B maka ‘tʋm-tʋmd sẽn tũud sɩdã’ n mik t’a zemsame!
B maka ‘tʋm-tʋmd sẽn tũud sɩdã’ n mik t’a zemsame!
“Wakat taame tɩ bʋʋd na n sɩng ne Wẽnnaam nebã.”—1 PƖƐƐR 4:17.
1. A Zezi mika bõe a sẽn lebg n wa n na n ges ‘tʋm-tʋmdã’?
YƲƲMD 33 Pãntekotã raare, a Zezi yãka “tʋm-tʋmd” sẽn segd n moenegd a “zaka” neba, n kõt-b tẽebã rɩɩb wakat sẽn zemse. A Zezi lebga Rĩm yʋʋmd 1914, la pa kaoos la a lebg n wa na n ges a ‘tʋm-tʋmdã’ ye. A sẽn wa wã, a mikame tɩ ‘tʋm-tʋmdã tũuda sɩd la a tar yam.’ Woto kɩtame t’a kõ-a noor t’a “yɩ a zaka fãa yel-gɛta.” (Matɩe 24:45-47) La tʋm-tʋmd wẽng sẽn da pa tũud sɩd la sẽn da ka yam me n zĩndi.
‘Tʋm-tʋmd wẽngã’
2, 3. “Tʋm-tʋmd wẽnga” yii yɛ, la sɩnga wãn-wãn t’a wa beẽ?
2 A Zezi sẽn gom ‘tʋm-tʋmd sẽn tũud sɩd la sẽn tar yamã’ yell poor bala, a goma tʋm-tʋmd wẽngã yelle. A yeelame: “La yẽ sã n yaa tʋm-tʋmd wẽnga sẽn yet a sũur pʋgẽ: ‘Mam Zusoaba kaoosda waoongo,’ la yẽ sã n sɩng n pãb a tʋmd-n-taasã n dɩ la a yũ ne dã-yũudba, tʋm-tʋmd kãng Zusoaba na n waa daar ninga a sẽn ka gũuda la wakat ninga a sẽn ka mi ye. Yẽ na n sɩbga yẽnda n naag yẽnda ne zãmb dãmba. Yãbre la yẽn wãbre na n zĩnda be.” (Matɩe 24:48-51) B sẽn gomd “tʋm-tʋmd wẽng” yellã yĩng kɩtame tɩ d tagsd tʋm-tʋmd sẽn tũud sɩd la sẽn tar yamã yell a Zezi sẽn deng n goma. N-ye, “tʋm-tʋmd wẽnga” sɩd yii tʋm-tʋmd sẽn tũud sɩd la sẽn tar yamã neb sull sʋka. * Wãn-wãna?
3 Sẽn deng yʋʋmd 1914, tʋm-tʋmd sẽn tũud sɩd la sẽn tar yamã sull neb ra saagda ne b sũy fãa n na n seg pʋg-paalã sɩd saasẽ yʋʋm-kãnga, la b saagrã pa paam pidsg ye. Rẽ ne yɛl a taab kɩtame tɩ bãmb wʋsg sũy sãam tɩ kẽer sũy yiki. Bãmb dãmbã neb kẽer wẽneg n ‘pãba’ neb nins sẽn da yaa b saam-biisã ne b no-goam la b tɩ lagem ‘rã-yũudba,’ sẽn dat n yeel tɩ kiris-neb ne yʋʋrã sul neba.—Ezai 28:1-3; 32:6.
