Tõnd na n kẽna a Zeova yʋʋr yĩng wakat fãa!
Tõnd na n kẽna a Zeova yʋʋr yĩng wakat fãa!
“Tõnd na n kẽna a Zeova tõnd Wẽnnaamã yʋʋr yĩng wakat sẽn pa yãk tɛka, n-ye wakat fãa.”—MIISE 4:5, NW.
1. Koe-bʋs n be Miise sak a 3 n tɩ ta a 5 pʋgẽ?
A ZEOVA tara koɛɛg n na n taas a nin-buiidã, la a tũnuga ne a no-rɛɛs a Miise n taas-ba. Wẽnnaam yãka raab sẽn ya a yik n zab ne wẽng maandbã. A na n sɩbga Israɛlle, a sẽn kɩɩsd sɩdã yĩnga. La zu-noogo, a Zeova na n ninga neb nins sẽn kẽnd a yʋʋr yĩngã barka. Koe-kãens yaa vẽenes a Miise bãngr-gomdã sak a 3 n tɩ ta a 5 pʋgẽ.
2, 3. a) Israɛll taoor dãmbã ra segd n bao n yɩɩ nin-bʋs buudu, la yaa bõe la b maanda? b) Wãn to la y na n wilg makr goam nins b sẽn tũnug ne Miise 3:2, 3 pʋgẽ wã võore?
2 Wẽnnaam no-rɛɛsã togsdame: “A Zakoob yagensa nanambse, Israɛll kãsem dãmba, kelg-y-yã! Yãmb tog n bãnga tɩrlem.” N-ye, yaa woto la b segd n maane, la yaa bõe la b sɩd maanda? A Miise yetame: “Yãmb kisa sõama n nong wẽnga. Yãmb sɩɩ m neba vɩɩse n yiis b nemd n bas b kõabã. Yãmb wãba m nebã. Yãmb sɩɩ bãmb n kao b kõaba. Yãmb wãa bãmb wa nemd sẽn na n dʋg rʋk pʋgẽ.”—Miise 3:1-3.
3 Ges-y koe, taoor dãmbã wẽgda naong rãmbã, sẽn pa tar-b sõngdã! Makr goam nins b sẽn tũnug ne ka wã yaa bũmb neb nins sẽn kelgd a Miise wã sẽn wʋmd a võor nana-nana. B sã n kodg pesg n na n dʋge, b rengd n sɩɩg-a lame n yaool n pas-a. Wakat ninga, b kaooda kõbã n yiis sɩɩlmã. B rʋgda nemdã ne kõba fãa rʋg-bedr pʋgẽ, wala a soab ning yell a Miise sẽn goma. (Ezekɩɛll 24:3-5, 10) Ad woto sɩd yaa bilgr sẽn zems ne taoor dãmb wẽnsã sẽn da namsd nin-buiidã a Miise wakatã!
A Zeova baoodame tɩ d maan sẽn yaa tɩrga
4. Welg-kãseng bʋg n be a Zeova ne Israɛll taoor dãmbã sʋka?
4 Welg-kãseng n be a Zeova sẽn yaa Pekɩɩm sẽn tar nonglmã, la Israɛll taoor dãmbã sʋka. B sẽn pa maan sẽn yaa tɩrgã yĩnga, b pa tõog n pids b tʋʋmd ning sẽn yaa kogl bãgrã ye. Sẽn yaa lebende, b baooda b mens nafr n wẽgd tẽebã wɛɛngẽ piisã, n pa maand sẽn yaa tɩrg ne-ba, n ‘maand-b wẽng n daagd b zɩɩm’ wala a Miise 3:10 sẽn wilgã. Bõe la yel-kãngã tõe n zãms tõndo?
5. Bõe la a Zeova baood neb nins sẽn lʋɩt taoor a nin-buiidã sʋkã nengẽ?
5 Wẽnnaam baoodame tɩ sẽn lʋɩt-b taoor a nin-buiidã sʋkã maan sẽn yaa tɩrga. Yaa rẽ la d ne a Zeova sõgen dãmbã nengẽ rũndã-rũndã. Sẽn paase, woto zemsa ne Ezai 32:1, sẽn yet tɩ: “Dẽ, dĩma na n dɩɩ naam ne tɩrlem, la kom-bɛɛmba na n sooga soolma ne zemsgo.” La bõe la d ne a Miise wakatã? Neb nins ‘sẽn kis sõma la sẽn nong wẽngã’ da ket n kaooda bʋʋdã kɛgre.
