Teeg-y a Zeova zãng-zãng toog wakate

“Wẽnnaam yaa zĩ-soalgdga la pãng tõnd yĩnga. Ned tõe n yãa bãmb sõngr wʋsg a toog pʋgẽ.”—YƖƖL SÕAMYÃ 46:21 in NW.

1, 2. a) Mak-bʋg n wilgd tɩ yeel bal tɩ d teega Wẽnnaam pa seke? b) Bõe yĩng tɩ d segd n maan bũmb n wilg tɩ d teega a Zeova?

YAA nana tɩ d yeel tɩ d teega Wẽnnaam, n yɩɩd rẽnda wilgr ne d tʋʋmã. Wala makre, hal sẽn kaoose, b gʋlsa Etazĩni ligd vãad la a koeems zut tɩ “Tõnd teega Wẽnnaam.” * Etazĩni tẽngã kug-zĩidb yiisa noor yʋʋmd 1956 pʋgẽ wã n wilg tɩ gom-kãngã la b yãk tɩ na n yɩ bãmb tẽngã sũur gomde. La neb wʋsg yaool n teega ligdã la laogã n yɩɩd b sẽn sɩd teeg Wẽnnaam. Woto pa Etazĩni bal ye, yaa dũniyã gill zugu.—Luk 12:16-21.

² Tõnd sẽn yaa kiris-neb hakɩkã yĩnga, yeel bal tɩ d teega a Zeova pa sek ye. Wala ‘tẽeb sẽn ka lagem ne tʋʋm sẽn yaa kɩɩngã,’ woto me d sã n yetẽ tɩ d teega Wẽnnaam tɩ d tʋʋmã yaool n pa wilgd woto vẽenega, yaa zaalem. (Zak 2:26) Sõsg ning sẽn loogã pʋgẽ, d bãngame tɩ d wilgda vẽeneg tɩ d teega a Zeova, d sã n pʋʋsd-a n kot sõngre, d sã n baood sõngr a Gomdã pʋgẽ, la d tũud sor-wilgr ning a siglgã sẽn kõtã. Masã, bɩ d ges d sẽn tõe n maan bõn-kãensã a tãabã toog wakat to-to.

D tʋʋm sã n sãam bɩ d paoong sã n paoodẽ

3. Zu-loe-bʋs la a Zeova Kaset rãmbã segd ‘toog wakat’ kãensã, la wãn to la d mi tɩ Wẽnnaam sɩd tʋll n sõng-d lame?

³ ‘Toog wakat’ kãensã pʋsẽ, kiris-nebã segda ligdã zu-loees wala neb a taabã me. (2 Tɩmote 3:1) D tʋʋm tõe n wa tiig n sãamame, pa rẽ bɩ wa yaa tɩlae ne-d tɩ d tʋm lɛɛr wʋsg n deeg yaood bilf bala. Yel-kãensã buud tõe n wa kɩtame tɩ lebg toog ne tõnd tɩ d ‘ges d zakã rãmb yelle.’ (1 Tɩmote 5:8) Rẽ yĩnga, Wẽnnaam sẽn ka to soabã na n sak n sõng-d-la wakat kãng pʋgẽ bɩ? Vẽenega, a na n sõng-d lame! Yaa sɩd t’a Zeova pa kogend-d ne dũni kãngã vɩɩmã zu-loees fãa ye. La baasg zãnga, d sã n teeg-a, Yɩɩl Sõamyã 46:2 sẽn yetã na n pidsa d zugu: “Wẽnnaam yaa zĩ-soalgdga la pãng tõnd yĩnga. Ned tõe n yãa bãmb sõngr wʋsg a toog pʋgẽ.” La d sã n wa tar ligd zu-loeese, wãn-wãn la d tõe n wilg tɩ d sɩd teega a Zeova zãng-zãnga?