4. Bõe la a Zezi maan ‘tʋm-tʋmd wẽngã’ ne neb nins fãa sẽn tall a tagsgã buudã?
4 Yaa nin-kãensã sẽn da yɩ kiris-nebã n wa n lebg ‘tʋm-tʋmd wẽngã,’ la a Zezi “sɩbg-b-la hal sõma.” Wãn-wãna? A zãgs-b lame tɩ b kong saagr ning b sẽn da tar n na n tɩ vɩɩmd saasẽ wã. La b pa sãam-b zĩig pʋgẽ ye. Nananda, b ra segd n yii kiris-neb tigingã pʋgẽ, n tɩ zĩnd “lik sẽn be kɛɛng zĩiga,” n wiisdẽ la b wãbd b yẽna. (Matɩe 8:12) Sẽn sɩng ne wakat kãnga, kiris-neb a taab sẽn da paam vʋʋsem sõngã zaeebã sõor bilf n wa n tall yam-wẽng a woto buud n wilg tɩ b yaa ‘tʋm-tʋmd wẽngã’ sull neba. ‘Piis a taabã’ me sʋka, neb kẽer n dɩk bãmb naoor n yɩ kɩɩsdba. (Zã 10:16) Bãmbã fãa sẽn yaa Kiristã bɛɛbã baasa zĩig a yembre, tẽeb ‘lik sẽn be kɛɛngã’ pʋgẽ.
5. Manesem bʋg la ‘tʋm-tʋmd sẽn tũud sɩd la sẽn tar yamã’ tall tɩ yɩ toor wʋsg ne ‘tʋm-tʋmd wẽngã’?
5 La ‘tʋm-tʋmd sẽn tũud sɩd la sẽn tar yamã’ ne ‘tʋm-tʋmd wẽnga’ fãa paama makr a ye. La wall tɩ ‘tʋm-tʋmd sẽn tũud sɩd la sẽn tar yamã’ sull neb sãam b sũyã, b saka remsgo. (2 Korẽnt dãmba 13:11) Nonglmã b sẽn tar ne a Zeova la b saam-biisã pãng paasame. Rẽ kɩtame tɩ b lebg ‘sɩdã ra-luk la a yẽbgr’ masã sẽn yaa ‘yaoolem wakat’ sẽn gudgã pʋgẽ.—1 Tɩmote 3:15; 2 Tɩmote 3:1.
Pʋg-sadb sẽn tar yam, la a taab sẽn ka yam
6. a) Wãn-wãn la a Zezi bilg a tʋm-tʋmd sẽn tũud sɩdã sull neb sẽn da na n gũus to-to wã? b) Nand tɩ yʋʋmd 1914 ta, koe-bʋg la kiris-neb nins sẽn zae ne vʋʋsem sõngã moon-yã?
6 A Zezi sẽn gom ‘tʋm-tʋmd wẽnga’ yell poore, a rɩka makr a yiib n wilg bũmb ning sẽn kɩt tɩ kiris-neb kẽer sẽn paam vʋʋsem sõngã zaeebã na n ‘tũ sɩd la b tall yam’ tɩ sãnda pa na n maan woto wã. * Sẽn na yɩl n bilg gũusgã, a yeelame: “[Saasẽ] soolem na n yɩɩ wa pʋg-sadb piig sẽn dɩk b fɩtl dãmb n yi n na n tɩ seg pʋg-paal sɩda. A nu wã ka yam ye la a nu wã yaa yam dãmba. Pʋg-sadb nins sẽn ka yama rɩka bãmb fɩtl dãmba, la b ka zɩ kaam ye. La yam dãmba suii tʋgd kaam n zɩ ne bãmb fɩtl dãmba.” (Matɩe 25:1-4) Pʋg-sadb piigã tẽegd-d-la kiris-neb nins sẽn zae ne vʋʋsem sõngã tɩ yʋʋmd 1914 nan pa ta wã. B ra magame tɩ pʋg-paalã sɩd sẽn ya a Zezi Kiristã ra na n puka wakat kãnga. Woto, b ‘yiime’ n na n tɩ seg-a, n moond ne raood n yetẽ tɩ “bu-zẽmsa wakat” b sẽn yãkã na n saa yʋʋmd 1914.—Luk 21:24.
