“Bãmb koees saaga dũniyã fãa”

“Bɩ y kẽng n maan neba buud fãa tɩ b yɩ mam karen-biisi n lis bãmb ne Ba la Biiga la [vʋʋsem sõng] yʋʋre.”—MATƖE 28:19.

1, 2. a) Tʋʋm-bʋg la a Zezi bobl a karen-biisã? b) Bõe yĩng tɩ pipi yʋʋm kob-gĩndẽ kiris-nebã tõog n pids tʋʋm-kãng sõma woto?

A ZEZI saasẽ dʋʋbã ket tɩ bilfu, a bobla a karen-biisã tʋʋmde. A yeel-b lame: “Bɩ y kẽng n maan neba buud fãa tɩ b yɩ mam karen-biisi n lis bãmb ne Ba la Biiga la [vʋʋsem sõng] yʋʋre.” (Matɩe 28:19) Ad yãoã sɩd ra yaa tʋʋm-kãseng menga!

² Tags-y n gese! Yʋʋmd 33 Pãntekotã raare, yaa sẽn na ta karen-biis 120 n paam vʋʋsem sõngã zaeebo, n sɩng tʋʋm kãngã pidsgu. B ra togsda neb a taabã t’a Zezi la Mesi ning yell b sẽn da gom hal daar zãrã, n wilgdẽ tɩ yaa yẽ maasem yĩng la neba na n paam fãagrã. (Tʋʋma 2:1-36) Wãn to la neb sõor sẽn paood woto ra na n tõog n moon ‘buudã fãa neba’? Ne ninsaala, bõn-kãngã pa tõe ye, la “Wẽnnaam tõee bũmb fãa.” (Matɩe 19:26) Pipi kiris-nebã paama a Zeova sõngre, la bãmb me nanga pãng n tʋm ne yãgbo. (Zakari 4:6; 2 Tɩmote 4:2) Rẽ kɩtame tɩ tʋm-tʋmd a Poll wa tõog n yeel yʋʋm pi-gĩn a wãn loogr poor tɩ b moona koe-no-kãng “dũniyã fãa.”—Kolos rãmba 1:23.

3. Bõe n da lud “ki” wã sẽn makd kiris-neb hakɩkã tɩ b pa tõog n yã-ba?

³ Pipi yʋʋm kob-gĩndã fãa pʋgẽ, baleng hakɩkã kell n talla yelgre. La a Zezi ra togsa bãngr-gomd pʋgẽ tɩ wakat n da wat t’a Sʋɩtãan na n fẽrg “nadens” tɩ yik n lud ki wã sẽn makd kiris-neb hakɩkã n maan yʋʋm kob-gĩn tɩ kẽebgã wakat yaool n ta. Tʋm-tʋmdbã kũum poore, bãngr gom-kãngã sɩd pidsame.—Matɩe 13:24-39.

Rũndã-rũndã fɩɩgrã yaa tʋʋlle

4, 5. Yʋʋmd 1919 wã sɩngrẽ, tʋʋm-bʋg la kiris-neb nins sẽn paam vʋʋsem sõng zaeebã sɩng-yã, la bõe yĩng tɩ tʋʋm-kãng yɩ toogo?

⁴ Yʋʋmd 1919 pʋgẽ wã, wakat ra taame tɩ ki wã sẽn makd kiris-neb halaalã segd n welg b mens ne nadensã. Kiris-neb nins b sẽn zae ne vʋʋsem sõngã bãngame tɩ b ra segd n tʋmda tʋʋm-kãseng ning a Zezi sẽn bobl-bã. B ra sɩd tẽeda ne b sũy fãa tɩ b ra bee ‘yaoolem wakatã’ la b ra mi bũmb ning a Zezi bãngr-gomdã sẽn yeelã: “Wẽnnaam soolem koe-noog kãngã na n moona dũniyã tɛk fãa tɩ yɩ kaset buud fãa yĩnga. Dẽ, dũniyã sɛɛb na yaool n ta.” (2 Tɩmote 3:1; Matɩe 24:14) N-ye, b sɩd bãngame tɩ tʋʋm wʋsg n be b sẽn da segd n maane.

