“Zusoaba, bɩ y zãms tõnd pʋʋsgo”
“Zusoaba, bɩ y zãms tõnd pʋʋsgo”
“Karen-biig a yembr yeela bãmb yaa: ‘Zusoaba, bɩ y zãms tõnd pʋʋsgo.’ ”—LUK 11:1.
1. Bõe yĩng t’a Zezi karen-biig a ye kos-a t’a zãms bãmb pʋʋsgo?
YƲƲMD 32 wã sasa, daar a yembre, a Zezi karen-biig n wa n yã a sẽn pʋʋsde. Tõe t’a Zezi ra pʋʋsda a sũurẽ wã, t’a karen-biigã ra pa tõe n wʋm bũmb ning a sẽn yet a Ba wã ye. La a Zezi sẽn pʋʋs n sa wã, karen-biigã yeel-a lame: “Zusoaba, bɩ y zãms tõnd pʋʋsgo.” (Luk 11:1) Bõe n tus-a t’a kos woto? Pʋʋsgã yaa bũmb Zʋɩf rãmbã sẽn da maand wakat fãa b vɩɩmã la b balengã yɛl pʋsẽ. Pʋʋsg wʋsg n be Yɩɩl Sõamyã sebr sẽn be Biiblã babg ning b sẽn gʋls ne Hebre wã pʋgẽ la zĩis a taaba. Dẽnd karen-biigã ra pa kot tɩ b zãms-a bũmb a sẽn pa mi bɩ a sẽn da zɩ n maan lae-lae ye. Sãmbg sẽn ka be, a ra mii pʋʋs-vɩɩd nins Zidaismã tũudum taoor dãmb sẽn da nong n pʋʋsd wakat fãa wã. La masã, a sẽn yã a Zezi sẽn pʋʋsdã a bãngame tɩ welg-kãseng n be rabẽ rãmbã pʋʋsg sẽn wilgd tɩtaam la pʋ-likã ne a Zezi sẽn pʋʋs to-to wã sʋka.—Matɩe 6:5-8.
2. a) Bõe n wilgd t’a Zezi ra pa rat n yeel tɩ d segd n dɩkda a pʋʋsgã gom-biis fãa ne zug n lebgd n togsdẽ? b) Bõe yĩng tɩ d rat n bãng pʋʋsgo?
2 Sẽn zems kiis 18 sẽn deng rẽ, a Zezi tãng zug zãmsgã pʋgẽ, a ra zãmsa a karen-biisã pʋʋsg buud tɩ b segd n tikd rẽ zug n pʋʋsdẽ. (Matɩe 6:9-13) Tõe t’a Zezi karen-bi-kãngã pa zĩnd sasa kãng ye. Rẽ n so t’a Zezi ye wilg a pʋʋsgã tags-kãsemse. A sẽn pa lebg n dɩk a pʋʋsgã goam fãa n togsã wilgda vẽeneg tɩ ra pa pʋʋsg nebã sẽn segd n dɩk ne zug n lebsd n togsd gom-kãens kɛpɩ wakat fãa ye. (Luk 11:1-4) Wala karen-bi-kãngã yʋʋr b sẽn pa wilgã, tõnd me ratame tɩ b zãms-d pʋʋsgo, tɩ rẽ pẽneg-d ne a Zeova n paase. Woto yĩng bɩ d lebg n vaees a Zezi pʋʋsgã zãng tʋm-tʋmd a Matɩe sẽn gʋlsã n gese. A tara kosg a yopoe. Kosg a tãab n tɩ loe ne Wẽnnaam daabã, t’a naasã tɩ loe ne yɛl tõnd sẽn dat d mensã la d tẽebã yĩnga. Sõs-kãngã pʋgẽ d na n vaeesa pipi kosg a tãabã.
Ba sẽn tar nonglem
3, 4. D sã n boond a Zeova tɩ “tõnd Ba,” bõe la rẽ rat n wilgi?
3 Sɩngrẽ wã, a Zezi yeelame tɩ d pʋʋsgã segd n wilgame tɩ d tara zems-n-taar la waoogr sẽn yaa kãseng ne a Zeova. A sẽn da gomd ne a karen-biisã sẽn da karg n gũbg-a tãngã sigdgẽ wã, a yeel-b lame tɩ b sã n na n gom ne a Zeova bɩ b bool-a tɩ “tõnd Ba sẽn be [saasẽ].” (Matɩe 6:9) Biibl-mit a yembr yeelame tɩ baa a Zezi sã n goma ne Hebre ning neba sẽn da minim n gomdã wall Arameẽ, gom-biig ning sẽn dat n yeel tɩ “Ba” wã wõnda ‘bi-bilf sẽn boond’ a Ba to-to wã. D sã n boond a Zeova tɩ “tõnd Ba,” rẽ wilgdame tɩ d nong-a lame, la tɩ d tara bas-yard la zems-n-taar sõma ne-a.
