‘Togs-y Wẽnnaam koɛɛgã tɩrga’
‘Togs-y Wẽnnaam koɛɛgã tɩrga’
“Nang pãng n ta Wẽnnaam yam n yɩ tʋm-tʋmd sẽn kõn zoe yãnd ye, la sẽn togsd sɩd koɛɛga tɩrg bala.”—2 TƖMOTE 2:15.
1, 2. a) Bõe yĩng tɩ tʋm-tʋmd rat tʋʋm-teedo? b) Tʋʋm-bʋg la kiris-nebã tara, la wãn-wãn la b wilgd tɩ Wẽnnaam Rĩungã la b baood pipi?
TƲM-TƲMD rata tʋʋm-teed sẽn na yɩl n tʋm a tʋʋmã. La tʋʋm-teoog tallg bal pa sek ye. Segd n yɩɩ tʋʋm-teoog ning sẽn zems ne a tʋʋmdã, la tʋm-tʋmdã me segd n bãng n tʋma ne-a sõma. Wala makre, y sã n tilgd roog n wa rat n naag raad a yiib taab n ka, marto la põent dãmb tallg bal pa sek ye. Y segd n bãnga põentã kaab t’a kẽ raoogã tɩrg n da golem ye. Y sã n mak n na n ka raoogã ne põent rãmbã n yaool n pa mi marto sẽn tʋmd ne to-to, na n yɩɩ toogo, pa rẽ bɩ sãam y sũur menga. La d sã n tall tʋʋmã teed n tʋm sõma, d tõogd n pidsa d bõn-datlã sõma tɩ d sũur yɩ noogo.
2 D sẽn yaa kiris-nebã, d tara tʋʋmd d sẽn segd n tʋme. Yaa tʋʋmd yõod sẽn yaa kãseng n tɩ yɩɩd tʋʋmd buuda fãa. A Zezi Kirist ra sagla a karen-biisã tɩ b “reng n bao Wẽnnaam [Rĩungã].” (Matɩe 6:33) Wãn to la d tõe n maan dẽ? Manesem a ye yaa d sẽn na n tall yẽesem Rĩungã koɛɛg moonegẽ la karen-biisã maaneg tʋʋmdẽ. Manesem a to yaa d sẽn na n tik d koe-moonegã Wẽnnaam Gomdã zug bala. Tãab-n-soaba, yaa d sẽn na n tall yel-manesem sẽn yaa sõma me. (Matɩe 24:14; 28:19, 20; Tʋʋma 8:25; 1 Pɩɛɛr 2:12) Sẽn na yɩl n tõog n pids d kiris-ned tʋʋmdã sõma la d tall sũ-noog a pʋgẽ, d rata tʋʋm teed sẽn zemse, la d bãng d sẽn segd n tʋm ne-b to-to me tɩ yɩ sõma. Rẽ wɛɛngẽ, tʋm-tʋmd a Poll yɩɩ kiris-ned sẽn tʋm sõma hal wʋsg n kõ mak-sõngo, la a sagla a tẽed-n-taasã tɩ b rɩk yẽ togs-n-taare. (1 Korẽnt dãmba 11:1; 15:10) Woto yĩnga, bõe la d tõe n zãms tõnd tʋmd-n-taag a Poll zugu?
