Sak-y Wẽnnaam sẽn vɩyã sor-wilgri

‘Sak-y Wẽnnaam sẽn vɩ sẽn naan yĩngr la tẽnga la ko-kãsenga la bũmb nins sẽn be b pʋsẽ wã.’—TƲƲMA 14:15.

1, 2. Bõe yĩng tɩ zems tɩ d sak t’a Zeova yaa “Wẽnnaam sẽn vɩ”?

TƲM-TƲMD a Poll ne a Barnabas sẽn sãoog Listr rao a yembr poore, a Poll wilga neb nins sẽn da zĩnd be n yã rao wã sãoogrã tɩ: “Tõnd me yaa ninsaalb wa yãmb bala. La tõnd moonda yãmb koe-noog tɩ y bas bõn-vɩɩd kãens n sak Wẽnnaam sẽn vɩ sẽn naan yĩngr la tẽnga la ko-kãsenga la bũmb nins sẽn be b pʋsẽ wã.”—Tʋʋma 14:15.

² A Zeova sɩd pa wa wẽnnaam dãmb nins ninsaalbã sẽn naan tɩ pa vɩyã ye, a yaa “Wẽnnaam sẽn vɩ.” (Zeremi 10:10; 1 Tesalonik rãmba 1:9, 10) A Zeova mengã sẽn vɩyã toor sẽn ka be, a yaa tõnd vɩɩmã Kõta. Yẽ n “kõt fãa vɩɩm la vʋʋsem la bũmb fãa.” (Tʋʋma 17:25) A ratame tɩ d rɩ vɩɩmã yõod masã la beoog-daare. A Poll paasame tɩ Wẽnnaam “ka kong kaset dãmb ye. B maana neer n kõ yãmb saaga la sẽoogo la bõn-bɩʋʋng tɩ rɩɩb sek yãmb tɩ y pid ne sũ-noogo.”—Tʋʋma 14:17.

3. Bõe yĩng tɩ d segd n tall bas-yard ne Wẽnnaam sor-wilgrã?

³ Wẽnnaam sẽn get tõnd vɩɩmã yellã kɩtdame tɩ d tar bas-yard ne a sor-wilgrã. (Yɩɩl Sõamyã 147:8; Matɩe 5:45) Kẽer tõeeme n pa tall bas-yard ne a sor-wilgrã, b sã n pa wʋmd Biiblã noor võore, bɩ a sã n wõnd a gɩdgda bãmb ne yɛl kẽer maanego. Baasg zãnga, a Zeova sor-wilgrã sakr yaa yam tʋʋmde. D rɩk makre: Baa Israɛll ned sã n da pa wʋmd noor ning sẽn da gɩdg tɩ b ra sɩɩs kũumã voore, a sakr da bee nafre. Pipi, a sakrã ra pẽnegd-a-la ne Wẽnnaam sẽn vɩyã. Yiib-n-soaba, ra sõngd-a lame t’a zãag a meng ne bãase.—Maankʋʋre 5:2; 11:24.

4, 5. a) Sẽn deng Kirist zãmaanã, no-bʋg la a Zeova kõ zɩɩmã wɛɛngẽ? b) Wãn to la d mi tɩ noor ning Wẽnnaam sẽn kõ zɩɩmã wɛɛngẽ wã paka kiris-nebã me?

