Rell-y a Zeova
Rell-y a Zeova
“[Zeova,] mam soaala, yãmb yaa mam tẽeb pidsg soaba. Mam della yãmb hal m yãadem wakat tɩ ta masã.”—YƖƖL SÕAMYÃ 71:5.
1. Yel-bʋg la pe-kɩɩm a Davɩɩd sẽn yaa bi-bɩɩgã seg-yã?
A GOLIAT woglmã ra kolga metr a tãabo. Pa lingr tɩ Israɛll sodaasã fãa sẽn da be zabrã zĩigẽ wã ra zoet rabeem n pa rat n tɩ zab ne-a ye. Sẽn na maan semen dãmba, Filisti nin-wobg a Goliat talla Israɛll sodaasã noor baoob yibeoog la zaabre, n yet-b tɩ b yãk gãndaoog bãmb sʋkã t’a wa zab ne yẽ. Ned n wa n baas n sak n na n tɩ zab ne-a, la pa sodaag ye, yaa bi-bɩɩg bala. Pe-kɩɩm a Davɩɩd ra paooda wʋsg a Goliat taoore. Tõe t’a Davɩɩd zɩslem pʋd n da pa ta a Goliat zab-teedã zɩslem meng ye. La baasgo, yaa bi-bɩ-kãngã n tɩ zab ne nin-wobgã n kõ mak-sõng raood tallgã wɛɛngẽ wakat fãa yĩnga.—1 Sãmwɛll 17:1-51.
2, 3. a) Bõe n kɩt t’a Davɩɩd tõog n tɩ zab ne a Goliat ne bas-m-yam woto? b) Yel-bʋs a yiib d sẽn segd n maan n tõog n dell a Zeova la d na n wegse?
2 Yaa bõe n kɩt t’a Davɩɩd tall raood woto? Bɩ d karem goam a Davɩɩd meng sẽn gʋls a kʋʋlem wakatã n gese: “[Zeova,] mam soaala, yãmb yaa mam tẽeb pidsg soaba. Mam della yãmb hal m yãadem wakat tɩ ta masã.” (Yɩɩl Sõamyã 71:5) N-yẽe, hal a Davɩɩd yaadem wakate, a rella a Zeova zãng-zãnga. A sẽn da wa n segd a Goliat n na n zabã, a yeel-a-la woto: “Yãmb zãada sʋʋg ne kãnd la munmun n wat mam nengẽ. La mam wata yãmb nengẽ ne Saasẽ-pãng-soaba yʋʋre. Bãmb yaa Israɛll tãb-biisa yãmb sẽn paoogda Wẽnnaam.” (1 Sãmwɛll 17:45) A Goliat ra teega a meng pãn-kãsengã ne a zab-teedã, la a Davɩɩd ra teega a Zeova. Ãndũniyã fãa Soaal sẽn da be ne a Davɩɩdã yĩnga, bõe t’a na n ye zoe ninsaala, a bedrem bɩ a zab-teed yĩnga?
3 Yãmb sẽn karem bũmb ning a Davɩɩd wɛɛngẽ wã kɩtame tɩ y tʋll tɩ y bas-yardã ne a Zeova wã pãng paas bɩ? Yaa vẽeneg tɩ tõnd wʋsg sɩd tʋlla woto. Dẽ, bɩ d ges yɛl a yiib d sẽn segd n maan n tõog n dell a Zeova. Pipi, d segd n talla raood hal wʋsg sẽn na yɩl n tõog bũmb sẽn mi n gɩdgd ned t’a pa tõe n tall bas-yard a woto wã. Yiib-n-soaba, d tog n bãnga d sẽn segd n maan bũmb ning takɩ n dell a Zeova.
D sẽn tõe n tõog gɩdgr sẽn wae n sãamd d bas-yardã ne a Zeova to-to
4, 5. Bõe yĩng tɩ yaa toog ne neb wʋsg tɩ b tall bas-m-yard ne Wẽnnaam?
