Yaa masã la d segd n gũus wʋsg n yɩɩd pĩndã
Yaa masã la d segd n gũus wʋsg n yɩɩd pĩndã
“Bɩ yãmb gũusi tɩ yãmb ka mi daar ninga yãmb Zusoaba sẽn na n wa ye.”—MATƖE 24:42.
1, 2. Bõe n wilgd tɩ d vɩɩ zãmaan-kãngã saab wakate?
SEB-GƲLSD a Bill Emmot yeelame tɩ “yʋʋm kob-gĩnd 20 soabã talla zab wʋsg n yɩɩda.” La a sak n deegame me tɩ zab la nen-kɛglem wʋsg zĩnda ãdem-biisã zãmaan dãmb fãa sẽn pʋg taabã pʋsẽ. A paasame: “Zabã la nen-kɛglmã wɛɛngẽ, yʋʋm kob-gĩnd 20 soabã pa tolg n yɩ toor fasɩ ne a taabã ye. Yaa yɛlã wẽnem bal n paase. Yɩɩ yʋʋm kob-gĩnd kãngã pʋgẽ bal la zabr yik dũniyã fãa gill zugu . . . La sẽn yɩ wẽng n tɩ yɩɩg fãa wã, yaa tɩ pa yɩ dũni gill zabr a ye bal ye, yɩɩ hal b yiib tõre.”
2 Zabã sẽn dãmbd ‘buud ne a to, la soolem ne a to’ sʋkã yaa bũmb a Zezi sẽn da reng n togse. La woto yaa ‘a Zezi belmã la dũniyã saab bãndã’ neng a yembr bala. Bãngr gom-kãngã sẽn yaa kãsengã pʋgẽ, a Zezi yeelame me tɩ kom, bã-longds la tẽn-digimdg na n zĩndame. (Matɩe 24:3, 7, 8; Luk 21:6, 7, 10, 11) Zĩis wʋsg pʋsẽ, yel-be-kãensã sõorã la b wẽnemã sɩd paasa hal wʋsgo. Manesem ning ãdem-biisã sẽn tar ne Wẽnnaam la bãmb ne taabã sɩd wilgdame tɩ ninsaalbã wẽnem lebga wʋsgo. Vɩɩm manesmã sãoong la nin-kʋʋrã ne nen-kɛglmã sẽn paasdã yaa vẽenega. Ãdem-biisã sẽn nong ligd yɩɩda b sẽn nong Wẽnnaam, yõ-noogrã n pak-b n yɩɩda. Rẽ fãa yaa kaset sẽn wilgd tɩ d vɩɩ “tood wakate.”—2 Tɩmote 3:1-5.
3. Bõe la ‘bãn nins sẽn wilgd wakatã’ segd n kɩt tɩ d maane?
3 Yãmb tagsg yaa wãn ne ãdem-biisã vɩɩm sẽn kengd n paasdẽ wã? Baa ne masã yɛlã sẽn wat ne sũ-sãamsã, neb wʋsg toog kae ye. Dũniyã nin-kãsemsã la a bãngdbã pa mi ‘bãn nins sẽn wilgd wakatã’ võorã ye. Tũudmã taoor dãmb me pa tõog n kõ sor-wilgr sẽn zems yel-kãens wɛɛngẽ ye. (Matɩe 16:1-3) La a Zezi yaool n da sagla a karen-biisã n yeele: “Bɩ yãmb gũusi tɩ yãmb ka mi daar ninga yãmb Zusoaba sẽn na n wa ye.” (Matɩe 24:42) A Zezi gom-kãensã pa wilgd tɩ d segd n gũusa wakat bilf pʋgẽ bal ye, a ra rat n yeelame tɩ d kell n gũus wakat fãa. Sẽn na yɩl n ket n gũusdẽ, d pa segd n gũs ye. Rẽ baoodame tɩ d maan tɩ yɩɩg sak n deeg bal tɩ d vɩɩ yaoolem dayã pʋsẽ la tɩ wakatã sɩd yaa toogo. D segd n kɩsa sɩd zãng-zãng tɩ “bũmb fãa sɛɛb wakat kolgame.” (1 Pɩɛɛr 4:7) Yaa rẽ bal n na n kɩt tɩ d tõog n sɩd gũus wʋsg n yɩɩg pĩndã. Woto yĩnga d segd n soka d mense: ‘Bõe n na n sõng tõnd tɩ d tõog n kɩs sɩd n paas tɩ saabã sɩd kolgame?’
