Kom-bɩɩse, kẽn-y tɩ zems ne a Zeova raabã

KOM-BƖƖS nins sẽn yaa kiris-nebã kẽer mi n wa basa b zakã neb la b tigims n tɩ zĩnd kɛɛng wakat bilfu. Sãnda maana woto sẽn na yɩl n paas b koe-moonegã tʋʋmde. Kẽer me basa b tẽnse, b sẽn dat n kell n da kẽes b toog dũni kãngã yɛlã pʋgẽ wã yĩnga. (Ezai 2:4; Zã 17:16) Tẽns a taab pʋsẽ, a “Sezaar” kɩtame tɩ b kẽes kom-bɩɩs nins sẽn dat n kell n tall b burkĩndã Wẽnnaam taoorã bãens roto, wall a kɩt tɩ b tʋm tʋʋm b sẽn sigl zãmã wã sõngr yĩnga. *—Mark 12:17; Tɩt 3:1, 2.

B sã n wa kẽes kom-bɩ-kãensã bãens b sẽn pa kẽesd b toog dũniyã yɛlẽ wã yĩnga, b mi n zĩnda be ne bi-bees n kaoose. Yɩɩ tɩlae ne kom-bɩɩs kẽer sẽn zãag ne b zagsã neb bʋʋm a taab me yĩng tɩ b lagem ne yoaadb n tʋme. Wãn-to la kom-bɩɩs nins sẽn yaa kiris-nebã bɩ neb a taab b sẽn modg n kẽes yel-kãensã pʋsẽ tõe n mao ne weoogrã la kʋɩɩbgã, la b tõog n kell n ‘kẽn wa sẽn zems Wẽnnaam daabã?’ (1 Tesalonik rãmba 2:12) Wãn-wãn la roagdbã tõe n deng n segl b kambã tɩ b sẽn wa n tɩ be yell ning fãa taoor bɩ b tõog n yals kãn-kãe?—Yelbũna 22:3.

Kom-bɩɩsã zu-loeese

“Mam sẽn wa n ye pa paamd m doagdbã koglg la kãsem dãmbã sẽn da mi maam sõma n get m yell ne nonglmã, nams-m-la hal wʋsgo, la sɩd kẽes-m-la rabeem.” Woto la a Tákis sẽn tar yʋʋm 21 b sẽn da modg t’a zãag ne a yirã rãmbã n maan kiuug 37 wã yeel-yã. * A paasame: “Sasa kẽere, mam da pa ye tar koglg baa bilf ye.” Yɩɩ tɩlae ne a Pétros sẽn tar yʋʋm pisi wã t’a zãag ne a yirã n tɩ maan sẽn yɩɩd yʋʋm a yiibu. A yeelame: “Mam vɩɩmã pʋgẽ, yɩɩ pipi mam sẽn da segd n dɩk sard tɩlae m yembr deemã la tũud-n-taarã wɛɛngẽ. La pa wakat fãa la sard nins m sẽn dɩkã yɩ sõma ye.” Rẽ wɛɛngẽ, a paasame: “Sasa ninga, rabeem n da tar-ma, m sẽn da segd n maan yɛl wʋsg m toorã yĩnga.” A Tássos sẽn yaa kiris-neb kãsem soab a yembr sẽn kaagd kiris-neb kom-bɩɩs nins sẽn be yɛl a woto pʋsẽ wakat fãa wã yeelame: “B zĩid-n-taasã sẽn pa tẽed Wẽnnaam n tar gom-dẽgdo, n kɩɩsd b taoor dãmbã la b tʋmd nen-kɛglmã tõeeme n kɩt tɩ kom-bɩɩs nins sẽn pa gũusd b mens la sẽn ka pãngã rɩk b manesmã.”

B sẽn vɩ la b tʋmd ne neb sẽn pa tũud Biiblã noyã yĩnga, kom-bɩ-kãensã sẽn yaa kiris-nebã segd n gũusa hal wʋsg n da maan wa b zĩid-n-taasã sẽn yaa yoaadb n tar vɩɩm manesem sẽn pa zems ne Biiblã noyã ye. (Yɩɩl Sõamyã 1:1; 26:4; 119:9) Tõe n yɩɩ toog tɩ f ket n zãmsd Biiblã f toor n pa vaandẽ, n kẽnd tigissã wakat fãa la f ra viig koe-noogã moonegã ye. (Filip rãmba 3:16) Tõeeme me n pa yɩ nana tɩ f yãk tẽeb bõn-datɩ la f pids-b ye.