4 D sã n yet tɩ ‘tõnd Ba,’ d wilgdame me tɩ d sak n deegame tɩ d bee zag-kãseng neb sʋka, rap la pagb sẽn sak n deeg t’a Zeova n sɩd yaa vɩɩmã Kõta. (Ezai 64:7; Tʋʋma 17:24, 28) Wẽnnaam saka kiris-neb nins sẽn dog ne vʋʋsem sõngã wa a “kamba,” tɩ b tõe n boond-a n “kelemd n yetẽ tɩ: ‘Abba, Ba!’ ” (Rom dãmba 8:14, 15) Neb milyõ rãmb n lebg b tũud-n-taas sẽn tar kɩs-sɩda. Nin-kãens rɩka b vɩɩmã n kõ a Zeova n deeg koom lisg n wilg rẽnda. Bãmb fãa sẽn yaa “piis a taabã” me tõe n kolga a Zeova a Zezi yʋʋrã maasem yĩng la b bool-a tɩ “tõnd Ba.” (Zã 10:16; 14:6) D tõe n kolga d saasẽ Ba wã pʋʋsg pʋgẽ wakat fãa sẽn na yɩl n pẽg-a, n pʋʋs-a bark nonglem ning fãa a sẽn tar ne-dã yĩnga, la d wilg-a yɛl nins fãa sẽn kõt-d yɩɩrã, n tar bas-m-yam t’a geta d yelle.—Filip rãmba 4:6, 7; 1 Pɩɛɛr 5:6, 7.
A Zeova yʋʋrã nonglem
5. Bõe la a Zezi reng n kos a pʋʋsgã pʋgẽ, la bõe yĩng tɩ rẽ zemse?
5 Pipi kosgã wilga bũmb ning sẽn tar yõod n yɩɩdã. A yetame: “Tɩ yãmb yʋʋr yɩ ne waoogre.” (Matɩe 6:9) N-ye, a Zeova yʋʋrã waoogr n segd n deng n pak tõndo, bala d nong-a lame, la d kisa rõdg ning fãa b sẽn dõd-a n sãam a yʋʋrã. A Sʋɩtãan kɩɩsgã la a sẽn tus pipi ninsaalb a yiibã tɩ b kɩɩs Wẽnnaam a Zeova wã, rẽ sãama a Zeova yʋʋrã n wa ne sãmb-sãmb Wẽnnaam sẽn dɩt naamã ãndũniyã fãa zug to-to wã wɛɛngẽ. (Sɩngre 3:1-6) Sẽn paase, pipi kɩɩsgã tɛk n tar n watẽ, neb sẽn yet tɩ b tũuda a Zeova n sãam a yʋʋrã ne bũmb nins b sẽn zãms nebã la b tʋʋm-beedã sababo.
6. Bõe la d pa na n maane, d sã n pʋʋsdẽ t’a Zeova yʋʋrã paam waoogre?
6 Tõnd sẽn pʋʋsd n kot t’a Zeova yʋʋrã paam waoogrã wilgdame tɩ d bee a poorẽ a naam sẽn ka to wã yell wɛɛngẽ, sẽn dat n yeel tɩ d saka ne d sũur fãa tɩ yẽ n sɩd segd n dɩ naam ãndũniyã gill zugu. A Zeova ratame tɩ ãndũniyã gill pʋgẽ, bɩ yɩ malɛgs la ninsaalb nins sẽn sakd a naam sẽn ka to wã sẽn zemsã ne sũ-noog b sẽn nong yẽ la b nong a yʋʋrã sẽn tar võor ningã yĩngã bal n be be. (1 Kɩbaya 29:10-13; Yɩɩl Sõamyã 8:2; 148:13) D sã n nong a Zeova yʋʋrã, rẽ na n sõng-d lame tɩ d ra wa maan bũmb sẽn tõe n yɩ sabab t’a yʋʋrã sẽn yaa sõngã sãam ye. (Ezekɩɛll 36:20, 21; Rom dãmba 2:21-24) Sẽn mik tɩ ãndũniyã ne neb nins sẽn be a zugã bãan tɩ loeya ne a Zeova yʋʋrã waoogr la b sẽn na n sak a naam sẽn ka to wã ne nonglmã yĩngã, tõnd sẽn pʋʋsd n yetẽ tɩ ‘yãmb yʋʋr yɩ ne waoogrã’ wilgdame tɩ d kɩsa sɩd zãng t’a Zeova raabã na n pidsame t’a paam pẽgre.—Ezekɩɛll 38:23.
