“Maan f tʋʋmd neere”
“Maan f tʋʋmd neere”
“Maan f tʋʋmd neere.”—2 TƖMOTE 4:5.
1, 2. Baa ne kiris-nebã fãa sẽn yaa koe-moondbã, bõe la Biiblã baood tɩ kãsem dãmbã maane?
YÃMB yaa Rĩungã koe-moond bɩ? Sã n yaa woto bɩ y pʋʋs Wẽnnaam a Zeova bark zu-no-kãseng kãngã yĩnga. Y yaa kãsem soab tigingã pʋgẽ bɩ? Rẽ me leb n yaa zu-noog a to sẽn yit a Zeova nengẽ. La d pa segd n yĩm tɩ pa bãngr ning d sẽn paam dũniyã lekoll dãmbẽ wã bɩ d sẽn tar gom-minim tõog yĩng n kɩtd tɩ d yaa koe-moond bɩ yel-gɛt tigingã pʋgẽ ye. Ya a Zeova n kɩtd tɩ d paam zʋg-sõma nins koe-moond sẽn segd ne wã, la yaa rap kẽer tõnd sʋkã sẽn tar zʋg-sõma nins sẽn zems ne Biiblã noyã yĩng n kɩt tɩ b tar zu-noog n yaa yel-gɛtbã.—2 Korẽnt dãmba 3:5, 6; 1 Tɩmote 3:1-7.
2 Kiris-neb nins fãa sẽn dɩk b mens n kõ Wẽnnaamã yaa koe-moondba, la kãsem dãmbã segd n kõo mak-sõng koe-moonegã wɛɛngẽ n yɩɩda. Kãsem dãmbã sẽn “moond koɛɛgã la sẽn zãmsd nebã” paamda waoogr Kirist ne Wẽnnaam la Kaset rãmb a taabã taoore. (1 Tɩmote 5:17; Efɛɛz rãmba 5:23; Hebre dãmba 6:10-12) Kãsem soab zãmsg segda wakat fãa n keng a kɛlgdbã tẽebo, bala tʋm-tʋmd a Poll sagla yel-gɛt a Tɩmote woto: “Tɩ bõe, wakat n na n wa tɩ neba ka rat n sak sɩd koɛɛga ye. La bãmb mens ratem yĩnga, bãmb na n baoo karen-saam dãmb wʋsg sẽn na n togs koɛɛg sẽn noom bãmb bala. Bãmb kõn le kelg sẽn yaa sɩd ye, bãmb na n kelga soalem bala. Bɩ f gũus f meng ne bũmb fãa, la f sak namsgo; maan koe-moaand tʋʋmde, la f maan f tʋʋmd neere.”—2 Tɩmote 4:3-5.
3. Bõe la b segd n maan sẽn na yɩl tɩ ziri zãmsg ra wa sãam tigingã neb tẽebo?
3 Sẽn na yɩl tɩ ziri zãmsg ra wa sãam tigingã neb tẽebo, kãsem soab segd n tũu a Poll sagl-kãngã: “Bɩ f gũus f meng ne bũmb fãa, . . . maan f tʋʋmd neere.” (2 Tɩmote 4:5) N-ye, kãsem soab segd n ‘maana a tʋʋmd neere.’ A segd n tʋma a tʋʋmdã zãnga, la a tʋm-a neer me. Kãsem soab sẽn maand a tʋʋmd neer pidsda a taoor sobend sõma n pa maand bũmb ba a ye ne yam-kaalgo, bɩ n pa maand a tʋʋmdã n kell ye. Ned a woto maanda sɩd baa yaa ne bũmb bilfu.—Luk 12:48; 16:10.