Ãnd dãmb pʋʋsg la Wẽnnaam dɛɛgda?
6, 7. Bõn-kãseng bʋg la b wilg Miise 3:4 pʋgẽ?
6 A Miise wakatẽ nin-wẽnsã ra tõe n saagame tɩ b na n paama a Zeova lohorem bɩ? Yaa vẽeneg tɩ yaa ayo! Miise 3:4 yetame: “La bãmb na n boola [a Zeova], la b ka na n leok-b ye. Baraare, Zusoaba na n solga b neng ne bãmba, bãmb sẽn maan wẽng woto wã yĩnga.” Woto wilgda bõn-kãsenga.
7 Tõnd sã n maand yel-wẽna, a Zeova pa na n deeg d pʋʋsg ye. Sɩd-sɩda na n yɩɩ woto, tõnd sã n solgd n maand yel-wẽnã, n yaool n maand wa d tũuda Wẽnnaam ne kɩs-sɩda. Sã n yaa ne Yɩɩl Sõamyã 26:4, a Davɩɩd yɩɩla woto: “Mam ka zĩnded ne nin-yaals ye, la mam ka tũud zãmb dãmba me ye.” A Zeova pa na n deeg neb nins sẽn kɩɩsd a Gomdã ne yamleoogã pʋʋsg me ye.
Wẽnnaam vʋʋsem sõngã kõ-b-la pãnga
8. B keooga a Miise wakatẽ ziri no-rɛɛsdbã tɩ bõe n na n paam-ba?
8 Ad sɩd ra yaa tʋʋm-wẽns meng n da wɛ Israɛll tũudum taoor lʋɩtbã sʋka! Ziri no-rɛɛsdbã kɩtame tɩ Wẽnnaam nin-buiidã bʋdg tẽebã wɛɛngẽ. Taoor dãmb nins sẽn yaa bũmb kõn sɛk-m dãmbã ra yetame tɩ “laafɩ” na n zĩndame, la neb nins fãa sẽn pa kõt-b rɩɩbã, b yetame tɩ b na n wa zaba ne-ba. Rẽ n so t’a Zeova yeele: “Yãmb sẽn maan woto wã yĩnga, yãmb ka na n paam yʋng bõn-makr ye. Yãmb na n zĩnda lik pʋgẽ; la yãmb ka na n paam bãngr-goam ye. Wĩndga na n kẽeme n bas bãngdb kãens lik pʋgẽ. Bãngdba na n paama paoogre. Yãnd na n yõka poeesã. Bãmb na n [luda b no-kõbdo].”—Miise 3:5-7a.
9, 10. ‘No-kõbdã ludb’ võor da yaa bõe, la bõe yĩng t’a Miise ra pa baood n na n maan woto?
9 Bõe yĩng tɩ b ‘lut b no-kõbdo’? Woto yaa bũmb a Miise wakatẽ nebã sẽn maande, yãndã sẽn tar-bã yĩnga. La yãnd sɩd segd n yõka nin-wẽns kãensã. ‘Wẽnnaam ka leok’ nin-wẽnsã ye. (Miise 3:7b) A Zeova pa kelgd nin-wẽnsã sẽn yaa wuk-m-mens rãmbã pʋʋsg ye.
10 A Miise pa baood n na n ‘solg a no-kõbd’ ye. Yãnd pa tar-a ye. A Zeova reegda a pʋʋsgo. No-rɛɛsã sẽn yaa sakdã yeta woto Miise 3:8 pʋgẽ: “La [a Zeova vʋʋsem sõngã] kõo maam pãng ne tɩrlem la raood[o].” A Miise ra tara mi-beoog wʋsgo, bala a sẽn tʋm a no-reesemdã tʋʋmd ne kɩs-sɩd tɩ kaoosã fãa sasa, ‘a Zeova vʋʋsem sõngã kõ-a-la pãnga’! Rẽ kõ-a-la pãng t’a tõog n ‘wilg a Zakoob yagensa b yel-wẽna la a wilg Israɛll neba b kongrã.’
