‘Maan-y sũ-noog a Zeova yĩnga’
‘Maan-y sũ-noog a Zeova yĩnga’
“Maan sũ-noog [a Zeova] yĩnga, la bãmb na kõ foom f sẽn kot bũmb ninsã.”—YƖƖL SÕAMYÃ 37:4.
1, 2. Ãnd n yaa sũ-noogã yẽgre, la wãn to la rĩm a Davɩɩd wilg rẽ?
“SŨ-NOOG rãmb la neb nins sẽn mi tɩ b tara tẽeb ratmã, . . . sũ-noog rãmb la nimbãan-zoɛtbã, . . . sũ-noog rãmb la laafɩ rãmbã.” A Zezi Tãng zug zãmsgã sẽn yɩ sõma wʋsgã pʋgẽ, a sẽn na n wilg neb nins sẽn tar sũ-noogã, yaa naoor a wae la a yeel tɩ “sũ-noog rãmb la,” n sɩng a goamã, wa Evãnzill gʋlsd a Matɩe sẽn gʋlsã. (Matɩe 5:3-11, NW ) A Zezi goamã kõta tõnd bas-m-yam tɩ d tõe n paama sũ-noogo.
2 Yɩɩll pĩnd Israɛllã rĩm a Davɩɩd sẽn gʋls wilgdame tɩ ya a Zeova la sũ-noog hakɩkã yẽgre. A Davɩɩd yeelame: “Maan sũ-noog [a Zeova] yĩnga, la bãmb na kõ foom f sẽn kot bũmb ninsã.” (Yɩɩl Sõamyã 37:4) La bõe n tõe n kɩt t’a Zeova la a zʋg-sõma toɛy-toɛyã bãngr kõ ned ‘sũ-noogo’? F sã n vaees a sẽn zoe n maan la a sẽn na n maan bũmb nins n pids a raabã, wãn to la rẽ na n kõ-f saagr tɩ f na n paama “f sẽn kot bũmb ninsã”? D sã n maag d yĩns n vaees Yɩɩl Sõamyã 37, verse a 1 n tɩ ta 11 wã neere, d na n paama leokre.
‘Ra maan sũ-kiir ye’
3, 4. Wa b sẽn togs Yɩɩl Sõamyã 37:1 pʋgẽ wã, sagl-bʋg la a Davɩɩd kõ-yã, la bõe yĩng t’a sakr zems rũndã-rũndã?
3 Tõnd vɩɩ ‘wakat toodo,’ tɩ wẽngã yaa wʋsgo. Tõnd nee tʋm-tʋmd a Poll gom-kãensã sẽn pidsdi: “Nin-wẽnsa ne zãmb dãmb na n maana wẽng n paase, b na n belga neb a taaba la bãmb mens na n paama belgre.” (2 Tɩmote 3:1, 13) Ad nin-wẽnsã arzɛgs la neb nins sẽn wõnd b tõoga b vɩɩmã pʋgẽ wã tõe n sãama tõnd sũur nana-nana! Rẽ fãa tõeeme n yuus d yamã, n kɩt tɩ d ye pa get yɛlã tɩrg tẽebã wɛɛngẽ ye. Ges-y Yɩɩl Sõamyã 37 pipi goama sẽn keoogd tõnd ne yel-kãng sẽn tõe n wa wã to-to: “Da sak tɩ y sũur sãam ne nin-wẽns ye, la [y] ra maan sũ-kiir ne yel-wẽn maandba ye.”
