Kiris-nedemd hakɩkã pãng tara paasgo

A ZEZI KIRIST koe-moonegã talla pãn-tusd-kãseng yʋʋm pipi kob-gĩndẽ zãmaanã neb zutu. A koɛɛgã ra kengda raoodo, n kõt vẽenem la a ra be yamleoog wʋsg hal tɩ yɩ bũmb sẽn ling nebã wʋsgo. Neb wʋsg sẽn kelg a Zezi goamã, kẽ-b-la sõma.—Matɩe 7:28, 29.

A Zezi zãgsa ne raood t’a kõn kẽes a meng tũudma taoor dãmb la politik siglsã yɛlẽ yẽ zãmaanẽ wã ye, la a kɩtame tɩ nin-buiidã ra tõe n pẽneg-a nana-nana. (Matɩe 11:25-30) A sak n deega vẽeneg tɩ malɛg-wẽnsã tara pãn-tusdg nebã zut dũniyã gill zugu, la a wilgame tɩ Wẽnnaam pãngã yɩɩda bãmb rẽndã. (Matɩe 4:2-11, 24; Zã 14:30) A Zezi vẽnega nebã sõma tɩ b bãng tɩ yaa yel-wẽna n wat ne namsgã, la ne nonglem, a wilgame tɩ yaa Wẽnnaam Rĩungã n na n wa ne yolsg zãng-zãnga. (Mark 2:1-12; Luk 11:2, 17-23) Vugr wakat fãa yĩnga, a vẽnega nebã a Ba wã zʋg-sõma b sẽn da solg hal sẽn kaoosã, n kɩt tɩ Wẽnnaam yʋʋrã yɩ vẽeneg ne neb nins fãa sẽn dat n paam zood ne-a wã.—Zã 17:6, 26.

Rẽnd pa lingr la a Zezi karen-biisã sẽn yelg a koɛɛgã sẽn tar pãngã tao-tao, baa ne tũudmã la tẽngã taoor dãmb kɩɩsg sẽn da yaa wʋsgã ye. Yʋʋm 30 pʋgẽ bala, kiris-neb tigims sẽn tar yẽesem la b lugl Afiriki, Aazi la Erop. (Kolos rãmba 1:23) Sɩd nins võor wʋmb sẽn yaa nana a Zezi sẽn zãms nebã vẽnega sik-m-mens rãmbã la nin-tɩrs nins sẽn da be Rom soolmã pʋgẽ wã.—Efɛɛz rãmba 1:17, 18.

La wãn to la karen-bi-paals kãensã fãa tarem, b buud la b buud-goam sẽn yaa toor-toorã, la b yit tũudum sẽn da yaa toɛy-toɛy pʋsẽ wã tõog n sɩd lagem taab “tẽeb a yembr” pʋgẽ, wala tʋm-tʋmd a Poll sẽn bool-a wã? (Efɛɛz rãmba 4:5) Bõe n da na n kɩt tɩ b “koees fãa zems taaba” n da welg taaba? (1 Korẽnt dãmba 1:10) Welg taab sẽn yaa kãseng sẽn be kiris-neb ne yʋʋrã ne taab sʋk rũndã-rũndã wã yĩnga, d segd n vaeesa a Zezi mengã sẽn zãms nebã bũmb ningã.

Kiris-nebã zems-n-taar yẽbgre

A Zezi sẽn da be bʋʋdẽ a Põns Pɩlat taoorã, a wilga kiris-neb zems-n-taarã yẽbgre. A yeelame: “Yaa bõn-kãng yĩng la mam dog-yã, la yaa bõn-kãng yĩng la mam wa dũniyã n na n kɩs sɩd kaseto. Ned ninga fãa sẽn yaa sɩd dẽnda a kelgda mam koɛɛgã.” (Zã 18:37) Woto yĩnga, a Zezi zãmsgã, n paas Wẽnnaam Gomdã vʋʋsem sõng sẽn vẽneg tɩ b gʋlsã sẽn yaa Biiblã sakr tara pãn-tusdg sẽn tõe n kɩt  tɩ Kirist karen-biis hakɩkã tall zems-n-taare.—1 Korẽnt dãmba 4:6; 2 Tɩmote 3:16, 17.