Rĩung ning yĩng d sẽn pʋʋsdã
7, 8. a) Yaa Rĩung bʋg la a Zezi zãms a karen-biisã tɩ b pʋʋs tɩ wa? b) A Daniɛll sebrã ne Wilgr sebrã pʋsẽ, bõe la d zãmsd Rĩung kãng wɛɛngẽ?
7 A Zezi pʋʋsgã kosg a yiib-n-soabã yaa: “Tɩ yãmb soolem [rĩungã, NW] wa.” (Matɩe 6:10) Kos-kãngã tɩ loeya wʋsg ne pipi soabã. Yaa ne a saasẽ goosneemã wã sẽn yaa Mesi Rĩungã a Biribl a Zezi Kirist sẽn segd n yɩ a Rĩma la a Zeova na n tũnug ne n maneg a yʋʋrã sẽn yaa sõngã. (Yɩɩl Sõamyã 2:1-9) A Daniɛll bãngr-gomdã bilga Mesi Rĩungã wa “kugr” sẽn bisg “tãng” zugu. (Daniɛll 2:34, 35, 44, 45) Tãngã makda a Zeova naam sẽn ka to wã. Rẽnd kugrã sẽn makd Rĩungã leb n ya a Zeova naam sẽn ka to wã pukr a to. Bãngr-gomdã pʋgẽ, kugrã “lebga tãn-kãseng n pid dũniyã zĩiga fãa” tɩ rẽ wilgdẽ tɩ Mesi Rĩungã na n dɩɩ naam tẽngã zugu, Wẽnnaam naam sẽn ka to wã yʋʋr yĩnga.
8 Neb nins sẽn na n naag a Zezi n dɩ naam goosneem-kãng pʋgẽ wã sõor yaa neb 144 000 b sẽn da ninsaalbã sʋk tɩ b na n yɩ rĩm dãmb la maan-kʋʋdba. (Wilgri 5:9, 10; 14:1-4; 20:6) A Daniɛll goma nin-kãens yell n yeel tɩ b yaa “Sẽn-ka-to neba,” sẽn naag Kirist sẽn yaa b Zusoabã n deeg ‘soolma fãa sẽn be dũniyã zuga naam la a pãng [n] sooge. Bãmb naamã ka na n sɛ abada ye. La pãens rãmba fãa na n maana bãmb tʋʋmd la b sak-ba.’ (Daniɛll 7:13, 14, 18, 27) Yãoã yaa bilgr sẽn zems ne saasẽ goosneema ning Kirist sẽn da zãms a karen-biisã tɩ b pʋʋs tɩ wa wã.
Bõe yĩng tɩ d segd n ket n pʋʋsdẽ tɩ Rĩungã wa?
9. Bõe yĩng tɩ zems tɩ d pʋʋsdẽ tɩ Wẽnnaam Rĩungã wa?
9 Kirist zãms-d-la a pʋʋsgã pʋgẽ tɩ d pʋʋs tɩ Wẽnnaam Rĩungã wa. Biiblã bãngr-goam pidsg wilgame tɩ b lugla Mesi Rĩungã saasẽ yʋʋmd 1914. * Woto yĩnga, zemsame tɩ d ket n pʋʋsd n kotẽ tɩ Rĩung-kãng “wa” bɩ? N-ye. Bala a Daniɛll bãngr-gomdã pʋgẽ, Mesi Rĩungã b sẽn mak ne kugrã zabda ne ninsaalbã goosneemã rãmbã b sẽn mak ne bõn-naandg sẽn yaa kãsengã. Kugrã na n wa wãa bõn-naandg kãngã t’a lebg zom-zom. A Daniɛll bãngr-gomdã yeelame tɩ yaa ‘soolem sẽn ka tõe n sãam la buud a taab sẽn ka tõe n deege. A na n wãa soolem kãens fãa tɩ b menem n bas-a t’a yaas wakat fãa.’—Daniɛll 2:44.