4 Daar fãa, dũniyã kɩba-kõtb wilgda tõnd yɛl wʋsg sẽn wilgd tɩrlmã kaalem. Homdafɛɛr dãmb sẽn yaa pʋ-lik rãmb maanda zãmb tɩ bũmb pa maand-b ye. Tʋʋm-wẽns maandba wẽgda ka pãng rãmbã. Nin-kʋʋdb n be tɩ b pa pukd b bãongo, bɩ tɩ b pa sɩbgd-b ye. Mak-kãensã fãa sẽn wilgd tɩ tɩrlmã ye kaeyã tõe n yika d sũur n kɩt tɩ d yamã ye pa gãe bãan ye. Sẽn ne wa wẽng maandbã paamda b sẽn datã tõe n kɩtame tɩ d maan sũ-kiir ne-b menga. La tõnd sũ-sãangã na n manega yellã bɩ? Sẽn wõnd nin-wẽnsã nafdame tɩ nebã maand sũ-kiir ne-bã kɩtdame tɩ b põsd baas-wẽngã bɩ? Abada! La d sɩd pa segd n ‘sãam d sũur’ ye. Bõe yĩnga?
5. Bõe yĩng tɩ b rɩk wẽng maandbã n mak ne yamdo?
5 Yɩɩl gʋlsdã leokdame: “Tɩ bõe, bãmb na n kʋɩɩ tao-tao wa moodo. La bãmb na n zelga wa yamdo.” (Yɩɩl Sõamyã 37:2) Mo-maas sẽn yi paalem gesg yaa neere, la pa yãt n kaoos la a zelg n ki ye. Yaa woto ne wẽng maandbã. Baa ne sẽn wõnd b vɩɩmã yaa noogã, rẽ pa bũmb sẽn kaoosd ye. B sã n wa ki, paoong ning b sẽn paam ne zãmbã ye pa tõe n sõng-b ye. Ned fãa wat n wʋka a tʋʋmã biisi. Tʋm-tʋmd a Poll gʋlsame tɩ: “Yel-wẽna yaood yaa kũum.” (Rom dãmba 6:23) Wẽng maandbã ne neb nins sẽn pa tɩrsã na n wa baas n paama b ‘yaoodo.’ Pa yɩɩd woto ye. Ad woto sɩd yaa vɩɩm sẽn ka barka!—Yɩɩl Sõamyã 37:35, 36; 49:17, 18.
6. Yɩɩl Sõamyã 37:1, 2 tõe n zãmsa tõnd bõe?
6 Rẽ yĩnga d segdame n bas tɩ wẽng maandbã arzɛg-loogdmã sãam tõnd sũy bɩ? Zãmsg ning Yɩɩl Sõamyã 37 wã pipi verse a yiibã sẽn kõtã yaa woto: Ra bas-y tɩ nin-wẽnsã sẽn yidgdã kɩt tɩ y bʋdg n bas a Zeova raabã maaneg ye. La bɩ y ket n baood tẽebã bark la tẽeb bõn-datɩ.—Yelbũna 23:17.
‘Dell a Zeova n maan neere’
7. Bõe yĩng tɩ d segd n tall bas-yard ne a Zeova?
7 Yɩɩl gʋlsdã sagenda tõnd tɩ d ‘rell a Zeova n maan neere.’ (Yɩɩl Sõamyã 37:3a) Yɩɩr bɩ sãmb-sãmb meng sã n wa pig tõndo, d segd n talla bas-yard sẽn pa vigsd ne a Zeova. Yaa yẽ n kõt tẽeb bãan hakɩkã. A Moiiz gʋlsa woto: “Ned ninga fãa sẽn zĩ Sẽn-ka-to zĩ-soalgdga pʋgẽ paada Sẽn-tõeyã-fãa wã maasmẽ.” (Yɩɩl Sõamyã 91:1) Zãmaan kãngã sẽn kɩɩsd noyã n paasdẽ wã sã n wa sãam tõnd sũuri, d segd n teega a Zeova n paase. D karg bɩ d nug sã n dãmb tɩ d zoa sõng-do, d sũur yaa noogo. Woto me, d sẽn maood n dat n kẽn wẽn-sakr pʋgẽ wã, d rata a Zeova sõngre.—Ezai 50:10.