4, 5. a) Bõe n na n kɩt tɩ d tẽ ne bas-yard zãng-zãng tɩ dũni-wẽn-kãngã saabã kolgame, la bõe yĩnga? b) Bõe sẽn zĩnd a Nowe wakatẽ wã n wõnd bũmb b sẽn maand ninsaal Biigã belem wakatã me?
4 Bɩ d ges yɛlã sẽn da yaa to-to, sẽn deng a Nowe wakatẽ sa-kãsengã sẽn yɩ yell sẽn pa tol n tall mak-n-taaga, hal ninsaalbã sẽn be tẽngã zug tɛkã. Nebã ra tolg n yaa wẽns wʋsg tɩ loog nug tɩ rẽ kɩt t’a Zeova ‘sũur sãam’ t’a yeele: “Mam na n sãama ninsaal mam sẽn da naan n ning dũniyã zugã.” (Sɩngre 6:6, 7) La a sɩd sãama nin-wẽnsã fãa. A Zezi ra maka yɛl nins sẽn zĩnd a Nowe wakatẽ wã ne rũndã-rũndã yɛlã n yeel tɩ “bũmb ninga sẽn zĩnd a Nowe wakatã na n zĩnda Ninsaal Biiga waoong wakat me.”—Matɩe 24:37.
5 Zemsame tɩ d tẽ tɩ bũmb ning a Zeova sẽn tagsd ne dũni-kãngã wã yaa wa a sẽn da tagsd to-to ne dũni ning sẽn deng sãoong sa-kãsengã. A sẽn da sãam a Nowe wakatẽ wẽn-kɩɩsdbã dũniyã, yaa vẽeneg t’a na n sãama rũndã-rũndã dũni-wẽngã me. D sã n bãng wakat kãng ne tõnd wakatã sẽn wõnd taab zĩis ninsã vẽenega, na n kɩtame tɩ d sɩd tẽ ne bas-yard zãng-zãng tɩ dũni-kãngã saabã kolgame. Yaa zĩ-bʋs wɛɛngẽ la zãmaan-kãensã a yiibã yɛl wõnd taabã? Taa zĩis a nu. Pipi wã, yaa b sẽn keoogd nebã vẽeneg tɩ sãoong n watã.
B reng n keoog-a-la ne “bũmb nif sẽn nan pa yã” ye
6. Yaa sard-bʋg la a Zeova ra rɩk n na n pids a Nowe wakatẽ wã?
6 A Nowe wakatẽ wã, a Zeova ra yeelame: “Mam [vʋʋsmã] sẽn kõt vɩɩmã ka na n pa ne ninsaal wakat fãa ye, bãmb sẽn yaa ninsaalba yĩnga, ninsaal yʋʋm na n zemsa koabg la pisi bala.” (Sɩngre 6:3) Yaa no-kãngã Wẽnnaam sẽn yiis n wilg yʋʋm 2490 sẽn deng Kirist zãmaanã n yɩ wẽn-kɩɩsdbã dũni saab sɩngre. Tags-y n ges-y no-kãngã sẽn da rat n yeel bũmb ning ne neb nins sẽn da vɩ rẽ wẽndã! Yʋʋm 120 bal n da ket t’a Zeova wa ne “sãoong sa-kãseng dũniyã zug n sãam bõn-vɩɩs nins fãa sẽn tar vɩɩm vʋʋsma tɩ b menem saas[ã] tẽngre.”—Sɩngre 6:17.
7. a) B sẽn keoog a Nowe tɩ sãoong sa-kãseng n watã, bõe la a maan-yã? b) B sẽn keoogd tõnd tɩ b na n sãama dũni-kãngã wã, bõe la d segd n maane?