4. Bõe n tõe n sõng tõnd tɩ d maan d tʋʋmdã neere?
4 Pa wakat fãa la d tʋʋmdã maaneg neerã baood tɩ d paam sẽk n paas ye, la a baoodame tɩ d tʋm ne sẽkã sõma. Sẽk b sẽn sigind wakat fãa tɩ zems tõe n sõnga kiris-nebã fãa tɩ b maan yɛl wʋsg Wẽnnaam tʋʋmdã pʋgẽ. Kãsem soab sã n dat n dɩk sẽk n moon koe-noogã n paase, a segd n sigla a meng tʋʋmã na-kẽndr sõma n bãng tʋʋm nins a sẽn segd n bobl nebã, la a sẽn tog n maan rẽ to-to wã. (Hebre dãmba 13:17) Wa sẽn zemse, kãsem soab b sẽn waoogd kẽesda a meng me tʋʋmã pʋsẽ, wala a Nehemi me sẽn kẽes a meng tɩ b lebs n me Zerizalɛm lalgã. (Nehemi 5:16) La a Zeova sõgen dãmbã fãa segd n kẽesa b mens wakat fãa Rĩungã koɛɛg mooneg pʋgẽ.—1 Korẽnt dãmba 9:16-18.
5. Tags-bʋg la d segd n tall koe-moonegã wɛɛngẽ?
5 Ad b sẽn bobl tõnd saasẽ Rĩungã b sẽn luglã koɛɛg moonegã sɩd yaa tʋʋmd sẽn kõt sũ-noog menga! Sãmbg sẽn ka be, d nanda zu-noog ning d sẽn tar n na n moon koe-noogã dũniyã tɛk fãa tɩ saabã yaool n ta wã. (Matɩe 24:14) La d sẽn yaa neb sẽn pa zems zãngã, a Poll gom-kãensã tõe n kenga d raoodo: “Tõnd tara paoong kãnga [koe- noogã] yagd laas pʋsẽ, tɩ pãng kãseng kãng na yɩ Wẽnnaam dẽnda, la ka tõnd dẽnd ye.” (2 Korẽnt dãmba 4:7) N-ye, tõnd tõe n maana tʋʋm sẽn tat Wẽnnaam yam, la yaa ne pãng la yam ning Wẽnnaam sẽn kõtã maasem yĩng bala.—1 Korẽnt dãmba 1:26-31.
D kɩt tɩ Wẽnnaam ziirã puki
6. Welg-bʋg n be tẽng zug Israɛllã ne tẽeb Israɛllã sʋka?
6 A Poll goma kiris-neb nins sẽn paam vʋʋsem sõngã zaeebã yell n yeel tɩ Wẽnnaam “maana tõnd me tɩ d zems tɩ yɩ kãab paalga karen-saam dãmba.” A Poll wilgame tɩ welgr n be kaool-paalgã b sẽn tũnug ne a Zezi Kirist n maan ne tẽeb Israɛllã, la kaool-kʋdgã b sẽn tũnug ne a Moiiz n maan ne tẽng zug Israɛllã sʋka. A Poll yeelame me t’a Moiiz sẽn da wa n yit Sinayi tãngã zug n sigd ne Tõod piigã sẽn gʋls kug-wals zutã, a nengã ra pɩnda hal wʋsg n kɩt tɩ Israɛll nebã ra pa tõe n ges-a n kaoos ye. La sẽn pa yã n kaoose, bũmb sẽn yaa kãseng n yɩɩd rẽ n maane bala “bãmb yam ludame” tɩ peend lud bãmb sũyã. La bãmb sã n da wa tek yam n kos a Zeova sugr n sak-a ne b sũy fãa peen-kãng pilgdame. Sẽn pʋgde a Poll goma koe-noogã b sẽn bobl neb nins b sẽn maan kaool-paalga ne wã yell n yeele: “Tõnd fãa nens pilgame, tɩ tõnd [na n kɩt t’a Zeova ziirã puk, NW ] wa nin-gɛtga.” (2 Korẽnt dãmba 3:6-8, 14-18; Yikri 34:29-35) A Zezi rũndã-rũndã ‘piis a taabã’ me tara zu-noog n na n kɩt t’a Zeova ziirã puki.—Zã 10:16.
