Wẽnnaam nin-buiidã segd n wilga sõmblem
Wẽnnaam nin-buiidã segd n wilga sõmblem
“Yaa bõe la Zusoaba baood yãmb nengẽ, sã n ka tɩ y maan sẽn yaa tɩrga n [nong sõmblem] daar fãa la y sik y mens n sak bãmb bala.”—MIISE 6:8.
1, 2. a) Bõe yĩng tɩ pa lingr t’a Zeova baoodẽ t’a nin-buiidã wilg sõmblem? b) Sõmblmã wɛɛngẽ, sogs-bʋs zut la d segd n tagse?
A ZEOVA yaa Wẽnnaam sẽn tar sõmblem. (Rom dãmba 2:4; 11:22) Ad a Ãdem ne a Hawa ra segd n talla mi-beoog wʋsg ne rẽ! Edɛn zẽedã pʋgẽ, b ra nee bũmb nins Wẽnnaam sẽn naanã, n da tõe n dɩ bõn-kãens nafa, tɩ woto ra wilgd vẽeneg tɩ Wẽnnaam maana ninsaalbã neere. La Wẽnnaam ket n wilgda sõmblem ne nebã fãa, baa ne sõm-zɩtbã la nin-wẽnsã menga.
2 Wẽnnaam sẽn naan ninsaalbã n wõneg a mengã yĩng kɩtame tɩ b tõe n tall a zʋgã buudu. (Sɩngre 1:26) Dẽnd pa lingr t’a Zeova baoodẽ tɩ d wilg sõmblem ye. Wala Miise 6:8 sẽn yetã, Wẽnnaam nin-buiidã segd n ‘nonga sõmblem.’ La sõmblem yaa bõe? Wãn-wãn la a tɩ loe ne Wẽnnaam zʋg a taabã? La sẽn mik tɩ ninsaalbã tõe n wilga sõmblmã, bõe yĩng tɩ dũniyã yaa wẽng tɩ loog t’a zug zĩndg yaa toogo? Bõe yĩng tɩ tõnd sẽn yaa kiris-nebã segd n mao n wilg sõmblem ne neb a taabã?
Sõmblem yaa bõe?
3. Sõmblem yaa bõe?
3 Wilg sõmblem yaa tʋm neb a taabã neer yĩnga. D wilgd-a-la ne tʋʋm sẽn tar yõod la goam sẽn be waoogre. Wilg sõmblem dat n yeelame tɩ f maan neer la f ra maan wẽng ye. Nin-sõng yaa ned sẽn tar zood yam, sũ-bʋgsem soaba, wʋmda, la nimbãan-zoɛta. A yaa kõt la ned sẽn waoogd a taaba. Tʋm-tʋmd a Poll sagla kiris-neba woto: “Bɩ y yeelg nimbãan-zoeer meng-menga, la sõmblem, la sik-m-menga, la sũ-bʋgsem, la sũ-mar wa futu.” (Kolos rãmba 3:12, Kãab-paalgã Koe-noogo) Dẽnd sõmblmã yaa zʋg kiris-ned hakɩk fãa sẽn segd n yeelg wa fuugu.
4. Wãn-wãn la a Zeova yɩ pipi n maan ãdem-biisã neere?
4 Wẽnnaam a Zeova n yɩ pipi n maan nebã neere. Wala a Poll sẽn yeelã, “Wẽnnaam sẽn yaa tõnd Fãagda sõmblem la bãmb nonglem neba fãa yĩng sẽn puki, bãmb fãaga tõndo,” la a “pek tõnd n kõ tõnd dogem paalga, n maneg tõnd ne b Sɩɩg Sõngo.” (Tɩt 3:4, 5) Wẽnnaam ‘pekame,’ bɩ a yɩlga kiris-neb nins sẽn paam vʋʋsem sõngã zaeebã ne a Zezi zɩɩmã, tɩ rẽ kɩt tɩ b tõe n dɩ Kirist maoongã sẽn yɩ rondã nafa. Vʋʋsem sõngã maasem yĩng me, b lebga ‘nin-paals’ wala Wẽnnaam kamba. (2 Korẽnt dãmba 5:17) Sẽn paase, Wẽnnaam sõmblmã ne a nonglmã sãag n buya ‘kʋʋn-kãseng’ neb sẽn ‘pek b fut tɩ lebg peels ne Pebila zɩɩmã.’—Wilgri 7:9, 14; 1 Zã 2:1, 2.