Yaa sɩda, a Zezi karen-biisã ra na n talla sogsg ne pʋ-peelem la mo-yõs bãmb ne taab sʋk wakat-wakate. Bõe n da na n sõng-ba? A Zezi wilgame: “Sõangda sẽn yaa sɩd sɩɩga sã n wa, bãmb na yãag yãmb sɩda fãa pʋga; tɩ bõe, bãmb ka na n gom b meng yell ye. B na n togsa bũmb ninga fãa b sẽn na n wʋma. La bãmb na n wilga yãmb bũmb nins sẽn watã.” (Zã 16:12, 13) Woto, Wẽnnaam sɩɩg bɩ vʋʋsem sõngã ra na n sõnga a Zezi karen-biis hakɩkã tɩ b wʋm sɩdã võor Wẽnnaam sẽn da vẽnegd bilf-bilfã. Sẽn paase, vʋʋsem kãng ra na n woma biis wala nonglem, sũ-noogo, laafɩ, tɩ rẽ me ra na n wa ne zems-n-taar b sʋkã.—Tʋʋma 15:28; Galat dãmba 5:22, 23.

A Zezi pa bas tɩ zab la welgr zĩnd a karen-biisã sʋk ye. A leb n pa kõ sor me tɩ b wilg sɩd nins sẽn yit Biiblã pʋgẽ wã tɩ zems ne b mens tagsgo, bɩ tɩ b zems ne neb nins b sẽn da na n segã buudã minungu bɩ b tũudmã rog-n-mik ye. Sẽn yaa lebende, yaoolem yʋng ning a sẽn zĩnd ne-bã sasa, a pʋʋsa woto ne a sũur fãa: “Mam ka pʋʋsd bãmb yĩng bal ye. La yaa neb nins sẽn na n tẽ maam bãmb kaseta yĩngã me yĩnga. Yaa sẽn na yɩlg tɩ bãmb fãa yɩ yembre wa yãmba, m Ba sẽn be mam pʋgẽ, la mam sẽn be yãmb pʋgẽ, tɩ bãmb me na yɩ yembr tõnd pʋsẽ, tɩ dũniyã bãng tɩ yãmb n tʋm maam.” (Zã 17:20, 21) Rẽ, zems-n-taar hakɩk sẽn zems ne vʋʋsem sõngã sor-wilgrã la sɩdã n da segd n yɩ Kirist karen-biis hakɩkã welgr bãnd hal sẽn sɩng pĩnd n tõk tõnd wakatã. (Zã 4:23, 24) Baasg zãnga, rũndã-rũndã egiliiz rãmbã pa tar zems-n-taar ye, b welgame. Bõe yĩng tɩ yaa woto?

Egiliiz rãmbã sẽn welgã võore

Rũndã-rũndã, kiris-neb ne yʋʋr tẽebã la b minungã sẽn yaa toor-toor woto wã yaa b sẽn pa tũ a Zezi zãmsgã yĩnga. Gʋlsd a yembr wilgame: “Wala pĩndã, rũndã-rũndã kiris-nin-paalsã rɩkda bũmb ning sẽn be Biiblã pʋgẽ fãa sẽn zems ne bãmb raabã, n pa sakd verse nins sẽn kɩɩsd bãmb rog-n-mik tũudmã ye.” Yaa woto bal kɛpɩ la a Zezi ne a tʋm-tʋmdbã reng n togse.

Wala makre, tʋm-tʋmd a Poll paama vʋʋsem sõngã vẽnegr n gʋls a yel-gɛt taag a Tɩmote tɩ: “Tɩ bõe, wakat n na n wa tɩ neba ka rat n sak sɩd koɛɛga ye. La bãmb mens ratem yĩnga, bãmb na n baoo karen-saam dãmb wʋsg sẽn na n togs koɛɛg sẽn noom bãmb bala. Bãmb kõn le kelg sẽn yaa sɩd ye, bãmb na n kelga soalem bala.” Ra yaa kiris-nebã fãa la b ra na n tudg bɩ? Ayo. A Poll paasame: “Bɩ f gũus f meng ne bũmb fãa, la f sak namsgo; maan koe-moaand tʋʋmde, la f maan f tʋʋmd neere.” (2 Tɩmote 4:3-5; Luk 21:8; Tʋʋma 20:29, 30; 2 Pɩɛɛr 2:1-3) A Tɩmote ne kiris-neb a taab sẽn yaa sakdb tũu sagl-kãngã vʋʋsem sõng sẽn vẽneg tɩ b gʋlsã.