4. D sã n wa tar ligd zu-loeese, bõe la d tõe n pʋʋs n kose, la wãn-wãn la a Zeova leokd pʋʋs-kãensã?

⁴ Sẽn na yɩl n wilg tɩ d teega a Zeova, yaa d sẽn na n pʋʋsd-a. La bõe la d tõe n pʋʋs n kose? D sã n wa maood ne ligd zu-loeese, yaa wakat kãng la d rat yam n yɩɩd pĩnda. Vẽenega, d tõe n pʋʋsame n kos yam. A Zeova Gomdã kõt-d-la bas-m-yam woto: “Ned sã n be yãmb sʋk t’a yam paoodẽ, bɩ a kos Wẽnnaam sẽn kõt neba fãa ne yamleoog n ka lengdẽ wã, la a na paam.”  (Zak 1:5) N-yẽe, d kos a Zeova yam. Yam yaa tõog n tʋm ne bãngrã la d sẽn wʋmd yɛlã võor to-to wã sõma, n tõog n dɩk sard sẽn yaa sõma la d maan yɛlã tɩ zemse. Tõnd saasẽ Ba-nongrã kõt-d-la bas-m-yam t’a na n kelga pʋʋs-kãensã. A leb n saka wakat fãa n na n dems neb nins sẽn teeg-a ne b sũyã fãa wã soaya.—Yɩɩl Sõamyã 65:32 in NW; Yelbũna 3:5, 6.

5, 6. a) Bõe yĩng tɩ d segd n bao sõngr Wẽnnaam Gomdã pʋgẽ sẽn na yɩl n mao ne ligdã zu-loeese? b) D tʋʋm sã n wa sãame, bõe la d tõe n maan n boog d yɩɩrã?

⁵ Bao sor-wilgr Wẽnnaam Gomdã pʋgẽ me yaa manesem a to sẽn wilgd tɩ d teega a Zeova. A saglsã sẽn be Biiblã pʋgẽ wã “yaa sɩd halaale.” (Yɩɩl Sõamyã 93:5) Baa ne Wẽnnaam seb-kãngã b sẽn gʋls n baas sẽn yɩɩd yʋʋm 1900 masã wã, a tara sagls sẽn be bas-m-yam la sẽn yaa sõma n tõe n sõng-d tɩ d mao ne ligdã zu-loees n yɩɩda. Bɩ d ges Biiblã sagls a wãn sẽn sɩd yaa sõma.

⁶ Yʋʋm wʋsg sẽn looge, rĩm a Salomo sẽn yɩ yam soabã ra yeelame tɩ: “Tʋm-tʋmd sã n dɩt bilf walla wʋsgo, a gõeem yaa noogo. La arzɛk soab tɩgra ka basd-a t’a gũs ye.” (Koɛɛg Soaba 5:1112 in NW) Ned sã n tar bõn-yood wʋsgo, b zãab la b koglg rɩkda sẽk la ligd wʋsgo. Woto yĩnga, d tʋʋm sã n wa sãame, d segd n lebg n gesa d vɩɩmã sẽn yaa to-to wã n bãng bũmb nins sẽn yaa tɩlae ne-dã n welg ne sẽn pa-b tɩlaeyã. Sẽn na yɩl n boog d yɩɩrã, yɩta yam tʋʋmd tɩ d toeem yɛl kẽere. Wala makre, rẽ yĩnga, d tõe n tɩ rɩka ro-bil walla d boog teed nins sẽn pa tɩlae ne-dã n gĩdg d vɩɩmã bɩ?—Matɩe 6:22.

7, 8. a) Wãn to la a Zezi wilg t’a miime tɩ ninsaalbã sẽn pa zems zãngã nong n maanda yɩɩr tɩ loogd noor laogã wɛɛngẽ? b) Sagl-bʋg la a Zezi kõ sẽn na yɩl n sõng-d tɩ d ra maan yɩɩr wʋsg tɩ looge?

⁷ A tãng zug zãmsgã pʋgẽ, a Zezi ra saglame: “Bɩ y ra maan yɩɩr ne y vɩɩma yelle, yãmb sẽn na n dɩ bũmb ninga la yãmb sẽn na n yũ bũmb ninga, la yãmb yĩnga yelle yãmb sẽn na n yeelg bũmb ninga ye. Vɩɩm ka yɩɩd dɩɩb laa, bɩ yĩnga ka yɩɩd futu?” (Matɩe 6:25) A Zezi ra miime tɩ zemsame tɩ ninsaalbã sẽn pa zems zãngã tʋlg bũmb nins sẽn yaa tɩlae ne-b vɩɩmã. Baasg zãnga, wãn to la d tõe n ‘da maan yɩɩr’ bõn-kãens wɛɛngẽ? A Zezi ra yeelame tɩ: ‘Bɩ y reng n bao Wẽnnaam rĩungã.’ Sẽn yaa zu-loɛɛg ning fãa taoore, d segd n ket n ningda a Zeova balengã pipi zĩigẽ d vɩɩmã pʋgẽ. D sã n maand woto, d saasẽ Ba wã na n ‘paas-d-la’ bũmb nins fãa sẽn yaa tɩlae ne-d daar fãa vɩɩmã. A na n tũnuga ne manesem buud bɩ a to n sõng-d tɩ d paam sẽn yaa tɩlaeyã.—Matɩe 6:33.

