D tall Kirist tagsg yɩ nin-kãsengã wɛɛngẽ
D tall Kirist tagsg yɩ nin-kãsengã wɛɛngẽ
“La ned ninga fãa sẽn dat n yɩ yãmb nin-kãsenga, bɩ a yɩ yãmb [sõgna].”—MATƖE 20:26.
1. Dũniyã neb tagsda wãn to yɩ nin-kãsengã wɛɛngẽ?
PĨND wẽndẽ Ezipt galʋ-tẽng b sẽn boond tɩ Tɛɛb noorẽ wã (rũndã-rũndã yaa Karnak), sẽn zems kɩlometr 500 ne Kɛɛre, a Faraõ Amenhotep a 3 soab naand woglem sẽn ta metr 18 n yas be. Ned pa tõe n ges bõn-naandg kãngã sẽn yaa kãsengã n pa tags tɩ yẽ yaa kɩdg wʋsg a taoor ye. Sãmbg sẽn ka be, bõn-naandg kãngã b sẽn maan sẽn na yɩl tɩ b balem naabã wa Wẽndã wilgda dũniyã neb sẽn tagsd to-to, yɩ nin-kãsengã wɛɛngẽ. B tagsdame tɩ yaa f sẽn na n maan f meng nin-kãseng wa f sẽn tõe tɛka, tɩ neb a taab tags tɩ b pa baa fʋɩ f taoor ye.
2. Mak-bʋg la a Zezi kõ a karen-biisã, la sogs-bʋs la d segd n sok d mense?
2 Ges-y tags-kãngã sẽn yaa toor to-to ne tagsg ning a Zezi Kirist sẽn zãms nebã yɩ nin-kãsengã wɛɛngẽ wã. Baa ne a Zezi sẽn da ya a karen-biisã ‘Zusoab la b karen-saambã,’ a zãms-b lame tɩ yaa f sẽn na n yɩ neb a taabã sõgen la f yaa nin-kãsenga. A Zezi tẽng zug vɩɩmã yaoolem yʋngo, a wilga a sẽn zãms nebã bũmb ningã võore, n pek a karen-biisã naoã. Ad sɩd yɩɩ sik-m-meng tʋʋmd menga! (Zã 13:4, 5, 14) Bõe la yãmb nong n yɩɩda? Y sẽn na n yɩ neb a taabã sõgen bɩ, bɩ neb a taabã sẽn na n yɩ yãmb sõgen dãmba? Kirist sẽn kõ makr ningã kɩtame tɩ y tʋll n yɩ sik-m-meng soab wa yẽ bɩ? Sã n yaa woto, bɩ d ges Kirist tagsg sẽn ya a soab yɩ nin-kãsengã wɛɛngẽ. Tagsg kãng yaa toor wʋsg ne dũniyã sẽn nong n tagsd to-to wã.
Lak-y y meng ne dũniyã tagsg yɩ nin-kãsengã wɛɛngẽ wã
3. Biiblã mak-bʋs n wilgd baas-beed ning sẽn paamd neb nins sẽn baood ziir ninsaalbã nengẽ wã?
3 Biiblã tara makr toɛy-toɛy sẽn wilgd tɩ dũniyã sẽn tagsd to-to yɩ nin-kãsengã wɛɛngẽ wã baasda yooko. Tags-y nin-kãseng a Haman sẽn da tar naam Pɛrs rĩmã zakẽ a Ɛstɛɛr la a Mardose wakatẽ wã yelle. A Haman sẽn da baood ziirã baasa ne yãnd la kũum. (Ɛstɛɛr 3:5; 6:10-12; 7:9, 10) Yaa wãn to ne wuk-m-meng soab a Nebukadnezaar b sẽn da lob gãeems a sẽn da wa n be a naamã piig la a yiib zugã? A tagsgã sẽn da pa zems yɩ nin-kãsengã wɛɛngẽ wã yɩɩ vẽeneg a gom-kãensã pʋgẽ: “Gese, Babilon yaa kãsenga! Yaa ne m yama la m noora la m me-a tɩ yɩ na-tẽnga, m naama ne m ziira yĩnga.” (Daniɛll 4:27) D ges bũmb ning sẽn paam wuk-m-meng soab a Herood Agripa pipi soabã sẽn sak ziir sẽn pa segd ne-a wã, la a pa kõ Wẽnnaam ziirã. “Zũnzũy rɩɩ yẽnda t’a ki.” (Tʋʋma 12:21-23) Ra-kãensã sẽn pa bãng a Zeova tagsg sẽn ya a soab yɩ nin-kãsengã wɛɛngẽ wã kɩtame tɩ b fãa baas ne yãnde.