7. Wãn-wãn la ninsaalb tõe n kɩt tɩ Wẽnnaam ziirã puki?
7 Sẽn mik tɩ ned pa tõe n yã Wẽnnaam n ket n vɩ wã, wãn to la ninsaalb sẽn pa zems zãng tõe n kɩt tɩ Wẽnnaam ziirã puki? (Yikri 33:20) D segd n tẽegame t’a Zeova mengã ziir sẽn yãk a toogo, a sẽn dat n tũnug ne a Rĩungã n wilg a naam sẽn ka to wã zemsgã me yaa bũmb sẽn tar ziir wʋsgo. Yel-sɩd nins sẽn tɩ loe ne Rĩungã neb nins sẽn paam vʋʋsem sõngã zaeebã sẽn sɩng mooneg yʋʋmd 33 Pãntekotã raarã naaga “Wẽnnaam tʋʋm kãsemsa” sʋka. (Tʋʋma 2:11) Ne vʋʋsem sõngã sor-wilgri, b ra tõe n moona koɛɛgã b sẽn bobl-bã neere.—Tʋʋma 1:8.
8. Wẽnnaam tʋʋmdã wɛɛngẽ, bõe la a Poll da rɩk sard kãn-kãe n na n maane?
8 A Poll da rɩka sard kãn-kãe n pa na n bas baa fʋɩ tɩ gɩdg-a t’a pa tʋm Wẽnnaam tʋʋmdã neer ye. A gʋlsame: “Tõnd sẽn tar tʋʋm kãnga sẽn zems nimbãan-zoeer ninga b sẽn kõ tõndã, tõnd ka tadgd ye. Tõnd basa bũmb nins sẽn yaa yãnde sẽn soos n maana. Tõnd ka kẽnd ne sɩlem ye, la tõnd ka tekd Wẽnnaam goama ye. La tõnd wilgda sɩd vẽenega n paamd kaset sõng ned kam fãa sũur pʋgẽ Wẽnnaam taoore.” (2 Korẽnt dãmba 4:1, 2) Ne bũmb ning a Poll sẽn bool tɩ “tʋʋm kãngã” wã maasem yĩnga, sɩdã puka vẽeneg tɩ tẽebã vẽenem saag tẽn-zẽmse.
9, 10. Wãn to la d tõe n kɩt t’a Zeova ziirã puki?
9 Vẽenem sɩd-sɩdã la tẽebã vẽenem yẽgrã 2 Korẽnt dãmba 4:6; Sɩngre 1:2-5) D sẽn paam tɩ b waoog-d ne waoogr sẽn yaa kãseng n kɩt tɩ d yaa Wẽnnaam tʋm-tʋmdbã, bɩ d kell n yɩ yɩlem n tõog n kɩt t’a Zeova ziirã puk wa nin-getse.
wɛɛngẽ, a Poll gʋlsame: “Wẽnnaam sẽn yeel tɩ ‘vẽenem na yãg lik pʋgẽ wã,’ bãmb kɩtame tɩ vẽenem yãg tõnd sũyã pʋsẽ tɩ wilg bãmb ziir sẽn yãgd Kirist pʋgẽ.” (10 Neb nins sẽn be tẽeb lik pʋgẽ wã pa tõe n yã a Zeova ziirã, bɩ a sẽn pukd to-to a Zezi Kirist sẽn yaa Moiiz kãsengã nengẽ wã ye. La tõnd sẽn ya a Zeova sõgen dãmbã, d reegda vẽenemã sẽn tar ziirã Gʋlsg Sõamyã pʋgẽ n vẽnegd neb a taabã. Sẽn na yɩl tɩ neb nins sẽn be tẽeb lik pʋgẽ wã wa tõog n põs sãoongã, rẽnda b paam vẽenem Wẽnnaam nengẽ. Woto yĩnga, ne sũ-no-kãseng la ne yẽesem, d sakda Wẽnnaam a Zeova sẽn kõ-d noor tɩ d kɩt tɩ vẽenem yãg lik pʋgẽ yẽ waoogr yĩngã.
Kɩt-y tɩ y vẽenemã yãg Biiblã zãmsg ne nebã sasa
11. Bõe la a Zezi yeel d sẽn segd n kɩt tɩ d vẽenemã yãgã wɛɛngẽ, la manesem a ye d sẽn tõe n tũnug ne n maan rẽ d moonegã tʋʋmd pʋgẽ la bʋgo?
