Segl-y y mens n gũ a Zeova raarã
Segl-y y mens n gũ a Zeova raarã
“Bɩ y segl tɩ Ninsaal Biigã wata wakat ning yãmb sẽn ka tẽeda.”—MATƖE 24:44.
1. Bõe yĩng tɩ d segd n gũ a Zeova raarã?
RA-KÃNG na n yɩɩ zabr la sũ-puugr daare, sũ-sãams ne toogo, lik la vargr daare. Sãmbg sẽn ka be, a Zeova “ra-kãsenga sẽn tar dabeema” na n wa sãama dũni-wẽn-kãngã wala sãoong sa-kãsengã me sẽn da wa n sãam a Nowe wakatẽ dũni-wẽngã. Bũmb pa tõe n gɩdg a waoongã ye. La “neb nins fãa sẽn na n pʋʋs ne [a Zeova] yʋʋrã na n paama fãagre.” (Zoɛll 3:3-5; Amos 5:18-20) Wẽnnaam na n sãama a bɛɛbã la a fãag a nin-buiidã. No-rɛɛs a Sofoni togsa goam nins sẽn pʋgdã n wilg tɩ yaa yãgb wakate. A yeelame: “[A Zeova] ra-kãsenga kolgame, a wata tao-tao wʋsgo.” (Sofoni 1:14) La Wẽnnaam bʋ-kaoorã na n yɩɩ ra-bʋre?
2, 3. Bõe yĩng tɩ yaa yõor yell tɩ d segl d mens n gũ a Zeova raarã?
2 A Zezi yeelame tɩ “ned ba a yembr ka mi daar kãnga la wakat kãng ye, baa malɛk rãmba sẽn be [saasẽ], baa Wẽnnaam Biiga meng ka mi ye, yaa Ba bala.” (Matɩe 24:36) D sẽn pa mi daarã takɩ wã yĩnga, d segd n tũu saglg ning yʋʋmd 2004 verse wã sẽn kõ wã ne d sũy fãa. A yetame: “Bɩ yãmb gũusi . . . Bɩ y segle.”—Matɩe 24:42, 44.
3 Sẽn na yɩl n bilg b sẽn na n wa fãag neb nins sẽn segl b mensã la b bas sẽn pa segl-bã sẽn na n yɩ ne lingr to-to, a Zezi yeelame tɩ “rap a yiib na n bee pʋʋgẽ, tɩ b rɩk a yembr n bas a yembre. La pagb a yiib na n bee neerẽ n werda, tɩ b rɩk a yembre n bas a yembre.” (Matɩe 24:40, 41) Ra-kãng sẽn na n yɩ yel-pakr daarã segd n wa mikame tɩ tõnd yaa nin-bʋg buudu? Na n mikame tɩ d segla d mense, bɩ a na n ling-d lame? Rẽ bee ne tõnd sẽn segend d mens to-to masã wã n tɩ yɩɩda. Segl d mens n gũ a Zeova raarã baoodame tɩ d zãag d mens ne manesem kẽer sẽn wɛ rũndã-rũndã, tɩ d gũus tɩ d tẽebã ra kɩll zĩig ninga, la tɩ d lak d mens ne vɩɩm manesem kẽere.
D lak d mens ne yam-kaalgo
4. Manesem bʋg la a Nowe wakatẽ nebã tall-yã?
4 D rɩk makr ne a Nowe wakatã. Biiblã yeelame tɩ “ne tẽebo, Wẽnnaam sẽn wilg a Nowe bũmb nins nin sẽn nan ka yã wã, yẽ zoee Wẽnnaam n maan koom koglg n fãag a yir dãmba.” (Hebre dãmba 11:7) Koom-koglgã yɩɩ bũmb b sẽn da nan zɩ n yã. Sẽn paase, a Nowe ra yaa “tɩrlem koe-moonda.” (2 Pɩɛɛr 2:5) La koglgã a Nowe sẽn da kaadã ne koe-moonegã fãa pa tõog n kɩt tɩ nebã toeem b manesmã ye. Bõe yĩnga? Bala b ra “rɩtame la b yũuda, la b peesd pagba, la b kõt b kamb sɩdba.” Bũmb ning sẽn da pak neb nins a Nowe sẽn da moondã, ra yaa b mensã yɛl la yõ-noogrã bala, “la bãmb ka bãng hal tɩ sãoong sa-kãsenga wa n loog ne bãmb fãa.”—Matɩe 24:38, 39.