5. Bõe yĩng tɩ neb nins sẽn tar Wẽnnaam vʋʋsem sõngã segd n wilg sõmblem?
5 Sõmblem leb n yaa Wẽnnaam vʋʋsem sõngã bil a ye. A Poll yeelame tɩ “Sɩɩg Sõng biis yaa nonglem la sũ-noogo la laafɩ la sũ-mare la maan neere [la sõmblem], la sũ-maasem la tẽeb la sũ-bʋgsem la yõk-m-menga; tõog ka be sẽn kɩɩsd bõn-kãensa ye.” (Galat dãmba 5:22, 23) Rẽ yĩnga, neb nins sẽn tar Wẽnnaam vʋʋsem sõngã pa segd n maan neb a taabã neer sɩda?
Sõmblem hakɩkã pa pãn-komsem ye
6. Sasa bʋg la sõmblem wilgr yaa pãn-komsem, la bõe yĩnga?
6 Neb kẽer geta sõmblmã wala pãn-komsem. B tagsdame tɩ ned segd n yɩɩ nin-toaag bɩ wẽnem soab meng wakat ning n kɩt tɩ nebã sɩd bãng a raoodã sẽn ta zĩig ninga. Sɩd-sɩda, tõog n wilg sõmblem hakɩkã la f ra wilg sõmblem sẽn pa zems sɩd baooda raoodo. Sẽn mik tɩ sõmblem hakɩkã bee Wẽnnaam vʋʋsem sõngã biis sʋkã, a pa tõe n yɩ zʋg sẽn kɩtd tɩ ned mum a nif n bas manesem wẽng taal ye. La sõmblem sẽn pa zems yaa pãn-komsem sẽn kɩtd tɩ ned sak n bas tʋʋm-wẽng taale.
7. a) Wãn to la a Eli wilg yam-kaalgo? b) Bõe yĩng tɩ kãsem dãmba segd n gũus n da tall sõmblem sẽn pa zemse?
7 Ges-y Israɛll maan-kʋʋd kãsem a Eli makrã. A maana yam-kaalg n pa kibl a kamb a Hofni ne a Fineyas sẽn da yaa maan-kʋʋdb sɛk roogẽ wã ye. Maandã nemd ning Wẽnnaam Tõogã sẽn da wilg tɩ b kõ-bã sẽn da pa ta b yamã, nand tɩ b yõog nem-kaamã tẽn-kugrã zugu, b ra tʋmda sõangd t’a tɩ reeg nem-kãad ned ning sẽn wa n kos maoongã nengẽ. A Eli kambã leb n da gãeyã pagb nins sẽn da tʋmd sɛk roogã noorã. La wall t’a Eli yiis a Hofni ne a Fineyas maan-kʋʋrẽ wã, a zab-b lame n gom ne-b bʋg-bʋg bala. (1 Sãmwɛll 2:12-29) Pa lingr tɩ “Zusoaba goam da ka waoog wakat kãng ye.” (1 Sãmwɛll 3:1) Kiris-neb kãsem dãmbã segd n gũusame n da wa tall sõmblem sẽn pa zems ne koangdbã tɩ b wa sãam tigingã neb tẽeb ye. Sõmblem hakɩkã pa kɩtd tɩ ned mum a nif gom-dẽgd la tʋʋm sẽn kɩɩsd Wẽnnaam noyã taoor ye.
8. Wãn to la a Zezi wilg sõmblem hakɩka?
8 Tõnd mak-sõng a Zezi Kirist pa tol n wilg sõmblem sẽn pa zems ne nebã ye. A yɩɩ mak-sõng sẽn yaa kãseng n tɩ yɩɩd sõmblem hakɩkã tallg wɛɛngẽ. Wala makre, ‘a sẽn yã kʋʋngã, b nimbãanega yõk-a lame, tɩ bõe, bãmb sũyã sãama wʋsgo la bãmb pãnga fãa sɛɛme. Bãmb yaa wa piis sẽn ka tar kɩɩm ye.’ Pʋ-peelem dãmbã ra pẽnegda a Zezi nana-nana, b talla b kom-bõonegã meng n wa a nengẽ. Tags-y n ges-y sõmblem la nimbãan-zoeer ning a sẽn talle, a sẽn deeg kambã ‘n tik bãmb ne a nusi, n ning b zut barkã.’ (Matɩe 9:36; Mark 10:13-16) Baa ne a Zezi sẽn yɩ nin-sõngã, a ra pa reemd ne bũmb ning a saasẽ Ba wã sẽn get tɩ yaa tɩrg ye. A Zezi pa tol n mum a nif wẽng taoor ye, a paama raood sẽn yi Wẽnnaam nengẽ n puk tũudmã taoor dãmb sẽn yaa zãmb dãmbã bãongo. Wala sẽn be Matɩe 23:13-26 pʋgẽ wã, naoor wʋsgo a yeel-b lame: “Gʋlsdbã ne Fariziẽ dãmba, zãmb dãmba, yãmb na paam toogo.”
