Sẽn kʋʋl-bã tara yõod kiris-neb tigingã pʋgẽ

“Neb nins sẽn be Zusoaba zak pʋgẽ wã . . . na n bɩɩme. Bãmb na n kell n woma biis b kʋʋlem wakate.”—YƖƖL SÕAMYÃ 92:14, 15.

1. Bõe la neb wʋsg tagsd sẽn kʋʋl-bã zugu?

A ZEOVA nonga a sõgen-sakdbã fãa, sẽn kʋʋl-bã bee bãmb sʋkã. La sã n yaa ne vaeesg b sẽn maan Etazĩni tẽngã pʋgẽ, yʋʋmd fãa, sẽn kolg neb milyõ pʋɩ-sʋk sẽn kʋʋl la b namsd bɩ b pa nand ye. Kɩbay sẽn wõnd woto sẽn yit dũniyã gill zug wilgdame tɩ nebã sẽn namsd sẽn kʋʋl-bã yaa yel-pakr dũniyã gill zugu. Siglg a yembr yeelame tɩ sẽn kɩt tɩ yaa woto wã yaa “neb wʋsg sẽn nong n tagsdẽ . . . tɩ sẽn kʋʋl-bã pa ye tar yõodo, tɩ b ye pa tõe n tʋme, la tɩ b teega neb a taabã wʋsgã yĩnga.”

2. a) Wãn to la a Zeova get a sõgen dãmb nins sẽn kʋʋlã? b) Bilg-bʋg sẽn kengd sũur la d ne Yɩɩl Sõamyã 92:13-16 pʋgẽ?

² Wẽnnaam a Zeova nanda a sõgen dãmb hakɩk nins sẽn kʋʋlã. A geta “tõnd sẽn ya a soab d sũurẽ wã,” bɩ tõnd tẽebã sẽn yaa to-to wã, lakae pa tõnd yĩngã pãn-tõod sẽn tar koakã ye. (2 Korẽnt dãmba 4:16, NW ) A Gomdã sẽn yaa Biiblã pʋgẽ, b kõta tõnd bas-m-yam woto: “Nin-tɩrs yita wa koanga [tamarʋ tɩɩga], b bɩta wa Libã soolem sɛɛdr tɩɩga. Neb nins sẽn be Zusoaba zak pʋgẽ wã, neb nins sẽn sel tõnd Wẽnnaam samana pʋsẽ wã na n bɩɩme. Bãmb na n kell n woma biis b kʋʋlem wakate n yɩ maasa la sõama, tɩ wilg [t’a Zeova] yaa tɩrga.” (Yɩɩl Sõamyã 92:13-16) Yãmb sẽn yaa kiris-neb sẽn kʋʋlã sã n tags verse kãensã zutu, y na n bãnga sõngr sẽn tar yõod ning y sẽn tõe n kõ saam-biisã.

“Bãmb na n kell n woma biis b kʋʋlem wakate”

3. a) Bõe yĩng tɩ b rɩk nin-tɩrsã n mak ne koms bɩ tamarʋ tɩɩse? b) Wãn to la sẽn kʋʋl-bã tõe n ‘wom biis b kʋʋlem wakate’?

³ Yɩɩl-gʋlsdã rɩka nin-tɩrsã n mak ne koang b “sẽn sel tõnd Wẽnnaam samana pʋsẽ.” Bãmb “na n kell n woma biis b kʋʋlem wakate.” Woto pa goam sẽn kengd raood sɩda? Koms sẽn be rasãnd sẽn tão tɩrsã ra yaa bũmb sẽn wɛ yaang nebã zagsẽ Biiblã gʋlsg wakate. B sẽn da be rasãndã toor sẽn ka be, b ra nonga tamarʋ tɩɩsã b sẽn da womd biis wʋsgo, tɩ kẽer tõe n maan yʋʋm koabg n ket n womd biisã yĩnga. * Y sã n kell n vigl kãn-kãe sɩd balengã pʋgẽ, yãmb me tõeeme n kell n “wom biis ne tʋʋm sõama buud fãa.”—Kolos rãmba 1:10.