8. Wãn to la koɛɛgã kiris-nebã sẽn segd n moona tõe n sõng tõnd tɩ d ra sãam d sũy ne nin-wẽnsã yidgri?
8 Nin-wẽnsã yidgr sã n sãamd tõnd sũuri, yellã tɩɩm a yembr yaa d sẽn na n baood sẽn wõnd-b piisã n sõng-b tɩ b paam a Zeova raabã bãngr hakɩka. Wẽngã sẽn tar paasgã yĩnga, d segd n dɩkda sẽk wʋsg n sõngd neb a taabã. Tʋm-tʋmd a Poll yeela woto: “Bɩ y ra yĩm tɩ maan neere la sõng neba ye, tɩ bõe, maand kãens nooma Wẽnnaam sũuri.” Tõnd sẽn tõe n maan neb a taabã “neer” ning n yɩɩd yaa d sẽn na n moon-b Wẽnnaam Rĩungã koe-noog sẽn be ziirã. Tõnd moonegã yaa ‘maand sẽn yaa pẽgre.’—Hebre dãmba 13:15, 16; Galat dãmba 6:10.
9. Wilg-y a Davɩɩd sẽn sagl tɩ d ‘vɩɩmd tẽngã pʋgẽ’ wã võore.
9 A Davɩɩd kẽngda taoor woto: “Zĩnd tẽng[ã] pʋgẽ n vɩɩmd ne [sɩda].” (Yɩɩl Sõamyã 37:3b) A Davɩɩd wakatẽ wã, ‘tẽngã’ ra yaa soolem ning a Zeova sẽn da kõ Israɛllã, sẽn dat n yeel tɩ Kãabg Tẽngã. A Salomo naamã wakate, soolem kãng todsã ra sɩnga Dan sẽn be rɩtg babgẽ wã n tɩ ta Beerseba sẽn be nug goabg babgẽ wã. Ra yaa Israɛll zĩndg zĩig la be. (1 Rĩm dãmba 5:5) Rũndã-rũndã, tõnd sẽn beẽ zĩig ning fãa tẽngã zugu, d gẽegda sasa ning tẽngã gill sẽn na n wa lebg arzãn tɩrlem dũni paalgã pʋgẽ. Nananda, d tara bãan tẽebã wɛɛngẽ.—Ezai 65:13, 14.
10. Bõe n maande, tõnd sã n ‘vɩɩmd ne sɩda’?
10 D sã n tũ ‘sɩda,’ na n baas n yɩɩ wãna? Yel-bũn-kãngã vʋʋsem sõng sẽn vẽneg tɩ b gʋlsa tẽegda tõndo: “Sɩd soab paamda bark wʋsgo.” (Yelbũna 28:20) Tõnd sẽn nangd pãng koe-noogã mooneg pʋgẽ wã, baa tõnd sẽn be zĩig ninga, la d sẽn tõe n moon ned ning fãa wã sɩd kɩtdame tɩ d paam a Zeova barka. Wala makre, a Frank ne a pag a Rose rɩka so-pakrã tʋʋmd sẽn na maan yʋʋm 40 sẽn loog Ekos rɩtg babgã galʋ-tẽng a yembrẽ. Neb a wãnã sẽn da wilg tɩ b rata sɩdã tɩ bãmb nan pa wa wã ra basame. A Frank ne a pagã sẽn yaa so-pakdbã pa koms raood ye, b sɩngame n na n moon koɛɛgã la b maan karen-biisi. Masã, tiging neb sẽn tar fɩɩgr n be galʋ-tẽn-kãng pʋgẽ. A Frank ne a pagã sẽn yɩ wẽn-sakdbã sɩd paama a Zeova barka. A Frank wilga ne sik-m-meng tɩ: “Bark sẽn yaa kãseng n tɩ yɩɩd tõnd sẽn paam yaa d sẽn ket n be sɩdã pʋgẽ n tar yõod ne a Zeova wã.” N-ye, tõnd sã n ‘vɩɩmd ne sɩda,’ d paamda bark wʋsgo.