7. Wakat bʋg la wãn-wãn la kiris-neb nins sẽn zaeyã ‘gũs’ tẽebã wɛɛngẽ?
7 B ra pa tudg ye. Bu-zẽmsã wakat b sẽn yãkã sɩd saa yʋʋmd 1914 tɩ Wẽnnaam Rĩungã rĩm sẽn ya a Zezi Kiristã sɩng naam dɩɩbo. La rẽ yaa saasẽ tɩ ninsaal nif pa tõe n yã ye. Tẽngã zugu, “toog” ning yell b sẽn da reng n togsã sɩnga ninsaalbã namsgo. (Wilgri 12:10, 12) Rẽ poore, makr wakat n zĩndi. Kiris-neb nins sẽn paam vʋʋsem sõngã zaeebã sẽn da pa wʋmd yɛlã võor sõma wã yĩng kɩtame tɩ b tags tɩ “pʋg-paal sɩda” kaoosda waoongo. B sẽn da be yam-yuusg pʋgẽ la b maood ne dũniyã neb sẽn da kis-bã yĩng kɩtame tɩ b yẽesmã boog tɩ b ra tolg n bas koɛɛgã mooneg la bala. Wa kɩbarã pʋgẽ pʋg-sadbã, “gõeem yõka bãmb” tẽebã wɛɛngẽ tɩ b gũsi, wala kiris-neb ne yʋʋrã sẽn maan a Zezi tʋm-tʋmdbã kũum poorã.—Matɩe 25:5; Wilgri 11:7, 8; 12:17.
8. Bõe n wa n kɩt tɩ b kelem tɩ “pʋg-paala sɩd watame,” la wakat ra taame tɩ kiris-neb nins sẽn zaeyã segd n maan bõe?
8 Rẽ poore, yʋʋmd 1919 wã, bũmb b sẽn da pa gũud n zĩndi. Biiblã yetame: “Yʋʋn-sʋka kɛleng n yiki: ‘Gese, pʋg-paala sɩd watame. Bɩ y yi n tɩ seg bãmba!’ Dẽ, pʋg-sadb kãens fãa yikame n maneg b fɩtl dãmba.” (Matɩe 25:6, 7) Wakat ning sẽn da wa n wõnd saagr buud fãa ye kaeyã pʋgẽ bala, b bool-b lame tɩ b ye yik n sɩng tʋʋma! Yʋʋmd 1918 wã, “kaoola koɛɛg soab” sẽn ya a Zezi wã waame n na n ges a Zeova tẽeb wẽn-doogã la a yɩlg Wẽnnaam tigingã. (Malaki 3:1) Sasa kãnga, kiris-neb nins sẽn zaeyã ra segd n yi n seg-a-la tẽng zug wẽn-doogã samandẽ. Wakat ra taame masã tɩ b segd n “yik n yãge.”—Ezai 60:1; Filip rãmba 2:14, 15.
9, 10. Yʋʋmd 1919 wã, bõe yĩng tɩ kiris-neb kẽer ‘tall yam’ tɩ sãnda yɩ ‘yalemba’?
9 La pa sa ye! Kɩbarã pʋgẽ, pʋg-sadbã kẽer paama zu-loɛɛga. A Zezi paasame: “Pʋg-sadb nins sẽn ka yama yeela yam dãmba yaa: ‘Yãk-y y kaama n kõ tõnd tɩ tõnd fɩtl dãmba rat n kiime.’ ” (Matɩe 25:8) Fɩtl dãmbã pa tõe n wid tɩ kaam kaẽ ye. Dẽnd fɩtl dãmba kaam tẽegd-d-la Wẽnnaam Gomdã sɩdã ne a vʋʋsem sõngã sẽn kɩtd tɩ neb nins sẽn balemd-a ne kɩs-sɩdã tõe n vẽneg neb a taabã. (Yɩɩl Sõamyã 119:130; Daniɛll 5:14) Sẽn deng yʋʋmd 1919 wã, kiris-neb nins sẽn paam vʋʋsem sõngã zaeebã sẽn tar yamã baoome n na n bãng Wẽnnaam sẽn dat tɩ b maane, baa ne b sẽn da kong pãng wakat bilfã. Woto yĩnga, b sẽn wa n bool-b tɩ b yik n kɩt tɩ b vẽenemã yãgã, mikame tɩ b ra zoe n segla b mens n sa.—2 Tɩmote 4:2; Hebre dãmba 10:24, 25.
