‘Bɩ y kẽng n maan karen-biisi’
‘Bɩ y kẽng n maan karen-biisi’
“B kõo maam pãng fãa sẽn be [saasẽ] la sẽn be dũniyã. Bɩ y kẽng n maan . . . karen-biisi.”—MATƖE 28:18, 19.
1, 2. a) Tʋʋm bʋg la a Zezi kõ a karen-biisã? b) Sogs-bʋs sẽn tɩ loe ne a Zezi noyã la d na n leoke?
RA YAA tɩ-tobend wakat Israɛlle, yʋʋmd 33, t’a Zezi ne a karen-biisã ra tigim Galile tãng zugu. B Soaalã vʋʋgame n da segd n leb saasẽ masã, la a ra tara koɛɛg sẽn tar yõod n na n togs-b nanda. A Zezi ra tara tʋʋmd b yĩnga. Ra yaa tʋʋm-bʋgo? A karen-biisã manesem yɩɩ wãn to? La wãn to la tʋʋm-kãng pak tõnd rũndã-rũndã?
2 A Zezi sẽn yeel bũmb ningã bee Matɩe 28:18-20 pʋgẽ: “B kõo maam pãng fãa sẽn be [saasẽ] la sẽn be dũniyã. Bɩ y kẽng n maan neba buud fãa tɩ b yɩ mam karen-biisi n lis bãmb ne Ba la Biiga la Sɩɩg Sõng yʋʋre. La y zãms bãmb tɩ b sak bũmb nins fãa mam sẽn da togs yãmbã. La gese, mam bee ne yãmb wakat fãa hal tɩ ta wakat sɛɛbo.” A Zezi goma “pãng fãa,” “buud fãa,” “bũmb nins fãa” la “wakat fãa” yelle. Noy nins a Zezi sẽn kõ sẽn tɩ loe ne bõn-kãensa a naasã wata ne sogsg sẽn tar yõodo, d sẽn tõe n kʋms ne gom-biis nins sẽn yaa: bõe yĩnga? yɛ? bõe? la wakat bʋgo? Bɩ d bao n leok sogs-kãensã ball-balle. *
“B kõo maam pãng fãa”
3. Bõe yĩng tɩ d segd n sak noor ning sẽn yet tɩ d maan karen-biisã?
3 Pipi, bõe yĩng tɩ d segd n sak noor ning b sẽn kõ tɩ d maan karen-biisã? A Zezi togsame: “B kõo maam pãng fãa sẽn be [saasẽ] la sẽn be dũniyã. Bɩ y kẽng n maan . . . karen-biisi.” Gom-biig ning sẽn yaa “bɩ” wã wilgda bʋʋm kãseng ning sẽn kɩt tɩ d segd n sak no-kãngã wã. Yaa t’a Zezi sẽn yaa ned ning sẽn kõ noorã tara “pãng fãa” bɩ zu-sobend faa. A pãngã taa zĩ-bʋgo?
4. a) A Zezi zu-sobendã taa zĩ-bʋgo? b) Tõnd sẽn wʋmd a Zezi zu-sobendã võor to-to wã segd n kɩtame tɩ d ges noor ning a sẽn kõ tɩ d maan karen-biisã wãn to?
4 A Zezi tara zu-sobend a tigingã zugu, la yʋʋmd 1914 tɛkã, a tara zu-sobend Wẽnnaam Rĩungã sẽn da lugl paalma zugu. (Kolos rãmba 1:13; Wilgri 11:15) A yaa malɛgsã naaba, n tar zu-sobend malɛgs milyõ kobs zutu. (1 Tesalonik rãmba 4:16; 1 Pɩɛɛr 3:22; Wilgri 19:14-16) A Ba wã kõ-a-la tõog t’a sãam “pãn-soaadba fãa la noyã fãa la pãens fãa” sẽn kɩɩsd no-tɩrsã. (1 Korẽnt dãmba 15:24-26; Efɛɛz rãmba 1:20-23) A Zezi zu-sobendã pa tek sẽn vɩ-bã bal zug ye. A leb n yaa “nin-vɩɩse la kũum bʋ-kaooda,” la Wẽnnaam kõ-a-la pãng t’a vʋʋg sẽn ki-bã. (Tʋʋma 10:42; Zã 5:26-28) Sɩd-sɩda, b segd n gesa noor ned ning sẽn paam zu-sobend kãseng woto wã sẽn kõ wã wa bũmb sẽn tar yõod wʋsgo. Woto yĩnga, yaa ne waoogr la yamleoog la d sakd noor ning Kirist sẽn kõ tɩ d ‘kẽng n tɩ maan karen-biisã.’
