Sẽn na yɩl n paam keoorã, bɩ y tall yõk-m-menga
Sẽn na yɩl n paam keoorã, bɩ y tall yõk-m-menga
“Ned ning fãa sẽn kẽed yĩn-wɩsgr wags-taab pʋgẽ yõkda a meng bũmb fãa pʋgẽ.”—1 KORẼNT DÃMBA 9:25, NW.
1. Wa sẽn zems ne Efɛɛz rãmba 4:22-24, wãn to la neb milyõ rãmb yeel a Zeova tɩ n-ye?
YÃMB sã n deega lisg n ya a Zeova Kaset soaba, yãmb togsa zãma wã taoor tɩ y rat n kẽesa y toog maoor pʋgẽ t’a keoorã yaa vɩɩm sẽn pa satã. Yãmb yeelame tɩ y sakame n na n maan a Zeova raabã. Nand tɩ d rɩk d meng n kõ a Zeova, tõnd wʋsg ra segd n maana toeeng wʋsg sẽn na yɩl tɩ d sẽn dɩk d meng n kõ a Zeova wã tall pãnga, tɩ Wẽnnaam sak-a. D tũu tʋm-tʋmd a Poll sagl-kãngã a sẽn taas kiris-nebã: “Bas[-y] yãmb pĩnd tʋʋma sẽn yaa nin-kʋdga rẽnda sẽn sãamd yẽnda ne a ratem wẽnga fãa sẽn yaa belgrã, . . . n yeelg nin-paalga Wẽnnaam sẽn naan wa bãmb wẽnego ne tɩrlem la pʋ-peelem sẽn wat ne sɩda.” (Efɛɛz rãmba 4:22-24) Woto rat n yeelame tɩ nand tɩ d yeel tɩ n-ye, sã n yaa ne rɩk d meng n kõ Wẽnnaamã wɛɛngẽ, yɩɩ tɩlae tɩ d yeel tɩ ayo, n zãgs d pĩnd vɩɩm manesmã sẽn da pa zemsã.
2, 3. Wãn to la 1 Korẽnt dãmba 6:9-12 wilgd toeeng buud a yiib d sẽn segd n maan n tõog n ta Wẽnnaam yam?
2 Nin-kʋdgã nens kẽer neb nins sẽn dat n lebg a Zeova Kaset rãmbã sẽn segd n basã yaa yɛl Wẽnnaam Gomdã sẽn gɩdg vẽenega. A Poll sõdga bãmb sãnda a lɛtr ning a sẽn taas Korẽnt dãmbã pʋgẽ, n yeele: “Nin-yoaadba ne bõn-naands pʋʋsdba la raop sẽn maand tɩ yɩ wa pagba la raglem dãmba la wagda ne zoe-bõn dãmba la rã-yũudba la nin-tʋʋdba ne fãadba ka na n paam Wẽnnaam soolem ye.” Rẽ poore, a wilgame tɩ pipi yʋʋm kob-gĩndẽ kiris-nebã maana toeeng ning sẽn yaa tɩlaeyã, la a paase: “La yãmb kẽer da yaa woto.” Bãng-y t’a yeelame tɩ b ra yaa woto, la a pa yeel tɩ b yaa woto ye.—1 Korẽnt dãmba 6:9-11.
3 A Poll wilgame tɩ toeeng tõe n yaa tɩlae zĩis a taab me, bala a paasa woto: “Mam tara [sor n tõe n] maan bũmb fãa, la ka bũmb fãa n be yõod ye.” (1 Korẽnt dãmba 6:12) Woto, rũndã-rũndã, neb wʋsg sẽn dat n yɩ a Zeova Kaset rãmb neeme tɩ b segd n zãgsa yɛl sẽn pa be nafr bɩ sẽn pa tar yõod sẽn kaoosda, baa noy sã n ka be n gɩdgd rẽ maanego. Tõe n yaa yɛl sẽn dɩt sẽk la sẽn tõe n kɩt tɩ b lak n bas bũmb nins yõod sẽn yaa kãsems n yɩɩda.