4, 5. a) Bi-bʋs sẽn tar yõod la kiris-nebã segd n wome? b) Wilg-y neb sẽn kʋʋl sẽn wom biis “ne noor goama,” Gʋlsg Sõamyã sẽn gomd b yelle.

⁴ A Zeova gũudame tɩ kiris-nebã wom biis  “ne noor goama,” sẽn yaa goam nins sẽn pẽgd yẽ ne a raabã. (Hebre dãmba 13:15) Gom-kãensã pidsda yãmb sẽn kʋʋlã zut bɩ? N-yẽe.

⁵ Biiblã pʋgẽ, b gomda neb sẽn kʋʋl sẽn kõ kasetã a Zeova ne a raabã wɛɛngẽ n pa zoe rabeem yelle. A Moiiz ra zoe n looga “yʋʋm pis-yopoe” a Zeova sẽn da wa n yãk-a t’a yɩ a no-rɛɛs n gom a yʋʋr yĩngã. (Yɩɩl Sõamyã 90:10; Yikri 4:10-17) No-rɛɛs a Daniɛll yʋʋmã sẽn da vẽsgã pa gɩdg-a t’a kõ kaset ne raood a Zeova naam sẽn ka to wã wɛɛngẽ ye. A Daniɛll da segd n wẽe yʋʋm 90 a Bɛlsazaar sẽn da wa n yeel-a t’a wilg nugã sẽn puk n gʋls lalgã zugã võorã sasa. (Daniɛll sak a 5) La yaa wãn to ne tʋm-tʋmd a Zã sẽn kʋʋlã? Wẽnnaamã tʋʋmd a sẽn tʋm tɩ kaoosã saab sẽnese, b ning-a-la bãens roog Patmos sẽn yaa ko-sʋk tẽngã pʋgẽ, “Wẽnnaam goama la a Zezi kaseta yĩnga.” (Wilgri 1:9) Tõe tɩ y tẽra neb wʋsg Biiblã sẽn gom b yell sẽn wom biis “ne noor goama,” b kʋʋlem wakat yelle.—1 Sãmwɛll 8:1, 10; 12:2; 1 Rĩm dãmba 14:4, 5; Luk 1:7, 67-79; 2:22-32.

6. Wãn to la a Zeova tũnug ne “nin-kẽemb” n togs bãngr-goam yaoolem day kãensã?

⁶ Tʋm-tʋmd a Pɩɛɛr lebs n togsa Hebre no-rɛɛs a Zoɛll goama woto: “Wẽnnaam yeelame: yaoolem wakat sã n ta mam na n pʋdga m Sɩɩg Sõng ninsaalba buud fãa [“ne nin-kẽemb”] zutu. . . . Tɩ b togs bãngr-goama.” (Tʋʋma 2:17, 18; Zoɛll 3:1) Rẽ n so tɩ yaoolem day kãensã, a Zeova tũnug ne sẽn zae-bã sull neb sẽn kʋʋlã, la ‘piis a taabã’ neb sẽn kʋʋlã n moon a raabã. (Zã 10:16) Bãmb kẽer womda Rĩungã biis sẽn na maan yʋʋm pi-gĩna.

7. Wilg-y sẽn kʋʋl-bã sẽn ket n womd Rĩungã biis to-to, baa ne b pãngã sẽn boogã.

⁷ Ges-y a Sonia sẽn lebg Rĩungã wakat fãa koe-moond yʋʋmd 1941. Baa ne a sẽn da maood ne bã-kʋdgã, wakat fãa a maana Biibl zãms rãmb a yirã. Ad a Sonia sẽn yeele: “Koe-noogã mooneg bee mam vɩɩmã pʋgẽ. Sɩd-sɩda yaa mam vɩɩmã la woto. M pa rat n bas mooneg ye.” Sẽn pa kaoose, a Sonia ne a kẽem poak a Olive sega a Janet sẽn da bẽed a yõor bãagã logtor yir n taas-a Biiblã saagr koɛɛga. A Janet ma wã sẽn da yaa katolik piig la a yiibã sũur yɩɩ noog wʋsg ne nonglem ning b sẽn tall ne a bipuglã hal t’a sak Biibl zãmsgo, la masã a kẽngda taoor sõma a zãmsga pʋgẽ. Yãmb me tõe n tũnuga ne soay a woto n wom Rĩungã biis bɩ?