5. a) Wãn to la a Pɩɛɛr sak a Zezi sẽn yeelã? b) A Pɩɛɛr sẽn sak a Zezi noorã waa ne bark bʋgo?
5 A Zezi tẽng zug tʋʋmdã sɩngrẽ, a zãmsa a karen-biisã vẽeneg tɩ b sã n sak a zu-sobendã la a noyã, b na n paama bark wʋsgo. Vugri, a yeela a Pɩɛɛr sẽn da yaa zĩm-yẽedã tɩ: “Kẽng-y kooma sʋk n tɩ lob y zĩm gãmbã n yõg zĩma.” A Pɩɛɛr da kɩsa sɩd tɩ zĩm da ka be ye, rẽ n so t’a yeel a Zezi: “Karen-saamba, tõnd tʋma yʋnga tɛka n ka tol n yõk bũmb ye.” La baasgo, a Pɩɛɛr paasa woto ne sik-m-menga: “La yãmb sẽn yeelã, mam na n loba zĩm gãmbrã.” A Pɩɛɛr sẽn sak Kirist noorã, a “yõga zĩm wʋsgo.” Yellã looga a Pɩɛɛre, t’a “wõgemd a Zezi taoore n yeele: ‘Zusoaba, bas-y maam tɩ mam yaa yel-wẽn soaba.’ ” La a Zezi leokame: “Da zoe rabeem ye. Sẽn sɩng masã, fo na n yɩɩ mam neb baooda.” (Luk 5:1-10; Matɩe 4:18) Kɩba-kãngã zãmsda tõnd bõe?
6. a) Kɩbar ning sẽn gomd zĩmã yõgb ne yel-solemdã yellã wilgda bõe, sã n yaa ne sakr buud ning a Zezi sẽn baoodã? b) Wãn to la d tõe n dɩk a Zezi togs-n-taare?
6 Yaa b sẽn yõg zĩmã wʋsgã poor la a Zezi kõ a Pɩɛɛre, a Ander la tʋm-tʋmdb a taabã tʋʋmd sẽn yaa ‘yɩ neb baoodba,’ la pa sẽn deng rẽ ye. (Mark 1:16, 17) Vẽenega, a Zezi pa bao tɩ b sak-a zond-yaar ye. A wilga bũmb ning sẽn kɩt tɩ b segd n sak-a wã. Wala b sẽn sak a Zezi noor n lob b zĩm-gãmba wã n paam zĩm wʋsgã, woto me, a Zezi sẽn kõ noor ning tɩ b ‘bao nebã’ sakr da na n kõ-b-la bark wʋsgo. Tʋm-tʋmdbã sak n tũu a Zezi sẽn yeelã ne tẽeb wʋsgo. Kɩbarã baasdame: “La bãmb sẽn tall kogenda n wa kooma noore, bãmb basa fãa n tũ a Zezi.” (Luk 5:11) Rũndã-rũndã, d yeta neb a taabã tɩ b kẽes b toog karen-biisã maaneg tʋʋmdẽ, tɩ rẽ kɩt tɩ d rɩkd a Zezi togs-n-taare. D pa baood tɩ nebã maan tõnd sẽn yet-bã bal ye, la d wilgd-b-la bũmb nins sẽn kɩt tɩ b segd n sak n tũ Kirist noorã.
Bũmb nins la yam-sõng ning sẽn kɩt tɩ d sakd a Zezi noorã
7, 8. a) Bʋʋm kẽer bʋs sẽn tik Gʋlsg Sõamyã zut la d tar n na n moon Rĩungã la d maan karen-biisi? b) Sẽn tɩ yɩɩd fãa, verse bʋg n kɩtd tɩ yãmb ket n moond koe-noogã? (Ges-y tẽngr notã me.)