4. Ãnd soab n kɩt tɩ dũniyã tar wuk-m-meng yam?
4 Zemsame tɩ d tʋlg n dɩk d vɩɩmã n tʋm tɩ wa ne pẽgr la waoogr n kõ-do. La a Sʋɩtãan tũnugda ne tʋlsem kãng n tusd-d tɩ d tall wuk-m-meng yam sẽn pukd yẽ mengã rat-taoor yamã. (Matɩe 4:8, 9) Ra tol-y n yĩm-y t’a yaa “dũni kãngã wẽnnaam,” la t’a rɩka sard sẽn pa vigsd n na n tus tẽngã zug neb tɩ b tags wa yẽ ye. (2 Korẽnt dãmba 4:4; Efɛɛz rãmba 2:2; Wilgri 12:9) Kiris-nebã lakda b mens ne dũniyã neb tagsg yɩ nin-kãsengã wɛɛngẽ, b sẽn mi tags-kãngã sẽn yitẽ wã yĩnga.
5. Arzɛka, yʋʋr la yɛl nins d sẽn tõog n maanã tõe n kõo sũ-noog sẽn kaoosd bɩ? Wilg-y-yã.
5 Tagsg a yembr a Sʋɩtãan sẽn dat tɩ nebã tall yaa tɩ f sã n paam tɩ f yʋʋr yi dũni kãngã pʋgẽ, n paam nebã pẽgr la ligd wʋsg bala, f paamda sũ-noogo. La yaa sɩd bɩ? Arzɛka, yʋʋr bɩ yɛl nins f sẽn tõog n maanã sɩd kɩtdame tɩ f paam sũ-noog bɩ? Biiblã keoogda tõnd tɩ d ra bas tɩ tags-kãngã belg-d ye. Rĩm a Salomo sẽn yaa yam soabã gʋlsame: “Mam yãame tɩ tʋʋm nins fãa neba sẽn maanda la tõogr nins fãa neba sẽn tõogdã, yaa sũ-kiir n tar ned kam fãa ne a yaka. Yõwã me yaa zaalem la a wẽnda ned sẽn digd sobgo.” (Koɛɛg Soaba 4:4) Neb wʋsg sẽn mao n bao yʋʋr la arzɛk dũniyã pʋgẽ tõe n kõo kaset tɩ Biiblã sagl-kãngã Wẽnnaam sẽn kɩt tɩ b gʋlsã yaa sɩda. Makr a yembr ne rẽ yaa rao a yembr sẽn sõng n maan masĩn sẽn kẽngd kiuugẽ wã. A yeelame: “Mam da tʋma wʋsg n paam tõog wʋsg m tʋʋmdã pʋgẽ. La yɩɩ faoore, bɩ pa tall yõodo, bala rẽ pa sõng maam tɩ m paam sũ-noog sẽn kaoosd la sũur pʋgẽ bãan ye.” * Dũniyã neb sẽn tagsd to-to yɩ nin-kãsengã wɛɛngẽ, yaa ligdã baoob tɩ yaa ɛspoorã la reemã wɛɛngẽ me, a pa kõt sũ-noog sẽn kaoosd ye.
