Bɩ nebã fãa moon a Zeova ziirã
Bɩ nebã fãa moon a Zeova ziirã
“Ninsaalb buud toɛy-toɛya, bɩ y kõ [a Zeova] waoogre la y wilg tɩ bãmb tara pãnga. Bɩ y kõ [a Zeova] waoogr sẽn zemsd ziir sẽn yaa bãmb yʋʋr dẽnda.”—YƖƖL SÕAMYÃ 96:7, 8.
1, 2. Bõe n kõt a Zeova waoogre, la ãnd dãmb la b sagend tɩ b naag n waoog-a?
A ZESE biig a Davɩɩd sẽn yɩ rũm-kɩɩmã bɩɩ Betlehɛm. Naoor wʋsgo, a ra mi n geta saasã sẽn yalem hal wʋsg n pid ne ãdsã yʋngo, zĩigã sẽn wat n yaa sɩddd wã sasa a sẽn da wa n gũud a ba wã rũmsã! Sãmbg sẽn ka be, a tẽega bõn-kãensã sẽn yaa kãsemsã yelle, Wẽnnaam vʋʋsem sõngã sẽn wa n vẽeneg-a t’a gʋls Yɩɩll 19 soabã goam sẽn be rasãndã. A gʋlsame: “Saas wilgda Wẽnnaam ziiri, la sa-gãong togsda bãmb nus tʋʋma. La Wẽnnaam nus tʋʋma rãamd yii tẽnga fãa pʋgẽ, la bãmb goama taa dũniyã tɛk fãa.”—Yɩɩl Sõamyã 19:2, 5.
2 Saasã a Zeova sẽn naan tɩ yaa kãseng hal wʋsgã wilgda a ziirã wĩntoog la yʋng tɩ pa tũ ne noor goam ye. Bũmb nins Wẽnnaam sẽn naanã wilgda a ziirã wakat fãa. Ziir kãng sẽn pukd to-to “tẽngã fãa” neb nifẽ wã kɩtdame tɩ d neẽ tɩ d pa baa fʋɩ ye. La baasgo, Wẽnnaam bõn-naandsã sẽn wilgd a ziirã tɩ pa tũud ne goamã bal pa sek ye. B sagenda ãdem-biis nins fãa sẽn yaa sakdbã tɩ b naag n kõ kaset kãng me ne b no-goamã. Wẽnnaam vẽnega yɩɩl-gʋlsd a yembr yʋʋr b sẽn pa wilgi, t’a taas gom-kãensã a balemdb sẽn tar kɩs-sɩda. A gʋlsame: “Bɩ y kõ [a Zeova] waoogre la y wilg tɩ bãmb tara pãnga. Bɩ y kõ [a Zeova] waoogr sẽn zemsd ziir sẽn yaa bãmb yʋʋr dẽnda.” (Yɩɩl Sõamyã 96:7, 8) Neb nins sẽn tar zems-n-taar sõma ne a Zeova wã sakda sagl-kãngã ne sũ-noogo. La kõ Wẽnnaam waoogr baooda bõe maanego?
3. Bõe yĩng tɩ ãdem-biisã waoogd Wẽnnaam?
3 Waoog Wẽnnaam baooda sẽn yɩɩd no-goam bala. A Ezai wakatẽ wã, Israɛll nebã ra waoogda Wẽnnaam ne b no-bɩmse, la bãmb sʋkã, neb wʋsg yaool n da pa pʋ-peelem dãmb ye. A Zeova ra tũnuga ne a Ezai n yeel-ba: “Nin-kãensa kolgda maam ne b noor goama, la b waoogd maam ne b no-bɩmse, la bãmb sũyã zãra ne maam.” (Ezai 29:13) Nin-kãensã fãa sẽn da waoogd Wẽnnaam to-to wã ra ka bark ye. Sẽn na yɩl n waoog Wẽnnaam a Zeova tɩ tall barka, d segd n nong-a-la ne d sũur fãa, la d sak n deeg ne pʋ-peelem t’a ziirã pa tar mak-n-taar ye. A Zeova a yen tãa bal la Naandã. Yẽ la Sẽn-tõeyã-fãa wã, ãndũni wã fãa tɩrlem soab la nonglmã halhaal menga. Yẽ n yaa tõnd fãagd la d Naab ning sẽn-ka-to tɩ sẽn be-b saasẽ la tẽng zugã fãa segd n sak-a. (Wilgri 4:11; 19:1) Tõnd sã n sɩd tẽeda bõn-kãensã, bɩ d pẽg a Zeova ne d sũur fãa.