7 Tõnd sẽn sakd Kirist zu-sobendã kɩtame tɩ d moond Rĩungã koɛɛg la d maand karen-biisi. Bʋʋm a taab bʋs sẽn tik Gʋlsg Sõamyã zut la d tõe n wilg neb nins d sẽn tʋll n kɩt tɩ b maan tʋʋm-neerã? Ges-y a Zeova Kaset rãmb kẽer sẽn yit tẽns toɛy-toɛy sẽn yeele, la y ges verse rãmbã sẽn wilgd tɩ b goamã yaa sɩd to-to.
8 A Roy sẽn deeg lisg yʋʋmd 1951 wã yeela woto: “Mam sẽn da wa n dɩk m meng n kõ a Zeova wã, m pʋlm-a lame tɩ m na n maana a raabã wakat fãa. M datame n pids m pʋlengã.” (Yɩɩl Sõamyã 50:14; Matɩe 5:37) A Heather sẽn deeg lisg yʋʋmd 1962 yeelame: “M sã n tags bũmb nins fãa a Zeova sẽn maan n kõ maamã yelle, m dat n wilg-a-la m mi-beoog n maan a raabã ne kɩs-sɩda.” (Yɩɩl Sõamyã 9:2, 10-12; Kolos rãmba 3:15) A Hannelore sẽn deeg lisg yʋʋmd 1954 yeelame: “Tõnd sã n wa be koe-noogã mooneg zug fãa, d paamda malɛgsã sõngre, tɩ woto sɩd yaa zu-noog menga!” (Tʋʋma 10:30-33; Wilgri 14:6, 7) A Honor sẽn deeg lisg yʋʋmd 1969 yeelame: “A Zeova bʋʋdã wakat sã n wa ta, m pa rat tɩ m sakã pʋgẽ bɩ ned ning a Zeova bɩ a Kaset rãmbã taal n yeel tɩ: ‘M zɩ n paam keoogr ye.’ ” (Ezekɩɛll 2:5; 3:17-19; Rom dãmba 10:16, 18) A Claudio sẽn deeg lisg yʋʋmd 1974 yetame: “Tõnd sã n moondẽ, d bee ‘Wẽnnaam taoore,’ ‘la d maand tũud-n-taar ne Kirist.’ Mams-y n gese! D sã n be koe-noogã mooneg pʋgẽ, d maanda tũud-n-taar ne d zo-rãmb nins sẽn yaa-b sõma n yɩɩdã.”—2 Korẽnt dãmba 2:17. *
9. a) Bõe la kɩbar ning sẽn tɩ loe ne zĩmã a Pɩɛɛr la tʋm-tʋmdb a taabã sẽn yõgã wilgd sã n yaa ne yam ning sẽn zems Kirist sakrã? b) Yam-bʋg n zems ne Wẽnnaam la Kirist sakrã rũndã-rũndã, la bõe yĩnga?
9 Kɩbar ning sẽn tɩ loe ne zĩmã b sẽn yõg wʋsgã me wilgdame tɩ tara yõod tɩ d tall yam-sõng Kirist sakrã pʋgẽ. Yaa nonglmã n segd n kɩt tɩ d yɩ sakdba. A Pɩɛɛr sẽn wa n yeel tɩ: “Bas-y maam tɩ mam yaa yel-wẽn soaba,” a Zezi pa loog n bas-a, a leb n pa ning-a taal me t’a maana yel-wẽnd ye. (Luk 5:8) A Zezi pʋd n pa sãbg a Pɩɛɛre, a sẽn kos-a t’a loog n bas-a wã yĩng ye. A leok-a-la ne nonglem: “Ra zoe rabeem ye.” Pa rabeem n segd n kɩt tɩ tõnd sak Kirist ye. A Zezi yeela a Pɩɛɛr tɩ yẽ ne a tũud-n-taasã na n talla yõod karen-biisã baoob pʋgẽ. Rũndã-rũndã, tõnd me pa tũnugd ne rabeem bɩ bũmb wala taal la yãnd ningr n modg neb a taabã tɩ b sak Kirist ye. Yaa d sẽn na n sakd Wẽnnaam la Kirist ne d sũur fãa bal la d na n noog a Zeova sũuri.—Matɩe 22:37.
