Kom-bɩɩse, yãmb segenda y mens beoog-daar yĩng bɩ?
Kom-bɩɩse, yãmb segenda y mens beoog-daar yĩng bɩ?
“Mam mii bũmb nins mam sẽn dat n maan yãmb yĩngã, m dat n kõo yãmb laafɩ ka toog ye, sẽn na yɩl tɩ y [beoog] yɩ neere.”—ZEREMI 29:11.
1, 2. Ne manesem toɛy-toɛy bʋs la b tõe n ges bi-bɩɩlmã?
KÃSEMB wʋsg tagsda bi-bɩɩlmã yell ne sũ-noog wʋsgo. B tẽra pãng la yẽesem ning b sẽn da tar b sẽn da wa n yaa kom-bɩɩsã. B tagsda sasa ning b sẽn da wa n pa tar zɩɩb wʋsgã yell ne sũ-noogo, la sasa ning b sẽn da reemd wʋsgo, tɩ b vɩɩmã tõr da be b taoore, tɩ b tõe n maan yɛl wʋsgã.
2 Yãmb sẽn yaa kom-bɩɩsã yãmb pa ne yɛlã woto ye. Tõe tɩ yaa toog ne-y tɩ y mao ne tagsa la y yĩnsã sẽn toeemd y bi-bɩɩlmã yĩngã. Tõe tɩ y lekollẽ wã, y maooda ne y karen-bi-taasã pãn-tusdg sẽn tar pãngã. Tõe tɩ y segd n modga wʋsg n lak y mens ne dorgã, rãamã la yoobã. Yãmb wʋsg me leb n segd n maoa ne pa-kẽesd-m-toogã bɩ yɛl a taab sẽn tɩ loe ne y tẽebã. N-ye, bi-bɩɩlmã tõe n yɩɩ toog wakate. Yaool n yaa wakat y sẽn tõe n maan yɛl wʋsgo. Sokrã yaa: Bõe la y na n maan wakat kãngã fãa sẽn be y taoorã sasa?
Maan-y sũ-noog ne y bi-bɩɩlmã
3. Sagl-bʋg la keoog bʋg la a Salomo kõ kom-bɩɩsã?
3 Kãsemba na n yeel-y lame tɩ bi-bɩɩlem pa kaoosd wʋsg ye, la b bee bʋʋm. Yʋʋm a wãn pʋgẽ bal tɩ yãmb bi-bɩɩlmã loogame. Woto yĩnga, bɩ y rɩ a nafa tɩ y ket n tar-a! Yaa woto la a Salomo sagl-yã, a sẽn wa n gʋls tɩ: “Bi-bɩɩga, maan sũ-noog f bi-bɩɩlma wakate. La f noog f sũur f bɩʋʋnga wakate, n tũ sor ninga f sũur sẽn datã la f nin sẽn getã.” La a Salomo keooga kom-bɩɩsã woto: “Rig sũ-pa-noom t’a loog n bas-fo, la f zãag f meng ne wẽnga.” La a paase: “Yãadem ne bi-bɩɩlem wakat yaa zaalem.”—Koɛɛg Soaba 11:9, 10.
4, 5. Bõe yĩng tɩ yaa yam tʋʋmd ne kom-bɩɩsã tɩ b segl b mens beoog-daar yĩnga? Rɩk-y makre.
4 Yãmb wʋmda a Salomo sẽn da rat n yeelã võor bɩ? D rɩk makr ne b sẽn na n kõ bi-bɩɩg kũun sẽn yaa kãseng wʋsgo, tõe tɩ yaa ligdi. Bõe la a na n maan ne-a? A tõe n dɩka ligda fãa n noog a yõore, wala biribl ning sẽn yaa laog sãamdã yell a Zezi sẽn gom a yel-bũndã pʋgẽ wã. (Luk 15:11-23) La ligdã sã n sa, na n yɩɩ wãn masã? Sɩd-sɩda a na n maana a bãngẽ, a sẽn sãam a ligdã yĩnga! La d rɩk makr wala a sã n da rɩka kũunã n segl beoog-daar yĩnga, n dɩk ligdã wʋsg n tʋm ne yam. Sã n wa beẽ-beẽ, a sã n wa rɩt a sẽn dɩk-a n tʋm ne yamã yõodo, yãmb tẽedame t’a na n maana a bãngẽ, a sẽn pa rɩk-a fãa n noog a yõor a bi-bɩɩlem wakatã bɩ? Yaa vẽeneg tɩ ayo!