4 Yaa bõe n gɩdgd nebã tɩ b pa tõe n tall bas-yard ne Wẽnnaam? Naoor wʋsgo, neb kẽer pa wʋmd sabab rãmbã sẽn be wã võor ye. B zãmsa neb wʋsg tɩ yaa Wẽnnaam n kɩt tɩ namsgã beẽ. Yel-beed sã n maane, egliizã taoor dãmb nong n yetame tɩ Wẽnnaam “deega” sẽn ki-bã a nengẽ saasẽ. Sẽn paase, tũudum wʋsg taoor dãmb zãmsda nebã tɩ Wẽnnaam deng n pʋlma yɛl nins fãa sẽn maand dũniyã zugã, baa yel-beedã la tʋʋm-wẽnsã fãa. Na n yɩɩ toog tɩ f sɩd tõog n tall bas-m-yard ne Wẽnnaam sẽn pa tar nimbãan-zoeer woto. A Sʋɩtãan sẽn lut neb nins sẽn pa tẽedã yamã rata ne a sũur fãa n kɩt tɩ zãms-kãensã fãa sẽn yaa ‘zĩn dãmb koeesã’ piuugi.—1 Tɩmote 4:1; 2 Korẽnt dãmba 4:4.
5 A Sʋɩtãan pa rat tɩ nebã tall bas-yard ne a Zeova ye. Wẽnnaam bɛ-kãngã pa rat tɩ d bãng bũmb ning sẽn sɩd kɩt tɩ ãdem-biisã namsdẽ wã ye. La d sã n da zoe n zãmsa Biiblã n bãng namsgã sẽn be wã võore, a Sʋɩtãan na n tʋlgame tɩ d yĩm d sẽn zãmsã. Woto yĩnga, yaa yam bũmb tɩ wakat-wakat bɩ d mi n lebg n ges yel-kãsemsa tãab sẽn kɩt tɩ namsgã be dũniyã zugã. Woto maaneg na n sõng-d lame tɩ d ye tall bas-m-yam tɩ pa a Zeova n wa ne zu-loeesã d sẽn paamd vɩɩmã pʋgẽ wã ye.—Filip rãmba 1:9, 10.
6. Wãn to la 1 Pɩɛɛr 5:8 wilg bũmb a ye sẽn kɩt tɩ kiris-neb hakɩkã namsdẽ wã?
6 Bũmb a ye sẽn kɩt tɩ ninsaalbã namsdẽ yaa t’a Sʋɩtãan baood n na n sãama a Zeova nin-buiidã sẽn tar kɩs-sɩd ne-a wã burkĩndi. A Sʋɩtãan ra makame n na n sãam a Zoob burkĩndã. A Zoob nengẽ wã a pa tõog ye, la a ket n makdame n na n sãam neb a taab burkĩndi. A sẽn yaa dũni kãngã naabã yĩnga, a baooda a Zeova sõgen dãmbã n na n ‘sãame.’ (1 Pɩɛɛr 5:8) Tõnd fãa bee a sẽn dat n sãam-b rãmbã sʋka. A Sʋɩtãan tʋllame tɩ tõnd bas a Zeova balengo. Woto kɩtame t’a mi n wat ne namsgo. La baa yaa nams-toose, d tara bʋʋm n na n ket n talld sũ-mar toogã taoore. D sã n maand woto, d sõngdame n wilgdẽ t’a Sʋɩtãan yagda ziri, tɩ rẽ noogd a Zeova sũuri. (Zoob 2:4; Yelbũna 27:11) A Zeova sã n kõt-d raood tɩ d yalsd kãn-kãe namsgã taoore, bas-yard ning d sẽn tar ne-a wã paasdame.—Yɩɩl Sõamyã 9:10, 11.
