Karemdbã sogsgo

Tall “vɩɩm a mengẽ” wã rat n yeelame tɩ bõe?

Biiblã yeelame t’a Zezi tara “vɩɩm a mengẽ” la t’a karen-biisã tara ‘vɩɩm b mensẽ.’ (Zã 5:26; 6:53, NW ) La verse kãensã a yiibã võor ka a yembr ye.

A Zezi yeelame: “Wala Ba sẽn tar vɩɩm a mengẽ wã, a kɩtame tɩ Biigã me tar vɩɩm a mengẽ.” (NW ) La nand t’a Zezi yeel gom-kãngã sẽn tar yõod wʋsgã, a reng n yeelame: “Mam yeta yãmb sɩd-sɩda tɩ ned ninga sẽn kelgd mam goama n tẽed sẽn tʋm-a maama, a tara vɩɩm sẽn ka sɛta. . . . Wakat watame la a taame masã tɩ kũum na n wʋm Wẽnnaam Biiga koɛɛga, la neb nins sẽn na n wʋm bãmb koɛɛga na n paama vɩɩm.” Kaanẽ, a Zezi ra gomda tõog sẽn yaa kãseng a Ba wã sẽn na n kõ-a yelle, sẽn yaa kɩt tɩ ninsaalbã tall zems-n-taar ne Wẽnnaamã. Sẽn paase, a Zezi tõe n vʋʋga sẽn ki-bã n kõ-b vɩɩm. Sã n yaa ne a Zezi, tall “vɩɩm a mengẽ” wã rat n yeelame tɩ Wẽnnaam kõ-a-la tõod kãensã. Dẽ, wala a Ba wã, Biriblã me ‘tõe n kõo vɩɩm,’ wa b sẽn lebg gom-kãng to-to wã. (Zã 5:24-26) La yaa wãn to ne a karen-biisã?

Sẽn zems yʋʋmd a yembr loogr poore, a Zezi yeela a kɛlgdbã woto: “Mam yeta yãmb sɩd-sɩda tɩ yãmb sã n ka wãb Ninsaal Biiga nemdo, la y ka yũ a zɩɩm, yãmb ka tar vɩɩm [y mensẽ] ye. Ned ninga sẽn wãbd mam nemd la a yũud mam zɩɩm tara vɩɩm sẽn ka sɛta. La mam na n vʋʋga yẽnda yaoolem daare.” (Zã 6:53, 54) Ka wã, a Zezi yeelame tɩ tall ‘vɩɩm b mensẽ’ wã yaa yembr ne paam “vɩɩm sẽn ka sɛta.” Zĩis a taab Gɛrk Gʋlsg Sõamyã pʋsẽ, b tõe n yãa pipi Gɛrk buud-gomdã pʋgẽ, goam sẽn wõnd tall ‘vɩɩm b mensẽ wã.’ Makr a yiib la woto: “Tall-y yamsem y pʋsẽ” la “b reega b yaood . . . b yĩnsa pʋsẽ.” (Mark 9:50, Sebr Sõngo; Rom dãmba 1:27) Mak-kãensã a yiibã pʋsẽ, goamã ka rat n yeel tɩ b kõta neb a taab yamsem, bɩ tɩ b yaooda ned bũmb ye. La b sẽn gomd bũmb ning yellã yaa tɩ bãmb mensã tara bũmb b pʋsẽ sẽn pid zãnga, bɩ sẽn bɩ n ta. Rẽ n so tɩ ‘vɩɩm b mens pʋsẽ wã’ sẽn be Zã 6:53 pʋgẽ wã rat n yeel bal tɩ b paama vɩɩm tɩ pid zãnga.

A Zezi sẽn da wa n yet t’a karen-biisã tara vɩɩm b mens pʋsẽ wã, a ra gomda a mengã yĩng la a zɩɩm yelle. Kaoosg zugẽ, a Zezi sẽn da wa n lugend a kũumã Tẽegrã, a leb n goma a yĩngã la a zɩɩmã yelle, n kõ a karen-biisã a sẽn da na n kẽes kaool paalgã pʋgẽ wã noor tɩ b rɩ bur sẽn ka rabɩllã la b yũ divẽ wã. Woto rat n yeelame tɩ yaa kiris-neb nins sẽn zae ne vʋʋsem sõng n be kaool paalgã pʋgẽ ne Wẽnnaam a Zeova wã bal n paamd vɩɩm sẽn pid zãng woto bɩ? Ayo. Yʋʋmd n welg yel-kãensã a yiibã sẽn maanã ne taaba. Neb nins sẽn wʋm a Zezi goam nins sẽn be Zã 6:53, 54 pʋgẽ wã ra ka mi tɩ b ra na n wa lugla bũmb tɩ b tẽegd yʋʋmd-yʋʋmde, tɩ sasa kãng bɩ b tũnug ne bũmb sẽn makd Kiristã yĩng la a zɩɩm ye.

Sã n yaa ne Zã sak a 6, a Zezi reng n maka a yĩngã ne mannã, n yeele: “Yãmb ba rãmba ra rɩɩ mann weooga pʋgẽ, la b kiimi. Bur sẽn yit [saasẽ] yaa woto, ned ninga sẽn dɩt-a kõn ki ye. Mam yaa bur sẽn vɩ sẽn yi [saasẽ]. Ned sã n dɩ bur-kãnga, a na n vɩɩ wakat sẽn ka sɛta.” A Zezi yĩngã ne a zɩɩmã yõod ra yɩɩda mann zaalga. Wãn-wãn to? Yaa b sẽn kõ a Zezi yĩngã ‘dũniyã vɩɩmã yĩngã’, n kɩt tɩ nebã tõe n paam vɩɩm sẽn ka sɛtã. * Woto yĩnga, gomd ning sẽn yaa tall ‘vɩɩm yãmb pʋsẽ wã’ sẽn be Zã 6:53 pʋgẽ wã paka neb nins fãa sẽn na n paam vɩɩm sẽn ka sɛtã, yaa saasẽ tɩ yaa tẽng zug me.—Zã 6:48-51.

Wakat bʋg la Kirist karen-biisã paamd vɩɩm b mensẽ, bɩ b paamd vɩɩm tɩ pid zãnga? Sã n yaa ne neb nins sẽn zae ne vʋʋsem sõng n na n dɩ naam Rĩungã pʋgẽ wã, yaa b sẽn na n wa vʋʋg-b tɩ b tɩ vɩɩmd saasẽ wala malɛgs sẽn pa tõe n ki wã. (1 Korẽnt dãmba 15:52, 53; 1 Zã 3:2) La a Zezi ‘piis a taabã’ yẽ paamda vɩɩm sẽn pid zãngã yʋʋm tusr naamã saab poore. Wakat kãng tɩ b zoe n mak-b lame n yã tɩ b yaa wẽn-sakdba, n wilg tɩ b yaa tɩrs n tõe n paam vɩɩm sẽn ka sɛt Arzãn pʋgẽ tẽng zugu.—Zã 10:16; Wilgri 20:5, 7-10.

[Tẽngr note]

 [Foto rãmba, seb-neng a 9]

Kiris-neb hakɩkã fãa tõe n talla ‘vɩɩm b mensẽ’