5 Ges-y y bi-bɩɩlmã wakat wala kũun sẽn yit Wẽnnaam nengẽ, bala sɩd yaa woto. Wãn to la y na n dɩk wakat kãngã n tʋme? Y tõe n dɩka y pãngã la y yẽesmã n noog y yõore, n maand woto wakat fãa n pa tagsd beoog yell ye. La y sã n maan woto, “yãadem la bi-bɩɩlem wakat [na n yɩɩ] zaalem” ne yãmba. Sẽn são n yɩɩd yaa y sẽn na n tũnug ne y bi-bɩɩlmã n segl y beoog-daarã!
6. a) A Salomo sagl-bʋg n kõt kom-bɩɩsã sor-wilgri? b) Bõe la a Zeova rat n maan n kõ kom-bɩɩsã, la wãn to la bi-bɩɩg tõe n dɩ rẽ nafa?
6 A Salomo kõo no-kãseng sẽn tõe n sõng yãmb tɩ y tʋm ne y bi-bɩɩlmã ne yam. A yeelame: “Tẽeg f naanda yell f bi-bɩɩlem wakate.” (Koɛɛg Soaba 12:1) Sẽn na yɩl tɩ y vɩɩmã yɩ sõma, yaa y sẽn na n kelg a Zeova la y maan a raabã. A Zeova togsa Israɛll nebã pĩnd wẽndẽ wã a sẽn da rat n maan bũmb ning n kõ-ba: “Mam mii bũmb nins mam sẽn dat n maan yãmb yĩngã, m dat n kõo yãmb laafɩ ka toog ye, sẽn na yɩl tɩ y poorẽ yɩ neere.” (Zeremi 29:11) A Zeova ratame me tɩ yãmb ‘poorẽ bɩ y beoog yɩ neere.’ Y sã n tẽeg a yell y tʋʋmã, y tagsa wã, la y sarda rɩkre pʋsẽ, y beoog na n yɩɩ neere.—Wilgri 7:16, 17; 21:3, 4.
“Bɩ y kolg Wẽnnaam”
7, 8. Wãn to la bi-bɩɩg tõe n kolg Wẽnnaam?
7 A Zak sagenda tõnd tɩ d tẽeg a Zeova yell a sẽn yeel tɩ: “Bɩ y kolg Wẽnnaam, la bãmb na kolg yãmba.” (Zak 4:8) Ya a Zeova la Naandã, Naab sẽn ka to sẽn be saasẽ, a Soab ning sẽn zems ne baleng la pẽgr buud fãa wã. (Wilgri 4:11) La tõnd sã n kolg-a, a na n kolga tõndo. A sẽn nong yãmb woto wã pa noogd y sũur sɩda?—Matɩe 22:37.
8 Tõnd kolgda a Zeova ne manesem buud toor-toore. Wala makre, tʋm-tʋmd a Poll yeelame: “Bɩ y wɩng ne pʋʋsgo la y gũus neere, la y pʋʋs barka.” (Kolos rãmba 4:2) Rat n yeelame tɩ y minim n pʋʋsdẽ. Ra tek-y ãmiina yeelg bala, y ba wã bɩ kiris-ned a to sã n lʋɩ tigingã taoor n pʋʋs ye. Yãmb zoe n pʋʋsa a Zeova ne y sũur fãa n yeel-a bũmb ning y sẽn tagsdã, yɛl nins sẽn kõt-y rabeemã la zu-loees nins y sẽn segdã bɩ? Yãmb zoe n togs-a-la yɛl y sẽn zoet yãnd n pa rat n gom ne ninsaal ba a yembr bɩ? Pʋʋsg y sẽn pelg y pʋg n maan kõta bãane. (Filip rãmba 4:6, 7) Pʋʋs-kãens sõngda tõnd tɩ d kolg a Zeova la d yã t’a kolgda tõndo.