⁵ La wa sẽn yɩ to-to ne karen-biisã yʋʋmd 33 wã, kiris-nin-kãensã sẽn paam vʋʋsem sõngã zaeebã talla tʋʋmd sẽn sɩd yɩ kãsenga. B ra yaa bãmb tus a wãn bal tẽns bilf pʋsẽ. Wãn to la b ra na n tõog n moon koe-noogã “dũniyã tɛk fãa”? Tẽeg-y tɩ tẽngã zugu, nin-buiid sõor fãa sẽn da zems milyõ 300 Sezaar dãmbã zãmaan sasa wã, a wa n fɩɩg n paasa ne sẽn kolg neb milyaar a 2 dũni-gill pipi zabrã poore. La yʋʋm kob-gĩnd 20 soabã pʋgẽ, nin-buiidã sõor kell n talla paasg tʋʋl-tʋʋlle.

6. Yʋʋmd 1935 wã sẽnes tɩ b ra zoe n moona koe-noogã n ta zĩ-bʋgo?

⁶ Baasg zãnga, wa sẽn da yɩ to-to me ne b saam-bi-taasã pipi yʋʋm kob-gĩndẽ wã, a Zeova sõgen dãmb nins sẽn paam vʋʋsem sõngã zaeebã talla bas-yard zãng-zãng ne a Zeova la a vʋʋsem sõngã n sɩng tʋʋmd ning a Zeova sẽn bobl-bã. Yʋʋmd 1935 sẽnesã tɩ sẽn zems koe-moondb 56 000 n zoe n moond sɩd ning sẽn yit Biiblã pʋgẽ wã tẽns 115 pʋsẽ. B ra zoe n tʋma wʋsgo, la tʋʋmdã sẽn da ketã me yaa wʋsgo.

7. a) Tʋʋm-kãseng a to bʋg la kiris-neb nins sẽn paam vʋʋsem sõng zaeebã paam-yã? b) Ne “piis a taabã” sõngre, wãn-wãn la tigisgã tʋʋmd kẽng taoore?

⁷ Wakat kãnga, kiris-nin-kãensã sẽn tʋmd wʋsgã sẽn bãng Wilgr 7:9 sẽn gomd ‘kʋʋn-kãseng’ ning yellã sẽn yaa b rãmbã sõma n  paasã, rẽ waa ne tʋʋm-kãseng a to me n kõ-ba, la kõ-b saagr me tɩ b na n paama sõngre. “Piis a taab” sẽn yaa tẽedb sõor ka-tɛk sẽn yit “soolem fãa, la buud fãa, la neb sẽn gomd goam toɛy-toɛy” sẽn tar saagr n na n vɩɩmd tẽngã zug la b ra segd n tigmi. (Zã 10:16) Bãmb dãmba na n ‘maana a Zeova tʋʋmd wĩntoog la yʋngo.’ (Wilgri 7:15) Rẽ rat n yeelame tɩ b na n sõng n moona koɛɛga la b zãms nebã. (Ezai 61:5) Kiris-neb nins sẽn paam vʋʋsem sõng zaeebã sẽn yã tɩ koe-moondbã sẽn da yaa tusa wã sõor fɩɩgame n lebg neb milyõ rãmbã, rẽ kõ-b-la sũ-no-kãsenga. Yʋʋmd 2003 pʋgẽ wã, koe-moondb 6 429 351 sẽn yaa sõor paalg sẽn yɩɩd pĩnd dẽndã n moon koe-noogã tɩ b sʋkã neb wʋsg sẽn tɩ yɩɩd yaa kʋʋn-kãsengã neba. * Kiris-neb nins sẽn paam vʋʋsem sõng zaeebã tara mi-beoog hal wʋsg sõng-kãng yĩnga, la piis a taabã me tara mi-beoog wʋsg zu-noog ning b sẽn paam n teend nin-kãensã sẽn yaa b saam-biisã.—Matɩe 25:34-40.