‘Bɩ y maan buuda fãa neb tɩ b yɩ karen-biisi’
10. a) A Zezi sẽn kõ noor tɩ b maan karen-biisã, toeen-bʋg n wa ne tʋʋm-toog n kõ a karen-biisã? b) A Zezi karen-biisã manesem yɩɩ wãn to ne noor ning a sẽn kõ-bã?
10 Sokr a yiib-n-soab sẽn tɩ loe ne Kirist sẽn kõ noor ningã yaa: Yɛ la b segd n maan karen-biisã? A Zezi yeela a karen-biisã tɩ b ‘maan buuda fãa neb tɩ b yɩ karen-biisi.’ Sẽn deng a Zezi koe-moonegã wakate, b ra sakdame tɩ bu-zẽmsã neb wa Israɛll n balem a Zeova. (1 Rĩm dãmba 8:41-43) A Zezi mengã moona Zʋɩf buudã neb n tɩ yɩɩda, la a yeela a karen-biisã tɩ b tɩ moon buuda fãa neba. Sɩda, a karen-biisã zĩmã yẽeb zĩisi, bɩ b moonegã zĩig ra yaa wa “bãk” sẽn yaa kɩdg bala, sẽn dat n yeel tɩ Zʋɩf buudã neba, la ra pa na n kaoos la ãdem-biisã b sẽn mak ne “ko-kãsengã” tõrã wa naag ye. Baa ne toeen-kãngã sẽn yɩ tʋʋm-toog n kõ karen-biisã, b saka a Zezi noorã ne yamleoogo. A Zezi sẽn ki tɩ yʋʋm 30 la bala, tʋm-tʋmd a Poll tõog n gʋlsame tɩ koe-noogã ra moona Zʋɩf rãmbã la “dũniyã fãa.”—Kolos rãmba 1:23.
11. Wãn to la moonegã zĩig yalg yʋʋm kob-gĩnd ning sẽn sɩng ne yʋʋmd 1900 wã sɩngrẽ?
11 Sẽn pa kaoos pʋgẽ, moonegã zĩig yalgr sẽn wõnd woto la d yã-yã. Yʋʋm kob-gĩnd ning sẽn sɩng yʋʋmd 1900 wã sɩngrẽ, moonegã zĩig ra teka tẽns a wãn bala. Ne rẽ fãa, rẽ wẽnde, Kirist karen-biisã rɩka pipi kiris-nebã togs-n-taare, n yalg b moonegã zĩiga. (Rom dãmba 15:20) Yʋʋmd 1930 tɛka, b ra maanda karen-biis tẽns sẽn zems koabg pʋsẽ. Rũndã-rũndã, tõnd moonegã taa tẽns 235 pʋsẽ.—Mark 13:10.
‘Goam toɛy-toɛyã fãa’
12. Tʋʋm-toog bʋg la Zakari 8:23 bãngr-gomdã wilgda?
12 Karen-biisã maaneg sẽn yaa toogã pa sẽn yaa tẽnsã fãa pʋsẽ wã yĩng bal ye, yaa sẽn yaa buud-goam wʋsg pʋsẽ wã yĩng me. A Zeova tũnuga ne no-rɛɛs a Zakari n deng n togs woto: ‘Wakat kãnga, yaa maam, Naaba-Wẽnd n yete, neb piig sẽn gomd goam toɛy-toɛyã na n gãda Zʋɩf fuug noore n yeel-a: “Tõnd tʋll n wa zĩnda ne yãmb Zʋɩf rãmbã tɩ d wʋmame tɩ Wẽnnaam bee ne yãmba.” ’ (Zakari 8:23, Sebr Sõngo) Bãngr-gom-kãngã pids-kãsengã pʋgẽ, ‘Zʋɩfã’ makda kiris-neb nins sẽn zae ne vʋʋsem sõngã, tɩ ‘neb piigã’ makd ‘kʋʋn-kãsengã.’ * (Wilgri 7:9, 10; Galat dãmba 6:16) Kʋʋn-kãseng kãngã sẽn yaa Kirist karen-biisã yita tẽns wʋsg pʋsẽ, la wala a Zakari sẽn wilgã, b gomda buud-goam wʋsgo. Rũndã-rũndã Wẽnnaam nin-buiidã sɩd maanda karen-biis sẽn gomd buud-goam toɛy-toɛy woto bɩ? N-ye.