5. A Lot wakatẽ wã, Sodom nebã manesem yɩɩ wãn-wãna?
5 A Lot wakatẽ nebã me talla manesem kãng buudu. Gʋlsg Sõamyã yetame tɩ bãmb me “ra rɩtame la b yũuda, b ra raadame la b koosdẽ, b ra bʋtame la b metẽ. La a Lot sẽn yi Sodom daare, bugum ne kidbr yii yĩngr n ni wa saag n sãam bãmb fãa.” (Luk 17:28, 29) Malɛgsã sẽn keoog a Lot tɩ Wẽnnaam na n sãama tẽngã, a Lot togsa a reem dãmbã yell ning sẽn da watã. La bãmb “gesa yõwã wa kʋʋsem goama.”—Sɩngre 19:14.
6. Manesem bʋg la d pa segd n talle?
6 A Zezi yeelame tɩ wa sẽn yɩ to-to a Nowe la a Lot wakatã, “na n yɩɩ woto me ne Ninsaal Biiga waoongo.” (Matɩe 24:39; Luk 17:30) Sɩd me, rũndã-rũndã neb wʋsg tara yam-kaalgo. D segd n gũusa d mens n da wa tall manesem kãng buud ye. Pa wẽng tɩ d rɩt rɩ-nood la d yũud rãam n zemsdẽ ye. La kãadem me pa wẽng ye. Bala yaa Wẽnnaam n sigl-a. Baasg zãnga, d sã n wa rɩk yel-kãensã n tɩ ning d vɩɩmã pipi zĩigẽ n lebs tẽebã yɛl poorẽ, rẽ yĩnga d segenda d mens a Zeova ra-kãsengã sẽn tar dabeemã yĩng sɩda?
7. Nand tɩ d yãk nug-tʋʋmde, sok-bʋg sẽn yaa kãseng la d segd n deng n sok d menga, la bõe yĩnga?
7 Tʋm-tʋmd a Poll da yeelame tɩ “wakatã lebga bilfu, la sẽn sɩng masã bɩ neb nins sẽn tar pagba yɩ wa b sẽn ka tar pagb ye.” (1 Korẽnt dãmba 7:29-31) Yaa wakat bilf bal n ket d sẽn segd n moon koe-noogã Wẽnnaam sẽn bobl-dã n sa. (Matɩe 24:14) A Poll da sagla yi-kãadbã meng tɩ b ra rɩk b sẽkã fãa n ges taab yell bal n lebs Rĩungã tʋʋmd poorẽ ye. Vẽenega, a Poll sẽn da sagend nebã tɩ b tall manesem ningã yaa lebend fasɩ ne yam-kaalgo. A Zezi ra yeelame tɩ d “reng n bao Wẽnnaam [Rĩungã] ne bãmb tɩrlem.” (Matɩe 6:33) D sã n wa na n dɩk sard wall d yãk nug-tʋʋmde, d segd n deng n soka d meng sok-kãngã sẽn yaa kãsengã: ‘Wãn-wãn la rẽ na n sõng-m tɩ m ning Wẽnnaam Rĩungã yɛl pipi zĩigẽ m vɩɩmã pʋgẽ?’
8. Tõnd daar fãa tʋʋmã sã n dɩkd d sẽkã wʋsgo, bõe la d segd n maane?
8 La yaa wãn masã, d sã n wa mik tɩ d rɩkda d sẽkã wʋsg n kẽesd d daar fãa tʋʋmã pʋgẽ n pa ye get tẽebã yɛl yelle? Tõnd sẽn vɩ to-to wã wõnda neb nins sẽn pa tar Gʋlsg Sõamyã bãngr hakɩkã la b pa Rĩungã koe-moondbã wʋsg bɩ? Sã n yaa woto, d segd n pʋʋsa rẽ yĩnga. A Zeova tõe n sõng-d lame tɩ d paam tagsg ning sẽn zemsã. (Rom dãmba 15:5; Filip rãmba 3:15) A tõe n sõng-d lame tɩ d ning Rĩungã yɛl pipi zĩigẽ, tɩ d maan sẽn yaa tɩrg la d maan tʋʋm nins a sẽn bobl-dã.—Rom dãmba 12:2; 2 Korẽnt dãmba 13:7.
