Y sẽn tõe n maneg y kãadmã n paas to-to
Y sẽn tõe n maneg y kãadmã n paas to-to
MAMS-Y b sẽn na n bas roog t’a sãame. Roogã pẽntiir lagsdame, a sugrã sãame, tɩ zĩigã fãa pid ne sagd menga. Yaa vẽeneg tɩ yʋʋmd ne a to fãa saagã ne sobgã sãama zakã, sẽn paase b ra bas-a lame n ka get a yell ye. Rẽ yĩnga b segd n siig-a lame bɩ? Pa tɩlae tɩ b maan woto ye. Roogã sã n yẽbga sõma la a ket n tar pãnga, b tõe n lebs n maneg-a lame.
Ro-kãngã sẽn yaa to-to wã tẽegd-y-la y kãadmã sẽn yaa to-to wã bɩ? Yʋʋmd ne a to fãa, tõeeme tɩ zu-loeesã toɛy-toɛyã sãama yãmb zĩnd-n-taarã. Tõeeme tɩ ned a yembr yãmb sʋkã, bɩ y yiibã fãa ka ges kãadmã yell sõma ye. Tõeeme tɩ y tagsd wala a Sandy sẽn yeel woto a sẽn zĩnd kãadem pʋgẽ yʋʋm 15 poorã: “Tõnd da ka tar baa fɩ sẽn lagem tõnd ne taab tɩ sã n pa sẽn yaa ned ne a kẽed-n-taagã bal ye. La woto ra ka sek ye.”
Baa yãmb kãadmã sã n yaa woto me, bɩ y ra tolg n yeel tɩ y na n kao-a lame ye. Y tõe n lebs n manega y kãadmã. La rẽ yaa yãmb ne y kẽed-n-taagã sẽn na n sɩd tʋll sõma n maneg y kãadmã la y kogl-a. Tʋlsem sẽn tar pãng woto tõe n kɩtame tɩ y kãadmã vigl kãn-kãe toog wakate. La wãn-wãn la Biiblã tõe n sõng n paas yãmb tʋlsem kãng pãnga?
Pʋlengã baoodame tɩ ned kam fãa maan a sẽn segd n maane
Ned sã n pʋlem t’a na n maana bũmbu, a getame masã tɩ yaa tɩlae ne-a t’a maan bõn-kãnga. Wala makre, ro-met sã n tik a nug kaool sebr zug t’a na n mee roogo, a getame tɩ yaa tɩlae t’a tũ kaoolã noyã. Tõeeme tɩ ro-metã meng ka mi ned ning sẽn dat-a tʋʋmdã ye. Ne rẽ fãa a getame tɩ yaa tɩlae ne-a t’a pids a pʋlengã.
Yaa sɩd tɩ kãadem pa wa tʋʋmd kaool neb sẽn maan ne taab ye, la pʋleng ning kẽed-n-taasã sẽn maan ne taabã baoodame tɩ ned kam fãa maan a sẽn segd n maane. Yãmb ne y kẽed-n-taagã pʋlma Wẽnnaam la ninsaalb taoor tɩ y na n zĩnda ne taaba, baa sẽn ya a soab fãa. A Zezi yeelame: “Naanda naana bãmb, daowa la paga hal sɩngre, la tɩ bãmb yeelame: A yaa woto yĩnga dao na bas a ba ne a ma n zĩnd ne a paga.” La a paase: “Bɩ ned da welg bũmb nins Wẽnnaam sẽn lagem ne taaba ye.” (Matɩe 19:4-6) Dẽ, zu-loees sã n wa wa, yãmb ne y kẽed-n-taagã segd n dɩka sard sẽn pa vigsd n na n pids pʋleng ning y sẽn maan ne taabã. * Pag a yembr yeelame: “Yaa tõnd sẽn da wa n bas n ka le tagsdẽ tɩ yaa kãadmã kaoob la yellã tɩɩmã poor bal la d kãadmã sɩng n lebgd sõma.”
Kãadem pʋleng pa baood tɩ ned kam fãa maan a sẽn segd n maan bal ye. La bõe me yɛs n kẽed sʋka?