4. Bõe la kiris-neb nins sẽn dɩk b mens n kõ Wẽnnaamã sak n deeg ne a Polle?
4 Yaa ne yamleoog la ned rɩkd a meng n kõ Wẽnnaam, la pa ne nin-gãnengã, tɩ yaa wala rẽ baooda modg-m-meng sẽn loog noor ye. Kiris-neb nins sẽn dɩk b mens n kõ Wẽnnaamã sak n deega a Poll sẽn yeele, a sẽn wa n lebg Kirist karen-biigã poorã. A yeelame: “Yaa [a Zezi] yĩng la mam bas bũmb fãa n geelgd bãmb wa sagdo tɩ mam tõe n paam Kirist.” (Filip rãmba 3:8) Ne sũ-noogo, a Poll zãgsa yɛl yõod sẽn paoode, sẽn na yɩl n tõog n ket n sakd Wẽnnaam.
5. Zoe-bʋg buud la a Poll zoe n tõoge, la wãn to la tõnd me tõe n maan woto?
5 A Poll talla yõk-m-meng a tẽebã zoees pʋgẽ, la a tõog n baas n yeela woto: “Mam zaba zabr sõama, mam zoee zoees n tõoge, mam talla tẽebo. La masã, tɩrlem maanf bĩnga mam yĩnga, tɩ Zusoaba sẽn yaa bʋ-kaood tɩrg soaba na n kõ maam daar kãnga, la a ka maam bal ye, yaa neb nins fãa sẽn nong bãmb waoongã.” (2 Tɩmote 4:7, 8) Daar n wat tɩ d na n tõog n yeel woto bɩ? Na n yɩɩ woto, d sã n tar yõk-m-meng d sẽn zoet kiris-nebã zoees n pa bas hal tɩ wa ta a tɛka.
Yõk-m-meng yaa tɩlae sẽn na yɩl n maan neere
6. Yõk-m-meng yaa bõe, la yaa yɛl a yiib bʋs pʋsẽ la d segd n tall-a?
6 Hebre la Gɛrk gom-biis nins b sẽn lebg tɩ ‘yõk-m-meng’ Biiblã pʋgẽ wã võor meng-meng tɩ loee ne ned sẽn tar tõog a meng zugu. Naoor wʋsgo, b tɩ loee ne f sẽn na n yõk f meng n da maan wẽng ye. La yaa vẽeneg tɩ yõk-m-meng me yaa tɩlae, d sã n dat n tall d yĩnsã n maan tʋʋm-sõma. Ninsaal sẽn pa zems zãngã nong n dat n maana wẽnga, yaa rẽ n so tɩ d maoorã tɩ loe ne yɛl a yiibu. (Koɛɛg Soaba 7:29; 8:11) D sẽn yõkd d mens n pa rat n maan wẽngã sasa, d segdame me n bao n maan neere. Sɩda, d sã n yõk d mensã sẽn na yɩl n maan neere, yaa manesem nins sẽn yaa sõma n yɩɩdã a yembr sẽn na yɩl n da maan wẽnga.
7. a) Bõe yĩng la d segd n pʋʋs wa a Davɩɩde? b) Yaa d sẽn na n tags bõe zug n na n sõng-d tɩ d tall yõk-m-meng n paase?
7 Vẽenega, yõk-m-meng yaa tɩlae, d sã n dat n vɩɩmd tɩ zems ne d rɩk-m-meng n kõ Wẽnnaamã. D segd n pʋʋsa wa a Davɩɩd woto: “Mam Wẽnnaam, bɩ y maan sũur sẽn tar pʋ-peelem n kõ maam, la y leb n kõ maam yam sõama sẽn ka yuusd ye.” (Yɩɩl Sõamyã 51:12) D tõe n tagsa nafa nins d sẽn paamde, d sã n lak d mens ne yɛl sẽn yaa wẽns bɩ sẽn sãamd d yĩnsã. D sã n pa lak d mens ne yel-kãense, tags-y bi-wẽns nins sẽn tõe n wa wã: yaa bã-kɛgemse, mo-yõs la ki-pẽbr menga. La tags-y nafa nins d sẽn paamde, d sã n tũ vɩɩm manesem ning a Zeova sẽn dat tɩ d tũ wã. La d pa segd n yĩm me tɩ d sũurã yaa zãmb soab ye. (Zeremi 17:9) D segd n dɩka sard sẽn pa vigsd n da bas tɩ d sũurã tus-d tɩ d reem ne a Zeova noyã tũub ye.
