Bõe yĩng tɩ d segd n pʋʋs Wẽnnaam n da base?
Bõe yĩng tɩ d segd n pʋʋs Wẽnnaam n da base?
“Pʋʋs-y Wẽnnaam n da bas ye. Bɩ y pʋʋs Wẽnnaam bark bũmb fãa yĩnga.”—1 TESALONIK RÃMBA 5:17, 18.
1, 2. Wãn-wãn la a Daniɛll wilg t’a sɩd nanda pʋʋsgã sẽn yaa zu-noog bũmbã hal wʋsgo, la rẽ talla pãn-tusd-bʋg a zems-n-taarã ne Wẽnnaam zugu?
NO-RƐƐS a Daniɛll ra minim n pʋʋsda Wẽnnaam naoor a tãab daar fãa. A ra rʋʋda a yĩngr doogã, n pak a fenetrã sẽn tees Zerizalɛmã, n yĩgimd n pʋʋse. (1 Rĩm dãmba 8:46-49; Daniɛll 6:11) Baa ne Meed rĩm a Darius sẽn wa n yiis noor n gɩdg tɩ b pa segd n ye kos Wẽnd bɩ ned a to bũmb tɩ pa yẽ wã, a Daniɛll pa tol n maan sãmb-sãmb ne a sã n na n ket n pʋʋsdame bɩ a pa na n ye pʋʋs ye. Baa woto sã n da na n ning a vɩɩmã yell pʋgẽ, a Daniɛll sẽn da minim n pʋʋsdẽ wã kell n pa viig a Zeova pʋʋsg ye.
2 A Zeova tagsg yɩɩ wãn-wãn ne a Daniɛlle? Malɛk a Gabriyɛll sẽn da wa n na n leok a Daniɛll pʋʋsg a yembre, a yeelame tɩ no-rɛɛsã yaa ‘ned Wẽnnaam sẽn nonge.’ (Daniɛll 9:20-23) A Ezekɩɛll bãngr-gomdã pʋgẽ, a Zeova yeelame t’a Daniɛll yaa nin-tɩrga. (Ezekɩɛll 14:14, 20) Vẽenega, a Daniɛll vɩɩmã pʋgẽ, pʋʋsgã kɩtame t’a tall zems-n-taar sẽn tar pãng ne a Wẽnnaamã, tɩ rĩm a Darius meng sak n deeg rẽ.—Daniɛll 6:17.
3. Wala yɛl nins misioneer a ye sẽn vɩɩmdã sẽn wilgã, wãn to la pʋʋsgã tõe n sõng-d tɩ d kell n tall d burkĩndã?
3 Pʋʋsgã wakat fãa wã tõe n sõng-d lame me tɩ d mao ne mak-toose. Ges-y-yã a Harold King makrã. A yɩɩ misioneer Sɩn tɩ b ra kao a bʋʋd n kẽes-a bãens yʋʋm a nu t’a zĩnd roog pʋgẽ a yembre. Saam-biig a King sẽn vɩɩmd yɛl ninsã wɛɛngẽ, a yeela woto: “B tõe n zãaga maam ne ninsaalbã, la ned ba a ye pa tõe n zãag maam ne Wẽnnaam ye. . . . Mam da yĩgimdida m doogã pʋgẽ n zẽkd m koɛɛg n pʋʋsd naoor a tãab daar fãa, tɩ sẽn da pɩʋʋgd-a mam doogã noor fãa tõe n yã-ma. M da ningda Biiblã sẽn gom a Daniɛll yellã m yamẽ. . . . Yel-kãnsã pʋsẽ, Wẽnnaam vʋʋsem sõngã wilga maam sor tɩ m bãng yɛl nins sẽn yaa sõma n yɩɩdã, la a kɩt tɩ m yamã gãand bãane. Pʋʋsgã sɩd kenga mam tẽebã la kõ maam belsg hal wʋsgo.”
4. Pʋʋsgã wɛɛngẽ, sogs-bʋs la d na n leok sõs-kãngã pʋgẽ?
4 Biiblã yeta woto: “Pʋʋs-y Wẽnnaam n da bas ye. Bɩ y pʋʋs Wẽnnaam bark bũmb fãa yĩnga.” (1 Tesalonik rãmba 5:17, 18) Sẽn na yɩl n tũ sagl-kãngã, bɩ d leok sogsg nins sẽn pʋgdã: Bõe yĩng tɩ d segd n gũus n ges d sã n pʋʋsda sõma la wakat fãa? Yel-bʋs yĩng n kɩt tɩ d segd n pʋʋsd a Zeova wakat fãa? La d sã n wa tagsdẽ tɩ d pãn-komslmã yĩnga, d pa zems d na pʋʋs a Zeova, bõe la d segd n maane?