Lagem-n-tʋmã paasda kãadem pʋleng pãnga
Kẽed-n-taas sã n pʋlem tɩ b na n zĩnda ne taaba, ka rat n yeel tɩ mo-yõsr ka na n tol n zĩnd b sʋk ye. Mo-yõsr sã n wa, b yiibã segd n tʋlla ne b sũur fãa n welg yellã, ka b pʋlengã yĩng bal ye, la yaa b sẽn nong taabã yĩng me. A Zezi yeela ned ne a pag wɛɛngẽ woto: “Bãmb ka leb n ya a yiib yɛs ye, b yaa yĩng a yembre.”
Yɩ ‘yĩng a yembr’ ne f kẽed-n-taagã rat n yeelame tɩ bõe? Tʋm-tʋmd a Poll gʋlsame n wilg tɩ “raopa tog n nonga b pagb wa bãmb mens yĩnsi.” (Efɛɛz rãmba 5:28, 29) Dẽ, yɩ ‘yĩng a yembrã’ rat n yeelame tɩ f kẽed-n-taag yell segd n pak-f-la wa f meng yell sẽn pak-f to-to wã. Kẽed-n-taasã segd n toeema b tagsgã. Ned kam fãa ka leb n segd n get yɛlã ne a meng tagsg yen-yen bal ye, yaa ne bãmb b yiibã tagsgo. Sagend a yembr yeelame: “Kẽed-n-taas a yiibã ka tog n leb n tagsd wa b pa kẽ kãadem ye, la b tog n sɩng n tagsda wa neb sẽn kẽ kãadem.”
Rẽ yĩnga, yãmb ne y kẽed-n-taagã “tagsda wa neb sẽn kẽ kãadem bɩ”? Ned ne a pag tõe n zĩnda ne taab yʋʋm wʋsg n yaool n ka ‘yĩng a yembr’ zĩ-kãngã wɛɛngẽ ye. La sebr a yembr (Giving Time a Chance) yeelame: “Kãadem rat n yeelame tɩ vɩɩmd ne taaba, la kẽed-n-taas a yiibã sã n maand yɛl wʋsg ne taaba, b kãadmã na n yɩɩ sõma n paase.”
Kẽed-n-taas sẽn ka tar sũ-noog kãadmã pʋgẽ ket n zĩi ne taab b kambã yĩnga, bɩ sẽn na yɩl n da wa paam zu-loees ligdã wɛɛngẽ ye. Neb a taab ket n zĩi ne taaba, bãmb mensã sẽn kis kãadem kaoobã yĩnga, bɩ b sẽn zoet nebã sẽn na n wa tagsd bũmb ning b sã n welg taabã yĩnga. Yaa sɩd tɩ kãadem a woto sẽn kaoosdã zemsa ne pẽgre, la tẽeg-y tɩ y bõn-datlã segd n yaa zĩnd ne taab ne nonglem, la pa zĩnd ne taab n kaoos bal ye.
D sã n pa rat-m-yembr soaba, paasda kãadem pʋleng pãnga
Biiblã reng n togsame tɩ “yaoolem wakate,” neba na n yɩɩ “nong-m-mens rãmba.” (2 Tɩmote 3:1, 2, NW ) Wa bãngr-gomdã sẽn yeelã, wõnda neba sẽn dat n yɩɩd rũndã-rũndã yaa b nong b mense. Kãadem wʋsg pʋsẽ, neba getame tɩ yaa yalemdo, tɩ kẽed-n-taag modgd wʋsg t’a to wã nafdẽ n yaool n pa mi vẽeneg t’a to wã me na n maana woto n lebs-a ye. La kãadem sẽn yaa sõma pʋgẽ, kẽed-n-taasã maoodame la b mongd b mens yɛl kẽer n sõngd taaba. Wãn to la yãmb tõe n maan woto?
Walla tɩ y tagsdẽ tɩ ‘Zĩid-n-taar a woto yõod ne maam yaa bõe?’ wã, sok-y y meng woto: ‘Bõe la m tõe n maan n sõng tɩ m kãadmã yɩ sõma n paase?’ Biiblã yeta kiris-nebã tɩ bãmb ‘ned kam fãa da ges a meng yell bal ye, la bɩ a ges a taab yell me.’ (Filip rãmba 2:4) Y sã n wa bʋgsd Biiblã no-kãngã zugu, bɩ y vaees bũmb nins y sẽn maan semen ning sẽn loogã n gese. Naoor a wãn la yãmb maan sõmblem tʋʋmd tɩ naf y kẽed-n-taagã bala? Yãmb kẽed-n-taagã sẽn da wa n dat n gom ne-yã, baa ne y sẽn da pa rat n kelgã, y kelgame bɩ? Naoor a wãn la yãmb maan bũmb sẽn noom yãmb kẽed-n-taagã n yɩɩd yãmb menga?
