Bark bee neb nins sẽn pẽgd Wẽnnaamã zutu
Bark bee neb nins sẽn pẽgd Wẽnnaamã zutu
“[Zeova], bu-zẽmsa fãa . . . na n wa wõgemda yãmb taoore n waoog yãmb yʋʋre.”—YƖƖL SÕAMYÃ 86:9.
1. Bõe yĩng tɩ tõnd tõe n pẽg Wẽnnaam tɩ yɩɩg bõn-naands nins sẽn pa vɩyã?
ZEMSAME tɩ bũmb nins fãa a Zeova sẽn naanã pẽg-a. Bõn-naands nins sẽn pa vɩyã pẽgd-a lame tɩ pa tũ ne goam ye, la tõnd sẽn yaa ninsaalbã tõe n tagsame, n wʋm yɛlã võore, n tall mi-beoog ne-a la d balm-a. Rẽnd yaa tõnd la yɩɩl-gʋlsdã gomd ne, a sẽn wa n yeel tɩ: “Dũniyã neba fãa, bɩ y kelem n pẽg Wẽnnaam. Yɩɩl-y bãmb yʋʋra waoogr yĩnga. Kɩt-y tɩ bãmb pẽgr yɩ ne ziiri.”—Yɩɩl Sõamyã 66:1, 2.
2. Ãnd dãmb n sak noor ning sẽn yet tɩ b pẽg Wẽnnaam yʋʋrã, la bõe yĩnga?
2 Nin-saalba wʋsg zãgsdame tɩ b kõn sak Wẽnnaam bɩ n pẽg-a ye. La tẽns 235 pʋsẽ, sẽn yɩɩd a Zeova Kaset rãmb milyõ a yoob n wilgd tɩ b nee Wẽnnaam “zʋg-sõma wã ninsaal nif sẽn pa ne wã” bũmb nins a sẽn naana maasem yĩnga, la b sẽn ‘wʋmd’ a naanegã sẽn kõt kaset mugr-mugrã yĩnga. (Rom dãmba 1:20, NW; Yɩɩl Sõamyã 19:3, 4) B zãms Biiblã me, n bãng a Zeova la b nong-a. Yɩɩl Sõamyã 86:9, 10 reng n togsame: “Zusoaba, bu-zẽmsa fãa yãmb sẽn naana na n wa wõgemda yãmb taoore n waoog yãmb yʋʋre. Tɩ bõe, yãmb yaa kãsenga la yãmb maanda bõn-bãna. Yãmb yaa Wẽnnaam y ye bala.”
3. Wãn to la ‘kʋʋn-kãsengã’ maand ‘Wẽnnaam tʋʋmd wĩntoog ne yʋngo’?
3 Wilgri 7:9, 15 me bilgda balemdb ‘kʋʋn-kãseng’ sẽn “maand [Wẽnnaam] tʋʋmd wĩntoog ne yʋng bãmb dooga pʋgẽ.” Pa rat n yeel tɩ Wẽnnaam sɩd baoodame t’a sõgen dãmbã pẽg-a n pa vʋʋs ye, la a balemdbã bee dũni gill siglg pʋgẽ. Woto, sã n wa yaa yʋng tẽns kẽer pʋsẽ, dũniyã babg a to ket n yaa wĩntoogo, tɩ Wẽnnaam sõgen dãmbã sẽn be be wã ket n kõt kasetã. Woto, d tõe n yeelame tɩ b pẽgda a Zeova wĩndg la yʋngo. Ka la bilfu, “bũmb nins fãa sẽn vʋʋsd ne yõorã” na n zẽka b koees n pẽg a Zeova. (Yɩɩl Sõamyã 150:6) La nananda, bõe la tõnd ned kam fãa tõe n maan n pẽg Wẽnnaam? Zu-loe-bʋs la d tõe n sege? La bark bʋs n gũud neb nins sẽn pẽgd Wẽnnaamã? Sẽn na yɩl n leok sogs-kãensã, bɩ d ges Biiblã kɩbar ning sẽn tɩ loe ne Gaad sẽn yaa Israɛll buud a ye wã.