11. Wãn to la ninsaalbã paamd pãng n moond Wẽnnaam koeesã?
11 A Miise rata pãng sẽn yɩɩd ninsaal pãnga, sẽn na yɩl n tõog n moon Wẽnnaam bʋ-kaoorã koɛɛga. A Zeova vʋʋsem sõngã bɩ a pãngã ra yaa tɩlae ne-a. Yaa wãn to ne tõndo? Tõnd tõe n moona koɛɛgã, a Zeova sã n kõ-d a vʋʋsem sõngã tɩ kõ-d pãng bala. Tõnd sã n dat n moon la d yaool n maand yel-wẽnã ne yamleoogo, yaa vẽeneg tɩ d moonegã na n yɩɩ zaalem, bala Wẽnnaam pa tõe n leok tõnd pʋʋsgã n kõ-d pãng tɩ d tʋm tʋʋm kãngã ye. Sɩd-sɩda, d pa tõe n togs d saasẽ Ba wã bʋ-kaoor koeese, d sã n pa tar ‘a Zeova vʋʋsem sõngã’ ye. Wẽnnaam sã n kelg d pʋʋsgã n kõ-d vʋʋsem sõngã, d tõe n moona Wẽnnaam koɛɛgã ne raood wala a Miise.
12. Bõe yĩng t’a Zezi pipi karen-biisã ra tõe n ket n ‘togsd Wẽnnaam koɛɛgã ne raoodo’?
12 Tõe tɩ y tẽra kɩbar ning sẽn be Tʋʋma 4:23-31 pʋgẽ wã. Mams-y n ges yãmb sẽn da na n bee a Zezi pipi karen-biisã sʋka, tɩ nin-toos rat tɩ Kirist karen-biisã bas koɛɛgã moonego. La wẽn-sakdb kãensã pʋʋsa b Soaalã sẽn yaa Naab sẽn ka to wã n yeele: “[Zeova], kelg-y bãmb zabr goama, la y kõ yãmb tʋm-tʋmdba raood kãsenga tɩ b togs yãmb koɛɛgã.” B sẽn pʋʋsã la zĩig ning b sẽn da tigmã sẽn dĩmsi, tɩ b fãa pid ne vʋʋsem sõng n moond Wẽnnaam koɛɛgã ne raoodo. Woto yĩnga, bɩ tõnd me pʋʋs n kos a Zeova sõngr la d teeg-a t’a kõ-d a vʋʋsem sõngã tɩ d moon koɛɛgã.
13. Bõe n da gũud Zerizalɛm la Samari, la bõe yĩnga?
13 D ye leb a Miise wakatẽ wã. Sã n yaa ne Miise 3:9-12, nanambsã sẽn yaa zɩɩm daagdbã ra bʋʋda bʋʋd n deegd kũuni, tɩ maan-kʋʋdbã ra zãmsd nebã yaood yĩnga, tɩ ziri no-rɛɛsdbã ra bʋgd bagr ligd yĩnga. Pa lingr la Wẽnnaam sẽn yeel tɩ Zida na-tẽngã sẽn yaa Zerizalɛmã “na n lebga kug-rʋya” ye! Sẽn mik tɩ ziri balengã la wẽngã maaneg ra bee zĩig fãa Israɛll me pʋgẽ wã yĩngã, a Miise paama vʋʋsem sõng vẽnegr n keoog nebã tɩ Wẽnnaam na n kɩtame tɩ Samari lebg ‘kug dʋre.’ (Miise 1:6) No-rɛɛsã meng ra ket n vɩɩ wakat ning Asiri tãb-biisã sẽn wa yʋʋmd 740 sẽn deng Kirist zãmaanã n sãam Samari wã, n maan kaset ne a sẽn da reng n togsã pidsgu. (2 Rĩm dãmba 17:5, 6; 25:1-21) Yaa vẽeneg tɩ b ra pa tõe n taas koe-kãensã sẽn tar pãng b sẽn togs Zerizalɛm la Samari zutã tɩ sã n da pa ne a Zeova pãng ye.