A Poll yɩɩ Rĩungã koe-moond sẽn tar yẽesem
3. Bõe yĩng tɩ d tõe n yeel tɩ tʋm-tʋmd a Poll tʋma Rĩungã tʋʋm ne yẽesem?
3 Wãn to la a Poll pids a tʋʋmdã? A tʋm-a-la ne “yẽesem.” A Poll modga hal wʋsg n moon koe-noogã n zãag zĩig Mediterane mogrã babg pʋgẽ. Tʋm-tʋmd kãngã sẽn da pa yaadã sẽn wa n na n wilg bũmb ning sẽn kɩt t’a moond Rĩungã koɛɛg ne sũ-noogã, a yeelame: “Ne maam, tɩ moon koe-noogã ka waoogr baoob ye. Wẽnnaam yet-m lame tɩ m moone. Mam sã n ka moon koe-noogã toog n na n paam maam.” (1 Korẽnt dãmba 9:16, Kãab-paalgã Koe-noogo) Rẽ yĩnga a Poll ra baooda a meng fãagr bal bɩ? Ayo. A ra pa rat-m-yembr soab ye. A Poll ra ratame tɩ neb a taab me rɩ koe-noogã yoodo. A ra gʋlsame: “Mam maanda bũmb fãa koe-noogã yĩnga, tɩ mam tõe n paam pʋɩɩr ne [neb a taaba, NW ].”—1 Korẽnt dãmba 9:23.
4. Yaa tʋʋm-te-bʋg la kiris-nebã nand n yɩɩda?
4 Tʋm-tʋmd a Poll yɩɩ sik-m-meng soab a tʋʋmdã pʋgẽ. A ra miime t’a ra pa tõe n teeg a mengã bãngr bal ye. Wala minizie sẽn dat marto wã, a Poll me ra rata tʋʋm-teoog sẽn zems sẽn na n sõng-a t’a tõog n kɩt tɩ sɩd ning sẽn be Wẽnnaam Gomdã pʋgẽ wã kẽ a kɛlgdbã sũyã. A tʋma ne tʋʋm-te-bʋg n yɩɩge? Yaa Gʋlsg Sõamyã sẽn yaa Wẽnnaam Gomdã. Tʋʋm-teoog ning me sẽn sõngd tõnd karen-biisã maaneg tʋʋmd pʋgẽ n tɩ yɩɩd yaa Biiblã.
5. Sẽn na yɩl tɩ d koɛɛgã mooneg yɩ sõma, verse rãmbã kareng toor sẽn kae, bõe me la d segd n maane?
5 A Poll ra miime tɩ Wẽnnaam Gomdã tall n tʋm tɩ zems ra baooda maan tɩ yɩɩg karem verse rãmb bal a pʋgẽ. A “gomame n kɩt tɩ nebã sak n deege.” (Tʋʋma 28:23, NW ) Wãn to la a maan-yã? A Poll tʋma ne Wẽnnaam Gomdã b sẽn gʋlsã n kɩt tɩ neb wʋsg sak n deeg sɩd ning sẽn tɩ loe ne Wẽnnaam Rĩungã. A kɩtame tɩ b tags sõma. A Poll rɩka kiuug a tãab Efɛɛz karen-doog pʋgẽ n ‘moon Wẽnnaam Rĩungã koɛɛg n wilg neb nins sẽn kelgã tɩ sɩd yaa sɩda.’ Baa neb “kẽer sũyã sẽn diglim tɩ bãmb ka tẽ” wã, neb a taab kelgame. A Poll sẽn moon koɛɛgã Efɛɛzã kɩtame t’a Zeova “koɛɛgã saag ne pãng n tõoge.”—Tʋʋma 19:8, 9, 20.
6, 7. Wãn to la a Poll waoog a koe-moonegã, la wãn tõ la tõnd me tõe n maan woto?
6 A Poll sẽn yɩ Rĩungã koe-moond sẽn tall yẽesmã ra ‘waoogda a tʋʋmdã.’ (Rom dãmba 11:13) Wãn to? A ra pa baood n na n zẽk a meng ye. A leb n da pa zoet yãnd zãma sʋk n pa rat tɩ nebã bãng t’a yaa Wẽnnaam tʋmd-n-taag ye. Ayo, a pʋd n da geta koe-moonegã tʋʋmd b sẽn kõ-a wã wa zu-no-kãseng menga. A Poll talla Wẽnnaam Gomdã n tʋm sõma tɩ wom biisi. A tʋʋmdã sẽn wom biis ninsã kõo a taabã yẽesem n kɩt tɩ b moon koɛɛgã sõma n paase. Yaa ne rẽ la a Poll koe-moonegã paam waoogre.