Bao-y Wẽnnaam zood ne pʋʋsgã maasem
5. Zood bʋg sẽn ka mak-n-taag la d tõe n paam ne pʋʋsgã maasem?
5 Y rat n yɩɩ a Zeova zoa bɩ? A ra boola bu-yaleng ba a Abrahaam t’a zoa. (Ezai 41:8; Zak 2:23) A Zeova ratame tɩ d tall zems-n-taar a woto buud ne-a. A sɩd yet-d lame tɩ d kolg-a. (Zak 4:8) Rẽ yĩnga, pʋʋsgã sẽn yaa sor ning sẽn pa wõnd a taab d sẽn tõe n tũnug ne n maan dẽ wã pa segd n kɩt tɩ d tags a zug neer sɩda? Ad yaa toog wʋsg tɩ f tõog n paam n seg goosneemã nin-kãseng n sõs ne-a, tɩ pa sokd paam n yɩ a zoa ye. La Ãndũniyã fãa Naand yẽ sagenda tõnd tɩ d pʋʋs-a d sẽn dat wakat ning fãa. (Yɩɩl Sõamyã 37:5) D sã n pʋʋsd wakat fãa, sõngd-d lame tɩ d tall zems-n-taar sẽn tar pãng ne a Zeova.
6. Bõe la a Zezi makrã zãmsd tõnd pʋʋsgã wakat fãa wã wɛɛngẽ?
6 La d yaool n tõe n wa maana yam-kaalg nana-nana ne pʋʋsgã. Daar fãa vɩɩmã zu-loees meng tõe n tiis-d-la hal wʋsg n kɩt tɩ d wa ye pa maand modgr n gomd ne Wẽnnaam ye. A Zezi sagla a karen-biisã tɩ b pʋʋs wakat fãa, la yẽ mengã maana woto. (Matɩe 26:41) Baa ne a sẽn da sõsd n tʋmd wʋsgã, a ra yãkda wakat n gomd ne a saasẽ Ba wã. Wakat ninga, a Zezi ra mi n ‘sãda beoog n tɩ pʋʋse.’ (Mark 1:35) Sasa kẽere, a baoa zĩig neb sẽn ka beẽ zĩ-sobd wakat n tɩ pʋʋs a Zeova. (Matɩe 14:23) A Zezi ra baoda sẽk wakat fãa n na n pʋʋse, la tõnd me segd n maana woto.—1 Pɩɛɛr 2:21.
7. Yel-bʋs n segd n kɩt tɩ d tʋll n gom ne d saasẽ Ba wã daar fãa?
7 Daar fãa, d tara soay wʋsg d sẽn tõe n tũnug ne n pʋʋse. Yaa d sẽn wat n maood ne zu-loeese, makr buud toor-toore, la d sẽn wat n yãkd yam n na n maan bũmb ninsã wakate. (Efɛɛz rãmba 6:18) D sã n baood Wẽnnaam sor-wilgr d vɩɩmã nens fãa pʋsẽ, d zems-n-taarã ne-a sɩd na n talla pãng n paase. Ned ne a zoa sã n naag taab n maood ne zu-loeese, rẽ yĩnga b zoodã pãng kõn paas sɩda? (Yelbũna 17:17, NW ) Na n yɩɩ woto me tõnd ne a Zeova sʋka, d sã n teeg-a n paam sõngre.—2 Kɩbaya 14:10.
8. A Nehemi ne a Zezi la a Ana makrã zãmsda tõnd bõe d yembr pʋʋsgã woglem wɛɛngẽ?
8 D sũur segd n sɩd yɩɩ noog wʋsg ne Wẽnnaam, a sẽn pa yãk pʋʋsgã woglem walla naoor sõor ning d sẽn segd n pʋʋs-a wã. A Nehemi reng n pʋʋsa a sũurẽ koɛɛg-koɛɛg n yaool n na n kos Pɛrs rĩmã bũmb ning a sẽn da ratã. (Nehemi 2:4, 5) A Zezi me maana pʋʋs-koɛɛg a sẽn wa n na n kos a Zeova t’a kõ-a tõog t’a vʋʋg a Lazaarã. (Zã 11:41, 42) La a Ana “kell n pʋʋsa [a Zeova] n kaoose,” a sẽn wa n na n wilg-a a sũ-sãangã. (1 Sãmwɛll 1:12, 15, 16) D sã n wa na n pʋʋs d yembre, sẽn zems ne d raabã la d yɛlã sẽn yaa to-to, d pʋʋsgã tõe n yɩɩ wok wall koɛɛga.