⁸ A Zezi sagla woto me n paase: “Bɩ y ra maan yɩɩr ne beoog yell ye, tɩ bõe beoog na n gesa a meng yelle.” (Matɩe 6:34) Pa zems tɩ d maan yɩɩr tɩ loog beoog sẽn tõe n yɩ to-to wã yĩng ye. Biibl mit a yembr yeela woto: “Naoor wʋsgo tõnd sẽn yɛɛsd to-to beoog sẽn na n yɩ a soab wɛɛngẽ wã pa zemsd ne yɛlã sẽn sɩd yɩt to-to wã ye.” D sã n sak ne sik-m-meng n tũ Biiblã sẽn sagl tɩ d tik d yamã fãa bũmb ning sẽn tar yõod n yɩɩdã zug la d vɩɩmd daar fãa ne a yell tɩ zemsã, na n sõng-d lame tɩ d ra maan yɩɩr tɩ loog ye.—1 Pɩɛɛr 5:6, 7.

9. D sã n wa tar ligd zu-loeese sõng-bʋg la d tõe n yã ‘tʋm-tʋmd sẽn tũud sɩd la sẽn tar yamã’ sɛb pʋsẽ?

⁹ D sã n wa tar ligd zu-loeese, d tõe n wilgame me tɩ d teega a Zeova, d sẽn na n bao sõngr ‘tʋm-tʋmd sẽn tũud sɩd la sẽn tar yamã’ sɛb pʋsẽ. (Matɩe 24:45) Réveillez-vous ! wã kõo sagls sẽn tõe n sõng-d tɩ d mao ne ligdã zu-loeese. Yʋʋm 1991, sa-sik kiuug rasem a 8 Réveillez-vous ! wã sõasg a yembr gom-zug n yaa: “Y tʋʋm sã n sãame, a tɩɩmã yaa bõe?” A pʋgẽ wã, b wilga sagls a nii sẽn yaa sõma sẽn sõng neb wʋsg tʋʋm sẽn da sãam tɩ b tõog n mao ne b zu-loeesã la b yɩɩrã. * Yaa vẽeneg tɩ sagl-kãensã tũub pʋgẽ  d segd n talla tagsg sẽn zems ligdã yõod wɛɛngẽ. B goma rẽ yell seb-kãng sõasg ning gom zug sẽn yaa “Bũmb yõod sẽn yɩɩd ligdã” pʋgẽ.—Koɛɛg Soaba 7:12.

Bãas sã n wa namsd-do

10. Wãn to la rĩm a Davɩɩd makrã wilgd tɩ d sɩd tõe n teega a Zeova d sã n wa bẽed bã-kɛgenga?

¹⁰ Rẽ yĩnga, d tõe n teega a Zeova d sã n wa bẽed bã-kɛgeng bɩ? Yaa vẽeneg tɩ d tõeeme. A Zeova nin-buiidã sʋka, sẽn pa tar-b laafɩ wã nimbãaneg tar-a lame, la a tʋllame n sõng-ba. D ges rĩm a Davɩɩd makrã. A sẽn da wa n gʋlsd Wẽnnaam yel-manesem sẽn ya a soab ne nin-tɩrg sẽn bẽedã sasa, tõe tɩ yẽ mengã ra bẽeda bã-kɛgenga. A gʋlsame: “Zusoaba kogenda yẽnda a sẽn ka laafɩ wakate, la yẽ paamda yãmb belsg wakat fãa yẽ sẽn gãe a gãagẽ a toog pʋgẽ wã.” (Yɩɩl Sõamyã 41:2, 4, 8, 9) A Davɩɩd kell n teega Wẽnnaam sõma hal t’a bãaga wa sigi. La bãas sã n wa namsd-do wãn to la d tõe n wilg tɩ d teega Wẽnnaam?