4. Tõnd sẽn segd n waoog Wẽnnaam to-to wã wɛɛngẽ, sagl-bʋs la a Zezi kõ-yã la wãn-wãn la d tõe n tũ sagl-kãense?
4 A Zezi Kirist wilga tõnd d sẽn segd n waoog Wẽnnaam to-to. A ra yeelame: “Yãmb sã n wom biis wʋsgo, m Ba na n paama waoogre, la woto yãmb na n yɩɩ mam karen-biisi.” (Zã 15:8) Wãn-wãn la d tõe n wom biis wʋsgo? Pipi, yaa d sẽn na n kẽesd d mens ne d sũur fãa Rĩungã “koe-noog” mooneg pʋgẽ n lagem bõn-naandsã fãa ne manesem kãng n wilgd Wẽnnaam zʋg-sõmã ninsaal “nin sẽn ka tõe n yã” wã. (Matɩe 24:14; Rom dãmba 1:20) Sẽn paase, d fãa naagdame n maand karen-bi-paals tɩ rẽ paasd Wẽnnaam a Zeova pẽgrã pãnga. Yiib-n-soaba, d baoodame n na n paam vʋʋsem sõngã biis la d modgd n dɩkd Wẽnnaam a Zeova zʋg-kãsemsã togs-n-taare. (Galat dãmba 5:22, 23; Efɛɛz rãmba 5:1; Kolos rãmba 3:10) Rẽ kɩtame tɩ d sẽn zãad d mensã to-to daar fãa wã waoogd Wẽnnaam.
“Hal dũniyã tɛka”
5. Wilg-y a Poll sẽn gom n tadg to-to n wilg kiris-nebã zɩɩb sẽn yaa gom b tẽebã yell ne neb a taabã n pẽg Wẽnnaamã.
5 A Poll lɛtr ning a sẽn taas Rom dãmbã pʋgẽ, a wilga vẽeneg tɩ kiris-nebã zɩɩb yaa gom b tẽebã yell ne neb a taab n pẽg a Zeova. Rom dãmb sebrã gom-zu-kãseng a yembr wilgdame tɩ yaa neb nins sẽn tẽed a Zezi Kiristã bal n tõe n paam fãagre. Rom dãmba sak 10 pʋgẽ, a Poll wilgame tɩ yẽ wakatẽ Zʋɩf rãmbã ra ket n modgame n tũud a Moiiz Tõogã sẽn na yɩl n paam tɩrlem, baa ne ‘Kirist sẽn yaa Tõoga tɛkã.’ Rẽ kɩtame t’a Poll yeele: “Fo sã n kɩs Zusoab a Zezi kaset ne f noore la f tẽ f sũur pʋgẽ tɩ Wẽnnaam vʋʋga bãmba, fo na paam fãagre.” Sẽn sɩng ne rẽ tɛka, “welgr ka be Zʋɩf rãmba ne Gɛrk rãmbã sʋk ye, bãmb fãa tara Zusoab a yembre sẽn tar arzɛgs neb nins sẽn kot bãmba yĩnga. Tɩ bõe, ned ninga fãa sẽn kot ne [a Zeova] yʋʋre, a na n paama fãagre.”—Rom dãmba 10:4, 9-13.
