Kirist tũudum hakɩk a ye n sɩd be

A ZEZI KIRIST lugla kiris-neb tũudum bɩ tiging a yembr bala. Tiging kãng ra yaa yĩng a yembr bɩ zak a ye neb tẽebã wɛɛngẽ. Woto rat n yeelame tɩ yaa neb Wẽnnaam sẽn yãk ne a vʋʋsem sõngã maasem n tigim, n sak b fãa wa a “kamba.”—Rom dãmba 8:16, 17; Galat dãmba 3:26.

A Zezi zãmsa nebã tɩ Wẽnnaam tũnugda ne tũudum yɛng bal n talld nebã n dabd sɩdã la vɩɩmã zĩigẽ. Sẽn na yɩl n bilg sɩdã yõodo, a Zezi maka tũudum ning sẽn tar n debd vɩɩm sẽn ka sɛtã zĩigẽ ne sore. A yeelame: “Bɩ y kẽ zak noor sẽn yaa sẽka. Tɩ bõe, zak noor sẽn yaa yalenga la sor sẽn yaa yalenga rabda sãoong zĩiga, la neb wʋsg kẽeda beenẽ. La zak noor sẽn yaa sẽka la sor sẽn yaa bãanega rabda vɩɩm zĩigẽ, la a yãtb yaa bilfu.”—Matɩe 7:13, 14; Zã 14:6; Tʋʋma 4:11, 12.

Tiging sẽn be lagem-n-taar pʋgẽ

Sebr a ye (Nouveau dictionnaire de théologie [ãngil.]) yeelame tɩ d ka segd n tags tɩ pipi yʋʋm kob-gĩndẽ tigingã ra yaa “siglg sẽn sigl neer dũniyã gill zug wala sẽn yaa to-to ne Katolik rãmbã tũudum rũndã-rũndã wã ye.” Bõe yĩnga? “Bala neb sẽn sigl neer woto dũniyã gill zug ra ka zĩnd ye.” Woto la sebrã paas-yã.

Ned ba a yembr ka tõe n kɩɩs tɩ pipi kiris-neb tigingã ra yaa toor fasɩ ne kiris-neb egiliiz toɛy-toɛyã tõnd sẽn ne masã wã sẽn sigl to-to wã n tall bʋʋm ye. La baasgo pipi kiris-neb tigingã ra siglame. Tiging fãa ra ka maand a sẽn dat ye, b fãa ra saka taoor lʋɩtb sullã sẽn da be Zerizalɛmã zu-sobendo. Sul-kãngã sẽn da ya a Zezi tʋm-tʋmdbã ne Zerizalɛm tigingã kãsem dãmbã ra sõngda tigingã sẽn yaa Kiristã ‘yĩng a yembrã’ neb tɩ b kell n zĩnd lagem-n-taar pʋgẽ.—Efɛɛz rãmba 4:4, 11-16; Tʋʋma 15:22-31; 16:4, 5.

Bõe n paam tiging hakɩk yɛng kãnga? Yaa tiging kãng n wa n lebg Katolik rãmbã tũudum sẽn tar pãngã bɩ? Bɩ yaa yẽ n wa n lebg Portɛstã rãmbã tũudum sul toɛy-toɛyã sẽn welg taabã tõnd sẽn ne rũndã-rũndã wã? Bɩ bũmb a to n maane?

“Ki wã” la “nadensã”

Sẽn na yɩl n paam leoorã, bɩ d maag d yĩng n ges a Zezi meng sẽn togs tɩ bũmb ning da na n wa maaname wã. Tõe tɩ na n yɩɩ lingr ne-yã, tɩ y bãng t’a Zezi ra miime tɩ wakat n da na n wa tɩ b ka tõe n bãng a tigingã n welg ye, la t’a ra na n basame tɩ yel-beed a woto kaoos sẽn na maan yʋʋm kobse.

A rɩka tigingã n tɩ loe ne saasẽ rĩungã n yeele: “[Saasẽ rĩungã] wẽnda wa rao sẽn fẽrg bõn-buud sõama a pʋʋgẽ. La neb gõeem wakate a bɛ wa n fẽrga nadens ki wã sʋka n bas n looge. La ki wã sẽn yik n wom biisi, nadensa me pukame. Yira soab tʋm-tʋmdb wa n soka yẽ yaa: Zu-soaba, yãmb ka fẽrg bõn-buud sõama yãmb pʋʋgẽ wã wɛ? Nadensa yii yɛ? Yẽ leoka bãmba: Yaa bɛ wã n maan bõn-kãnga. La tʋm-tʋmdba soka yẽnda: Yãmb datame tɩ tõnd tɩ võ-b bɩ? Yẽ leoka bãmb yaa: Ayo, yãmb sã n võ nadensã, daar ninga, yãmb na n võo ki wã me. Bɩ y bas bãmb b yiiba fãa tɩ b bɩ ne taaba hal tɩ ta tigisg wakate. La tigsg wakate mam na n yeela tigisdba tɩ b reng n kɛ nadensã n loe kila n yõog bugum, la b wʋk ki wã n sui m baoorẽ wã.”—Matɩe 13:24-30.

