẽnnaam, la b yaool n kɩɩsda a pãnga. Sãnda kɩɩsda sɩdã, tɩ b “tagsg yaa wẽnse.” Sẽn yɩɩd fãa, ‘nin-wẽnsã ne zãmb dãmb . . . maanda wẽng n paasdẽ, n belgd neb a taabã la bãmb mens paamd belgre.’ Baa nin-kãensã sã n zãmsd wakat fãa me, b pa tõe n ‘bãng sɩdã ye.’—2 Tɩmote 3:1, 5, 7, 8, 13.
4 Wẽnnaam vẽnega tʋm-tʋmd a Pɩɛɛr me t’a gʋls yaoolem wakatã wɛɛngẽ. Wala a sẽn da reng n togsã bal kɛpɩ, nebã pa zãgsd sɩdã bal ye, b leb n yaanda Wẽnnaam Gomdã la neb nins sẽn moond sɩd ning sẽn be a pʋgẽ wã. Laadbã “pa rat n deeg” tɩ koom n da sãam a Nowe wakatẽ dũniyã tɩ rẽ kõt mamsg ne bʋʋd ning sẽn nan watã ye. B sẽn belgd b mens ne tagsg ninsã na n wa baas n waa ne yel-beed b zutu, Wẽnnaam sã n wa na n sãam wẽn-kɩɩsdbã.—2 Pɩɛɛr 3:3-7.
A Zeova sõgen dãmbã mii sɩdã
5. Sã n yaa ne no-rɛɛs a Daniɛlle bõe n da na n zĩnd “sɛɛbã wakate,” la yaa wãn-wãn la bãngr gom-kãngã pids-yã?
5 No-rɛɛs a Daniɛll sẽn wa n bilgd “sɛɛba wakatã” a reng n togsame tɩ wakat kãnga, bũmb sẽn yaa toor zãng fasɩ n na n zĩnd Wẽnnaam nin-buiidã sʋka. Yaa sɩdã lebs-n-lugl tũudmã wɛɛngẽ. A gʋlsa woto: “Neb wʋsg na n kẽnga ka la ka, la bãngr na n paasa wʋsgo.” (Daniɛll 12:4) Tudgr naab a Sʋɩtãan pa tõog n liib bɩ n tudg a Zeova nin-buiidã ye. B sẽn kẽng ka la ka Biiblã pʋgẽ wã, b wa n baas n paama bãngr hakɩkã. Pipi yʋʋm kob-gĩndẽ wã, a Zezi vẽnega a karen-biisã. A “vẽnega bãmb yam tɩ b bãng Gʋlsg Sõamyã.” (Luk 24:45) Tõnd wakatã me, yaa woto la a Zeova maan-yã. A tũnuga ne a Gomdã, a vʋʋsem sõngã la a siglgã, n kɩt tɩ neb milyõ rãmb sẽn be tẽngã gill zug tõog n bãng sɩdã sẽn yaa bũmb ninga, yẽ sẽn da sɩng n mi hal daar zãrã.
6. Yaa sɩd-bʋs sẽn yit Biiblã pʋgẽ võor la Wẽnnaam nin-buiidã wʋm-yã?
6 Tõnd sẽn yaa Wẽnnaam nin-buiidã yĩnga, d wʋmda yɛl wʋsg võor d sẽn da kõn tol n tõog n wʋmẽ, d sã n da pa a nin-buiidu. D tõog n paama sogsg leoore, tɩ neb sẽn tar dũniyã yam yaol n dɩk yʋʋm tusa n bao b leoor n pa tol n yã ye. Wala makre, d mii bũmb ning sẽn kɩt tɩ namsgã beẽ wã, nebã sẽn kiidã la ninsaalbã sẽn pa tõe n kɩt tɩ laafɩ la zems-n-taar zĩnd zĩig fãa wã võore. D leb n paamame tɩ b wilgd-d beoog daarã sẽn na n yɩ to-to. Wala makre, d mii yɛl sẽn tɩ loe ne Wẽnnaam Rĩungã, tẽngã sẽn na n lebg arzãnã la vɩɩm sẽn kõn sa zems-zãng pʋgẽ wã. D tõog n bãnga sẽn ka to Soab a Zeova. D leb n bãnga a zʋg-sõma wã sẽn be yamleoogã, la bũmb ning d sẽn segd n maan n paam a barkã. D sẽn mi sɩdã yĩng kɩtame tɩ d tõe n bãng sẽn yaa sɩd la sẽn pa sɩd n welge. Sɩdã tũub kɩtdame tɩ d pa pʋgd yel-yaalse, tɩ d tõe n dɩ vɩɩmã nafa n yɩɩda, la a kõt-d saagr sẽn be rasãnd hal wʋsg beoog daar yĩnga.