6. A Poll rɩka Yɩɩl Sõamyã 19:4 goamã n tɩ loe ne bõe?
6 Rẽ poore a Poll soka vẽenega: “B na n yɩɩ wãn n pʋʋs ne b sẽn nan ka tẽ a soaba yʋʋre? La b na n yɩɩ wãn n tẽ b sẽn nan ka wʋm a soab kɩbare? La b na n yɩɩ wãn n wʋm tɩ ned ka togs koɛɛga?” (Rom dãmba 10:14) A Poll yeelame tɩ pa Israɛll “neba fãa n sak Koe-noogã ye.” Bõe yĩng tɩ b pa sak koe-noogã? Yaa b sẽn da pa tar tẽebã yĩnga. Sã n pa rẽ, pa segb sẽn na yɩl n maan dẽ la b pa paam ye. A Poll wilga rẽ n lebs n dɩk Yɩɩl Sõamyã 19:4 goamã, n tɩ loe-a ne kiris-neb koe-moonegã, la pa kaset ning bõn-naandsã sẽn kõt tɩ pa tũ ne noor goamã ye. A yeelame: “Bãmb koees saaga dũniyã fãa. La bãmb goama saaga hal dũniyã tɛka.” (Rom dãmba 10:16, 18) N-yẽe, wala bũmb nins a Zeova sẽn naanã sẽn pẽgd-a wã, pipi yʋʋm kob-gĩndẽ kiris-nebã me moona fãagr koe-noogã zĩig fãa n pẽg Wẽnnaam “hal dũniyã tɛka.” A Poll lɛtr ning a sẽn tool Kolos rãmbã pʋgẽ, a leb n wilga koe-noogã mooneg sẽn da ta zĩig ninga. A yeelame tɩ koe-noog kãng moona “dũniyã fãa.”—Kolos rãmba 1:23.
Kaset rãmb sẽn tar yẽesem
7. A Zezi yeelame tɩ zɩɩb-bʋg la kiris-nebã tara?
7 Wõnda a Poll gʋlsa a lɛtr ning a sẽn tool Kolos rãmbã sẽn na maan yʋʋm 27 a Zezi kũumã poore. Yɩɩ wãn tɩ koe-noogã mooneg ra tol n zãag n ta hal Kolos tao-tao woto? Sẽn yɩ woto wã yaa tɩ pipi yʋʋm kob-gĩndẽ kiris-nebã talla yẽesem t’a Zeova ning-b barka. A Zezi Kirist da reng n yeelame t’a karen-biisã na n moona wʋsg a sẽn yeel tɩ ‘yaa tɩlae tɩ Koe-nooga reng n moon buuda fãa sʋkã.’ (Mark 13:10) A Zezi kõo noor a Matɩe evãnzillã yaoolem verse rãmb pʋgẽ n paas bãngr-gom-kãngã. A yeelame: “Bɩ y kẽng n maan neba buud fãa tɩ b yɩ mam karen-biisi n lis bãmb ne Ba la Biiga la [vʋʋsem sõng] yʋʋre. La y zãms bãmb tɩ b sak bũmb nins fãa mam sẽn da togs yãmbã. La gese, mam bee ne yãmb wakat fãa hal tɩ ta wakat sɛɛbo.” (Matɩe 28:19, 20) A Zezi sẽn dʋ saasẽ wã poor bilf bala, a karen-biisã sɩnga gom-kãensã pidsgu.
8, 9. Sã n yaa ne Tʋʋm sebrã, wãn-wãn la kiris-nebã tũu a Zezi saglsã?