7 Wẽnnaam da wilga a Nowe yʋʋm pi-gĩn sẽn deng tɩ sãoong n wate, la a rɩka a sẽkã n tʋm ne yam sẽn na yɩl n wa paam n põse. Tʋm-tʋmd a Poll yeelame: “Wẽnnaam sẽn wilg a Nowe bũmb nins nin sẽn nan ka yã wã, yẽ zoee Wẽnnaam n maan koom koglg n fãag a yir dãmba.” (Hebre dãmba 11:7) La yaa wãn to yẽ ne tõndo? Dũni-kãngã saabã sẽn sɩng yʋʋmd 1914 tɛkã, sẽn na maan yʋʋm 90 n looge. Hakɩka, d sɩd bee “sɛɛba wakate.” (Daniɛll 12:4) Tõnd manesem segd n yɩɩ wãn-wãn ne keoogr nins b sẽn sɩng n kõt-dã? Biiblã yetame tɩ “ned ninga sẽn maand Wẽnnaam daab paada wakat sẽn ka sɛta.” (1 Zã 2:17) Dẽnd yaa masã meng la d segd n wɩng ne a Zeova raabã maaneg n yɩɩda.
8, 9. Keoog-bʋs la b kõt tõnd wakatã, la wãn-wãn la b togsd-ba?
8 Tõnd wakatã, Biiblã zãmsdb sẽn tar pʋ-peelmã vaeesa Gʋlsg Sõamyã n bãng tɩ b na n sãama dũni-kãngã tɩ sik kaẽ ye. Rẽ yĩnga tõnd sɩd tẽeda bõn-kãng bɩ? Kelg-y bũmb ning a Zezi Kirist sẽn da togs vẽenegã: “Wakat kãnga toog kãseng na n zĩndame, toog sẽn yaa woto nan ka zĩnd dũniyã zug ye, la a kõn leb n zĩnd yõwã zugẽ abada ye.” (Matɩe 24:21) A Zezi ra yeelame me tɩ Wẽnnaam yãka yẽ t’a na n wa yɩ Bʋ-kaooda, n welg nebã wala pe-kɩɩm sẽn welgd a piis ne a bʋʋse. Neb nins sẽn pa zemsã “na n paama sɩbgr sẽn ka sɛta, la nin-tɩrsa na n paama vɩɩm sẽn ka sɛta.”—Matɩe 25:31-33, 46.
9 A Zeova tũnugda ne a ‘tʋm-tʋmd sẽn tũud sɩd la sẽn tar yamã’ sẽn kõt a nin-buiidã tẽebã rɩɩbã n tẽegd-b keoog-kãensã wakat fãa. (Matɩe 24:45-47) Sẽn paase, b boonda tẽng la buud fãa neb sẽn gomd goam toɛy-toɛyã tɩ b ‘zoe Wẽnnaam la b waoog-a, tɩ bõe, a bʋʋd kaoob wakat taame.’ (Wilgri 14:6, 7) Koɛɛg ning a Zeova Kaset rãmbã sẽn moond dũniyã fãa pʋgẽ n tɩ yɩɩdã keoogda nebã tɩ Wẽnnaam Rĩungã na n yiisa ninsaalbã naam tẽngã zug ka la bilfu. (Daniɛll 2:44) D pa segd n deem ne keoog-kãngã ye. Wẽnnaam sẽn yaa pãng sẽn ka to Soabã goam pidsdame n pa vaandẽ ye. (Ezai 55:10, 11) A pidsa a goamã a Nowe wakatẽ wã, la a na n pids-b-la tõnd wakatã me.—2 Pɩɛɛr 3:3-7.