⁴ Yaa woto me ne noy nins Wẽnnaam sẽn kõ zɩɩmã wɛɛngẽ wã. A yeela a Nowe tɩ ninsaalbã pa segd n dɩ zɩɩm ye. Rẽ n so tɩ Tõogã pʋgẽ, Wẽnnaam wilgame tɩ zɩɩmã rɩk n tʋm manesem a ye bal sẽn tat a yam yaa tẽn-kugrã zug yel-wẽnã sugr kũun yĩnga. Ne no-kãens maasem, Wẽnnaam da wilgda a sẽn da na n wa rɩk zɩɩmã n tʋm ne manesem kãseng sẽn tɩ yɩɩd fãa: Yaa sẽn na yɩl n fãag nebã ne rond ning a Zezi sẽn da na n wa kõ wã maasem. (Hebre dãmba 9:14) N-ye, Wẽnnaam sẽn kõ no-kãngã wã ra yaa tõnd vɩɩmã la d neerã yell n da pak-a. A Adam Clarke sẽn yɩ Biiblã mit a ye sẽn vɩɩmd yʋʋm kob-gĩnd 19 soabã sasa wã goma Sɩngre 9:4 yell n gʋls woto: “Yaang kiris-nebã ket n tũudã no-kãngã b sẽn taas [a Nowe wã] neere . . . Nebã ra pa segd n dɩ zɩɩmTõogã tũub wakat ye, bala a ra makda zɩɩm ning sẽn da na n wa raag dũniyã neb yel-wẽn yĩngã. Kiris-nebã pa segd n dɩ zɩɩm ye, bala wakat fãa b segd n ges-a-la wa bũmb sẽn makd zɩɩm ning sẽn daag yel-wẽnã sugr kũun yĩngã.”

⁵ Tõe tɩ nin-kãngã ra gomda koe-noog ning sẽn tik a Zezi zugã yelle. Wẽnnaam sẽn tʋm a Biriblã t’a wa ki tõnd yĩnga, n daag a zɩɩmã sẽn na yɩl tɩ tõnd tõog n paam vɩɩm sẽn pa satã bee koe-kãng pʋgẽ. (Matɩe 20:28; Zã 3:16; Rom dãmba 5:8, 9) A Adam Clarke goamã leb n tɩ loee ne noor ning b sẽn wa n kõ Kirist karen-biisã n yeel-b tɩ b segd n laka b mens ne zɩɩmã.

6. No-bʋs sẽn tɩ loe ne zɩɩmã la b kõ kiris-nebã, la bõe yĩnga?

⁶ Yãmb miime tɩ Wẽnnaam kõo Israɛll nebã noy kobse. A Zezi sẽn ki wã, ra pa leb n yaa tɩlae ne a karen-biisã tɩ b tũ no-kãens fãa ye. (Rom dãmba 7:4, 6; Kolos rãmba 2:13, 14, 17; Hebre dãmba 8:6, 13) La no-keemd sẽn tɩ loe ne rapã bãong kõom sẽn da yaa no-kãsengã n wa n puki. Rẽ yĩnga, sẽn da pa-b Zʋɩf rãmb n dat n dɩ Kirist zɩɩmã nafa wã ra segd n kẽe bãong n wilg tɩ b ket n tũuda Tõogã bɩ? Yʋʋmd 49 wã, kiris-neb siglgã taoor lʋɩtb sull welga yel-kãngã. (Tʋʋma sak 15) Ne Wẽnnaam vʋʋsem sõngã sõngre, tʋm-tʋmdbã la kãsem dãmbã wilgame tɩ bãongã kõom sẽn da yaa tɩlaeyã naaga Tõogã n sa. La Wẽnnaam noy a taab la kiris-nebã ra segd n ket n tũudẽ. Lɛtr ning siglgã taoor lʋɩtb sull sẽn taas tigimsã pʋgẽ, b gʋlsa woto: “Tɩ bõe, Sɩɩg Sõngo la tõnd me tẽedame tɩ yaa neer tɩ tõnd da paas yãmb zɩɩb sẽn yɩɩd bõn-kãensa sẽn yaa tɩlae wã ye. A yaa tɩ yãmb da rɩ [bɩ lak ne] maand nemd neb sẽn kõ bõn-naands b sẽn pʋʋsd wa Wẽnnaam, la zɩɩm, la bũmb nins sẽn sãrge, la y ra maan yoob ye. Yãmb sã n lak ne bãmba, yãmb maana neere.”—Tʋʋma 15:28, 29.