Sõmblmã, la Wẽnnaam vʋʋsem sõngã biis a taabã
9. Wãn to la sõmblem tɩ loe ne sũ-mar la maan neere?
9 Sõmblem tara loees ne Wẽnnaam vʋʋsem sõngã biis a taab wala ‘sũ-marã’ la ‘maan neerã.’ Woto yĩnga, ned sẽn bɩɩsd sõmblem tara sũ-mar sẽn sɩd wilgd rẽ. A yaa maag-m-meng soaba, baa ne sẽn pa-b nin-sõmsã. Sõmblem tara loees ne maan neere, a sẽn kɩtd tɩ naoor wʋsgo ned tʋmd tʋʋm sẽn nafd neb a taabã yĩnga. Wakat ninga, b mi n lebga gɛrk gom-biig ning sẽn yaa “sõmblem” Biiblã pʋgẽ wã tɩ “maan neere.” Pipi kiris-nebã sẽn tall zʋg-kãngã wã, yɛɛsa wẽn-zɩtbã wʋsg hal tɩ kɩt t’a Tɛrtiliẽ ra boond a Zezi karen-biisã tɩ ‘neb nins sẽn yaa sõmblem dãmbã.’
10. Wãn-wãn la sõmblmã tɩ loe ne nonglem?
10 Sõmblem tara loees ne nonglem. A Zezi yeela a karen-biisã tɩ “yãmb sã n nong taaba, neba fãa na n bãngame tɩ yãmb yaa mam karen-biisi.” (Zã 13:35) Nonglem kãng wɛɛngẽ a Poll yeelame: “Nonglem maanda sũ-mare, la a pida ne neerlem.” (1 Korẽnt dãmba 13:4) Sõmblmã leb n tara loees ne gom-biig ning b sẽn lebg tɩ “nonglem sẽn pa vaandã” sẽn be Gʋlsg Sõamyã pʋgẽ naoor wʋsgã. Yaa sõmblem sẽn tik nonglem sẽn pa vaand zugu. Hebre gom-biig ning b sẽn lebg tɩ “nonglem sẽn pa vaandã” võor pãng yɩɩda nonglem bala. A yaa nonglem f sẽn tar ne bũmbu, hal tɩ bõn-datl ning sẽn kɩt tɩ f nong-a woto wã pidsi. A Zeova nonglem sẽn pa vaandã puka ne manesem buud toor-toore. Wala makre, d yãt-a-la tʋʋm nins a sẽn tʋm n fãag la a kogl a nin-buiidã pʋgẽ.—Yɩɩl Sõamyã 6:5; 40:12; 143:12.
11. Bas-m-yam bʋg la Wẽnnaam nonglem sẽn pa vaandã kõt-do?
11 A Zeova nonglem sẽn pa vaandã kɩtame tɩ nebã rat n pẽneg-a. (Zeremi 31:3) Wẽnnaam sõgen dãmb nins sẽn balemd-a ne kɩs-sɩdã sã n wa rat fãagr wall sõngre, b miime t’a nonglmã pa na n vaal ye. Wẽnnaam sẽn nong-bã yĩnga, a pa na n bas-b ye. Rẽ yĩnga, b tõe n pʋʋsa ne tẽeb wala yɩɩl gʋlsdã sẽn yeelã: “Mam na n della yãmb nonglmã. Mam sũur yaa noog yãmb fãagra yĩnga.” (Yɩɩl Sõamyã 13:6) Sẽn mik tɩ Wẽnnaam nonglmã pa vaandã, a sõgen dãmbã tõe n dell-a-la zãng-zãnga. B tara bas-m-yam kãngã: “Zusoaba ka basd b neba ye, la bãmb ka basd neb nins bãmb sẽn so wã ye.”—Yɩɩl Sõamyã 94:14.