10 Baasg zãnga, kiris-neb kẽer me sẽn paam vʋʋsem sõngã zaeeb ra pa segl n na n maan modgr ye, baa ne b sẽn da rat ne b sũy fãa n zĩnd ne pʋg-paalã sɩdã. Rẽ n so tɩ wakat sẽn da wa n ta tɩ b segd n moon koe-noogã, mikame tɩ b ra pa segl ye. (Matɩe 24:14) B makame meng n na n boog b tũud-n-taasã yẽesem n kos-b tɩ b yãk b kaamã n kõ-ba. A Zezi kɩbarã pʋgẽ, pʋg-sadb nins sẽn yaa yam dãmba leokame tɩ bõe? B yeelame: “Ayo, a ka na n sek tõnd ne yãmb me ye. La sẽn yaa neer n yɩɩda, bɩ y kẽng koaasdba nengẽ n tɩ ra.” (Matɩe 25:9) Woto, yʋʋmd 1919 wã, kiris-neb nins sẽn paam vʋʋsem sõng zaeebã me n kɩs sɩd ne Wẽndã tõdgame tɩ b kõn maan bũmb ba a yembr sẽn da tõe n kɩt tɩ b pa tõog n vẽneg nebã ye. Rẽnd b sẽn wa n na n ges-bã, b mikame tɩ b zemsame.
11. Bõe n paam pʋg-sadb nins sẽn ka yamã?
11 A Zezi baasa a kɩbarã n yeele: “La bãmba, [pʋg-sadb nins sẽn ka yamã] sẽn kẽng n na n tɩ ra wakate, pʋg-paala sɩd waame. La neb nins sẽn segl n sɛ wã tũu yẽnda n kẽ kibsã, la kʋɩlenga pagame. Dẽ, pʋg-sadb a taaba yaool n waame n yeele: ‘Zu-soaba, Zu-soaba, pak-y tɩ d kẽ.’ La yẽ leokame: ‘Mam yeta yãmb sɩda tɩ mam ka mi yãmb ye.’ ” (Matɩe 25:10-12) N-ye, pʋg-paalã sɩd waoong mikame tɩ kẽer sɩd ra pa segl b mens n sa ye. Rẽ kɩtame tɩ b sẽn wa n ges-bã b pa kõ-b sor tɩ b kẽng saasẽ yi-kãadem kibsã ye. Ad rẽ sɩd yɩɩ yel-beed tɛkẽ!
Talã rãmba kɩbare
12. a) Mak-bʋg la a Zezi rɩk n wilg kɩs-sɩd tallg yõodo? b) Ãnda la rao ning sẽn ‘tog sorã’?
12 A Zezi sẽn dɩk makr n wilg yamã tallg yõodã poore, a leb n dɩka makr a to sẽn wilgd kɩs-sɩd tallg yõodo. A yeelame: “A na n yɩɩ wa rao a yembre sẽn togd sore n bool a tʋm-tʋmdba n kɩs bãmb a paoongo. Yẽ kõo ned a ye talã a nu, la a to talã a yiibu, la a tãab soaba talã a yembre. Yẽ kõo ned kam fãa sẽn zems-a, la a loogame.” (Matɩe 25:14, 15) Kɩbarã pʋgẽ, rao ning sẽn ‘tog sorã’ ya a Zezi sẽn dʋ saasẽ yʋʋmd 33 wã. La sẽn deng t’a rʋ saasẽ, a rɩka a “paoongã” n kɩs a karen-biis nins sẽn tar kɩs-sɩdã. Wãn to la a maan rẽ?
13. Wãn-wãn la a Zezi segl mooneg zĩig sẽn yaa yaleng la a kõ a “tʋm-tʋmdba” noor tɩ b rɩk a paoongã n tʋm ne?
13 A Zezi tẽng zug koe-moonegã sasa, a saaga Israɛll tẽngã fãa n moon Rĩungã koe-noogã, n segl mooneg zĩig sẽn yalem. (Matɩe 9:35-38) La sẽn deng t’a ‘tog sorã’ a bobla zĩ-kãensã a karen-biis nins sẽn yaa kɩs-sɩd rãmbã n yeele: “Bɩ y kẽng n maan neba buud fãa tɩ b yɩ mam karen-biisi n lis bãmb ne Ba la Biiga la Sɩɩg Sõng yʋʋre. La y zãms bãmb tɩ b sak bũmb nins fãa mam sẽn da togs yãmbã.” (Matɩe 28:18-20) Ne gom-kãensã, a Zezi ra kõta a “tʋm-tʋmdba” noor tɩ b yõd n dɩk a paoongã n tʋmdẽ hal t’a wa, ‘ned kam fãa sẽn zems ne a tõogo.’