8 A Zezi karen-biis nins sẽn tar kɩs-sɩd ne-a wã sẽn paam vʋʋsem sõngã zaeeb yʋʋmd 33 Pãntekotã raarã poore, pipi bũmb b sẽn maan yɩɩ b sẽn togs kʋʋngã sẽn tigim Zerizalɛmã “Wẽnnaam tʋʋm-kãsemsã.” B koe-moonegã taa a bõn-datl hal sõma, tɩ “karen-biis sõor sẽn kolg tus a tãab” reeg lisgu. Karen-biisã kell n talla Wẽnnaam pẽgr zãma wã sʋk ne yẽesem hal tɩ rẽ wom biis wʋsgo.—Tʋʋma 2:4, 11, 41, 46, 47.
9 Pa yã n kaoos la tũudmã taoor dãmb bãng kiris-nin-kãensã sẽn tʋmd tʋʋm ninsã ye. A Pɩɛɛr ne a Zã sẽn gom ne pʋ-peelem n wilg yɛlã vẽenegã, yɛɛs-b lame tɩ b yeel tʋm-tʋmdb a yiibã tɩ b ra ye moon koɛɛgã ye. Tʋm-tʋmdbã leokame: “Tõnd ka tõe n ka togs bũmb nins tõnd sẽn yã la d wʋma ye.” B sẽn zab bãmb la b bas-bã zugẽ, a Pɩɛɛr ne a Zã lebg n tɩ paama b saam-biisã tɩ b fãa naag taab n pʋʋs a Zeova. Ne raoodo, b kos-a la woto: “Kõ yãmb tʋm-tʋmdbã raood kãseng tɩ b togs yãmb koɛɛgã.”—Tʋʋma 4:13, 20, 29.
10. Gɩdg-bʋg n wa n sɩnge, la kiris-neb hakɩkã manesem yɩɩ wãn-wãna?
10 Pʋʋs-kãngã ra zemsa ne a Zeova raabã wala rẽ sẽn wa n sɩd yɩ vẽeneg b pʋʋsgã poor bilfã. B ra yõga tʋm-tʋmdbã n kẽes bi-bees roog tɩ malɛk a ye wa yiis-b ne yel-solemde. Malɛkã yeel-b lame: “Kẽng-y n tɩ yaas-y Wẽnnaam dooga pʋgẽ n togs neba vɩɩm koɛɛga fãa.” (Tʋʋma 5:18-20) Tʋm-tʋmdbã sẽn sakã yĩngã, kɩtame t’a Zeova kell n ning-b barka. Dẽ, “daar fãa Wẽnnaam dooga pʋgẽ ne dot pʋsẽ bãmb zãmsa neba la b moon a Zezi Kirist koe-noogã n ka bas ye.” (Tʋʋma 5:42) Vẽenega, baa kɩɩsgã sẽn tall pãngã pa tol n tõog n gɩdg a Zezi karen-biisã tɩ b pa pẽg Wẽnnaam zãma wã sʋk ye.
11. Pipi kiris-nebã manesem yɩɩ wãn-wãn koe-moonegã wɛɛngẽ?
11 Pa yã n kaoos la b yõk a Etɩɛn n lob kug n kʋ ye. A kʋʋbã waa ne nams-toaag n kõ kiris-nebã Zerizalɛm, tɩ rẽ kɩt tɩ yɩ tɩlae ne bãmb fãa tɩ b zoe n yi tẽngã n kell tʋm-tʋmdbã bala. Rẽ yĩnga, namsgã komsa b raood bɩ? Yaa vẽeneg tɩ rẽ pa koms b raood ye. D karemdame: ‘Neb nins sẽn sãeega kẽnga zĩig-zĩig n moon Koe-noogã.’ (Tʋʋma 8:1, 4) B ra ket n togsda Wẽnnaam ziirã ne yẽesem wakat la wakat fãa. Tʋʋma sak a 9 pʋgẽ d karemdame t’a Soll sẽn yaa Fariziẽ sẽn yit Tarsã sẽn da wa n digd Damas n na n tɩ sɩng a Zezi karen-biisã namsgã, a yãa a Zezi vẽnegr pʋgẽ n lebg zoanga. A Soll sẽn ta Damasã, a Ananias sãooga a zondã ne yel-solemde. Pipi bũmb a Soll b sẽn wa n boond tɩ tʋm-tʋmd a Poll rẽ zugẽ wã sẽn deng n maan yɩɩ bõe? Kɩbarã yeelame: ‘Tao-tao bala, yẽ moona koɛɛga karen-dot pʋsẽ n yeel t’a Zezi yaa Wẽnnaam Biiga.’—Tʋʋma 9:20.