Pĩnd wẽndẽ zu-loɛɛga
4. Zu-loe-bʋg la Gaad buudã ra segda?
4 Nand tɩ b kẽ Kãabg Tẽngã, Gaad sẽn yaa Israɛll buudã neb kosame tɩ b kõ-b Zʋrdẽ yaangã sẽn yaa rũms wõmeneg zĩigã. (Sõdbo 32:1-5) Beenẽ vɩɩmdgã ra na n waa ne yel-kãsemse. Zʋrdẽ longã ra kogenda buud nins sẽn da be nen-taoorã ne b bɛɛbã. (Zozue 3:13-17) Baasg zãnga, sã n yaa ne Zʋrdẽ yaang tẽnsã, a George Adam Smith yeela woto a sebr a yembr (The Historical Geography of the Holy Land) pʋgẽ: “[Tẽn-kãens] fãa yaa zĩ-lamd sẽn tong taab n be Laarb rãmbã zĩ-kãseng sẽn zãntã zugu. Woto kɩtame tɩ wakat buud fãa, buud nins sẽn pa zĩ zĩ-yendã sẽn kaoogd n wat yʋʋmd fãa n baood wõmeneg zĩigã ra tõe n wa zab ne-ba.”
5. A Zakoob sagla a Gaad yagensã tɩ b maan bõe, bɛɛbã sã n da wa zabd ne-ba?
5 Gaad buudã maana wãn to, b sẽn da wat n zabd ne-b wakat fãa woto wã taoore? Yʋʋm kobs sẽn da reng rẽ, b yaab a Zakoob sẽn da wa n da bẽed a yõor bãagã reng n togsame: “Fãadb wʋsg na n fãa a Gaad, la yẽ na n tõog-b lame n dig-ba.” (Sɩngre 49:19) D sã n ges zugẽ-zugẽ, gom-kãensã tõe n wõnda goam sẽn sãamd sũuri. La sɩd-sɩda, b ra kõta Gaad buudã neb noor tɩ b zabe. A Zakoob kõ-b-la bas-m-yam tɩ b sã n maan woto, bɛɛbã na n lebg n looga ne yãnde, tɩ Gaad nebã tõog n dig-ba.
Zu-loees nins d sẽn segd rũndã-rũndã d balengã pʋgẽ
6, 7. Wãn to la kiris-nebã sẽn be zĩig ning rũndã-rũndã wã wõnd Gaad buudã rẽnda?
6 Wala Gaad buudã, rũndã-rũndã a Sʋɩtãan dũniyã wata ne yɩɩr la zu-loees n kõt kiris-nebã. B pa na n maan yel-solemd n kogl tõnd tɩ zu-loe-kãens ra paam-d ye. (Zoob 1:10-12) Tõnd sʋkã, neb wʋsg segd n maoo ne yɩɩr nins sẽn tɩ loe ne lekollã kẽnde, bao n kõ noorã la kamba wubri. D pa segd n yĩm tõnd mengã yɩɩr ye. Kẽer namsda “yĩng gõaag” sẽn yaa komslmã bɩ bãasã yĩnga. (2 Korẽnt dãmba 12:7-10) Neb a taab namsdame, b sẽn tagsd tɩ b ka yõodã yĩnga. Kʋʋlmã sẽn yaa ‘toog wakatã’ tõe n gɩdga kiris-neb nins sẽn kʋʋlã tɩ b pa tõog n tʋm a Zeova tʋʋmdã wa pĩndã ye.—Koɛɛg Soaba 12:1.
7 Tʋm-tʋmd a Poll tẽegda tõnd me tɩ ‘tõnd zabrã yaa ne malɛg-wẽns buud fãa sẽn be yĩngri.’ (Efɛɛz rãmba 6:12) Wakat fãa, d segd n kɩɩsa “zãmaana rãmb yam,” sẽn yaa tõdgrã la vɩɩm manesem wẽngã a Sʋɩtãan ne a zĩn dãmbã sẽn tusd nebã tɩ b tarẽ wã. (1 Korẽnt dãmba 2:12, Sebr Sõngo; Efɛɛz rãmba 2:2, 3) Wala wẽn-zoɛt a Lote, rũndã-rũndã, d sũy tõe n sãamame, nebã sẽn gomd raglem yɛl bɩ b maand-a wã yĩnga. (2 Pɩɛɛr 2:7) A Sʋɩtãan leb n zabda ne tõndo. A Sʋɩtãan zabda ne kellã sẽn paam vʋʋsem sõng zaeebã n “sakd Wẽnnaam noore la sẽn tar a Zezi kasetã.” (Wilgri 12:17) A Sʋɩtãan zabda ne a Zezi ‘piis a taabã’ me, tɩ zab-kãng pukd ne gɩdgrã la kɩɩsgã.—Zã 10:16.