8. Wãn to la nin-kẽem a Kalɛɛb wilg a bas-yard ne a Zeova, la wãn to la kiris-neb nins sẽn kʋʋlã tõe n dɩk a togs-n-taare?

⁸ Kiris-neb nins sẽn kʋʋlã sã n ket n nangd pãng Rĩungã mooneg tʋʋmd pʋgẽ baa ne kʋʋlmã sẽn wat ne gɩdgr ninsã, b tũuda Israɛll ned a Kalɛɛb sẽn yɩ wẽn-sakdã sẽn yãag a Moiiz rasempʋɩɩgã pʋgẽ yʋʋm pis-naas pʋgẽ wã makre. A Kalɛɛb sẽn da wa n pasgd Zʋrdẽ Kʋɩlgã n na n kẽ Kãabg Tẽngã t’a ra tara yʋʋm 79. A sẽn lagem Israɛll tãb-biisã n zab n tõog b bɛɛbã yʋʋm a yoob poore, a ra tõe n yeelame t’a yaa n modgame tɩ seke, n segd n vʋʋs masã. La a pa maan woto ye, a kosa tʋʋm toog ning sẽn yaa zab n deeg ‘tẽns sẽn yaa bɛd n tar pãnga,’ sẽn be Zida tãensã zutã, zĩig ning Anakim dãmbã sẽn yaa nin-wobdã sẽn da be wã. Ne a Zeova sõngre, a Kalɛɛb sɩd ‘rig-b-la wa a Zeova sẽn da yeelã.’ (Zozue 14:9-14; 15:13, 14) Kɩs-y sɩd tɩ y sã n ket n womd Rĩungã biis y kʋʋlem wakate, a Zeova bee ne yãmb wa a sẽn da be ne a Kalɛɛbã. La y sã n  kell n yɩ wẽn-sakda, a na n kõ-y-la zĩig a dũni paalgã pʋgẽ.—Ezai 40:29-31; 2 Pɩɛɛr 3:13.

‘Bãmb na n kell n yɩɩ maasa, la sõma’

9, 10. Wãn to la kiris-neb nins sẽn kʋʋlã tõe n kell n tall tẽeb sẽn yaa kãn-kãe? (Ges-y zĩ-gũbrã sẽn be seb-neng 11 pʋgẽ wã.)

⁹ Yɩɩl-gʋlsdã bilga a Zeova sõgen dãmb nins sẽn kʋʋl n womd biisã woto: “Nin-tɩrs yita wa koanga, b bɩta wa Libã soolem sɛɛdr tɩɩga. Bãmb na n kell n woma biis b kʋʋlem wakate n yɩ maasa la sõama.”—Yɩɩl Sõamyã 92:13, 15.

¹⁰ Wãn to la y tõe n kell n tall y tẽebã kãn-kãe, baa ne y yʋʋmã sẽn vẽsgã? Bũmb ning sẽn kɩt tɩ koang be rasãnd wakat fãa wã ya a sẽn paamd koom wakat fãa wã. Sɩd ning sẽn be Biiblã pʋgẽ b sẽn mak ne koomã tõe n teela yãmb me, y sã n zãms Wẽnnaam Gomdã la y naag a siglgã neba. (Yɩɩl Sõamyã 1:1-3; Zeremi 17:7, 8) Yãmb tẽebã sẽn yaa kãn-kãe wã kɩtame tɩ y tar yõod wʋsg ne y tẽed-n-taasã. Ges-y rẽ sẽn yɩ to-to ne maan-kʋʋd kãsem a Zehoyada sẽn kʋʋlã.

11, 12. a) Tʋʋm-kãseng bʋg la a Zehoyada tall Zida rĩungã yɛl pʋsẽ? b) Wãn to la a Zehoyada tũnug ne tõog ning a sẽn da tarã n sõng tɩ sɩd balengã kẽng taoore?