D ra suus tẽebã wɛɛngẽ ye
9. Sẽn zems ne Wilgri 16:14-16 goamã, bõe yĩng tɩ d segd n mao n da suus tẽebã wɛɛngẽ?
9 Bãngr-gomdã sẽn gomd ‘Wẽnnaam Sẽn-tõe-fãa ra-kãsenga zabr’ sẽn wat Armagedõ wã yellã keoogame tɩ rẽ tõe n wa linga neb kẽer sẽn pa gũusdi. Soaal a Zezi Kirist yeelame: “Gese, mam wata wa wagdre. Bark bee ned ninga sẽn gũusda zugu, la sẽn talld a fut n ka rat n kẽn zaal tɩ neba yã a yãndã.” (Wilgri 16:14-16) Fut nins yell b sẽn gomd ka wã makda yel-manesem nins sẽn kɩtd tɩ b bãng tɩ tõnd yaa kiris-neb sẽn ya a Zeova Kaset rãmbã. Rẽ lagma ne Rĩungã koɛɛg d sẽn moondã la d sẽn tar kiris-ned manesmã. D sã n bas tẽebã tʋʋm maanego, yel-manesem nins sẽn kɩtd tɩ b bãng tɩ d yaa kiris-nebã na n menemame. Rẽ sɩd yaa yãnd la bũmb sẽn yaa yell wʋsgo. D segdame n mao n da wa suus tẽebã wɛɛngẽ ye. Wãn-wãn la d tõe n gil yel-kãngã?
10. Bõe yĩng tɩ Biiblã kareng daar fãa wã tõe n sõng tõnd tɩ d ra gũs tẽeba wɛɛngẽ?
10 Biiblã gomdame n yɩlemdẽ tɩ yaa tɩlae tɩ d gũ la d kell n yɩ mi-m-neng rãmba. Wala makre, Evãnzill dãmbã kɩbay tẽegd-d lame tɩ d kell n “gũusi” (Matɩe 24:42), tɩ d “gũ” (Matɩe 25:13; Mark 13:35-37), tɩ d “segle” (Matɩe 24:44; Luk 12:40), tɩ d ‘gũus neere’ (Mark 13:33). Tʋm-tʋmd a Poll sẽn yeel t’a Zeova raarã waoong na n linga dũni-kãngã nebã poore, a sagla a tẽed-n-taasã, n yeele: “Bɩ tõnd da gũs wa neb a taaba ye, la bɩ d gũusi n da tɩg ne rãam ye.” (1 Tesalonik rãmba 5:6) Biiblã yaoolem sebr pʋgẽ, sẽn na yɩl n wilg t’a waoongã na n yɩɩ lingri, a Zezi b sẽn kõ ziirã yeelame tɩ yẽ “wata tao-tao.” (Wilgri 3:11; 22:7, 12, 20) Israɛll buudã no-rɛɛsdb wʋsg me bilga a Zeova bʋʋdã raar sẽn yaa kãsengã, la b keoog nebã t’a watame. (Ezai 2:12, 17; Zeremi 30:7; Zoɛll 2:11; Sofoni 3:8) Biiblã sẽn yaa Wẽnnaam Gomdã kareng daar fãa, la bũmb ning d sẽn karemdã zug bʋgs na n sõng-d lame tɩ d tõog n da gũs tẽeba wɛɛngẽ ye.
11. Bõe yĩng tɩ meng Biibl zãmsgã yaa tɩlae sẽn na yɩl n da gũs tẽeba wɛɛngẽ?
11 N-ye, d sã n tũnugd ne sɛb nins ‘tʋm-tʋmd sẽn tũud sɩd la sẽn tar yamã’ sẽn tik Biiblã zug n yiisã n zãmsd Biiblã wakat fãa, d sɩd pa na n gũs tẽeba wɛɛngẽ ye. (Matɩe 24:45-47) Sẽn na yɩl n kɩt tɩ d meng Biibl zãmsgã yɩ sõma, d segd n maand-a-la neer n pa vaandẽ ye. (Hebre dãmba 5:14–6:3) Wakat fãa, d segd n dɩɩ tẽeb rɩɩb sẽn yaa taokã. Rũndã-rũndã, yɩl n yã sẽk n zãms Biiblã sɩd tõe n yɩɩ toogo. (Efɛɛz rãmba 5:15, 16) La baasgo, karemd Biiblã la sɛb nins sẽn wɛgsd-a wã d sẽn wat n tar sẽk bal pa sek ye. Sẽn na yɩl n tall ‘tẽeb sẽn yaa sɩd’ sẽn tar pãng n kell n gũusi, yaa tɩlae tɩ d zãmsd Biiblã wakat fãa n pa vaandẽ ye.—Tɩt 1:13.