Ned kam fãa ra moonda koɛɛgã
12, 13. a) Sã n yaa ne pĩnd yɛl mitbã, bõe n da yaa vẽeneg pipi kiris-neb tigingã pʋgẽ? b) Wãn-to la Tʋʋma sebrã la a Poll goamã wilgd tɩ pĩnd yɛl mitbã sẽn yetã yaa sɩda?
12 Neb wʋsg sak n deegame tɩ pipi kiris-nebã tiging pʋgẽ, ned kam fãa ra kẽesda a meng koe-moonegã pʋgẽ. A Philip Schaff gʋlsa wakat kãng kiris-nebã wɛɛngẽ n yeele: “Tiging fãa bõn-datl da yaa koe-noogã moonego, tɩ tẽed fãa sẽn yaa kiris-ned ra yaa koe-moonda.” (Histoire de l’Église chrétienne [ãngil.]) A Samuel Williams me yeelame tɩ “nebã fãa tõe n kõo kaset tɩ pipi kiris-neb tigingã pʋgẽ, tẽedba fãa ra moonda koe-noogã, sẽn yɩɩd fãa neb nins sẽn da paam vʋʋsem sõngã kũunã.” (The Glorious Ministry of the Laity) A paasame: “A Zezi Kirist ra pa rat tɩ wa lebg neb sull takɩ bal n tar zu-noog n moond koɛɛgã ye.” Baa a Celse meng sẽn yɩ ned sẽn da kis Kirist tũudmã gʋlsame: “Neb sẽn tʋmd ne gãndo, zap rãmba, sẽn pa mi-b karengã la nin-zaalsã fãa ra yaa koe-noogã moondb sẽn tar yẽesem.”
13 Kɩbay nins b sẽn gʋls tɩ be Tʋʋm sebrã pʋgẽ wã wilgdame tɩ gom-kãensã yaa sɩda. Yʋʋmd 33 Pãntekotã raare, karen-biisã sẽn paam vʋʋsem sõng zaeebã poore, b fãa kɛpɩ, rap la pagba, b moona Wẽnnaam tʋʋm-kãsemsã zãma sʋka. B sẽn nams-b a Etɩɛn kũumã poorã, kiris-nebã fãa sẽn da sãeegã moona koe-noogã zĩis wʋsgo. Sẽn na maan yʋʋm 28 dẽ loogr poore, a Poll gʋlsa kiris-neb nins sẽn yaa Hebre rãmba fãa, la pa tũudum taoor dãmba sull ye. A yeel-b lame: “Bãmb maasem yĩnga, bɩ tõnd kõ Wẽnnaam maand daar fãa sẽn yaa pẽgre, sẽn dat n togs tɩ d kɩs kaset ne noor goam bãmb yʋʋrã yĩnga.” (Hebre dãmba 13:15) A Poll sẽn da wa n wilgd yẽ meng tagsg koe-moonegã tʋʋmd zugã, a yeelame: “Ne maam, tɩ moon koe-noogã ka waoogr baoob ye. Wẽnnaam yet-m lame tɩ m moone. Mam sã n ka moon koe-noogã toog n na n paam maam.” (1 Korẽnt dãmba 9:16, Kãab-paalgã Koe-noogo) Yaa vẽeneg tɩ pipi yʋʋm kob-gĩndẽ kiris-neb nins sẽn da yaa kɩs-sɩd rãmbã fãa me tagsg ra yaa woto.