Yoobã tara piuugr n debda
10. Bõe la d tõe n yeel yoobã sẽn da piuug a Nowe wakatẽ wã wɛɛngẽ?
10 Tõnd wakatã ne a Nowe wakatã leb n wõnda taab zĩig a to wɛɛngẽ. A Zeova ra kõo pipi raoã ne a pagã noor tɩ b rɩk pag ne rao lagengã tõog a sẽn kõ-bã n tʋm ne waoogr b kãadmã pʋgẽ n “dog kamb n pid dũniyã.” (Sɩngre 1:28) A Nowe wakatẽ wã, malɛg-kɩɩsdb n kʋɩɩb ãdem-biisã pag ne rao lagengã wɛɛngẽ. Malɛg-kãensã siga tẽng zug n toeem b mens n lebg ninsaalb n dɩgs pʋg-neeb n dog kamb b sẽn boond tɩ Nefilim dãmb bɩ nin-wobdo. Kom-kãens ra pa ninsaalb fasɩ, b ra leb n pa zĩn dãmb zãng me ye. (Sɩngre 6:2, 4) Malɛg-kãensã sẽn sak b yĩnsã ratem n maan yel-wẽnd ningã wõnda Sodom la Gomoor nebã sẽn da maan a soabã. (Ziid 6, 7) Rẽ ra yɩɩ sabab tɩ yoobã piuug wakat kãnga.
11. Yel-bʋs n kɩt tɩ tõnd wakatã wõnd a Nowe wakatã?
11 La rũndã-rũndã, ninsaalbã vɩɩm manesem yaa wãn-wãna? Yaoolem da-kãensã sasa, yaa pag ne rao lagengã yɛl n pak neb wʋsg b vɩɩmã pʋgẽ n tɩ yɩɩda. A Poll bilga nin-kãens tʋʋm-beedã vẽeneg n yeel tɩ “wẽng fãa sẽn ka le sãamd bãmb sũyã,” bãmb wʋsg ‘sakame n kẽ raglem yembd la b maan tʋʋm dẽgd fãa hal tɩ looge.’ (Efɛɛz rãmba 4:19) Yoobã yɛl wilgri, rap sẽn gãe pagb tɩ pa kãadem pʋgẽ, yoob b sẽn maand ne kom-bõonego, rap sẽn gãe taab la pagb sẽn gãe taabã yaa yɛl sẽn be zĩig fãa. Nin-kãens sʋkã, neb kẽer zoe n “deega yaood ninga sẽn zems bãmb kongrã b yĩnsa pʋsẽ” wala taoor bãas la b zags wãabo, bɩ zu-loees a taaba.—Rom dãmba 1:26, 27.
12. Bõe yĩng tɩ d segd n kisg wẽngã?
12 A Nowe wakatẽ wã, a Zeova kɩtame tɩ sa-kãseng ni n sãam dũniyã sẽn da pid ne yoobã. D pa segd n yĩm abada tɩ dũni ning pʋgẽ tõnd sẽn vɩyã sɩd yaa wala a Nowe wakatẽ dũniyã bal kɛpɩ ye. ‘To-kãsengã’ sẽn watã na n menemsa ‘yoaadbã, rap sẽn maand b mens wa pagbã la raglem dãmba’ fãa tẽngã zugu. (Matɩe 24:21; 1 Korẽnt dãmba 6:9, 10; Wilgri 21:8) Ad sɩd yaa yãgb yell meng tɩ d kisg wẽng buudã fãa la d zãag d mens ne yɛl nins sẽn tõe n tus-d tɩ d lʋɩ yoob pʋgẽ wã!—Yɩɩl Sõamyã 97:10; 1 Korẽnt dãmba 6:18.
Tẽngã “neba ra maanda taab pãnga”