12. Wãn-wãn la kiris-neb tigissã la tigis-kãsemsã sõngd tõnd tɩ d zabd ne tẽebã gõeem?
12 Tigissã d sẽn maand d tigimsẽ wã la tigis-kãsemsã me sõng-d lame tɩ d zabd ne tẽeba gõeem. Wãn to? Ne zãmsgã d sẽn paamd be wã maasem yĩnga. Tigis-kãens sasa, b tẽegd-d-la wakat fãa t’a Zeova raarã kolgame. Kiris-neb tigissã d sẽn maand semen fãa wã me yaa segb d sẽn paamd n daoond taab sẽn na yɩl n ‘maan nonglem la tʋʋm sõama.’ Rẽ kõta ned pãng t’a tõe n kell n da gũs tẽeba wɛɛngẽ ye. Pa lingr tɩ b sagend-d tɩ d sẽn ‘yã tɩ daarã kolgdame wã yĩng’ bɩ d ra bas taab tiging ye.—Hebre dãmba 10:24, 25.
13. Wãn to la kiris-neb tʋʋmã sõngd-d tɩ d ra gũs tẽeba wɛɛngẽ?
13 D sã n kẽesd d meng ne d sũur fãa koe-noogã pʋgẽ, leb n sõngd-d lame tɩ d ra gũs tẽebã pʋgẽ ye. D sã n ningd wakatã bãnã võor d yamẽ la d gomd b yell ne neb a taabã, rẽ na n kɩtame tɩ d ra yĩm-b ye. Sẽn paase, d sã n neẽ tɩ d sẽn zãmsd Biiblã ne neb ninsã bãngr paasdame, tɩ b sɩng yɛl nins b sẽn zãmsdã tũubu, rẽ kɩtdame tɩ d wɩngd ne gũubu. Tʋm-tʋmd a Pɩɛɛr da yeelame: “Yõk-y y tagsgo n gũus y mense.” (1 Pɩɛɛr 1:13) Wakat fãa d sã n ‘maand Zusoaba tʋʋmd wʋsgo,’ na n sõngd-d-la hal sõma tɩ d ra gũs tẽeba wɛɛngẽ ye.—1 Korẽnt dãmba 15:58.
Lak-y y mens ne vɩɩm manesem sẽn sãamd tẽebo
14. Wa sẽn be Luk 21:34-36 pʋgẽ wã, a Zezi sagl-d lame tɩ d lak d mens ne vɩɩm manesem bʋs buudu?
14 A Zezi bãngr-gom-kãseng ning pʋgẽ a sẽn gom bãnd sẽn na n wilg tɩ yẽ bee a naamẽ wã yellã, a keoogame: “Bɩ y gũus y mense n da sak tɩ yão-beed ne rã-yũur la vɩ-kãnga yɛlã pak yãmb tɩ ra-kãng wa ling yãmb ye. Tɩ bõe, a na n wa linga neba fãa sẽn be dũniyã zuga wa kũusri. Dẽ yĩnga bɩ y gũ la y pʋʋs daar fãa n paam pãng n põs bõn-kãens fãa sẽn na n wa wã, la y yals Ninsaal Biiga taoore.” (Luk 21:34-36) A Zezi bilga vɩɩm manesem buud toor-toor takɩ nebã sẽn tare. Yaa yão-beed ne rã-tɩgr la vʋɩɩm manesem sẽn wat ne yɩɩre.
15. Bõe yĩng tɩ d segd n lak d mens ne yão-beed la rã-tɩgre?
15 Yão-beed la rã-tɩgr yaa manesem sẽn pa zems ne Biiblã noy tɩ d segd n lak d mens ne rẽ. Biiblã yetame: “Ra tũ rã-yũudb la yão-beed rãmb ye.” (Yelbũna 23:20) La pa tɩlae ne ned t’a yũ rãam la a rɩ rɩɩb tɩ loog noor tɩ rẽ yaool n sãam a tẽebã ye. Rɩɩbã la rãamã yũub tõe n kẽes-d-la tẽeb suusg la a kʋɩɩng pʋgẽ n kaoos tɩ d nan pa paam taal yão-beed la rã-tɩgr yĩng ye. Biiblã yelbũnd a yembr yetame tɩ “kʋɩɩm datame la a ka paamd ye.” (Yelbũna 13:4) Nin-kãng soab tõe n wa rat n maana Wẽnnaam daabã la yam-kaalgã na n kɩtame t’a pa tõog ye.