7. Nin-bʋs buud n tõe n bãng sɩd ning sẽn be Biiblã pʋgẽ wã, la nin-bʋs buud n pa tõe n bãng-a?
7 Rẽ yĩnga, y wʋmda sɩd ning sẽn be Biiblã pʋgẽ wã võor bɩ? Sã n yaa woto, bɩ y bãng tɩ yaa bark sẽn yaa kãseng hal wʋsg la y paam-yã. Seb-gʋlsd sã n gʋlsd sebr n na n kõ zãmã, a nong n gʋlsd-a lame t’a tall yamleoog ne nin-kãense. Wala makre, sɛb kẽer yaa neb sẽn karem n zãag yĩng bal la b gʋls-yã, a taab yaa kambã yĩnga, la sãnda me yaa neb sẽn tar tʋʋmd takɩ yĩnga. Baa nebã fãa sẽn tõe n paam Biiblã nana-nana zĩig fãa wã, yaa neb sull takɩ yĩng la b gʋls-a, sẽn na yɩl tɩ b tõog n wʋm-a võor la b rɩ a yõodo. A Zeova gʋls-a-la tẽngã sik-m-mens rãmb yĩnga. Nin-kãensã tõe n wʋma Biiblã võor tɩ pa tũ ne b bãngre, b minungu, b tarem, b naam bɩ b buudã sẽn ya a soab ye. (1 Tɩmote 2:3, 4) La neb nins fãa sẽn pa tar yam sõngã pa tol n tõe n wʋm Biiblã võore, baa b yam la b bãngr sẽn ta zĩig ning ye. Tɩta-ned ne wuk-m-meng soab pa tõe n bãng sɩd ning sẽn be Wẽnnaam Gomdã pʋgẽ t’a yõodã yaa kãsengã ye. (Matɩe 13:11-15; Luk 10:21; Tʋʋma 13:48) Yaa Wẽnnaam bal n tõe n gʋls sebr sẽn yaa woto.
A Zeova sõgen dãmbã yaa sɩd rãmba
8. Wãn-wãn la a Zezi mengã yɩ sɩdã?
8 Wala a Zeova, a Kaset rãmbã sẽn yaa wẽn-sakdbã me yaa sɩd rãmba. A Zezi Kirist sẽn ya a Zeova Kaset soab ning sẽn yaa kasẽngã wilga sɩdã sẽn ya a soab ne yɛl nins a sẽn zãms nebã, la ne a sẽn vɩɩmd la a ki to-to wã. A teela sɩdã la kãabs nins sẽn be a Zeova Gomdã pʋgẽ wã. Woto yĩnga, a Zezi n da yaa sɩdã wala yẽ meng sẽn da yeelã.—Zã 14:6; Wilgri 3:14; 19:10.