14. Wãn to la koɛɛgã mooneg la tẽebã tar loees ne taaba?
14 Kiris-ned hakɩk segd n sɩd kẽesa a meng koe-noogã mooneg pʋgẽ, bala rẽ tara loees ne a tẽebã. A Poll ra yeelame tɩ “yaa ne sũur la ned tẽeda n paamd tɩrlem, la yaa ne noor la a kɩt kaseto n paamd fãagre.” (Rom dãmba 10:10) Rẽ yĩnga, yaa tigingã neb bilf bal sẽn yaa taoor dãmb n da tar tẽebo, tɩ yaa bãmb bal n da segd n moon koɛɛgã bɩ? Yaa vẽeneg tɩ ayo! Kiris-nebã fãa kɛpɩ ra tara tẽeb kãn-kãe ne Soaal a Zezi Kirist n da togsd tẽeb kãng neb a taabã. Sã n pa rẽ, b tẽebã ra na n yɩɩ kɩɩnga. (Zak 2:26) Pipi yʋʋm kob-gĩndẽ kiris-nebã sẽn wilg b tẽebã ne manesem kãngã wã kɩtame tɩ neb wʋsg wʋm a Zeova yʋʋrã pẽgre.
15, 16. Rɩk-y makr n wilg tɩ baa ne zu-loeesã, koe-moonegã tʋʋmd kẽnga taoore.
15 Pipi yʋʋm kob-gĩndẽ wã, a Zeova ninga a nin-buiidã bark tɩ b fɩɩge, baa ne b sẽn da segd zu-loees tigingã pʋgẽ la ne yɩng rãmbã. Wala makre, Tʋʋm sak a 6 wilgdame tɩ mo-yõsr n zĩnd kiris-neb nins sẽn gomd hebre wã ne b rãmb nins sẽn gomd gɛrkã sʋk tɩ tʋm-tʋmdbã welg-a. D karemda mo-yõsrã welgr sẽn wa ne biis ninsã wɛɛngẽ tɩ: “Wẽnnaam koɛɛga saagame n yɩɩd pĩnda, la karen-biisa paasa wʋsg Zerizalɛm. La maan-kʋʋdbã wʋsg saka tẽeb kãnga.”—Tʋʋma 6:7.
16 Kaoosg zugẽ, politik zab n wa n zĩnd Zide soolmã rĩm a Herood Agripa ne Sɩdõ la Tɩɩr nebã sʋka. Soolem kãens nebã waame n na n bao laafɩ ne rĩm a Herood tɩ rẽ fʋʋs-a t’a na n yi n gom zãma wã taoore. Kʋʋngã sẽn tigmã wa n sɩnga kaasg n yetẽ: “Yõwã yaa Wẽnnaam koɛɛga, ka ninsaal dẽnd ye.” La tao-tao bala, a Zeova malɛkã wẽe a Herood Agripa t’a ki, “yẽ sẽn ka kõ Wẽnnaam waoogra yĩnga.” (Tʋʋma 12:20-23) Ad woto sɩd yɩɩ sũ-sãang kãseng n kõ neb nins fãa sẽn da rell nanambs sẽn yaa ninsaalbã. (Yɩɩl Sõamyã 146:3, 4) Kiris-nebã yẽ ra ket n pẽgda a Zeova. Rẽ kɩtame tɩ ‘Wẽnnaam goama saag tɩ karen-biisã paase,’ baa ne gudgr ning sẽn da be naamã yɛl poorẽ wã.—Tʋʋma 12:24.