11. D sã n wa namsd ne bãaga, bõe la d tõe n kos d saasẽ Ba wã?

¹¹ D sã n wa namsd ne bãaga, manesem a ye d sẽn tõe n tũnug ne n wilg tɩ d teega a Zeova yaa d sẽn na n pʋʋs n kos-a t’a kõ-d raood tɩ d tõog n mao ne toogã. D tõe n kos-a-la “yam” sẽn na yɩl n tõog n tɩp d bãagã tɩ sã n tõeyã. (Yelbũna 3:21) D leb n tõe n kos-a lame t’a sõng-d tɩ d tõog n tall sũ-mar la tõog-toog n tõog n mao ne bãagã. Sẽn tɩ yɩɩd fãa, d tog n kosa a Zeova t’a teel-d la a kõ-d pãng tɩ d tõog n kell n tall kɩs-sɩd ne yẽ, tɩ sẽn ya a soab fãa bɩ d tõog n kell n gãd kãn-kãe. (Filip rãmba 4:13, Sebr Sõngo) Wẽnnaam sakr n tar yõod wʋsg n yɩɩd d sẽn na n bao n koglg d yõorã. D sã n kell n wilg wẽn-sakre, Wẽnnaam sẽn yaa roandã na n kõ-d-la vɩɩm la laafɩ sẽn zems zãng wakat sẽn kõn sa yĩnga.—Hebre dãmba 11:6.

12. D sã n wa rat n tɩp bãaga, Biiblã no-bʋs n tõe n sõng-d tɩ d tõog n dɩk sard sẽn yaa sõma?

¹² Tõnd sẽn teeg a Zeova wã yĩng me kɩtame tɩ d baood sor-wilgr Biiblã sẽn ya a Gomdã pʋgẽ. Noy nins sẽn be Biiblã pʋgẽ wã tõe n sõng-d lame tɩ d tõog n dɩk sard sẽn zems bãasã tɩpg wɛɛngẽ. Wala makre, d sẽn mi tɩ Biiblã gɩdga ‘bagrã’ yĩnga, bãag tɩpg pʋgẽ, zĩn dãmb yɛl sã n kẽed sʋka, d na n gila tɩp-kãnga. (Galat dãmba 5:19-21; Tõodo 18:10-12) Ad makr a to sẽn wilgd tɩ yam ning sen be Biiblã pʋgẽ wã zemsa ne bas-m-yam: “Zɩt deegda a sẽn wʋmd bũmb ninga fãa. La [yam soab] gũusda ne a sẽn maand bũmb ningã.” (Yelbũna 14:15) Woto  yĩnga, d sã n wa na n tɩp d bãaga, yɩta yam bũmb tɩ d bao kɩbay d sẽn tõe n tall bas-m-yam ne, la d ra ‘reeg d sẽn wʋmd bũmb ninga fãa’ ye. D sã n “gũus d mens” woto tõe n sõng-d lame tɩ d mag yɛlã tɩbsgã wɛɛngẽ neer la d tõog n dɩk sard sẽn zemse.—Tɩt 2:12.

13, 14. a) Sõs-bʋs sẽn kõt kɩbay wʋsg bãasã wɛɛngẽ la b yiis Gũusg Gãsgã la Réveillez-vous ! wã pʋgẽ? (Ges-y zĩ-gũbrã seb-neng 31) b) Sagl-bʋs sẽn tõe n sõng-d tɩ d mao ne bãas sẽn tõt saab la b kõ yʋʋmd 2001, yʋʋm-vẽkr kiuugã rasem 22 Réveillez-vous ! wã pʋgẽ?

¹³ D leb n tõe n wilgame tɩ d teega a Zeova, d sẽn na n vaeesd tʋm-tʋmd sẽn tũud sɩdã sɛbã. Wakat-wakate, Gũusg Gãsgã la Réveillez-vous ! wã kõta kɩbay wʋsg bãas toɛy-toɛy zutu. * Wakat ninga, seb-kãensã tara kɩbay neb sẽn tõog n mao ne bãas ne komslem buud toor-toor sẽn gʋlse. Sẽn paase, zĩis kẽer tara sagls sẽn yit Biiblã pʋgẽ ne sagl-sõma a taab sẽn wilgd f sẽn tõe n vɩɩmd ne bãag sẽn tõt saab to-to.