8. Yel-bʋg sẽn yaa sɩd la d sẽn vɩɩmd bũmb ningã zãmsd tõndo? Rɩk-y makre.
8 Tõnd wʋsg mikame tɩ d sã n tʋll n maan sẽn segde, yĩngã ratem nong n dat n kiisa tʋlsem kãngã. D rɩk makr ne Rĩungã moonego. A Zeova sũur nooma a sẽn ne ninsaalb sẽn sak n kẽes b mens yõe fãagr tʋʋm-kãngã pʋgẽ wã. (Yɩɩl Sõamyã 110:3; Matɩe 24:14) Ne tõnd wʋsgo, pa yɩ nana tɩ d zãms koɛɛgã mooneg zãma sʋk ye. Yɩɩ tɩlae tɩ d yõk d mense, la tõe tɩ ket n yaa woto. D ra segd n ‘modga d mengã’ la d ‘tõog d yĩngã,’ n pa bas-a t’a kẽes-d kʋɩɩng pʋgẽ ye.—1 Korẽnt dãmba 9:16, 27; 1 Tesalonik rãmba 2:2.
“Bũmb fãa pʋgẽ”
9, 10. Tall ‘yõk-m-meng bũmb fãa pʋgẽ’ wã baoodame me tɩ d maan bõe?
9 Biiblã sẽn sagl-d tɩ d tall ‘yõk-m-meng bũmb fãa pʋgẽ’ wã wilgdame tɩ pa d sẽn na n modg n da yik d sũur bala, bɩ n da yo bal ye. D tõe n tagsame tɩ d tara yõk-m-meng bõn-kãensã pʋsẽ, la sã n yaa woto, d sũur segd n yaa noogo. La yaa wãn to ne vɩɩmã nens a taabã pʋsẽ, zĩis nins sẽn pa wõnd yõk-m-mengã tallg yaa tɩlae woto wã? D rɩk makr ne d sẽn na n vɩ tẽng sẽn tar arzɛk pʋgẽ, tɩ neb wʋsg tar laog wʋsgo. Kõn yɩ yam bũmb tɩ d zãms ayo yeelgo, ne teed nins raab sẽn pa tɩlaeyã sɩda? Roagdbã segdame n zãms b kambã tɩ b ra ra bũmb ning fãa b sẽn ne, bũmbã sẽn be yamleoogo, bɩ b sẽn tar ligd n na n da-a wã yĩng bal ye. Yaa sɩd tɩ sẽn na yɩl tɩ sagl-kãens tall pãnga, rẽndame tɩ roagdbã meng kõ mak-sõngo.—Luk 10:38-42.
10 D sã n zãms n yõkd d mens n pa raad te-kãensã, na n kɩtame tɩ d sẽn dɩk sard n na n tall yõk-m-mengã pãng paase. Na n leb n sõnga tõnd tɩ d tall naneb n paas ne teed nins d sẽn zoe n tarẽ wã, tɩ kɩt tɩ d zoe neb nins sẽn pa tõe n paam teed kẽerã nimbãanega. Yaa sɩd tɩ maan-tɩ-zemsã kɩɩsda zãma wã sẽn nong n yetẽ tɩ “maan sẽn noom-fo,” bɩ “sẽn yaa sõma n yɩɩdã toga ne-fã.” Piblisite wã fʋʋsda nebã sẽn na yɩl tɩ b pids b tʋlsmã zĩig pʋgẽ, la yaa sẽn na yɩl n paam tɩ yõod kẽ-b bala. Yel-kãngã tõe n gɩdga tõnd tɩ d pa modg n tall yõk-m-meng ye. Erop tẽng sẽn tar arzɛk zʋrnall a yembr yeela sẽn pa kaoose tɩ: “Tʋlsem wẽnsã kɩɩsg sã n baoodẽ tɩ neb nins sẽn be naong wʋsg pʋgẽ wã mao wʋsgo, mao-kãng yaa toog n yɩɩd ne neb nins sẽn vɩ tẽns nins sẽn tar arzɛk wʋsg pʋsẽ rũndã-rũndã wã.”