Yaa vẽeneg tɩ kom-bɩɩs nins sẽn yaa kiris-neb sẽn tar kɩs-sɩdã tʋll n taa a Zeova yam b manesmã la b goamã pʋgẽ. B maooda ne b sũur fãa n na n tũ saglg ning b saasẽ Ba wã sẽn kõ-b ne nonglmã: “M biiga, maan yam n kõ maam sũ-noogo tɩ m paam n leok sẽn paoogd-a maamã.” (Yelbũna 27:11) B miime tɩ  b sẽn zãad b mens to-to wã la b yel-manesmã tara pãn-tusdg neb a taabã sẽn tagsd to-to ne a Zeova la ne a nin-buiidã zugu.—1 Pɩɛɛr 2:12.

Kom-bɩɩs nins sẽn maood wa b sẽn tõe tɛk fãa n na n yɩ wa pipi yʋʋm kob-gĩndẽ tẽeb saam-biisã zemsa ne pẽgre. Tʋm-tʋmd a Poll ra pʋʋs n kosa saam-bi-kãens yĩng n yeele: “Bɩ yãmb kẽnd zems ne a Zeova waoogre la a ta bãmb yam ne bũmb fãa, la tɩ yãmb wom biis ne tʋʋm sõama buud fãa la y bɩ Wẽnnaam bãngr pʋgẽ. La tõnd kotame tɩ yãmb pãng paam paasg . . . hal tɩ yãmb na modg ne sũ-mare la sũ-noog daar fãa.” (Kolos rãmba 1:9-11) Biiblã tara kɩbay sẽn wilgd kom-bɩɩs wʋsg sẽn yɩ wẽn-zoɛtb sẽn kõ mak-sõng ne b sẽn tõog n mao n kẽn tɩ zems ne Wẽnnaam daabã, zĩ-yood pʋsẽ la nin-kɩɩsdb ne bõn-naands pʋʋsdb sʋka.—Filip rãmba 2:15.

‘A Zeova ra bee ne a Zozɛfe’

A Zakoob ne a Rasɛll bi-nongr a Zozɛf bi-bɩɩlmã wakate, b ra wa n zãag-a-la ne a ba wã sẽn da yaa wẽn-zoɛtã. B koos-a-la yembd Ezipti. A Zozɛf kõo mak-sõng n tʋm ne a sũur fãa, n yɩ pʋ-peelem soab la a tall vɩɩm manesem sẽn yaa sõma. Baa ne a sẽn da yaa a Potifaar sẽn da pa a Zeova sõgnã yemb-raoogã, a Zozɛf tʋma wʋsg ne yẽesem la pʋ-peelem t’a Potifaar kɩt t’a lebg a zakã fãa yel-gɛta. (Sɩngre 39:2-6) A Zozɛf kell n talla a burkĩndã a Zeova taoore, la baa rẽ sẽn wa n baas n yɩ sabab tɩ b kẽes-a bãensã, a pa sok a meng ‘t’a sẽn tall a burkĩndã a Zeova taoorã yõod bɛɛ ye.’ Baa bãensã roogẽ, a Zozɛf talla zʋg-sõma tɩ pa yã n kaoos la b kɩt t’a ges yɛl-wʋsg yell beenẽ ye. (Sɩngre 39:17-22) Wẽnnaam ning-a-la barka, la wa Sɩngre 39:23 sẽn sɩd yeelã, “[a Zeova] ra bee ne yẽnda.”

A Zozɛf sẽn da zãag ne a roagdbã sẽn yaa wẽn-zoɛtb n da tɩ be wẽn-naands pʋʋsdb sʋkã, a ra tõe n dɩka Ezipt nebã sẽn da yaa yoaadbã vɩɩm manesem nana-nana. La a Zozɛf pa maan woto ye, a kell n tũu Wẽnnaam no-tɩrsã n tõog n tall a vɩɩm manesem sõngã, baa ne makrã sẽn tall pãng wʋsg a zugã. A Potifaar pagã sẽn wa n pẽdgd-a t’a gãand-a wã, a leok-a-la vẽeneg tɩ: “Mam na n yɩɩ wãn n maan yel-wẽn-kãseng woto n beeg m Wẽnnaam?”—Sɩngre 39:7-9.