A Zezi wilgame tɩ yẽ mengã la ‘ka-fẽrgdã.’ “Bõn-buud sõama wã” makda a karen-biis  hakɩkã. “Bɛ wã” ya a Sʋɩtãan munaafɩɩka. “Nadensã” yaa ziri kiris-nebã sẽn kẽ pipi kiris-neb tigingã pʋgẽ wã. A yeelame tɩ “ki wã” la “nadensã” ra na n naaga taab n bɩ hal tɩ ta ‘tigisgã,’ sẽn na n yɩ ‘dũniyã sɛɛb wakatã.’ (Matɩe 13:37-43) Bõe la woto fãa rat n yeele?

Kiris-neb tigingã sãoongo

Tʋm-tʋmdbã kũum poore, pa kaoos la karen-saam dãmb sẽn yaa kɩɩsdb yik n na n soog tigingã neb ye. B ‘zãmsa neba sẽn ka sɩd n belg karen-biis tɩ b tũ bãmba.’ (Tʋʋma 20:29, 30) Rẽ kɩtame tɩ kiris-neb wʋsg ‘bas tẽebo.’ B ‘kelga soalem bala.’—1 Tɩmote 4:1-3; 2 Tɩmote 4:3, 4.

Nouveau dictionnaire de théologie wã yeelame tɩ yʋʋm kob-gĩnd a naas soabã wakate, “yɩɩ Katolik tũudmã n da yaa . . . tũudum ning Rom soolmã pãn-soaadb sẽn sakã.” La a paas tɩ “zems-n-taar n da be Egiliizã ne tẽngã taoor dãmb sʋka,” sẽn dat n yeel tɩ Egiliizã la tẽnga pãn-soaadb ra fãooga taaba, tɩ ra yaa lebend fasɩ ne pipi kiris-nebã tẽebo. (Zã 17:16; Zak 4:4) Seb-kãng leb n yeelame tɩ wakat kãnga, “Kãab Kʋdgã ne a Platõ poorẽ dãmbã zãmsg sẽn gẽdem taab ne gẽdeng sẽn yaa wẽng wʋsgã,” kɩtame tɩ Egliizã sẽn da sigl to-to wã la a halhaalã, n paas a zãms-kãsems wʋsg toeem zãng fasɩ. Wa a Zezi Kirist sẽn da reng n togsã, ziri kiris-nebã sẽn da paamd pãngã wa n luda kiris-neb hakɩkã tɩ b ra ka leb n tõe n bãng-b n welg ye.

A Zezi kɛlgdbã ra miime tɩ ra yaa toog wʋsg tɩ b bãng ki ne nadens n welge, bala b bɩʋʋngã wakate nadensã ne ki wõnda taab hal wʋsgo. Woto, a Zezi da wilgame tɩ wakat n da na n wa zĩnd tɩ yɩ toog tɩ b bãng kiris-neb hakɩkã ne ziri kiris-nebã n welge. La woto ka rat n yeel tɩ wakat n zĩnd tɩ kiris-neb tiging ka zĩnd ye, bala a Zezi ra pʋlmame t’a na n ket n wilgda a tẽeb saam-biisã sor “wakat fãa hal tɩ ta [zãmaanã] sɛɛbo.” (Matɩe 28:20) A Zezi yeelame tɩ ki wã na n ket n bɩtame. Baa ne rẽ, yʋʋm kobsã sẽn loogã pʋsẽ, sãmbg sẽn ka be, kiris-neb hakɩkã yembr-yembr bɩ kiris-neb sul maana b sẽn tõe fãa n tũ Kiristã zãmsgo. La b ra wa n ka le tõe n bãng-b n welg vẽeneg wala neb sull sẽn sigl sõma ye. La yaa vẽeneg tɩ b ra ka wõnd sɩdã kɩɩsdb tũudum siglg sẽn paoog a Zezi Kirist yʋʋrã yʋʋm kobs pʋsẽ wã ye.—2 Pɩɛɛr 2:1, 2.