13. A Nowe wakatã, bõe n yɩ sabab tɩ tẽngã ra pid ne ‘neb sẽn da maand taab pãnga’?
13 Biiblã wilga bũmb a tãab-n-soab me sẽn zĩnd a Nowe wakatẽ wã n yeele: “Dũniyã neba lebga bõn-põaas Wẽnnaam nifẽ, la dũniyã neba ra maanda taab pãnga.” (Sɩngre 6:11) Wẽnemã ra pa bõn-sãang wakat kãng ye. A Ãdem biribl a Kayẽ ra kʋʋ a yao sẽn da yaa nin-tɩrga. (Sɩngre 4:8) A Lamek yɩɩl n goma wẽnemã sẽn zĩnd yẽ wakatẽ wã yell n wilg yẽ sẽn kʋ bi-bɩɩg a ye, n yetẽ tɩ yaa sẽn na yɩl n kogl a menga. (Sɩngre 4:23, 24) Bũmb sẽn da yaa bõn-sãang a Nowe wakatã yaa nen-kɛglmã sẽn da paas hal wʋsgã. Wẽnnaam komdibli wã sẽn sig n dɩgs pagb tẽngã zug n dog kamb sẽn yaa nin-wobd ne-bã, kɩtame tɩ wẽnemã ra zẽn n yɩɩg pĩndã. Traduction du monde nouveau wã yetame tɩ nin-wobd kãensã sẽn da maand nebã pãngã ra yaa “lubdba,” sẽn dat n yeel tɩ “neb sẽn lubd neb a taabã.” (Sɩngre 6:4) Rẽ kɩtame tɩ nebã ra ‘maand taab pãng dũniyã zugu.’ (Sɩngre 6:13) Tags-y n ges-y zu-loees nins a Nowe sẽn da segd n mao ne n tõog n zã a zakã sõma nin-kãensã sʋkã! Baasg zãnga, a Nowe kell n yɩɩ ‘nin-tɩrg a Zeova taoor zãmaan-kãngã pʋgẽ.’—Sɩngre 7:1.
14. Hal sẽn ta zĩ-bʋg la masã dũniyã ‘pid ne neb sẽn maand taab pãnga’?
14 Hal ãdem-biisã sẽn be tẽng zug tɛka, nen-kɛglmã beeme. La wa sẽn yɩ to-to a Nowe wakatã, rũndã-rũndã nen-kɛglmã wẽnem paasame n yɩɩd pĩndã. Wakat fãa, d wʋmda b sẽn gomd zak pʋgẽ nen-kɛglem yelle, teerorism bɩ bi-beer sẽn loog nug n kẽesd rabeem la buud zãng neb kʋʋb yelle. D leb n wʋmdame tɩ b gomd neb sẽn tãood b taab ne bʋg-raad n kʋʋd zaalem yĩng bala. Sẽn paas rẽ, zabã kɩtdame tɩ b raagd zɩɩm wʋsgo. Tẽngã ye pida ne nen-kɛglem. Bõe yĩnga? Bõe n yɩ sabab tɩ wẽnemã ye paam pãng woto? Sok-kãngã leoorã vẽnegda wõneg sẽn be bũmb a to sẽn zĩnd a Nowe wakatẽ wã la tõnd wakatã sʋka.
15. a) Bõe n kɩt tɩ nen-kɛglmã paam pãng n paas yaoolem dayã pʋsẽ? b) D tõe n talla bas-m-yam tɩ rẽ na n wa baasa ne bõe?
15 Wẽnnaam sẽn lugl Mesi Rĩungã saasẽ yʋʋmd 1914 pʋgẽ wã, Rĩm a Zezi Kirist b sẽn kõ naamã pidsa tʋʋm-kãseng wakat kãnga. A riga a Sʋɩtãan ne a malɛgsã saasẽ tɩ b sig tẽngã zugu. (Wilgri 12:9-12) Sẽn deng sa-kãsengã, malɛg-kɩɩsdb n da yãk yam n bas b zĩigã saasẽ, la rũndã-rũndã b tolg n dig-b lame n yiis saasẽ. Sẽn paase, b pa le tõe n tedg b mens n yɩ ninsaalb tẽng zug n pids b ratem wẽnsã me ye. Yel-kãngã kɩtame tɩ b sũyã sãame. La b bʋʋdã kaoob sẽn ta n sa wã yĩnga, b sũyã yikame tɩ rẽ kɩt tɩ b tusd ninsaalbã la b siglsã tɩ b tʋmd tʋʋm-beed buud fãa la nen-kɛglem tɩ rẽ wẽnem yɩɩd yɛl nins sẽn zĩnd a Nowe wakatẽ wã menga. A Zeova sãama dũni ning sẽn deng sãoong sa-kãsengã, malɛg-kɩɩsdbã ne b kambã sẽn da pids-a ne wẽngã yĩnga. Bãng-y vẽeneg t’a na n sãama rũndã-rũndã zãmaanã me. (Yɩɩl Sõamyã 37:10) La neb nins sẽn gũusd rũndã-rũndã wã miime tɩ bãmb fãagr wakat sɩd kolgame.