14. Bõe yĩng tɩ b ra pa gũud tɩ neba fãa tʋʋm zeng taaba?
14 B sẽn yeel tɩ ‘ned kam fãa sẽn zems ne a tõogã,’ wilgdame tɩ pipi yʋʋm kob-gĩndẽ kiris-nebã fãa tõog ra pa zem taab ye. Kẽer wala a Poll ne a Tɩmote ra tõe n kẽesa b mens zãng-zãng koe-moonegã la zãmsgã tʋʋmd pʋgẽ wa sẽn zems ne b yɛlã sẽn da yaa to-to wã. Tõe tɩ neb a taabã yɛl ra sẽbg-b-la hal wʋsg n kɩt tɩ b ra pa tõe n kẽes b mens tʋʋmdã pʋgẽ zãng-zãng ye. Wala makre, kiris-neb kẽer da yaa yembse, sãnda bãad rãmba, neb sẽn kʋʋl wʋsgo, bɩ zags rãmba. Yaa vẽeneg tɩ tigingã pʋgẽ, pa karen-biisã fãa la b ra tõe n kõ zu-noog tʋʋm kẽer ye. Sẽn zae-bã sʋka, pagbã, la rap kẽer me ra pa karen-saam dãmb tigingã pʋgẽ ye. (1 Korẽnt dãmba 14:34; 1 Tɩmote 3:1; Zak 3:1) La baa ne Kirist karen-biis nins b sẽn zaeyã fãa yɛl sẽn da sõs n yaa to-to, b ra kõo pagbã la rapã fãa noor tɩ ned kam fãa rɩk a paoong n tʋme, sẽn dat n yeel tɩ b kẽes b mens kiris-neb tʋʋmdã pʋgẽ wa sẽn zems ne b yɛlã la b tõogã sẽn yaa to-to. Rũndã-rũndã kiris-nebã me maanda woto.
Gesgã wakat sɩngame!
15, 16. a) Yaa wakat bʋg la ned kam fãa kolg n wilg a sẽn paame? b) Yaa so-bʋs la b pak n kõ sẽn tall-b kɩs-sɩdã?
15 Kɩbarã paasame: “La sẽn kaoos wʋsgo tʋm-tʋmd kãens zu-soaba waame n yeel tɩ ned kam fãa tall a ligd n wa sõd t’a gese.” (Matɩe 25:19) Vẽenega, sẽn sɩng ne yʋʋmd 33 wã tɛk n tall n tɩ ta yʋʋmd 1914, sɩd kaoosa hal wʋsg tɩ Kirist naamã yaool n na n sɩnge. Yʋʋmd 1918, sẽn dat n yeel tɩ yʋʋm a tãab la pʋɩ-sʋk loogr poore, Kirist waa Wẽnnaam tẽeb wẽn-doogẽ wã t’a Pɩɛɛr goamã paam pidsgu. A Pɩɛɛr da yeelame: “Tɩ bõe, wakat taame tɩ bʋʋd na n sɩng ne Wẽnnaam nebã.” (1Pɩɛɛr 4:17; Malaki 3:1) Wakat ra taame tɩ ned kam fãa segd n kolg n wilg a sẽn paame.
16 Tʋm-tʋmdbã sẽn ya a Zezi ba-biis nins sẽn zae ne vʋʋsem sõngã rɩka Rĩmã “talã” rãmb n maan bõe? Sẽn sɩng ne yʋʋmd 33 wã tɛk n tall n tɩ ta yʋʋmd 1914, bãmb sʋkã neb wʋsg sɩd tʋma wʋsg n “leebe,” sẽn na yɩl t’a Zezi paoongã fɩɩge. (Matɩe 25:16) Dũni gill pipi zabrã wakat menga, b wilga ne b sũy fãa tɩ b rat n tʋm n kõo Zusoabã. Masã, ra zemsame tɩ b pak so-paals n kõ sẽn tall-b kɩs-sɩdã tɩ b “leebe.” Dũni-kãngã saabã wakat ra taame tɩ b segd n moon koe-noogã dũniyã gill zugu. B ra segd n tigsa “dũniyã bõn-koaadla.” (Wilgri 14:6, 7, 14-16) B ra segdame me n bao ki wã sull neb sẽn ketã la b tigis ‘kʋʋn-kãsengã’ sẽn yaa piis a taabã nebã.—Wilgri 7:9; Matɩe 13:24-30.