8. A Zeova Kaset rãmbã manesem yɩɩ wãn-wãn nams-toaag ning sẽn zĩnd dũni gill zabr a yiib-n-soabã sasa wã taoore?

⁸ Ki wã sull sẽn wa n puk vẽenegã, a Sʋɩtãan yika zab-kãseng ne-ba. (Wilgri 12:17) A sẽn wa n yã kʋʋn-kãsengã neb sẽn pukdã, a manesem yɩɩ wãn-wãna? A tʋma nen-kɛglem hal wʋsgo! Sãmbg kae tɩ yaa yẽ n kɩt tɩ b zab ne baleng hakɩkã dũniyã gill zug dũni gill zabr a yiib-n-soabã sasa ye. Tẽns nins sẽn da zabd ne taabã pʋsẽ, b namsa kiris-nebã ne wẽnem wʋsgo. Saam-biis la saam-bi-pogs wʋsg sega mak-toose, hal tɩ kẽer ki b tẽebã yĩng menga. Ne rẽ fãa, ne b tʋʋmã, b wilgame tɩ b tagsda wa yɩɩl-gʋlsdã sẽn da yɩɩl woto wã: “Ne Wẽnnaam yelle, mam pẽgda bãmb goama. Mam dellda Wẽnnaam n ka zoet dabeem ye. Ninsaalba tõe n maana maam bõe?” (Yɩɩl Sõamyã 56:5; Matɩe 10:28) A Zeova vʋʋsem sõngã kõo kiris-neb nins a sẽn zaeyã la piis a taabã pãng tɩ b naag taab n yals kãn-kãe. (2 Korẽnt dãmba 4:7) Rẽ kɩtame tɩ ‘Wẽnnaam koɛɛgã saag n yɩɩd pĩnda.’ (Tʋʋma 6:7) Zabrã sẽn wa n yik yʋʋmd 1939 wã tɩ kiris-neb 72 475 sẽn tar kɩs-sɩd n moond koɛɛgã. La zabrã saab yʋʋmd 1945 wã, pa neba fãa n tõog n tool b tʋʋmdã kɩbay ye, la kɩbay nins b sẽn paamã wilgdame tɩ neb 156 299 n moon koe-noogã. Ad a Sʋɩtãan modgrã sɩd yɩɩ faoore!

9. Dũni gill zabr a yiib-n-soabã sasa, lekoll paal bʋs sɩngr la b wilg-yã?

⁹ Vẽenega, dũni gill zabr a yiib-n-soabã sẽn wa ne zũnd-zãnd ningã pa tõog n kɩt t’a Zeova sõgen dãmbã yam yo ne b na tõog n moon koe-moonegã ye. Sɩd me, zabrã sẽn wa n be a zug tẽn-sʋk yʋʋmd 1943, b wilgame tɩ lekoll paal a yiib la b sɩng-yã. A ye b sẽn boond rũndã-rũndã tɩ Wẽnnaam tʋʋmdã lekollã yaa lekoll b sẽn da segd n maan tigimsã pʋsẽ n zãms Kaset rãmbã fãa koe-noogã mooneg la karen-biisã maanego. La a to wã yaa Sosiete Watstawa Gileaad Biibl zãmsg lekolle. Lekoll kãng bõn-datlã yaa zãms misioneer dãmb tɩ b tɩ moon koe-noogã tẽn-zẽmsẽ. Zabrã sẽn wa n na n sa wã tɩ kiris-nebã me ra segla b mens n sa n na n yãng b tʋʋmdã n paase.

10. Yʋʋmd 2003 pʋgẽ wã, wãn-wãn la a Zeova nin-buiidã yẽesem yɩ vẽenega?

¹⁰ Ad b sɩd maana tʋʋm-kãseng menga! Kom-bɩɩs la kãsemba, roagdb la kamba, baa koms rãmbã fãa sẽn paam zãmsg Wẽnnaam tʋʋmdã lekollẽ wã tʋma tʋʋm-kãseng ning a Zezi sẽn bobl-bã la b ket n tʋmd-a. (Yɩɩl Sõamyã 148:12, 13; Zoɛll 3:1, 2) Yʋʋmd 2003 pʋgẽ wã, b sã n pʋɩ tɩ zemse, kiuug fãa, yɩɩ neb 825 185 n yɩ so-pakdb wakat bilf bɩ wakat fãa n wilg tɩ b miime tɩ b tʋʋmdã yaa yãgdem bũmbu. Yʋʋm-kãng pʋgẽ me, a Zeova Kaset rãmbã rɩka lɛɛr dãmb 1 234 796 477 n gom Rĩungã koe-noog yell ne neb a taabã. Vẽenega, a Zeova sũur yɩɩ noog ne a nin-buiidã sẽn tall yẽesmã!

Moonegã tẽn-zẽmsẽ

11, 12. Mak-bʋs n wilgd modgr ning misioneer dãmbã sẽn maana vẽenega?