‘Maan-y sũ-noog a Zeova yĩnga’
11, 12. a) Wãn to la d tõe n ‘maan sũ-noog a Zeova yĩnga’? b) Bõe la d tõe n bao n maan tõnd mengã zãmsg wɛɛngẽ, la rẽ na n woma bi-bʋse?
11 Sẽn na yɩl n paas d zems-n-taarã ne a Zeova la d kell n teeg-a, d segd n ‘maana sũ-noog a Zeova yĩnga.’ (Yɩɩl Sõamyã 37:4a) Wãn to la d maand woto? D pa na n maan yɩɩr ne tõnd mengã vɩɩm, ba a sẽn yaa toog to-to ye, d na n tagsa a Zeova yell n yɩɩda. D tõe n maana woto, d sã n dɩkd sẽk n karemd a Gomdã. (Yɩɩl Sõamyã 1:1, 2) Yãmb Biiblã kareng kõt-y-la sũ-noog bɩ? Na n yɩɩ woto, y sã n karemd n dat n bãng a Zeova n paase. Y sã n wa karem babg a yembr poor bɩ y yals bilf n sok y meng woto: ‘Bõe la zĩ-kãngã zãmsd maam a Zeova zugu?’ Y na n mikame tɩ y sã n wa karemd Biiblã, yaa sõma tɩ sebr be yambẽ tɩ y tõe n gʋlse. Wakat fãa yãmb sẽn yals n na n tags y sẽn karemdã võor zugu, bɩ y gʋls gomd sẽn tẽegd yãmb Wẽnnaam zʋg-sõma wã sẽn be yamleoog wʋsgã a yembre. A Davɩɩd yeela woto yɩɩll a yembr pʋgẽ: “[Zeova,] mam pĩiga la mam fãagda, bɩ y kɩt tɩ mam noor goama ne m sũura tagsg zems yãmb nin gesgo.” (Yɩɩl Sõamyã 19:15) D sã n sik d yamã fãa Wẽnnaam Gomdã zug woto, kõta a Zeova ne tõnd me sũ-noogo.
12 Wãn to la d zãmsgã la d bʋgsgã tõe n kõ-d sũ-noogo? D tõe n maana d sẽn na maan n zãms n bãng a Zeova la a manesmã wʋsg wa d sẽn tõe tɛka. Sɛb wala Le plus grand homme de tous les temps wã, n paas Approchez-vous de Jéhovah * wã tara zãmsg wʋsg d sẽn tõe n tags a zug ne mi-beoogo. A Davɩɩd me wilgda nin-tɩrsã tɩ b kɩs sɩd t’a Zeova ‘na n kõo bãmb b sẽn kot bũmb ninsã.’ (Yɩɩl Sõamyã 37:4b) Ra segd n yaa bas-yard kãng buud n kɩt tɩ tʋm-tʋmd a Zã gʋls gom-kãensã: “Tõnd tara tẽeb kãng ne bãmba, tɩ tõnd sã n kos bũmb sẽn zems bãmb daabo, b kelgda tõndo. La tõnd sã n mi tɩ b kelgda tõnd ne bũmb ninga tõnd sẽn kotã, dẽ, tõnd miime tɩ tõnd paamda bũmb ninga tõnd sẽn kos bãmbã.”—1 Zã 5:14, 15.