11. Bõe yĩng tɩ d segd n yõk d mens n da bao sẽn pa tɩlae wã, la bõe n kɩt tɩ rẽ yaa toogo?
11 Sã n yaa toog ne tõnd tɩ d bãng tõnd sẽn datã la bũmb nins sẽn sɩd yaa tɩlae ne-dã n welge, yaa sõma tɩ d reng n tags n ges d sẽn dat n maan bũmb ninga sã n pa yalemdo. Wala makre, d sã n pa rat n yiisd d ligda yaare, tõe tɩ d segd n dɩka sard n da ra teed sama, bɩ d sã n wa rebd teed raabo, bɩ d ra zɩ ligd wʋsg ye. Tẽeg-y t’a Poll yeelame tɩ “ned sẽn sakd Wẽnnaam la a maand sũ-noog ne a sẽn yaa bũmb ningã, yõwã tara yõod wʋsgo.” A wilgame: “Tõnd ka zɩ bũmb n wa dũniyã pʋgẽ ye, la yaa sɩda tɩ tõnd ka tõe n zɩ bũmb n yi ye. Dẽ yĩnga, tõnd sã n tar dɩɩb ne futu, yõwã sekda tõndo.” (1 Tɩmote 6:6-8) Tõnd maanda woto bɩ? Sẽn na n yɩl tɩ d vɩɩmã ra gĩd ne yɛl wʋsg sẽn noom tõnd bala, baa bõn-kãens sẽn yaa to-to, rɩlla d rɩk sard sẽn tar pãng rẽ yĩng la d tall yõk-m-menga. La zemsame tɩ d zãms rẽ maanego.
12, 13. a) Zĩ-bʋs wɛɛngẽ la kiris-neb tigissã baood yõk-m-menga? b) Zĩis a taab bʋs pʋsẽ la d segd n tall yõk-m-menga?
12 D segd n talla yõk-m-meng wʋsg kiris-neb tigissã la tigis-kãsemsẽ wã. Wala makre, yõk-m-mengã yaa tɩlae sẽn na yɩl n da bas tɩ d yamã gõ tigisgã wakat ye. (Yelbũna 1:5) Tõe n yaa tɩlae tɩ d tall yõk-m-meng n da walemd ne sẽn zĩ n kɛg-b tõndã n tiisd neb a taabã, wall n pa kelgd sõsdã sõma ye. Sigl d sẽkã sõma n tõog n wa lɛɛrã baooda yõk-m-menga. Sẽn paase, yõk-m-meng tõe n yaa tɩlae sẽn na yɩl n bao sẽk n segl tigissã la d kẽes d mens b pʋsẽ.
13 D sã n tar yõk-m-meng yel-kɩds pʋsẽ, na n kɩtame tɩ d tõog n maan woto yel-kãsems pʋsẽ. (Luk 16:10) Woto, ad sɩd yaa sõma tɩ d kibl d mensã n karem Wẽnnaam Gomdã la sɛb nins sẽn tik Biiblã zugã wakat fãa, n zãmsd-b la d bʋgsd d sẽn zãmsd bũmb ningã zugu! Ad sɩd yaa yam tʋʋmd tɩ d kibl d mense, nug tʋʋma, zoodo, tagsa la meng minund sẽn pa zemsã wɛɛngẽ, bɩ d kibl d mens n yeel ayo, ne tʋʋm nins sẽn tõe n sãam tõnd sẽkã sẽn tar yõod Wẽnnaam tʋʋmdã yĩngã! D sã n tar tʋʋm wʋsg a Zeova balengã pʋgẽ, sɩd na n kogla tõnd ne yɛl nins sẽn tõe n zãag tõnd ne a Zeova dũni gill tigingã tẽeb arzãna.
Yɩ-y neb sẽn bɩ ne yõk-m-mengã maasem
14. a) Wãn to la kambã segd n zãms yõk-m-menga? b) Kambã sã n zãms yõk-m-mengã tɩ b nan paooda, rẽ nafa wã yaa bõe?