14. Wãn to la bãngr-gomd ning b sẽn gʋls Miise 3:12 pʋgẽ wã paam pidsgu, la rẽ segd n kɩtame tɩ d kɩs sɩd ne bõe?
14 Sɩd-sɩda, Zida pa tõe n põs a Zeova bʋ-kaoorã ye. Siõ na n ‘lebga wa pʋʋg sẽn tar kaalem’ tɩ pids bãngr-gomd ning sẽn be Miise 3:12 pʋgẽ wã. Tõnd mii rũndã-rũndã tɩ bõn-kãensã zĩnda sasa ning Babilon nebã sẽn wa n sãam Zida la Zerizalɛm yʋʋmd 607 sẽn deng Kirist zãmaanã. Yaa a Miise sẽn togs a bãngr-gomdã sẽn yɩɩd yʋʋm koabg poor la rẽnda zĩnd-yã. A Miise ra kɩsa sɩd tɩ ra yaa bũmb sẽn wate. Tõnd me segd n kɩsa sɩd tɩ zãmaan-wẽng kãngã na n saa ‘a Zeova daarã’ b sẽn pĩnd n togsã sasa.—2 Pɩɛɛr 3:11, 12.
A Zeova remsda yɛlã
15. Kʋms-y bãngr-gomd ning sẽn gʋls tɩ be Miise 4:1-4 pʋgẽ wã ne y meng goamã.
15 D leb n ges d sẽn gom tɩ loogã. Rẽ poore, a Miise taasda saagr koɛɛg sẽn be yamleoogo. Ad sɩd yaa goam sẽn kengd raood la d yãt Miise 4:1-4 pʋgẽ! A Miise yeta woto: “Wakat watame tɩ [a Zeova] rooga tãng na n zẽk n yɩɩg tãensa fãa. La buud wʋsg na n maga taab n kẽng be. . . . Bãmb n na n yɩ buud wʋsg bʋ-kaooda. Bãmb na n [demsa yɛlã sẽn tɩ loe ne, NW ] bu-kãsems sẽn zãr ne Israɛll sʋka. Neba na n dɩka b sʋʋsã n kud wãgse, la b rɩk b kãna n kud goeto. Buud ka na n le zẽk sʋʋg ne buud a to ye, la b ka na n le zãms zabr yɛs ye. La ned kam fãa na n zĩnda a viyn tɩɩg ne a kankang tẽngr tɩ ned ka yɛɛs-b ye. Yaa Saasẽ-pãng-soabã n yeele.”
16, 17. Wãn to la Miise 4:1-4 paamd pidsg rũndã-rũndã?
16 Ãnd dãmb la “buud wʋsg” la ‘bu-kãsemsã’ yell b sẽn gom ka wã? Pa dũni kãngã tẽnsã la a goosneema rãmbã ye. Ka wã, bãngr-gomdã tɩ loee ne neb sẽn yit tẽnsã fãa pʋsẽ, n lagem taab n tʋmd a Zeova tʋʋmã, a baleng hakɩkã tãng zugu.
17 Wa sẽn zems ne a Miise bãngr-gomdã, nebã na n tũu a Zeova balengã sẽn yaa yɩlemdã, la na n sɩd yɩɩ tẽngã gill zugu. Rũndã-rũndã, neb nins “sẽn tar yam-sõng vɩɩm sẽn-kõn-sa wã yĩngã” paamda zãmsg a Zeova soayã pʋsẽ. (Tʋʋmã 13:48, NW ) A Zeova kaooda bʋʋd la a remsd yɛlã tẽebã wɛɛngẽ n sõngd tẽedb nins sẽn yãkd n na n zĩnd a Rĩungã poorẽ wã. B na n zĩnda ‘kʋʋn-kãsengã’ sʋk n põs ‘to-kãsengã’ sasa. (Wilgri 7:9, 14) B sẽn dɩk b sʋʋsã n kud wãgsã yĩnga, baa masã menga, a Zeova Kaset rãmbã tara laafɩ ne taaba, la ne neb a taabã me. Ad d sũy sɩd yaa noog d sẽn be b sʋkã!
B rat n kẽna a Zeova yʋʋr yĩng ne b sũy fãa
18. Bõe la ‘zĩnd f meng viyn la f kankang tẽngr’ makda?
18 Tõnd wakatã sẽn yaa sasa ning rabeem wʋsg sẽn tar dũniyã nebã, d sũy yaa noogo, neb wʋsg sẽn zãmsd a Zeova soayã yĩnga. D gũuda wakat ning sẽn na n wa ka la bilfu, tɩ sẽn nong-b Wẽnnaamã fãa pa na n le zãms zabrã, n na n zĩ b mens viyn tɩɩs la b kankams tẽngrã. Naoor wʋsgo, b senda kankams viyn pʋtẽ. (Luk 13:6) Zĩnd f meng viyn la f kankang tẽngr makda laafɩ, arzɛk la bãane. Baa masã menga, tõnd sẽn tar zems-n-taar ne a Zeova wã kɩtame tɩ d yamã gãe bãane, la d tar tẽeb bãane. Rĩungã naam wakate, yɛlã sẽn na n yɩ woto wã, d pa na n yɛɛs ye, la d na n paama bãan zãng-zãnga.