¹⁴ Wala makre, yʋʋmd 2001 yʋʋm-vẽkr kiuugã rasem 22 Réveillez-vous ! wã gom-zug sẽn yaa: “Belsg bãad dãmbã yĩnga,” talla sõss sẽn pʋg taaba. Seb-kãng sõssã wilga Biiblã noy la kɩbay neb sẽn nams ne bã-kɛgsems yʋʋm wʋsg sẽn togse. Sõasg ning gom-zug sẽn yaa: “Y sẽn na n tõog n vɩɩmd ne y bãaga to-to wã” sagendame tɩ y bao n bãng yɛl wʋsg y bãagã wɛɛngẽ. (Yelbũna 24:5) Yãk-y bõn-datɩ sẽn zemse, wala neb a taabã sõngre. La bãng-y me tɩ y tõeeme n pa tõog n pids bõn-datɩ kãens wala neb a taabã ye. (Tʋʋma 20:35; Galat dãmba 6:4) Ra zãag-y y meng ne neb a taabã ye. (Yelbũna 18:1) Kɩt-y tɩ neb a taabã sã n wa n na n kaag-y bɩ zĩnd yamleoog ne-ba. (Yelbũna 17:22) Sẽn yɩɩd fãa, kell-y n tall loees sẽn yaa kãn-kãe ne a Zeova la ne tigingã. (Nahum 1:7; Rom dãmba 1:11, 12) Rẽ yĩnga, d pa tar mi-beoog ne a Zeova, a sẽn tũnugd ne a siglgã n kõt-d sor-wilgr sẽn be bas-m-yamã sɩda?

D sã n wa maood ne pãn-komslem sẽn kaoosde

15. Tʋm-tʋmd a Poll maana wãn n tõog n mao ne yĩngã sẽn pa zems zãngã pãn-komslem, la bas-m-yam bʋg la d tõe n talle?

¹⁵ Tʋm-tʋmd a Poll ra gʋlsame: “Bõn-neer ka be mam pʋgẽ ye.” (Rom dãmba 7:18) A Poll meng ra vɩɩmda yɛl n miẽ tɩ mao ne yĩngã sẽn pa zems zãngã tʋlsem la a pãn-komslmã tõe n yɩɩ toogo. Baasg zãnga, a Poll ra tara bas-m-yam t’a tõe n maoome n tõoge. (1 Korẽnt dãmba 9:26, 27) Wãn to? Ya a sẽn na n teeg a Zeova zãng-zãnga. Yaa rẽ n kɩt t’a Poll ra tõe n yeel woto wã: “Mam yaa nimbãan ned bala. Ãnda n na n fãag maam ne kũum sẽn be yĩng kãngã pʋgẽ wã? Bark Wẽnnaam tõnd Zusoab a Zezi Kirist maasem yĩnga.” (Rom dãmba 7:24, 25) La yaa wãn to yẽ ne tõndo? Tõnd me  maooda ne d yĩngã pãn-komslem. D sẽn maood ne pãn-komslem kãensã wã, yaa nana tɩ d wa koms raoodo, n sɩd tẽed tɩ d pa na n tol n tõog ye. La a Zeova na n sõng-d lame, d sã n sɩd teeg-a zãng-zãng wala a Polle, n pa teeg d meng pãng bal ye.

16. D sã n maood ne pãn-komslem sẽn kaoosde, bõe la d segd n pʋʋs n kose, la d sã n wa leb n lʋɩ a pʋgẽ, bõe la d segd n maane?

¹⁶ D sã n maood ne pãn-komslem sẽn kaoosde, d segd n wilgame tɩ d teega a Zeova, n pʋʋs-a n kos a sõngre. D segd n bõosa a Zeova t’a sõng-d ne a vʋʋsem sõngã. (Luk 11:9-13) D sẽn tõe n kos bũmb ning takɩ yaa yõk-m-mengã sẽn yaa Wẽnnaam vʋʋsem sõngã bilã. (Galat dãmba 5:22, 23) La tõnd sã n da tõoga d pãn-komslmã n wa leb n lʋɩ a pʋgẽ, bõe la d segd n maane? Sẽn ya a soab fãa, d pa segd n bas maoob ye. D tog n ket n pʋʋsda ne sik-m-meng n kot d nimbãan-zoeer Wẽnnaamã sugr la a sõngre. A Zeova pa zãgsd ned ‘sũur sẽn sãam’ a sũur-kaset sẽn ningd-a taal yĩng abada. (Yɩɩl Sõamyã 51:19) D sã n bõos a Zeova ne pʋ-peelem la sũ-sãanga, a na n sõng-d lame tɩ d tõog n mao ne makrã.—Filip rãmba 4:6, 7.

