Bõe yĩng t’a Zeova Kaset rãmbã ket n wat n get yãmba?

DŨNIYÃ gill zugu, nebã mii sõma t’a Zeova Kaset rãmbã kẽesda b mens zak-zak moonegã pʋgẽ wakat fãa. Neb kẽer sokda b mens n dat n bãng bũmb ning sẽn kɩt tɩ Kaset rãmbã ket n wat n get-bã, sẽn yɩɩd fãa, sã n mik tɩ b zoe n wilgame tɩ b pa rat n kelg Kaset rãmbã koɛɛga. Lɛta a yiib sẽn yit Rusi sõngd-d lame tɩ d wilg a võorã.

A Masha sẽn yaa bipugl sẽn tar yʋʋm 19 n be Kabarovskã sak n deega woto: “Togs sɩda, pĩndã, m da zãagda m meng ne a Zeova Kaset rãmbã wa m sẽn tõe tɛka.” La a sẽn karem zʋrno rãmb a wãn a Zeova Kaset rãmbã sẽn yiisã kɩtame t’a toeem tagsgo. A Masha gʋlsame: “Bũmb nins fãa mam sẽn karem sɛbã pʋsẽ wã bee yamleoog la kõt vẽenem, la sẽn tar yõod n yɩɩdã, a kɩtdame tɩ f toeem f tagsgã dũniyã yɛl zugu. Bilf-bilfu, m sɩngame n bãng bũmb ning sẽn kɩt tɩ nebã vɩɩm tar bõn-datlã.”

Ussuriysk galʋ-tẽngã sẽn zems kɩlometr 80 ne Vladivostok galʋ-tẽngã nug-rɩtg babgã, a Svetlana gʋlsame: “Mam sɩnga sẽn pa kaoos pʋgẽ n karem Gũusg Gasgã la Réveillez-vous ! wã. Tõnd rata seb-kãensã wʋsg tõnd wakatã. Sõss nins sẽn be be wã fãa kareng yaa noog ne maam. B bee yamleoogo, n kõt zãmsg la vẽnegre. Bark wʋsgo! Bark wʋsg ne y sẽn be dũni kãngã pʋgẽ wã la y sẽn tʋmd tʋʋm sõng kãngã sẽn tar yõod wʋsgã.”

A Zeova Kaset rãmbã sẽn be dũniyã gill zugã pa reemd ne tʋm-tʋmd a Poll sok-kãngã sẽn wat ne tagsgã ye: “La b na n yɩɩ wãn n wʋm tɩ ned ka togs koɛɛga?” (Rom dãmba 10:14) Bõe yĩng tɩ y pa na n dɩk minit a wãn n kelg a Zeova Kaset soab ning sẽn na n wa ges yãmbã nindaarã? Tõe tɩ yãmb me na n nonga belsg koɛɛgã sẽn be Wẽnnaam Gomdã sẽn yaa Biiblã pʋgẽ wã.