11 A Zezi yeela a karen-biisã: “Yãmb yaa dũniyã vẽenem. Tẽng sẽn be tãng zug ka tõe n solg ye. La ned kõn yõgen fɩtla n fõgen ne peoog ye, a na n dogl-a-la fɩtl-doagendg zugu t’a kõ neba fãa sẽn be rooga pʋgẽ wã vẽenem. Bɩ yãmb vẽenem yãg woto neba sʋka, tɩ bãmb tõe n yã yãmb tʋʋm sõama la b waoog yãmb Ba sẽn be arzãna.” (Matɩe 5:14-16) Tõnd yel-manesem sõngã tõe n kɩtame tɩ neb a taabã waoog Wẽnnaam. (1 Pɩɛɛr 2:12) La d koe-moonegã tʋʋmd nens toɛy-toɛyã kõt-d-la soy wʋsg d sẽn tõe n tũnug ne n kɩt tɩ d vẽenemã yãge. Tõnd bõn-datɩ kãsemsã pipi soab yaa kɩt tɩ tẽeb vẽenem ning sẽn be Wẽnnaam Gomdã pʋgẽ wã yãge, ne d sẽn na n zãms Biiblã ne nebã tɩ wom biisi. Rẽ yaa manesem kãseng a ye d sẽn tõe n tũnug ne n maan d tʋʋmdã neere. Sagl-bʋs n tõe n sõng-d tɩ d zãms Biiblã ne neb nins sẽn sɩd baood sɩdã tɩ kẽ b sũyã?
12. Wãn to la pʋʋsgã tar loees ne Biiblã zãmsg ne nebã?
12 D sã n pʋʋs a Zeova rẽ wɛɛngẽ, d wilgdame tɩ d tʋll n zãmsa nebã Biiblã ne d sũur fãa. Leb n wilgdame tɩ d miime tɩ tara yõod tɩ d sõng neb a taabã tɩ b paam Wẽnnaam bãngrã. (Ezekɩɛll 33:7-9) A Zeova na n leoka d pʋʋsgã la a ning modgr nins d sẽn maand ne d sũur fãa d koe-moonegã pʋgẽ wã barka. (1 Zã 5:14, 15) La d pa pʋʋsd bal sẽn na yɩl n paam ned n zãms Biiblã ye. D sã n wa sɩng Biiblã zãmsg ne neda, rẽ poore, yɛl nins sẽn pak Biiblã karen-biigã n tɩ yɩɩdã zug pʋʋsg la b zut bʋgsg na n sõng-d lame tɩ d tõog n maan zãmsg fãa tɩ wom biisi.—Rom dãmba 12:12.
13. Bõe n tõe n sõng-d tɩ d zãms Biiblã ne nebã tɩ wom biisi?
13 Sẽn na yɩl n zãms ned Biiblã tɩ wom biisi, d segd n segla zãmsg fãa sõma. D sã n tagsdẽ tɩ rẽ maaneg yaa toog ne-do, yɩta sõma tɩ d ges tigingã sebr zãmsg yel-gɛt sẽn maand sebrã zãmsg semen fãa to-to wã. Wakat-wakate, d tõe n mii n yãaga Rĩungã koe-moondb nins sẽn tõog n zãms Biiblã ne neb tɩ wom biisã. Yaa vẽeneg tɩ d segd n gesa a Zezi sẽn tall manesem ningã la a sẽn da zãmsd nebã to-to wã n yɩɩda.