17. a) Bõe yĩng tɩ yaa sõma tɩ d bʋgs a Zeova sẽn tagsd to-to pãn-komslem ning d sẽn maood ne wã zugu? b) Biiblã verse bʋs la d tõe n ning d yamẽ d sã n yaa sũ-tʋʋlem soab n maood n dat n base? D sã n dat n tõog n gũus ne d goamã? D sã n dat n bas reem buud sẽn pa sõma?

¹⁷ D leb n tõe n wilgame tɩ d teega a Zeova, d sẽn na n baood sõngr a Gomdã pʋgẽ. D sã n tũnug ne Biiblã kõnkordãns walla Publications de la Société Watch Tower ẽndɛgs rãmbã, d tõe n paama sok-kãngã leoore: ‘A Zeova tagsg yaa wãn to pãn-komslem ning mam sẽn maood ne wã wɛɛngẽ?’ D sã n bʋgs a Zeova sẽn tagsd to-to yellã zugã, na n kɩtame tɩ d tʋlg n ta a yam n paase. Woto, d na n wa sɩngame n get yɛlã wa a Zeova sẽn gɛt-b to-to wã, la d kisg a sẽn kis bũmb ningã. (Yɩɩl Sõamyã 97:10) Neb kẽer yãame tɩ b sã n ning Biiblã verse rãmb nins sẽn tɩ loe ne pãn-komslem ning takɩ b sẽn maood ne wã b yamẽ, sõngd-b lame. Rẽ yĩnga, d yaa sũ-tʋʋlem soab n maod n dat n bas bɩ? Sã n yaa woto, d tõeeme n ning d yamẽ  Yelbũna 14:17 la Efɛɛz rãmba 4:31 sẽn yet bũmb ningã. Sã n yaa toog ne tõnd tɩ d yõk d noorã, d tõe n bao n ninga d yamẽ Yelbũna 12:18 la Efɛɛz rãmb 4:29 goamã. Rẽ yĩnga tõnd minima reem sẽn pa sõma bɩ? Sã n yaa woto, d tog n ninga Efɛɛz rãmba 5:3 la Kolos rãmba 3:5 goamã d pʋtẽerẽ.

18. Bõe yĩng tɩ d pa segd n zoe yãnd ne d tɩ kos kãsem-dãmbã sõngr sẽn na yɩl n tõog d pãn-komslem?

¹⁸ Manesem a to me d sẽn tõe n tũnug ne n wilg tɩ d teega a Zeova yaa d sẽn na n bao sõngr tigingã kãsem dãmb sẽn yaa vʋʋsem sõngã n yãkã nengẽ. (Tʋʋma 20:28) Ra-kãens sẽn yaa kũunã yaa a Zeova sẽn tũnug ne Kirist n segle, sẽn na yɩl n kogl a piisã la a ges b yelle. (Efɛɛz rãmba 4:7, 8, 11-14) Yaa sɩd tɩ d sã n maood ne pãn-komslem, tõe n yɩɩ toog tɩ d kos sõngre. D tõe n zoeta yãnd n tagsdẽ tɩ kãsem dãmbã pa na n ye wa nand-d ye. La sãmbg sẽn ka be, nin-kãensã sẽn bɩ tẽebã wɛɛngẽ wã na n waoog-d-la d sẽn tall raood n wa kos b sõngrã. Sẽn paase, kãsem dãmbã maoodame n pukd a Zeova meng zʋg-sõma wã b manesemã ne bãgrã neb pʋgẽ. B belsgã, b saglsã la b sor-wilgrã sẽn tik Biiblã zugã b sẽn na n kõ-dã, tõe n yaa bũmb nins d sẽn dat sẽn na yɩl n tõog n mao ne d pãn-komslmã.—Zak 5:14-16.

19. a) Bõe la a Sʋɩtãan baood n na n tũnuga ne dũni kãngã vɩɩmã sẽn yaa faoorã n maane? b) Teeg a Zeova baoodame tɩ d maan bõe, la bõe la d segd n dɩk sard kãn-kãe n maane?