7 Wala a Polle, tõnd me tõe n waooga d koe-moonegã tʋʋmde, ne d sẽn na n tʋmd ne Wẽnnaam Gomdã sõma la wakat fãa. D koe-moonegã nens fãa pʋgẽ, d bõn-datl segd n yɩɩ modg wa d sẽn tõe tɛk n wilg neb wʋsg bũmb nins sẽn be Gʋlsg Sõamyã pʋgẽ wã. Wãn-to la d tõe n maan dẽ n kɩt tɩ nebã sɩd sak n deeg koɛɛgã? Bɩ d ges yɛl a tãab d sẽn segd n maane: 1) Sik-y a soabã yam Wẽnnaam Gomdã zug ne manesem sẽn na n kɩt t’a waoog-a. 2) Tall-y waoogr ne nedã la y wilg-a Biiblã sẽn yet bũmb ningã, la rẽ sẽn tar loees ning ne bũmb ning y sẽn zãmsd-a wã. 3) Kɩt-y tɩ nebã tags Gʋlsg Sõamyã zug ne manesem sẽn na n kɩt tɩ b sak n deeg tɩ yaa sɩda.
8. Rũndã-rũndã, d tara tʋʋm-te-bʋs Rĩungã koe-mooneg pʋgẽ, la wãn-wãn la y tʋm ne-ba?
8 Rũndã-rũndã, Rĩungã koe-moondb tara tʋʋm-teed a Poll sẽn da pa tall a koe-moonegã wakate. Yaa wala zʋrno rãmbã, seb-bi, seb-bõoneg sẽn wilgd tigissã lɛɛr dãmba, seb-vãado, la kasɛt kelgdɩ ne kasɛt video rãmba. Yʋʋm 1900 sẽnesã, b tʋma ne kaset kũun kart rãmba, fõnograf rãmba, mobila sẽn tar mikoro rãmba, la radio rãmba. Yaa vẽeneg tɩ tõnd tʋʋm-teoog ning sẽn yaa sõma n tɩ yɩɩd yaa Biiblã, la d segd n tʋma ne tʋm-te-kãngã sẽn yaa tɩlae ne-dã sõma.
D koe-moonegã segd n tika Wẽnnaam Gomdã zugu
9, 10. Wẽnnaam Gomdã tall n tʋmã wɛɛngẽ, bõe la saglg ning a Poll sẽn kõ a Tɩmote wã zãmsd-do?
9 Wãn-wãn la d tõe n tʋm ne Wẽnnaam Gomdã wala tʋʋm-te-sõngo? Yaa d sẽn na n sak gom-kãensã a Poll sẽn taas a tʋmd-n-taag a Tɩmote wã: “Nang pãng n ta Wẽnnaam yam n yɩ tʋm-tʋmd sẽn kõn zoe yãnd ye, la sẽn togsd sɩd koɛɛga tɩrg bala.” (2 Tɩmote 2:15) ‘Togs sɩd koɛɛgã tɩrg balã’ rat n yeelame tɩ bõe?