7. Galat dãmba 6:7 sõngda tõnd tɩ d bãng tɩ bõe me n wat ne namsgã?
7 D yãta bũmb a yiib-n-soab sẽn kɩt tɩ namsgã beẽ wã no-kãngã pʋgẽ: “Ned sẽn bʋt bumb ninga, yaa bõn-kãng la a na n [kẽebe].” (Galat dãmba 6:7) Nebã mi n bʋtame, b sẽn maand yɛl sẽn pa zemsã, n wa baas n kẽeb bɩ n paam namsg rẽ yĩnga. Ned tõe n yãka yam n na n wẽn a mobil n zoe yaare, tɩ wa wa ne aksɩdã. Neb wʋsg yãkda yam n na n yũ sɩgaare, la woto wat n kõ-b-la sũur bãas wall fulfuud kãnsɛɛre. Neb nins sẽn yoodã wat n namsda b kãadem sẽn sãam yĩnga, b sẽn ye pa nand b mense, bɩ b sẽn paam taoor bãas wall pʋs b sẽn dɩk tɩ pa tũ ne b raabo. Nebã tõe n wa rat n ninga Wẽnnaam taal zu-loe-kaãensã yĩnga, la yaool n yaa sard wẽns nins b sẽn dɩkã biisi.—Yelbũna 19:3.
8. Sã n yaa ne Koɛɛg Soab 9:11, bõe n kɩt tɩ ãdem-biisã namsdẽ?
8 B wilga bũmb a tãab-n-soab sẽn wat ne namsgã Koɛɛg Soaba 9:11 “Mam leb n yãame tɩ dũniyã zug ka, ka neb sẽn zoet tao-tao n tõogd zoees ye, la ka gãndaadã n tõogd zabr ye, la ka yam dãmb n paamd rɩɩb ye, la ka bãngdbã n paamd arzɛgs ye, la ka nin-yẽesems n paamd pẽgr me ye. Tɩ bõe, wakat n be bãmb fãa yĩnga, la zu-beed n be bãmb fãa yĩnga.” Wakat ninga, ned tõe n wa tɩ bee zĩig ning sasa sẽn pa zemse. Baa d keelmã bɩ d pãn-komslmã sẽn yaa soab fãa, namsg bɩ kũum tõe n ling-d lame. Wala makre, a Zezi zamaanẽ wã, gasg n da lʋɩ Zerizalɛm n kʋ neb 18. A Zezi wilgame tɩ pa Wẽnnaam n sɩbg-b woto b sẽn da maan yel-wẽn yĩng ye. (Luk 13:4) Ayo. D pa segd n ning a Zeova taal yel-beed woto buud pʋgẽ ye.
9. Namsgã sẽn be wã wɛɛngẽ, bõe võor la neb wʋsg pa wʋmde?
9 Tõnd sẽn bãng yɛl kẽer sẽn kɩt tɩ namsgã beẽ wã yaa bũmb sẽn tar yõod wʋsgo. La baasg zãnga, yellã neng a ye võor wʋmb n ket n yaa toog ne neb wʋsgo. Rẽ la woto: Bõe yĩng tɩ Wẽnnaam bas tɩ namsgã beẽ?
Bõe yĩng t’a Zeova bas tɩ namsgã beẽ?
10, 11. a) Sã n yaa ne Rom dãmba 8:19-22, bõe n paam ‘bõn-naandsã fãa’? b) Wãn-wãn la d tõe n bãng sẽn kɩt-a tɩ bõn-naandsã fãa lebg faoorã?
10 Lɛtr ning tʋm-tʋmd a Poll sẽn gʋls Rom dãmbã babg a ye n kõt vẽnegr sok-kãngã zugu. A Poll gʋlsame: “Bõn-naandsã fãa me gũuda Wẽnnaam kamba pukr ne datem kãsenga. Tɩ bõe, bõn-naandsã fãa lebga faoore, la ka b mens ratem yĩng ye, yaa sẽn maan-a bãmb tɩ b yɩ woto wã yĩngã. Bãmb yaasdame n gũud tẽeb pidsgu tɩ bãmb me na paam yolsg ne faoolem yembdo n paam pʋɩɩr ne Wẽnnaam kamba b lohorma ne b ziira pʋgẽ. La tõnd miime tɩ bõn-naandsa wẽeda siri n namsd wa pag sẽn dat n dog tɩ ta masã.”—Rom dãmba 8:19-22.