9. Bõe la Biiblã yet sɩdã togsg wɛɛngẽ?
9 A Zezi ra ‘pida ne neerlem la sɩda,’ la ‘ziri ra ka be a noorẽ’ me ye. (Zã 1:14; Ezai 53:9) Kiris-neb hakɩkã tũuda makr ning a Zezi sẽn basã, n yaa sɩd rãmb neb a taabã taoore. A Poll ra sagla a tẽed-n-taasã woto: “Bɩ ned kam fãa togs sɩd ne a yaka; tɩ bõe, tõnd fãa yaa yĩng a yembr wil ne taaba.” (Efɛɛz rãmba 4:25) Sẽn deng rẽ, no-rɛɛs a Zakari ra gʋlsa woto: “Gom-y sɩd ne taaba.” (Zakari 8:16) Kiris-nebã yaa sɩd rãmba, bala b tʋll n taa Wẽnnaam yam. A Zeova yaa sɩd soaba, la a mii zɩlem-beed sẽn tõe n wa ne wẽng ningã. Woto yĩnga, wa sẽn zemse, a tʋllame t’a sõgen dãmbã fãa togsd sɩda.
10. Bõe yĩng tɩ neb kẽer nong n yagd ziri, la bi-bʋs sẽn yaa wẽns la rẽ wat ne?
10 Neb wʋsg tõe n getame tɩ sẽn na yɩl n naf yɛl kẽer pʋsẽ, zemsame tɩ b yag ziri. Sãnda yagda ziri sẽn na yɩl n põs sibgr walla b paam nafa ninga, bɩ sẽn na yɩl n paam bal tɩ neb a taabã pẽg-ba. La ziri yagb yaool n yaa zʋg-wẽnga. Sẽn yaa wẽng n yɩɩd fãa, zɩlem-be-ned pa tõe n ta Wẽnnaam yam ye. (Wilgri 21:8, 27; 22:15) Neb a taabã sã n mi tɩ tõnd yaa sɩd soaba, b sakd n tẽeda d sẽn yetã, b tara bas-yard ne-do. La d sã n zoe n yag ziri baa yaa vugr tɩ b yõk-do, d sã n wa togs bũmb nindaare nebã yam tõe n yooda ne d sẽn yetã sã n yaa sɩda. Afriki, yel-bũnd a ye n yeel tɩ “zɩlem-beed a yembr kɩtdame tɩ sɩd tusr lebg ziri.” Yel-bũnd a to me yetame: “Baa zɩlem-be-ned sã n wa togsd sɩda, b pa na n tol n tẽ-a ye.”
11. Bõe yĩng tɩ yɩ sɩd soab baoodẽ tɩ f ra tek f sẽn na n togsd sɩd bala?
11 Yɩ sɩd soab pa tek sɩd togsg bal ye. Yaa vɩɩm manesem. A wilgda tõnd sẽn sɩd ya a soaba. Pa ne d noor goam bal la d kɩtd tɩ neb a taabã bãngd sɩdã ye, leb n yaa ne d tʋʋmã me. Tʋm-tʋmd a Poll ra soka woto: ‘Fo sẽn zãmsd . . . neb a taabã, fo pa zãmsd f meng sɩda? Fo sẽn moond tɩ ned ra zu wã, yaa bõe tɩ fo zuuda? Fo sẽn yet tɩ ned ra yo wã, yaa bõe tɩ fo yooda?’ (Rom dãmba 2:21, 22) Tõnd sã n dat n zãms neb a taabã sɩdã, d segdame n yɩ sɩd rãmb d vɩɩmã nens fãa pʋsẽ. Nebã sã n miẽ tɩ tõnd yaa sɩd rãmb la pʋ-peelem dãmba, na n kɩtame tɩ b sak n tũ tõnd sẽn zãmsd-b bũmb ningã.
12, 13. Bõe la bi-bɩɩg a ye gʋls pʋ-peelmã wɛɛngẽ, la bõe yĩng t’a tar vɩɩm manesem noy sẽn yaa sõma wʋsgo?