¹⁹ D ra tol n yĩm t’a Sʋɩtãan miime t’a wakatã yaa bilf ye. (Wilgri 12:12) A rat n tũnuga ne dũni kãngã vɩɩmã sẽn yaa faoorã n koms d raood tɩ d bas tẽebã. Bɩ d tall bas-m-yam zãng-zãng ne Rom dãmba 8:35-39 sẽn yetã: “Bõe n na n welg tõnd ne Kirist nonglem? Toog bɩ? Sũ-sãoongo walla namsgo walla kom walla naongo wala yel-pakre walla sʋʋg bɩ? . . . La bõn-kãens fãa pʋgẽ tõnd yaa tõaagdb hakɩɩka, sẽn nong-a tõnda maasem yĩnga. Tɩ bõe, mam sũur kɛɛma tɩ baa kũum walla vɩɩm walla malɛɛk rãmba walla rĩm dãmba walla bũmb sẽn be walla bũmb sẽn wata walla pãens rãmba, walla zãntlem walla zulum walla bõn-naands buud fãa kõn tõog n welg tõnd ne Wẽnnaam nonglem sẽn be tõnd Zusoaba Kirist Zezi pʋgẽ wã ye.” Ad woto yaa goam sẽn sɩd wilgd bas-yard tɛkẽ ne a Zeova! Baasg zãnga, bas-yard kãngã buud pa yĩn-sidg yell bal ye. A baoodame tɩ d tagsd neer d sẽn dɩkd sard nins daar fãa d vɩɩmã pʋgẽ wã zutu. Woto yĩnga, bɩ d rɩk sard kãn-kãe n teeg a Zeova zãng-zãng toog wakate.

[Tẽngr not rãmbã]

Y tẽrame bɩ?

• D sã n wa tar ligd zu-loeese, wãn to la d tõe n wilg tɩ d teega a Zeova?

• D sã n wa namsd ne bãase, wãn to la d tõe n wilg tɩ d teega Wẽnnaam?

• D sã n wa maood ne pãn-komslem sẽn kaoosde, wãn to la d tõe n wilg tɩ d sɩd teega a Zeova?

[Zãmsgã sogsgã]

[Zĩ-gũbrã, seb-neng 29]

Yãmb tẽra sõs-kãensã bɩ?

Tõnd sã n be sũ-sãang pʋgẽ d yĩnsã sẽn pa noomã yĩnga, d sã n karem kɩbay sẽn tɩ loe ne neb a taab sẽn tõog n mao ne bãas la pãn-komlsem, tõe n kenga d pɛlga. Sẽn pʋgdã yaa sõss kẽer b sẽn yiis Gũusg Gasgã la Réveillez-vous ! wã pʋsẽ.

“M sẽn tõog n mao ne m pan-komslmã to-to” wã wilgda f sẽn tõe n mao ne tags-wẽns la yam-ka-m-meng to-to.—Gũusg Gasgã. 1990, sig-noya, 1

“Vʋʋsg masĩn meng pa gɩdg-a t’a pa moon koɛɛgã ye.”—Réveillez-vous ! 1993, yʋʋm-vẽkre, 22

“Vẽend n toeem mam vɩɩmã” goma ned sẽn mao ne yĩng komslem yelle.—Réveillez-vous ! 1995, zĩ-likri, 22

“Yãmb pa mi y vɩɩmã sẽn na n yɩ bũmb ning beoog ye.” Sõs-kãngã goma zu-lɛbg buud yelle.—Gũusg Gasgã (ne farende). 2000, bõn-bɩʋʋngo, 1

“A Loida sẽn mao ne mugnum to-to.” Sõs-kãngã gom n tadga kalkõtã komslem yelle.—Réveillez-vous ! 2000, sig-noya, 8

“M sẽn maan to-to n mao ne bãag sẽn wõnd ka-pʋga.”—Réveillez-vous ! 2000, sẽoogo, 22

“Mam sẽn mao ne yĩn-gãong bãag sẽn yaa toaag to-to.” Réveillez-vous ! 2001, sa-sika, 8

“Mam maoome n tõog rogem poor sũ-sãanga.” Réveillez-vous ! 2002, sẽoogo, 22

[Foto, seb-neng 29]

D tʋʋm sã n wa sãame, yɩta yam bũmb tɩ d lebg n vaees d vɩɩmã sẽn yaa to-to wã n gese

[Foto, seb-neng 30]

A Loida kɩbarã wilgda a Zeova teegr sẽn tõe n sõng ned t’a tõog toog to-to (ges-y zĩ-gũbrã seb-neng 31)

[Foto, seb-neng 32]

D pa segd n zoe yãnd ne d tɩ kos sõngr sẽn na yɩl n tõog d pãn-komslem ye