Yɛlã sẽn yɩ to-to rẽ wẽnde, la masã
17. Pipi yʋʋm kob-gĩndẽ wã, bõe la neb wʋsg wa n sõng n maane?
17 N-ye, pipi yʋʋm kob-gĩndẽ wã, kiris-neb tigimsã fãa sẽn da be dũniyã gill zugã neb ra pẽgda Wẽnnaam a Zeova ne yẽesem. Kiris-neb nins sẽn da tar kɩs-sɩdã fãa kɛpɩ kẽesa b mens koe-noogã mooneg pʋgẽ. Bãmb kẽer sɩd sega neb sẽn sak n kelge. Wala a Zezi sẽn yeelã, b zãmsa nin-kãens tɩ b tũ bũmb nins fãa a sẽn da yeel tɩ b maanã. (Matɩe 28:19, 20) Rẽ kɩtame tɩ tigingã neb sõor fɩɩg n paas tɩ neb wʋsg wa naag n pẽg a Zeova wala a Davɩɩd sẽn da pẽg-a to-to tẽn-kʋdem wẽndẽ wã. Bãmb fãa pidsa gom-kãensã Wẽnnaam sẽn vẽneg tɩ b gʋlsã: “[Zeova] mam Wẽnnaam, mam pʋʋsda yãmb bark ne m sũur fãa, la mam na n waooga yãmb yʋʋr wakat fãa. Tɩ bõe, yãmb nonglem yaa kãseng ne maam.”—Yɩɩl Sõamyã 86:12, 13.
18. a) Welg-bʋg n be pipi yʋʋm kob-gĩndẽ kiris-neb tigingã ne dũni kiris-nedemdã sẽn be rũndã-rũndã wã sʋka? b) Bõe la d na n yã sõsg ning sẽn pʋgdã pʋgẽ?
18 Rẽ wɛɛngẽ, porfesɛɛr a Allison Trites sẽn yaa tũudum yel-mitã sẽn togs goam ninsã sɩd kɩtdame tɩ d tagse. A maka Kirist tũudmã sẽn da be pipi yʋʋm kob-gĩndẽ wã ne rũndã-rũndã dũni kiris-nedemdã n yeele: “Rũndã-rũndã egiliiz rãmbã neb sõor sẽn fɩɩgdã, yaa zagsã neb sẽn lebgd kʋʋngã sabab yĩnga, (sẽn dat n yeel tɩ tẽngã egiliiz pʋgẽ, kambã sakda b roagdba tẽebã,) wall yaa toeeng sabaab yĩnga, (wala ned sẽn na n bas a tẽng egiliiz n tɩ lebg tẽng a to egiliiz neda). La Tʋʋm sebrã yaool n wilgdame tɩ yaa nin-paalsã sẽn da sakd n tuubd n wat tigingã pʋgẽ wã bal n da fɩɩgd tẽedbã sõore. Bala rẽ wẽnd tɩ yaa tigingã sẽn da nan sɩng a tʋʋmdã.” La rẽ rat n yeelame t’a Zezi sẽn da yeel tɩ Kirist tũudum hakɩkã neb sõor na n fɩɩgame wã pa na n pids bɩ? Ayo. Rũndã-rũndã, kiris-neb hakɩkã me pẽgda Wẽnnaam zãma sʋk ne yẽesem zĩig fãa wala pipi yʋʋm kob-gĩndẽ kiris-nebã sẽn da maandã bal kɛpɩ. Yaa rẽ la d na n yã sõsg ning sẽn pʋgdã pʋgẽ.
Y tõe n wilga a võor bɩ?
• Ne manesem bʋs la tõnd pẽgd Wẽnnaam?
• A Poll rɩka Yɩɩl Sõamyã 19:4 goamã n tɩ loe ne bõe?
• Wãn to la koɛɛgã mooneg la tẽebã tar loees ne taaba?
• Bõe n da yaa vẽeneg pipi yʋʋm kob-gĩndẽ kiris-neb tigingã pʋgẽ?
[Zãmsgã sogsgã]
[Foto, seb-neng 20, 21]
Saasã wilgda a Zeova ziirã wakat fãa
[Fotã soaadbã]
Courtesy of Anglo-Australian Observatory, photograph by David Malin
[Foto rãmba, seb-neng 23]
Koe-moonegã ne pʋʋsgã tara loees ne taaba