7. Hal sẽn ta zĩ-bʋg la tar yõod ne kiris-nebã tɩ b ‘lak b mens ne zɩɩmã’?

⁷ Vẽenega, siglgã taoor lʋɩtb sull da geta ‘lak ne zɩɩmã’ wa noor sẽn tar yõod wʋsg wala lak f meng ne yoobã bɩ bõn-naands pʋʋsgã. Rẽ wilgdame tɩ gɩdgr ning sẽn tɩ loe ne zɩɩmã pa reem yell ye. Kiris-neb nins sẽn pʋʋsd bõn-naands bɩ sẽn yood n pa tekd yam n kos sugrã pa tõe n “paam Wẽnnaam soolem” ye, la “bãmb pʋɩɩr na n yɩɩ . . . kũum a yiib soaba.” (1 Korẽnt dãmba 6:9, 10; Wilgri 21:8; 22:15) Ges-y manesem kãensã biis sẽn yaa toor wʋsg ne taabã: Kɩɩs Wẽnnaam noyã sẽn tɩ loe ne zɩɩmã tõe n waa ne kũum wakat fãa yĩnga, la tall waoogr ne a Zezi maoongã tõe n kõo ned vɩɩm sẽn pa sate.

8. Bõe n wilgd tɩ pipi kiris-nebã ra pa reemd ne Wẽnnaam noyã sẽn tɩ loe ne zɩɩmã tũubu?

⁸ Wãn to la pipi kiris-nebã wʋm Wẽnnaam noyã sẽn tɩ loe ne zɩɩmã võore, la wãn to la b tũ-ba? Tẽeg-y a Clarke sẽn togsã: “Kiris-nebã ra pa segd n dɩ zɩɩm ye, bala wakat fãa b segd n gesame t’a makda zɩɩm ning sẽn daag yel-wẽnã sugr yĩngã.” Pĩnd yɛlã mitb wilgdame tɩ pipi kiris-nebã pa reem ne no-kãng ye. A Tɛrtiliẽ gʋlsame: “Ges-y neb nins sẽn yũud tʋʋm-wẽns maandbã zɩɩm ne yão-beed ning Rom dãmbã reem zĩigẽ . . . sẽn na yɩl n maag b kĩnsinkĩirã.” Bõn-naands pʋʋsdbã ra rɩta zɩɩm, la a Tɛrtiliẽ yeelame tɩ kiris-nebã “ra pa rɩt rũmsã zɩɩm meng ye . . . Kiris-nebã bʋʋdẽ, yãmb kõt-b-la yãad b sẽn suy zɩɩm n dʋge. La yãmb pʋd n miime tɩ rẽ kɩɩsda noy nins b sẽn segd n tũ wã.” N-ye, baa b sã n da na n kʋ-ba, kiris-nebã ra pa rɩt zɩɩm ye. Wẽnnaam noyã ra tara yõod wʋsg ne-ba.

9. Ra rɩ zɩɩmã toor sẽn ka be, b sẽn yeel tɩ d lak d mens ne-a wã naaga bõe me?

⁹ Kẽer tõe n tagsame tɩ siglgã taoor lʋɩtb sull da gɩdgdame bal tɩ kiris-nebã ra rɩ bɩ b yũ zɩɩm meng-menga, tɩ b ra wõb rũng sẽn ki gɩfo, la b ra rɩ rɩɩb sẽn kalem ne zɩɩm ye. Yaa sɩd tɩ noor ning Wẽnnaam sẽn kõ a Nowe wã pipi võor yaa woto. La tʋm-tʋmdbã sẽn yiis noor ningã sɩd yeta kiris-nebã tɩ b ‘lak b mens ne bũmb sẽn sãrge,’ sẽn yaa nemd sẽn ket n tar zɩɩmã. (Sɩngre 9:3, 4; Tʋʋma 21:25) La pipi kiris-nebã ra miime t’a võorã yɩɩda woto. Wakat ninga, b ra rɩkda zɩɩmã n tɩpd neba. A Tɛrtiliẽ wilgame tɩ bõn-naands pʋʋsdbã kẽer da yũuda zɩɩm b sẽn yãk paalem sẽn na yɩl n tɩp kĩnsinkĩiri. Tõe tɩ b ra rɩkda zɩɩmã n tʋmd ne manesem a taab sẽn na yɩl n tɩp bãas bɩ n tẽed t’a paasda yĩns laafɩ. Rẽnd b sẽn yeel tɩ kiris-nebã lak b mens ne zɩɩmã, rat n yeelame me tɩ b ra rɩk-a n “tɩbs” b mens ye. B kell n tũu no-kãngã, baa woto sã n da tõe n ninga b vɩɩmã yell pʋgẽ.