14. Wãn to la d tõe n kɩt tɩ d goamã kẽ ned sẽn zãmsd Biiblã sũuri?
14 A Zezi sũur da nooma a sẽn da maand a saasẽ Ba wã raabã yĩnga, la a sẽn da gomd Wẽnnaam yell ne neb a taabã. (Yɩɩl Sõamyã 40:9) A ra yaa sũ-mar soab la a tõogame n gom tɩ kẽ a kɛlgdbã sũyã. (Matɩe 11:28-30) Bɩ tõnd me mao n kɩt tɩ d goamã kẽ neb nins d sẽn zãmsd Biiblã sũyã. Sẽn na yɩl n maan dẽ, zãmsg fãa seglg sasa, d segd n ninga yɛl nins sẽn pak karen-biigã n tɩ yɩɩdã d yamẽ. Wala makre, sã n mik t’a soabã sẽn wub zĩig ningã neb pa tẽed Biiblã, d segd n tõog n kɩtame t’a sak n deeg tɩ Biiblã goam yaa sɩda. Rẽ, yaa vẽeneg tɩ d na n karma verse rãmb wʋsg la d wilg b võore.
Sõng-y sẽn zãmsd-b Biiblã tɩ b wʋm makr toɛy-toɛyã võore
15, 16. a) Wãn to la d tõe n sõng Biiblã zãmsd sẽn pa wʋm makr b sẽn dɩk Biiblã pʋgẽ võore? b) Bõe la d tõe n maane, b sã n dɩk makr tõnd sɛbã pʋgẽ t’a võor wʋmb yaa toog ne ned d sẽn zãmsd Biiblã?
15 Sẽn zãmsda Biiblã tõeeme n pa wʋmd makr b sẽn dɩk Biiblã pʋgẽ võor ye. Wala makre, a tõeeme n pa wʋm a Zezi sẽn da rat n yɛɛlga, a sẽn gom fɩtl doglg fɩtl doagendg zugã yellã ye. (Mark 4:21, 22) A Zezi ra gomda tẽn-kʋdem wẽndẽ fɩtl sẽn tar lamd sẽn wit yelle. Roagendg takɩ n da be tɩ b rogend fɩtl kãng buudã a zug sẽn na yɩl t’a bugmã tõog n vẽneg roog pʋga. Sẽn na yɩl n wilg a Zezi makrã võor vẽenega, rẽ tõe n baoodame tɩ d vaees wala Étude perspicace des Écritures sebrã pʋgẽ gom-zut sẽn yaa “fɩtl” la “fɩtl-doagendgã” zĩisẽ n bãng b võore. * La segl f meng n tõog n sõng ned f sẽn zãmsd Biiblã t’a wʋm makr võor t’a sũur yɩ noog ne rẽ sɩd kõta sũ-noog menga!
16 Wakat ninga b tõe n dɩkda makr tõnd sɛbã pʋsẽ t’a võorã wʋmb yaa toog ne Biiblã zãmsda. Rɩk-y sẽk n wilg y makrã võor wall y bao makr a to sẽn bilgd tags-kãngã. Sebr tõe n bilgda vẽeneg tɩ kẽed-n-ta-sõng tallg la lagem n tʋm tara yõod kãadem pʋgẽ. Sẽn na yɩl n bilg rẽ, sebrã tõe n gomda reem-dɛɛmd sẽn gãm wĩir yĩngr n bas a meng wa a na n lʋɩɩme tɩ reem-dɛɛmd a to koak-a yelle. Makr a to sẽn gomd kẽed-n-ta-sõng paoong la lagem n tʋm yell d sẽn tõe n dɩk yaa tʋm-tʋmdb sẽn tong taab n sigsd teed batayo pʋgẽ to-to wã.
17. Bõe la d tõe n zãms a Zezi nengẽ makr toɛy-toɛyã rɩkr wɛɛngẽ?
17 Makr a to rɩkr tõe n baoodame tɩ f reng n segl f menga. La rẽ wilgdame tɩ Biiblã zãmsd yell sɩd pak-d lame. A Zezi rɩka makr toɛy-toɛy sẽn yaa nana n kɩt tɩ b tõog n fasem yɛl võor wʋmb sẽn yaa toogo. A tãng zug zãmsgã tara makr toɛy-toɛy woto buudu, la Biiblã wilgdame t’a zãmsgã sɩd talla pãng wʋsg a kɛlgdbã zutu. (Matɩe 5:1–7:29) A Zezi maaga a yĩng n bilg yɛlã, bala a ra tʋlla ne a sũur fãa tɩ neb a taabã wʋm b võorã.—Matɩe 16:5-12.