B moonda koɛɛgã
16, 17. Yel-bʋg sẽn yaa naas-n-soab sẽn zĩnd a Nowe wakatẽ wã n maand tõnd wakatã me?
16 Bũmb a naas-n-soab sẽn kɩt tɩ dũni kãngã ne wakat ning sẽn deng sãoong sa-kãsengã wõnd taabã, yaa tʋʋmd ning b sẽn da bobl a Nowe sasa kãngã. A Nowe kaa koom koglg sẽn yaa parwẽnde. A leb n yɩɩ “koe-moonda.” (2 Pɩɛɛr 2:5) Yaa koe-bʋg buud la a moon-yã? Yaa vẽeneg tɩ koɛɛg ning a Nowe sẽn moona ra wilgda nebã tɩ b tek yam n kos sugr la b bãng tɩ sãoong n wate. A Zezi ra yeelame t’a Nowe wakatẽ nebã “ka bãng hal tɩ sãoong sa-kãsenga wa n loog ne bãmb fãa.”—Matɩe 24:38, 39.
17 Woto me, a Zeova Kaset rãmbã sẽn pidsd koe-moonegã tʋʋmd b sẽn bobl-bã yĩnga, Wẽnnaam Rĩungã koɛɛg paamda mooneg dũniyã gill zugu. Dũniyã babs fãa la bala, nebã tõe n wʋma Rĩungã koɛɛg b mens buud goam pʋgẽ la b karm-a. B yiisda Gũusg Gasgã sẽn moond a Zeova Rĩungã sẽn yɩɩd zʋrno rãmb milyõ 25 kiuug fãa, sẽn yɩɩd buud goam 140 pʋgẽ. Wẽnnaam Rĩungã koe-noog sɩd moonda ‘dũniyã tɛk fãa tɩ yaa kaset buud fãa yĩnga.’ Tʋʋm-kãngã sã n wa tʋm tɩ sek wa Wẽnnaam sẽn date, sãmbg ka be tɩ saabã na n waame ye.—Matɩe 24:14.
18. Wala sẽn yɩ to-to a Nowe wakatã, neb wʋsg manesem yaa wãn-wãn ne tõnd koe-moonegã?
18 D sã n ges nebã sẽn da pa tar tẽeb la b vɩ vɩ-yook ning nand tɩ sãoong sa-kãsengã wa wã, d bãngda ka-tẽeb rãmbã sẽn da laad la b namsd a Nowe ne a zakã rãmb to-to wã sẽn da ta zĩig ningã. La ne rẽ fãa, saabã waame. Woto me, yaoolem wakat kãensã, dũniyã pida ne “neb sẽn laad neba.” La Biiblã yetame t’a ‘Zeova raarã na n waa wa wagdre.’ (2 Pɩɛɛr 3:3, 4, 10) Hakɩka, a na n waa wakat ning b sẽn yãkã bal takɩ, n pa vaal ye. (Habakuk 2:3) Ad yaa yam bũmb tɩ d sɩd ket n gũusdẽ!
Neb bilf bal n põse
19, 20. Bõe sẽn zĩnd sãoong sa-kãsengã sasa n na n zĩnd dũni-kãngã saabẽ wã me?
19 A Nowe wakatã ne tõnd wakatã sẽn tɩ wõnd taab zĩig ningã pa tek nebã wẽnem la b sãoongã ye. Wala neb sẽn põs sãoong sa-kãsengã sasa wã, neb n na n põs dũni-kãngã sãoongã sasa me. Neb nins sẽn põs sa-kãsengã sasa wã yɩɩ sũ-bʋgsem dãmbã sẽn da pa tall vɩ-yook wala b wakatẽ nebã. B kell n tũu Wẽnnaam keoogrã n lak b mens ne wakat kãng dũni-wẽngã. Biiblã yetame t’a Zeova “ra nonga a Nowe.” Sẽn paase, ‘a Nowe [yɩɩ] nin-tɩrg sẽn ka tall yell yẽ zamaanã neb sʋk ye.’ (Sɩngre 6:8, 9) Ãdem-biisã fãa sʋka, zak a ye neb bala, “neb bilf bal n põs ne koomã, bãmb yaa neb a nii.” (1 Pɩɛɛr 3:20) La Wẽnnaam a Zeova kõo bãmb tʋʋmd n yeel-b yaa: “Rog-y kamb n pid dũniyã n paase.”—Sɩngre 9:1.