Zɩɩmã rɩk n tɩpe

10. Wãn to la b rɩkd zɩɩmã n tʋmd tɩbsgã pʋgẽ, la rẽ wata ne sok bʋgo?

¹⁰ Rɩk zɩɩmã n tɩbs neb yaa bũmb sẽn wae masã. Pĩndã, neb n da sakd tɩ b yãk b zɩɩmã n bĩng sẽn na yɩl n wa rɩk n ning bãada, wala makre, ned sẽn pogl zabr pʋgẽ. Kaoos zugẽ, bãngdbã tõog n welga zɩɩmã bab-kãsems a naase. Logtoɛɛmbã sẽn dɩkd zɩɩmã babs kẽer n ningd nebã, b tõe n kõo zɩɩmã bãad dãmb wʋsg n paase. B tõe n dɩka zɩ-koomã b sẽn boond tɩ plasma wã n ning ned sẽn pogle, la b rɩk zɩ-bi-miidã (b sẽn boond tɩ globulruuz rãmbã) n ning ned a to. Vaeesgã b sẽn ket n maandẽ wã wilgame tɩ b tõog n dɩka zɩɩmã bab-kãseng wala zɩ-koomã, n welg-a babs wʋsgo, n yaool n ning-a bãad dãmb wʋsg n paase. B ket n maoodame n na n welg zɩɩmã babs a taaba, la b wilgame tɩ b rɩkda bab-kãensã n tʋmd ne manesem paalse. Kiris-ned manesem ne zɩɩmã bab-kɩds rɩk n tɩp segd n yɩɩ bõe? Kiris-nedã tõe n dɩka sard t’a pa na n sak tɩ b ning-a zɩɩm abada, la a logtorã tõe n yeelame tɩ sã n yaa woto bɩ a sak zɩɩmã bab-kãseng a yembre, tõe tɩ yaa zɩ-bi-miidã. Bɩ tõe tɩ tɩbsgã yaa zɩɩmã bab-kãseng b sẽn kẽ be n ye weel n yãk a bab-kɩdga. Wãn to la Wẽnnaam sõgen tõe n maan yel-kãensã wɛɛngẽ n pa yĩm tɩ zɩɩmã tara yõod wʋsg Wẽnnaam nifẽ, la tɩ Kirist zɩɩmã n fãagd yõy n yɩɩd sẽn keta fãa?

11. Hal sẽn kaoose, tags-bʋg takɩ la a Zeova Kaset rãmbã tar zɩɩmã rɩk n tɩbs wɛɛngẽ?

¹¹ Hal sẽn na maan yʋʋm wʋsg sẽn looge, a Zeova Kaset rãmbã tagsg yɩɩ vẽeneg yel-kãngã zugu. Wala makre, b gʋlsa sõsg b sẽn yiis Amerik zʋrnall a yembr pʋgẽ (The Journal of the American Medical Association, yʋʋmd 1981, sɩpaolg  kiuug rasem 27; tɩ b lebg n yiis-a sebr ning gom-zug sẽn yaa: Comment le sang peut-il vous sauver la vie ?  * pʋgẽ, seb-neng 27-9) Sõs-kãng wilga verse rãmb sẽn yit Sɩngre, Maankʋʋr la Tʋʋm sebrã pʋsẽ. A yeelame: “Baa ne b sẽn pa togs verse kãensã ne logtoeemd gom-biisã, a Zeova Kaset rãmbã get-b-la wala noor sẽn gɩdg zɩɩmã tõr ningri, zɩ-bi-miidã la zɩ-koomã n paas zɩ-bi-pɛɛlã (b sẽn boond tɩ globull blã rãmbã) la zɩ-soayã lim (b sẽn boond tɩ plakɛt dãmbã) ningri.” Sebr b sẽn yiis yʋʋmd 2001 (Emergency Care) yetame: “Zɩɩmã tara babs a wãna: zɩ-koomã, zɩ-bi-miidã, zɩ-bi-pɛɛlã ne zɩ-soayã limã.” Rẽnd wa sẽn zems ne tɩbsgã yɛlã, a Zeova Kaset rãmbã zãgsda zɩɩmã tõre, la a bab-kãsems a naasã a ye fãa reegre.