Bõe yĩng tɩ dũniyã yaa wẽng wʋsg woto?
12. Wakat bʋgo, la wãn-wãn la na-toomã sɩng-yã?
12 Sok-kãngã leoorã tara loees ne bũmb ning sẽn maan Edɛn zẽedẽ wã. Ninsaal sẽn sɩng tẽngã zug zĩndg bilf poor bala, malɛk a ye sẽn lebg rat-m-yembr la tɩtaam soab n yik n dat n dɩ naam dũniyã zugu. A wa n baas n lebga “dũni kãngã naaba,” n sɩd yaa na-toaag menga. (Zã 12:31) B wa n bool-a lame t’a Sʋɩtãana, Wẽnnaam la ãdem-biisã kɩɩsd ning sẽn yaa kãsengã. (Zã 8:44; Wilgri 12:9) A rat-m-yembr yamã sẽn yaa lugl a naam n wags ne a Zeova naamã sẽn yaa sõma wã lebga vẽeneg a Hawa naanegã bilf poor bala. Dẽnd naam sẽn yaa yookã sɩnga wakat ning a Ãdem sẽn yãk yam n na n soog a menga, n tõdg Wẽnnaam sor-wilgr n zãgs a sõmblmã fasɩ wã tɛka. (Sɩngre 3:1-6) La a Ãdem ne a Hawa pa sɩd soog b mens ye. Ya a Sʋɩtãan sẽn yaa rat-m-yembr la a wuk-m-meng soabã n lebg b naaba.
13-15. a) A Zeova naam sẽn yaa tɩrgã zãgsg biis kẽer la bʋse? b) Bõe yĩng tɩ dũniyã pid ne toog woto?
13 Bɩ d ges rẽ sẽn wa ne biis ninsã kẽere. B riga a Ãdem ne a Hawa n yiis tẽngã zĩig ning sẽn da yaẽ arzãnã pʋgẽ. B konga Edɛn zẽedã sẽn da yaa neer n tar tɩɩs la biisã, tɩ b vɩɩmã lebg toogo. Wẽnnaam yeela a Ãdem yaa: “Kãab wẽng bee tẽnga zug fo yĩnga, fo sẽn sak f paga noor n dɩ tɩɩg ninga mam sẽn yeel foom tɩ f ra rɩ wã biisa yĩnga. Fo na n namsa f vɩɩm tɛka n dɩ tẽnga bõn-koaadla biisi. Gõos ne mood na n yii tẽnga zug fo yĩnga, la fo na n dɩɩ koodo.” Kãab wẽng bee tẽngã zugã ra rat n yeelame tɩ tẽnga koob na n yɩɩ toog wʋsg masã. Tẽngã b sẽn kãab wẽng tɩ gõos ne mood sɩd yi a zugã namsa a Ãdem yagensa wʋsg hal n kɩt t’a Nowe ba a Lamek gom ‘bãmb tʋʋma ne b nus tʋʋma toodo, Zusoaba sẽn kãab tẽngã wẽngã yĩnga’ yelle.—Sɩngre 3:17-19; 5:29.
14 A Ãdem ne a Hawa teka bãan ning b sẽn da tarã me ne toogo. Wẽnnaam yeela a Hawa: “Mam na n paasa foom toog wʋsg f tʋdb wakate, fo na n doga kamb ne toogo, la fo sɩda na n sooga foom ne f ratma fãa.” Kaoosg zugẽ, a Ãdem ne a Hawa pipi biig a Kayẽ tʋma tʋʋm-beed a sẽn kʋ a yao a Abɛllã.—Sɩngre 3:16; 4:8.
15 Tʋm-tʋmd a Zã yeelame tɩ “dũniyã fãa bee wẽng soaba nugẽ.” (1 Zã 5:19) Wala b naabã, rũndã-rũndã dũniyã neb manesem wilgdame tɩ b tara rat-m-yembr yam la wuk-m-menga. Pa lingr tɩ dũniyã pid ne toom la wẽnem ye! La a pa na n kell n yɩ woto wakat fãa ye. A Zeova na n kɩtame tɩ sõmblem la nimbãan-zoeer ledg toomã la wẽnemã zĩigẽ a Rĩungã naam sasa.