16. Wãn-wãn la d tõe n da maan yɩɩr tɩ loog noor d zakã neb yell gesg wɛɛngẽ?
16 Yaa yɩɩr ne vɩɩmã yel-bʋs la a Zezi sẽn keoog tɩ d ra tallã? Yaa tõnd mensã zu-loeese, wala bao n kõ noorã la yɛl a taab sẽn wõnd rẽ. Ad sɩd na n yɩɩ yalemdo, d sã n bas tɩ bõn-kãensã rɩ tõnd tẽebã! A Zezi sokame: “Yãmb ned a bõe n tõe n paas a woglem kãntɩɩg a ye a vɩɩm tɛka a sẽn maand yɩɩrã yĩnga?” Rẽ zugẽ, a sagla a kɛlgdbã n yeele: “Dẽ yĩnga, bɩ yãmb da maan yɩɩr ye, la y ra yeele: Tõnd na n dɩɩ bõe? Tõnd na n yũu bõe? Tõnd na n yeelga bõe? Tɩ bõe, bõn-kãens la neb sẽn ka pʋʋsd Wẽnnaam[ã] baood wakat fãa. Yãmb Ba sẽn be [saasẽ wã] miimi tɩ yãmb data bõn-kãense.” D sã n ning Wẽnnaam Rĩungã tʋʋm pipi zĩigẽ d vɩɩmã pʋgẽ la d tall bas-yard t’a Zeova na n gesa d yelle, rẽ na n sõng-d lame tɩ d tõog n mao ne yɩɩrã la d kell n da gũs tẽeba wɛɛngẽ ye.—Matɩe 6:25-34.
17. Wãn-to la laogã pʋgb tõe n wa ne yɩɩre?
17 Laogã pʋgb me tõe n waa ne yɩɩre. Wala makre, neb kẽer gĩda b vɩɩmã b sẽn bao teed sẽn yɩɩd b paoongo, bɩ b sẽn pa tõe n zã. Sãnda sẽn tʋlg n lebg rakãagb tao-tao maga mag-bɛd sẽn pa zems tɩ rẽ kɩt tɩ b yiis b ligd n tʋm n lʋɩ. Neb a taab me ra tẽeme tɩ b sã n karem n zãage, b na n wa tõog n paama nug-tʋʋmd sẽn tar yaood wʋsgo, tɩ rẽ yɩ bẽdg ne-ba. Yaa sɩd tɩ f sã n karem n zãag n paam bãngr n wa na n bao tʋʋmde rẽ tõe n sõng-f lame. La karem n zãagã sẽn dɩt sẽk wʋsgã me yɩɩ sabab tɩ neb wʋsg tẽeb sãame. A Zeova raarã sẽn kolgdã, yel-kãensã pʋsẽ kõom sɩd yaa yell menga! Biiblã keoogame: “Neb nins sẽn dat n yɩ arzɛgs rãmba kẽeda makr la kũusr pʋgẽ la ratem wʋsg sẽn yaa yalemdo sẽn sãamd bãmba n kẽesd bãmb toog ne sãoong pʋgẽ.”—1 Tɩmote 6:9.
18. Sẽn na yɩl n gil laog pʋgbo, tõog-bʋg la d segd n talle?
18 Sẽn na yɩl n gil laog pʋgbo, yaa tɩlae tɩ sard nins fãa f sẽn dɩkdã pʋsẽ bɩ f tõog n bãng sẽn yaa tɩrg la sẽn yaa wẽng n bake. D wat n paama tõog kãngã, d sẽn na n dɩt ‘tẽeba rɩɩb sẽn yaa taok sẽn yaa neb nins sẽn bɩ wã yĩnga,’ la d tʋmd ne d yam-welgrã n tõe n bãng ‘sõma ne wẽng n bake.’ (Hebre dãmba 5:13, 14) D sã n wa yãkd yɛl nins d sẽn get tɩ tara yõod ne-d n yɩɩdã, bao n bãng “bũmb nins sẽn yaa sõama n yɩɩdã” takɩ na n kogl-d lame tɩ d ra wa rɩk sard sẽn yaa wẽng ye.—Filip rãmba 1:10.