12. a) Manesem bʋg võor la b wilg sẽn tɩ loe ne zɩɩmã bab-kãsems b sẽn weelã? b) Yɛ la d tõe n paam vẽnegr n paas yel-kãngã zugu?

¹² Tɩbsgã wɛɛngẽ sebrã paasdame: “A Zeova Kaset rãmbã tũudum pa gɩdg fasɩ-fasɩ tɩ b ra rɩk zɩɩmã bab-kɩds sẽn weel n tɩbse, wala zɩɩmã gũuda (b sẽn boond tɩ albuminnã), yĩngã sodaas (b sẽn boond tɩ imunoglobulinnã), la bũmb sẽn yalsd zɩɩmã yiib ye. A Zeova Kaset soab fãa segd n dɩka sard a sã n na n saka zɩɩmã bab-kɩds kãensã a yembr bɩ a sã n pa na n sake.” Yʋʋmd 1981 wã tɛka, zɩɩmã bab-kɩds wʋsgo (a bab-kãsems a naasã a yembr b sẽn weele) la b rɩk n tʋme. Woto, Gũusg Gasgã 2000, sigri, 15 (ne farende) kõo vẽnegr yel-kãngã zug “Karemdbã sogsgã” pʋgẽ. Sẽn na yɩl t’a naf karemdb milyõ rãmba, b leb n yiisa leokrã Gũusg Gasgã 2004, sigri, 15 (ne farende) seb-neng 29-31 pʋgẽ. Sõs-kãng wilga yɛl toɛy-toɛya, la a kõ sagls sẽn zemse, la y na n yãame t’a sẽn yet bũmb ningã zemsa ne b sẽn wilg yʋʋmd 1981 wã.

Yãmb sũur-kasetã tʋʋmd sẽn yaa a soaba

13, 14. a) Sũur-kãset yaa bõe, la tʋʋm-bʋg la a tar zɩɩmã wɛɛngẽ? b) No-bʋg la Wẽnnaam kõ Israɛll nemdã wõbr wɛɛngẽ, la rẽ tõe n waa ne sogs-bʋse?

¹³ D sã n wa na n dɩk sard sẽn tɩ loe ne yel-kãngã, d sũur-kãsetã kẽeda sʋka. Bõe yĩnga? Kiris-nebã sak n deegame tɩ b segd n tũu Wẽnnaam sor-wilgri, la yɛl kẽer pʋsẽ, ned kam fãa segd n kelga a sũur kasetã n dɩk a meng sardo. Sũur-kasetã yaa bũmb sẽn sõngd tõnd tɩ d mag yɛlã, n dɩk sard yɛl zut sẽn tɩ loe naoor wʋsg ne sõma la wẽngã. (Rom dãmba 2:14, 15) La y miime tɩ nebã sũur-kaset pa taab ye. * Biiblã wilgdame tɩ neb kẽer ‘sũur-kaset ka pãnga,’ tɩ woto wilgdẽ tɩ neb sãnda sũur-kaset tara pãnga. (1 Korẽnt  dãmba 8:12, NW ) Kiris-nebã bɩʋʋng tẽebã pʋgẽ pa taaba, sã n yaa ne zãms n bãng Wẽnnaam daabã, sak Wẽnnaam sẽn tagsd to-to, la tik rẽ zug n dɩkd sardã ye. D rɩk makr ne Zʋɩf rãmbã, la nemd buud ning bãmb sẽn da tõe n wõbã.