Rũndã-rũndã, kom-bɩɩs nins sẽn ya a Zeova Kaset rãmbã segd n tũu Biiblã sẽn keoogd-b tɩ b ra tall tũud-n-ta-wẽnse, reem sẽn naag ne yoob yɛla, tɩ b ra ges filim dãmb la sɛb sẽn wilgd yoob yɛl la b ra kelg mizik yoodã. B sak n deegame t’a Zeova “nee zĩiga fãa. [A] nee nin-wẽnsa ne nin-sõama wã fãa.”—Yelbũna 15:3.

A Moiiz zãgsa “sũ-noog ning yel-wẽnã sẽn kõtã”

B wuba a Moiiz a Faraõ zakã pʋgẽ, sẽn da yaa wẽn-naands pʋʋsg la yõ-noogr zĩigã. Biiblã  yeelame tɩ: “Ne tẽebo, a Moiiz . . . ka sak tɩ b bool yẽnda tɩ Faraõ bipugl biig ye. Yẽ tagsame t’a sã n lagem ne Wẽnnaam nebã n sak namsgo yaa neer n yɩɩd sũ-noog ninga yel-wẽna sẽn kõt wakat bilf pʋgẽ wã.”—Hebre dãmba 11:24, 25.

Zood ne dũniyã tõe n talla nafa kẽere, la yaa nafa sẽn pa na n kaoose. Nafa kãens sẽn tõog n kaoos yaa wakat ning sẽn ket dũni-kãngã yĩngã tɛk bala. (1 Zã 2:15-17) Rẽ yĩnga, kõn yɩ yam tʋʋmd tɩ d tũ a Moiiz makrã sɩda? Biiblã yeelame t’a “talla tẽeb kãn-kãe wa a yãa neba nin sẽn ka tõe n yã a soabã.” (Hebre dãmba 11:27) A ra tika a yamã fãa a yaab rãmbã sẽn yɩ wẽn-zoɛtbã sẽn da gẽegd tẽeb rogem-pʋɩɩr ningã zugu. A Moiiz vɩɩmã pʋgẽ, a ra geta a Zeova raabã wala yẽ meng raabo, tɩ bõn-datl ning a sẽn da yãkã ya a maan Wẽnnaam daabã.—Yikri 2:11; Tʋʋma 7:23, 25.

Kom-bɩɩs sẽn yaa wẽn-zoɛtb sã n wa tɩ be neb sẽn pa mi Wẽnd la sẽn pa tar zood manesem sʋka, b tõe n paasa b zems-n-taarã ne a Zeova, b sẽn na n zãmsd Biiblã n bãngd “neba nin sẽn ka tõe n yã a soabã” sõma n paasdẽ. Kiris-ned tʋʋmã na-kẽndr sẽn yaa sõma wala kẽnd tigissã n pa vaandẽ la koe-noogã mooneg na n sõnga kom-bɩ-kãensã tɩ b kell n tik b yamã fãa tẽebã yɛl zutu. (Yɩɩl Sõamyã 63:7; 77:13) B segd n modg n paama tẽeb sẽn tar pãng la saagr wala a Moiizi. Yɩta yam tʋʋmd tɩ b mao n tik b tagsgã la b tʋʋmã a Zeova zug la b maan sũ-noogo, b sẽn paam n ya a zo-rãmbã yĩnga.

A pẽga Wẽnnaam ne a no-goama

Bi-bɩɩg a ye me sẽn kõ mak-sõng a sẽn da wa n zãag ne a yir dãmb yaa Israɛll bi-pʋgl ning Siiri nebã sẽn da yõk Wẽnnaam no-rɛɛs a Eli wakatẽ wã. A wa n lebga Siiri tãb-biis naab a Naama sẽn yaa wãoorã pag yem-poaka. Bi-pugl kãngã yeela a zu-soben-poakã t’a “zaka soab sã n da kẽngẽ Wẽnnaam no-rɛɛs ninga sẽn be Samari wã nengẽ, a na n maaga a wãoodã.” Kasetã a sẽn kõ wã kɩtame t’a Naama kẽng a Eli nengẽ Israɛll n tɩ paam a wãoodã sãoogre. Sẽn paase, a Naama lebga a Zeova balemda.—2 Rĩm dãmba 5:1-3, 13-19.

