Wẽnnaam Rĩungã sɩd rɩta naam rũndã-rũndã

“Wãn-wãn la tẽns ka tɛk neb sẽn tar dog-n-migs toɛy-toɛya, tɩ b yidgr pa a ye tõe n zĩnd ne taab zems-n-taar pʋgẽ? B yeelame tɩ yaa bũmb sẽn yit saasẽ bal n na n wa modg tẽngã neb tɩ b tõog n zems taaba.”—The Age sẽn yaa Ostrali zʋrnallã.

BŨMB sẽn yit saasẽ n na n sɩd wa bɩ? Baa d wa n pa mi rẽ sã n na n sɩd lagma tẽnsã neb ne taab me, Biiblã bãngr-goam gomda gudgr sẽn wat yelle, sẽn na n kɩt tɩ dũniyã tẽns naag taaba. Yel-kãng sɩd na n waame la a pa na n tũ ne pãens sẽn be dũniyã zug ka ye.

Tẽn-kʋdem wẽndẽ Israɛll rĩm a Davɩɩd ra goma rũndã dũniyã yell bãngr-gomd pʋgẽ. Wẽnnaam da vẽneg-a lame t’a gʋlse: “Dũniyã rĩm dãmba zẽkda b mense la nanambs yẽsda ne taaba n kɩɩsd [a Zeova] la bãmb nin-tũusdgã n yetẽ: ‘Bɩ d kao bãmb balgrã n fãag d mens ne bãmb bãensã.’ ” (Yɩɩl Sõamyã 2:2, 3; Tʋʋma 4:25, 26) Ges-y tɩ b yeelame tɩ dũniyã rĩm dãmb na n wa yẽsa ne taab n kɩɩs a Zeova sẽn yaa ãndũniyã Naandã, la a nin-tũusdgã bɩ Rĩm a sẽn yãkã, sẽn ya a Zezi Kiristã. Wãn-wãn la bõn-kãng na n maane?

Sẽn zems ne Biiblã sẽn magd wakatã to-to wã la ne bãngr-goamã sẽn paam pidsgã, b lugla Wẽnnaam Rĩungã saasẽ yʋʋmd 1914 t’a Zezi Kirist ya a Rĩmã. * Wakat kãnga,  dũniyã soolem toɛy-toɛyã zemsa taab noor a yembre. Wall tɩ b sak Wẽnnaam Rĩungã sẽn nan lugl paalmã naamã, b yika zabr naamã poorẽ tɩ rẽ yɩ zab-kãsengã bɩ dũni gill pipi zabrã.

Bõe la Wẽnnaam a Zeova tagsd ninsaalbã nanambs manesem kãngã zugu? ‘Sẽn zĩ-a saasẽ wã laadame, Zusoaba laada bãmba. [Wakat kãnga] a na n goma ne bãmb ne sũ-puugri. A sũ-yikra na n kẽesa bãmb dabeem.’ Dẽ a Zeova na n yeela a Biriblã sẽn yaa Rĩungã Rĩmã yaa: “Kos maam, la mam na kõ foom dũniyã soolem fãa tɩ f sooge. La fo soolem na n taa dũniyã tɛk fãa. Fo na n sãama bãmb ne kut dasaare. Fo na n wãa bãmb wa yagd rʋko.”—Yɩɩl Sõamyã 2:4, 5, 8, 9.

Yaa Armagedõ la b na n wa baas n sãam tẽnsã sẽn yaa kɩɩsdbã ne kut dasaare. Wilgr sebrã sẽn yaa Biiblã yaoolem sebrã boonda yel-kãngã sẽn na n tall rabeem wʋsgã tɩ “Wẽnnaam Sẽn-tõe-fãa daar kãsenga zabre,” la a yetẽ tɩ “dũniyã tɛk fãa nanambs” tigimda taab ra-kãng yĩnga. (Wilgri 16:14, 16) Zĩn dãmbã na n tusa dũniyã nanambs tɩ b wa baas n naag taab bõn-datl a yembr yĩnga. Yaa sẽn na n zab ne Wẽnnaam sẽn-tõe-fãa wã.