Yɩ nin-kãseng yaa yɩ neb a taabã sõgna, nonglem yĩnga
6. Bõe n wilgd t’a Zak ne a Zã ra tara tagsg sẽn pa zems yɩ nin-kãsengã wɛɛngẽ?
6 Bũmb n maan a Zezi vɩɩmã pʋgẽ tɩ wilgd yɩ nin-kãseng sẽn sɩd baood tɩ d maan bũmb ninga. A Zezi ne a karen-biisã ra togda sor n digd Zerizalɛm n na n tɩ maan yʋʋmd 33 Pakã. Sorã zugu, a Zezi roagdb a yiibu, a Zak ne a Zã talla tagsg sẽn pa zems yɩ nin-kãsengã wɛɛngẽ. B kɩtame tɩ b ma wã kos a Zezi woto b yĩnga: ‘Bɩ y kõ noor tɩ tõnd zĩnd y rɩtg la y goabg yãmb soolmã pʋgẽ.’ (Matɩe 20:21) Zʋɩf rãmbã sʋka, b ra getame tɩ f sã n zĩnd ned nug goabg bɩ a rɩtgo, yaa zu-no-kãsenga. (1 Rĩm dãmba 2:19) A Zak ne a Zã maana sɩlem n dat n paam naam zĩis nins sẽn yaa kãsems n yɩɩdã. B ra ratame tɩ b kõ-b zu-sobend zĩ-kãensã. A Zezi ra mii bũmb ning b sẽn da tagsdã, la a tũnuga ne rẽ n dems b tagsgã sẽn da pa zems yɩ nin-kãsengã wɛɛngẽ wã.
7. Wãn to la a Zezi bilg yɩ nin-kãseng sẽn dat n yɛɛlg ne kiris-ned hakɩka?
7 A Zezi ra miime tɩ dũni kãngã neb sẽn tar wuk-m-mengã pʋgẽ, ned ning b sẽn get wa nin-kãseng yaa ned sẽn so a taab n kõt-b noyã, n kɩtdẽ tɩ b maand a sẽn datã fãa tao-tao. La a Zezi karen-biisã sʋka, ra yaa sik-m-meng tʋʋmd n wilgd tɩ f yaa kãsenga. A Zezi yeelame: “Ned ninga fãa sẽn dat n yɩ yãmb nin-kãsenga, bɩ a yɩ yãmb [sõgne]. La ned ninga fãa sẽn dat n yɩ yãmb kãsma bɩ yẽ yɩ yãmb yamba.”—Matɩe 20:26, 27.
8. Yɩ sõgen dat n yeelame tɩ bõe, la sogs-bʋs la d tõe n sok d mense?
8 Gɛrk gom-biig ning b sẽn lebg tɩ sõgnã Biiblã pʋgẽ wã tɩ loee ne ned sẽn modgd wakat fãa n na n tʋm neb a taabã nafr yĩnga. A Zezi ra zãmsda a karen-biisã bũmb sẽn tar yõod wʋsgo: Kõ neb a taabã noy tɩ b tʋm tʋʋm pa kɩtd tɩ ned yɩ nin-kãseng ye. Yaa yɩ neb a taabã sõgen nonglem yĩng n wilgd tɩ f yaa nin-kãsengã. Sok-y y meng woto: ‘Mam manesem da na n yɩɩ wãn to, m sã n da beẽ-la a Zak la a Zã zĩigẽ? M da na n bãngame tɩ yɩ nin-kãseng meng-meng yaa m sẽn na n yɩ neb a taabã sõgen nonglem yĩng bɩ?’—1 Korẽnt dãmba 13:3.
9. Mak-sõng bʋg la a Zezi kõ a yel-manesmã ne neb a taabã pʋgẽ?
9 A Zezi wilga a karen-biisã tɩ dũniyã tagsg yɩ nin-kãsengã wɛɛngẽ pa yembr ne yẽ sẽn tagsg to-to wã ye. A zɩ n tall manesem sẽn wilgd t’a yɩɩda neb nins a sẽn da sõngdã, bɩ n kɩtdẽ tɩ b tagsdẽ tɩ b pa ta-a ye. Neb buud fãa, rapa, pagb ne kamba, arzɛgs rãmba, naong rãmba, neb sẽn tar naam la neb nebã fãa sẽn mi tɩ b yaa yel-wẽn-maandb ra nonga a zĩigẽ. (Mark 10:13-16; Luk 7:37-50) Nebã pa nong n tar sũ-mar ne neb nins sẽn tar pãn-komsmã ye. A Zezi yẽ ra yaa toore. Baa ne a karen-biisã sẽn mi n pa tagsdẽ tɩ bɩ la b zabd taab wakat ningã, a zãms-b-la ne sũ-mare, n wilg-b t’a sɩd ra tara sik-m-meng la sũ-bʋgsem.—Zakari 9:9; Matɩe 11:29; Luk 22:24-27.