Y na n basame bɩ y na n ket n maoodame?
8. Tõnd manesem segd n yɩɩ wãn to, a Sʋɩtãan sẽn zabd ne tõndã, la bõe yĩnga?
8 Tõnd manesem segd n yɩɩ wãn to, a Sʋɩtãan sẽn zabd ne tõndã? Wala pĩnd Gaad buudã, d segd n talla tẽeb sẽn yaa kãn-kãe la d zab ne a Sʋɩtãan tɩ zems ne Wẽnnaam noyã. Zu-bʋko, kẽer sɩngame n basdẽ tɩ vɩɩmã yɩɩr tõogd-ba, tɩ b maag ne b tẽebã tʋʋmã. (Matɩe 13:20-22) Kaset soab a yembr wilga bũmb ning sẽn kɩt tɩ yẽ tigingã nebã maag tigissã kẽndã: “Saam-biisã yaame. Yɩɩrã lim-b-la fasɩ.” Sɩda, rũndã-rũndã, yɛl wʋsg n kɩt tɩ nebã be yaams pʋgẽ. Rẽ kɩtame tɩ yaa nana tɩ f ges Wẽnnaam balengã wala bũmb a to sẽn wat ne yɩɩre, wa zɩɩb sẽn zɩs wʋsgo. La woto yaa tagsg sẽn yaa sõma bɩ sẽn zems bɩ?
9. Wãn to la tʋm ne Kirist wat ne yolsgo?
9 Ges-y bũmb ning a Zezi sẽn yeel yẽ wakatẽ neb kʋʋngã vɩɩmã yɩɩr sẽn da limã me: “Bɩ y wa mam nengẽ, yãmb fãa sẽn yɛ la sẽn tʋkd zɩɩb sẽn yaa zɩsgo, la mam na kõ yãmb vʋʋsgo.” A Zezi ra rat n yeelame tɩ yolsgã yaa f sẽn na n boog Wẽnnaam tʋʋmdã bɩ? Ayo, a Zezi yeelame: “Bɩ y rɩk mam nao wã n zãms bũmb nins mam sẽn na n wilg yãmbã. Tɩ bõe, mam yaa sũ-mar soaba la m yaa nin-nana la yãmb na paam vʋʋsgo.” Bõe yĩng tɩ ned na n dat n maan bũmb n paase? Tõnd pa zoe n ‘tar zɩɩb sẽn yaa zɩsg’ sɩda? N-ye, la gɛrk goamã pʋgẽ, b sẽn lebg tɩ “rɩk mam nao wã” rat n yeelame t’a Zezi ra boonda a karen-biisã tɩ b wa tʋm ne yẽnda, t’a tõog n sõng-b n tʋk b zɩɩbã. Tags-y n gese: A Zezi kãabdame t’a na n sõnga tõnd tɩ d tʋk d zɩɩbã! Pa tɩlae tɩ d maan-a ne d meng pãng ye.—Matɩe 9:36; 11:28, 29; 2 Korẽnt dãmba 4:7.
10. D sã n modg n pẽg Wẽnnaam, bõe la d na n paame?
10 Tõnd sã n wa lebg a Zezi karen-biis n na n sɩng n tʋm ne-a, d zabda ne a Sʋɩtãana. Zak 4:7 yetame: “Kɩɩs-y Sʋɩtãanã, la yẽ na zoe n bas yãmba.” Woto pa rat n yeel tɩ Sʋɩtãanã kɩɩsg yaa nana ye. Wẽnnaam daabã maaneg baoodame tɩ d maan modgr wʋsgo. (Luk 13:24) La Biiblã pʋlemda woto Yɩɩl Sõamyã 126:5 pʋgẽ: “Neb nins sẽn bʋt ne nintãma na n tigsa ne sũ-noog yɩɩla.” N-ye, tõnd sẽn balemd Wẽnnaam ningã tara mi-beoogo. A yaa “neb nins sẽn baood bãmba roanda,” la a ningda neb nins sẽn pẽgd-a wã barka.—Hebre dãmba 11:6.