19. D sã n wa neẽ tɩ sẽk ning d sẽn dɩkd tẽebã tʋʋm yĩngã yaa bilf bala, bõe la d segd n maane?
19 Laogã pʋgb tõe n luda d nin n kɩt tɩ sẽk ning d sẽn tar tẽebã yɛl yĩngã lebg bilf bɩ d pʋd n ye pa tall sẽk b yĩng meng ye. Wãn to la d tog n fees d mens n da wa lʋɩ bẽd-kãngã pʋgẽ? D segd n pʋʋsame n ges d sẽn tõe n gĩdg d vɩɩmã to-to t’a lebg faaga. Israɛll tẽn-kʋdem wẽndẽ rĩm a Salomo ra yeelame tɩ “tʋm-tʋmd sã n dɩt bilf walla wʋsgo, a gõeem yaa noogo. La arzɛk soab tɩgra ka basd-a t’a gũs ye.” (Koɛɛg Soaba 5:11) Rẽ yĩnga, tõnd teed nins sẽn pa tɩlae ne-dã yell gesg rɩta d sẽkã wʋsg la kõt-d yaams bɩ? D laogã sã n lebgd wʋsgo, yɛl nins sẽn tɩ loe ne b koglgã la b zãabã lebgda wʋsg n yɩɩda. Rẽ yĩnga, d sã n boog teed nins d sẽn tarã sãnda bilf tɩ gĩdg d vɩɩmã, kõn naf-d sɩda?
Maan-y y sẽn tõe tɛk n segl y mense
20, 21. a) Bas-m-yam bʋg la tʋm-tʋmd a Pɩɛɛr kõ-d a Zeova ra-kãsengã wɛɛngẽ? b) D sẽn segend d mens n gũud a Zeova raarã, yel-manesem bʋs la d segd n ket n tarẽ, la tʋʋm bʋs la d segd n ket n maandẽ?
20 A Nowe wakatẽ dũniyã wa n saame, la masã zãmaanã me na n wa saame. Tʋm-tʋmd a Pɩɛɛr kõ-d-la bas-m-yam ne rẽ n yeele: “[A Zeova] raarã na n waa wa wagdre. La baraare, saasã na n looga ne bʋrg kãsenga, la dũniyã bũmb fãa na n wɩnga wʋsgo n yẽnege, la tẽnga ne tʋʋma fãa sẽn be a zuga na n dɩɩ bugum.” Saasã sẽn makd ninsaalbã goosneemã rãmbã sẽn yaa wẽnsã la tẽngã sẽn makd ãdem-biis nins fãa sẽn zãag b mens ne Wẽnnaamã pa na n põs Wẽnnaam sũ-puugrã sẽn na n yɩ kãsengã sasa ye. Sẽn na yɩl n wilg tõnd d sẽn tog n segl d mens to-to ra-kãng yĩngã, a Pɩɛɛr yeelame: “Dẽ yĩnga, bõn-kãens fãa sẽn na n yẽnegã, yãmb ka rat n yɩ neba b yel-manesem sẽn yaa sõama la sẽn sakd Wẽnnaam n gũud bãmb daara ne datem kãseng bɩ?”—2 Pɩɛɛr 3:10-12.
21 Kiris-neb tigissã kẽnd wakat fãa, la koe-noogã mooneg bee tõnd yel-manesmã la d Wẽnnaamã tũub pʋgẽ. Bɩ d maand woto ne wẽn-sakr hakɩk n gũud a Zeova ra-kãsengã ne sũ-mare. Bɩ d “maan [d] sẽn tõe tɛk tɩ [Wẽnnaam wa] mik tɩ [tõnd] be laafɩ pʋgẽ, tɩ dẽgd tosb ne dõdb kaẽ ye.”—2 Pɩɛɛr 3:14.
Y tẽrame bɩ?
• Bõe yĩng tɩ d segd n segl d mens a Zeova raarã yĩnga?
• Sã n mikame tɩ daar fãa tʋʋmã n pak tõnd n yɩɩda, bõe la d segd n maane?
• Bõe n na n sõng-d tɩ d ra suus tẽebã wɛɛngẽ?
• Vɩɩm manesem bʋs sẽn sãamd tẽeb la d segd n lak d mens ne, la wãn to?
[Zãmsgã sogsgã]
[Foto rãmba, seb-neng 17]
A Nowe wakatẽ nebã ra pa gũusd ne bʋ-kaoorã sẽn da watã ye—La yãmb yẽ?