9. Wãn to la bi-bɩɩg tõe n kelg a Zeova?
9 D nee d sẽn tõe n kolg a Zeova to-to me, gom-kãensã a sẽn vẽneg tɩ b gʋlsã pʋgẽ: “Sak saglg la f reeg zãmsg n paam yam.” (Yelbũna 19:20) N-ye, yãmb sã n kelg a Zeova la y sak-a, y segenda y mens beoog-daar yĩnga. Wãn to la y wilgd tɩ y sɩd kelgda a Zeova? Sãmbg sẽn ka be, y kẽnda kiris-neb tigissã wakat fãa la y kelgdẽ. Sẽn paase, yãmb ‘waoogda y ba la y ma,’ n wat zak pʋgẽ Biiblã zãmsgẽ. (Efɛɛz rãmba 6:1, 2; Hebre dãmba 10:24, 25) Woto yaa sõma. La sẽn paase, yãmb ‘baooda sẽk’ n segend tigissã, n karemd Biiblã wakat fãa la y maand vaeesg bɩ? Yãmb modgdame n tũud y sẽn zãmsdã, sẽn na yɩl n kẽn ‘wa yam dãmb’ bɩ? (Efɛɛz rãmba 5:15-17; Yɩɩl Sõamyã 1:1-3) Y sã n maand woto, y kolgda a Zeova.
10, 11. Nafa kãsems bʋs la kom-bɩɩsã paamda, b sã n kelgd a Zeova?
10 Yelbũnã sebr sɩngr goamẽ, gʋlsdã vʋʋsem sõngã sẽn vẽnegã wilgda Biiblã seb-kãngã bõn-datla. A wilgd-a-la woto: “Sẽn na n yɩl tɩ neb paam yam ne zãmsgo la b bãng yam dãmb yẽesem goama, tɩ b tõe n zãms n paam yam vẽnegr ne pʋ-peelem la zemsg ne tɩrlem. B kõta zɩtb yẽesem la b kõta kamb bãngr ne yam.” (Yelbũna 1:1-4) Rẽnd y sã n karemd Yelbũna sebr la y tũud a saglsã, la y maand woto ne Biiblã sɛb a taabã, y na n yɩɩ tɩrga, la a Zeova sũur na n yɩɩ noogo, y sã n kolg-a. (Yɩɩl Sõamyã 15:1-5) Y sã n baood yam, bãngr la tagsg tõog n paasdẽ, sard nins y sẽn dɩkdã me na n yɩɩ sõma n paase.
11 Yaa bũmb sẽn pa zems tɩ y gũ tɩ bi-bɩɩg tʋm ne yam yel-kãensã wɛɛngẽ bɩ? Ayo, bala kiris-neb wʋsg sẽn yaa kom-bɩɩs maanda woto. Woto kɩtame tɩ neb a taabã waoogd-ba, n pa ‘paoogd-b b yãadmã yĩng ye.’ (1 Tɩmote 4:12) Ne bʋʋm, rẽ yaa zu-zẽkr n kõ b roagdbã, la a Zeova yetame tɩ b noogda a sũuri. (Yelbũna 27:11) Baa ne b sẽn yaa kom-bɩɩsã, b tõe n kɩsa sɩd tɩ gom-kãensã Wẽnnaam sẽn kɩt tɩ b gʋlsã pidsda bãmb zutu: “Bɩ f ges pʋ-peelem soaba n yã nin-tɩrga. Tɩ bõe, laafɩ soab na n paama yagense.”—Yɩɩl Sõamyã 37:37.