10. Bõe yĩng tɩ d rat tɩ Wẽnnaam Rĩungã wa tao-tao?
10 D ratame tɩ Wẽnnaam Rĩungã wa sãam a Sʋɩtãan dũni wẽngã tao-tao, bala yaa rẽ n na n maneg a Zeova yʋʋrã sẽn yaa sõngã la menems neb nins fãa sẽn kɩɩsd Wẽnnaam naamã. D pʋʋsda ne d sũy fãa n yetẽ tɩ “yãmb soolem wa,” la d naagd tʋm-tʋmd a Zã n yetẽ tɩ: “Amina! Bɩ y wa, Zusoab a Zezi.” (Wilgri 22:20) N-yẽe, bɩ a Zezi wa maneg a Zeova yʋʋrã la a wilg t’a Zeova naam sẽn ka to wã zemsame, tɩ rẽ pids yɩɩl-gʋlsdã goama. A yeelame: Tɩ b “bãng tɩ yaa yãmb y ye bal yʋʋr n yaa [a Zeova, NW ]; yãmb yaa Sẽn-ka-to dũniyã tɛk fãa..”—Yɩɩl Sõamyã 83:19.
‘Tɩ yãmb daab maan dũniyã zugu’
11, 12. a) D sã n pʋʋsdẽ tɩ Wẽnnaam daabã ‘maan dũniyã zug wa sẽn maan saasẽ’ wã, bõe la d kota? b) D sẽn pʋʋsd n kotẽ t’a Zeova raabã maana rat n yeelame me tɩ bõe?
11 Sẽn pʋgde, a Zezi zãmsa a karen-biisã tɩ b pʋʋs woto: “Tɩ yãmb daab maan dũniyã zug wa sẽn maand [saasẽ wã.]” (Matɩe 6:10) Ya a Zeova raabã yĩng n kɩt tɩ ãndũniyã beẽ. Saasẽ malɛgs sẽn tar pãngã kaasame n yeele: “Zusoaba tõnd Wẽnnaam, yãmb n zems tɩ reeg pẽgre la waoogre la pãnga, tɩ bõe, yãmb n naan bũmb fãa, la yaa yãmb daaba yĩng la yãmb naan bãmb tɩ b beẽ.” (Wilgri 4:11) A Zeova tara raab ne ‘bũmb nins fãa sẽn be yĩngr la sẽn be dũniyã’ zugã. (Efɛɛz rãmba 1:8-10) D sã n pʋʋsdẽ t’a Zeova raabã maane, d kot-a lame t’a pids a raabã. Sẽn paase, d wilgda ne rẽ tɩ d gũuda ne d sũur fãa tɩ Wẽnnaam daabã paam pidsg saasẽ la tẽng zugu.
12 Ne pʋʋs-kãngã d leb n wilgdame tɩ d sakame n na n maneg d vɩɩmã tɩ zems ne a Zeova raabã. A Zezi yeelame: “Mam dɩɩb yaa tɩ maan sẽn tʋm-a maama ratem, la tɩ maan bãmb tʋʋma n sɛ.” (Zã 4:34) Wala a Zezi, d sẽn yaa kiris-neb sẽn dɩk b mens n kõ Wẽnnaamã, d maanda a raabã ne sũ-noogo. Tõnd sẽn nong a Zeova ne a Biriblã yĩng kɩtame tɩ d vɩɩmã pʋgẽ d ye ‘ka rat n sak ninsaal datem wẽngã ye, la d rat n saka Wẽnnaam yam.’ (1 Pɩɛɛr 4:1, 2; 2 Korẽnt dãmba 5:14, 15) D maoodame n pa rat n maan bũmb d sẽn mi tɩ yaa lebend ne a Zeova raabã ye. (1 Tesalonik rãmba 4:3-5) D sẽn baood sẽk ning sẽn zems Biiblã kareng la a zãmsg yĩngã, d ket n ‘bãngda a Zeova yam sẽn yaa bũmb ningã’ n paasdẽ. Rẽ naaga ne d sẽn moond “Wẽnnaam soolem koe-noog kãngã” ne yẽesmã.—Efɛɛz rãmba 5:15-17; Matɩe 24:14.