13. Yʋʋm sẽn pa kaoosã pʋgẽ, Rĩungã mooneg tʋʋmd yelg n taa zĩ-bʋg tẽns wʋsg pʋsẽ?
13 D sẽn yaa wẽn-sakdbã, bũmb ning sẽn kõt tõnd sũ-noog wʋsg n yɩɩd yaa d yã a Zeova naam sẽn ka to wã zemsg wilgri. (Yelbũna 27:11) D sẽn wʋmd tɩ tõnd saam-biisã moonda koe-noogã wʋsg tẽns nins sẽn da tar na-toos pĩndã pʋsẽ wã pa noogd tõnd sũyã wʋsg sɩda? D gẽegda ne d sũy fãa n dat n yã lohorem ning d sẽn na n ye paam n paas tɩ dũni wẽng kãngã yaool n sa wã. A Zeova sõgen dãmb wʋsg sẽn be nasaar tẽnsẽ modgdame n moond karen-bi-bɛda, neb sẽn zoe b tẽns n tɩ be beenẽ, la neb a taab sẽn wa nasaar tẽnsẽ n na n zĩnd wakat bilf n tar lohorem n tõe n tũ Wẽnnaamã. Tõnd sẽn dat ne d sũy fãa yaa tɩ nin-kãensã sã n leb b ba-yiyã bɩ b ket n maandẽ tɩ sɩdã vẽenem yãgd zĩis nins sẽn wõnd vẽenem kãng pa tõe n ta wã.—Matɩe 5:14-16.
‘Bas f yell ne a Zeova’
14. Bõe n wilgd tɩ d tõe n della a Zeova?
14 D sẽn mi tɩ d yɩɩrã, n paas yɛl nins sẽn wõnd zɩɩb ne tõndã tõe n saame wã sɩd yaa bũmb sẽn kõt tõnd yolsgo! Wãn to? A Davɩɩd paasa woto: “Bas f yell ne [a Zeova] n dell bãmba, la bãmb na manege.” (Yɩɩl Sõamyã 37:5) Tõnd tigimsã pʋsẽ, d tara kaset sẽn sek sẽn wilgd tɩ zemsame tɩ d teeg a Zeova. (Yɩɩl Sõamyã 55:23) Neb nins sẽn be Wẽnnaam tʋʋmdã pʋgẽ wakat fãa wã, n yaa so-pakdba, so-toak yel-gɛtba, misioneer dãmb bɩ yamleoog tʋm-tʋmdb Betɛllẽ wã fãa tõe n kõo kaset tɩ d tõe n teega a Zeova t’a ges d yelle. Bõe yĩng tɩ y pa na n gom ne yãmb sẽn mi b rãmbã la y sok-b n ges a Zeova sẽn sõng-b to-to? Sãmbg sẽn ka be, y na n wʋma yɛl wʋsg b sẽn seg vɩɩmã pʋgẽ sẽn wilgd tɩ baa toog wakate, a Zeova sõngrã pa vaand ye. Wakat fãa, a kõta tõnd d sẽn dat bũmb nins sẽn na yɩl n vɩɩmdã.—Yɩɩl Sõamyã 37:25; Matɩe 6:25-34.
15. Wãn to la Wẽnnaam nin-buiidã tɩrlem pɩnda?
15 Tõnd sã n tar bas-yard ne a Zeova la d teeg-a vẽenega, d toe n yãa yɩɩl gʋlsdã goam nins sẽn pʋgdã pidsgu: “Bãmb na puk fo tɩrlem wa vẽenem n kɩt tɩ fo bʋʋd zemsg yɩ wa wĩnto-sʋka.” (Yɩɩl Sõamyã 37:6) Tõnd sẽn ya a Zeova Kaset rãmbã yĩnga, naoor wʋsgo nebã gomda tõnd wẽnga. La a Zeova pukda pʋ-peelem dãmbã nin n sõngd-b tɩ b bãngdẽ tɩ yaa tõnd sẽn nong yẽ la d taabã yĩng n kɩt tɩ d moond koe-noogã. Rẽ sasa, baa b sã n gomd tõnd wẽng me, nebã nee vẽeneg tɩ tõnd manesmã yaa tɩrga. A Zeova teenda tõnd ne manesem buud fãa bɛɛbã kɩɩsg la b namsg taoore. Rẽ kɩtame tɩ Wẽnnaam nin-buiidã tɩrlem pɩnd wa wĩntoog sẽn be a zug tẽn-sʋka.—1 Pɩɛɛr 2:12.