¹¹ A Zehoyada ra segd n yɩɩda yʋʋm koabga, rĩm poak a Atali sẽn yaa rat-taoor soabã sẽn wa n soog Zida n kʋ a meng yagensã sasa. Bõe la nin-kẽem a Zehoyada ra tõe n maan yellã taoore? Yʋʋm a yoob pʋgẽ, yẽ ne a pagã solga a Zoas sẽn yaa rĩma bi-yend tãa b sẽn pa paam n kʋ wã wẽnd-doogẽ wã. Rẽ poore, a Zehoyada mooname t’a Zoas sẽn tar yʋʋm a yopoe wã yaa rĩma, tɩ rẽ ling neba wʋsgo, la a kɩt tɩ b kʋ a Atali.—2 Kɩbaya 22:10-12; 23:1-3, 15, 21.

¹² A Zehoyada sẽn yaa rĩmã gũudã tũnuga ne tõog ning a sẽn da tarã n sõng tɩ sɩd balengã kẽng taoore. A “kɩtame tɩ rĩma ne a neba wẽen tɩ b na n tũu Zusoabã.” A Zehoyada sẽn kõ noor poore, nin-buiidã wãa ziri wẽnnaam a Baal doogã, a tẽn-kugã, a bõn-naandsã, la b kʋ a maan-kʋʋdã. Ra ya a Zehoyada me n wilg a Zoas sor t’a lebs n lugl wẽnd-doogã tʋʋma, la a maneg wẽnd-doogã wʋsgo. “A Zoas maana sẽn ta Zusoaba yam [a Zehoyada] yõor tɛka. Maan-kʋʋd a Zehoyada ra zãms-a-la Wẽnnaam yɛla.” (2 Kɩbaya 23:11, 16-19; 24:11-14; 2 Rĩm dãmba 12:3) A Zehoyada sẽn wa n ki a yʋʋm 130 zugẽ wã, a paama waoogr sẽn pa wõnd a taaba, b sẽn mum-a ne rĩm dãmbã yĩnga, “tɩ bõe, yẽ maana Israɛll neere n tʋm Wẽnnaam ne [a] rooga tʋʋmde.”—2 Kɩbaya 24:15, 16.

13. Wãn to la kiris-neb nins sẽn kʋʋlã tõe n maan ‘neer n tʋm Wẽnnaam ne a roogã tʋʋmde’?

¹³ Tõe tɩ yĩns ka laafɩ bɩ yɛl a taab kɩtame tɩ y pa tõe n maan bũmb wʋsg n kɩt tɩ sɩd balengã kẽng taoor ye. Baa sã n yaa woto, y tõe n maana “neere n tʋm Wẽnnaam ne [a] rooga tʋʋmde.” Y tõe n wilga yẽesem ne a Zeova tẽeb roogã n kẽnd tigingã tigissẽ, n kẽesd y meng b pʋsẽ la y moond koe-noogã wa y sẽn tõe tɛka. Yãmb sẽn sakd Biiblã sagls la y teend ‘tʋm-tʋmd sẽn tũud sɩd la sẽn tar yamã’ la tigingã na n kɩtame tɩ kiris-neb saam-biirã pãng paase. (Matɩe 24:45-47) Y leb n tõe n kɩtame tɩ sẽn balemd-b Wẽnnaam ne yãmbã “maan nonglem la tʋʋm sõama.” (Hebre dãmba 10:24, 25; Filemo 8, 9) La y na n yɩɩ bark n kõ neb a taabã, y sã n tũ tʋm-tʋmd a Poll sagl-kãngã: “Zãms nin-kẽembã tɩ b  yɩ yõk-m-mens rãmba, la b yɩ neb sẽn tar waoogre, la b yɩ mi-m-mens rãmba, la b yɩ sõama tẽeba pʋga la nonglem pʋga, la b yɩ sũ-maasem dãmba. Wilg pʋg-yãansã me tɩ b tog n paama yel-manesem sẽn yaa sõama, tɩ b ka tog n yɩ nin-sãbsdba, wall rã-yũudb ye. Bãmb tog n kõo sagl sõamyã.”—Tɩt 2:2-4, Kãab-paalga Koe-noogo.