¹¹ Yʋʋmã sẽn pʋg taabã pʋgẽ, Gileaad karen-biisã, la sẽn nan pa kaoose, Wẽnnaam tʋʋmdã zãmsg lekoll karen-biis me tʋma tʋʋm-kãsenga. Wala makre, pipi misioneer dãmbã sẽn ta Berzill  yʋʋmd 1945 wã, b mika koe-moondb sẽn pa ta 400. Misioneer kãens ne misioneer dãmb nins sẽn pʋgl n wa wã lagma taab n tʋm ne Berzill sãam-biisã sẽn tar yẽesmã hal sõma t’a Zeova ning b modgrã bark wʋsgo. Ad Berzill sẽn paam sõor paalg sẽn yɩɩd pĩnd rẽndã sẽn ta neb 607 362 yʋʋmd 2003 wã na n nooga neb nins sẽn tẽr tʋʋmdã sɩngr beenẽ sẽn yɩ to-to wã sũy wʋsgo!

¹² D ges Zapõ me. Sẽn deng dũni gill zabr a yiib-n-soabã tɩ ra yaa sẽn zems Rĩungã koe-moondb koabg n da be tẽn-kãng pʋgẽ. Zabrã wakate, nams-toaag n kɩt tɩ b sõorã booge, la zabrã saabẽ tɩ ra yaa Kaset rãmb a wãn bal n da ket n vɩ la b tar tẽebo. (Yelbũna 14:32) Sãmbg sẽn ka be, yɩɩ ne sũ-noog wʋsg la nin-kãensã sẽn tall b kɩs-sɩdã ne manesem sẽn yaa kãsengã reeg Gileaad lekollã pipi misioneer dãmb 13 yʋʋmd 1949 wã. Tao-tao bala, b talla nonglem ne b Zapõ saam-biisã sẽn nong sãamb la b tar yẽesmã. Yʋʋmd 2003 wã, sẽn dat n yeel tɩ yʋʋm 50 loogr poore, Zapõ paama koe-moondb sõor sẽn ta neb 217 508! A Zeova sɩd ninga a nin-buiidã bark hal wʋsg tẽn-kãngã pʋgẽ. Kɩbay sẽn wõnd woto me n yit tẽns a taab pʋsẽ. Neb nins sẽn tõog n kẽng zĩ-zẽms n tɩ moon koɛɛgã sõngame n yelg koe-noogã hal wʋsg n kɩt tɩ yʋʋmd 2003 wã, b wʋm-a tẽns la ko-sʋk tẽns 235 pʋsẽ dũniyã gill zugu. N-ye, kʋʋn-kãsengã neb sɩd yita “soolem fãa” pʋsẽ.

‘B yita buud fãa pʋsẽ la b gomd goam toɛy-toɛya’

13, 14. Wãn-wãn la a Zeova wilg tɩ tara yõod tɩ d moon koe-noogã “buud goam toɛy-toɛy” pʋsẽ?

¹³ Yʋʋmd 33 Pãntekotã raar karen-biisã sẽn paam vʋʋsem sõngã zaeebã, pipi yel-solemd b sẽn maan tɩ be Biiblã pʋgẽ yɩɩ b sẽn gom buud goam toɛy-toɛy ne kʋʋngã sẽn da tigmã. Neb nins sẽn kelg-bã fãa ra segd n wʋmda buud gomd b sẽn da gomd tẽns wʋsg pʋsẽ, wala makre, gɛrk buudã gomde. B sẽn ‘sakd tẽeb sõama’ wã yĩngã, b ra wʋmda tʋʋm nins Hebre rãmbã sẽn da maand wẽn-doogã pʋgẽ wã võor me. La b sẽn wʋm koe-noogã ne buud gomd ning b sẽn zãms hal b yãadmẽ wã yĩng kɩtame tɩ b sɩd tʋlg n na n kelg-a.—Tʋʋma 2:5, 7-12.

¹⁴ Rũndã-rũndã, b moonda koe-noogã buud goam wʋsg pʋsẽ. B reng n togsame tɩ kʋʋn-kãsengã na n yii soolem toɛy-toɛy pʋsẽ, la b leb n paasame me tɩ yaa “buud toɛy-toɛy neb sẽn gomd goam toɛy-toɛya.” Sẽn zems ne rẽ, a Zeova ra tũnuga ne no-rɛɛs a Zakari n yeele: “Bu-zẽms [neb] piig sẽn yaa buud toor-toor na n gãda Zʋɩf ned fuug n yeele: ‘Bas-y tɩ d tũ yãmb n kẽnge; bala, tõnd wʋmame tɩ Wẽnnaam bee ne yãmba.’ ” (Zakari 8:23) Baa ne a Zeova Kaset rãmbã sẽn pa paam gom-zẽn kũuna, b miime tɩ b segd n zãmsa nebã b buudã goam pʋgẽ.