17. Wãn-wãn la kiris-neb nins sẽn zae n tar kɩs-sɩdã ‘paam pʋɩɩr ne b Zusoabã sũ-noogo’?
17 Kẽebg sasa yaa sũ-noog wakate. (Yɩɩl Sõamyã 126:6) Rẽnd a Zezi sẽn wa n kõo a ba-biis nins sẽn zaeyã zɩɩb n paas yʋʋmd 1919 wã zemsame. A yeelame: ‘Fo maana sɩd ne bũmb bilfu, mam na n kõo foo tɩ f soog bũmb wʋsgo. Bɩ f paam pʋɩɩr ne f zu-soaba sũ-noogo.’ (Matɩe 25:21, 23) Sẽn paase, sũ-noog ning Zusoabã sẽn paame, a sẽn deeg naam paalem n lebg Wẽnnaam Rĩungã Rĩmã pa tõe n bãng n bilg ye. (Yɩɩl Sõamyã 45:2, 3, 7, 8) Tʋm-tʋmd sẽn tũud sɩd la sẽn tar yamã paama pʋɩɩr ne sũ-no-kãnga, a sẽn tʋmd Rĩmã yʋʋr yĩng t’a paoongã fɩɩgd tẽnga zugã yĩnga. (2 Korẽnt dãmba 5:20) B sũ-noogã pukda bãngr-gomd ning sẽn be Ezai 61:10 pʋgẽ wã. Be b yeelame: “Mam na n maana sũ-noog ne Zusoabã. Mam na n kɩdma m Wẽnnaama yĩnga. Tɩ bõe, bãmb yeelga maam fãagr wa fuugu.”
18. Bõe yĩng tɩ gesgã wakate, b mik tɩ kẽer pa zemse, la rẽ baasa wãn-wãna?
18 Zu-bʋko, b sẽn wa n na n ges-bã, b mikame tɩ neb kẽer n da pa zemse. Biiblã yetame: “La sẽn deeg-a talã a ye wã kolgame n yeele: ‘Zusoaba, mam miime tɩ yãmb yaa nin-toaaga sẽn tigsd yãmb sẽn ka bʋdẽ la sẽn wʋkd yãmb sẽn ka yelgẽ ye. Rabeem yõka maam tɩ m kẽng n tɩ tu bok n bus yãmb talã wã. Ade, bɩ y reeg y rẽnda.’ ” (Matɩe 25:24, 25) Wala woto, kiris-neb sẽn zaeyã kẽer me pa rɩk b talã rãmbã n ‘leeb’ ye. Sẽn deng yʋʋmd 1914, b pa taas neb a taabã b saagrã ne yẽesem, la yʋʋmd 1919 wã me b pa sak n na n sɩng rẽ maaneg ye. A Zezi maan-b-la bõe b sẽn paoog-a woto wã? A reega zu-noog tʋʋm nins fãa b sẽn da tarã. B rig-b lame tɩ b ‘kẽ lik sẽn be kɛɛnga. Yãbr ne yẽn wãbr sẽn zĩndẽ wã.’—Matɩe 25:28, 30.