20 Wẽnnaam Gomdã kõt-d-la bas-m-yam tɩ ‘kʋʋn-kãseng’ n na n “yi to-kãsengã pʋgẽ.” (Wilgri 7:9, 14) Kʋʋn-kãsengã neb sõor na n yɩɩ wãna? A Zezi meng ra yeelame tɩ “zak noor sẽn yaa sẽkã la sor sẽn yaa bãanegã rabda vɩɩm zĩigẽ, la a yãt-bã yaa bilfu.” (Matɩe 7:13, 14) D sã n na n mak ne tẽngã neb milyaar a yoobã, sẽn na n põs-b to-kãsengã sẽn watã sõor paoodame. Baasg zãnga, nin-kãens me na n paama zu-noog wala sẽn põs-b sãoong sa-kãsengã sẽn da paam a soaba. Tõe tɩ wakat n na zĩnd tɩ sẽn na n põs-bã sẽn na n yɩ tẽn-paalgã nin-buiidã na n dog kamba.—Ezai 65:23.
“Bɩ yãmb [kell n] gũusi”
21, 22. a) Hal sẽn ta zĩ-bʋg la sãoong sa-kãsengã kɩbar d sẽn lebg n tẽegã naf yãmbã? b) Yʋʋmd 2004 verse wã yaa bʋgo, la bõe yĩng tɩ d segd n tũ a saglgã?
21 Baa ne sãoong sa-kãsengã sẽn yɩ bũmb sẽn wõnd a zĩnda yʋʋm wʋsg sẽn deng tõnd wakatã, a kõt-d-la keoogr vẽeneg d sẽn pa segd n yĩmi. (Rom dãmba 15:4) Wõneg ning sẽn be a Nowe wakatã ne tõnd wakatã sʋkã segd n kɩtame tɩ d bãng bũmb nins sẽn maand masã wã võor n paasdẽ, la a kɩt tɩ d gũ wakat ning a Zezi sẽn na n wa ne lingr n pids bʋ-kaoorã n sãam nin-wẽnsã.
22 Rũndã-rũndã, tẽeb koom koglg la b kaad t’a Zezi kõt sor-wilgr tʋʋm-kãng pʋgẽ. Sẽn na yɩl n kõ balemdb hakɩkã bãan la fãagre, tẽeb arzãn sẽn makd koglg n be. (2 Korẽnt dãmba 12:3, 4) Sẽn na yɩl n paam tɩ b kogl-d to-kãsengã sẽn watã sasa, d segd n kell n paa tẽeb arzãn kãng pʋgẽ. A Sʋɩtãan dũniyã sẽn pa be tẽeb arzãnã pʋgẽ wã baoodame n na n sãam neb nins sẽn suusd tẽebã wɛɛngẽ wã tẽebo. Yaa yõor yell tɩ d ‘kell n gũusi,’ la d yɩ neb sẽn segl n gũud a Zeova raarã.—Matɩe 24:42, 44.
Y tẽrame bɩ?
• Sagl-bʋg la a Zezi kõ a waoongã wɛɛngẽ?
• A Zezi maka a belmã wakat ne bõe?
• Zĩ-bʋs wɛɛngẽ la tõnd wakatã ne a Nowe wakatã wõnd taaba?
• A Nowe wakatã ne tõnd wakatã yɛl sẽn wõnd taabã zug bʋgsg na n kɩtame tɩ d tall manesem bʋgo?
[Zãmsgã sogsgã]
[Goam sẽn tar pãngã, seb-neng 14]
Yʋʋmd 2004 verse wã na n yɩɩ yãoã: “Bɩ yãmb gũusi . . . Bɩ y segle.”—Matɩe 24:42, 44.