14 Bi-pɛɛlg pa tar yõk-m-meng ye. Sebr sẽn gomd kamb yel-manesem yell wilga woto: “Yõk-m-mengã pa wat nana-nana bɩ zĩig pʋgẽ woto ye. Kom-peelsã la kom-kɩdsã rata b roagdbã sor-wilgr la b sõngr sẽn na yɩl n sɩng yõk-m-meng zãmsgo. . . . Ne roagdbã sõngre, biigã yõk-m-meng paasda yʋʋm nins fãa a sẽn be lekollẽ wã sasa.” Vaeesg b sẽn maan kamb sẽn tar yʋʋm a naas-naas zug wilgame tɩ kamb nins sẽn zãms yõk-m-mengã “nong n yaa kamb sẽn bɩt tɩ b vɩɩmã kɩls tɩ zemse, tɩ neba nong-b n yɩɩda, sẽn tar daoodo, sẽn tar bas-m-yam la sẽn yaa kom-bɩɩs b sẽn tõe n tall bas-yard ne.” Kamb nins sẽn da pa sɩng n zãmsd rẽ wã “nong n pa baood neb a taab zĩigẽ, b sũy sãamda tao-tao, la b yaa tõtba. Yɩɩrã tõogd-b-la nana-nana n yɩɩda, la b ka baood n na n maan tʋʋm-kãsems ye.” Vẽenega, sẽn na yɩl tɩ biig wa yɩ kãsem vɩɩm sẽn kɩls tɩ zemse, a segd n zãmsa yõk-m-menga.
15. Bõe la yõk-m-meng kaalem wilgda, tɩ rẽ kɩɩsd bõn-datl bʋg sẽn be Biiblã pʋgẽ?
15 Woto, tõnd me sã n dat n lebg kiris-neb sẽn bɩ, d segd n zãmsa yõk-m-mengã. Yõk-m-meng kaalem wilgdame tɩ d ket n yaa kom-peels tẽebã wɛɛngẽ. Biiblã sagenda tõnd tɩ ‘yam vẽnegrã wɛɛngẽ bɩ d yɩ neb sẽn bɩ.’ (1 Korẽnt dãmba 14:20) Tõnd bõn-datl yaa “d fãa paam tẽeb a yembre, la yam vẽnegre n bãng Wẽnnaam Biigã, tɩ tõnd bɩ zãnga n zems wa Kirist sẽn zems zãngã.” Bõe yĩnga? “Dẽ, tõnd kõn leb n yɩ wa kamb sẽn ka yam sẽn sakd kareng buud toor-toor wa sobg sẽn dɩkd bũmbu, la neba belgre la b sɩlem wẽnga b sẽn baood weer tɩ belg neba ye.” (Efɛɛz rãmba 4:13, 14) Vẽenega, zãms yõk-m-mengã tara yõod wʋsg ne tõnd tẽebã.
D sẽn na n bɩɩs yõk-m-meng to-to
16. Wãn to la a Zeova kõt a sõngre?
16 Sẽn na yɩl n bɩɩs yõk-m-menga, d data Wẽnnaam sõngre, la d tõe n paama sõng-kãngã. Wala nin-gɛtga, Wẽnnaam Gomdã wilgda tõnd ned kam fãa zĩig ning d sẽn segd n toeema, la a kõta tõnd sagls sẽn wilgd d sẽn na n maan dẽ to-to. (Zak 1:22-25) D saam-biisã sẽn tar nonglmã me rat n sõng-d lame. Kiris-neb kãsem dãmbã wilgdame tɩ b yaa wʋmdba, n kõt tõnd sõngre. A Zeova mengã kõta a vʋʋsem sõngã ne yamleoogo, d sã n pʋʋs n kos-a. (Luk 11:13; Rom dãmba 8:26) Woto yĩnga, bɩ d rɩ segl-kãensã nafa wã ne sũ-noogo. Sagls nins b sẽn kõ zĩ-gũbrã zĩigẽ wã tõe n sõng-d lame.