Gesgã ket n kẽngda taoore
19. Ne manesem bʋg la gesgã ket n kẽngd taoore, la bõe la kiris-neb nins sẽn zaeyã fãa rɩk sard n na n maane?
19 Yaa sɩda, neb wʋsg sẽn wa n lebg Kirist tʋm-tʋmdb sẽn zae saabã wakat ra nan pa balemd a Zeova yʋʋmd 1918 wã a Zezi sẽn wa n sɩng a nebã gesgã ye. Rẽ yĩnga, bãmb dãmba põsa gesgã bɩ? Ayo. Gesgã meng-mengã sɩnga yʋʋmd 1918 n tall n tɩ ta 1919 wã, wakat ning b sẽn mak tʋm-tʋmd sẽn tũud sɩd la sẽn tar yamã sull fãa neb n mik tɩ b zemsame wã. La b kell n maka kiris-neb nins sẽn zaeyã fãa yembr-yembr hal n wa tãag b bãndã ningr zãng-zãnga. (Wilgri 7:1-3) Kirist ba-biisã sẽn paam zaeebã sẽn bãng rẽ wã, b rɩka sard n na n kell n tall kɩs-sɩd b ‘leebgã’ pʋgẽ. B rɩka sard n na n tall yam la b tall kaam wʋsg sẽn na n kɩt tɩ b vẽenemã yãg hal sõmbo. B miime tɩ bãmb ned kam fãa sã n tall kɩs-sɩd n tãag a yõor tɛka, a Zezi na n deeg-a-la saasẽ.—Matɩe 24:13; Zã 14:2-4; 1 Korẽnt dãmba 15:50, 51.
20. a) Rũndã-rũndã, bõe la piis a taabã rɩk sard n na n maane? b) Kiris-neb nins sẽn zaeyã mii bõe tiiri?
20 Kʋʋn-kãsengã sẽn yaa piis a taabã nebã rɩka b saam-biis nins sẽn zaeyã togs-n-taare. B miime tɩ b sẽn bãng Wẽnnaam daabã yĩnga, zɩɩb sẽn yaa kãseng n zao b zutu. (Ezekɩɛll 3:17-21) Rẽ n so tɩ ne a Zeova Gomdã la a vʋʋsem sõngã sõngre, bãmb me ket n tar b kaamã wʋsg ne b sẽn paamd zãmsg ning kiris-neb tigissẽ wã maasem. B kɩtdame tɩ b vẽenemã yãgd koe-moonegã la karen-biisã maaneg pʋgẽ. Dẽnd ne manesem kãngã b naaga b saam-biis nins sẽn zaeyã n ‘leebdẽ.’ Baasg zãnga, sẽn zae-bã mii vẽeneg tɩ yaa bãmb la b bobl talã rãmbã. B segd n wa kolg n togsa b sẽn ges Zusoabã paoong to-to wã wɛɛngẽ. Baa b sõorã sã n paoodẽ, b pa tõe n tõdg b zɩɩb ninga sẽn yaa kʋʋn-kãsengã yell gesgã ye. Tʋm-tʋmd sẽn tũud sɩd la sẽn tar yamã sẽn mi rẽ wã, a ket n lʋɩta Rĩmã leebg tʋʋmd taoore, n tar mi-beoog wʋsgo, kʋʋn-kãsengã sẽn teend-a sõma wã yĩnga. Kʋʋn-kãsengã neb sak n deega zu-sobend ning b saam-biis nins sẽn zaeyã sẽn tarã, la b tar mi-beoog b sẽn tʋmd b sor wilgr pʋgẽ wã.
21. Sagl-bʋg n ket n pak kiris-nebã fãa hal sẽn deng yʋʋmd 1919 tɛka?
21 Rẽnd baa ne kɩba-kãensã a yiibã sã n sõngame tɩ d wʋm yɛl nins sẽn zĩnd wakat sẽn deng yʋʋmd 1919 wã bɩ sasa kãng sẽnesã võore, b paka kiris-neb hakɩkã fãa sẽn be saabã wakatã. Woto yĩnga, saglg ning a Zezi sẽn kõ pʋg-sadb piigã kɩbar baasgẽ wã sã n paka kiris-neb nins sẽn zaeyã wakat sẽn deng yʋʋmd 1919 wã, a ket n paka kiris-ned fãa. Bɩ d fãa tũ a Zezi sẽn yeel bũmb ningã ne d sũy fãa. A yeelame: “Woto yĩnga, bɩ y ket n gũudẽ, tɩ bõe, yãmb ka mi daarã la wakatã me ye.”—Matɩe 25:13.
[Tẽngr not rãmbã]
^ sull 2 Ne manesem sẽn wõnd woto, tʋm-tʋmdbã kũum poore, “we-baas” n yi kiris-neb nins sẽn yaa kãsem dãmb sẽn paam vʋʋsem sõngã zaeebã sʋka.—Tʋʋma 20:29, 30.