10. Wãn to la a Zezi vɩɩmã tõr wilgd t’a yɩɩ neb a taabã sõgen nonglem yĩnga?
10 Mak-sõng ning Wẽnnaam Biribl kãsengã sẽn kõ to nonglmã wɛɛngẽ wã wilgda yɩ nin-kãsengã sẽn sɩd rat n yɛɛlga. A Zezi pa wa tẽngã zug sẽn na yɩl tɩ neba yɩ a sõgen dãmb ye, la yaa sẽn na yɩl n yɩ neb a taabã sõgna, n sãoog b bãas buud toor-toorã la a rig b zĩn dãmbã n yiisi. Ba a Zezi sã n da ya n dat n vʋʋse, wakat fãa, a rɩkda neb a taabã raab n lʋɩɩs taoore, n modgd n kõt-b belsgo. (Mark 1:32-34; 6:30-34; Zã 11:11, 17, 33) A nonglmã yĩng ra kɩtame t’a sõngd nebã tẽebã wɛɛngẽ, n togd soay kɩlometa kobs so-bugsã zut n moond Rĩungã koe-noogo. (Mark 1:38, 39) Sãmbg sẽn ka be, a Zezi gesame tɩ yɩ neb a taabã sõgna tara yõod wʋsgo.
D rɩk Kirist sik-m-mengã togs-n-taare
11. Zʋg-bʋs la b baood tɩ saam-biis nins b sẽn yãk tɩ b yɩ yel-gɛtb tigingã pʋgẽ wã talle?
11 Yʋʋm kob-gĩnd 19 soabã baasgẽ, Sosiete wã sẽn wa n yãk neb tɩ b yɩ so-toak yel-gɛtb n ges Wẽnnaam nin-buiidã ratem yellã b wilga yam ning kiris-neb yel-gɛtbã sẽn da segd n tallã vẽenega. Yʋʋmd 1894, bõn-bɩʋʋng kiuugã 1 daar Gũusg Gasgã (ne ãngilind) pʋgẽ, b wilgame tɩ b ra baooda rap “sẽn yaa sũ-bʋgsem dãmba, sẽn pa tar wuk-m-menga . . . , sẽn tar sik-m-meng n baood n na n moon Kirist la pa bãmb mens pẽgre, sẽn pa neb sẽn na n wilg b mens bãngre, la yaa b wilg Wẽnnaam Gomdã võor sẽn yaa nana n yaool n tar pãngã.” Vẽenega, kiris-neb hakɩkã pa segd abada n bao taoor sobend sẽn na yɩl n pids b mens mag-bɛdã tʋlsem, bɩ sẽn na yɩl n dɩ yʋʋre, n paam naam bɩ n soog neb a taabã ye. Yel-gɛt sẽn yaa sik-m-meng soab ningda a yamẽ t’a taoor sobendã yaa “tʋʋmd sẽn yaa neere,” pa naam zĩig sẽn na n kõ yẽ mengã ziir ye. (1 Tɩmote 3:1, 2) Kãsem dãmbã la kãsemb sõngdbã fãa segd n maana b sẽn tõe tɛk n tʋm neb a taabã nafr yĩng ne sik-m-menga, la b lʋɩt taoor koe-noogã moonegẽ, n kõt neb a taabã mak-sõng b sẽn tõe n tũ.—1 Korẽnt dãmba 9:19; Galat dãmba 5:13; 2 Tɩmote 4:5.