10 Gɛrk gom biig ning b sẽn lebg tɩ “togs tɩrgã” rat n yeelame tɩ “wãag tɩ tũ tɩrga,” bɩ “rẽeg ko-ruls tɩ tũ tɩrga.” Yaa sagls nins a Poll sẽn kõ a Tɩmote tɩ be Biiblã babg ning b sẽn gʋls ne gɛrkã pʋgẽ bal la gom-bi-kãngã be. B tõe n tall-a lame n bilg ka-koaad sẽn dẽesd a pʋʋg ne wãk n maand rulsi. Na n yɩɩ yãnd ne-koaada, a sã n pa tar minim n bẽesd ruls tɩ yaa goalma. Sẽn na yɩl “n yɩ tʋm-tʋmd sẽn kõn zoe yãnde,” b tẽega a Tɩmote t’a pa segd n golem zãmsg ning sẽn be Biiblã pʋgẽ wã ye. A Tɩmote ra pa tar sor n na n paas a meng tagsg a zãmsgã pʋgẽ tɩ toeem-a ye. A ra segd n tika a koe-moonegã la a zãmsgã Gʋlsg Sõamyã zug bala. (2 Tɩmote 4:2-4) Woto, a na n sõnga pʋ-peelem dãmbã tɩ b ges yɛlã wa a Zeova sẽn get-b to-to wã la b ra tũ dũniyã neb tagsg ye. (Kolos rãmba 2:4, 8) Rũndã-rũndã, yaa manesem kãng me la d segd n talle.
D yel-manesmã segd n yɩɩ sõma
11, 12. Pãn-tusd-bʋg la tõnd yel-manesmã tar d sẽn togsd Wẽnnaam Gomdã tɩrga zugu?
11 D segd n maaname tɩ yɩɩg togsd Wẽnnaam Gomdã tɩrg n moond sɩd ning sẽn be a pʋgẽ wã bala. D yel-manesmã segd n zemsa ne sɩd ning sẽn be Wẽnnaam Gomdã pʋgẽ wã. “Tõnd yaa tʋmd-n-taas ne Wẽnnaam.” Woto yĩnga d pa segd n yɩ tʋm-tʋmdb sẽn tar zãmb ye. (1 Korẽnt dãmba 3:9) Wẽnnaam Gomdã yetame: “Woto yĩnga, fo zãmsda neb a taaba, n yaool n ka zãmsd f meng ye. Fo sẽn moond tɩ ned ra zu wã, yaa bõe tɩ fo zuuda? Fo sẽn yet tɩ ned ra yo wã, yaa bõe tɩ fo yooda? Fo sẽn kis bõn-naands neb sẽn waoogd wa Wẽnnaamã yaa bõe tɩ fo zuud b rooga teedo?” (Rom dãmba 2:21, 22) Tõnd sẽn yaa Wẽnnaam tʋm-tʋmdb rũndã-rũndã wã, bũmb a ye d sẽn na n maan n togs Wẽnnaam Gomdã tɩrg yaa d sẽn na n tũ sagl-kãngã: “Teeg [a Zeova] ne f sũur fãa la f ra teeg f meng bãngr ye. Fo sẽn maand bũmb ninga fãa, bɩ f tẽeg [a Zeova] yelle, la b na n demsa fo sorã.”—Yelbũna 3:5, 6.
12 Tõnd sã n togsd Wẽnnaam Gomdã tɩrga, tõe waa ne bi-bʋse? D ges Wẽnnaam Gomdã sẽn tõe n tall pãng ning pʋ-peelem dãmbã vʋɩɩm zugã.
Wẽnnaam Gomdã pãng toeemda neda
13. Wẽnnaam Gomdã tũub tõe n maana ned bõe?
13 Nebã sã n sak n deeg tɩ Wẽnnaam Gomdã bee bas-m-yam, a koɛɛgã sẽn tar pãng ningã sõngd-b lame tɩ b toeemd hal sõma b vʋɩɩmã pʋgẽ. A Poll ra maana kaset ne Wẽnnaam Gomdã sẽn tʋmd to-to wã, la a yã pãn-tusd-sõng ning a sẽn tall neb nins sẽn lebg kiris-neb Tesalonikã zutã. Rẽ n so t’a yeel-ba: ‘Tõnd pʋʋsda Wẽnnaam bark wakat fãa, tɩ yãmb sẽn deeg Wẽnnaam koɛɛga tõnd sẽn togs yãmbã, yãmb ka reeg-a wa ninsaal koɛɛg ye, la yãmb reeg-a-la wa Wẽnnaam koɛɛga sẽn tʋmd yãmb sẽn tẽeda pʋsẽ, la a sɩd yaa woto.’ (1 Tesalonik rãmba 2:13) Ne kiris-nin-kãensã, neb nins fãa sẽn tũud Kirist ne pʋ-peelma pa tol n tõe n dɩk ninsaalba yam sẽn paood wʋsgã n mak ne Wẽnnaam yamã sẽn yaa kãsengã ye. (Ezai 55:9) Tesalonik nebã ‘reega Wẽnnaam goama tood wʋsg pʋgẽ ne [vʋʋsem sõng] su-noog’ n lebg mamsg tẽedb a taabã fãa yĩnga.—1 Tesalonik rãmba 1:5-7.