12 Kom-bɩɩsã sẽn be a Zeova sõgen dãmba sʋkã mii b sẽn segd n yɩ sɩd rãmbã yõodo. Yʋʋm 13 bipugl a Jenny gʋlsa woto a devoaar pʋgẽ: “Pʋ-peelem yaa bũmb mam sẽn nand hal wʋsgo. La zu-bʋko, rũndã-rũndã neb wʋsg ye pa pʋ-peelem dãmb zãng fasɩ ye. La maam yẽ yãka yam n na n kell n yɩ pʋ-peelem soab wakat fãa m vɩɩmã pʋgẽ. M leb n na n yɩɩ pʋ-peelem soab me, baa sɩd togsg sã n pa na n naf maam bɩ m zo-rãmbã zĩig pʋgẽ. Mam yãkda m zo-rãmbã neb nins sẽn togsd sɩdã, la pʋ-peelem dãmba bal sʋka.”
13 Karen-saam-poakã sẽn wa n gomd a Jenny devoaarã yellã, a yeela woto: “Fo paooda ne f tall vɩɩm manesem noy sẽn yaa sõma hal wʋsg woto, la m miime tɩ f na n sɩd tũu vɩɩm manesem no-kãensã, bala fo sɩd tõe n tũ-b lame.” Bõe n kɩt tɩ bipugl kãngã sẽn yaa lekoll karen-biigã tar vɩɩm manesem sõng woto? A Jenny yeela a devoaarã sɩngr goam pʋgẽ tɩ yaa yẽ tũudmã n “yãkd vɩɩm manesem noy nins a sẽn tũud a vɩɩmã pʋgẽ wã.” Yaa yʋʋm a yopoe la woto masã a Jenny sẽn gʋls devoaar kãngã. Wala a karen-saambã sẽn da tagsdã, a Jenny ket n tũuda vɩɩm manesem no-kãensã sẽn yaa sõma wʋsgã a vɩɩmã pʋgẽ, n ya a Zeova Kaset soaba.
A Zeova sõgen dãmbã vẽnegda sɩdã
14. Bõe yĩng tɩ Wẽnnaam sõgen dãmbã segd n teel sɩdã?
14 Yaa sɩd t’a Zeova Kaset rãmbã toor sẽn ka be, neb a taabã me tõe n togsa sɩd la b mao n yɩ pʋ-peelem dãmba. La baasg zãnga, tõnd sẽn ya a Zeova Kaset rãmbã yĩnga, d segd n teela sɩdã. B bobla tõnd sɩd ning sẽn be Biiblã pʋgẽ wã, sẽn yaa sɩd sẽn tõe n kɩt tɩ ned wa paam vɩɩm sẽn kõn sa. Woto yĩnga, yaa tɩlae ne-d tɩ d taas-a neb a taabã. A Zezi yeelame tɩ “ned ninga b sẽn kõ wʋsgo, b na n soka yẽnda ne bũmb wʋsgo.” (Luk 12:48) Vẽenega, neb nins b sẽn bark ne Wẽnnaam bãngrã sẽn tar yõod wʋsgã, b na n ‘sok-b-la ne bũmb wʋsgo.’
15. Y sã n taasd neb a taabã sɩd ning sẽn be Biiblã pʋgẽ wã, sũ-no-bʋg la y paamda?
15 D sã n taasd sɩd ning sẽn be Biiblã pʋgẽ wã neb a taabã, d paamda sũ-noog wʋsgo. Wala a Zezi pipi karen-biisã, d moonda koe-noogã sẽn yaa saagr koɛɛg sẽn kõt sũ-noogã neb nins ‘pãng fãa sẽn sɛ tɩ b yaa wa piis sẽn pa tar kɩɩmã,’ la neb nins b sẽn tudg ne ‘zĩn dãmb’ zãmsg n kẽes lik la yam-yuusg pʋgẽ wã. (Matɩe 9:36; 1 Tɩmote 4:1) Tʋm-tʋmd a Zã ra gʋlsa woto: ‘Bũmb ninga sẽn kõt maam sũ-noog n yɩɩda, yaa bãng tɩ mam kamba kẽnda sɩdã pʋgẽ.’ (3 Zã 4) A Zã ‘kambã’ wẽn-sakrã ra kõt-a-la sũ-noogo. Tõe tɩ kom-kãens yaa neb nins a sẽn sõng tɩ b sak sɩdã. Nebã sã n sakd Wẽnnaam Gomdã, sɩd kõt-d-la sũ-noogo.