Tõeeme tɩ y kẽed-n-taagã pa gũus n yã y tʋʋm sõma wã bɩ a ka tall mi-beoog ye, la y sã n bʋgsd sogs-kãensã zut bɩ y ra bʋ rẽ ye. Sebr a yembr yeela woto: “Ned sã n maand neb a taab neere, b nong n maand-a-la neere n lebse. Dẽ, bɩ yãmb mengã maan y kẽed-n-taagã neer n paase, sẽn na yɩl n sõng-a t’a maan neere.” Yãmb sã n modgd n maand tʋʋm sõma, rẽ na n paasa yãmb kãadmã pãnga, bala wilgdame tɩ y kãadmã tara yõod ne-yã, tɩ y rat n kogl-a.
Ges-y kãadmã wala bũmb sẽn segd n kaoose
Wẽnnaam a Zeova nanda neb sẽn ka basd taaba. Sɩd me Biiblã yetame: “Ned sã n ka bas [a Zeova], bãmb me ka basd a soab ye.” (2 Sãmwɛll 22:26, Sebr Sõngo) Wẽnnaam sakrã baoodame tɩ d sak segls nins a sẽn maan kãadmã a sẽn luglã yĩnga.—Sɩngre 2:24.
Yãmb mengã ne y kẽed-n-taagã sã n ka rat n bas tãaba, y na n gesame tɩ y kãadmã yaa bũmb sẽn segd n kaoose. Tags-y tɩ y na n ket n bee ne taab kiisi, yʋʋma, la yʋʋm pi-gĩn nins sẽn watã pʋsẽ. Pa segd n wa y yamẽ meng tɩ wakat n wat tɩ y ka na n leb n zĩnd ne taab ye. Tagsg a woto na n kɩtame tɩ y zĩnd-n-taarã kaoose. Pag a yembr yeelame: “Baa mam sũurã sã n yik wʋsg ne m sɩdã, tɩ m sũurã sãam wʋsg ne bũmb ning sẽn paamd tõndã, mam ka zoet d kãadmã na n wa sãam ye. Sẽn pak maam yaa d sẽn na n maan to-to tɩ d moorã ne taabã leb n yɩ noogã. Mam ka sãmbd baa bilf tɩ d na n leb n zemsa taab ye, baa wakat kãng m sẽn ka mi rẽ sẽn na n yɩ to-to wã.”
Ges kãadmã wala bũmb sẽn segd n kaoosã tara yõod wʋsg pʋlengã kẽed-n-taasã sẽn maan ne taabã pʋgẽ, la zu-bʋko a yaa bũmb sẽn kae kãadem wʋsg pʋsẽ. Kẽed-n-taas tõe n zabda taab t’a yembr yeel ne sũ-yikri, “Mam Zak 3:8) Kẽed-n-taag raab sã n ka pids t’a yetẽ t’a na n tão n sãeegame yaa wala a sẽn yet bal tɩ: ‘Mam ka get tɩ tõnd kãadmã na n kaoosame ye. M tõe n kao-a-la m sẽn dat wakat ning fãa.’ Tags-kãngã buud tõe n sãama kãadem.
na n loogame!” bɩ “Mam na n baoo ned a to sẽn sɩd nong maam!” La togs sɩdã, naoor wʋsgo a soabã ka tagsd t’a na n sɩd maana wa a sẽn yeelã ye. Ne rẽ fãa, Biiblã yeelame tɩ zɩlemdã tõe n “pida ne zẽnem toaaga.” (Yãmb sã n get kãadmã wala bũmb sẽn na n kaoose, y na n zĩnda ne y kẽed-n-taagã zu-loees la toog wakate. Rẽ me tara nafr a to, bala na n kɩtame tɩ yɩ nana n yɩɩd ne yãmb la y kẽed-n-taagã tɩ y sak taab pãn-komslem la kongre, n maand sũ-mar ne taab la y kõt taab sugri. (Kolos rãmba 3:13) Sebr a yembr wilgame: “Kãadem sẽn yaa sõma pʋgẽ, kẽed-n-taag fãa sakdame t’a to wã tõe n kongame, la tɩ baa ne rẽ b kãadmã tõe n kell n talla pãnga.”