^ sull 6 Y sã n dat sõsg a to a Zezi sẽn togs kɩbar ningã zug bɩ y ges Sécurité universelle sous le Règne du “Prince de paix” sebrã a Zeova Kaset rãmbã sẽn yiisã, a sak a 5 ne a 6 pʋgẽ.
Y tõe n wilga a võor bɩ?
• Wakat bʋg la a Zezi wa n ges a karen-biisã, la bõe la a yã-yã?
• Bõe yĩng tɩ kiris-neb nins sẽn zaeyã kẽer tall “tʋm-tʋmd wẽnga” manesem buudu?
• Wãn-wãn la tõnd tõe n wilg tɩ d gũusda tẽebã wɛɛngẽ?
• D sẽn dɩkd a Zezi ba-biis nins sẽn zaeyã togs-n-taarã yĩnga, ne manesem bʋg la d tõe n ket n ‘leebdẽ’?
[Zãmsgã sogsgã]
[Zĩ-gũbri, seb-neng 29]
WAKAT BƲG LA A ZEZI WATA?
Matɩe sak 24 la 25 pʋgẽ wã b yeelame t’a Zezi ‘wata’ ne manesem buud toor-toore. Pa na n yɩ tɩlae ne-a t’a sɩd yi zĩig ning a sẽn be wã n ‘wa’ ye. A ‘waoongã’ ya a sẽn na n ges ninsaalbã bɩ a karen-biisã yelle, tɩ naoor wʋsgo yaa sẽn na n kao bʋʋdo. Dẽnd yʋʋmd 1914, a ‘waoongã’ yɩɩ a sẽn lebg Rĩm tɩ ninsaal nif pa ne-a wã. (Matɩe 16:28; 17:1; Tʋʋma 1:11) Yʋʋmd 1918 wã, a yɩɩ kaoolã koɛɛg soab n ‘wa’ sɩng neb nins sẽn da yet tɩ b balemda a Zeova wã bʋʋd kaoobo. (Malaki 3:1-3; 1 Pɩɛɛr 4:17) Armagedõ, a na n ‘wa’ kaoa a Zeova bɛɛbã bʋʋdo.—Wilgri 19:11-16.
Waoong ning yell b sẽn gomd naoor wʋsg Matɩe 24:29-44 la 25:31-46 pʋgẽ wã tɩ loee ne “to-kãsengã.” (Wilgri 7:14) La waoong ning yell b sẽn gomd Matɩe 24:45 n tɩ ta 25:30 pʋgẽ wã tɩ loee ne neb nins sẽn yeel tɩ b ya a karen-biis tɩ b sɩng b bʋʋdã kaoob yʋʋmd 1918 tɛkã. Wala makre, pa zems tɩ d yeel tɩ yaa to-kãsengã wakat a Zezi sẽn na n ‘wa’ wã, la tʋm-tʋmd sẽn tũud sɩdã na n deeg a keoorã, la tɩ yaa sasa kãng me la b na n kao pʋg-sadb nins sẽn ka yamã bʋʋdo, la tʋm-tʋmd ning sẽn yaa kʋɩɩm sẽn solg a Zusoaba talã wã bʋʋd ye. Sã n da yaa wakat kãng la yel-kãensã na n pidsi, rẽ wilgdame tɩ to-kãsengã na n wa mika sẽn zae-bã wʋsg sẽn pa tar kɩs-sɩd tɩ b segd n toeem-ba. La Wilgri 7:3 wã wilgdame tɩ to-kãsenga wakat na n mikame tɩ kiris-neb nins fãa sẽn zaeyã paama ‘bãnd’ zãng-zãnga.
[Picture on page 27]
“Tʋm-tʋmd wẽngã” pa paam bark yʋʋmd 1919 wã ye
[Foto, seb-neng 28]
Pʋg-sadb nins sẽn tar yamã ra segl n saame n na n seg pʋg-paalã sɩda
[Foto, seb-neng 30]
Tʋm-tʋmd sẽn tũud sɩdã yõd n ‘leebame’
Tʋm-tʋmd ning sẽn yaa kʋɩɩmã pa leeb ye
[Foto, rãmba, seb-neng 31]
Sẽn zae-bã ne ‘kʋʋn-kãsengã’ neb ket n yãgda b vẽenemã