Wakat ning ninsaalbã sẽn na n tigim taab n zab ne Wẽnnaam naam sẽn-ka-to wã kolgda tao-tao. La b sẽn ‘tigimd taabã’ pa na n naf bãmb mensã ye. B na n deng n tigma taab woto, tɩ ninsaalbã sẽn da sɩng n gũud laafɩ ning hal daar sẽn zãra yaool n wa. Wãn-wãn la rẽ na n pidsi? Baasg zab-kãngã pʋgẽ Wẽnnaam Rĩungã “na n wãa [dũniyã soolem toɛy-toɛyã] fãa tɩ b menem n bas-a t’a yaas wakat fãa.” (Daniɛll 2:44) Yaa Wẽnnaam Rĩungã bal n na n yɩ goosneem ning sẽn na n kõ ãdem-biisã fãa kɛpɩ laafɩ ning b sẽn baoodã, pa ninsaalb siglg ba a yembr n na n wa ne laafɩ kãng ye.

Wẽnnaam Rĩungã sẽn yaa goosneemã wã Yel-gɛt kãsenga

Yaa Wẽnnaam Rĩungã la pʋ-peelem dãmb wʋsg sẽn da sɩng n pʋʋsd ne b sũy fãa tɩ wa, n yetẽ tɩ “yãmb soolem wa, tɩ yãmb daab maan dũniyã zug wa a sẽn maand [saasẽ] wã.” (Matɩe 6:10) Wẽnnaam Rĩungã pa bũmb sẽn be f sũur pʋgẽ bal ye, a yaa goosneem sɩd-sɩd sẽn zoe n pids tʋʋm-kãsems hal a luglgã tɛk saasẽ yʋʋmd 1914. D ges yel-kãsems sẽn wilgd tɩ Wẽnnaam Rĩungã sɩd rɩta naam rũndã-rũndã.

Pipi, a tara nanambs sull sẽn tar tõog la minim t’a Zezi Kirist sẽn yaa Rĩmã yaa b taoor soaba. Yʋʋmd 33 wã, Wẽnnaam a Zeova kɩtame t’a Zezi Kirist lebg kiris-neb tigingã taoor soaba. (Efɛɛz rãmba 1:22) Wakat kãng tɛka, a Zezi pidsda a taoor sobendã, n wilgdẽ t’a sɩd tara tõog n na n yɩ yel-gɛta. Wala makre, kom kãsengã sẽn da wa n kẽ Zide soolmã pʋgẽ pipi yʋʋm kob-gĩndẽ wã, kiris-neb tigingã yika zĩig pʋgẽ n maan bũmb n sõng tigingã neba. B sigla sõngr n tʋm a Barnabas ne a Soll tɩ b yi Ãntios n na n tɩ kɩs kũunã.—Tʋʋma 11:27-30.

Rĩungã sẽn luglg n sɩng naam dɩɩb masã wã, d tõe n gũume t’a Zezi Kirist maan sẽn yɩɩd woto menga. Wakat buud fãa, yel-beed wala tẽn-digimdgu, kom, sa-kãsems  sẽn ni tɩ koom deeg zĩisi, seb-bɛd wall tãng sã n pusgi, a Zeova Kaset rãmba tigims neb yɩta tao-tao n tɩ sõng tẽed-n-taasã la neb a taabã sẽn be zĩis nins yel-beedã sẽn maanã. Wala makre, Salvadoor tẽngã sẽn digimd yʋʋmd 2001 yʋʋm-vẽkr la wao-fugd kiisã pʋsẽ tɩ sãoongã yɩ kãsengã, tẽngã zĩis fãa b sigla sõngre, t’a Zeova Kaset rãmb sẽn yit Kanada, Guatemala la Etazĩni wa ne sõngre. B balengã zĩis a tãab la sẽn yɩɩd zags 500 la b lebs n me wakat bilf pʋgẽ bala.

Wẽnnaam Rĩungã sẽn yaa goosneemã tẽng zug nin-buiidu

B sẽn lugl Wẽnnaam saasẽ Rĩungã yʋʋmd 1914 tɛkã, a sɩnga a tẽng zug nin-buiidã tiging la b siglg dũniyã gill zugu. Yãoã yaa bãngr-gom-kãseng ning a Ezai sẽn da reng n gʋlsa pidsgu. A ra gʋlsame: ‘Daar n wat t’a Zeova roogã tãnga [a baleng hakɩkã sẽn tar ziirã] na n yẽbge, t’a zãntlem yɩɩg tãensa fãa la kunkuba fãa. Ninsaalb buud fãa na n kẽnga be.’ Bãngr-gomdã wilgame tɩ “neb wʋsg” na n kẽnga tãng-kãng zug n tɩ sak a Zeova zãmsgã la a noyã.—Ezai 2:2, 3.