13. a) Yel-bʋg sẽn tɩ loe ne buud-goamã n be Wẽnnaam sõgen dãmbã sʋk rũndã-rũndã? b) Tʋm-tʋmd sẽn tũud sɩdã sull manesem yɩɩ wãn to, b sẽn da rat tẽebã rɩɩb buud-goam toɛy-toɛyã pʋsẽ n paasã? (Paas-y zĩ-gũbr ning sẽn yaa “Sɛb zoensã yĩnga.”)
13 Yʋʋmd 1950, sẽn zems a Zeova Kaset rãmb a 3 bãmb b 5 sʋk buud-gomd ra yaa ãngilindi. La yʋʋmd 1980 tɛka, lebga Kaset rãmb a 2 bãmb b 5 sʋka, tɩ rũndã-rũndã, yaa Kaset soab a 1 bãmb b 5 sʋk buud-gomd n yaa ãngilindi. Neb wʋsg sẽn pa gomd ãngilindã yĩnga, bõe la tʋm-tʋmd sẽn tũud sɩd la sẽn tar yamã sull maan-yã? B kõo tẽebã rɩɩb buud-goam sõor sẽn tar paasg pʋsẽ. (Matɩe 24:45) Wala makre, yʋʋmd 1950, b yiisa tõnd sɛbã ne buud-goam 90, la rũndã-rũndã, taa buud-goam 400. B sẽn bao n na n sõng buud-goam toɛy-toɛy neb woto wã pa wom biis sɩda? Rẽ yaa vẽenega! B sã n pʋɩ tɩ zemse, yʋʋmd fãa, yaa neb sẽn na ta 5 000 sẽn gomd ‘goam toɛy-toɛy’ n lebgd Kirist karen-biis semen fãa! (Wilgri 7:9) La b sõorã ket n fɩɩgdame. Tẽns kẽer pʋsẽ, tẽebã wɛɛngẽ, zĩm-gãmba wã yõgda zĩm wʋsgo!—Luk 5:6; Zã 21:6.
Y tõe n kẽesa y meng moonegã tʋʋmd sẽn kõt sũ-noogã pʋgẽ bɩ?
14. Wãn to la d tõe n sõng neb nins sẽn be tõnd moonegã zĩigẽ n gomd buud gom-zẽngã? (Paas-y zĩ-gũbr ning sẽn yaa “Mugsã goama, la karen-biisã maanego.”)
14 Nasaar tẽns wʋsg pʋsẽ, sãambã waoong kɩtame tɩ b segd n mao n maan karen-biis “goam toɛy-toɛya fãa” pʋsẽ. (Wilgri 14:6) Wãn to la d tõe n sõng neb nins sẽn be tõnd moonegã zĩigẽ n gomd buud-gomd sẽn yaa toor ne tõnd rẽndã? (1 Tɩmote 2:4) Makr wɛɛngẽ, d tõe n loba zĩm-gãmbr ning sẽn zemsã. Kãab-y nin-kãensã sɛb sẽn gʋls buud-gomd b sẽn wʋmd pʋgẽ. Sã n tõeyã, bɩ y bao Kaset soab sẽn gomd b buud-gomdã t’a tɩ ges-ba. (Tʋʋma 22:2) Woto maaneg yaa nana n yɩɩd masã, bala Kaset rãmb wʋsg zãmsa buud-gom a taaba, sẽn na yɩl n sõng sãambã tɩ b lebg Kirist karen-biisi. Kɩbayã wilgdame tɩ sõngr woto kõta sũ-noogo.