14, 15. Wẽnnaam Gomdã koɛɛg pãng taa hal zĩ-bʋgo, la bõe yĩnga?
14 Wẽnnaam Gomdã tara pãng wala a Soab a Zeova sẽn tar pãngã. A yita “Wẽnnaam sẽn vɩyã” nengẽ, sẽn ‘naan saasã’ ne a noor goama, a soab ning gomd ‘sẽn tõogd bũmb ning a sẽn tʋm-a t’a tɩ maanã’ wakat fãa wã. (Hebre dãmba 3:12; Yɩɩl Sõamyã 33:6; Ezai 55:11) Biibl mit a yembr yeelame tɩ: “Wẽnnaam pa welg ne a Gomdã ye. A pa maan t’a Gomdã pa tar loees ne yẽ ye. . . . Rẽ n so t’a Gomdã pa bõn-kɩɩnga, tɩ b sẽn tʋmd ne-a to-to fãa bɩ baa fʋɩ pa maand-a ye, bala loees n sɩd be Wẽnnaam ning sẽn vɩ-yã ne a Gomdã sʋka.”
15 Koɛɛg ning sẽn yit Wẽnnaam Gomdã pʋgẽ wã pãng taa hal zĩ-bʋgo? A tara pãn-kãsenga. A Poll ra gʋlsame n sɩd wilg tɩ: “Wẽnnaam goama vɩɩme la a tara pãnga, la a rɩtame n yɩɩd sʋʋg sẽn tar noy a yiibu, la a kẽeda hali n welgd vɩɩm ne sɩɩga la kõb-sugds ne b sɩɩlem, la a yaa sũur tagsgo la ratem bʋ-kaooda.”—Hebre dãmba 4:12.
16. Hal sẽn ta zĩ-bʋg la Wẽnnaam Gomdã tõe n toeem neda?
16 Koɛɛg ning sẽn be Wẽnnaam Gomdã pʋgẽ wã “rɩt n yɩɩda sʋʋg sẽn tar noy a yiibu.” Rẽnd a tara pãn-kãseng n tõe n kẽ ned n yɩɩd ninsaal tʋʋm-teoog buud fãa. Wẽnnaam Gomdã kẽeda ned sũur tagsa la a ratem sẽn solgã pʋgẽ n tõe n toeem a tagsa wã la yɛl nins a sẽn nongã fãa n kɩt t’a soabã zems ne a yɩ Wẽnnaam tʋm-tʋmda. Ad a sɩd yaa tʋʋm-teoog sẽn tar pãn-kãseng menga!