“Sĩnd . . . n ges” a Zeova
16, 17. Wa sẽn zems ne Yɩɩl Sõamyã 37:7, masã yaa bõe wakate, la bõe yĩnga?
16 Yɩɩl gʋlsdã togsa woto n paase: “Bɩ f sĩnd [a Zeova] taoore n ges bãmba. Da kãbg fo sũur ne ned sẽn tõogd ne a yelle la ne ned sẽn tõogd n maand wa sẽn zems a tags-wẽns ye.” (Yɩɩl Sõamyã 37:7) Ka wã, a Davɩɩd wilgda vẽeneg tɩ d segd n maaga d yĩns n gũ t’a Zeova maan bũmbu. Baa ne dũni wẽng kãngã saab sẽn nan pa wa wã, d sũy pa sãamd rẽ yĩng ye. Rẽ yĩnga, d pa yã t’a Zeova nimbãan-zoeerã la a sũ-marã yaa kãsems n yɩɩd tõnd sẽn da tagsd to-to sɩngrẽ wã zĩig sẽn zãr sɩda? Tõnd me tõe n wilga masã tɩ d gũuda ne maag-m-menga, n ket n moond koe-noogã tɩ saabã nan ka wa bɩ? (Mark 13:10) Masã yaa sasa d sẽn segd n da yɩ yãg-yãg n maan tʋʋm sẽn tõe n sãam tõnd sũ-noogã la d tẽebã bãan ye. Yaa masã la d segd n sɩd wɩk d mens n kɩɩs a Sʋɩtãan dũniyã pãn-tusdg sẽn yaa wẽngã n paase. La yaa masã la d segd n kell n yɩ yɩlem d vɩɩmã manesem pʋgẽ n da tol n sãam d tɩrlmã a Zeova nifẽ ye. Bɩ d ket n kɩɩsd yoob tagsa, la d lak d mens ne manesem sẽn pa zems ne rapã la pagbã.—Kolos rãmba 3:5.
17 A Davɩɩd sagla tõnd woto: “Sik f sũur n bas sũ-yikri. Da kãbg f sũur ye, yõwã wata ne wẽng maaneg bala. Tɩ bõe, tʋʋm-wẽns maandba na n sãamame la neb nins sẽn tẽed [a Zeova] na n sooga dũniyã.” (Yɩɩl Sõamyã 37:8, 9) N-ye, d tõe n gũu ne bas-yard tɩ ka la bilfu a Zeova na n wa yiisa wẽngã buud fãa ne neb nins sẽn wat ne-a wã.
“A keta bilf bala”
18, 19. Yɩɩl Sõamyã 37:10 kengda tõnd raood wãn to?
18 “A keta bilf bala tɩ nin-wẽng kõn tol n zĩnd ye. Yãmb na bao tɩ bãng a zĩiga, la a ka be ye.” (Yɩɩl Sõamyã 37:10) Ad gom-kãensã sɩd kengd tõnd raoodo, sẽn mik tɩ d kolgda zãmaan-wẽng kãngã saabã, la nebã soog-m-meng ne a Zeova sẽn wat ne yel-beedã saabã! Ninsaalbã sẽn wa ne goosneema bɩ zu-sobend buud ning fãa wã yɩɩ faoore. La masã d pẽnega wakat ning Wẽnnaam a Zeova sẽn na n ye reeg naamã, n dɩk a Rĩungã n ning a Zezi Kirist nugẽ wã. Rĩung kãng na n gesa dũniyã yɛl gill la a yiis Wẽnnaam Rĩungã bɛɛb fãa.—Daniɛll 2:44.