11 Sẽn na yɩl n wʋm verse kãensã võore, d segd n deng n leoka sogs-kãsemse. Wala makre, yaa ãnd n kɩt tɩ bõn-naandsã fãa lebg faoore? Tũudmã karen-saam dãmb kẽer yetame tɩ ya a Sʋɩtãan tɩ kẽer yetẽ tɩ ya a Ãdem. La a Sʋɩtãan bɩ a Ãdem yaool n da pa tõe n maan bõn-kãngã ye. Bõe yĩnga? Bala sẽn kɩt-a tɩ bõn-naandsã fãa lebg faoorã maana woto “saagr yĩnga.” (NW ) N-ye, a kõo saagr tɩ neb nins sẽn na n sak-a wã na n wa ‘paama yolsg ne faoolmã yembdo.’ A Sʋɩtãan bɩ a Ãdem da pa tõe n kõ saag-kãngã ye, sã n pa a Zeova bala. Dẽnd vẽenega, yaa yẽ n kɩt tɩ bõn-naandsã fãa lebg faoorã.
12. ‘Bõn-naandsã fãa’ wã yaa bõe, la bõe n kɩt tɩ d miẽ tɩ yaa woto?
12 La ‘bõn-naandsã fãa’ yell b sẽn gom verse kãensã pʋgẽ wã yaa bõe? Neb kẽer yetame tɩ ‘bõn-naandsã fãa’ wã yaa dũniyã bõn-naands fãa gilli, rũmsã la tɩɩsã sẽn naage. La rẽ yĩnga rũmsã ne tɩɩsã saagdame n na n “paam pʋɩɩr ne Wẽnnaam kambã b lohormã ne b ziira pʋgẽ” bɩ? Ayo. (2 Pɩɛɛr 2:12) Dẽnd ‘bõn-naands fãa’ wã makda ninsaalbã bala. Yaa bõn-naands kãens la kɩɩsg ning sẽn zĩnd Edɛnnã kẽes yel-wẽnã la kũumã pʋgẽ, tɩ rẽ kɩt tɩ b sɩd rat yolsg ne b sũur fãa.—Rom dãmba 5:12.
13. Bõe la kɩɩsg ning sẽn zĩnd Edɛnnã wa ne ninsaalbã zutu?
13 Bõe la kɩɩs-kãngã wa ne takɩ ninsaalbã zutu? A Poll bilga kɩɩs-kãngã sẽn wa ne biis nins takɩ wã ne gom-bi-yend bala: faoolem. * Sebr a ye n wilg tɩ gom-bil ning b sẽn lebg tɩ faoolmã bilgda “teoog sẽn ka yõodo, a sẽn pa tʋmd wa b sẽn da naan-a t’a tʋm to-to wã yĩnga.” B ra naana ninsaalbã tɩ b vɩɩmd wakat sẽn kõn sa yĩnga, n naag taab wa zak a ye sẽn zems zãng neb n ges arzãnã yelle. La wall tɩ yɩ woto wã, b vɩɩmã lebga koɛɛg la toogo, n pid ne sũ-sãamse. Wala a Zoob sẽn yeela bal kɛpɩ, “ninsaal pag sẽn doga vɩɩm yaa koɛɛga, la toogo.” (Zoob 14:1) Woto sɩd yaa faoore!
14, 15. a) Bõe n wilgd vẽeneg t’a Zeova sẽn kao ninsaalbã bʋʋd to-to wã zemsame? b) Bõe yĩng t’a Poll yeel tɩ ‘bõn-naandsã’ sẽn lebg faoorã ‘ka b mens ratem yĩnga’?
14 Masã d taa sokr ning sẽn yaa kãseng n yɩɩdã menga: Bõe yĩng tɩ ‘dũniyã fãa bʋ-kaood’ bas tɩ ãdem-biisã vɩɩm pid ne toog la sũ-sãams woto? (Sɩngre 18:25) Rẽ yĩnga, a sẽn maan woto wã segdame bɩ? Tẽeg-y bũmb ning tõnd pipi yaab rãmbã sẽn da maana. B sẽn kɩɩs Wẽnnaamã, b naaga a Sʋɩtãan n kɩɩs a Zeova naam sẽn ka to wã ne kɩɩsg sẽn yaa kãsenga. Ne b tʋʋmã, b wilgame tɩ b saka tagsg ning sẽn yaa tɩ ninsaal sã n bas a Zeova n na n soog a meng n sak a Sʋɩtãan sor-wilgri, a vɩɩmã na n yɩɩ sõma n yɩɩgã. A Zeova sẽn kao kɩɩsdbã bʋʋdã, yaa bũmb ning b sẽn da kosã bal la a kõ-ba. A kõo ninsaal sor t’a soog-a meng t’a Sʋɩtãan dɩ naam a zugu. Yel-kãensã pʋgẽ, ra sɩd zemsame t’a bas tɩ ninsaalbã fãa lebg faoore, la yaa ne saagr yĩnga.