18. Bõe la b sagend-d tɩ d maan Biiblã verse nins b sẽn ning sɛbã pʋsẽ wã n pa gʋls b goamã wɛɛngẽ?
18 D sẽn dat nebã ne neerã yĩng na n kɩtame tɩ d ‘sõs ne-b ne Gʋlsg sõamyã.’ (Tʋʋma 17:2, 3) Rẽ maaneg baoodame tɩ f maan zãmsg neer la pʋʋsgo, la f tʋm ne sɛb nins ‘tʋm-tʋmd sẽn tũud sɩd la sẽn tar yamã’ sẽn yiisdã sõma. (Luk 12:42-44) Wala makre, Bãngr Sẽn Tar n Debd Vɩɩm Sẽn Kõn-Saẽ Wã * sebr tara Biiblã verse rãmb wʋsgo. Sebrã vɩʋʋg sẽn pa waoogã yĩng kɩtame tɩ b wilg verse kẽer bal n pa gʋls b goamã ye. Biibl zãmsg sasa, tara yõod tɩ d karem la d wilg verse kãens kẽer võore. Sẽn paas menga, d zãmsgã tika Wẽnnaam Gomdã zugu, la a tara pãnga. (Hebre dãmba 4:12) Zãmsg fãa sasa bɩ y tʋm ne Biiblã la y tũnug ne verse rãmbã sẽn be sulã pʋsẽ wã wʋsgo. Sõng-y karen-biigã t’a bãng Biiblã sẽn yet bũmb ning yɛl bɩ manesem kẽer wɛɛngẽ. Modg-y n wilg-a t’a bãng Wẽnnaam sakr sẽn na n naf-a to-to.—Ezai 48:17, 18.
Maan-y sogsg sẽn kɩtd tɩ ned tagse
19, 20. a) Bõe yĩng tɩ d sã n zãmsd Biiblã ne ned bɩ d segd n maan-a sogsg sẽn kɩtd t’a togs a sẽn tagsde? b) Gom-zug ning sã n baoodẽ tɩ d gom n tadg a zugu, bõe la d tõe n maane?
19 A Zezi sẽn tũnug ne sogsgã sõma wã sõnga nebã tɩ b tags tɩrga. (Matɩe 17:24-27) D sã n maan Biibl zãmsd sokr sẽn pa ningd-a yãnde, a leokrã tõe n wilga a meng sẽn tagsd to-to yell zugu. D tõe n mikame t’a ket n tẽeda yɛl sẽn pa zems ne Biiblã. Wala makre, a tõe n tẽeda Tãablmã. Bãngr sebrã wilga a sak a 3 wã pʋgẽ tɩ gom-biig ning b sẽn lebg tɩ “Tãablmã” pa be Biiblã pʋgẽ ye. Sebrã kõo verse rãmb sẽn wilgd t’a Zeova yaa toor ne a Zezi, la tɩ vʋʋsem sõngã yaa Wẽnnaam pãn-tʋmdgã, la pa ned ye. Biiblã verse kãens kareng la b zut sõsg tõe n seka na sõng-a t’a bãng rẽ vẽenega. La yaa wãn to masã, d sã n wa segd n maan sẽn yɩɩd rẽ? Tõe tɩ d na n dɩka sẽk bilf zãmsg ning sẽn pʋgdã poor n sõs a Zeova Kaset rãmba sebr a to sẽn gomd gom-zu-kãng yell zugu, wala Doit-on croire à la Trinité ? seb-bilã. Rẽ poore, d tõe n kẽnga taoor ne zãmsgã Bãngr sebrã pʋgẽ.