D yɩ Rĩungã moondb sẽn pẽgd Wẽnnaam
11. Wãn to la koe-noogã mooneg kogend tõnd a Sʋɩtãan taoore?
11 A Zezi kõo noor woto: “Bɩ y kẽng n maan neba buud fãa tɩ b yɩ mam karen-biisi.” Pipi, yaa ne moonegã la d kõt Wẽnnaam ‘maand sẽn yaa pẽgre.’ (Matɩe 28:19; Hebre dãmba 13:15) D sẽn ‘wid laafɩ koe-noogã togsgã tɩ yɩ d neooda’ wã yaa tõnd ‘zab-teedã’ bũmb a ye sẽn tar yõodã d sẽn tar n kogend d mens ne a Sʋɩtãanã. (Efɛɛz rãmba 6:11-15) Pẽg Wẽnnaam koe-noogã mooneg pʋgẽ yaa bũmb sẽn kengd d tẽebã. (2 Korẽnt dãmba 4:13) A sõngda tõnd tɩ d zãag ne tagsa sẽn pa zemse. (Filip rãmba 4:8) Koe-noogã mooneg sõngda tõnd tɩ d maan tũud-n-taar ne sẽn balemd-b Wẽnnaam wa tõndã.
12, 13. Wãn to la koɛɛga mooneg wakat fãa tõe n naf zagsã? Rɩk-y makre.
12 Koe-moonegã leb n tõe n yɩɩ tʋʋmd sẽn yaa sõma ne zakã. Yaa sɩd tɩ kom-bɩɩsã rata reem sẽn zemse. La sẽk ning zakã sẽn dɩkd n kẽes koe-moonegã pʋgẽ wã pa segd n yɩ yam-yiisg bũmb ye. Roagdbã tõe n kɩtame t’a tall yamleoog n yɩɩda, b sã n zãms b kambã tɩ b bãng n gom ne nebã koe-moonegã wakate. Kambã nonga bũmb nins b sẽn maand sõma wã n yɩɩda. Roagdbã sã n yaa maan-tɩ-zems rãmb n pa kot kambã tɩ b maan sẽn yɩɩd b pãnga, b tõe n sõng-b lame tɩ b paam sũ-noog koe-moonegã pʋgẽ.—Sɩngre 33:13, 14.
13 Sẽn paase, zak neb sẽn naagd taab n pẽgd Wẽnnaam paamda zems-n-taar sõma-sõma. D rɩk makr ne saam-bi-poak a yembr sɩd sẽn pa tẽed sẽn bas-a ne kamb a nu. Yɩɩ tɩlae ne-a t’a nams n bao nug tʋʋmd n tʋm n ges a kambã yelle. Yɛlã ra lim-a lame hal t’a bas a kambã tẽeb yell gesg bɩ? A yeelame: “Mam zãmsa Biiblã la sɛb nins sẽn tik Biiblã zugã neere, la m modg n tũ m sẽn da karemdã. M da tallda kambã n kẽngd tigissã la zak-zak koe-moonegã wakat fãa. Mam modgrã biis yɩɩ wãn to? Kamb a nu wã fãa reega lisgu.” Yãmb me sã n kẽes y toog koe-moonegã pʋgẽ wʋsgo, tõe n sõng-y lame tɩ y wub y kambã “ne Zusoaba saglg la a zãmsgo.”—Efɛɛz rãmba 6:4.
14. a) Wãn to la kom-bɩɩsã tõe n pẽg Wẽnnaam lekollẽ wã? b) Bõe n tõe n sõng kom-bɩɩsã tɩ b ra ‘zoe yãnd ne koe-noogã’?