15 Yaa sɩd tɩ bõn-kãngã pa bõn-naandsã “mens ratem yĩng ye.” Tõnd roga yel-wẽnã la bõn-wẽns nins rẽ sẽn wa ne wã pʋgẽ tɩ pa tũ ne d yam ye. La a Zeova zoeya a Ãdem ne a Hawa nimbãaneg n bas tɩ b vɩɩmd bilf n tõog n dog kamba. Baa ne b sẽn kẽes tõnd sẽn ya b yagensã yel-wẽnã la kũumã faoolem pʋgẽ wã, d tõeeme n maan bũmb ning a Ãdem ne a Hawa sẽn pa maanã. Tõnd tõe n kelga a Zeova n bãng t’a naam sẽn ka to wã yaa tɩrg n zems zãnga, la tɩ ninsaal sã n bas a Zeova n soog a menga, wata ne toogo, sũ-sãams la faoolem bala. (Zeremi 10:23; Wilgri 4:11) Sẽn paase, a Sʋɩtãan pãn-tusdgã yĩng kɩtame tɩ yɛlã lebg toog wʋsg n paase. Yɛl sẽn maan ninsaalbã sʋk b sẽn be tẽng zugã tɛkã wilgda vẽeneg tɩ sɩd yaa woto bal kɛpɩ.—Koɛɛg Soaba 8:9.
16. a) Bõe yĩng tɩ d tõe n kɩs sɩd tɩ pa a Zeova n wa ne namsg ning d sẽn ne dũniyã zug rũndã-rũndã wã? b) Saag-bʋg la a Zeova kõ ãdem-biis nins sẽn yaa sakdbã ne nonglem?
16 Yaa vẽeneg t’a Zeova sɩd tara bʋʋm n na n kɩt tɩ bõn-naandsã fãa lebg faoore. La woto rat n yeelame tɩ faoolmã la toogã sẽn namsd tõnd fãa rũndã-rũndã wã ya a Zeova yell bɩ? Mak-y yel-kãngã ne bʋ-kaood sẽn na n kao nin-wẽng bʋʋd tɩ zemse. Nin-wẽngã tõe n wa namsda hal wʋsg b sẽn kõ-a sɩbgr ningã yĩnga. La rẽ yĩnga, a tara bʋʋm n na n ning bʋ-kaoodã taal tɩ yẽ n yɩ sabab t’a wa namsd woto bɩ? Yaa vẽeneg t’a ka bʋʋm n yet woto ye. Sẽn paase, wẽnga pʋd n pa yit a Zeova nengẽ ye. Zak 1:13 yetame: “Bũmb ka tõe n mak Wẽnnaam [t’a] maan wẽng ye, la Wẽnnaam menga ka makd ned ba a ye t’a maan wẽng ye.” D leb n tẽeg me t’a Zeova bʋ-kaoorã yaa ‘saagr yĩnga.’ Ne nonglem, a maana segls sẽn na yɩl t’a Ãdem ne a Hawa yagens nins sẽn na n yɩ sakdbã wa tõog n yi faoolmã pʋgẽ “n paam pʋɩɩr ne Wẽnnaam kamba b lohorma ne b ziira pʋgẽ.” Wakat fãa yĩnga, ãdem-biis nins fãa sẽn yaa sakdbã pa na n le yɛɛs tɩ bõn-naandsã fãa na n le wa kẽ faoolem pʋgẽ ye. A Zeova sẽn dɩk na-kẽndr ning n na n maneg yɛlã na n wilga a naam sẽn ka-to wã zemsg wakat fãa yĩnga.—Ezai 25:8.