Kiris-neb hakɩkã ket n tara zems-n-taare

Wala a Tɩmote, rũndã-rũndã, kiris-neb hakɩkã gũusda b mens n zãgsd ninsaalb tagsgo, la b sakd Gʋlsg Sõamyã sẽn zãmsd bũmb ning tɩ b segd n tẽ wã bala. (Kolos rãmba 2:8; 1 Zã 4:1) A Zeova Kaset rãmbã rɩkda pipi kiris-nebã togs-n-taar n moond koe-noogã sẽn yɩɩd tẽns 230 pʋsẽ, n taasd koɛɛg ning a Zezi sẽn taas pipi wã, sẽn yaa Rĩungã koe-noog nebã sẽn be zĩig ning fãa. Ges-y manesem kãsems a naas b sẽn dɩkd a Zezi togs-n-taare, la b tũud kiris-nedemd hakɩkã, baa b sẽn be zĩig ning fãa.

B tẽebã tika Wẽnnaam Gomdã zugu. (Zã 17:17) Prɛtr sẽn be Bɛlzik gʋlsa woto b zutu: “Bũmb a yembr d sẽn tõe n zãms b [a Zeova Kaset rãmbã] nengẽ yaa b sẽn dat n kelg Wẽnnaam Gomdã, la b sẽn tar daood n na n kõ kaset a zugã.”

Yaa Wẽnnaam Rĩungã la b teeg n na n paam yolsg ne zu-loeesã fãa. (Luk 8:1) Kolõmbi galʋ-tẽng a yembr b sẽn boond tɩ Barãnkila, a Zeova Kaset soab a yembr n gom  ne a Ãntonio sẽn da teend politik siglg hal wʋsgã. Kaset soabã pa wilg t’a bee yẽ politik siglgã bɩ a to me poorẽ ye. La a kãabame t’a na n zãmsa Biiblã ne a Ãntonio la a tãpã tɩ pa tũ ne ligd yaoob ye. Pa kaoos la a Ãntonio bãng tɩ Wẽnnaam Rĩungã n sɩd yaa saag-yɛng bal n kõ naong rãmbã Kolõmbi la dũniyã tẽns nins sẽn ketã pʋgẽ wã ye.

B waoogda Wẽnnaam yʋʋrã. (Matɩe 6:9) Pipi, a Zeova Kaset rãmbã sẽn seg a Maria sẽn da yaa Katolik sẽn be Ostrali n kɩs sɩd ne a tũudmã, a basame tɩ Kaset rãmbã wilg-a Wẽnnaam yʋʋrã Biiblã pʋgẽ. A manesem yɩɩ wãn to? “Mam sẽn wʋm Wẽnnaam yʋʋrã pipi Biiblã pʋgẽ wã, m yãbame. M sũurã yɩɩ noog tɩ loog noore, m sẽn sɩd da tõe n bãng Wẽnnaam yʋʋrã la m pʋd-a wã yĩnga.” A Maria kell n kẽnga taoor ne Biiblã zãmsgo, la yaa pipi a vɩɩmã pʋgẽ, la a bãng a Zeova sẽn ya a soaba, la a tõog n talla zood sẽn kaoosd ne-a.

Nonglmã kɩtame tɩ b tar zems-n-taare. (Zã 13:34, 35) Kɩbay sebr a yembr (The Ladysmith-Chemainus Chronicle) sẽn yit Kanada tẽngã wilgame: “Baa f tũudum sẽn ya a soaba, baa f pa tar tũudum, f pa tõe n pa pẽg a Zeova Kaset rãmb 4 500 sẽn tʋm wĩndg la yʋng semen la pʋɩ-sʋk ning sẽn loogã, n me Tigis-kãseng roog Kasidi t’a yalma ta metrkaare 2 300 wã ye . . . Woto maaneg ne yam-sõng tɩ pa tũ ne no-koɛɛma, welgr la pẽg-m-mengã yaa kiris-nedemd hakɩkã bãnde.”

Woto yĩnga, ges-y kasetã. Kiris-neb ne yʋʋr siglsã bãngdba, b misioneer dãmbã la b tũudmã nebã sẽn maood ne no-koɛɛm nins sẽn be b egiliiz rãmbẽ wã sasa, kiris-neb hakɩkã pãng tara paasg dũniyã gill zugu. Sɩda, kiris-neb hakɩkã kẽngda taoor ne b moonegã la b ket n zãmsd neb a taabã Wẽnnaam Gomdã. (Matɩe 24:14; 28:19, 20) Yãmb sã n be neb nins sẽn “wõosd n yãbd” bõn-wẽns nins sẽn maand masã, tɩ b sũy sãam ne welgr ning sẽn be kiris-neb ne yʋʋr tũudum dãmbã sʋkã, d boonda yãmb tɩ y wa lagem a Zeova Kaset rãmbã sẽn yaa kiris-neb sẽn tar zems-n-taarã sɩd Wẽnnaam yɛng a Zeova balengã pʋgẽ.—Ezekɩɛll 9:4; Ezai 2:2-4.