15, 16. a) Mak-bʋs n wilgd tɩ d sã n sõng neb nins sẽn gomd buud-gom-zẽnga, kõta sũ-noogo? b) Sogs-bʋs sẽn tɩ loe ne koe-moonegã zĩig ning b sẽn gomd buud-gom-zẽngã la d segd n bao n leoke?
15 Ges-y makr a yiib sẽn maan Peyiba, b sẽn siglẽ rĩungã mooneg tʋʋmd buud-goam 34 pʋsẽ wã. Saam-biig ne a pag ra sakame n na n tɩ maan karen-biis sãamb nins sẽn gomd Poloyn buudã goamã sʋka. Nebã saka koɛɛgã sõma hal tɩ kɩt tɩ raoã boog a nug-tʋʋmdã sẽn na yɩl n paam daar a yembr n paas semen fãa pʋgẽ sẽn na yɩl n zãms Biiblã ne neb nins sẽn wilg tɩ b rata sɩdã. Pa kaoos la ra-kãngã ne a pagã paam sẽn yɩɩd Biibl zãmsdb 20 semen fãa ye. B yeela woto: “Tõnd koe-moonegã kõt-d-la sũ-noog wʋsgo.” Sẽn tɩ yɩɩd fãa, sẽn maand-b karen-biisã tara sũ-noogo, b sã n wʋmd neb nins sẽn kelgd Biiblã zãmsg b mensã buud-goamẽ sẽn wilgd b mi-beoogã. Wala makre, tigisg sẽn zĩnd Vietnam buud-goamã pʋgẽ, nin-kẽem n yik yĩngr n kos sor n na n gome. Ne nintãm, a yeela Kaset rãmbã tɩ: “Bark wʋsg ne modgr nins y sẽn maand sẽn na yɩl n zãms mam buudã goam sẽn yaa toogã. M tara mi-beoog wʋsgo, bõn-kãsems wʋsgã m sẽn zãmsd Biiblã pʋgẽ m kʋʋlem zugã yĩnga.”
16 Rẽnd pa lingri, koe-moondb nins sẽn be tigims nins sẽn gomd bu-zẽms goamã sẽn paamd sũ-noog wʋsgã ye. Saam-biig ne a pag sẽn be Gãrãnd Bertayn yeelame: “Moon koe-noogã neb sẽn gomd gom-zẽngã sʋkã talla yamleoog wʋsgo, Rĩungã mooneg tʋʋm fãa tõnd sẽn pids yʋʋm 40 pʋgẽ.” Yãmb tõe n maana toeeng y vɩɩmã pʋgẽ sẽn na yɩl n kẽes y meng koe-mooneg kãngã sẽn kõt sũ-noogã pʋgẽ bɩ? Yãmb sã n ket n debd lekolle, y tõe n zãmsa buud-gom-zẽng n segl y mens koe-moonegã yĩng bɩ? Woto maaneg tõe n paka sor tɩ y paam vɩɩm sẽn be barka. (Yelbũna 10:22) Bõe yĩng tɩ y pa na n gom dẽ yell ne y roagdbã?
D toeem d sẽn moond to-to wã
17. Wãn to la d tõe n paam n sõs ne neb wʋsg n paas d tigingã mooneg zĩigẽ?
17 D miime tɩ yɛlã pa kõt tõnd sʋkã neb wʋsg sor tɩ d moon zĩis nins b sẽn gomd buud-gom-zẽmsã ye. La d tõe n moona neb wʋsg n paas n yɩɩd tõnd mengã tiging mooneg zĩigẽ. Wãn to? Pa d sẽn na n toeemd d koɛɛgã gom-zutã ye, la yaa d sẽn moond zĩis nins la wakat ninsã. Tẽns wʋsg pʋsẽ, neb wʋsg vɩɩ etaas bɛd pʋsẽ, la bãmb sõorã tara paasgo. B gũuda zĩ-kãens wʋsg tɩ ned yaar pa tõe n kẽ ye. Neb wʋsg me pa be yir tõnd zak-zak moonegã sasa ye. Rẽ kɩtame tɩ d segd n tɩ moon sasa a taab la zĩis a taaba. Woto, d rɩkda a Zezi togs-n-taare. A modgame n gom ne neb zĩis toɛy-toɛy pʋsẽ.—Matɩe 9:9; Luk 19:1-10; Zã 4:6-15.