16, 17. a) Bõe yĩng tɩ pa nebã fãa n sakd sɩdã? b) Sũ-no-bʋg la y tõe n paame, y sã n moond sɩdã sẽn be Biiblã pʋgẽ wã?
16 Yaa sɩd tɩ pa nebã fãa n na n sak sɩdã ye. A Zezi ra togsda nebã sɩdã Wẽnnaam wɛɛngẽ baa ne neb wʋsg sẽn da pa nong sɩd kãngã wã. A ra yeela Zʋɩf rãmbã sẽn da kɩɩsd-a wã woto: “Yaa bõe tɩ yãmb ka tẽed maam? Ned ninga sẽn yaa Wẽnnaam dẽnda, a reegda Wẽnnaam goama. Yãmb sẽn ka reegdã, yaa yãmb sẽn ka Wẽnnaam dẽnda yĩnga.”—Zã 8:46, 47.
17 Wala a Zezi, tõnd me pa basd sɩdã sẽn tɩ loe ne a Zeova wã togsg ye. Sɩd kãng tara yõod wʋsgo. D pa gũud tɩ nebã fãa sak n deeg bũmb ning d sẽn togsdã, bala pa nebã fãa n sak n deeg a Zezi goamã ye. Baasg zãnga, d sẽn mi tɩ d maanda sẽn yaa tɩrgã yĩnga d sũy noomame. A Zeova sõmblmã yĩng kɩtame t’a rat tɩ ãdem-biisã fãa bãng sɩdã. Kiris-nebã sẽn tar sɩdã yĩnga, b lebga neb sẽn tar vẽenem dũni sẽn be lik pʋgẽ. D sã n kɩtdẽ tɩ sɩdã vẽenem yãgd ne d goamã la d tʋʋmã, d tõe n sõnga neb a taabã tɩ b waoog d saasẽ Ba a Zeova. (Matɩe 5:14, 16) D wilgda nebã sʋk tɩ d kɩɩsda ziri ning a Sʋɩtãan sẽn wa ne wã, la d teend Wẽnnaam Gomdã sẽn yaa sɩd zãn-zãngã. Tõnd sẽn mi la d moond sɩd ningã tõe n kõo neb nins sẽn sakd-a wã paam-m-meng hakɩka.—Zã 8:32.
Yɩ-y sɩd dãmb y vɩɩmã pʋgẽ
18. Bõe yĩnga, la wãn-wãn la a Zezi maan a Natanayɛll lohorem?
18 A Zezi ra nonga sɩdã la a ra togsd-a. A tẽng zug koe-moonegã sasa, a ra maanda sɩd rãmbã lohorem. A Zezi ra yeela woto a Natanayɛll wɛɛngẽ: “Ad Israɛll ned sẽn ka tar zãmbo.” (Zã 1:47) Kaoosg zugẽ, a yãka a Natanayɛll b sẽn da boond me t’a Bartelemi wã t’a yɩ tʋm-tʋmdb 12 wã ned a ye. (Matɩe 10:2-4) Ad woto sɩd yaa waoogr sẽn yaa kãsenga!
19-21. Wãn to la ned sẽn da yɩ zoang paam bark a sẽn togs sɩd ne raood yĩnga?
19 A Zã sebrã pʋgẽ, sak tõr la b rɩk n gom rao a to me yelle. Yaa rao sẽn yɩ sɩd soab t’a Zezi maan-a lohorem hal wʋsgo. D pa mi raoã yʋʋr ye. D miime bal tɩ ra yaa bõaas sẽn dog ne zondo. A Zezi sẽn puk raoã ninã, nebã yɛɛsame. Fariziẽ rãmbã me wʋma zoangã nin pukr sẽn tũ ne yel-solemdã kibare. B sẽn yaa sɩdã kɩɩsdbã yĩnga b ra sɩɩga taab noor tɩ b na n diga ned ning fãa sẽn na n tẽ a Zezi b karendoogẽ wã. Zoanga roagdb sẽn deng n mi Fariziẽ rãmbã magbã yĩnga, b zoee rabeem n yag ziri tɩ bãmb pa mi sẽn yɩ to-to bɩ sẽn tũ ne ned ning sabab tɩ b biigã wa neẽ masã wã ye.—Zã 9:1-23.