14. Bõe la kiris-neb nins sẽn yaa yel-gɛtb hal sẽn kaoosã tõe n maan n sõng tɩ sɩd balengã kẽng taoore?

¹⁴ Yãmb yaa tiging kãsem soab sẽn na maan yʋʋm wʋsg bɩ? Ad ned sẽn yaa tiging kãsem soab hal sẽn kaoos sẽn sagende: “Rɩk-y yam ning y sẽn paam yʋʋm-kãensã fãa pʋsẽ wã n wilg neb a taab me. Rɩk-y zɩɩb kẽer n bobl neb a taaba, la y sõng neb nins sẽn datã tɩ b rɩ yãmb minimã nafa . . . Ges-y neb a taabã sẽn tõe n wa maan bũmb ninsã. Sõng-y-b tɩ b bɩɩs b tõodã n paase. Segl-y beoog-daar yĩnga.” (Tõodo 3:27, 28) Yãmb sẽn sɩd rat tɩ Rĩungã koe-noog tʋʋmd kell n kẽng taoorã na n waa ne bark wʋsg n kõ d kiris-nin-taasã.

‘Wilg-y t’a Zeova yaa tɩrga’

15. Wãn to la kiris-neb nins sẽn kʋʋlã yet ‘t’a Zeova yaa tɩrga’?

¹⁵ Wẽnnaam sõgen dãmb nins sẽn kʋʋlã pidsda b tʋʋmdã ne sũ-noogo, sẽn yaa b togs ‘t’a Zeova yaa tɩrgã.’ Yãmb sã n yaa kiris-ned sẽn kʋʋle, y goamã la y tʋʋmã tõe n wilga neb a taabã t’a ‘Zeova yaa yãmb pĩig kugri, la wẽng ka be ne-a ye.’ (Yɩɩl Sõamyã 92:16) Koang kõta kaset mugr-mugr tɩ Naandã tara zʋg-sõma sẽn ka mak-n-taare. La a Zeova kõo yãmb zu-noog tɩ y tõe n kõ neb nins sẽn sak sɩdã paalmã kaset a zugu. (Tõodo 32:7; Yɩɩl Sõamyã 71:17, 18; Zoɛll 1:2, 3) Bõe yĩng tɩ rẽ maaneg tar yõodo?

16. Biiblã mak-bʋg n wilgd tɩ tara yõod tɩ d ‘togs t’a Zeova yaa tɩrga’?

¹⁶ Israɛll taoor lʋɩt a Zozue sẽn da wa n ‘lebg nin-kẽem kʋdr n kʋʋl wʋsgo,’ a “boola Israɛll neba fãa, b nin-kẽemba ne b nanambsã la b bʋ-kaoodba ne b kãsem dãmbã,” n tẽeg-b tɩ Wẽnnaam yel-manesmã ne nebã yaa tɩrse, n yeel yaa: “Zusoab a Wẽnnaam sẽn da yeel tɩ b na n maana bũmb nins fãa n kõ yãmbã, b  maaname n ka tol n bas ba a ye tɩ vaal ye. Bãmb maana fãa, ba a ye ka pa ye.” (Zozue 23:1, 2, 14) Wakat n zĩnd tɩ gom-kãensã keng nin-buiidã sẽn da rɩk sard n na n yɩ wẽn-sakdbã raoodo. La a Zozue kũumã poore, “zamaan a to n wa t’a neba ka mi Zusoaba la b ka mi tʋʋm nins bãmb sẽn da maan n kõ Israɛll neba me ye. Israɛll neba beega Zusoabã n waoog Baall dãmba.”—Bʋkaoodba 2:8-11.