18. Wãn to la kasetã kũun zĩis toɛy-toɛy womd biisi? (Paas-y zĩ-gũbgr ning sẽn yaa “D sõng nebã b tʋʋmã zĩisẽ tɩ b lebg karen-biisi.”)
18 Tẽns kẽer pʋsẽ, moon nebã zĩis nins d sẽn tõe n yã-bã yaa karen-biisã maaneg tʋʋmd nen-kãsenga. Neb sẽn tar minim karen-biisã maaneg pʋgẽ wã kõta kasetã zĩis toɛy-toɛy pʋsẽ n paasdẽ. Zak-zak koe-moonegã toor sẽn ka be, masã koe-moondbã kõta kasetã sɩls yiyã, biru rãmbẽ, mangas rãmbẽ, parkĩng rãmbẽ, biisã yalsg zĩisẽ, soayã zutu, park rãmbẽ, mogrã noy la zĩis a taaba. Hawai tẽngã, yaa woto la b yã neb wʋsg sẽn wa n lebg a Zeova Kaset rãmba. D sã n toeemd d moonegã zĩis la a wakate, na n sõng-d lame tɩ d pids noor ning a Zezi sẽn kõ tɩ d maan karen-biisã.—1 Korẽnt dãmba 9:22, 23.
19. Tʋʋmd ning a Zezi sẽn kõ tõndã nens bʋs la d na n bao n bãng sõsg ning sẽn pʋgdã pʋgẽ?
19 A Zezi tʋʋmd ning sẽn yaa maan karen-biisã pa tɩ loe ne bũmb ning yĩng la zĩig ning d sẽn segd n tʋm tʋʋm-kãngã wã bal ye, la a leb n tɩ loee ne bũmb ning d sẽn segd n moone, la d sẽn segd n ket n moondẽ tɩ ta wakat ningã. D na n bao n bãnga tʋʋmd ning a Zezi sẽn kõ tõndã nens a yiib kãensã sõsg ning sẽn pʋgdã pʋgẽ.
[Tẽngr not rãmbã]
^ sull 2 D na n leoka pipi sogsg a yiibã sõs-kãngã pʋgẽ. D na n leoka yaoolem sogsg a yiibã sõsg ning sẽn pʋgdã pʋgẽ.
^ sull 8 Bʋʋm a taab sẽn kɩt tɩ d moondẽ bee Yelbũna 10:5; Amos 3:8; Matɩe 24:42; Mark 12:17; Rom dãmba 1:14, 15.
^ sull 12 Sẽn na yɩl n paam kɩbay n paas bãngr-gom-kãngã pidsg zugu, bɩ y ges Gũusg Gasgã, 2001, sigri, 1, seb-neng 10, ne La prophétie d’Isaïe, lumière pour toutes les nations, volume 2, seb-neng 408, a Zeova Kaset rãmbã sẽn yiisã pʋsẽ.
Y tẽrame bɩ?
• Yel-bʋse, la yam-sõng bʋg n kɩt tɩ d moond Rĩungã koɛɛg la d maand karen-biisi?
• Rũndã-rũndã, hal sẽn ta zĩ-bʋg la a Zeova sõgen dãmbã maan tʋʋmd ning a Zezi sẽn bobl-b tɩ b maan buudã fãa neb tɩ b yɩ karen-biisã?
• Wãn to la d tõe n toeem d sẽn moond to-to wã, la bõe yĩng tɩ d segd n maan woto?