Yãk-y sõma
12. Yãkr nins sẽn tar yõodã a yembr la bʋgo, la bõe yĩng tɩ yãk-kãng womd biis sẽn kaoosde?
12 Bi-bɩɩlmã yaa wakat f sẽn yãkd n maan yɛl wʋsgo, tɩ yãk-kãens biisã kaoosdẽ. Yãkr kẽer yãmb sẽn maand na n woma bɩɩs yʋʋm wʋsg sẽn wat pʋgẽ. Yãkr nins y sẽn maand ne yamã paasda y sũ-noogã la b manegd y vɩɩmã. Yãkr sẽn pa tũ ne yam tõe n sãama vɩɩm tõre. Bãng-y tɩ sɩd yaa woto ne yãkr a yiib y sẽn segd n maane. Pipi: Yaa ãnd dãmb la yãmb yãkd n na n maan tũud-n-taar ne? Bõe yĩng tɩ rẽ tar yõodo? Be neere, yel-bũndã Wẽnnaam sẽn kɩt tɩ b gʋlsã yetame: “Ned sã n tũud yam dãmba, a na n lebga yam soaba. La ned sã n tũud yalma, a na n paama toogo.” (Yelbũna 13:20) Sẽn dat n yeel tɩ d na n wa baas n yɩɩ wa neb nins d sẽn tũudã, yam dãmba, bɩ yalemba. Bʋg la y rat n yɩ?
13, 14. a) Nebã naagr toor sẽn ka be, bõe me n yaa tũud-n-taare? b) Tags-bʋg sẽn pa sɩd la kom-bɩɩsã segd n lak b mens ne?
13 Y sã n tagsd tũud-n-taar yelle, tõe tɩ y tagsda zĩnd ne neb yelle. Yaa sɩda, la pa rẽ bal ye. Yãmb sã n get televiziõ wã, n kelgd mizikã, n karemd sebre, n kẽnd sĩnima, bɩ n get ẽntɛrnetã, yaa tũud-n-taar la y maanda. Tũud-n-ta-kãens sã n tɩ loe ne nen-kɛglem la yoob yɛla, dorg yũub la rã-tɩgre, bɩ bũmb a to sẽn kɩɩsd Biiblã noyã, rẽnd yãmb maanda tũud-n-taar ne “zɩt” sẽn maand wa a Zeova ka be wã.—Yɩɩl Sõamyã 14:1.
14 Tõe tɩ y tagsdame tɩ y sẽn wat kiris-neb tigissã la y tʋmd ne tigingã, y tara pãng tɩ sek n tõe n ges filim sẽn wilgd nen-kɛglem la y kelg mizik noog goam sẽn pa lebd be. Tõe tɩ y tagsdame tɩ pa na n baas wẽnga, y sã n ges yoob yɛl bilf ẽntɛrnetã pʋgẽ ye. Tʋm-tʋmd a Poll yet-y lame tɩ tags-kãng pa sɩd ye. A yetame: “Tũud-n-ta-wẽns sãamda nin-sõamyã.” (1 Korẽnt dãmba 15:33) Zu-bʋko, kiris-neb wʋsg sẽn yaa kom-bɩɩs sẽn da tõe n wa yɩ sõma sãama b zʋg-sõma wã ne tũud-n-ta-wẽnse. Rẽ wã yĩnga, bɩ y rɩk sard sẽn pa vigsd n zãag y meng ne tũud-n-ta-wẽnsã. Y sã n maan woto, y na n tũu a Poll sagl-kãngã: “Bɩ y ra yɩ wa dũniyã rãmb ye, bɩ y bas tɩ Wẽnnaam tek yãmb yama n maneg-y zãnga tɩ y bãng Wẽnnaam daab sẽn yaa sõama, la sẽn tat bãmb yam, la sẽn zems zãnga.”—Rom dãmba 12:2.
