Tũudum bʋg pʋgẽ la y segd n zĩndi?

‘TŨUDMÃ toɛy-toɛyã yaa soɛy toɛy-toɛy sẽn tar n debd zĩ-yend bala. Wẽnnaamã pa a yembr bal la?’ Neb wʋsg tagsda woto, la baa ne b sẽn tagsd tɩ tũudum pʋgẽ zĩndg tara yõodã, b tẽedame tɩ f sẽn yãk tũudum ning fãa, zemsame.

F sã n ges pipi, tags-kãngã wõnda a yaa tɩrga, bala yaa sɩd tɩ yaa Wẽnnaam sẽn tõe fãa a yembr bal n be. (Ezai 44:6; Zã 17:3; 1 Korẽnt dãmba 8:5, 6) La d pa tõe n kɩɩs tɩ welgr sẽn yaa vẽenega, bɩ kɩɩs-taab meng n be tũudum wʋsg sẽn yet tɩ b tũuda sɩd Wẽnnaamã sʋk ye. B yel-maandɩ wã, b tẽebã, b zãmsgã la b noyã yaa toor ne taab wʋsgo. Welgrã bãmb ne taab sʋkã yaa kãsems hali n kɩt tɩ neb sẽn be tũudum yɛng pʋgẽ getẽ tɩ yaa toog tɩ b wʋm bɩ b sak neb a taab zãmsg bɩ b tẽebo.

La a Zezi yeelame: “Wẽnnaam yaa sɩɩga. La yaa tɩlae tɩ neb nins sẽn waoogd bãmba waoog bãmb ne b sɩɩse la ne sɩda.” (Zã 4:24) Rẽ yĩnga, balem Wẽnnaam ne sɩd tõe n tika tẽeb sẽn kɩɩsd taaba, Wẽnnaam sẽn ya a soabã, a raabã, la a sẽn dat tɩ tõnd balm-a to-to wã zug sɩda? Zemsame tɩ d tags tɩ Wẽnnaam sẽn tõe fãa wã toor kae ne tõnd sẽn balemd-a to-to wã sɩda?

Kiris-neb hakɩkã sɩngrẽ wã, la masã

Pipi kiris-nebã talla tagsa toɛy-toɛy yɛl kẽer zutu. Wala makre, tʋm-tʋmd a Poll yeela Korẽnt kiris-nebã woto: “M ba-biisi, a Kolowe yir dãmba togsa maam tɩ no-koɛɛm n be yãmb sʋka. Mam sẽn dat n togse yaa tɩ yãmb ned kam fãa yeta woto: ‘Mam yaa a Poll karen-biiga,’ walla ‘Mam yaa a Apolos karen-biiga,’ walla ‘Mam yaa a Sefas karen-biiga.’ walla ‘Mam yaa Kirist karen-biiga.’ ”—1 Korẽnt dãmba 1:11, 12.

A Poll gesa welg-kãensã wa yel-bil bɩ? Ned kam fãa ra tũuda a meng fãagr sor bal bɩ? Pa woto abada! A Poll saglame: “M ba-biisi, mam kota yãmb ne tõnd Zusoab a Zezi Kirist yʋʋre tɩ yãmb koees fãa zems taaba la tɩ welgr da zĩnd yãmb sʋk ye, la bɩ yãmb lagem taab sõama n paam tagsgo la yam a yembre.”—1 Korẽnt dãmba 1:10.

Yaa sɩd tɩ pa b sẽn na n modg nebã la b tõe n paam zems-n-taarã tẽebã pʋgẽ ye. La yaa nebã yembr-yembr sẽn na n fees yɛlã n bãnge, n wa tall tagsg a yembr bala. Rẽnd ned fãa sẽn na n zãms Wẽnnaam Gomdã a toore, la a sɩd rat n tũ a sẽn zãmsdã ne a sũur fãa yaa tɩlae sẽn na yɩl tɩ zems-n-taar buud ning yell a Poll sẽn gomã zĩndi. Zems-n-ta-kãng yaa bũmb sẽn tõe n paam  bɩ? Wala d sẽn yã wã, hal sẽn kaoose, Wẽnnaam wilgda a nin-buiidã sẽn yaa sullã sore. D tõe n bãnga sul-kãng sẽn ya a soab rũndã-rũndã bɩ?