Tigsg tʋʋm-kãngã kɩtame tɩ ninsaalb siglg sẽn yaa kãseng n yɩɩd puk tõnd wakatã. Siglg kãng yaa saam-biis sẽn yaa kiris-neba, tɩ b sõorã yɩɩd 6 000 000 n yit sẽn yɩɩd tẽns 230 pʋsẽ. A Zeova Kaset rãmba tigis-kãsems nins sẽn tigimd tẽns wʋsg nebã, naoor wʋsgo, neb nins sẽn wat n getẽ wã sã n yã nonglem, bãan la lagem-n-taar ning sẽn be kʋʋngã neb ne taab sʋka, tɩ b ned kam fãa buudu, a rog-m-mik bɩ a buud gomd pa gɩdgd lagem-n-ta-kãnga wã, yaa lingr wʋsg ne-bã. (Tʋʋma 10:34, 35) Rẽ yĩnga y pa na n sak n deeg tɩ goosneemã sã n tõog tɩ buud kobs neb naag taab bãan la zems-n-taar pʋgẽ woto, goosneem kãng segd n yaa goosneem sõng sẽn lugl kãn-kãe la sẽn sɩd n be sɩda?

Wẽnnaam Rĩungã, la zãmsgã

Goosneemã fãa tara a noy a nin-buiidã sẽn segd n tũ, tɩ ned ning fãa sẽn dat n yɩ goosneem kãng soolmã ned segd n tũ no-kãense. Woto me, Wẽnnaam Rĩungã tara a noyã, tɩ neb nins fãa sẽn na n yɩ a nin-buiid tẽngã zugã tog n tũ. La sẽn na yɩl tɩ neb kʋʋng woto sẽn yit zĩis toɛy-toɛy tõog n sak la b tũ noy bɩ laloa a yembre, sɩd yaa tʋʋm-toog menga. Dẽnd bũmb a to me sẽn wilgd tɩ Wẽnnaam Rĩungã yaa goosneema sẽn sɩd be, ya a sẽn tar zãmsg na-kẽndr n zãmsd nebã tɩ toeemd b yamã la b sũyã.

Wãn-wãn la Rĩungã sẽn yaa goosneemã pidsd tʋʋm kãngã sẽn yaa kãseng wʋsgã? B rɩka a Zezi tʋm-tʋmdbã naoor n moond zak-zak la b zãmsd nebã yembr-yembr Wẽnnaam Gomdã. (Tʋʋma 5:42; 20:20) Hal sẽn ta zĩ-bʋg la zãms-kãngã womd biisi? A Jacques Johnson sẽn yaa prɛtr katolikã gʋlsa Kanada zʋrnall a ye sẽn yit semen fãa pʋgẽ, n wilg yẽ sẽn mao to-to n na n gɩdg pag a  yembr t’a ra zãms Biiblã ne a Zeova Kaset rãmbã ye. A yeelame: “Mam da bee yam-yuusg pʋgẽ, la m wa n bãngame tɩ m pa na n tõog n gɩdg pagã ye. Sẽn wa n zems kiis a wãna, mam mikame tɩ pʋg-kãensã sẽn ya a Zeova Kaset rãmbã yõga zood sẽn tar pãng ne pagã sẽn da pa yit yɩngã. B sẽn sõngd-a la b rɩkd-a wa b zoa wã, a wa n lebga b zoa meng-menga. Pa yã n kaoos la a lebg b tũudmã neda, la mam da pa tõe n maan baa fʋɩ n gɩdg rẽ ye.” Wala Biiblã koɛɛg a Zeova Kaset rãmbã sẽn zãmsd nebã la b manesmã sẽn tõog n toeem pʋg-kãngã sẽn da yaa katolikã, dũniyã gill zugu, b toeemda neb milyõ rãmb sũy woto.