Wẽnnaam Rĩungã naamẽ, sõmblem na n yɩ wʋsgo
16. Bõe yĩng tɩ Wẽnnaam naam ne Kirist Zezi maasmã na n yɩ sõma, la bõe la rẽ kɩt tɩ d segd n maane?
16 A Zeova ne a Rĩungã Rĩm a sẽn yãkã sẽn yaa Kirist Zezi wã baoodame tɩ neb nins zut bãmb sẽn na n dɩ naamã yɩ nin-sõmse. (Miise 6:8) A Zezi Kirist reng n wilga tõnd naam ning a Ba wã sẽn bobl-a wã sẽn na n maan neer to-to. (Hebre dãmba 1:3) D yãta rẽ a Zezi goam nins sẽn wilgd tɩ tũudmã taoor dãmb da kɩtdame tɩ nin-buiidã tʋkd zɩɩb b sẽn pa tõeyã pʋgẽ. A yeelame: “Bɩ y wa mam nengẽ, yãmb fãa sẽn yɛ la sẽn tʋkd zɩɩb sẽn yaa zɩsgo, la mam na kõ yãmb vʋʋsgo. Bɩ y rɩk mam naowã n zãms bũmb nins mam sẽn na n wilg yãmbã. Tɩ bõe, mam yaa sũ-mar soaba la m yaa nin-nana la yãmb na paam vʋʋsgo. Tɩ bõe, mam yɛla yaa naana, la mam zɩɩb yaa faasga.” (Matɩe 11:28-30) Tẽngã zugu, tũudmã taoor dãmb bɩ nanambs a taabã fãa namsda nin-buiidã ne noy ka tɛk la tʋʋm sẽn ka barka. La a Zezi sẽn baood t’a karen-biisã maan bũmb ningã zemsa ne yɛl nins sẽn yaa tɩlae ne-bã la b pãn-tõogã. Hakɩka, a Zezi zɩɩbã sɩd faasame n kõt vʋʋsgo! Rẽ yĩnga woto pa kɩtd tɩ d tʋll n dɩk a togs-n-taar n maan neb a taabã neer sɩda?—Zã 13:15.
17, 18. Bõe yĩng tɩ d tõe n tall bas-m-yam tɩ neb nins sẽn na n dɩ naam ne Kirist saasẽ wã la sẽn na n tʋm-b tẽngã zug a yʋʋr yĩnga na n yɩɩ nin-sõmse?
17 A Zezi wilga a tʋm-tʋmdbã tɩ Wẽnnaam Rĩungã naam yaa toor fasɩ ne ninsaalbã sẽn dɩt b naamã to-to wã. Biiblã yeelame: “Bãmb [karen-biisã] wẽe no-koeemd ne taaba n dat n bãng bãmb ned ninga sẽn tog n yɩ kãsma. A Zezi yeela bãmb yaa: ‘Soolem wʋsg rĩm dãmba soo bãmb neba ne pãnga, la b boonda neb nins sẽn so pãnga tɩ yel-manegdba. Bɩ a ra yɩ woto yãmb sʋk ye. La ned ninga sẽn yaa kãseng n yɩɩd a taaba yãmb sʋka, bɩ a yɩ wa yao-zʋʋga, la ned ninga sẽn yaa zu-soaba bɩ a yɩ wa tʋm-tʋmda.Tɩ bõe, ãnda n yaa kãseng n yɩɩda, ned ninga sẽn zĩ n dɩtẽ wã bɩ, bɩ ned ninga sẽn kɩt rɩɩbã? A ka ned ninga sẽn zĩ n dɩtẽ wa la? La baasgo, mam bee yãmb sʋk wa rɩ-kɩta.’ ”—Luk 22:24-27.
18 Ninsaalba nanambs tʋll n wilgame tɩ b yaa kãsemse, ‘n so bãmb nebã ne pãng’ la b baood naam yʋya, n tẽed tɩ rẽ kɩtdame tɩ bãmb yɩɩg neb nins bãmb sẽn dɩt naam b zutã. La a Zezi wilgame tɩ yɩ ned sẽn yaa kãsenga baoodame tɩ f tʋm hal sõma la wakat fãa neb a taabã sõngr yĩnga. Neb nins fãa sẽn na n tɩ rɩ naam saasẽ ne Kiristã bɩ sẽn na n tʋm-b tẽngã zug a yʋʋr yĩnga segd n maoome n dɩk a Zezi sik-m-mengã la a sõmblmã togs-n-taare.