9. Bõe yĩng tɩ d pʋʋsgã segd n naag ne pẽgr la bark pʋʋsg a Zeova sẽn maan bũmb nins fãa n kõ-dã yĩnga?
9 Biiblã pʋgẽ, pʋʋsg wʋsg yaa mi-beoog wilgr ne a Zeova, a naamã sẽn ka to wã la a tʋʋm-kãsemsã yĩnga. (Yikri 15:1-19; 1 Kɩbaya 16:7-36; Yɩɩl Sõamyã 145) Wẽnd vẽnegr pʋgẽ, tʋm-tʋmd a Zã yãa kãsem dãmb 24 sẽn makd kiris-neb nins sẽn paam vʋʋsem sõngã zaeebã b saasẽ ziirã pʋgẽ tɩ b pẽgd a Zeova n yetẽ: “[Zeova,] tõnd Wẽnnaam, yãmb n zems tɩ reeg pẽgre la waoogre la pãnga, tɩ bõe, yãmb n naan bũmb fãa, la yaa yãmb daaba yĩng la yãmb naan bãmb tɩ b beẽ.” (Wilgri 4:10, 11) Tõnd me tara bʋʋm n na n pẽg d Naandã wakat fãa. Roagdbã sã n kõ b kamb bũmb tɩ b kambã wa pʋʋsd-b barka, b sũy sɩd nooma hal wʋsgo. Manesem sõng a ye d sẽn tõe n tũnug ne n paas d pʋʋsgã sõmblem yaa d sẽn na n bʋgsd a Zeova sõmblmã zug sõma, la d wilgd d mi-beoog rẽ yĩng ne d sũur fãa.
Bõe yĩng tɩ d segd n ‘pʋʋs n da base’?
10. Wãn to la pʋʋsgã tõe n paas d tẽebã pãnga?
10 Pʋʋsgã wakat fãa wã yaa tɩlae ne tõnd tẽebã. A Zezi sẽn wa n kõ makr n wilg tɩ d segdame n “pʋʋs daar fãa n da yɛ” wã poore, a sokame tɩ: “Ninsaal Biiga sã n wa, b na n yãa tẽeb duniyã zugu?” (Luk 18:1-8) Pʋʋsg d sẽn maan ne d sũur fãa kengda tẽebo. Bu-yaleng ba a Abrahaam sẽn da wa n kʋʋndẽ n ket n pa tar biigã, a goma ne Wẽnnaam yellã wɛɛngẽ. A Zeova yeel-a lame t’a zẽk a neng yĩngr n ges a sã n tõe n sõda ãdsã n sa. Rẽ zugẽ, Wẽnnaam kõo a Abrahaam bas-m-yam n yeel-a: “Fo yagensa na n yɩɩ woto.” Rẽ, a Abrahaam “tẽe [a Zeova,] la bãmb geelga yõwã wa tɩrlem yẽ yĩnga.” (Sɩngre 15:5, 6) D sã n pʋʋs n togs a Zeova bũmb ning sẽn be d sũurẽ wã, d sã n sak goam nins sẽn kõt bas-m-yam sẽn be Biiblã pʋgẽ wã, na n paasa d tẽebã pãnga.