17. A Zeova talla manesem bʋg ne a nin-buiidã rũndã-rũndã?

¹⁷ Rũndã-rũndã, pa Wẽnnaam sõgen dãmb nins sẽn kʋʋlã noor kaset yĩng n kɩtd tɩ kiris-neb tigingã tar burkĩnd Wẽnnaam taoor ye. La tõnd sã n wʋm kɩbay bãmb mens sẽn togs tõnd sẽn wilgd tʋʋm-kãsems a Zeova sẽn maan a nin-buiidã yĩng yaoolem day kãensã pʋsẽ wã, kengda tõnd tẽebã ne a Zeova la ne a kãabsã n paase. (Bʋkaoodba 2:7; 2 Pɩɛɛr 1:16-19) Yãmb sã n lagma ne a Zeova siglgã sẽn na maan yʋʋm wʋsgo, y tõe n tẽega wakat y sõorã sẽn da yaa bilfu, n moond Rĩungã y babgẽ wã bɩ y tẽngẽ wã, bɩ moonegã tʋʋmd sẽn da wa n segd kɩɩs-toaaga. Sẽn wa n beẽ-beẽ, y yãa a Zeova sẽn yãk bõn-gɩdgdɩ kẽer la a kɩt tɩ Rĩungã moondb sõor fɩɩg ‘tao-tao.’ (Ezai 54:17; 60:22) Yãmb yãa vẽnegr ning b sẽn wa ne sɩd nins sẽn be Biiblã pʋgẽ wã zutu, la y leb n yãame tɩ Wẽnnaam tẽng zug siglgã paama manegr bilf-bilfu. (Yelbũna 4:18; Ezai 60:17) Yãmb baoodame n na n keng neb a taabã tẽeb n togs-b yɛl sẽn wilgd t’a Zeova yaa tɩrg bɩ? Ad woto sɩd tõe n paasa kiris-neb saam-biirã pãng sõma!

18. a) Rɩk-y makr sẽn wilgd tɩ f sã n ‘togsd neb a taabã t’a Zeova yaa tɩrga,’ tõe n sõng-b-la kaoosg zugẽ. b) Wãn to la yãmb mengã yãẽ t’a Zeova yaa tɩrga?

¹⁸ Yaa wãn to yẽ ne sasa nins a Zeova sẽn ges y yell la a wilg-y sor ne nonglem y vɩɩmã pʋgẽ wã? (Yɩɩl Sõamyã 37:25; Matɩe 6:33; 1 Pɩɛɛr 5:7) Saam-bi-poak sẽn kʋʋl yʋʋr sẽn boond t’a Martha ra nong n kengda neb a taabã raood n yetẽ: “Sẽn wa n yaa a soab fãa, bɩ y ra tol n bas a Zeova ye. A na n sõng-y lame.” Sagl-kãngã sõnga a Tolmina sẽn ya a Martha Biibl zãms a ye sẽn deeg lisg yʋʋmd 1960 poor bilfã wʋsgo. A Tolmina tẽra woto: “Mam sɩdã sẽn wa n ki wã, m komsa raood wʋsgo, la gom-kãensã kɩtame tɩ m dɩk sard kãn-kãe n pa na n vaal tigisg ba a yembr ye. La a Zeova sɩd kõ-m-la pãng tɩ m kẽng taoore.” A Tolmina kõo sagl-kãngã a meng Biibl zãms rãmb wʋsg yʋʋmã sẽn tong taabã pʋgẽ. Sɩda, y sã n kengd neb a taabã raood la y togsdẽ t’a Zeova yel-manesmã ne nebã yaa tɩrse, y tõe n kenga y tẽed-n-taasã tẽeb wʋsgo.

A Zeova nanda sẽn kʋʋl-b n yaa wẽn-sakdbã wʋsgo

19, 20. a) Wãn to la a Zeova get a sõgen dãmb nins sẽn kʋʋlã tʋʋmã? b) Bõe la d na n vaees sõsg ning sẽn pʋgdã pʋgẽ?

¹⁹ Zãmaan kãngã neb sẽn pa tar mi-beoogã pa nand sẽn kʋʋl-bã ye. (2 Tɩmote 3:1, 2) B sã n wa tẽegd sẽn kʋʋl-bã yelle, naoor wʋsgo yaa b sẽn maan tɩ loog yelle, b sẽn da maan bũmb ninsã, la pa b sẽn maand bũmb ninsã ye. Sẽn yaa lebend ne rẽ, Biiblã yetame: “Wẽnnaam yaa tɩrga, la bãmb kõn yĩm yãmb tʋʋmda ne y nonglma yãmb sẽn wilg bãmb yʋʋra yĩnga, yãmb sẽn sõng bãmb neba n ket n sõngdẽ wã ye.” (Hebre dãmba 6:10) Yaa sɩda, Wẽnnaam a Zeova tẽra yãmb wẽn-sakrã tʋʋm sẽn loogã. La a nanda y sẽn ket n maand bũmb ning a tʋʋmdã pʋgẽ wã. N-ye, a geta sẽn kʋʋl-bã wa kiris-neb sẽn womd biis la sẽn tar yẽesem, n tar tẽeb sẽn yaa kãn-kãe, neb vɩɩm sẽn kõt kaset t’a Zeova tara pãngã.—Filip rãmba 4:13.