15. Yãkr a yiib-n-soab kom-bɩɩsã sẽn segd n maan yaa bõe, la wakat ninga b tusd-b lame tɩ b maan bõe yel-kãngã wɛɛngẽ?
15 Ad yãkr a yiib-n-soab y sẽn segd n maane. Wakat n wat tɩ y segd n yãk yam ne y sẽn dat n maanega, y sã n wa sa y lekollã. Yãmb sã n be tẽngẽ tɩ tʋʋmã paoong yaa toogo, y tõe n tagsdame tɩ y segd n yɩɩ tao-tao n sak tʋʋmd ning sẽn são-são wã. Yãmb sã n vɩ tẽng sẽn tar arzɛk pʋgẽ, tʋʋm buud toor-toor bee y sẽn tõe n yãk n maane, tɩ bãmb kẽer tõdgr yaa toogo. Yãmb karen-saam dãmbã bɩ y roagdbã tõe n sagl-y-la ne pʋ-peelem tɩ y tʋm tʋʋmd sẽn na n kõ-y ligd bɩ arzɛk wʋsg menga. La tʋʋm-kãngã buud zãmsg tõe n booga sẽk ning y sẽn na n dɩk n maan a Zeova raabã wʋsgo.
16, 17. Wilg-y verse toɛy-toɛy sẽn tõe n sõng bi-bɩɩg t’a tall tagsg sẽn zems nug-tʋʋmã wɛɛngẽ to-to.
16 Tẽeg-y n ges Biiblã sẽn yet bũmb ning la y yaool n yãk yam n sak tʋʋmde. Biiblã sagenda tõnd tɩ d tʋm n paam d noor dɩɩbo, la a wilgdẽ tɩ yaa tõnd meng n segd n zã d mense. (2 Tesalonik rãmba 3:10-12) La yɛl a taab n be nug-tʋʋmd yãkr pʋgẽ. D sagend-y lame tɩ y karem verse nins sẽn pʋgdã la y tags n ges b sẽn tõe n sõng bi-bɩɩg t’a tall tagsg sẽn zems nug-tʋʋmdã yãkr wɛɛngẽ to-to: Yelbũna 30:8, 9; Koɛɛg Soaba 7:11, 12; Matɩe 6:33; 1 Korẽnt dãmba 7:31; 1 Tɩmote 6:9, 10. Y sẽn karem verse kãensã wã, y nee a Zeova tagsg yellã zug masã bɩ?
17 Nug-tʋʋm pa segd n lebg bũmb sẽn tar yõod wʋsg hali n wa sãamd tʋʋmd ning a Zeova sẽn bobl tõndã ye. Y sã n karem kolɛɛsã n sa, n tõe n wa paam tʋʋm sẽn zems bala, yaa sõma. Y sã n segd n paam zãmsg n paas kolɛɛsã poore, yaa bũmb y sẽn segd n sõs ne y roagdbã. La ra yĩm-y “bũmb nins sẽn yaa sõama n yɩɩda” sẽn yaa tẽebã yɛlã ye. (Filip rãmba 1:9, 10) Ra maan-y tudgr ning a Zeremi seb-gʋlsd a Baruk sẽn maanã ye. A ra wa n ye pa nand zu-noog ning a sẽn da tar Wẽnnaam tʋʋmdẽ wã ye, n dat n ‘bao bõn-kãsems a meng yĩnga.’ (Zeremi 45:5) Wakat bilf pʋgẽ, a yĩmame tɩ dũni kãngã ‘bõn-kãsems’ pa tõe n kɩt t’a kolg a Zeova bɩ sõng-a t’a põs Zerizalɛm sãoongã ye. B tõe n yeela woto ne tõnd me rũndã-rũndã.
Nand-y tẽebã yɛla
18, 19. a) Bõe n namsd yãmb yags wʋsgo, la bõe la yãmb segd n tags b zugu? b) Bõe yĩng tɩ neb wʋsg pa tagsd tɩ tẽeb kom n tar-ba?