20 Fariziẽ rãmbã ye boola raoã meng n na n soke. Ne raoodo, a togsa sɩd n pa bʋ bũmb ning sẽn tõe n paam-a rẽ yĩnga ye. A bilga b sẽn puk a ninã to-to, la a yeel tɩ ya a Zezi n maag yẽ. Nin-kãensã sẽn paam zãmsg la b ra yaa nin-kãsemsã sẽn pa sak n tẽ t’a Zezi yii Wẽnnaam nengẽ wã, yɩɩ lingr wʋsg ne raoã, t’a pa zoe rabeem n sagl-b tɩ b segd n sak n deega bõn-kãngã sẽn yaa vẽenegã, la a yeel-b woto: “Dao kãng sã n da ka yi Wẽnnaam nengẽ, bãmb da ka tõe n maan baa fɩ ye.” Farizɩẽ rãmbã sẽn da ye pa tar b sẽn na n yɛɛlgã, b kong n dõd-a lame t’a paooga bãmba, la b rig-a.—Zã 9:24-34.
21 A Zezi sẽn wʋm bõn-kãng kibarã, a sũur yɩɩ noog hal wʋsg t’a rɩk sẽk n na n gẽes raoã. A sẽn seg raoã, a kenga tẽeb ning a sẽn da tallã, n wilg-a vẽeneg tɩ yaa yẽnda la Mesi wã. Ad ra-kãngã sɩd paam bark tɛkẽ a sẽn togs sɩdã yĩnga! Hakɩka, Wẽnnaam bark sɩd bee neb nins sẽn togsd sɩdã zutu.—Zã 9:35-37.
22. Bõe yĩng tɩ d segd n yɩ sɩd rãmba?
22 Sɩdã tũub yaa bũmb d sẽn segd n gãd ne d sũur fãa. A yaa tɩlae sẽn na yɩl n tall zood ne nebã la ne Wẽnnaam. Yɩ sɩd soab baoodame tɩ f yɩ pʋ-peelem soaba, ned b sẽn tõe n pẽneg nana-nana la b sẽn tõe n tall bas-yard ne. Woto kɩtdame tɩ f tõe n ta a Zeova yam. (Yɩɩl Sõamyã 15:1, 2) Yɩ zɩlem-be-ned yaa yɩ bɛlgda, ned b sẽn pa tõe n tall bas-yard ne, la sẽn yagd ziri. Woto kɩtdame tɩ f kong a Zeova lohorem. (Yelbũna 6:16-19) Bɩ d rɩk sard sẽn pa vigsd n yɩ sɩd rãmba. Sãmbg sẽn ka be, sẽn na yɩl n dɩk Wẽnnaam sẽn yaa sɩd soabã togs-n-taare, d segd n bãnga sɩdã, n togsdẽ la d vɩ tɩ zemsd ne sɩdã.
Wãn to la y na n leokẽ?
• Bõe yĩng tɩ d segd n tall mi-beoog d sẽn mi sɩdã yĩnga?
• Wãn to la d tõe n dɩk a Zeova togs-n-taar n yɩ sɩd rãmba?
• D sã n taasd neb a taabã Biiblã sɩda, nafa bʋs la d paamda?
• Bõe yĩng tɩ tar yõod tɩ d yɩ sɩd rãmba?
[Zãmsgã sogsgã]
[Foto rãmba, seb-neng 29]
Kiris-nebã taasda Biiblã sɩdã b sẽn bobl-bã neb a taabã.
[Foto rãmba, seb-neng 31]
Zoang ning nin a Zezi sẽn pukã paama bark a sẽn togs sɩdã