²⁰ Yãmb geta tõnd saam-biis nins sẽn kʋʋlã wa a Zeova sẽn get-b to-to wã bɩ? Sã n yaa woto, y na n wilgame tɩ y nong-b lame. (1 Zã 3:18) Sõsg ning sẽn pʋgdã na n wilga manesem kẽer d sẽn tõe n tũnug ne n wilg nonglem kãng n sõng-b zĩis nins b sẽn dat sõngrã.

[Tẽngr note]

Yãmb leokdame tɩ bõe?

• Wãn to la sẽn kʋʋl-bã “womd biisi”?

• Bõe yĩng tɩ kiris-neb nins sẽn kʋʋlã tẽebã sẽn yaa kãn-kãe wã tar yõod wʋsgo?

• Wãn to la sẽn kʋʋl-bã tõe n ‘wilg t’a Zeova yaa tɩrga’?

• Bõe yĩng t’a Zeova nand a sõgen dãmb nins sẽn maand a raabã hal sẽn kaoos wʋsgã?

[Zãmsgã sogsgã]

[Zĩ-gũbri, seb-neng 11]

B sẽn kell n tall tẽeb sẽn yaa kãn-kãe to-to

Bõe n sõng neb sẽn yaa kiris-neb hal sẽn kaoos tɩ b kell n tall tẽeb sẽn yaa kãn-kãe? Ad bãmb kẽer sẽn leoke:

“Gʋlsg Sõamyã zĩis nins sẽn gomd zems-n-taar ning tõnd sẽn tar ne a Zeova wã zug kareng tara yõod wʋsgo. Yʋnd wʋsgo, mam togsda Yɩɩl Sõamya 23 la 91 soabã ne zugu.”—A Olive sẽn deeg lisg yʋʋmd 1930.

“Mam yãka yam n na n zĩnd lisg sõsgẽ fãa la m kelg neere, wala yaa mam mengã lisg raare. M sẽn ket n tẽegd m lisgã yell tɩ yaa vẽenegã talla yõod wʋsg sẽn kɩt tɩ m kell n yɩ wẽn-sakda.”—A Harry sẽn deeg lisg yʋʋmd 1946.

“Pʋʋsgã daar fãa tara yõod wʋsgo. M kota a Zeova sõngre, a koglg la a bark wakat fãa, n ‘tẽegd a yell bũmb fãa pʋgẽ.’ ” (Yelbũna 3:​5, 6)—A Antônio sẽn deeg lisg yʋʋmd 1951.

“M sã n kelgd neb nins sẽn ket n maand a Zeova raabã wẽn-​sakr pʋgẽ yʋʋm wʋsg poorã, sõngda maam tɩ m dat n kell n sak-a wakat fãa.”—A Joan sẽn deeg lisg yʋʋmd 1954.

“Tara yõod tɩ d ra tags d mengã yell tɩ loog noor ye. Bũmb ning fãa tõnd sẽn tarã yaa Wẽnnaam sõmblem d sẽn pa segd ne wã maasem yĩnga. D sã n get yɛlã woto na n kɩtame tɩ d ket n get zĩig ning sẽn zemsã sẽn na yɩl n paam tẽebã rɩɩb n ket n sakd-a hal tɩ saabã ta.”—A Arlene, sẽn deeg lisg yʋʋmd 1954.

[Foto, seb-neng a 9]

Sẽn kʋʋl-bã womda Rĩungã biis sẽn tar yõodã

[Foto, seb-neng 12]

Sẽn kʋʋl-bã tẽeb sẽn yaa kãn-kãe wã tara yõod wʋsgo