17. Bilg-y Wẽnnaam Gomdã pãng sẽn tõe n toeem ned to-to.
17 Wẽnnaam Gomdã sɩd wilgda ned sũur tagsa la a ratem sẽn solgã sẽn sɩd yaa a soaba vẽeneg n yɩɩd nedã sẽn tõe tagsd a mengã wɛɛngẽ, bɩ a sẽn tõe n kɩt tɩ nebã tẽed t’a yaa a soabã. (1 Sãmwɛll 16:7) Baa nin-wẽng meng tõe n solga a wẽnemã n maand wa a yaa nin-sõngo, bɩ Wẽnnaam neda. Sẽn na yɩl n paam n maan wẽnga, nin-wẽnsã mi n solgda b zʋgã n maand wa b yaa nin-sõmse. Wuk-m-mens rãmbã me sã n wa rat ne b sũur fãa tɩ neb a taabã pẽg-ba b mi n maanda wa b yaa sik-m-mens rãmba, la Wẽnnaam Gomdã sẽn vẽnegd bũmb ning sẽn be sũur pʋgẽ wã yĩnga, a tõe n kɩta hal sõma tɩ sik-m-mens rãmbã bas b pĩnd zʋgã la b “yeelg nin-paalgã wa fuugu, nin-paalg ning Wẽnnaam sẽn naan wa b sẽn data, tɩrlem la sõmblem sɩd sẽn wat ne wã pʋgẽ.” (Efɛɛz rãmba 4:22-24, Kãab-paalgã Koe-noogo) Wẽnnaam Gomdã zãmsg leb n tõe toeema ned sẽn zoet yãnd wʋsg t’a lebg a Zeova Kaset soab sẽn tar daoodo, la Rĩungã koe-moond sẽn tar yẽesem.—Zeremi 1:6-9.
18, 19. Tik-y sul-kãensã zut wall yɛl y sẽn zoe n seg koe-moonegã pʋgẽ n wilg sɩd ning sẽn be Biiblã pʋgã sẽn tõe n toeem ned tagsg to-to.
18 Wẽnnaam Gomdã pãng sẽn toeemd nebã tara pãn-tusdg sẽn yaa sõma wʋsg nebã zut zĩig fãa. Wala makre, Rĩungã koe-moondbã sẽn be Fõnom Pɛn, Kãmbodz tẽngã pʋgẽ wã ra moonda Kõmpõng Sam babgẽ wã naoor a yiib kiuug fãa. Beenẽ pastɛɛr poak a yembr sẽn wʋm pastɛɛr dãmb a taab sẽn wɩt a Zeova Kaset rãmbã, a segla a meng n seg Kaset rãmbã sẽn ye lebg n wa bãmb babgẽ wã. A sok-b-la yɛl wʋsg sẽn tɩ loe ne tigã, la a maag a yĩng n kelg leoor ning Kaset rãmbã sẽn tik Biiblã zug n kõ-a wã. A sẽn kelg-bã poore a yeelame: “Masã, mam miime tɩ m pastɛɛr taasã sẽn da yeel bũmb ning yãmb zugã pa sɩd ye! B ra yetame tɩ yãmb pa tʋmd ne Biiblã ye, la yaool n yaa Biiblã bal la yãmb sẽn tik n leok maam yibe-kãngã wã!”
19 Pʋg-kãngã kell n talla Biiblã zug sõsg ne Kaset rãmbã, n pa bas t’a taabã sẽn da yet tɩ b na n yiis-a-la a pastɛɛremdẽ wã gɩdg-a ye. A goma yɛl nins yell a sẽn sõs Biiblã zugã ne pag a ye sẽn yaa a zoa, t’a sɩng Biiblã zãmsg ne Kaset rãmbã. A zoa wã sũur yɩɩ noog hal wʋsg ne yɛl nins a sẽn da zãmsdã tɩ rẽ kɩt tɩ daar a yembre, b egiliizã pʋgẽ a zẽka a koɛɛg n yeele: “Wa n zãms-y Biiblã ne a Zeova Kaset rãmbã!” Dẽ loogr poor bilfu, pag ning sẽn da yɩ-a pastɛɛrã la neb a taab sɩng Biiblã zãmsg ne a Zeova Kaset rãmbã.