17. Raood kengr bʋg la Yelbũna 24:16 kõt tõndo?
17 A Zeova sẽn nand modgr nins d sẽn maand n dat n ta a yamã sɩd yaa bũmb sẽn kõt belsgo! Rẽ segd n kɩtame tɩ d ket n maood n na n bao yõk-m-mengã n paase. Baa tõnd lʋɩɩsã sõor sẽn ya soab fãa, d pa segd n bas modgr abada. “Tɩ bõe, nin-sõng tõe n lʋɩɩ naoor a yopoe n le yiki.” (Yelbũna 24:16) Wakat buud fãa tõnd sẽn tõog n ta a Zeova yam, seka sũ-noog maanego. D tõe n kɩsa sɩd me t’a Zeova sũur nooma ne-do. A Zeova Kaset soab a yembr n yeel tɩ sẽn deng t’a rɩk a meng n kõ a Zeova, a sã n da tõog n pa yũ sɩgaar semen tõr fãa, a da raada bũmb sẽn tar yõod ne ligd ning a yõk-m-mengã sẽn sõng-a t’a tigsã n keo a menga.
18. a) Tõnd sẽn maood n na n yõk d mensã tɩ loee ne bõe maanego? b) Bas-m-yam bʋg la a Zeova kõt tõndo?
18 Sẽn yɩɩd fãa, d segd n tẽegame tɩ yõk-m-mengã tɩ loee ne yamã la sũurã. A Zezi gom-kãngã n wilgd rẽ: “Mam yeta yãmba tɩ ned ninga fãa sẽn get pag ne datem wẽnga, a maana yoob ne yẽnda a sũur pʋgẽ.” (Matɩe 5:28; Zak 1:14, 15) Ned ning sẽn zãms a yamã la a sũurã kiblg na n yãame tɩ yaa nana n yɩɩd ne-a t’a tõog a yĩngã tõre. Woto yĩnga, bɩ d kell n gãd d sard sẽn pa vigsdã n lak d meng ne wẽngã, la d ra tags a yell meng ye. Tags-wẽns sã n wa y yamẽ fãa, bɩ y yiis-b zĩig pʋgẽ. D tõe n zãaga d mens ne makre, d sã n tik d yamã a Zezi mak-sõngã zug ne d sũur fãa. (1 Tɩmote 6:11; 2 Tɩmote 2:22; Hebre dãmba 4:15, 16) D sã n maan d sẽn tõe tɛka, d na n tũu Yɩɩl Sõamyã 55:23 saglgã: “Bas f yell ne [a Zeova] la bãmb na kogl foom. Bãmb ka na n bas nin-tɩrg t’a leng wakat sẽn ka sɛt ye.”
Y tẽrame bɩ?
• Ne manesem a yiib bʋs la d tõe n tall yõk-m-menga?
• Tall ‘yõk-m-meng bũmb fãa pʋgẽ’ rat n yeelame tɩ bõe?
• Sagl-sõma bʋs sẽn na yɩl n bɩɩs yõk-m-meng la yãmb gãd sõma zãms-kãngã sasa?
• Yõk-m-mengã tallg sɩngda yɛ?
[Zãmsgã sogsgã]
[Zĩ-gũbri/Foto rãmba, seb-neng 21]
D sẽn na n paas d yõk-m-mengã to-to
• Bɩɩs-y-yã baa bõn-kɩds pʋsẽ
• Tags-y a nafa wã zut masã la sẽn wat beoog-daare
• Lɛdg-y Wẽnnaam sẽn gɩdg bũmb ninsã ne a sẽn yet tɩ y maanã
• Zãgs-y tags-wẽnsã zĩig pʋgẽ
• Pids-y y yamã ne tẽeb tagsa sẽn kengd raoodo
• Sak-y sõngr ning kiris-neb nins sẽn bɩ wã sẽn kõtã
• Lak-y y mens ne yɛl sẽn wat ne kʋɩɩbgo
• Kʋɩɩbg taoor bɩ y pʋʋs Wẽnnaam n kos a sõngre
[Foto, seb-neng 18, 19]
Yõk-m-mengã kɩtdame tɩ d maan neere