Zãms-kãngã buudã sẽn yaa Rĩungã zãmsgã yẽbga Biiblã la a vɩɩm manesmã noy zugu. A zãmsda nebã baa b sẽn yitẽ fãa tɩ b nong taab la b waoogd taaba. (Zã 13:34, 35) A leb n sõngda nebã tɩ b sakd sagl-kãngã: “Bɩ y ra yɩ wa dũniyã rãmb ye, bɩ y bas tɩ Wẽnnaam tek yãmb yama n maneg-y zãnga tɩ y bãng Wẽnnaam daab sẽn yaa sõama, la sẽn tat bãmb yam, la sẽn zems zãnga.” (Rom dãmba 12:2) Neb milyõ rãmb sẽn bas b pĩnd vɩɩm manesmã la b sakd Wẽnnaam Rĩungã laloa la a noy ne sũ-noogã yĩnga, b paama bãan la sũ-noog masã, la b tar beoog-daar saagr sẽn be yamleoogo.—Kolos rãmba 3:9-11.

Bõn-kãseng ning sẽn sõngd tõnd tɩ paamd zems-n-ta-kãngã dũniyã gill zug yaa Gũusg Gasgã. B sigla sɛb lebgr tʋʋmd ne masĩn dãmb b sẽn tõe n tall n lebg sɛbã ne buud goam toɛy-toɛya. Ne rẽ maasem, b yiisda Gũusg Gasgã sõs-kãsemsã buud goam 135 pʋgẽ wakat yɛnga, t’a karemdbã neb 95 koabg zug tõe n zãms sõs-kãens ne b mensã buud gomd wakat yɛng dũniyã gill zugu.

Tũudum ning neb b sẽn boond tɩ Mormon rãmbã seb-gʋlsd a ye sõdga tũudmã sɛb nins sẽn womd bi-sõma n tɩ yɩɩda, yẽ tũudmã sɛb sẽn yãk b toogo. A sõdga Gũusg Gasgã la Réveillez- vous ! wã a Zeova Kaset rãmbã sẽn yiisdã wa sɛb nins sẽn moond koe-noogã hal sõma n yɩɩdã, la a yeele: “Ned ba a ye pa tõe n yeel tɩ Gũusg Gasgã la Réveillez-vous ! wã yaa sɛb sẽn kɩtd tɩ nebã maagd tẽebã wɛɛngẽ ye. Sẽn yaa lebend ne rẽ, seb-kãensã sagenda nebã tɩ b yɩ gũusdb tẽebã wɛɛngẽ, la mam nan zɩ n yã rẽ tũudum a taabã sɛb pʋsẽ ye. Gũusg Gasgã la Réveillez-vous ! wã kɩbay kengda raoodo, b tika yɛl sẽn sɩd zĩnd zutu, n yaa sɩd la takɩ.”

Kaset wʋsg n sɩd be n wilgdẽ tɩ Wẽnnaam Rĩungã sɩd beeme n tʋmdẽ. A Zeova Kaset rãmbã taasda ‘Rĩungã koe-noog kãngã’ neb a taabã ne sũ-noog la ne b pãng fãa, n boond-b tɩ b wa yɩ Rĩungã tẽng zug soolmã neba. (Matɩe 24:14) Rẽ yĩnga y pa nong n paam saag-kãngã sɩda? Y tõe n paama bark nins lagem-n-taar maaneg ne neb nins sẽn zãmsd la b modgd n tũud Rĩungã noy sẽn kõtã. Sẽn yɩɩd fãa, y tõe n wa paam n vɩɩmda Rĩungã naam sasa, dũni paalg ning ‘tɩrlem sẽn na n zĩnd a pʋgẽ’ wã waoong b sẽn kãabã pʋgẽ.—2 Pɩɛɛr 3:13.

[Tẽngr note]

[Foto, seb-neng a 4, 5]

Yʋʋmd 1914 pʋgẽ wã, tẽnsã yika zabr dũniyã gill zugu

[Foto rãmba, seb-neng a 6]

Sõngrã b sẽn maand ne yamleoogã wilgdame tɩ kiris-neb nonglmã pukda ne tʋʋmã

[Foto, seb-neng a 7]

A Zeova Kaset rãmbã paamda zãmsg a yembr dũniyã gill zugu