Sull ning sẽn tat Wẽnnaam yamã pʋgẽ zĩndg nafa

Yɩɩl gʋlsd a Davɩɩd soka woto vugri: “Zusoaba, ãnda n na n sig yãmb zãndẽ? Ãnda n na n pa yãmb tãn-sõnga zugu?” Woto yaa sokr sẽn sɩd wat ne tagsgo. A Davɩɩd leoka woto: “Yaa ned ninga sẽn kẽnd ne pʋ-peelem la a maand tɩrga la a gomd sɩd ne a sũur fãa.” (Yɩɩl Sõamyã 15:1, 2) Biiblã võor wʋmb sẽn zems kɛpɩ na n sõnga ned t’a bãng tũudum ning sẽn zems ne Wẽnnaam noyã. Rẽ, f sã n zĩnd sul-kãng pʋgẽ, f na n paama tũud-n-taar sẽn kengd tẽeb ne neb sẽn balemd Wẽnnaam zems-n-taar pʋgẽ ne ‘vʋʋsem la ne sɩda.’

A Zeova Kaset rãmbã wilgame tɩ b tõe n paama zems-n-taar tẽebã la b yel-manesmã pʋgẽ, baa dũniyã sẽn welg rũndã-rũndã wã. Neb sẽn da yit tũudum la buud toɛy-toɛy pʋsẽ n be b sʋkã. Kaset rãmb kẽer ra tẽeda pĩndã tɩ sɩdã yaa bũmb b sẽn pa tõe n bãnge, wall b ra yaa Wẽnd kae rãmba. La sãnda me toog ra kae ne tũudmã ye. Neb tũudum, b buud la b bãngr sẽn yaa toor-toore, n zemsd taab tũudmã pʋgẽ masã tɩ rẽ buud ka to dũni kãngã pʋgẽ ye.

Zems-n-ta-kãngã tika Wẽnnaam Gomdã sẽn yaa Biiblã zugu. Yaa sɩda, a Zeova Kaset rãmbã miime tɩ b pa tõe n modg neb a taabã tɩ b tũ sɩdã ye. La b sũy noomame, b sẽn tõe n sõng neb a taabã tɩ b zãms Biiblã, n tik yẽbg-kãng sẽn yaa kãn-kãe wã zug n yãk b sẽn na n balem Wẽnnaam to-to wã. Woto, neb wʋsg sã n paas tõnd n balem Wẽnnaam ne ‘vʋʋsem la ne sɩda,’ na n nafa bãmb me.

Rũndã-rũndã, pãn-tusd-wẽns la belgr tõe n kẽes-f-la toog pʋgẽ nana-nana. Rẽnd tũud-n-taar sẽn yaa sõma yãkr tara yõod wʋsgo. Biiblã yetame tɩ “ned sã n tũud yam dãmba, a na n lebga yam soaba” la tɩ “tũud-n-ta-wẽns sãamda nin-sõamyã.” (Yelbũna 13:20; 1 Korẽnt dãmba 15:33) Wẽnnaam balemdb hakɩkã naagr yaa koglgo. Yaa rẽ yĩng la Biiblã sẽn tẽegd tõnd woto wã: “La bɩ tõnd tẽeg taab yelle la d yik taab ratem tɩ maan nonglem la tʋʋm sõama. Bɩ d da bas taab tiging wa neb kẽer sẽn maanda ye. La bɩ d sagl taaba, la bɩ d sagl n yɩɩda tõnd sẽn yã tɩ daarã kolgdame wã yĩnga.” (Hebre dãmba 10:24, 25) Ad sɩd yaa bark menga, zo-rãmb hakɩka, bɩ tẽeb saam-biis sã n sõngd taab ne nonglem n tʋmd tʋʋm nins Wẽnnaam sẽn bobl-dã!