19 Dũni paalgã pʋgẽ, Wẽnnaam Rĩungã naam wakate, y tõe n baoa “nin-wẽng” wa y sẽn tõe tɛka, la y kõn yã ba a yembr ye. Sɩda, ned ning fãa sẽn na n tõdg t’a kõn sak a Zeova rẽ wẽnde, b na n menems-a-la tao-tao. B pa na n bas ned sẽn kɩɩsd a naam sẽn ka to wã bɩ sẽn zãgsd t’a kõn sak Wẽnnaam zu-sobendã t’a zĩnd be ye. Yãmb yagsã fãa na n dat n maana sẽn tat a Zeova yam. Ad woto sɩd na n waa ne bãane: kʋɩlens sogb ne bãens sa-ya, baa fʋɩ pa na n wa sãam bas-yardã la sũ-noog hakɩkã ye!—Ezai 65:20; Miise 4:4; 2 Pɩɛɛr 3:13.
20, 21. a) Ãnd dãmb la ‘sũ-maasem dãmb’ nins yell Yɩɩl Sõamyã 37:11 sẽn gomdã, la yaa yɛ la b paamd ‘laafɩ wʋsgo’? b) Bark bʋs la d na n paame, d sã n dɩk Davɩɩd Kãsengã togs-n-taare?
20 Rẽ, “sũ-maasem dãmba na n sooga dũniyã.” (Yɩɩl Sõamyã 37:11a) La “sũ-maasem dãmba” yaa ãnd dãmba? Gom-biig ning b sẽn lebg tɩ ‘sũ-maasmã’ yita gom-bi-yẽgrẽ sẽn dat n yeel tɩ “namse, sik f mengã, paooge.” N-ye, “sũ-maasem dãmba” yaa neb nins sẽn sikd b mens n gũudẽ t’a Zeova wa rems yɛlã n yiis kɛgr buud fãa sẽn namsd-bã. B na n ‘maana sũ-noog laafɩ wʋsg yĩnga.’ (Yɩɩl Sõamyã 37:11b) Masã menga, d paamda bãan wʋsg tẽeb arzãn ning pʋgẽ kiris-neb tiging hakɩkã sẽn be wã pʋgẽ.
21 Baa ne d sẽn nan pa paam yolsg ne namsgã, d teenda taab la d belsd neb nins sẽn be yam-ka-m-meng pʋgẽ wã. Rẽ kɩtame t’a Zeova nin-buiidã tar sũ-noog hakɩka. Saam-biis nins b sẽn yãk tɩ b yaa pe-kɩɩmbã geta tõnd yell tẽebã wɛɛngẽ ne nonglem. Wakat ninga, b geta tõnd yĩngã raab yell menga, tɩ kɩtdẽ tɩ d tõogd toog ne sũ-mar namsgã sẽn paamd-d tɩrlmã yĩnga. (1 Tesalonik rãmba 2:7, 11; 1 Pɩɛɛr 5:2, 3) Ad bãan kãng sɩd bee yõod wʋsgo! D leb n tara vɩɩm sẽn pa satã saagr Arzãnã sẽn na n tall laafɩ sẽn ta n sa wã pʋgẽ. Rẽ, bɩ d rɩk togs-n-taar ne Davɩɩd Kãseng a Zezi Kirist sẽn tall yẽesem a Zeova yĩng tɩ kɩt t’a maan a raabã hal n tɩ ta a kũumã. (1 Pɩɛɛr 2:21) D sã n maan woto, d na n ket n tara sũ-noogo, n pẽgd d Wẽnnaam a Zeova n maand sũ-noog a yĩngã.
[Tẽngr note]
^ sull 12 Sɛb a Zeova Kaset rãmbã sẽn yiisi.
Y tõe n leokame bɩ?
• Bõe la Yɩɩl Sõamyã 37:1, 2 zãms yãmba?
• Wãn to la y tõe n ‘maan sũ-noog a Zeova yĩnga’?
• Kaset bʋg n wilgd tɩ d tõe n talla bas-yard ne a Zeova?
[Zãmsgã sogsgã]
[Foto, seb-neng 23]
‘Dell a Zeova n maan neere’
[Foto, seb-neng 25]
“Sũ-maasem dãmba na n sooga dũniyã”