A Zeova raab ning sẽn maand saasẽ wã
13. Hal sẽn deng t’a Sʋɩtãan kɩɩsã, wãn-wãn la b ra maand Wẽnnaam daabã?
13 B ra sɩng n maanda a Zeova raabã saasẽ hal sẽn kaoos t’a biribl a ye sẽn yaa malɛk nan pa kɩɩs-a n lebg Sʋɩtãan ye. Yelbũn sebrã pʋgẽ, b bilga Wẽnnaam pipi Biriblã wala yam sẽn gomde. Seb-kãng wilgdame tɩ hal wakat sẽn kaoos tɩ b pa tõe n bãng n bilgi, Wẽnnaam Biribl-yendã ra sɩng n “tara sũ-noog bãmb nengẽ wakat fãa,” n maand a Ba wã raab ne sũ-noogo. A wa n lebga a Zeova “tʋʋm-mita,” n sõng n naan bũmb nins fãa “sẽn be yĩngri la sẽn be tẽnga, sẽn tõe n yã la sẽn ka tõe n yã.” (Yelbũna 8:22-31; Kolos rãmba 1:15-17) A Zeova kɩtame t’a Zezi yɩ a Gomd bɩ a Koe-taasda.—Zã 1:1-3.
14. Bõe la Yɩɩl Sõamyã 103 soabã tõe n zãms-d malɛgsã sẽn maand a Zeova raabã to-to saasẽ wã wɛɛngẽ?
14 Yɩɩl-gʋlsdã wilgame t’a Zeova naamã ka to ye, la tɩ malɛgs tus-kẽema wã kelgda a goamã la a noyã. Biiblã yetame: “Zusoaba yẽbga b naam geer saasẽ, la bũmb fãa yaa bãmb naam n so. Bãmb malɛk rãmbã, pãng kãsems rãmba sẽn sakd bãmb noor la b kelgd bãmb goama, bɩ y kõ Zusoaba waoogre. Yãmb fãa sẽn yaa bãmb saasẽ pãens rãmba la bãmb tʋm-tʋmdba sẽn maand bãmb daabo, bɩ y kõ Zusoaba waoogre. Yãmb fãa sẽn yaa bãmb tʋʋma sẽn be zĩig fãa bãmb [naamã] sẽn so, bɩ y kõ Zusoaba waoogre.”—Yɩɩl Sõamyã 103:19-22.
15. Wãn to la a Zezi naamã reegr kɩt tɩ Wẽnnaam daabã maan saasẽ?
15 A Sʋɩtãan kɩɩsgã zugẽ, a ra ket n tõe n kẽnga saasẽ wala a Zoob sebrã sẽn wilgã. (Zoob 1:6-12; 2:1-7) La Wilgr sebrã da reng n togsame tɩ wakat n da wat tɩ b na n dig a Sʋɩtãan ne a malɛgsã n yiis saasẽ. Vẽenega, wakat kãng yɩɩ yʋʋmd 1914 b sẽn kõ a Zezi Kirist Rĩungã naamã poor bilf bala. Sẽn sɩng ne rẽ, kɩɩsdb kãensã ra pa ye tõe n zĩnd saasẽ ye. B rig-b lame tɩ b sig tẽngã zugu. (Wilgri 12:7-12) Malɛk baa a ye sẽn kɩɩsd a Zeova naam sẽn ka to wã sẽn pa ye be saasẽ wã, b fãa naaga taab n pẽgd “Pebilã” sẽn yaa Kirist Zezi wã, n pẽgd a Zeova la b sakd-a. (Wilgri 4:9-11) A Zeova raabã sɩd maanda saasẽ.
A Zeova raabã ne tẽngã
16. Wãn to la a Zezi pʋʋsgã kɩɩsd bũmb ning kiris-neb ne yʋʋrã siglg sẽn zãmsd nebã ãdem-biisã saagr wɛɛngẽ wã?
16 Kiris-neb ne yʋʋrã siglgã yetame tɩ Wẽnnaam pa tar daab ne tẽngã ye, la tɩ nin-sõmã wã fãa na n kẽnga saasẽ. La a Zezi zãms-d lame tɩ d pʋʋs woto: “Tɩ yãmb soolem wa, tɩ yãmb daab maan dũniyã zug wa sẽn maand [saasẽ wã.]” (Matɩe 6:10) Rẽ yĩnga rũndã-rũndã d tõe n yeelame t’a Zeova raaba fãa maanda dũni kãngã zug sẽn pid ne nen-kɛglem, zãmbo, bãas la kũumã bɩ? Yaa vẽneg tɩ ayo! Rẽ n so tɩ d segd n pʋʋs ne d sũy fãa n kos tɩ Wẽnnaam daabã wa maan tẽngã zug wala sẽn zems ne kãabg ning yell tʋm-tʋmd a Pɩɛɛr sẽn gomã. A gʋlsame: “Wa sẽn zems bãmb kãabgo, tõnd gũuda yĩngr paalga, [Mesi Rĩungã goosneemã Kirist sẽn ya a Rĩmã] la tẽn-paalga [nin-tɩrs zãmaanã], tɩrlem sẽn na n zĩnd b pʋsẽ.”—2 Pɩɛɛr 3:13.