19. Kẽn a Zeova yʋʋr yĩng rat n yeelame tɩ bõe?
19 Sẽn na yɩl n ta Wẽnnaam yam la d paam a barka, d segd n kẽna a Zeova yʋʋr yĩnga. B wilga rẽ ne manesem sẽn tar pãng Miise 4:5 (NW ) pʋgẽ. Be no-rɛɛsã yetame tɩ: “Sã n yaa ne buuda fãa, bãmb ned kam fãa na n kẽna a wẽnnaam yʋʋr yĩnga, la tõndo, tõnd na n kẽna a Zeova tõnd Wẽnnaam yʋʋrã yĩnga wakat sẽn pa yãk tɛka, n-ye wakat fãa.” Kẽn a Zeova yʋʋr yĩng pa d sẽn na n yetẽ bal t’a yaa tõnd Wẽnnaam ye. Pa tõnd sẽn na n kẽnd d tigissã la d moond Rĩungã bal ye, baa tʋʋm-kãensã me sẽn tar yõod wʋsgã. Tõnd sã n kẽnd a Zeova yʋʋr yĩnga, d rɩkda d meng n kõ-a n modgd n maand a raabã wakat fãa d sẽn nong-a ne d sũurã fãa wã yĩnga. (Matɩe 22:37) La d sẽn ya a balemdbã, sɩd-sɩda, d rɩkda sard sẽn pa vigsd n na n kẽn a Zeova tõnd Wẽnnaamã yʋʋr yĩng wakat sẽn pa sata.
20. Bõe la b reng n togs Miise 4:6-13 pʋgẽ?
20 D ges bãngr-gomd ning sẽn be Miise 4:6-13 pʋgẽ wã masã. “Siõ bipuglã” (NW ) ra segd n kẽnga yembd “hal Babilon.” Yaa woto bal kɛpɩ n paam Zerizalɛm nebã yʋʋm kob-gĩnd a yopoe soab sẽn deng Kirist zãmaanã. Baasg zãnga, a Miise bãngr-gomdã wilgdame tɩ kell n da segd n leb Zida, la tɩ Siõ sã n wa lebs n lugli, a Zeova na n kɩtame tɩ Siõ bɛɛbã menem zãnga.
21, 22. Wãn to la Miise 5:1 pids-yã?
21 Yel-kãsems a taab waoong la b reng n togs Miise sak a 5 pʋgẽ. Wala makre, ges-y b sẽn yeel bũmb ning Miise 5:1-3 pʋgẽ wã. A Miise togsa bãngr-goam n wilg tɩ Naab ning Wẽnnaam sẽn yãk ‘hal kʋdemd wakatã’ na n yii Bɛtlehɛm. A na n dɩɩ naam n yɩ wa pe-kɩɩm ‘ne a Zeova pãnga.’ Sẽn paase, Na-kãng na n yɩɩ kãsenga, pa Israɛll tẽngẽ wã bal ye, la yaa “dũniyã tɛk fãa.” Dũniyã neb tõe n sãmbda a sẽn ya a soaba, la sã n yaa ne tõndo, a pa bũmb sẽn solg ye.
22 Ãnd n yɩ nin-kãseng sẽn ka to sẽn dog Bɛtlehɛm? Ãnd la b na n ‘waoog dũniyã tɛk fãa’? Pa ned a to n zʋʋg Mesi a Zezi Kirist ye! A Herood le Gãrã sẽn sok maan-kʋʋdbã kãsem dãmba la gʋlsdbã zĩig ning Mesi wã sẽn da segd n dogẽ wã, b leokame: “Zida Bɛtlehɛm.” B pʋd n lebs n togsa goam nins sẽn yit Miise 5:1 pʋgẽ wã. (Matɩe 2:3-6) Nin-buiidã sʋka, neb kẽer me n da mi rẽ, bala Zã 7:42 wilgdame tɩ b yeela woto: “Gʋlsg Sõng ka yeel tɩ Kirist na n yɩɩ a Davɩɩd yagenga, la tɩ b na n yii tẽng sẽn boond tɩ Bɛtlehɛm, a Davɩɩd sẽn da be zĩig ninga la?”