11. Wãn to la pʋʋsgã tõe n sõng-d tɩ d mao ne zu-loeesã?
11 Pʋʋsgã leb n tõe n sõng-d lame tɩ d welg zu-loeese. D vɩɩmã sã n pida ne zu-loees tɩ yɛl nins d sẽn maood ne daar fãa wã pa nana, Biiblã yet-d lame: “Bas f yell ne Zusoabã la bãmb na kogl foom. Bãmb ka na n bas nin-tɩrg t’a leng wakat sẽn ka sɛt ye.” (Yɩɩl Sõamyã 55:23) D sã n wa segd n dɩk sard sẽn pa nana, d tog n dɩka a Zezi togs-n-taare. A rɩka yʋng tõr n pʋʋs n yaool n na n yãk a tʋm-tʋmdb 12 wã. (Luk 6:12-16) La yʋng ning sẽn deng a kũumã, a pʋʋsa ne a sũur fãa wʋsg hal t’a ‘tʋʋlgã lebg wa zɩɩm n tosd bɛd-bɛda n lʋɩt tẽnga.’ (Luk 22:44) Woto baasa wãn-wãna? ‘Wẽnnaam leoka a pʋʋsgã a sakra yĩnga.’ (Hebre dãmba 5:7) D sã n pʋʋsd ne d sũur fãa n pa vaandẽ, na n sõng-d lame tɩ d tõog n mao ne zu-loeesã la mak-toosã.
12. Wãn to la pʋʋsgã wilgd tɩ tõnd ned kam fãa yell paka a Zeova?
12 Bũmb a to me sẽn kɩt tɩ d segd n tũnug ne pʋʋsgã n kolg a Zeova wã yaa tɩ yẽ mengã na n kolg-d lame. (Zak 4:8) Rẽ yĩnga d sã n mi n pʋʋs a Zeova n togs-a d sũurẽ yelle, rẽ poore pa wa d neeme t’a sɩd kẽesa a toogo, la t’a sɩd geta d yell ne nonglem sɩda? Tõnd ned kam fãa zoe n vɩɩmda yɛl sẽn wilgd-a Wẽnnaam nonglmã. Yaa a Zeova meng a toor n kelgd pʋʋsg nins a sõgen dãmba fãa sẽn taasd-a wã. (Yɩɩl Sõamyã 66:19, 20; Luk 11:2) A leb n yet-d lame tɩ d ‘bas d yɩɩra fãa ne yẽ, bala a geta tõnd yelle.’—1 Pɩɛɛr 5:6, 7.
13, 14. Yel-bʋs yĩng n kɩt tɩ d segd n pʋʋsd wakat fãa?
13 Pʋʋsgã tõe n kõ-d-la yẽesem wʋsg d koe-moonegã pʋgẽ la keng d raoodo, neba yam-kaalgã la b kɩɩsgã sã n wa kɩt tɩ d rat n koms raood n base. (Tʋʋma 4:23-31) Pʋʋsgã leb n tõe n kogl-d-la ne “Sʋɩtãanã sɩlem fãa.” (Efɛɛz rãmba 6:11, 17, 18) D sã n wa maood ne makr nins d sẽn segd daar fãa wã, d tõe n kosa Wẽnnaam wakat fãa t’a kõ-d pãnga. A Zezi sẽn wilg a karen-biisã b sẽn segd n pʋʋs to-to wã pʋgẽ, a yeelame tɩ d kos a Zeova t’a “fãag tõnd wẽng soaba nugẽ.”—Matɩe 6:13.
14 D sã n ket n pʋʋsd n kot sõngr sẽn na yɩl n mao ne yel-wẽna tʋlsem, d na n paama a Zeova sõngre. D tara bas-m-yam kãngã: “Wẽnnaam sẽn yaa sɩd soabã, bãmb ka na n sak tɩ yãmb paam makr sẽn yɩɩd yãmb pãng ye. La ne makre bãmb na n maana sore tɩ yãmb tõe n yi, la tɩ yãmb tõe n paam pãng makra pʋgẽ n da lʋɩ ye.” (1 Korẽnt dãmba 10:13) Tʋm-tʋmd a Poll mengã paama a Zeova sõngr yɛl buud toor-toor pʋsẽ. A yeela woto: “Mam tõee fãa ne ned ning sẽn kõt-a maam pãnga.”—Filip rãmba 4:13, Sebr Sõngo; 2 Korẽnt dãmba 11:23-29.