‘Yel-wẽna raoa pukame’

Tʋm-tʋmd a Poll reng n togsame tɩ bũmb a to n na n zĩnd ziri kiris-neb tũudumã pʋgẽ me. A gʋlsame: ‘Da sak-y tɩ ned belg yãmb ne bũmb ba a yembr ye; tɩ bõe, [a Zeova daarã] kõn ta hal tɩ neb wʋsg na leb poorẽ, la tɩ yel-wẽna raoa puk ye.’ (2 Tesalonik rãmba 2:2-4) ‘Yel-wẽna rao’ kãng ka ned a to n zʋʋg egiliizã taoor dãmb sẽn zẽk b mens “kiris-neb” tigingã zug n dɩt naamã ye. *

Sɩdã kɩɩsg sɩnga tʋm-tʋmd a Poll wakatẽ wã. La tʋm-tʋmdbã sẽn ki n pa leb n yaa gɩdgr ne sɩdã kɩɩsgã, a yãng n paasame menga. A Poll yeelame tɩ bũmb ning sẽn na n kɩt tɩ b bãng-a vẽeneg ya a sẽn ‘na n wa ne Sʋɩtãana pãnga, la ne zĩri bõn-bãn buud fãa la bãn ne bõn-yɛɛsdse, n wa ne belgr buud fãa sẽn yaa wẽng n belg nebã.’ (2 Tesalonik rãmba 2:6-12) Ad woto sɩd bilgda tũudmã taoor dãmb sẽn zĩnd yʋʋm kobsã sẽn loogã sasa tʋʋm takɩ!

Sẽn na yɩl n wilg tɩ bãmb sẽn yet tɩ Katolik rãmbã tũudum la kiris-neb tũudum yɛng ning sẽn yaa hakɩkã, Katolik tũudmã taoor dãmb yeelame tɩ bãmb evɛk rãmbã “reega b naamã pipi tʋm-tʋmdbã nengẽ ne tʋm-tʋmdbã sẽn kiid t’a taab reegd b zĩisã maasem, hal kiris-neb tũudmã sɩngr tɛka.” Sɩd-sɩdã, Gʋlsg Sõamyã bɩ pĩnd yɛlã pʋsẽ, bũmb ka be n wilgdẽ tɩ tags-kãngã yaa sɩd ye. Kaset kae sẽn wilgd tɩ yaa Wẽnnaam vʋʋsem sõngã n da wilgd kiris-neb ne yʋʋr tũudum ning sẽn puk Kirist tʋm-tʋmdbã kũum poorã sor ye.—Rom dãmba 8:9; Galat dãmba 5:19-21.

La yaa wãn to yẽ ne kiris-neb tũudum wʋsg a taabã sẽn puk tũudum remsgã b sẽn boond tɩ Reformã poorã? Rẽ yĩnga b tũu pipi kiris-neb tigingã makr bɩ? Rẽ yĩnga b lebs n lugla Wẽnd baleng sɩd-sɩdã pipi kiris-neb tigingã sẽn da maandã bɩ? Yaa sɩd tɩ Reformã tɛka, nin-buiidã wʋsg ra tõe n paama Biiblã b mens buud-goam pʋsẽ. La yɛl sẽn maan pĩnd  wilgame tɩ kiris-neb tũudum kãens da kell n talla nebã ziri zãmsgo. *—Matɩe 15:7-9.

La bãng-y t’a Zezi ra reng n togsa vẽeneg t’a ra na n lugla yẽ meng tiging hakɩkã, sasa ning a sẽn bool tɩ zãmaanã baasg wakatã. (Matɩe 13:30, 39) Biiblã bãngr-goam pidsg wilgdame tɩ yaa tõnd wakatã. (Matɩe 24:3-35) Sẽn yaa woto wã, tõnd ned kam fãa segd n soka a menga: ‘Kiris-neb tũudum hakɩk kãng bee yɛ?’ Tũudum kãng yaa bũmb d sẽn segd n bãngd n welgd vẽeneg n paasdẽ.

Y tõeeme n tagsdẽ tɩ y zoe n yãa kiris-neb tũudum bɩ tiging kãnga. Tara yõod tɩ y bao n bãng sã n sɩd yaa woto. Bõe yĩnga? Bala wala sẽn da yaa to-to pipi yʋʋm kob-gĩndẽ wã, kiris-neb tũudum hakɩk a ye bal n segd n beẽ. Rẽ yĩnga yãmb zoe n dɩka sẽk n bao n bãng yãmb tũudmã sã n sɩd tũuda pipi kiris-neb tigingã makr neere, la a sã n tũuda a Zezi Kirist zãmsgã wakat fãa bɩ? Bõe yĩng tɩ y ka na n maan dẽ masã? Yaa ne sũ-noog la a Zeova Kaset rãmbã na n sõng-y tɩ y maan dẽ bal kɛpɩ.—Tʋʋma 17:11.

[Tẽngr not rãmbã]

[Foto rãmba, seb-neng a 5]

Yãmb tũudmã tũuda pipi kiris-nebã makr moonegã la zãmsgã wɛɛngẽ bɩ?