Yaa woto la a Ottmar wilgda. B wuba yẽ katolik rãmb zakẽ Alemayn, la a basa wẽnd-doogẽ wã kẽnde. Ad a sẽn wilgdi: “Mam sã n kẽng wẽnd-doogẽ wã fãa, m yita ne tẽeb kom ning m sẽn da kẽng ne wã.” La a ra ket n tẽeda Wẽnnaam. Rẽ poore, a wa n sõsa ne a Zeova Kaset rãmbã, n wa sak tɩ yaa bãmb la Wẽnnaam sõgen dãmb hakɩkã. A yãame t’a segd n maana lagem-n-taar ne-ba. Masã a yetame: “M sẽn tar tʋʋmd dũni gill siglg pʋgẽ wã yĩnga, m yamã gãee bãane. M paamda sõngr bilf-bilf n na n paam Biiblã bãngr sẽn zems kɛpɩ wã n paase. Woto yaa bũmb sẽn tar yõod wʋsg ne maam.”

B boonda neb nins sẽn baood sɩdã

Neb sẽn be sull pʋgẽ n tʋmd ne yam a yembr tõe n tʋma tʋʋm wʋsg sõma n yɩɩd ned fãa sẽn na n tʋmd a yembr bala. Wala makre, ad a Zezi sẽn kõ noy nins la a yaool n loogã: “Bɩ y kẽng n maan neba buud fãa tɩ b yɩ mam karen-biisi n lis bãmb ne Ba la Biiga la Sɩɩg Sõng yʋʋre. La y zãms bãmb tɩ b sak bũmb nins fãa mam sẽn da togs yãmbã.” (Matɩe 28:19, 20) Wãn to la b ra  tõe n tʋm tʋʋm kãngã tɩ yɩ sõma, sor-wilgr la siglg sã n da ka be? Wãn to la ned tõe n tũ Gʋlsg Sõamyã no-kãngã, a sã n mak n na n tũ Wẽnnaam ne soog-m-menga?

Rɩẽ, dũniyã gill zugu, a Zeova Kaset rãmbã pʋɩya sɛb 91 933 280 sẽn tik Biiblã zugu, n paas zʋrno rãmb 697 603 247, tɩ rẽ kɩt tɩ b tõog n sõng neb milyõ kobs tɩ b wʋm Wẽnnaam Gomdã tẽns 235 pʋsẽ. Ad woto sɩd wilgda vẽeneg tɩ neb sull sẽn tar zems-n-taar la sẽn sigl sõma tõe n tʋma tʋʋm wʋsg n yɩɩd nin-yɛng sẽn tõe n maane!

Sɛb nins sẽn tik Biiblã zugã pʋɩɩb toor sẽn ka be, a Zeova Kaset rãmbã zãmsda nebã Biiblã tɩ pa tũ ne ligd yaoobo, n sõngd-b tɩ b bãngd Wẽnnaam sẽn dat tɩ b bãng bũmb ninsã võor sõma. Rɩẽ, b sã n pʋɩ tɩ zemse yaa Biibl zãms rãmb 5 726 509 la b maan semen fãa ne neba. Biiblã zãmsg woto sõnga neb milyõ rãmb tɩ b paam yẽbgr sẽn yaa kãn-kãe n tõe n tik rẽ zug n yãk tũudum. B sagenda yãmb me tɩ y bao n bãng Wẽnnaam noyã sẽn be Biiblã pʋgẽ wã, tɩ rẽ la y tõe n yãk sõma.—Efɛɛz rãmba 4:13; Filip rãmba 1:9; 1 Tɩmote 6:20; 2 Pɩɛɛr 3:18.

Y sã n dat n ta Wẽnnaam yam, yaa tɩlae tɩ y zĩnd tũudum pʋgẽ, la pa tũudum fãa pʋgẽ ye. Y segd n tika Biiblã bãngr sẽn zems kɛpɩ wã zug n yaool n yãk y tũudmã, la pa egiliizã zãmsg bɩ neb sẽn yeel zug bal la y segd n tik ye. (Yelbũna 16:25) Bao-y n bãng noy nins sẽn tɩ loe ne sɩd tũudmã. Mak-y-b ne y mengã tẽebo. Rẽ poor masã bɩ y yãke.—Tõodo 30:19.

[Foto rãmba, seb-neng a 7]

A Zeova Kaset rãmbã tara zems-n-taar dũni sẽn welg pʋgẽ