¹⁴ Biiblã wilgda vẽeneg tɩ ned sẽn sakd Wẽnnaam pa segd n dɩ gɩf ye. Woto ra tara yõod wʋsgo, hal tɩ baa Israɛll sodaasã sẽn wõb nemdã ne a zɩɩmã yel-pakr sasa wã menga, ra yaa yel-wẽn-kãsenga. (Tõodo 12:15, 16; 1 Sãmwɛll 14:31-35) Ne rẽ fãa, rẽnda ra tõe n waa ne sogsgo. Israɛll ned sã n da kʋ pesgo, wakat a wãn pʋgẽ la a ra segd n yiis a zɩɩmã? A ra segd n kodg-a lame n yiis a zɩɩmã bɩ? Ra yaa tɩlae tɩ b zẽk pesgã poorẽ nao bɩ? Rẽ ra segd n kaoosa wakat a wãna? Sã n yaa nag-bedre, wãn to la a ra segd n maane? Baa kodgrã poore, zɩɩm bilf n tõe n ket nemdẽ wã. A ra tõe n wõba nem-kãng bɩ? Yaa and soab n da segd n dɩk sard yel-kãensa wɛɛngẽ?

15. Zʋɩf rãmb kẽer manesem yɩɩ wãn to ne nemdã wõbre, la sor-wilgr bʋg la Wẽnnaam kõ-yã?

¹⁵ D rɩk makr ne wala Israɛll ned sẽn tũud Wẽnnaam sõma sẽn da segd n leok sogs-kãensã. A ra tõeeme n tags t’a pa na n da raagẽ nemd tɩ rẽ n são, wala ned a to sẽn pa na n da nemd a sẽn tẽed tɩ b reng n dɩk-a lame n maan maoong n kõ rʋbgã. Zʋɩf rãmb a taab ra tõe n wõba nemdo, la yaa b sẽn da na n deng n yiis a zɩɩmã tɩ zems ne rog-n-mikã. * (Matɩe 23:23, 24) Yãmb tagsda wãn to ne nebã manesem sẽn yaa toor-toor woto wã? Sẽn paase, sẽn mik tɩ Wẽnnaam pa baood tɩ b tũ rog-n-mik kãensa wã, ra yaa bũmb sẽn zems tɩ Zʋɩf rãmbã tool b tũudmã taoor dãmb sull sogsg wʋsg sẽn na yɩl n paam noor b sẽn na n tũ sokr fãa zug bɩ? Baa ne minung kãngã sẽn da wa n piuug Zidaismã tũudum pʋgẽ wã, d sũy yaa noog a Zeova sẽn pa yeel a balemdb hakɩkã tɩ b bao n tũ noy woto zɩɩmã wɛɛngẽ wã. Wẽnnaam kõo sor-wilgr sẽn tɩ loe ne rũm-yɩlmã koodg la b zɩɩmã raagre, la a pa togs tɩ yɩɩg woto ye.—Zã 8:32.

16. Bõe yĩng tɩ kiris-nebã tagsg pa taab zɩɩmã bab-kãseng a ye bab-kɩdg reegr wɛɛngẽ?

¹⁶ Wala b sẽn wilg sull 11 la 12 wã, a Zeova Kaset rãmbã pa sakd tɩ b ning-b zɩɩm tõr bɩ a bab-kãsems a naasã, sẽn yaa zɩ-koomã, zɩ-bi-miidã, zɩ-bi-pɛɛlã la zɩ-soayã limã ye. Yaa wãn to ne bab-kɩds nins b sẽn yãk zɩɩmã bab-kãsemsẽ wã, wala serom sẽn tar yĩngã sodaas sẽn na yɩl n zab ne bãaga, bɩ ne waaf zẽnemã? (Ges-y Gũusg Gasgã, 2004, sigri, 15 [ne farende] seb-neng 30, sull a 4.) Kẽer tagsame tɩ bab-kɩds kãensã pa leb n yaa zɩɩm meng-meng ye, la tɩ rẽ yĩnga tɩp-kãnga pa kɩɩsd noor ning b sẽn kõ tɩ d ‘lak d mens ne zɩɩmã’ ye. (Tʋʋma 15:29; 21:25; Gũusg Gasgã, 2004, sigri,15 [ne farende] seb-neng 31, sull a 1) Yaa bãmb n segd n kolg n togs Wẽnnaam taoor ne sard ning b sẽn dɩkã. Neb a taab sũur-kaset yet-b lame tɩ b zãgs bũmb ning fãa sẽn tɩ loe ne zɩɩm (rũms la ninsaalb rẽnda), baa yaa zɩɩmã bab-kãseng a yembr bab-kɩdga. * La kẽer me sakdame tɩ b  vʋdg-b zɩ-koom sẽn tar bũmb ning b sẽn boond tɩ proteina (protéines plasmatiques) sẽn na yɩl n mao ne bãag bɩ ne waaf zẽnem, n yaool n tõe n zãgsd zɩɩmã bab-kɩds a taaba. Sẽn paase, tɩɩm kẽer b sẽn yiis zɩɩmã bab-kãsems a naasã a yembrẽ tõe n tʋmda wa zɩɩmã bab-kãseng a yembr vɩɩmã zãab pʋgẽ, tɩ kɩt tɩ kiris-neb wʋsg getẽ tɩ b pa segd n dɩk-b ye.