Baa ne y pãn-komslmã bɩ y pʋʋs n da bas ye
15. Tõnd vɩɩm manesmã sã n wa pa zems ne Wẽnnaam noyã, bõe n tõe n maane?
15 D sã n dat tɩ d pʋʋsgã reege, d pa segd n tõdg Wẽnnaam Gomdã sagls ye. Tʋm-tʋmd a Zã gʋlsa woto: “Tõnd sẽn kot bãmb bũmb ninga fãa tõnd deegda bãmb nengẽ, tõnd sẽn sakd bãmb tõog la d maand sẽn noom bãmba yĩnga.” (1 Zã 3:22) Tõnd vɩɩm manesmã sã n wa pa zems ne Wẽnnaam noyã, bõe n tõe n maane? Edɛn zẽedẽ wã, a Ãdem ne a Hawa sẽn beega poore, b zoe n solgame. Tõnd me tõe n wa rat n solgame t’a Zeova ra yã-do, n pa ye pʋʋsdẽ ye. (Sɩngre 3:8) A Klaus sẽn yaa kaagr yel-gɛt a ye sẽn tar minimã yeelame: “Mam gũus n gesame tɩ wakat fãa la bala, neb nins sẽn zãag b mens ne a Zeova la a siglgã pipi tudgrã yɩɩ b sẽn bas pʋʋsgã.” (Hebre dãmba 2:1) A José Ángel nengẽ wã yɩɩ woto. A yeelame: “Sẽn na maan yʋʋm a nii, mam sẽn pʋʋs a Zeova sõor paooda. Mam da getame tɩ baa ne m sẽn da ket n get-a wa m saasẽ Ba wã, m pa zems ne m pʋʋs-a ye.”
16, 17. Kõ-y makr toor-toor sẽn wilgd pʋʋsgã wakat fãa wã sẽn tõe n sõng-d tɩ d tõog d tẽebã pãn-komslem to-to.
16 Neb kẽer tõnd sʋkã tõe n wa getame tɩ b pa zems ne b na pʋʋs a Zeova, b tẽebã sẽn maage, bɩ b sẽn maan wẽng yĩnga. La yaool n yaa wakat kãng meng la pʋʋsgã tar yõod wʋsg ne-do. A Zonas ra zoeeme t’a kõn kẽng n tɩ tʋm tʋʋmd ning Wẽnnaam sẽn da tʋm-a t’a tɩ maanã ye. La a Zonas ‘pʋʋsa a Zeova a toogã pʋgẽ, t’a leok-a. A zĩnda kɩɩm-kulgã pʋgẽ n bool a Zeova t’a wa sõng-a, la a wʋma a goamã.’ (Zonas 2:3) A Zonas pʋʋsa a Zeova t’a leok a pʋʋsgã n sõng-a t’a ye paam tẽebo.
17 A José Ángel me pʋʋsa ne a sũur fãa n kos sõngre. A yeela woto: “M togsa Wẽnnaam bũmb ning sẽn be m sũurẽ wã n bõos a sugri. La a sɩd sõnga maam. M pa tagsd tɩ m da na n tõog n lebg n waa sɩdã pʋgẽ tɩ pa tũ ne pʋʋsgã sõngr ye. Masã, m pʋʋsda daar fãa n pa vaandẽ ye, la m gẽegda pʋʋs-kãens sasa hal wʋsgo.” Wakat fãa, d segd n pelga d pʋg n togs Wẽnnaam d kongrã la d kos a sugr ne sik-m-menga. Rĩm a Davɩɩd sẽn vẽneg a kongrã n togs a Zeova wã, a kõ-a-la a yel-wẽnã sugri. (Yɩɩl Sõamyã 32:3-5) A Zeova tʋll n sõng-d lame, a pa rat n ning-d taal ye. (1 Zã 3:19, 20) Sẽn paase, tigingã kãsem dãmb pʋʋsg tõe n sõng-d-la tẽebã wɛɛngẽ, bala pʋʋs-kãens tara pãng wʋsgo.—Zak 5:13-16.
18. Baa ne Wẽnnaam sõgen dãmbã sẽn kong wʋsg to-to fãa, bas-m-yam bʋg la b tõe n talle?
18 Roagd kae sẽn pa na n sõng a biig sẽn wa n na n kos-a sõngr la saglg ne sik-m-meng a sẽn beeg yĩng ye. Biribl sẽn yaa laog-sãamdã kɩbar wilgdame tɩ baa d kongrã sẽn zem to-to fãa, d sã n lebg n wa d saasẽ Ba wã nengẽ, a sũur na n yɩɩ noog ne-do. (Luk 15:21, 22, 32) A Zeova sagla koangdbã fãa tɩ b bao-a t’a ‘kõta sugr wʋsgo.’ (Ezai 55:6, 7) Baa ne a Davɩɩd sẽn da maan yel-wẽn-kãsemsã, a pʋʋsa a Zeova woto: “Mam Wẽnnaam, bɩ y kelg mam pʋʋsgo n da solg y meng ne mam kosga ye.” A leb n yeela woto me: “Zaabr ne yibeoog la winto-sʋka yaa tagsg ne maam tɩ mam wõosdẽ. [A Zeova] na n wʋma mam koɛɛga.” (Yɩɩl Sõamyã 55:2, 18) Ad woto sɩd kõt bas-m-yam!