Yolsg hakɩk n kõ nebã
23. Bõe n maand masã tɩ pidsd Miise 5:6?
23 Miise 5:4-14 gomda Asiiri sẽn na n zab n tõog t’a tõogrã na n kaoos wakat bilf bala yelle, la a wilgdẽ tɩ Wẽnnaam na n doka a sũur ne buud nins sẽn pa sak-a wã. Miise 5:6 pʋgẽ, b kãaba Zʋɩf rãmba kell ning sẽn tek yam n kos sugrã tɩ b na n leba b ba-yirã, la gom-kãensã pidsda rũndã-rũndã me. A Miise togsame: “A Zakoob yagensa sẽn keta na n yɩɩ wa [a Zeova] meenem, la wa saag sẽn niid mood zut buud wʋsg sʋka.” B tũnuga ne makr gom-kãngã sẽn yaa sõma wã n deng n togs tɩ tẽeb Zakoobã bɩ Israɛllã kell na n yɩɩ bark sẽn yit Wẽnnaam nengẽ n kõ nebã. Yaa ne sũ-noog la a Zezi ‘piis a taabã’ sẽn tar saagr n na n vɩɩmd tẽng zugã lagemd “Israɛll sẽn yaa Wẽnnaam dẽnda” sẽn be rũndã-rũndã wã, n sõngd n kõt neb a taabã yolsg tẽebã wɛɛngẽ. (Zã 10:16; Galat dãmba 6:16; Sofoni 3:9) Rẽ wɛɛngẽ, bõn-kãseng n be d sẽn segd n tags a zugu. D sẽn yaa Rĩungã koe-moondbã, d fãa segd n nonga zu-noog ning d sẽn tar n kõt neb a taabã yolsg hakɩkã.
24. Yel-bʋs sẽn yit Miise sak a 3 n tɩ ta 5 pʋgẽ n kẽ yãmb sũyã sõma?
24 Bõe la y zãms a Miise bãngr-gomdã sak a 3 n tɩ ta a 5 pʋgẽ? Tõe tɩ yaa bõn-kãensã: 1) Wẽnnaam baoodame tɩ neb nins sẽn lʋɩt taoor a nin-buiidã sʋkã maan sẽn yaa tɩrga. 2) Tõnd sã n maand yel-wẽnã ne yamleoogo, a Zeova pa na n deeg d pʋʋsgã ye. 3) Tõnd pa tõe n moon koɛɛgã, Wẽnnaam sã n pa kõ-d a vʋʋsem sõngã tɩ kõ-d pãng ye. 4) Sẽn na yɩl n ta Wẽnnaam yam, rẽnda d kẽn a Zeova yʋʋr yĩnga. 5) Tõnd sẽn yaa Rĩungã koe-moondbã, d segd n nonga zu-noog ning d sẽn tar n kõt nebã yolsg hakɩkã. Tõe tɩ yɛl a taab n kẽ yãmb sũyã sõma. Bõe me la d tõe n zãms Biiblã seb-kãngã sẽn taasd bãngr-goamã pʋgẽ? Sõsg ning sẽn pʋgdã na n sõnga tõnd tɩ d paam zãmsg sẽn yaa sõma sẽn yit a Miise bãngr-gomdã sẽn kengd tẽebã pʋgẽ.
Wãn to la y na n leoke?
• Bõe la Wẽnnaam baood tɩ neb nins sẽn lʋɩt taoor a nin-buiidã sʋkã maane?
• Bõe yĩng tɩ pʋʋsgã la vʋʋsem sõngã tar yõod a Zeova tʋʋmdã tõnd sẽn maandã pʋgẽ?
• Wãn to la nebã ‘kẽnd a Zeova yʋʋr yĩnga’?
[Zãmsgã sogsgã]
[Foto, seb-neng 12]
Y tõe n wilga a Miise makrã sẽn tɩ loe ne rʋkã võor bɩ?
[Foto rãmba, seb-neng 15]
Wala a Miise, tõnd moonda koe-noogã ne raoodo