17. a) Wãn to la d sũur-kasetã tõe n sõng-do, d sã n wa be yɛl sẽn tɩ loe ne zɩɩmã bab-kãsems bab-kɩds reegr taoore? b) Bõe yĩng tɩ sard nins d sẽn dɩkd yel-kãngã wɛɛngẽ wã pa reem yelle?

¹⁷ Bĩiblã sẽn yet bũmb ning sũur-kasetã wɛɛngẽ wã na n sõng-y lame, y sã n wa rɩkd sard kãense. Y sẽn segd n maan bũmb ning pipi yaa y zãms n bãng Wẽnnaam Gomdã sẽn yet bũmb ninga, la y modg t’a rems y sũur-kasetã. Rẽ na n sõng-y lame tɩ y rɩk sard tɩ zems ne Wẽnnaam sor-wilgri, la y pa na n kos ned a to t’a yãk noor n kõ-y ye. (Yɩɩl Sõamyã 25:4, 5) Sã n yaa ne zɩɩmã bab-kɩds reegr wɛɛngẽ, neb kẽer tagsa woto: ‘Yaa sũur-kaset yelle, yell ka a pʋgẽ ye.’ La tags-kãngã pa zems ye. Pa bũmb sẽn yaa sũur-kaset yell yĩng la a pa tar yõod ye. A tõeeme n yɩ yell menga. Bũmb a yembr sẽn kɩt tɩ yaa woto wã yaa t’a tõe n sãama neb nins sũur-kaset sẽn yaa toor ne tõnd rẽndã. D nee woto saglg ning a Poll sẽn kõ nemd b sẽn dɩk n maan maand n kõ rʋbs n yaool n tɩ koos-a raagẽ wã wɛɛngẽ pʋgẽ. Kiris-ned segdame n gũus n da ‘sãam sũur kaset nins sẽn ka pãngã ye.’ A sã n lub neb a taabã, a tõe n ‘sãama a ba-biiga Kirist sẽn ki a yĩngã’ n beeg Kirist. Woto yĩnga, yaa ned kam fãa n segd n yãk a sã n na n sakame n tɩp a meng ne zɩɩm bab-kɩds bɩ a pa na n sake, la woto yaa bũmb sẽn pa reem yelle.—1 Korẽnt dãmba 8:8, 11-13; 10:25-31.

