Belsg n kõ sẽn namsd-bã

PĨND wẽndẽ dap la pagb sẽn yɩ wẽn-zoɛtb sẽn da wa n namsdẽ, b pʋʋsa Wẽnnaam ne b sũyã fãa n kos a sor-wilgri. La b leb n baoome n na n yols b mens b toogã pʋgẽ, n bao yam sẽn na yɩl n põs b namsdbã. Wala makre, a Davɩɩd sẽn teeg a Zeova la a maan modgrã sõng-a lame t’a yals kãn-kãe a toogã pʋgẽ. Yaa wãn to ne tõnd rũndã-rũndã?

Y sã n wa namsdẽ, y na n bao n welga yellã. Wala makre, y sã n pa tar tʋʋma, y pa maood n na n yã tʋʋmd sẽn zems sẽn na yɩl n tõog n ges y meng ne y zakã rãmb yell sɩda? (1 Tɩmote 5:8) Bɩ yãmb sã n namsd bãag yĩnga, y pa baood tɩpg sẽn zems sɩda? Bãng-y t’a Zezi sẽn da tar tõog sẽn yit Wẽnnaam nengẽ n na n sãoog bãas buud fãa wã sak n deegame tɩ ‘bãad dãmba baooda tɩpa.’ (Matɩe 9:12) La tõe tɩ pa wakat fãa la b na n yiis y toogã ye. Tõe tɩ y na n ket n namsda bilfu.

Bõe yĩng tɩ y pa na n pʋʋs Wẽnnaam a Zeova yel-kãng poorẽ? Wala makre, d sã n baood tʋʋmde, Wẽnnaam teegr la a pʋʋsg na n sõnga tõnd tɩ d ra sak tʋʋmd sẽn kɩɩsd Biiblã noy ye. D pa na n bas me tɩ rat tɩ loog bɩ ligd nonglem kɩt tɩ d ‘bas tẽeb’ ye. (1 Tɩmote 6:10) Sɩda, d sã n wa rɩkd sard sẽn yaa kãsems sẽn tɩ loe ne tʋʋma, zak bɩ yĩnsã laafɩ wɛɛngẽ, d tõe n tũu a Davɩɩd sagl-kãngã: “Bas f yell ne Zusoabã la bãmb na kogl foom. Bãmb ka na n bas nin-tɩrg t’a leng wakat sẽn ka sɛt ye.”—Yɩɩl Sõamyã 55:23.

D sã n pʋʋs ne d sũur fãa, na n sõng-d lame me tɩ d kell n tall tagsg sẽn zems tɩ d toogã ra wa lim-d ye. Tʋm-tʋmd a Poll sẽn yaa kiris-ned hakɩkã gʋlsame: “Ne pʋʋsgo la ne bark pʋʋsgo bɩ y wilg Wẽnnaam yãmb sẽn dat bũmb ninsi.” Wãn to la pʋʋsg d sẽn maan ne d sũur fãa tõe n bels-do? “Wẽnnaam laafɩ sẽn yɩɩd neba bãngr fãa na gũ yãmb sũyã la yãmb tagsgo Kirist Zezi maasem yĩnga.” (Filip rãmba 4:6, 7) Wẽnnaam laafɩ wã ‘yɩɩda neba bãngr fãa.’  Woto yĩnga, a tõe n kɩtame tɩ d yals kãn-kãe, sũ-sãamsã sã n wa zɩsgd tõndo. A na n ‘gũu tõnd sũyã la d tagsgã,’ tɩ rẽ na n sõng tõnd tɩ d lak d mens ne yãg-yãg la yalemd sẽn tõe n paas tõnd toogã.

Pʋʋsgã tõeeme meng n toeem tõnd yɛlã. B sẽn da wa n kẽes tʋm-tʋmd a Poll bãens roogẽ Rom tẽngã, a kosa kiris-neb a taab ne sik-m-meng tɩ b pʋʋs a yĩnga. Bõe yĩng t’a Poll kos-b woto? Ad a sẽn gʋlse: “Mam kota yãmb ne m sũur fãa tɩ y pʋʋse tɩ mam le wa yãmb nengẽ tao-tao.” (Hebre dãmba 13:19) Sẽn dat n yeel t’a Poll da miime t’a Zeova sẽn da wʋmd pʋʋsg nins a tẽed-n-taasã sẽn da pʋʋsd ne pẽdgrã tõe n toeema yɛlã sẽn tɩ loe ne a yiisgã bãens roogẽ wã wakate.—Filemo 22.

Pʋʋsgã na n toeema tõnd toogã bɩ? Tõe t’a toeem-a. La d segd n bãngame tɩ Wẽnnaam a Zeova tõe n deega tõnd pʋʋsgã tɩ pa yɩ wa tõnd sẽn da gũudã ye. A Poll pʋʋsa naoor a tãab ‘a yĩng gõaagã’ sẽn da tõe n yaa bãaga wɛɛngẽ. Wẽnnaam pa yiis a toogã ye, la a yeela a Polle: “Mam barka sekda foom; tɩ bõe, yaa pãn-komsem pʋgẽ la ned bãngd mam pãnga.”—2 Korẽnt dãmba 12:7-9.

Rẽnd tõe tɩ d toogã pa sa zĩig pʋgẽ ye. La d na n paama sor n wilg tɩ d teega d saasẽ Ba wã. (Zak 1:2-4) Kɩs-y sɩd tɩ baa Wẽnnaam a Zeova sã n pa yiis toogã, a tõe n ‘maana sore tɩ tõnd tõe n yi la tɩ tõnd tõe n paam pãng makra pʋgẽ n da lʋɩ ye.’ (1 Korẽnt dãmba 10:13) Rẽnd zemsame la b sẽn boond a Zeova tɩ ‘belsg fãa Wẽnnaam sẽn belsd tõnd d toog pʋgẽ’ wã. (2 Korẽnt dãmba 1:3, 4) Wẽnnaam tõe n kõo tõnd bũmb nins sẽn yaa tɩlae ne-dã sẽn na yɩl tɩ d yals kãn-kãe toogã pʋgẽ, la d tara vɩɩm sẽn pa satã saagre.

Wẽnnaam Gomdã, sẽn yaa Biiblã kãabame t’a Zeova “na n yẽesa nintãmã fãa t’a ra le zĩnd bãmb ninẽ ye, la kũum ka na n le zĩnd ye, la sũ-sãoong bɩ yãbre walla toog kõn le zĩnd yɛs ye.” (Wilgri 21:3, 4) Dũni sẽn pa tar toog wõnda bũmb yãmb sẽn pa tõe n tẽ bɩ? Tõe tɩ rẽ tẽeb yaa toog ne-yã, y sã n minim n vɩ toog pʋgẽ. Baasg zãnga, paam-m-meng ne rabeema la yel-beedã yaa bũmb Wẽnnaam sẽn kãabe, la a raabã na n pidsa zãnga.—Ezai 55:10, 11.

[Foto rãmba, seb-neng a 9]

A sẽn da ka saagrã, a paama yolsg masã