12. Sogs-bʋs la neb nins sẽn baood zu-noog tʋʋm tigingã pʋgẽ wã segd n sok b mense?
12 Saam-biig ning fãa sẽn dat zu-noog tʋʋm segd n soka a meng woto: ‘Mam baooda soay n na n yɩ neb a taabã sõgen bɩ, bɩ m nong n datame tɩ neb a taabã yɩ mam sõgen dãmba? Mam sakdame n na n tʋʋm tɩ naf nebã, baa neb a taabã sã n pa ne rẽ bɩ?’ Wala makre, bi-bɩɩg tõe n datame n kõt sõss kiris-neb tigingã pʋgẽ, la tõe t’a pa rat n sõng sẽn kʋʋl-bã ye. Tõe t’a nonga lagem-n-taar ne tigingã taoor lʋɩtba, la a pa rat n moon koe-noogã ye. Nin-kãngã buud segd n soka a meng woto: ‘Bũmb ning sẽn pak maam n yɩɩd yaa Wẽnnaam tʋʋmdã nens nins sẽn zẽkd mam yʋʋr la sẽn wat ne pẽgr m zugã bɩ? Mam baoodame n na n dɩ yʋʋr neb a taabã taoor bɩ?’ D sã n baood d meng ziiri, yaa vẽeneg tɩ d pa rɩkd Kirist togs-n-taar ye.—Zã 5:41.
13. a) Wãn to la yel-gɛt sik-m-mengã tõe n tall pãn-tusdg neb a taabã zutu? b) Bõe yĩng tɩ b tõe n yeel tɩ sik-m-mengã baoob yaa tɩlae ne kiris-neda?
13 D sã n modgd n na n dɩk Kirist sik-m-mengã togs-n-taare, na n kɩtame tɩ d tʋll n yɩ neb a taabã sõgne. D rɩk makr ne yel-gɛt sẽn yaa tẽns kaagd sẽn da get a Zeova Kaset rãmbã tʋʋmd will a yembr tʋʋmã. Baa ne yel-gɛt kãng sẽn da tar tʋʋm wʋsg la zɩɩb wʋsgã, a yalsame n sõng saam-biig sẽn da maood n na n kɩt tɩ masĩn sẽn maand sɛb relie rãmba mars tɩ zemse. Saam-biig ning a sẽn sõngã yeelame: “Woto linga maam wʋsgo. A yeela maam t’a tʋma ne masĩn-kãngã buud a sẽn da wa n yaa bi-bɩɩg n tʋmd Betɛllẽ wã, la a tẽegame tɩ ra yaa toog wʋsg t’a kɩt t’a mars tɩ zems kɛpɩ. A tʋma masĩnã zug ne maam n kaoose, baa ne a sẽn da tar yɛl a taab wʋsg sẽn tar yõod n na n maana. A sẽn maana sɩd yɩɩ maam noogo.” Saam-bi-kãngã sẽn yaa yel-gɛt masã a Zeova Kaset rãmbã tʋʋmd willẽ wã ket n tẽra sik-m-meng manesem kãngã. Bɩ d ra tol n tags tɩ d tara ziir wʋsg ne d na sak n tʋm sik-m-meng tʋʋma, bɩ tɩ d yaa kãseng wʋsg ne d na sak n tʋm tʋʋmd ning ye. D segd n talla ‘sik-m-menga.’ Rẽ yaa tɩlae ne-do, la yaa bũmb sẽn be ‘nin-paalgã’ kiris-ned sẽn segd n yeelg wa fuugã pʋgẽ.—Filip rãmba 2:3; Kolos rãmba 3:10, 12; Rom dãmba 12:16.
D sẽn tõe n tall Kirist tagsg yɩ nin-kãsengã wɛɛngẽ to-to
14. Wãn to la d sẽn na n tags d zems-n-taarã ne Wẽnnaam la d taabã zug sõngd tõnd tɩ d tall tagsg sẽn zems yɩ nin-kãsengã wɛɛngẽ?
14 Wãn to la d tõe n tall tagsg sẽn zems yɩ nin-kãsengã wɛɛngẽ? Manesem a yembr yaa d sẽn na n bʋgs d zems-n-taarã ne Wẽnnaam a Zeova zugu. A ziirã, a pãngã la a yamã zẽk-a lame t’a yɩɩd ninsaalbã sẽn ka pãngã zĩig sẽn zãre. (Ezai 40:22) D sã n bʋgs tõnd zems-n-taarã ne d taabã zugu, sõngda tõnd me tɩ d tall bɩɩs sik-m-menga. Wala makre, tõe tɩ d yɩɩda neb a taabã zĩis kẽer pʋsẽ, la b tõe n maandame tɩ yaa sõma n yɩɩd tõnd wʋsg vɩɩmã nens kẽer sẽn tar yõod n yɩɩdã pʋsẽ, bɩ tõnd kiris-nin-taasã tõe n talla zʋg sõma kẽer tõnd sẽn pa tare. Sɩda, neb nins sẽn tar sũ-bʋgsem la sik-m-mengã tara yõod wʋsg Wẽnnaam nifẽ, la naoor wʋsgo neba pa ne-b ye.—Yelbũna 3:34; Zak 4:6.