14 Kom-bɩɩse, laloa wã sã n pa gɩdgd kasetã kũun zĩis kẽer yãmb tẽngẽ wã, rẽ yĩnga, y pẽgda Wẽnnaam n kõt kasetã lekollẽ wã, bɩ y basdame tɩ ninsaal zoees gɩdg-y-yã? (Yelbũna 29:25) Yʋʋm 13 bi-bɩɩg sẽn yaa Kaset soab Porto-Riko gʋlsame: “M zɩ n zoe yãnd n pa moon lekollẽ wã ye, bala m da miime tɩ yaa sɩda. Karen-doogẽ wã, m zẽkda m nug wakat fãa n na n togs m sẽn zãms bũmb ning Biiblã pʋgẽ wã. M sã n pa tar kareng sasa, m kẽngda lekollã sɛb roogẽ n tɩ karemd Les jeunes s’interrogent sebrã.” * A Zeova ninga a modgrã bark bɩ? A yeelame: “Wakat ninga, mam karen-bi-taasã sokda maam bũmbu, la b kot sebr ning mam sẽn karemdã menga.” Yãmb sã n da pa maand woto, tõe tɩ y segd n maana y meng zãmsgã neere, n ‘bãng Wẽnnaam daab sẽn yaa sõama la sẽn tat a yam, la sẽn zems zãnga.’ (Rom dãmba 12:2) Yãmb sã n kɩs sɩd tɩ y sẽn zãmsã yaa sɩda, y pa na n tol n ‘zoe yãnd ne koe-noogã ye.’—Rom dãmba 1:16.
‘Kʋɩlen-kãseng’ paka tʋʋmdã yĩnga
15, 16. ‘Kʋɩlen-kãseng bʋg n pak’ tɩ kiris-neb kẽer tõe n tʋm n paase, la bark bʋs la rẽ wa ne?
15 Tʋm-tʋmd a Poll gʋlsame tɩ ‘kʋɩlen-kãseng paka mam taoore tɩ m maan tʋʋmde.’ (1 Korẽnt dãmba 16:9) Yãmb vɩɩmã yɛl kõt-y-la sor tɩ y tʋm n paas bɩ? Wala makre, y sã n dɩk wakat fãa bɩ sõngr so-pakrã tʋʋmde, yaa lɛɛr dãmb 70 bɩ 50 la y segd n dɩk kiuug fãa n moon koe-noogã. Kiris-neb a taabã nanda so-pakdbã, b sẽn tʋmd Wẽnnaam tʋʋmdã ne kɩs-sɩdã yĩnga. La b sẽn dɩkd sẽk koe-moonegã pʋgẽ n yɩɩdã pa kɩtd tɩ b tags tɩ b yɩɩda b saam-biisã la b saam-bi-pogsã ye. La b tara tagsg ning a Zezi sẽn sagl tɩ d tallã: “Tõnd yaa tʋm-tʋmdb sẽn ka yõodo. Tõnd maana tʋʋmd ninga d sẽn tog n maana bala.”—Luk 17:10.
16 So-pakrã tʋʋmd baoodame tɩ f kibl f menga, tɩ f sigl f meng la f sak n mong f meng yɛl kẽere. La bark nins rẽ sẽn wat ne wã seka f na modg woto. Bi-bɩɩg yʋʋr sẽn boond t’a Tamika sẽn yaa so-pakdã yeelame: “M sẽn tõe n tʋm sõma ne Wẽnnaam Gomdã sẽn yaa sɩdã yaa bark menga. F sã n yaa so-pakda, f tʋmda ne Biiblã wʋsgo. Masã, m sẽn moond zak-zakã, m tõe n tẽega verse rãmb sẽn zems ne zak ned fãa yelle.” (2 Tɩmote 2:15) Ad so-pakd yʋʋr sẽn boond t’a Mica sẽn yeele: “Mam sẽn ne sɩdã sẽn toeemd nebã vɩɩmã yaa bark kãseng a to.” Bi-bɩɩg yʋʋr sẽn boond t’a Matɩe me wilga sũ-noog ning a sẽn tare. A yeelame tɩ yẽ “sã n wa yã ned sẽn wa sɩda pʋgẽ, sũ-noog a to ka be n tõe n ledg kada ye.”