19. Bõe yĩng tɩ d pa segd n yɩ tao-tao n tags tɩ pʋʋsg sẽn wõnd a pa paam leokr wilgdame tɩ d pa tat Wẽnnaam yam?
19 La yaa wãn masã, d pʋʋsgã sã n pa paam leokr zĩig pʋgẽ? Wakat kãng bɩ d ges d kosgã sã n zemsa ne a Zeova raabã, la d sã n kos-a-la ne a Zezi yʋʋre. (Zã 16:23; 1 Zã 5:14) Karen-biig a Zak ra wilgame tɩ kiris-neb kẽer pʋʋsg ra pa reegde, ‘bãmb kosga sẽn ka zemsa yĩnga.’ (Zak 4:3) La d yaool n pa segd n yɩ tao-tao n tags tɩ sã n wõnda d pʋʋsg pa reege, wilgdame tɩ d pa tat Wẽnnaam yam ye. Wakat kẽere, a Zeova tõe n basa neb sẽn balemd-a ne kɩs-sɩd tɩ b pʋʋs-a yell wɛɛngẽ n kaoos t’a yaool n leok-ba. A Zezi yeelame: “Bɩ y [kell n] kose, tɩ b na kõ-yã.” (Matɩe 7:7) Woto yĩnga, d segdame n ‘pʋʋs n da bas ye.’—Rom dãmba 12:12.
Pʋʋs-y wakat fãa
20, 21. a) Bõe yĩng tɩ d segd n pʋʋs n da bas ‘yaoolem wakat’ kãensã pʋsẽ? b) Daar fãa, d sã n kolgd a Zeova bark geerã bõe la d na n paame?
20 Zu-loeesã tara paasg la kengr masã sẽn yaa ‘yaoolem wakat tɩ tood’ beẽ wã. (2 Tɩmote 3:1) Zu-loeesã tõe n kõ-d-la yɩɩr nana-nana. La pʋʋsgã wakat fãa wã na n sõng-d lame tɩ d vɩɩmã kell n tik tẽebã yɛl zutu, baa d zu-loeesã sã n pa satẽ, tɩ d segd makr buud toor-toor la raood komsgo. D sẽn pʋʋsd a Zeova daar fãa wã na n kɩtame tɩ d paam sõngr ning d sẽn datã.
21 A Zeova sẽn ‘wʋmd pʋʋsgã’ zɩ n kong sẽk n na n kelg tõnd ye. (Yɩɩl Sõamyã 65:3) Bɩ d ra yeel abada tɩ d ka sẽk n na n gom ne-a ye. Tõnd zems-n-taarã ne Wẽnnaamã n yaa bũmb ning sẽn tar yõod n yɩɩdã. D ra tol n deem ne zems-n-ta-kãng ye. “Dẽ yĩnga, bɩ d kolg Wẽnnaam barka geer ne raood n paam nimbãan-zoeer la barka, tɩ b sõng tõnd d sẽn dat sõngr wakate.”—Hebre dãmba 4:16.
Wãn to la y na n leokẽ?
• No-rɛɛs a Daniɛll makrã zãmsda tõnd bõe pʋʋsgã yõod wɛɛngẽ?
• Wãn to la d tõe n paas zems-n-taar ning d sẽn tar ne a Zeova wã pãnga?
• Bõe yĩng tɩ d segd n pʋʋs n da base?
• Bõe yĩng tɩ d pa segd n bas tɩ d sẽn tagsd tɩ d ka yõodã gɩdg-d tɩ d pa pʋʋs a Zeova?
[Zãmsgã sogsgã]
[Foto, seb-neng 16]
A Nehemi reng n pʋʋsa koɛɛg-koɛɛg a sũurẽ n yaool n gom ne Rĩmã
[Foto, seb-neng 17]
A Ana pʋʋsa a Zeova n kaoose
[Foto rãmba, seb-neng 18]
A Zezi pʋʋsa yʋng tõor n yaool n na n yãk a tʋm-tʋmdb 12 wã
[Foto rãmba, seb-neng 20]
Daar fãa, soay toor-toor bee d sẽn tõe n tũnug ne n pʋʋse