18 Kɩbayẽ wã, yãmb zoe n yãa yimaaz rãmb sẽn wilgd kamb nins sẽn be tẽns nins koma sẽn beẽ wã bɩ? Y sã n zoe n yãa woto, b nimbãaneg yõk-y lame. Yãmb zoeta neb nins sẽn be yãmb sakẽ wã nimbãaneg woto bɩ? Bõe yĩng tɩ b nimbãaneg segd n yõk-yã? Bala kom n namsd bãmb wʋsg me. Kom ning sẽn tar-bã yaa a soab ning a Amos sẽn deng n togs bãngr-gomd pʋgẽ woto wã: “Zusoaba yeelame yaa: ‘Gese, raar n wat tɩ mam na n kɩt tɩ kom zĩnd tẽnga pʋgẽ. Neba na n wa rata mam goama n kelg la b ka na n wʋm ye.’ ”—Amos 8:11.
19 Yaa sɩd tɩ neb wʋsg sẽn namsd tẽebã kom kãngã yĩngã pa ‘mi tɩ b tara tẽeb ratem’ ye. (Matɩe 5:3, NW ) Wʋsg pa ne tɩ tẽeb kom n tar-b ye. Kẽer tõe n tagsdame meng tɩ b rɩ n tɩga tẽebã wɛɛngẽ. La sẽn yaa woto wã yaa b sẽn dɩlgd b mens ne ‘dũniyã yamã’ sẽn tar laog nonglem, no-koɛɛm bãngrã wɛɛngẽ, b mens tagsg sõma ne wẽngã la yɛl a taab wɛɛngẽ wã yĩnga. Neb kẽer tagsdame tɩ rũndã-rũndã ‘yamã’ kɩtame tɩ Biiblã zãmsg pa leb n tar yõod ye. La “dũniyã ka tõog n bãng Wẽnnaam ne a meng yam ye.” Dũniyã yam pa na n sõng yãmb tɩ y kolg Wẽnnaam ye. A pa baa fʋɩ n zʋʋg “yalemd ne Wẽnnaam” ye.—1 Korẽnt dãmba 1:20, 21; 3:19.
20. Bõe yĩng tɩ pa yam tʋʋmd tɩ d tʋlg n dɩk neb nins sẽn pa balemd a Zeova wã togs-n-taare?
20 Y sã n get yimaaz rãmb nins sẽn wilgd kamb kom sẽn tarã, y rat n yɩɩ wa bãmb bɩ? Ayo! La kom-bɩɩs kẽer sẽn be kiris-neb zagsẽ wã wilgame tɩ b tʋll n yɩɩ wa neb nins sʋk b sẽn vɩ tɩ tẽebã kom namsd-bã. Kom-bɩ-kãens tagsdame tɩ kom-bɩɩs nins sẽn be dũniyã pʋgẽ wã pa tar zu-loeese, la b noogda b yõe bala. B yĩmame tɩ kom-bɩ-kãens zãra ne a Zeova. (Efɛɛz rãmba 4:17, 18) B yĩmda tẽebã kom bi-wẽnsã me. Bi-wẽns kãens kẽer yaa pʋsã kom-bɩɩs sẽn dɩgsd tɩ pa tũ ne b raabã, la tood yĩnsã pʋsẽ, n paas sũ-sãams yoobã, sɩgaarã yũubu, rã-tɩgrã la dorgrã rɩkr sẽn wat ne wã. Tẽebã kõm wata ne tõdgr yam, saagr kaalem la sor-wilgr kaalem vɩɩmã pʋgẽ.