20 Wala makre, tõnd tõe n soka Biibl zãmsdã a tagsg yell zug t’a leokrã ling-d wall sãam d sũuri. Sokrã sã n tɩ loee ne sɩgaar yũub bɩ ne nedã zugẽ yell a to, d tõe n kos-a lame t’a bas tɩ d kẽng taoor ne zãmsgã tɩ d na wa n gom dẽ yell nindaare. D sẽn bãng tɩ Biibl zãmsdã ket n yũuda sɩgaarã, rẽ na n sõng-d lame tɩ d bao kɩbay sɛbã pʋsẽ sẽn na n sõng-a t’a tõog n bɩ tẽebã wɛɛngẽ. D sẽn maood n dat tɩ zãmsgã kẽ Biibl zãmsdã sũurã, d tõe n kosa a Zeova pʋʋsg pʋgẽ t’a sõng-a t’a bɩ tẽebã wɛɛngẽ.
21. Bõe n tõe n maane, d sã n kɩt tɩ d zãmsgã zems ne yɛl nins sẽn pak Biiblã karen-biiga?
21 D sã n segl d meng sõma la d bao a Zeova sõngre, sãmbg sẽn ka be, d na n tõogame tɩ d zãmsgã zems ne yɛl nins sẽn pak Biiblã zãmsdã. Sã n be n beẽ, d na n wa tõog n sõng-a lame t’a nong Wẽnnaam. Tõeeme me tɩ d tõog n sõng-a t’a tall waoogr la mi-beoog ne a Zeova siglgã. Neb sã n sak n deeg tɩ ‘Wẽnnaam sɩd bee tõnd sʋkã,’ rẽ kõta sũ-noog menga! (1 Korẽnt dãmba 14:24, 25) Woto yĩng bɩ d maan Biibl zãmsg sẽn womd biis ne nebã la d mao wa d sẽn tõe tɛk n sõng neb a taabã tɩ b lebg a Zezi karen-biisi.
Bũmb sẽn tar yõod wʋsg d sẽn segd n nane
22, 23. Bõe la d rat sẽn na yɩl n maan d tʋʋmdã neere?
22 Sẽn na yɩl n maan d tʋʋmdã neere, d segd n teega Wẽnnaam pãngã. Koe-moonegã wɛɛngẽ, a Poll gʋlsa a tẽed-n-taasã sẽn zae ne vʋʋsem sõngã n yeele: “Tõnd tara paoong kãnga yagd laas pʋsẽ, tɩ pãng kãseng kãng na yɩ Wẽnnaam dẽnda, la ka tõnd dẽnd ye.”—2 Korẽnt dãmba 4:7.
23 Tõnd paama vʋʋsem sõngã zaeeb tɩ d yaa ‘piis a taabã’ sʋk ned me, d yaa wa yagd laag sẽn ka pãnga. (Zã 10:16) La a Zeova tõe n kõ-d-la pãng ning d sẽn datã tɩ d tõog n pids tʋʋm nins a sẽn bobl-dã, baa ne weoogrã. (Zã 16:13; Filip rãmba 4:13, Sebr Sõngo.) Bɩ d kell n teeg a Zeova zãng-zãnga, n nand d zu-noog tʋʋmdã wʋsg la d maan d tʋʋmd neere.
[Tẽngr note]
^ sull 15 Yaa sebr a Zeova Kaset rãmbã sẽn yiisi.
^ sull 18 Yaa sebr a Zeova Kaset rãmbã sẽn yiisi.
Wan to la y na n leoke?
• Bõe la kãsem dãmbã tõe n maan tɩ wilg tɩ b tʋmda b tʋʋmdã neere?
• Wãn to la d tõe n maan tɩ sõng-d tɩ d zãms Biiblã ne nebã tɩ wom biisi?
• Bõe la y na n maane, Biibl karen-biig sã n wa pa wʋm makr võor bɩ n baoodẽ tɩ d kõ-a kɩbay a taab zãmsg zug n paase?
[Study Questions]
[Foto, seb-neng 18]
Kiris-neb kãsem dãmbã zãmsda nebã tigingã pʋgẽ la b sõngd b tẽed-n-taasã koe-moonegã pʋgẽ
[Foto, seb-neng 20]
Biibl zãmsg sẽn womd biis maaneg ne nebã yaa manesem a ye sẽn na yɩl n kɩt tɩ d vẽenemã yãge