17. A Zeova raab ne tẽngã yaa bõe?
17 A Zeova naana tẽngã ne raabo. A vẽnega no-rɛɛs a Ezai t’a gʋlse: “Yaa Zusoaba n naan saasã. Bãmb yaa Wẽnnaam. Yaa bãmb n naan dũniyã. Bãmb yẽbg-a lame. Bãmb ka naan-a t’a lebg zaalem ye. Bãmb naan-a lame tɩ neb zĩnd a zugu. Bãmb yeelame: ‘Mam yaa Zusoaba, zu-soab a to ka be ye.’ ” (Ezai 45:18) Wẽnnaam ninga pipi raoã ne a pagã zẽed sẽn yaa arzãn pʋgẽ “n yeel-b tɩ b rog kamb n pid dũniyã la b tõog-a.” (Sɩngre 1:27, 28; 2:15) Vẽenega, Naand a Zeova ratame tɩ nin-tɩrs sẽn zems zãng la sẽn na n sak a naam sẽn ka to wã ne sũ-noog zĩnd tẽngã zug la b vɩɩmd wakat fãa arzãn ning Kirist sẽn kãabã pʋgẽ.—Yɩɩl Sõamyã 37:11, 29; Luk 23:43.
18, 19. a) Bõe n na n deng n zĩnd tɩ Wẽnnaam daabã yaool n pids zãng tẽngã zugu? b) A Zezi pʋʋsgã nen-bʋs la d na n vaees sõsg ning sẽn pʋgdã pʋgẽ?
18 A Zeova raabã ne tẽngã pa na n tol n pids zãnga, tẽngã sã n ket n pid ne rap la pagb sẽn kɩɩsd a naam sẽn ka to wã ye. Wẽnnaam na n tʋma Kirist t’a wa ne malɛgs n wa ‘sãam neb nins sẽn sãamd dũniyã.’ A na n menemsa a Sʋɩtãan dũni wẽngã ne a ziri tũudmã, a nanambsã sẽn yaa wẽgdbã, a leebgã sigls sẽn pid ne rat-tɩ-loog ne zãmbã, la a sodaasã sẽn wat ne sãoongã. (Wilgri 11:18; 18:21; 19:1, 2, 11-18) A Zeova na n wilgame t’a naam sẽn ka to wã zemsame la a maneg a yʋʋrã. Yaa bõn-kãensã fãa yĩng la d pʋʋsda, d sã n yetẽ tɩ: “Tõnd Ba sẽn be [saasẽ] tɩ yãmb yʋʋr yɩ ne waoogre, tɩ y soolem wa, tɩ yãmb daab maan dũniyã zug wa sẽn maand [saasẽ wã.]”—Matɩe 6:9, 10.
19 La a Zezi wilga a pʋʋsgã pʋgẽ tɩ d tõe n pʋʋsa d mensã yɛl yĩng me. Sor-wilgr ning a sẽn kõ rẽ wɛɛngẽ a pʋʋsgã pʋgẽ wã la d na n vaees sõsg ning sẽn pʋgdã pʋgẽ.
Lebg-n-gese
• Bõe yĩng tɩ zems tɩ d bool a Zeova tɩ “tõnd Ba”?
• Bõe yĩng tɩ d segd n pʋʋs n kos pipi t’a Zeova yʋʋrã paam waoogre?
• Bõe yĩng tɩ d pʋʋsdẽ tɩ Wẽnnaam Rĩungã wa?
• D sã n pʋʋsdẽ tɩ Wẽnnaam daabã maan dũniyã zug wa sẽn maan saasẽ wã, bõe la rẽ rat n yeele?
[Tẽngr note]
^ sull 9 Ges-y Prêtons attention à la prophétie de Daniel ! sebrã sak a 6, sebr a Zeova Kaset rãmbã sẽn yiisi.
[Zãmsgã sogsgã]
[Foto, seb-neng 19]
A Zezi pʋʋsgã yɩɩ toor wʋsg ne Fariziẽ rãmbã pʋʋsg sẽn wilgd tɩtaam la pʋ-likã
[Foto, seb-neng 20]
Kiris-nebã pʋʋsd n kota Wẽnnaam Rĩungã waoongo, Wẽnnaam yʋʋrã manegr la a raabã maanego