Bi-pugl kãngã makrã wilgda vẽeneg tɩ baa kom-bɩɩsã sã n wa zãag ne b roagdbã, b segd n kell n talla goam sẽn pẽgd Wẽnnaam. Rẽ yĩnga bi-puglã sã n da minim n gomda goam “sẽn ka sõama” wall “kʋʋsem goamã,” a ra na tõog n yiis gom-sõng sor ning a sẽn paama pʋgẽ sɩda? (Efɛɛz rãmba 5:4; Yelbũna 15:2) A Níkos sẽn yaa bi-bɩɩg b sẽn kẽes bãens roog a sẽn wa n tar yʋʋm 20 a sẽn pa kẽesd a toog dũniyã yɛlẽ wã yĩng yeelame: “B sẽn da wa n kẽes maam ne saam-biis a taab sẽn yaa kom-bɩɩs bãens roogẽ tɩ m da zãr ne m doagdbã la tigingã kãsem-dãmbã, mam gũus n gesame tɩ goam nins tõnd sẽn da gomdã wa n ye pa sõma ye. Rẽ pa yɩ pẽgr n kõ a Zeova ye.” La zu-noogo, b sõnga a Níkos ne a taabã tɩ b tũ saglg ning a Poll sẽn da kõ yel-kãngã wɛɛngẽ wã: “Yoob ne dẽgd fãa la  zoe-bõne, bɩ y ra sak n pʋd bõn-kãens yãmb sʋk ye, a wa sẽn zems Wẽnnaam neba.”—Efɛɛz rãmba 5:3.

A Zeova ra yaa vẽeneg ne-ba

Yell ning a Daniɛll tũud-n-taas a tãabã sẽn yaa Hebre rãmbã sẽn sɛg tẽn-kʋdem wẽndẽ Babilonnã pʋgẽ wã wilgdame t’a Zezi sẽn da yeel tɩ ned ninga sẽn maand sɩd ne bũmb bilfu, a maanda sɩd ne bõn-kãseng me wã yaa sɩda. (Luk 16:10) B sẽn da wa n yeel kom-bɩɩsã tɩ b rɩ rɩɩb a Moiiz tõogã sẽn da gɩdgã sasa, b ra tõe n kõo b mens bʋʋm n tags tɩ b sẽn yaa yembs tẽn-zẽng pʋgẽ wã yĩnga, yaa b sak n dɩ bala. La b sẽn pa reem ne bõn-kãngã sẽn da wõnd yel-bilã, b sɩd paama barka! B nobame la b tall yam n yɩɩg kom-bɩɩs a taabã fãa sẽn da rɩt na-yirã rɩ-noodã. Sãmbg kae tɩ b sẽn maan kɩs-sɩd bõn-kãngã sẽn yɩ bilfã pʋgẽ wã kõ-b-la raood ye. Woto kɩtame tɩ b sẽn wa n mak-b mak-kãseng n yeel tɩ b wõgemd n balem bõn-naandgã, b tõdgame n pa kɩɩs Wẽnnaam ye.—Daniɛll 1:3-21; 3:1-30.

A Zeova sɩd ra yaa vẽeneg ne kom-bɩɩs a tãab kãensã. Baa ne b sẽn da zãr ne b yiyã la Wẽnnaam balengã zĩigã, b ra rɩka sard kãn-kãe n na n lak b mens ne dũniyã neb n kell n yɩ yɩlma. (2 Pɩɛɛr 3:14) B zems-n-taarã ne a Zeova wã ra tara yõod hal wʋsg ne-b n kɩt tɩ b ra sak meng n na n ki a poorẽ.

A Zeova pa na n bas-y ye

Kom-bɩɩsã sã n wa zãag ne neb nins b sẽn nong la b tar bas-yard ne wã tɩ rabeem la yam-yoog tar-ba, b bee bʋʋm. La b yaool n tõeeme n mao ne b zu-loeesã n tall bas-yard zãng-zãng t’a ‘Zeova pa na n bas-b ye.’ (Yɩɩl Sõamyã 94:14) Kom-bɩ-kãensã ‘sã n namsd tɩrlem yĩnga,’ a Zeova na n sõng-b lame tɩ b ‘kẽn pʋ-peelem ne tɩrlem zugu.’—1 Pɩɛɛr 3:14; Yelbũna 8:20.