17. Wãn to la kiris-nin-poak bas tagsa sẽn pa zems so-pakrã tʋʋmd wɛɛngẽ?
17 Y tagsame n ges y sã n tõe n yɩɩ so-pakd bɩ? Tõe tɩ y rat n maana woto, la y tẽedame tɩ y pa tõe ye. Saam-bi-poak sẽn yaa bi-bɩɩg yʋʋr sẽn boond t’a Kenyatte sak n deegame: “Mam da tara tagsg sẽn pa zems so-pakrã tʋʋmd wɛɛngẽ. M da pa tẽed tɩ m tõeeme ye. M da pa mi m sẽn na n segl sɩngr-goam to-to bɩ m sẽn na n tik Gʋlsg Sõamyã zug to-to n kɩt tɩ nebã tags ye.” La kãsem dãmbã yãka saam-bi-poak sẽn yaa so-pakd sẽn bɩ t’a tʋm ne yẽnda. A Kenyatte tẽra woto: “M sẽn da tʋmd ne-a wã ra bee yamleoog wʋsgo. Kɩtame tɩ m dat n yɩ so-pakda.” Ne pẽgrã la wilgrã y sẽn paamdã, tõe tɩ yãmb me wa tʋlg n yɩ so-pakda.
18. Bark bʋs la neb nins sẽn lebgd misioneer dãmbã tõe n paame?
18 So-pakrã tʋʋmd tõe n paka sor tɩ y paam zu-nood a taab Wẽnnaam tʋʋmdã pʋgẽ. Wala makre, sẽn kẽ-b kãadmã kẽer tõe n paama zʋgd nins b sẽn baood sẽn na yɩl n paam misioneeremdã zãmsgã tɩ b tʋm-b tẽn-zẽng tɩ b tɩ moone. Misioneer dãmbã segd n minima tẽn-paalga, tõe tɩ b segd n zãmsa buud-gom-paalga, n minim tẽngã nebã vɩɩm la b rɩɩbo. La bark nins b sẽn paamdã kɩtdame tɩ b yĩm a yel-toodã. A Mildred sẽn yaa misioneer poak sẽn tar minim n be Megsikã yeelame: “M zɩ n maan m bãngẽ, m sẽn lebg misioneerã ye. Yaa bũmb m sẽn tʋlg m sẽn da wa n yaa kɩdga.” Bark bʋs la a paam-yã? A yeelame: “Mam ba-yirã, Biibl zãmsg paoong ra yaa toogo. La ka mam da paama Biibl zãms rãmb a naas sẽn naag taab n sɩng koe-noogã moonego.”
19, 20. Wãn to la Betɛllã tʋʋmde, tẽn-zẽms tʋʋmdã, la Wẽnnaam tʋʋmdã zãmsg lekoll kõ neb wʋsg barka?
19 Bark wʋsg me la neb nins sẽn tʋmd Betɛllẽ wã sẽn ya a Zeova Kaset rãmbã tʋʋm-wilã paamda. Alemayn bi-bɩɩg a yen yʋʋr sẽn boond t’a Sven yeela woto a Betɛllẽ wã tʋʋmd wɛɛngẽ: “M neeme tɩ m maanda tʋʋmd yõod sẽn kaoosde. M da tõe n dɩka m tõodã n tʋm dũniyã pʋgẽ. La rẽ ra na n yɩɩ wa f sẽn bĩng ligd bãnk sẽn be a lʋɩɩs zug pʋgẽ.” Yaa sɩda, tʋm n pa rɩk kiuug ligd baoodame tɩ f mong f meng ne bũmb kẽere. La a Sven yeelame: “F sã n wa kuli, f miime tɩ bũmb ning fãa f sẽn maan daarã pʋgẽ wã yɩɩ a Zeova yĩnga. La woto kõt-f-la sũ-noog sẽn yaa kãsenga.”