17. Wãn-wãn la d sẽn lebg n tẽeg bũmb nins sẽn kɩt tɩ namsgã be rũndã-rũndã wã na n tall yõod ne-do?
17 D sẽn lebg n tẽeg bũmb nins sẽn kɩt tɩ ãdem-biisã namsdẽ wã, rẽ yĩnga y tara bʋʋm n tõe n ning a Zeova taal wẽngã sẽn be wã yĩnga, bɩ n pa na n tall bas-yard ne-a bɩ? Ayo, zãms-kãngã kɩtame tɩ d tõe n lebs n dɩk a Moiiz gom-kãensã: “Bãmb yaa kugri. Bãmb tʋʋma zemsa zãnga. Bãmb soɛya fãa yaa tɩrse. Bãmb yaa Wẽnnaam sẽn maand sɩda n ka maand wẽng ye. Bãmb yaa sõngo la tɩrga.” (Tõodo 32:4) D mi n bʋgsd gom-kãensã zutu, n lebg n ges wãn to la tõnd meng tõe n leok sogs-kãensã d toore. Woto na n kɩtame tɩ d sã n wa be makr taoor fãa, bɩ d modg t’a Sʋɩtãan da wa kẽes-d sãmbs pʋgẽ ye. La bũmb a yiib-n-soabã yell d sẽn gom sɩngrẽ wã yaa bʋgo? A Zeova rellg baooda bõe maanego?
Rell a Zeova sẽn dat n yɛɛlga
18, 19. Ne gom-bʋs la Biiblã sagend tõnd tɩ d rell a Zeova, la rẽ wɛɛngẽ tags-bʋs sẽn pa zems la neb kẽer tara?
18 Wẽnnaam Gomdã sagenda tõnd woto: “Teeg Zusoaba ne f sũur fãa la f ra teeg f meng bãngr ye. Fo sẽn maand bũmb ninga fãa, bɩ f tẽeg Zusoaba yelle, la b na n demsa fo sorã.” (Yelbũna 3:5, 6) Woto yaa goam sẽn be yamleoog la sẽn kõt bas-m-yam. Vẽenega, ãndũniyã fãa pʋgẽ, ned ka be sẽn zems ne teegr n yɩɩd d saasẽ Ba-nõngrã ye. Baasgo, gom-kãensã kareng yaa nana Yel-bũnã sebr pʋgẽ, la b tũubã tõe n yɩɩ toogo.
19 Neb wʋsg tara tagsg sẽn pa zems a Zeova rellg sẽn dat n yɛɛlgã zugu. Kẽer tagsdame tɩ rẽ yaa sũ-noog sẽn tiigd n kẽ f sũurẽ woto bala. Sãnda me tẽedame tɩ d sã n dell a Zeova, a kogend-d-la ne yell buud fãa, la a welgd d zu-loeesã, tɩ d sã n paam yel-pakr buud fãa bɩ a manegd-a zĩig pʋgẽ. La tags-kãensã fãa pa zems ye. Bas-yardã pa yĩn-sidg yɛl bal ye, a yaa bũmb sẽn tar tikri. Teegr baoodame tɩ f tags neer la f yaool n dɩk sardo.
20, 21. A Zeova rellgã baooda bõe maanego? Kõ-y makre.
20 D ye ges Yelbũna 3:5 sẽn yet bũmb ningã. A yetame tɩ d rell a Zeova la d ra teeg d meng bãngre, tɩ wilgdẽ tɩ d pa tõe n lagem yɛl a yiibã taab ye. La woto rat n yeelame tɩ d pa segd n tʋm ne d bãngrã bɩ? Ayo. A Zeova sẽn kõ-d tõog tɩ d tõe n wʋm yɛlã võorã, a gũudame tɩ d tʋm ne tõog kãng a balengã pʋgẽ. (Rom dãmba 12:1) La d sã n wa yãkd yam n na n maan bũmbu, bõe zug la d tikda? Tõnd tagsgã sã n wa pa zems ne a Zeova tagsgã, d sakd n deegame t’a Zeova tagsgã n zemse, bala a yɩɩda tõnd tagsgã hal zĩig sẽn zãr bɩ? (Ezai 55:8, 9) Rell a Zeova rat n yeelame tɩ d tũ a tagsgã.