18. Bõe la kiris-ned tõe n maan n da wa kʋ a sũur-kasetã, sard nins a sẽn dɩkd zɩɩmã wɛɛngẽ wã pʋgẽ?

¹⁸ Bũmb a to sẽn tɩ loe ne yel-kãngã wilgdame tɩ sard nins d sẽn dɩkd zɩɩmã wɛɛngẽ wã pa reem yell ye. Sard kãensã buud tõe n talla pãn-tusdg woto yãmb zugu. Yãmb sã n miẽ tɩ y sã n dɩk zɩɩmã bab-kãsems a naasã a ye bab-kɩdga na n wa namsa y sũur-kãsetã sẽn paam Biiblã zãmsgã, y segd n kelga y sũur-kasetã. Y segd n kelga y sũur-kasetã sẽn yet-y bũmb ningã, baa ned sã n yeel-y tɩ pa wẽng tɩ y sak bõn-kãngã tɩ bala neb wʋsg n sak-a. Tẽeg-y tɩ rũndã-rũndã, neb wʋsg n pa kelgd b sũur-kasetã, tɩ rẽ kɩt tɩ b sũur-kasetã ki, tɩ b tõe n yag ziri, bɩ b maand tʋʋm wẽns a taab tɩ pa zabd-b ye. Kiris-nebã gũusda wʋsg n da wa maan woto ye.—2 Sãmwɛll 24:10; 1 Tɩmote 4:1, 2.

19. D sã n wa rɩkd sard sã n yaa ne zɩɩmã rɩk n tɩpã wɛɛngẽ, bõe la d segd n ning d yamẽ n tɩ yɩɩda?

¹⁹ Leokrã d sẽn lebs n yiis seb-neng 29-31 pʋgẽ wã yeta a baasgẽ wã tɩ: “Nebã tagsa la b yam-yãkr sẽn yaa toɛy-toɛyã rat n yeelame tɩ d sẽn maaneg fãa koɛɛg kae bɩ? Ayo. Yaa yam-yãkr sẽn pa reem yelle.” Sẽn sɩd yaa woto wã yaa rẽ sẽn tar loees ne yãmb zems-n-taarã ne “Wẽnnaam sẽn vɩyã.” Yaa zems-n-ta-kãng bal n na n tall-y n kẽng vɩɩm sẽn pa satẽ wã, a Zezi zɩɩmã sẽn daagã sẽn kõt fãagrã maasem yĩnga. Tall-y waoogr sẽn yaa kãseng wʋsg ne zɩɩmã, Wẽnnaam sẽn tũnugd ne-a n fãagd yõyã yĩnga. A Poll gʋlsa woto ne bʋʋm: ‘Yãmb da ka tar tẽeb la Wẽnnaam dũniyã pʋgẽ ye. La masã Kirist Zezi pʋgẽ, yãmb sẽn da zãr wʋsgã, yãmb pẽeme Kirist zɩɩma yĩnga.’—Efɛɛz rãmba 2:12, 13.

[Tẽngr not rãmbã]

Y tẽrame bɩ?

• Wẽnnaam kõo a Nowe, Israɛll nebã la kiris-nebã sor-wilgr bʋg zɩɩmã wɛɛngẽ?

• Zɩɩmã wɛɛngẽ, bõe la a Zeova Kaset rãmbã zãgsd fasɩ-fasɩ?

• Wãn to la zɩɩmã bab-kãseng a yembr bab-kɩdg reegr be ne ned kam fãa sũur-kaseto, la bõe la woto pa rat n yeele?

• D sã n wa rɩkd sardo, bõe yĩng tɩ d segd n ning d zems-n-taar ning d sẽn tar ne Wẽnnaamã d yamẽ n tɩ yɩɩd fãa?

[Zãmsgã sogsgã]

 [Taablo, seb-neng 14]

(Sebrã meng pʋgẽ la y tõe n yã fãa)

KIRIS-NEBÃ TAGSG ZƖƖMÃ WƐƐNGẼ

ZƖƖMÃ TÕRE

▾ ▾ ▾ ▾

B PA SAKD-A YE Zɩ-bi-miidã Zɩ-bi-pɛɛlã Zɩ-soayã lima Zɩ-koomã

KIRIS-NED FÃA ▾ ▾ ▾ ▾

N DƖKD SARDO Zɩ-bi-miidã Zɩ-bi-pɛɛlã Zɩ-soayã lim Zɩ-koomã

babse babse babse babse

[Foto, seb-neng 14]

Siglgã taoor lʋɩtb sull yeelame tɩ kiris-nebã segd n ‘laka b mens ne zɩɩm’

[Foto, seb-neng 17]

Y sã n wa segd n dɩk sard zɩɩmã bab-kɩdg reegr wɛɛngẽ bɩ y kelg y sũur-kasetã