Yãmb kãadmã raare, yãmb ka maan pʋleng ne kãadmã meng bal ye, la y pʋlmame tɩ y na n zĩnda ne ned a to, sẽn yaa y kẽed-n-taagã. Rẽ segd n talla pãn-tusdg sẽn yaa kãseng y tagsgã zug masã la y sẽn tar manesem ning wala yi-kãadã zugu. Rẽ yĩnga yãmb ka tagsd tɩ y segd n zĩnda ne y kẽed-n-taagã, pa y sẽn tẽed ne y sũur fãa tɩ kãadem tara yõod Wẽnnaam nifẽ wã yĩng bal ye, la yaa y sẽn nong a soab ning y sẽn kẽ kãadem ne wã me yĩng sɩda?
[Tẽngr note]
^ sull 7 Wakat ning tɩ yellã sã n wa loog nugu, kẽed-n-taas tõe n tara bʋʋm n na n welg taaba. (1 Korẽnt dãmba 7:10, 11; ges-y Zak pʋgẽ sũ-noogã kʋɩlen-biiga, seb-neng 160-1, a Zeova Kaset rãmbã sẽn yiisã.) Sẽn paase, Biiblã wilgame tɩ b tõe n kaoo kãadem yoob yĩnga.—Matɩe 19:9.
[Zĩ-gũbri/Foto, seb-neng a 5]
Y sẽn tõe n maan bũmb ning masã
Hal sẽn ta zĩ-bʋg la y tʋll ne y sũur fãa n kogl y kãadmã la y paas a sõmblmã? Tõe tɩ y neeme tɩ y tõe n manega y kãadmã n paase. Sẽn na yɩl n paas y sẽn pʋlem tɩ y na n zĩnda ne taabã pãnga, bɩ y modg n maan sẽn pʋgdã:
● Fees-y y mengã. Sok-y y menga: ‘Rẽ yĩnga, m sũurã pʋgẽ m sakame tɩ m kẽe kãadem bɩ, bɩ m ket tagsdame la m maand yɛlã wa m pa kẽ kãadem?’ Bao-y n bãng yãmb kẽed-n-taagã sẽn tagsd to-to ne yãmb zĩ-kãngã wɛɛngẽ.
● Karm-y sõs-kãngã ne y kẽed-n-taagã. Rẽ poor bɩ yãmb y yiibã maag y yĩng n sõs n bãng y sẽn na n maan to-to n paas y sẽn pʋlem tɩ y na n zĩnda ne taabã pãnga.
● Naag-y y kẽed-n-taagã n tʋm tʋʋm sẽn na n paas y sẽn pʋlem tɩ y na n zĩnda ne taabã pãnga. Wala makre, ges-y fot rãmb sẽn tẽegd yãmb kãadmã la yel-kãsems a taab y sẽn da maane. Maan-y bũmb nins yãmb sẽn da nong n maand ne taab roobã wakat la kãadmã pipi yʋʋmã wakate. Naag-y taab n karem zãmsg sẽn tik Biiblã zug kãadmã wɛɛngẽ, Gũusg Gasgã la Réveillez-vous ! wã pʋgẽ.
[Zĩ-gũbri/Foto, seb-neng a 6]
Y kãadmã pʋleng baoodame tɩ y . . .
● Maan y sẽn segd n maanã: “Bɩ f yao bumb ninga fo sẽn pʋlmã. Fo sã n ka maan pʋlengo, yõwã n são fo sẽn na n pʋlem n yaool n ka rol ye.”—Koɛɛg Soaba 5:3, 4.
● Lagem n tʋm: “Neb a yiib n são nin-yende. . . . Bãmb ned a ye sã n lʋɩ, ned a to wã yikda yẽ.”—Koɛɛg Soaba 4:9, 10.
● Modge, la y sak n mong y mense: “Sẽn kõt-a sũ-noog yɩɩda sẽn deegd-a.”—Tʋʋma 20:35, Sebr Sõngo.
● Ges kãadmã wala bũmb sẽn segd n kaoose: “Nonglem . . . tõe n tõoga toog fãa pʋgẽ.”—1 Korẽnt dãmba 13:4, 7.
[Foto rãmba, seb-neng a 7]
Yãmb kẽed-n-taagã sã n dat n gom ne-yã, y kelgdame bɩ?