21 D rɩk makr ne wala biig sẽn na n be mobill pʋgẽ ne a roagdba. A zĩi poorẽ t’a roagdba be taoore, t’a ba wã wẽnd mobillã. B kẽndã pʋgẽ tɩ sãmb-sãmb sã n wa be sor ning b sẽn dɩkã wɛɛngẽ, walla saag bɩ sebg sã n wa bɩ yaa sorã n pa sõma, manesem bʋg la biig sẽn sakd la a teegd a roagdb na n tall yɛl a woto taoore? Rẽ yĩnga, a na n bee poorẽ wã n tãsd a ba wã n wilgd-a a sẽn segd n wẽn mobillã to-to bɩ? A na n kɩɩsa a roagdbã sẽn dɩk sard ningã, bɩ b sã n yeel-a t’a sẽbg a sẽntiirã sõma n kell n pa a zĩigẽ wã a na n tõdgame? Ayo. Vẽenega, baa ne a roagdbã sẽn pa zems zãngã, a na n basame tɩ b welg yel-kãensã. A Zeova yaool n yaa tõnd Ba sẽn zems zãnga. Rẽ yĩnga, d pa segd n dell-a zãng-zãnga, sẽn yɩɩd fãa d sã n wa maood ne zu-loee-kãsems sɩda?—Ezai 30:21.
22, 23. a) Bõe yĩng tɩ d segd n dell a Zeova d sã n wa be yɛl taoore, la wan to la d tõe n maan woto? b) Bõe yell la d na n gom sõsg sẽn pʋgdã pʋgẽ?
22 Baasg zãnga, Yelbũna 3:6 wilgdame tɩ d segd n teega a Zeova d ‘sẽn maand bũmb ning fãa pʋgẽ,’ la pa d sẽn wat n maood ne zu-loees sasa bal ye. Woto yĩnga, sard nins d sẽn dɩkd daar fãa wã segd n wilgdame tɩ d sɩd rella a Zeova. Zu-loees sã n wa wa, d pa segd n yɛɛs n pa tall bas-yard ne a Zeova, bɩ n tõdg a sor-wilgrã sã n yaa ne b sẽn segd n welg yɛlã sõma to-to wã ye. D segd n gesa makrã sẽn watã wala bũmb d sẽn tõe n tũnug ne n teel a Zeova naam sẽn ka to wã n wilg t’a Sʋɩtãan yagda zɩri, la sẽn na yɩl n mao n paas d sakrã, la d bɩɩs zʋg-sõma a taab sẽn noogd a Zeova sũuri.—Hebre dãmba 5:7, 8.
23 Sẽn yaa gɩdgr ning fãa taoore, d tõe n wilgame tɩ d rella a Zeova. D sẽn pʋʋsd-a la d baood a Gomdã la a siglgã sor-wilgr yella taoorã, d wilgdame tɩ d rell-a lame. Sẽn tɩ yɩɩd fãa, yaa wãn-wãn la d tõe n wilg tɩ d sɩd rella a Zeova, d sã n wa maood ne rũndã-rũndã vɩɩmã zu-loeese? D sõsg ning sẽn pʋgdã na n goma rẽ yelle.
[Tẽngr note]
^ sull 13 Gɛrk gom-biig ning sẽn yaa “faoolem” t’a Poll tũnug ne wã võor ya a ye ne gom-biig ning a Salomõ sẽn tũnug ne naoor ka tɛk Koɛɛg Soab sebrã sẽn be Gɛrk Sɛptãntã pʋgẽ wã, n yet woto wã: “Fãa yaa zaalem!”—Koɛɛg Soaba 1:2, 14; 2:11, 17; 3:19; 12:8.
Wãn to la y na n leokẽ?
• Wãn-wãn la a Davɩɩd wilg t’a rella a Zeova?
• Yɛl a tãab bʋs yĩng n kɩt tɩ ãdem-biisã namsd rũndã-rũndã wã, la bõe yĩng tɩ yaa sõma tɩ d mi n tẽegd rẽ yelle?
• Wãn to la a Zeova kao ninsaalbã bʋʋdo, la bõe yĩng tɩ woto zemse?
• A Zeova rellg baooda bõe maanego?
[Zãmsgã sogsgã]
[Foto, seb-neng 23]
A Davɩɩd da rella a Zeova