A Zeova kõo a Zozɛf ne a Moiiz la Israɛll bi-puglã sẽn da lebg yambã ne kom-bɩɩs a tãabã sẽn yaa Hebre rãmbã pãnga, la a ning-b bark wʋsg n pa tol n bas-b ye. Rũndã-rũndã, a tũnugda ne a vʋʋsem sõngã, a Gomdã la a siglgã n teend neb nins sẽn ‘zabd tẽebã zabrã’ n bĩngd-b “vɩɩm sẽn ka sɛtã” tɩ na n yɩ b keoore. (1 Tɩmote 6:11, 12) Sɩda, kẽn tɩ zems ne a Zeova raabã yaa bũmb sẽn sɩd tõe, la yaa yam bũmb d sẽn segd n maane.—Yelbũna 23:15, 19.

[Tẽngr not rãmbã]

[Zĩ-gũbri, seb-neng 11]

ROAGDBA, SEGL-Y Y KAMBÃ

“Nina komdibli a sẽn dog a yãadem wakat yaa wa pɛɛm sẽn be gãndaoog nugẽ.” (Yɩɩl Sõamyã 127:4) F pa tõe n tão peemd yaar t’a yõg bũmb ning f sẽn datã ye. Rẽnd f wõon sõma n tão. Woto, kambã me sã n pa paam b roagdbã zãmsg la b sor-wilgr sõma, b pa wat n tõog n mao ne vɩɩmã zu-loees ye.—Yelbũna 22:6.

Kom-bõonegã mi n lʋɩta ‘yãadem datem wẽnsã’ pʋgẽ tao-tao. (2 Tɩmote 2:22) Biiblã wilgame tɩ “sãbsg ne tãsg kõta yam. La b sã n bas biig t’a maan a yam, a ningda a ma yãnde.” (Yelbũna 29:15) B sã n bas biig n pa wilg-a tɩ pa bũmba fãa la a segd n maane, a sã n wa zãag ne a roagdbã a pa na n tõog n mao ne vɩɩmã zu-loees ye.

Roagdb nins sẽn yaa kiris-nebã segd n zãmsa b kambã tɩ b bãng dũni kãngã vɩɩmã zu-loeese, a weoogrã la a yel-toodã tɩ yɩ vẽenega. Ne manesem sẽn pa na n koms b kambã raoodo, b tõe n maaga b yĩng n bilg b kambã zu-loees nins bi-bɩɩg sẽn tõe n wa sege, a sã n wa zãag ne a yirã. Zãms-kãng n paas Wẽnnaam sẽn kõt yam ningã na n ‘kõo zɩtbã yẽesem la kõ kambã bãngr ne yam.’—Yelbũna 1:4.

Roagdb nins sẽn zãmsd b kambã Wẽnnaam noyã sõma wã sõngd-b lame tɩ b tõe n mao ne vɩɩmã zu-loeese. Roagdbã sã n maand b zak pʋgẽ Biibl zãmsgã n pa vaandẽ, n yẽsd sõma ne b kambã la b sɩd rat b neere, tõe n sõng-b lame tɩ b tõog n gʋʋl-b sõma. Roagdbã segd n zãmsa b kambã wẽn-zoeer n segl-b sõma sẽn na yɩl tɩ b wa tõog n ges b mens yell b toor b vɩɩmã pʋgẽ. B tõe n zãmsa b kambã ne bãmb mensã mak-sõng n wilg-b tɩ b bãng tɩ b tõe n vɩɩmda dũniyã pʋgẽ la b tõog n kell n pa yɩ dũniyã rẽnd ye.—Zã 17:15, 16.

[Foto, seb-​neng a 8]

Wa n yɩɩ tɩlae ne kom-bɩɩs kẽer sẽn yaa kiris-neb tɩ b zãag ne b zagse

[Foto rãmba, seb-​neng a 9]

Kom-bɩɩsã tõe n dɩka a Zozɛf togs-n-taar n yals kãn-kãe makr taoore, la b kell n tall vɩɩm manesem sẽn yaa yɩlemde

[Foto rãmba, seb-​neng 10]

Rɩk-y Israɛll bi-puglã togs-n-taare, a sẽn pẽg a Zeova ne a goam a yembdã weoogã