[Zãmsgã sogsgã]
[Zĩ-gũbri/Foto rãmba, seb-neng 21]
Sɛb zoensã yĩnga
A Albert yaa kiris-neb kãsem soab la a leb n yaa wakat fãa so-pakd sẽn be Etazĩni. A yaa zoanga. Zoensã sɛb nins sẽn tik Biiblã zugã rɩk-n-tʋm sõngd-a-la a koe-moonegã pʋgẽ, la leb n sõngd-a-la sõma n yɩɩd a tʋʋmd ning sẽn yaa ges koe-moonegã tʋʋmd yellã pʋgẽ. Wãn to la a pidsd a tʋʋmdã tigingã pʋgẽ? A James sẽn yaa tigingã yel-gɛt taoor soabã yeelame:
“Tõnd nan pa paam tʋʋmd yel-gɛt sẽn tʋmd sõma wa a Albert d tigingã pʋgẽ ye.” Etazĩni tara zoens 5 000 sẽn paamd zoensã sɛb nins sẽn tik Biiblã zug ne ãngilind la ɛspayollã. A Albert bee bãmb sʋka. Sɩda, yʋʋmd 1912 tɛkã, tʋm-tʋmd sẽn tũud sɩdã sull yiisa zoensã sɛb buud toor-toor sẽn yɩɩd koabga. Yʋʋmd fãa, a Zeova Kaset rãmbã tũnugda ne rũndã-rũndã bãngrã n yiisd sɛb tus ka tɛk zoens yĩnga, sẽn yɩɩd buud-goam piig pʋsẽ n pʋɩt-b sẽn yɩɩd tẽns 70 pʋsẽ. Yãmb mii ned sẽn tõe n dɩ sɛb nins sẽn tik Biiblã zugã b sẽn segl zoensã yĩngã nafa bɩ?
[Zĩ-gũbri/Foto, seb-neng 22]
Mugsã goama, la karen-biisã maanego
Dũniyã gill zugu, a Zeova Kaset rãmb tusa, n paas kom-bɩɩs wʋsg sẽn tar yẽesem zãmsa mugsã goam sẽn na yɩl n sõng mugsã tɩ b lebg Kirist karen-biisi. Rẽ kɩtame tɩ sẽn nan pa kaoose, Berzill pʋgẽ wã bala, mugs 63 reeg lisg yʋʋmd a yembr pʋgẽ. A Zeova Kaset rãmb 35 sẽn yaa mugs yaa wakat fãa so-pakdb tẽn-kãng pʋgẽ. Dũniyã gill zugu, yaa sẽn yɩɩd mugs goam tigims la sul 1 200 n be. Yaa Risi la mugs goam tigims gĩnd ning sẽn yaa kãseng n yɩɩdã be, bala yaa Risi tẽngã fãa n kell n yaa tigims gĩndã.
[Zĩ-gũbri, seb-neng 23]
D sõng nebã b tʋʋmã zĩisẽ tɩ b lebg karen-biisi
A sẽn da wa n kaagd homdafɛɛr dãmbã b tʋʋmã zĩisẽ, Kaset soab a yembr sẽn be Hawai sɛga sosiete de tãrspoor taoor soaba. Baa ne raoã sẽn da tar tʋʋm wʋsgã, a sakame n na n zãms Biiblã minit 30 semen fãa a biru wã pʋgẽ. Arb yibeoog fãa, a yeta a tʋm-tʋmdbã tɩ b sã n bool-a telefõnnẽ bɩ b bas-a sɩɩ, rẽ poore ra yaa Biiblã zãmsg yell n pak-a. Kaset soab a to sẽn be Hawai zãmsda Biiblã vugr semen fãa ne naooda zapa. Biiblã zãmsg maanda zapa nengẽ. Raadeng sã n wa, Kaset soabã lebda kɛɛnga. Raadengã sã n looge, b lebsd n sɩnga b zãmsgã.
Kaset rãmbã sẽn tõog n sõs ne biru wã taoor soaba la zapã, yaa b sẽn yãk yam n na n moon koɛɛgã zĩis toɛy-toɛyã yĩnga. Y tõe n tagsa zĩis sẽn be yãmb tigingã mooneg zĩigẽ y sẽn tõe n sõsẽ ne neb yãab sẽn yaa toog b yiyã bɩ?
[Foto, seb-neng 23]
Y tõe n tɩ moona neb sẽn gomd buud-gom-zẽng bɩ?