15, 16. Wãn-wãn la misioneer dãmbã ne neb a taab mao sẽn na yɩl n moon koɛɛgã buud gom-zẽn pʋsẽ?

¹⁵ Yaa sɩd tɩ rũndã-rũndã, yaa buud goam a wãn bal wa ãngilindã ne farendã la ɛspayõllã la neb wʋsg gomda. Baasg zãnga, neb nins sẽn bas b ba-yiy n na n tɩ moon tẽns a taab pʋsẽ wã maoome n zãms tẽn-kãng buudã goam sẽn na yɩl n tõog n moon koe-noogã neb nins “sẽn [tʋll n] paam vɩɩm sẽn ka sɛtã.” (Tʋʋma 13:48) Buud gomd zãmsg tõe n yɩɩ toogo. Tuvalu sẽn yaa Pasifik mogrã sʋk tẽngã pʋgẽ, saam-biisã sẽn wa n dat sɛb b mensã buud goam pʋgẽ wã, misioneer a ye sakame n na n tʋm tɩ raab kãng paam pidsgu. Sẽn mik tɩ Tuvalu buudã gom-biis võor sebr da kaeyã, a sɩnga rẽ maanego. Bilf-bilfã, b wa n tõog n yiisa sebr ning gom-zug sẽn yaa, Y Tõe n Vɩɩnda Wakat Sẽn-Kõn-sa Tẽng zug Arzãnẽ * wã ne tuvalu buudã gomde. Misioneer dãmbã sẽn kẽng Kurasao paalmã, b tɩ mikame tɩ Biibl ne sɛb la gom-biis võor sebr da kae ne papiamento sẽn yaa tẽngã buud gomdã pʋgẽ ye. B sẽn da segd n gʋls buudã gomd to-to wã poorẽ, no-koɛɛm wʋsg n zĩndi. La baa ne zu-loe-kãens fãa, misioneer dãmbã waoong yʋʋm a yiib poore, b yiisa pipi seb-vãoog sẽn tik Biiblã zug buud gom-kãng pʋgẽ. Rũndã-rũndã, Gũusg Gasgã b sẽn yiisd ne buud goam 133 pʋgẽ wakat yɛng ne ãngilindã, papiamento wã bee sʋka.

¹⁶ Namibi, pipi misioneer dãmbã pa tɩ mik ned tẽngã Kaset rãmb sʋk sẽn da tõe n sõng-b tɩ  b lebg sɛbã ne b buudã goam ye. Sẽn paase, nama wã sẽn yaa tẽngã buud gomd a ye wã ra pa tar gom-biis kẽer sẽn na yɩl n lebg goam sãnda sẽn wɛ n be tõnd sɛbã pʋsẽ ye. Wala makre, b pa tar gom-biig sẽn dat n yeel tɩ “sẽn zems zãng” ye. Misioneer a ye kõo kɩba-kãngã: “Mam da nong n tũnugda ne lekoll karen-saam dãmb nins sẽn zãmsd Biiblã n lebgd sɛbã. B sẽn da pa mi sɩdã wʋsgã yĩnga, m da zĩndida ne-b n gũusd n get gomd fãa lebgr sã n da sɩd zemsame.” Baasg zãnga, b wa tõog n yiisa seb-vãoog ning gom-zug sẽn yaa Laafɩ Vɩɩm Dũni Paalg Pʋgẽ wã ne Namibi buud-goam a naase. Rũndã-rũndã, Gũusg Gasgã yita wakat fãa ne kwanyama la ndonga sẽn yaa tẽnga buud goamã.

17, 18. Modg-bʋg la b maand Megsik la tẽns a taab pʋsẽ?

¹⁷ Megsiki, buud gomd ning neb wʋsg sẽn gomd n tɩ yɩɩd yaa ɛspayõllã. La sẽn deng tɩ Ɛspayõll dãmbã wa tẽngẽ wã, buud goam wʋsg la nebã ra sɩng n gomda. La hal ne masã menga, b ket n gomda gom-kãens kẽere. Woto yĩnga, b yiisda a Zeova Kaset rãmbã sɛb Megsik tẽngã buud goam a yopoe pʋgẽ la tẽngã mugs goam pʋgẽ me. Rĩungã Tʋʋmd sebr n yɩ pipi sebr b sẽn yiis ne maya sẽn yaa Amerik Ẽndiẽ rãmbã buud gomd a yembrã. Megsik Rĩungã koe-moondb 572 530 sʋka, b sɩd tõe n yãa Maya rãmba, Aztɛk rãmba, la buud a taab neb tusa.