15. Wãn to la Wẽnnaam nin-buiidã burkĩnd wilgd tɩ ned ba a yembr pa segd n tags t’a yɩɩda a taabã?
15 A Zeova Kaset rãmbã sẽn paam makr b tẽebã yĩngã wilgda yel-kãngã vẽenega. Naoor wʋsgo, yaa neb nins dũniyã sẽn get wala nin-zaalsã n tall b burkĩndã Wẽnnaam taoor mak-toosã pʋsẽ. D sã n tags mak-kãensã zutu, tõe n sõng-d lame tɩ d kell n yɩ sik-m-mens rãmba, la kɩt tɩ d ra ‘tags tɩ d yaa sõma n yɩɩd sẽn zems ye.’—Rom dãmba 12:3. *
16. Wãn to la nebã fãa sẽn be tigingã pʋgẽ wã tõe n dɩk a Zezi togs-n-taare, yɩ nin-kãsengã wɛɛngẽ?
16 Kiris-nebã fãa, kom-bɩɩsã la kãsembã segd n bao n talla Kirist tagsg yɩ nin-kãsengã wɛɛngẽ. Tigingã pʋgẽ, tʋʋm toɛy-toɛy la b segd n maane. Ra tol-y n sãam y sũuri, b sã n yeel yãmb tɩ y tʋm sik-m-meng tʋʋm ye. (1 Sãmwɛll 25:41; 2 Rĩm dãmba 3:11) Roagdba, b sã n kõ yãmb kambã tʋʋmd buud fãa Rĩungã Roogẽ bɩ tigis-kãsengã zĩigẽ, rẽ yĩnga yãmb sagend-b lame tɩ b tʋm tʋʋmdã ne yamleoog bɩ? Yãmb kambã yãta yãmb menga sẽn tʋmd sik-m-meng tʋʋm bɩ? Saam-biig a yembr sẽn tʋmd a Zeova Kaset rãmbã dũni gill tʋʋmd biru yẽgrẽ wã tẽra a roagdbã mak-sõngã yell sõma. A yeelame: “B sẽn tall manesem ning ne Rĩungã Roog la tigis-kãsengã zĩig yɩlemd yell gesgã wilga maam tɩ b ra geta rẽ wa bũmb sẽn tar yõodo. Naoor wʋsgo, b sakame n tʋm tʋʋm sẽn yaa tigingã bɩ saam-biisã nafr yĩnga, baa tʋʋm-kãens sẽn da wõnd tʋʋm-zaals to-to fãa. Manesem kãng sõnga maam tɩ m sak tʋʋmd ning fãa b sẽn kõ maam Betɛllẽ wã ne yamleoogo.”
17. Wãn to la pagb nins sẽn tar sik-m-mengã tõe n yɩ bark n kõ tigingã?
17 Sã n yaa ne rɩk neb a taabã raab n ning taoorã wɛɛngẽ, a Ɛstɛɛr kõo tõnd mak-sõngo. A wa n lebga rĩm poak Pɛrs soolmẽ wã yʋʋm kob-gĩnd a nu soab sẽn deng Kirist zãmaanã. Baa ne a sẽn da vɩ na-zakẽ wã, a ra sakame n gẽneg a yõor Wẽnnaam nin-buiidã yĩnga, tɩ woto ra zems ne Wẽnnaam daabã. (Ɛstɛɛr 1:5, 6; 4:14-16) Baa ne kiris-nin-pogsã paoong sẽn yaa to-to rũndã-rũndã, b tõe n talla a Ɛstɛɛr tagsgã buud n keng yam-ka-m-meng rãmbã raoodo, n kaag bãad dãmbã, n moon koe-noogã la b sak kãsem dãmbã sor-wilgri. Ad pʋg-kãensã sẽn yaa sik-m-mens rãmbã sɩd yaa bark n kõ tigingã!