21. Wãn to la d tõe n kogl d mens n da wa tall tagsa sẽn pa zems wa neb nins sẽn pa balemd a Zeova wã?
21 Woto yĩnga, y sã n be lekollẽ wã ne karen-bi-taas sẽn pa balemd a Zeova, bɩ y ra bas tɩ b manesmã koms y raood ye. (2 Korẽnt dãmba 4:18) Kẽer na n gom n sãbga tẽebã yɛla. Sẽn paase, kɩba-kɩtbã na n yelga goam sẽn yaa ziri, n wilg tɩ zemsame tɩ y yo, tɩ y yũ rãam n tɩg wall y gom gom-dẽgdo. Lak-y y mens ne yel-manesem kãensã. Ket-y n maand tũud-n-taar wakat fãa ne neb nins sẽn ‘talld b tẽeb la sũur kaset sõama’ wã. Wakat fãa, bɩ y “maan Zusoaba tʋʋmd wʋsgo.” (1 Tɩmote 1:19; 1 Korẽnt dãmba 15:58) Ket-y n tʋmd-y wʋsg Rĩungã Roogẽ la koe-moonegã pʋgẽ. Yãmb karengã wakate, rɩk-y sõngr so-pakrã tʋʋmd wakat-wakate. Woto na n paasa y tẽebã pãnga, n kɩt tɩ y tõog n yals kãn-kãe wakat fãa.—2 Tɩmote 4:5.
22, 23. a) Bõe yĩng tɩ naoor wʋsgo, kiris-ned sẽn yaa bi-bɩɩg na n maan yãkr neb a taabã sẽn pa wʋmd a võore? b) Bõe la b sagend kom-bɩɩsã tɩ b maane?
22 Y sã n get yɛlã ne tẽebo, na n kɩtame tɩ y maan yãkr tɩ neb a taabã pa wʋmd a võor ye. Wala makre, kiris-ned a yembr sẽn yaa bi-bɩɩg ra tõe n maana mizik sõma la a ra yaa karen-biig sẽn da lʋɩt taoor wakat fãa. A sẽn paam a dipolmã poore, a naaga a ba wã vitr dãmbã yẽesg tʋʋmdẽ, sẽn na yɩl n tõog n ket n kẽngd taoor ne tʋʋmd ning a sẽn yãk sẽn yaa yɩ wakat fãa koe-noogã moonda, bɩ so-pakdã. A karen-saam dãmbã zɩ n wʋm bũmb ning sẽn kɩt t’a maan yãkr kãngã wã ye, la y sã n yaa ned sẽn pẽ a Zeova sõma, d mii vẽeneg tɩ y wʋmda a yãkrã võore.
23 Y sã n tags y sẽn na n tʋm ne y bi-bɩɩlmã sẽn tar yõodã to-to, ‘y na n bĩnga arzɛgs beoog yĩng yẽbgr ninga sẽn tar pãnga zugu, tɩ yãmb tõe n paam vɩɩm sẽn yaa sɩda.’ (1 Tɩmote 6:19) Rɩk-y sard kãn-kãe n ‘tẽeg y naand kãsengã yell’ y bi-bɩɩlmã wakate, la y vɩɩmã fãa sẽn ketã sasa. Yaa woto bal la y tõe n segl beoog-daar sẽn kõn sa sẽn be barka.
Bõe la y na n baas n yeele?
• Sagl-bʋg Wẽnnaam sẽn kɩt tɩ b gʋls n sõngd kom-bɩɩsã, b sã n wa segend b mens beoog-daar yĩnga?
• Wãn to la bi-bɩɩg tõe n “kolg Wẽnnaam”?
• Yãk-bʋs kẽer la bi-bɩɩg maand tɩ na n tall pãn-tusdg a zug beoog-daare?
[Zãmsgã sogsgã]
[Foto rãmba, seb-neng 25]
Yãmb na n dɩka y bi-bɩɩlmã pãng la a yẽesmã fãa n pʋg y mens bõn-datɩ bɩ?
[Foto, seb-neng 26]
Kiris-neb nins sẽn yaa kom-bɩɩs sẽn tar yamã geta yɛlã ne tẽeb wakat fãa