¹⁸ Rũndã-rũndã, neb wʋsg n yi b tẽnsẽ n zoe n kẽng tẽn-zẽms zabã yĩng wall farã yĩnga. Rẽ kɩtame tɩ tẽns wʋsg pʋsẽ, neb wʋsg gomd buud gom-zẽmse. A Zeova Kaset rãmbã sɩnga tʋʋm-kãsengã. Wala makre, Itali, italiyẽ wã toor sẽn ka be, tigims la sul sẽn gomd buud goam 22 a taab n be. Sẽn na yɩl n sõng saam-biisã tɩ b moon neb nins sẽn gomd buud goam a taabã, b sigla kareng n na n zãms nebã buud goam 16, tɩ Itali mugsã goam zãmsg be rẽ sʋka. Tẽns a taab pʋsẽ, a Zeova Kaset rãmbã maooda woto me sẽn na yɩl n tõog n taas koɛɛgã sãamba sẽn waoogã. N-ye, ne a Zeova sõngre, kʋʋn-kãsengã sɩd yita buud goam sul wʋsg neb sʋka.

“Dũniyã fãa”

19, 20. A Poll goam-bʋs n paamd pidsg ne manesem sẽn yaa kãseng rũndã-rũndã? Kõ-y makre.

¹⁹ Pipi yʋʋm kob-gĩndẽ wã, tʋm-tʋmd a Poll ra gʋlsame: “Bãmb ka wʋm la? Bãmb wʋmame. ‘Bãmb koees saaga dũniyã fãa. La bãmb goama saaga hal dũniyã tɛka.’ ” (Rom dãmba 10:18) Sɩd yɩɩ woto pipi yʋʋm kob-gĩndẽ wã, la rũndã-rũndã wã n yɩɩde! Neb milyõ rãmba, tõe tɩ b sõor yɩɩda sẽn zĩnd pĩndã n yete: “Mam na n waooga [a Zeova] daar fãa. Mam noor pẽgda bãmba n ka basdẽ ye.”—Yɩɩl Sõamyã 34:2.

²⁰ Sẽn paase, tʋʋmdã pa lebd poorẽ ye. Rĩungã koe-moondb sõor ket n tara fɩɩgre. Sẽk wʋsg la b rɩkd n paasd n moond koɛɛgã. Neb milyõ rãmb la b lebgd n tʋgd n kaagdẽ la b zãmsd Biiblã ne neb tus kobse. Nin-paals n ket n dat n bãng n paase. Rɩẽ, yɩɩ neb 16 097 622 n wa a Zezi kũumã Tẽegrẽ tɩ rẽ yaa sõor paalg sẽn yɩɩd pĩnd dẽndã. Vẽenega, tʋʋm wʋsg n ket d sẽn segd n tʋme. Bɩ d ket n dɩkd d saam-biis nins sẽn tall b burkĩndã nams-toos taoorã togs-n-taare. La bɩ d tall yẽesem buud ning d saam-biisã fãa sẽn sɩng n tar hal yʋʋmd 1919 tɛkã, b sẽn tʋm wʋsg a Zeova tʋʋmdã pʋgẽ wã. Bɩ d fãa ket n naagd taab n deesd yɩɩl gʋlsdã sẽn pʋd yɩɩll ningã. A yɩɩlame: “Bɩ bũmb nins fãa sẽn vʋʋsd ne yõorã pẽg Zusoabã. Pẽg-y-yã [a Za!]”—Yɩɩl Sõamyã 150:6.

Y tõe n bilga a võor bɩ?

• Tʋʋm-bʋg la saam-biisã sɩng maaneg yʋʋmd 1919 tɛkã, la bõe yĩng tɩ ra yaa tʋʋm-toogo?

• Ãnd rãmb la b tigim tɩ b na n sõng n moon koɛɛgã?

• Tʋʋm-bʋg la misioneer dãmbã la neb a taab sẽn moond tẽn-zẽmsã tõog n maane?

• Bõe sẽn yaa vẽeneg la y tõe n tik n wilg t’a Zeova sɩd ningda a nin-buiidã tʋʋmd bark rũndã-rũndã?

[Tẽngr not rãmbã]

[Zãmsgã sogsgã]

 [Taablo, seb-neng 26-29]

A ZEOVA KASET RÃMBÃ TƲƲMD RAPƆƆR YƲƲMD 2003

(Ges-y volim relie wã)