Tall Kirist tagsg yɩ nin-kãsengã wɛɛngẽ sẽn wat ne bark ninsi
18. Nafa bʋs la d paamda, d sã n dɩkd Kirist togs-n-taar yɩ nin-kãsengã wɛɛngẽ?
18 Y tõe n paama nafa wʋsgo, y sã n kell n tall Kirist tagsg yɩ nin-kãsengã wɛɛngẽ. D sã n tʋmd neb a taabã neer yĩng ne nonglem, kõta bãmb ne tõnd me sũ-noogo. (Tʋʋma 20:35) Y sã n tʋmd wʋsg y saam-biisã neer yĩng ne yamleoogo, y tallda yõod b nifẽ. (Tʋʋma 20:37) Sẽn tar yõod n yɩɩda, a Zeova geta bũmb ning yãmb sẽn maand n na n paas y kiris-nin-taasã neerã wa maoong sẽn pẽgd-a la sẽn noogd a sũuri.—Filip rãmba 2:17.
19. Tõnd segd n bao n maana bõe ne d sũur fãa, sã n yaa ne tags wala Kirist yɩ nin-kãsengã wɛɛngẽ?
19 Tõnd ned kam fãa segd n feesa a sũur n sok a meng woto: ‘Yaa ne m no-goam bal la m na n yeel tɩ d segd n talla Kirist tagsg yɩ nin-kãsengã wɛɛngẽ, bɩ m na n sɩd modgame n tũ no-kãngã?’ A Zeova sẽn tagsd to-to ne wuk-m-mens rãmbã yaa vẽenega. (Yelbũna 16:5; 1 Pɩɛɛr 5:5) Bɩ tõnd tʋʋmã wilg tɩ d nong n tagsda wa Kirist, yɩ nin-kãsengã wɛɛngẽ wã, yaa kiris-neb tigingã pʋgẽ tɩ yaa d zakã pʋgẽ, bɩ yaa tõnd daar fãa yel-manesmã pʋgẽ ne d taabã. D maan bũmb fãa Wẽnnaam ziir la a pẽgr yĩnga.—1 Korẽnt dãmba 10:31.
[Tẽngr not rãmbã]
^ sull 5 Ges-y Gũusg Gasgã, 1982, sa-sika, 1, seb-neng a 3-6, “J’ai voulu réussir.”
^ sull 15 Wala makre, ges-y Annuaire des Témoins de Jéhovah 1992, seb-neng 181-2 la Gũusg Gasgã, 1993, bõn-bɩʋʋngo, 1, ne farende, seb-neng 27-31.
Y tõe n wilga a võor bɩ?
• Bõe yĩng tɩ d pa segd n tags wa dũniyã nebã yɩ nin-kãsengã wɛɛngẽ?
• Bõe la a Zezi tikd n yeel tɩ ned yaa nin-kãsenga?
• Wãn to la yel-gɛtbã tõe n dɩk Kirist sik-m-mengã togs-n-taare?
• Bõe n tõe n sõng tõnd tɩ d tags wa Kirist yɩ nin-kãsengã wɛɛngẽ?
[Zãmsgã sogsgã]
[Zĩ-gũbri, seb-neng 27]
Ne Kiristã, ãnd la nin-kãsenga?
Ned sẽn dat tɩ b yɩ a sõgen bɩ, bɩ ned sẽn dat n yɩ a taab sõgne?
Ned sẽn nong pẽgr zĩig bɩ, bɩ ned sẽn sakd n tʋmd sik-m-meng tʋʋma?
Ned sẽn nong n zẽkd a meng bɩ, bɩ ned sẽn zẽkd a taabã?
[Foto, seb-neng 24]
A Faraõ Amenhotep a 3 soab naande
[Foto, seb-neng 25]
Yãmb mii bũmb ning sẽn wã a Hamannã bɩ?
[Foto rãmba, seb-neng 26]
Yãmb baooda soay n na n yɩ neb a taabã sõgen bɩ?