20. Wãn-wãn la Ghana pag a ye kɩbar wilgd Wẽnnaam Gomdã pãnga?
20 Wẽnnaam Gomdã pãng yɩɩ vẽeneg me a Paulina sẽn yit Ghana wã makr pʋgẽ. Rĩungã wakat fãa koe-moond a yembr n sɩng Biiblã zãmsg ne-a ne Bãngr Sẽn Tar n Debd Vɩɩm Sẽn-Kõn-Saẽ Wã sebre. * A Paulina ra kẽe kãadem ne rao sẽn tar pagb a taaba, t’a yã tɩ yaa tɩlae ne-a t’a yi n bas raoã. La a sɩdã ne a roagdbã fãa mak n na n gɩdg-a lame. Sẽn na yɩl n gɩdg-a, a yaab-raoog a ye sẽn yaa bʋ-kaood la egiliiz taoor soab rɩka Matɩe 19:4-6 goamã n bilg a võorã kɛgre. Bʋ-kaoodã wɛgsa verse wã ne yam tɩ wõnd wa yaa sɩda, la tao-tao bala, a Paulina bãngame t’a golemda Gʋlsg Sõamyã, wa a Sʋɩtãan me sẽn da maan a sẽn wa n na n mak a Zezi wã. (Matɩe 4:5-7) A leb n tẽega a Zezi sẽn yeel vẽeneg kãadmã wɛɛngẽ tɩ sɩngrẽ wã, Wẽnnaam naana ninsaalb a yiibã rao la paga, la pa rao la pagbã, la tɩ b yeelame tɩ bãmb b yiibã na n lebga yĩng a ye, la b pa yeel tɩ bãmb b tãabã ye. A Paulina kell n pa viig a sardã ye. A wa n baas n paamame tɩ b kao a kãadmã tɩ zems ne rog-n-mikã. Tao-tao bala, a lebga Rĩungã koe-moond sẽn tar sũ-noogo, la a reega lisgu.
Kell-y n togs-y Wẽnnaam Gomdã tɩrga
21, 22. a) Tõnd sẽn yaa Rĩungã koe-moondbã, sard-bʋg la d segd n dɩk kãn-kãe? b) Bõe la d na n yã sõsg ning sẽn pʋgdã pʋgẽ?
21 Wẽnnaam Gomdã a sẽn kɩt tɩ b gʋlsã sɩd yaa tʋʋm-teoog sẽn tar pãng d sẽn segd n tall n sõng neb a taabã tɩ b toeem b vɩɩmã sẽn na yɩl n tõog n kolg a Zeova. (Zak 4:8) Wala tʋʋm-mitb sẽn tʋmd ne tʋʋm teed sõma n nafdẽ wã, tõnd me segd n dɩka sard kãn-kãe n sɩd modg n tʋm ne Wẽnnaam Gomdã sõma Rĩungã koe-moonegẽ.
22 Wãn-wãn la d tõe n tall Gʋlsg Sõamyã n tʋm sõma n paas karen-biisã maaneg tʋʋmdẽ? Manesem a yembr yaa d sẽn na n bao n paam minim, n tõe n gom tɩ nebã sak n deeg bũmb ning d sẽn yetã d zãmsgã pʋgẽ. D bõos tɩ y karem sõsg ning sẽn pʋgdã t’a wilgda y sẽn tõe n zãms nebã la y sõng-b to-to tɩ b sak Rĩungã koɛɛga.
[Tẽngr note]
^ sull 20 Sebr a Zeova Kaset rãmbã sẽn yiisi.
Y tẽrame bɩ?
• Tʋʋm-te-bʋs la Rĩungã koe-moondb tara?
• Zĩ-bʋs wɛɛngẽ la a Poll yɩ Rĩungã tʋʋmd sẽn kõ mak-sõngo?
• Wẽnnaam Gomdã tall n tʋm sõma baooda bõe maanego?
• A Zeova Gomdã b sẽn gʋlsã yaa tʋʋm-teoog pãng sẽn ta hal zĩ-bʋgo?
[Zãmsgã sogsgã]
[Foto rãmba, seb-neng 10]
Tʋʋm-teed kẽer kiris-nebã sẽn tʋmd ne b Rĩungã koe-mooneg pʋgẽ