19, 20. a) Wãn-wãn la a Zezi wilg a Zeova sõmblmã sẽn ta zĩig ningã? b) Wãn-wãn la d tõe n dɩk a Zeova sõmblmã togs-n-taare?
19 Bɩ d ges sagls a taab a Zezi sẽn kõ-d ne nonglem. Sẽn na yɩl n wilg a Zeova sõmblmã sẽn ta zĩig ninga a yeelame: ‘Yãmb sã n nong neb nins sẽn nong yãmba bala, a bee yõod bɩ? Baa yel-wẽna rãmb me nonga neb nins sẽn nong bãmbã. Yãmb sã n maan neb nins sẽn maand yãmb neera bal neere, a bee yõod bɩ? Baa yel-wẽna rãmb me maanda woto. La yãmb sã n peng neb nins sẽn na n paam n lebs yãmba bala, a bee bark bɩ? Baa yel-wẽna rãmb me pengda taab n leb n deegdẽ. Nong-y yãmb bɛɛbã la y maan-b neere, la y penge n da tags tɩ leb n deeg ye. La yãmb keoor na n yɩɩ kãsenga, la yãmb na n yɩɩ Sẽn-ka-to kamba; tɩ bõe, bãmb maanda zɩ-beoog rãmba ne nin-wẽnsa neere. Woto yĩnga, bɩ y yɩ nin-sõama wa yãmb Ba wã me sẽn yaa nin-sõngã.’—Luk 6:32-36.
20 Wẽnnaam sõmblmã pa baood a meng nafr ye. A pa baood keoor ye. A Zeova sõmblmã yĩnga, a “kɩtdame [t’a] wĩntoog zẽk nin-wẽns la nin-tɩrs yĩnga, la [a] tʋmda saaga nin-tɩrs la nin-wẽns yĩnga.” (Matɩe 5:43-45; Tʋʋma 14:16, 17) D sã n dɩk d saasẽ Ba wã togs-n-taare, d pa na n maan sõm-zɩtba wẽng ye, la d na n maan-b-la neere, baa neb nins sẽn da wilg tɩ b yaa d bɛɛbã menga. D sã n tar sõmblem, d wilgda a Zeova ne a Zezi tɩ d rat n vɩɩmda Wẽnnaam Rĩungã naamẽ, wakat ning ãdem-biisã fãa sẽn na n tall sõmblem la zʋg-sõma a taab bãmb ne taab sʋkã.
Bõe yĩng tɩ d segd n wilg sõmblem?
21, 22. Bõe yĩng tɩ d segd n wilg sõmblem?
21 Ne kiris-ned hakɩka, sõmblem wilgr tara yõod hal wʋsgo. Rẽ yaa kaset sẽn wilgd tɩ d tara Wẽnnaam vʋʋsem sõngã. Sẽn paase, d sã n wilgd sõmblem hakɩkã, d rɩkda Wẽnnaam a Zeova ne Kirist Zezi togs-n-taare. Sõmblmã leb n yaa zʋg b sẽn baood tɩ Wẽnnaam Rĩungã neb talle. Woto yĩnga, d segd n nonga sõmblem la d zãms d sẽn tõe n wilg-a to-to.
22 Wãn to la d tõe n wilg sõmblem daar fãa d vɩɩmã pʋgẽ? Sõsg ning sẽn pʋgdã na n goma rẽ yelle.
Wãn to la y na n leokẽ?
• Sõmblem yaa bõe?
• Bõe yĩng tɩ tẽngã pid ne wẽng la tood woto?
• Wãn to la d mi tɩ sõmblmã na n yɩɩ wʋsg Wẽnnaam naamã wakate?
• Bõe yĩng tɩ tar yõod ne neb nins sẽn dat n vɩɩmd Wẽnnaam Rĩungã naam wakatã tɩ b wilg sõmblem?
[Zãmsgã sogsgã]
[Foto, seb-neng a 8]
Kãsem dãmba modgdame n na n yɩ nin-sõms ne bãgrã
[Foto, seb-neng a 9]
A Zeova nonglem sẽn pa vaandã yĩnga, a pa basd a nebã toog wakat ye
[Foto rãmba, seb-neng 10]
Ne sõmblem, a Zeova kɩtdame tɩ wĩntoogã zẽkd neba fãa yĩnga, la a tʋmda saaga neba fãa yĩnga