20 Saam-biis kẽer paama zu-noog n tʋm tʋʋm-wilã meebẽ tẽn-zẽmsẽ. Saam-biig a ye ne a pag sẽn tʋm tẽns a nii pʋsẽ gʋlsame: “Saam-biisã yaa sõma wʋsgo. Tõnd sã n looge, na n yɩɩ sũ-sãoong wʋsgo. Naoor a nii wã tõnd sẽn toeem tẽngã yɩɩ ‘sũ-sãang’ wʋsgo. Ad tõnd sẽn vɩɩmd bũmb ningã sɩd yɩɩ sõma wʋsgo!” Sẽn paase, yaa Wẽnnaam tʋʋmdã zãmsg lekolle. A kõta saam-biis nins sẽn yaa rakõap sẽn pidsd yɛl nins b sẽn baooda zãmsgo. Ad bãmb ned a ye sẽn paam a dipolom sẽn gʋlse: “M pa tar noor n pʋʋsd yãmb bark ne lekoll kãngã sẽn yaa sõma wʋsgã ye. Siglg a to bʋg n na n modg woto n zãms neba?”
21. Bõe la kiris-nebã fãa segd n maan Wẽnnaam tʋʋmdã pʋgẽ?
21 N-ye, kʋɩlens wʋsg n pags tʋʋma yĩnga. Yaa sɩda, tõnd wʋsg pa tõe n tʋm Betɛllẽ bɩ tẽn-zẽng ye. A Zezi mengã sak n deegame tɩ kiris-nebã ‘biis’ womb ra na n yɩɩ toor-toore, b yɛlã sẽn pa taabã yĩnga. (Matɩe 13:23) Tõnd sẽn yaa kiris-nebã, d segd n maana d sẽn tõe tɛka, n kẽes d meng a Zeova tʋʋmdã pʋgẽ sõma tɩ zems ne tõnd yɛlã sẽn kõt-d sor to-to. D sã n maan woto, d pẽgda a Zeova, la d tõe n kɩsa sɩd t’a sũur yaa noogo. Ges-y a Ethel sẽn yaa saam-bi-poak sẽn kʋʋl n be sẽn kʋʋl-b roogẽ wã makre. A kõta neb a taabã sẽn be ne yẽ be wã kasetã wakat fãa, la a kõt kasetã ne telefõnne. Baa ne a sẽn kʋʋlã, a moonda koɛɛgã ne a sũur fãa.—Matɩe 22:37.
22. a) Manesem sãnda d sẽn tõe n tũnug ne n pẽg Wẽnnaam la bʋse? b) Wakat bʋg sẽn be yamleoog n gũud tõndo?
22 La tẽeg-y tɩ moonegã yaa manesem a ye bal d sẽn tũnugd ne n pẽgd a Zeova. D sã n kõt mak-sõng d yel-manesmã la d mengã manegr pʋgẽ d tʋʋmã zĩigẽ, lekollẽ wã la yirã, d noogda a Zeova sũuri. (Yelbũna 27:11) Yelbũna 28:20 kãabda woto: “Sɩd soab paamda bark wʋsgo.” Woto yĩnga, d segd n ‘bʋda wʋsg’ Wẽnnaam tʋʋmdã pʋgẽ, n miẽ tɩ d na n paama bark wʋsgo. (2 Korẽnt dãmba 9:6) D sã n maan woto, d na n paama zu-noog n vɩɩmd n yã sasa ning “bũmb nins fãa sẽn vʋʋsd ne yõorã” sẽn na n pẽg a Zeova sẽn zems ne pẽgr wʋsgã!—Yɩɩl Sõamyã 150:6.
[Tẽngr note]
^ sull 14 A Zeova Kaset rãmbã n yiis Les jeunes s’interrogent — Réponses pratiques sebrã.
Y tẽrame bɩ?
• Wãn to la Wẽnnaam a Zeova nin-buiidã maand a raabã ‘wĩntoog la yʋngo’?
• Zu-loe-bʋg la Gaad buudã seg-yã, la bõe la rẽ zãmsd kiris-nebã rũndã-rũndã?
• Wãn to la koe-noogã mooneg kogend tõnd a Sʋɩtãan taoore?
• ‘Kʋɩlen-bʋg n pak’ tʋʋm yĩng n kõ neb kẽere, la bark bʋs la rẽ wa ne?
[Zãmsgã sogsgã]
[Foto rãmba, seb-neng 31]
So-pakrã tõe n paka kʋɩlens tɩ f paam tʋʋmd zu-nood a taab wala:
1. Tẽn-zẽmsẽ tʋʋmdã
2. Betɛllẽ tʋʋmdã
3. Misioneer tʋʋmdã